Breaking News

అసెంబ్లీ ఎన్నికలు వచ్చాయంటే చాలు టికెట్ల పంచాయితీ మొదలవుతుంది. ప్రతి పార్టీలోనూ టికెట్ తమ కంటే తమకు కావాలని నేతలు పోటీ పడుతుంటారు. అధినేతను ప్రసన్నం చేసుకునేందుకు అష్టకష్టాలు పడుతారు. ఇంకొందరైతే… ఇదంతా కాదు గానీ ఓ పది కోట్లు పోయినా పర్వాలేదు గానీ టికెటు మాత్రం మాకే రావాలని ప్రయత్నాలు చేస్తారు.

అలాంటి ఓ వ్యాపారి ఆశను ఆసరాగా చేసుకున్న ఓ టీవీ మాజీ యాంకర్ ఒకరు అతని నుంచి కోట్లు దండుకున్నారు. బీజేపీ నుంచి ఎమ్మెల్యే టికెట్ ఇప్పిస్తానంటూ ఆశ జూపి రూ. 5 కోట్లు దండుకున్నారు. తీరా మోసపోయానని తెలుసుకున్న ఆ వ్యాపారి పోటీసులను ఆశ్రయించాడు. దీంతో పోలీసులు ఆ మాజీ యాంకర్ ను అరెస్టు చేశారు. పోలీసుల వివరాల ప్రకారం….

టీవీ మాజీ యాంకర్ చైత్ర కుందపురా తన ప్రసంగాలతో కర్ణాటకలో చాలా ఫేమస్ అయ్యారు. ఆ తర్వాత భజరంగ్ దళ్, వీహెచ్ పీ లాంటి హిందుత్వ సంస్థ సభల్లో వక్తగా ప్రసంగిస్తూ ఉండే వారు. ఏబీవీపీతో కూడా గతంలో ఆమెకు సంబంధాలు వున్నాయి. ఇది ఇలా వుంటే గోవింద బాబు పూజారి అనే వ్యాపార వేత్త ఇటీవల జరిగిన ఎన్నికల్లో ఉడిపి జిల్లా బైందూరు నియోజక వర్గం నుంచి పోటీ చేయాలని అనుకున్నారు.

టికెట్ కోసం పలు పార్టీలతో సంప్రదింపులు మొదలు పెట్టారు. ఈ క్రమంలో విషయం తెలుసుకున్న చైత్ర తన బృందంతో కలిసి ఆ వ్యాపారిని కలుసుకున్నారు. బైందూరులో బీజేపీ నుంచి టికెట్ ఇప్పిస్తామంటూ ఆయన దగ్గర గతేడాది జూలై నుంచి ఈ ఏడాది మే వరకు పలు దఫాల్లో డబ్బులు వసూలు చేశారు. ఈ క్రమంలో చైత్ర బృందంపై వ్యాపారికి అనుమానం పెరిగింది.

ఈ నేపథ్యంలో డబ్బుల గురించి చైత్రను ఆ వ్యాపారి ప్రశ్నించారు. దీంతో ఆ డబ్బులు అన్నీ విశ్వనాథ్ అనే ఆర్ఎస్ఎస్ నేత దగ్గర ఉన్నట్టు చైత్ర బదులు ఇచ్చింది. ఆ తర్వాత రమేశ్ అనే మరో వ్యక్తిని ఆర్ఎస్ఎస్ నేత విశ్వనాథ్ గా ఆ వ్యాపారికి పరిచయం చేశారు. అనుమానం పెరగడంతో తన డబ్బులు తనకు ఇవ్వాలని ఒత్తిడి చేయడంతో ఆ వ్యాపారిని బెదిరింపులకు గురిచేశారు. దీంతో పోలీసులకు వ్యాపారి ఫిర్యాదు చేశారు.

స్వామీజి అభినవ హల శ్రీకి డబ్బులు ఇవ్వాలని విశ్వనాథ్ చెప్పారని అనడంతో ఆ సాధువుకు తాను రూ. 1.5 కోట్లు ఇచ్చినట్టు ఆ వ్యాపారి ఫిర్యాదులో పేర్కొన్నారు. దీంతో పాటు నిందితులకు రూ. 3.5 కోట్లను అందజేసినట్టు తెలిపారు. కేసు నమోదు చేసిన పోలీసులు చైత్రతో పాటు మరో ముగ్గురిని అరెస్టు చేశారు.

