Breaking News

జమ్ము కశ్మీర్ మాజీ సీఎం ఒమర్ అబ్దుల్లా (Omar Abdullah)కు షాక్ తగిలింది. ఆయన దాఖలు చేసిన విడాకుల పిటిషన్ ను ఢిల్లీ హైకోర్టు (Delhi High Court) తోసి పుచ్చింది. భార్య నుంచి విడాకులు కోరకునేంతగా బలమైన కారణాలు ఏవీ కనిపించడం లేదని వెల్లడించింది. ఈ మేరకు పిటిషన్ పై విచారణకు జస్టిస్​ సంజీవ్ సచ్‌దేవా, జస్టిస్​ వికాస్​ మహాజన్‌తో కూడిన ద్విసభ్య ధర్మాసనం నిరాకరించింది.

ఒమర్ అబ్దుల్లా తన భార్య క్రూరత్వానికి సంబంధించి చేస్తున్న ఆరోపణలు అస్పష్టంగా ఉన్నాయని ధర్మాసనం పేర్కొంది. ఆయన ఆరోపణలు ఏమాత్రం ఆమోదయోగ్యంగా లేవని స్పష్టం చేసింది. ఈ విషయంలో ఫ్యామిలీ కోర్టు ఇచ్చిన తీర్పులో తమకు ఎలాంటి లోపాలు కూడా కనిపించడం లేదని వెల్లడించింది.

తన భార్య తనను శారీరకంగా లేదా మానసికంగా ఇబ్బందులకు గురి చేశారనే విషయాన్ని ఒమర్ అబ్దుల్లా నిరూపించుకోలేకపోయారని ధర్మాసనం తెలిపింది. అందుకే పిటిషన్ ను తిరస్కరిస్తున్నట్టు చెప్పింది. అంతకు ముందు 2016 ఆగస్టు 30న ఒమర్ అబ్దుల్లా పిటిషన్ ను ట్రయల్ కోర్టు కొట్టి వేసింది. దీంతో ట్రయల్ కోర్టు తీర్పును ఢిల్లీ హైకోర్టులో ఒమర్ అబ్దుల్లా సవాల్ చేశారు.

ఇది ఇలా వుంటే నిన్న ఆర్టికల్ 370 రద్దును సుప్రీం కోర్టు సమర్థించడం, ఈ రోజు విడాకుల పిటిషన్ ను ఢిల్లీ కోర్టు తిరస్కరించడం వంటి పరిణామాలతో ప్రస్తుతం ఆయన కలత చెందారు. ఈ క్రమంలో ఆయన కీలక నిర్ణయం తీసుకున్నారు. కొన్నివారాల పాటు తాను ఎవరికీ అందుబాటులో ఉండనని ఒమర్ అబ్దుల్లా తెలిపారు.

కేంద్ర హోం మంత్రి అమిత్ షా (Amit Shah)పై కాంగ్రెస్ (Congress) అగ్రనేత రాహుల్ గాంధీ (Rahul Gandhi) తీవ్ర స్థాయిలో విరుచుకుపడ్డారు. దివంగత మాజీ ప్రధాని జవహార్ లాల్ నెహ్రూపై అమిత్ షా వ్యాఖ్యలను ఆయన తప్పుబట్టారు. కేంద్ర హోం మంత్రికి భారత చరిత్ర గురించి తెలియదంటూ విమర్శలు చేశారు. చరిత్రను ఎప్పటికప్పుడు అమిత్ షా పునర్ లిఖిస్తూ ఉంటారని ఎద్దేవా చేశారు.

పార్లమెంట్ ఆవరణలో రాహుల్ గాంధీ మాట్లాడుతూ…. జవహర్ లాల్ నెహ్రూ ఒక గొప్ప నేత అని అన్నారు. నెహ్రూ తన జీవితాన్ని ఈ దేశం కోసం అంకితం చేశారని తెలిపారు. కొన్నేండ్ల పాటు నెహ్రూ జైలులో ఉన్నారని వెల్లడించారు. అమిత్ షాకు చరిత్ర తెలియదన్నారు. చరిత్రను తిరగరాస్తున్నందున అమిత్ షాకు చరిత్ర తెలుసని తాను భావించనన్నారు.

