Breaking News

యూపీ (UP)లో ప్రజలను తప్పుడు పద్దతుల్లో మత మార్పిడి (Religious conversion) చేసేందుకు ప్రయత్నించిన వారిపై పోలీసులు కేసు నమోదు చేశారు. సోన్ భద్ర జిల్లాలో తప్పుడు పద్దతుల్లో మత మార్పిడులకు పాల్పడుతున్న తొమ్మిది మందిని పోలీసులు అరెస్టు చేశారు. మొత్తం 42 మందిపై కేసులు నమోదు చేసినట్టు పోలీసులు వెల్లడించారు.

వారి దగ్గర నుంచి పెద్ద ఎత్తున మత గ్రంధాలు, ప్రచార వస్తువులు, ల్యాప్ టాప్స్‌లను స్వాధీనం చేసుకున్నట్టు తెలిపారు. జిల్లాలోని చోపాన్ పోలీస్ స్టేషన్ పరిధిలో మల్హియా తోలా నివాసి నర్సింహా అనే వ్యక్తి గిరిజనులను, పేదలను ప్రలోభాలకు గురి చేసి మోసపూరిత మార్గాల ద్వారా వారిని మతం మార్చేందుకు ప్రయత్నం చేస్తున్నట్టు అదనపు ఎస్పీ కలు సింగ్ తెలిపారు.

ఫిర్యాదు మేరకు ఎఫ్ఐఆర్ నమోదు చేసినట్టు చెప్పారు. మొత్తం 42 మందిపై కేసులు నమోదు చేశామన్నారు. తొమ్మిది మందిని అరెస్టు చేశామన్నారు. అరెస్టైన వారిలో చెన్నైకి చెందిన జైప్రభు, యూపీలోని రాబర్ట్స్‌గంజ్‌కు చెందిన అజయ్‌కుమార్, ఏపీలోని విజయవాడకు చెందిన చెక్కా ఇమ్మాన్యుయేల్ ఉన్నారన్నారు.

వారితో పాటు రాజేంద్ర కోల్‌, చొటు అలియాస్ రంజ‌న్‌, ప‌ర‌మానంద్‌, సోహ‌న్‌, ప్రేమ్‌నాథ్ ప్ర‌జాప‌తి, రామ్ ప్ర‌తాప్‌లు ఉన్నట్టు వివరించారు. కేసు దర్యాప్తు చేస్తున్నామన్నారు. ఇటీవల యూపీలో మత మార్పిడిలను నిషేదిస్తూ యోగీ సర్కార్ ఓ ప్రత్యేకమైన చట్టాన్ని రూపొందించింది. దీంతో అక్రమ పద్దతుల్లో మత మార్పిడిలకు పాల్పడే వారిపై కఠిన చర్యలు తీసుకుంటున్నారు.

పార్లమెంట్ లైబ్రరీ బిల్డింగ్‌ (Library)లో అఖిల పక్ష సమావేశం (All Party Meeting) కాసేపటి క్రితం ముగిసింది. అఖిల పక్ష సమావేశానికి 23 పార్టీలకు చెందిన 30 మంది నేతలు హాజరైనట్టు కేంద్ర మంత్రి ప్రహ్లాద్ జోషి వెల్లడించారు.ఈ నెల 4 నుంచి సమావేశాల ప్రారంభం కానున్నట్టు ఆయన తెలిపారు. మొత్తం 15 సెషన్లు ఉంటాయని పేర్కొన్నారు.

అన్ని అంశాలపై చర్చించేందుకు ప్రభుత్వం సిద్దంగా ఉందన్నారు. ఎప్పటిలాగే జీరో హవర్ కొనసాగుతుందన్నారు. చర్చలకు అనుకూలమైన వాతావరణాన్ని కొనసాగించాలని అన్ని పార్టీలను కోరామన్నారు. చర్చల సమయంలో సభా నియమాలు, విధానాలను అనుసరించాలన్నారు. నిర్మాణాత్మకమైన చర్చలకు ప్రభుత్వం రెడీగా ఉందన్నారు.