సనాతన ధర్మంపై తమిళనాడు మంత్రి, సీఎం స్టాలిన్ తనయుడు ఉదయనిధి స్టాలిన్ (Udayanidhi Stalin) ఈమధ్య తీవ్ర వ్యాఖ్యలు చేశారు. దీనిపై హిందూ సంఘాలు, బీజేపీ నేతలు ఆగ్రహం వ్యక్తం చేశారు. కొన్నిచోట్ల ఉదయనిధిపై కేసులు కూడా నమోదయ్యాయి. అయితే.. తాను తప్పేం మాట్లాడలేదని ఏం చేసుకుంటారో చేసుకోండని అదే స్థాయిలో ఆయన కౌంటర్ ఇచ్చారు. ఈ వివాదం కొనసాగుతుండగానే.. ఇతర డీఎంకే నేతలు కూడా ఉదయనిధికి వంత పాడారు. ఈ నేపథ్యంలో బీజేపీ రాష్ట్ర అధ్యక్షుడు అన్నామలై (Annamalai).. డీఎంకే నేతలపై విరుచుకుపడ్డారు.

ట్విట్టర్(ఎక్స్)లో ఓ పోస్ట్ పెట్టిన అన్నామలై.. ఉదయనిధితోపాటు పీకే శేఖర్ బాబు (PK Shekar Babu)పై సెటైర్లు వేశారు. సనాతన ధర్మం హిందూయిజం ఒక్కటి కాదంటూ వారు చేస్తున్న వ్యాఖ్యలను ఖండిస్తూ.. 12వ తరగతి పుస్తకంలోని పాఠానికి సంబంధించి ఫోటోలను పోస్ట్ చేశారు.

అన్నామలై ట్వీట్

‘‘తిరు ఉదయనిధి స్టాలిన్, తిరు శేఖర్ బాబు సనాతన ధర్మాన్ని నిర్మూలించాలని పిలుపునిచ్చారు. ఆ తర్వాత అన్ని వైపుల నుంచి వస్తున్న ఖండనలు, విమర్శలతో హిందూయిజం, సనాతన ధర్మం వేర్వేరు అని చెబుతున్నారు. తమిళనాడు ప్రభుత్వం రూపొందించిన 12వ తరగతి పుస్తకంలో సనాతన ధర్మం, హిందూయిజం ఒక్కటే అని ఉంది. సనాతన ధర్మం అనేది శాశ్వతమైన ధర్మమని పేర్కొన్నారు. కనుక, ఉదయనిధి స్టాలిన్, పీకే శేఖర్ బాబు 12వ తరగతిలో చేరి జ్ఞానోదయం పొందాలి’’

రాజస్థాన్‌ ముఖ్యమంత్రి అశోక్ గెహ్లాట్‌కు వ్యతిరేకంగా ఆ రాష్ట్ర మాజీ మంత్రి, కాంగ్రెస్ నేత వినూత్న రీతిలో నిరసన తెలిపారు. తాను చేస్తున్న డిమాండ్లను సీఎం పట్టించుకోవడం లేదంటూ సంగోడ్ ఎమ్మెల్యే భరత్ సింగ్ గుండు గీయించుకున్నారు. అనంతరం ఆ వెంట్రుకలతో పాటు ఓ లేఖను సీఎం గెహ్లాట్ కు పంపించారు.

సీఎం గెహ్లాట్ విశ్వాసం కోల్పోయారని ఆయన మండిపడ్డారు. అందుకే గుండు గీయించుకుని వెంట్రుకలు పంపుతున్నట్టు వెల్లడించారు. రాష్ట్ర మంత్రి ప్రమోద్ భయ చేస్తున్న అవినీతికి సీఎం బహిరంగంగా మద్దతు పలుకుతున్నారని పేర్కొన్నారు. ఖాన్ కీ జోప్రియా గ్రామాన్ని కోట జిల్లాలొ చేర్చలేదని ఆయన ఫైర్ అయ్యారు. గాంధేయ వాదిగా చెప్పుకునే గెహ్లాట్ కు ఇది సరికాదన్నారు.

పలు సమస్యలను సీఎం దృష్టికి తీసుకు వచ్చానన్నారు. సుదీర్ఘ కాలంగా వాటిని సీఎం పరిష్కరించడం లేదన్నారు. సీఎం మీద తనకు గౌరవం చనిపోయిందన్నారు. అందుకే నిరసనగా తాను గుండు గీయించుకుని ఆ వెంట్రుకలను పంపుతున్నానని లేఖలో తెలిపారు. తాను పంపుతున్న బహుమతిని తీసుకోవాలని సీఎంను కోరారు.

పాలకులపై చాలా ఒత్తిళ్లు ఉండవచ్చన్నారు. కానీ ముఖ్యమంత్రి ఎప్పుడూ గాంధీ సిద్దాంతాల గురించి మాట్లాడతారన్నారు. గాంధీ తన జీవితంలో ఎఫ్పుడూ సత్యాన్నే పలికారన్నారు. సీఎంపై గౌరవం చనిపోయిందన్నారు. మన సమాజంలో ఎవరైనా చనిపోతే వారి బంధువులు గుండు చేయించుకోవడం మన సంస్కృతిలో భాగమన్నారు. సీఎం గౌరవం చనిపోవడంతో తాను గుండు చేయించుకున్నట్టు మాజీ మంత్రి వివరించారు.