దేశంలో కుల గణన జరపాలని ఆయన మరోసారి డిమాండ్‌ చేశారు. ప్రభుత్వం ఇప్పటి వరకు దానిపై చర్చించలేదని ఆరోపించారు. కుల గణన వంటి నిరంతర సమస్యల నుండి దేశం దృష్టి మరల్చేందుకు బీజేపీ ప్రయత్నిస్తోందన్నారు. దేశంలో డబ్బు మొత్తం ఎవరి చేతుల్లోకి వెళుతుందనేది ఇప్పుడు అసలు విషయం అని పేర్కొన్నారు.

ఈ సమస్యపై చర్చించేందుకు బీజేపీ నేతలు ఇష్టపడరని తెలిపారు. వారు దానిపై చర్చ నుంచి భయపడి పారిపోయారని చెప్పారు. తాము ఈ సమస్యను ముందుకు తీసుకెళ్తామన్నారు. పేద ప్రజలు తమ హక్కులు పొందేలా కాంగ్రెస్ పోరాటం చేస్తుందన్నారు. సంస్థాగత వ్యవస్థలో ఓబీసీలు, దళితులు, గిరిజనుల భాగస్వామ్యం గురించి తాను ప్రశ్నించానన్నారు. ఈ సమస్య నుంచి ప్రజల దృష్టి మళ్లించేందుకే జవహర్‌లాల్ నెహ్రూ తదితరుల గురించి బీజేపీ నేతలు మాట్లాడుతున్నారన్నారు.

తెలంగాణ పబ్లిక్​ సర్వీస్​ కమిషన్​(TSPSC)పై సీఎం రేవంత్ రెడ్డి సమీక్ష నిర్వహించారు. సచివాలయంలో నిర్వహించిన సమావేశంలో రాష్ట్ర ప్రభుత్వ ప్రధాన కార్యదర్శి శాంతి కుమారితో పాటు డీజీపీ రవి గుప్తా ఇతర అధికారులు పాల్గొన్నారు. ఈ సమావేశంలో టీఎస్పీఎస్సీ పరీక్షల నిర్వహణ, నియామకాలపై చర్చించారు.

పబ్లిక్​ సర్వీస్​ కమిషన్ పనితీరు,​ కార్యకలాపాలు, పరీక్షల నిర్వహణపై సమావేశంలో అధికారులతో సీఎం చర్చించారు. పదో తరగతి, ఇంటర్​ పరీక్షల నిర్వహణపై కూడా సమావేశంలో చర్చకు వచ్చింది. దీంతో పాటు టీఎస్​పీఎస్సీ ఛైర్మన్​ జనార్దన్​ రెడ్డి అంశంపై కూడా సమీక్షలో అధికారులతో సీఎం చర్చించారు. ఇది ఇలా వుంటే టీఎస్పీఎస్సీ​ ఛైర్మన్​ జనార్దన్ రెడ్డి రాజీనామాతో నిరుద్యోగులు సంబురాలు చేసుకున్నారు.

అంతకు ముందు సీఎం రేవంత్​ రెడ్డితో టీఎస్పీఎస్సీ చైర్మన్ జనార్దన్ రెడ్డి సోమవారం సమావేశం అయ్యారు. సమావేశం అనంతరం జనార్దన్ రెడ్డి తన పదవికి రాజీనామా చేశారు. ఈ మేరకు తన రాజీనామాను గవర్నర్ తమిళి సై సౌందర్ రాజన్ కు పంపారు. ఈ రాజీనామాను గవర్నర్ ఇప్పటి వరకు ఆమోదించనట్టు రాజ్ భవన్ వర్గాల ద్వారా తెలుస్తోంది.