ఈ సమావేశాలకు కేంద్రం నుంచి రక్షణ మంత్రి రాజ్ నాథ్ సింగ్, కేంద్ర మంత్రులు ప్రహ్లాద్ జోషి, అర్జున్ రామ్ మేఘవాల్ పాల్గొన్నారు. అటు కాంగ్రెస్ నుంచి సీనియర్ నేత జైరాం రమేశ్, ప్రమోద్ తివారీ, గౌరవ్ గగోయ్ ,టీఎంసీ సుదీప్ బంధోపాద్యాయ్, డరెక్ ఓబ్రెయిన్, జేఎంఎం మహువా మాజీ, ఎస్సీ నుంచి హసన్, బీఎస్పీ నుంచి గిరీశ్ చంద్ర ఇతర పార్టీల నాయకులు పాల్గొన్నట్టు పార్లమెంట్ వర్గాలు తెలిపాయి. వైసీపీ, బీఆర్ఎస్‌లు ఈ పార్టీ సమావేశానికి గైర్హాజరయ్యాయి.

వచ్చే ఏడాది లోక్ సభ సార్వత్రిక ఎన్నికలు జరగనున్నాయి. ఎన్డీఏ ప్రభుత్వానికి ఈ సారి ఇవి చివరి సమావేశాలు. దీంతో ఈ సమావేశాల్లో పలు కీలకమైన బిల్లులను ఆమోదించాలని చూస్తోంది. మొత్తం 18 బిల్లులను ఇప్పటికే కేంద్రం లిస్టు చేసింది. అందులో జమ్ముకశ్మీర్, పుదుచ్చేరిలకు మహిళ రిజర్వేషన్ బిల్లు వర్తింపు, ఐపీసీ, సీఆర్పీసీల స్థానంలో తీసుకు వస్తున్న మూడు నేర శిక్షాస్మృతి, ఇతర బిల్లులు వున్నాయి.

భారత వాతావరణ కేంద్రం (IMD) ‘మిచౌంగ్’ తుఫాన్ (Cyclone Michaung) హెచ్చరికలు చేసింది. నైరుతి బంగాళాఖాతంలో ఏర్పడిన అల్పపీడనం గంటకు 9 కిలోమీటర్ల వేగంతో పశ్చిమ-వాయువ్య దిశగా కదులుతోందని తెలిపింది. తుఫాన్ ప్రస్తుతం చెన్నైకి తూర్పు-ఆగ్నేయంగా 630 కిలో మీటర్లు, నెల్లూరుకు ఆగ్నేయంగా 740 కిమీ, బాపట్లకు ఆగ్నేయంగా 810 కి.మీ, మచిలీపట్నానికి ఆగ్నేయంగా 800 కి.మీల దూరంలో ఉన్నట్టు బులిటెన్ విడుదల చేసింది.

తుఫాన్ వాయవ్య దిశలో ప్రయాణించి డిసెంబర్ 4 నాటికి దక్షిణ ఆంధ్రప్రదేశ్ దాన్ని ఆనుకుని ఉన్న ఉత్తర తమిళనాడు తీరాలకు చేరుకుంటుందని వెల్లడించింది. తుఫాన్ ఉత్తరం వైపు కదులుతూ దక్షిణ ఆంధ్రప్రదేశ్ తీరానికి సమాంతరంగా వెళ్తున్నట్టు అంచనా వేసింది. డిసెంబర్ 5 మధ్యాహ్ననికి ముందు నెల్లూరు, మచిలిపట్నం మధ్య తుఫాన్ తీరాన్ని దాటే అవకాశం ఉందని హెచ్చరించింది.

తుఫాన్ సమయంలో గరిష్టంగా 80 నుంచి 90 కి.మీ వేగంతో గాలులు వీస్తాయని అంచనా వేస్తున్నట్టు చెప్పింది. ఈ క్రమంలో ఏపీ సీఎస్ జవహర్ రెడ్డితో కేంద్ర హోంశాఖ కార్యదర్శి సమీక్ష నిర్వహించారు. తుఫాన్ నేపథ్యంలో రాష్ట్ర, జిల్లా స్థాయిలో కంట్రోల్‌ రూమ్‌లను ఏర్పాటు చేశామని సీఎస్ జవహర్ రెడ్డి వివరించారు.