బీఆర్ఎస్ సర్కార్ హయాంలో నిర్వహించిన గ్రూపు-1తో పాటు పలు పోటీ పరీక్షల ప్రశ్నాపత్రాలు లీక్ అయ్యాయి. దీంట్లో పబ్లిక్ సర్వీస్ కమిషన్ లోని సభ్యులే ప్రధాన నిందితులుగా ఉన్నట్టు వార్తలు వచ్చాయి. ఈ నేపథ్యలో నిరుద్యోగులు, తల్లిదండ్రులు పెద్ద ఎత్తున ఆందోళనలు చేపట్టారు. జనార్ధన్ రెడ్డి తన పదవికి రాజీనామా చేయాలని నిరుద్యోగులు డిమాండ్ చేశారు. కానీ జనార్దన్ రెడ్డి రాజీనామా చేయలేదు. తాజాగా ప్రభుత్వం మారడంతో ఆయన తన పదవికి రాజీనామా చేశారు.

– నగరాల పేర్ల చుట్టూ వివాదం
– ప్రయాగ్ రాజ్ గా మారిన అలహాబాద్
– అయోధ్య జిల్లాగా మారిన ఫైజాబాద్
– యూపీలోనే అధికంగా మార్పులు
– ‘‘బీయింగ్ ముస్లిం ఇన్ హిందూ ఇండియా’’ పుస్తకంలో..
– ఆసక్తికర విషయాలు

దేశంలో పలు నగరాల పేర్లను బీజేపీ సర్కార్ మారుస్తూ వస్తోంది. ఇప్పటికే యూపీ ప్రభుత్వం సుమారు 15 నగరాల పేర్లను మార్చింది. పలు రాష్ట్రాల్లో మరికొన్ని నగరాల పేర్లను మారుస్తామని ఇప్పటికే బీజేపీ నేతలు వెల్లడించారు. అయితే.. ఈ పేర్లపై జియాస్ ఉస్ సలామ్ రచించిన ‘బీయింగ్ ముస్లిం ఇన్ హిందూ ఇండియా ఏ క్రిటికల్ వ్యూ’ అనే పుస్తకంలో కొన్ని విషయాలను పొందుపరిచారు

దీనిపై వివాదం చెలరేగుతోంది. పుస్తకంలో వెల్లడించిన వివరాల ప్రకారం.. ఇలా నగరాల పేరు మార్పు తెరపైకి వచ్చిన ప్రతిసారి వలసవాదం అనే కాన్సెప్ట్ ను ముందుకు తీసుకు వస్తారట. గతంలో ప్రధాన మోడీ మాట్లాడుతూ… మనం 1200 ఏండ్ల నాటి బానిస మనస్తత్వంతో ఇబ్బంది పడుతున్నామని, దానికి ముగింపు పలకాలని అన్నారు. దాని అర్థం సుల్తాన్, మొఘల్, బ్రిటిష్ పాలన కాలాన్ని కలిపి ఆయన లెక్కించారు. మోడీ దృష్టిలో బ్రిటీష్ పాలకులు, మొఘల్ చక్రవర్తులు ఇద్దరు ఒకటే. అందుకే ముస్లిం పేరు ఉన్న నగరాల పేర్లు మారుస్తున్నారని పుస్తకంలో రాశారు.

బీజేపీ అధికారంలోకి వచ్చాక మొఘల్ చక్రవర్తులు, సలామ్ సుల్తానేట్ రాజులు, ప్రభువులు, సాధువులు, మనసబ్ దార్లు స్థాపించిన నగరాలు, పట్టణాల పేర్లను మాత్రమే మార్చేందుకు ప్రయత్నించారని చెప్పారు. వందల ఏండ్లుగా అలహాబాద్, ఔరంగాబాద్, అలీఘర్, ఉస్మానాబాద్ పేరుతో అక్కడి ప్రజలకు ఎలాంటి ఇబ్బంది కలగలేదని.. కానీ, బీజేపీ సర్కార్ వచ్చాక ఆయా నగరాల పేర్ల మార్పులు చకచకా జరిగిపోయాయని తెలిపారు.

అలహాబాద్ అంటే ‘అల్లా నివాసం’అని అర్థం. కానీ, దాన్ని ప్రయాగ్ రాజ్ గా మార్చారు. ఈ సందర్భంగా పలు ప్రశ్నలు ఉత్పన్నం అవుతున్నాయని పుస్తకంలో పొందుపరిచారు. ఈ నగరానికి మొఘల్ చక్రవర్తి అక్బర్ ‘ఇల్లాహ బాద్’ లేదా ‘ఇల్లాహి బాస్’ అని పేరు పెట్టారు. ఇల్లాహి అంటే దేవుడు అని అర్థం. ఇల్లాహి బాస్ అంటే ‘దేవుళ్ల నివాసం’ అని అర్థం వస్తుంది. అక్బర్ ఈ స్థలాన్ని హిందువుల పవిత్ర నగరంగా భావించారని చరిత్రకారుడు బదౌని వివరించారు.

అక్కడ పవిత్ర నదీ సంగమం వద్ద మరణిస్తే దేవుడిలో ఐక్యం అయిపోతారనే విషయం తెలిసి దానికి ‘దేవతల నివాసం’ అని అక్బర్ పేరు పెట్టారు. అదే సమయంలో ప్రయాగ్ రాజ్ పేరు చెక్కు చెదరకుండా, నదుల సంగమ ప్రాంతాన్ని అలాగే వదిలేశారు. ఇక పురాణాల విషయానికొస్తే, ‘ఇల’ అనేది ఐల తెగకు మూలపురుషుని తల్లి పేరు. మహాభారతం ఇలా అనే పేరును ఒక నదిగా లేదా రాజుగా కూడా పేర్కొంది. “వాస్” అంటే మళ్ళీ నివాసం. అలా చూసినా ‘ఇలా వాస్’ అనేది హిందువులు పెట్టిన పేరు. అలాంటప్పుడు అలహాబాద్ పేరును ‘ఇలా వాస్’గా మార్చి ఉండాల్సింది.

కానీ అలా చేయలేదు. గతంలో ప్రయాగ, అలహాబాద్ కలిసి ఉండేవి. ఇప్పుడు ప్రయాగ పేరు తెరపైకి రావాలంటే అలహాబాద్ పేరును పూర్తిగా తుడిచి పెట్టాలి. అందుకే అలహాబాద్ పేరును భారత దేశ మ్యాపులో కనిపించకుండా చేశారని పుస్తకంలో రాశారు. అవధ్ మొదటి నవాబ్ సాదత్ అలీ ఖాన్ 1730లో ఘఘ్రా నది ఒడ్డున ఫైజాబాద్‌ ను నిర్మించారు. కానీ, ఆ ప్రాంతంలో పక్కనే రాముడి జన్మస్థలంగా గుర్తించిన అయోధ్య ఉంది. దీంతో ఆ నగరం పేరును మార్చేందుకు అలీఖాన్ ప్రయత్నించలేదు.

ఢిల్లీ సుల్తానుల కాలం నుంచి అయోధ్యను ప్రత్యేకంగా గుర్తిస్తూ వస్తున్నారు. కానీ, యోగి సర్కార్ వచ్చాక కొత్తగా అయోధ్యకు ఏదో గుర్తింపు ఇస్తున్నట్టు ఫైజాబాద్ జిల్లా పేరును అయోధ్య జిల్లాగా మార్చి మరో నగరాన్ని భారత దేశ పటం నుంచి తొలగించారని పేర్కొన్నారు. ప్రస్తుతం ఈ పుస్తకంపై తీవ్రస్థాయిలో చర్చ జరుగుతోంది. ప్రజలను రెచ్చగొట్టేలా ఉందంటూ కామెంట్లు వినిపిస్తున్నాయి.