ఇప్పటికే తీర ప్రాంత జిల్లాల కలెక్టర్లను అప్రమత్తం చేశామన్నారు. అటు తమిళనాడు సీఎం ఎంకే స్టాలిన్ కూడా 12 జిల్లాల అధికారులతో సమీక్ష సమావేశాన్ని నిర్వహించారు. లోతట్టు ప్రాంతాల ప్రజలను సురక్షిత ప్రాంతాలకు తరలించాలని అధికారులకు ఆయన సూచించారు. ముందస్తు చర్యలను చేపట్టామని అధికారులు ఈ సందర్భంగా వివరించారు.

ఉత్తరకాశీ టన్నెల్ (Uttarkashi tunnel) రెస్క్యూ ఆపరేషన్‌ (Rescue Operation)లో కీలక పాత్ర పోషించిన ఢిలీ జల్ బోర్డు (DJB)కార్మికులను సీఎం కేజ్రీవాల్ (CM Kejriwal) కలిశారు. వారితో కాసేపు ముచ్చటించారు. డీజేబీ సభ్యులు తమ ప్రాణాలను రిస్కులో పెట్టి రెస్క్యూ ఆపరేషన్‌లో పాల్గొన్నారని సీఎం కేజ్రీవాల్ తెలిపారు. పగలు,రాత్రి విరామం లేకుండా శ్రమించి 41 మంది కార్మికులను కాపాడరని చెప్పారు.

ఈ రోజుల్లో ప్రపంచం మొత్తం స్వార్థపూరితంగా తయారైందన్నారు. అలాంటి స్వార్థ పూరిత ప్రపంచంలో ఎవరూ కూడా మరొకరి గురించి ఆలోచించరన్నారు. ‘నాకు ఏం జరుగుతుంది. ఒక వేళ నాకేమైనా జరిగితే నా కుటుంబం పరిస్థి ఏంటి’అని ఈ రోజుల్లో ప్రతి వ్యక్తి మొదట ఆలోచిస్తారని తెలిపారు.

ఇలాంటి ప్రపంచంలో మీలాంటి వాళ్లు కూడా ఉండటం గొప్ప విషయమన్నారు. మీ ధైర్యసాహసాల గురించి ఇప్పుడు దేశమంత చర్చించుకుంటోందని అన్నారు. 41 మంది కార్మికులను రక్షించేందుకు మీరు పడిన కష్టం, మీ తెగువను ప్రపంచం మొత్తం చర్చించుకుంటోందని పేర్కొన్నారు.

రెస్క్యూ ఆపరేషన్ కోసం డీజేబీ సంస్థ ఎలాంటి డబ్బులు తీసుకోలేదన్నారు. ఆ కంపెనీ తన బాధ్యతను అర్థం చేసుకుందని, దేశ భక్తితో ఈ రెస్క్యూ ఆపరేషన్ లో పాల్గొందన్నారు. దేశంలోని ప్రతి ఒక్కరిలో అలాంటి భావాలు తలెత్తితే, మన దేశం గణనీయంగా అభివృద్ధి చెందుతుందని తాను నమ్ముతున్నానన్నారు.

టన్నెల్‌లో చిక్కుకున్న 41 మంది కార్మికులను రక్షించే విషయంలో తీవ్రంగా శ్రమించారని సీఎంఓ వెల్లడించింది. అమెరికాకు చెందిన ఆగర్ మెషిన్ విఫలం అవగానే డీజేబీ సభ్యులను టన్నెల్ వద్దకు ఎయిర్ లిఫ్ట్ చేశామని తెలిపింది. సుమారు 36 గంటల పాటు డీజేబీ సభ్యులు తీవ్రంగా శ్రమించి కార్మికులను రక్షించారని చెప్పింది. ఈ సందర్బంగా రెస్క్యూ ఆపరేషన్ గురించి కార్మికులు సీఎంకు వివరించారని పేర్కొంది.