Featured

టీఆర్టీసీ బిల్లుపై తెలంగాణ ప్రభుత్వానికి, గవర్నర్ తమిళిసైకి మధ్య వివాదం తలెత్తింది. ఆర్టీసీ ఉద్యోగులను ప్రభుత్వంలో విలీనం చేస్తూ.. వారిని ప్రభుత్వ ఉద్యోగులుగా గుర్తించడానికి వీలు కల్పిస్తున్న బిల్లును ప్రభుత్వం.. గవర్నర్ కి పంపగా.. దీనిపై మరిన్ని వివరణలు అవసరమని, దీనిపై న్యాయ నిపుణుల సలహాలను తీసుకోవాల్సి ఉందంటూ రాజ్ భవన్ .. ప్రభుత్వానికి షాక్ ఇచ్చింది. ఇప్పటికే అసెంబ్లీ ఆమోదించిన కొన్ని బిల్లులను గవర్నర్ తమిళిసై తిప్పి పంపడంతో ఆగ్రహంతో ఉన్న సర్కార్.. ఈ తాజా పరిణామంతో మరింత నిప్పులు కక్కింది. గవర్నర్ ఈ బిల్లుకు గ్రీన్ సిగ్నల్ ఇచ్చిన పక్షంలో శాసనసభలో దీనికి ఆమోదముద్ర వేయించుకోవాలన్నది ప్రభుత్వ ఉద్దేశం. అయితే రాజ్ భవన్ నుంచి ఇంకా ఎలాంటి ఆమోద సంకేతాలు రాలేదు.

బహుశా ఈ బిల్లు విషయంలోనే కావచ్చు ..అసెంబ్లీ సమావేశాలను మరోరోజు వరకు.. అంటే రేపటివరకు పొడిగించాలని ప్రభుత్వం నిర్ణయించింది. ఈ లోగా బిల్లుకు గవర్నర్ నుంచి ఆమోద ముద్ర రావచ్చునని ఆశిస్తోంది. నిజానికి మూడు రోజులపాటు మాత్రమే అసెంబ్లీ సమావేశాలు నిర్వహించాలని సర్కార్ నిర్ణయించినా.. మరో రోజు వరకు పొడిగిస్తున్నారు.

రెండు గంటలపాటు రోడ్డెక్కని ఆర్టీసీ బస్సులు

బస్సు బిల్లుపై గవర్నర్ వైఖరికి నిరసనగా శనివారం ఉదయం తెలంగాణ వ్యాప్తంగా రెండు గంటల పాటు ఆర్టీసీ బస్సులు రోడెక్కలేదు. బస్సు డిపోలలో ఎక్కడి బస్సులు అక్కడే నిలిచిపోవడంతో ప్రయాణికులు, కాలేజీ, స్కూలు విద్యార్థులు నానా ఇబ్బందులు పడ్డారు. హఠాత్తుగా బస్సులు నిలిచిపోవడానికి కారణాలు తెలియవని కొందరు ప్రయాణికులు చెప్పారు. వీరి అవసరాలను ఆసరాగా తీసుకున్న ప్రైవేటు వాహనాలు, ఆటోలు, ఓలా వంటివి చార్జీలను విపరీతంగా పెంచేశాయి. తమ ప్రయోజనాలను ఉద్దేశించి ప్రభుత్వం తెచ్చిన బిల్లు పట్ల గవర్నర్ వైఖరికి నిరసనగా ఆర్టీసీ కార్మికులు శనివారం రాజ్ భవన్ వరకు నిరసన ర్యాలీ చేబట్టాలని నిర్ణయించారు.

ప్ర‌జా స‌మ‌స్య‌లు, వ‌ర‌ద‌ల‌పై అసెంబ్లీలో నేత‌ల మధ్య మాట‌ల యుద్ధం కొన‌సాగింది. వ‌ర‌ద సాయంపై ప్ర‌భుత్వం నిర్ల‌క్ష్యంగా వ్య‌వ‌హ‌రిస్తోంద‌ని బీజేపీ, కాంగ్రెస్ ఎమ్మెల్యేలు విమ‌ర్శ‌లు చేశారు. ఈ నేప‌థ్యంలో మంత్రి కేటీఆర్ స్పందించారు. కేంద్రమంత్రి కిష‌న్ రెడ్డిపై నిప్పులు చెరిగారు. హైద‌రాబాద్ లో వ‌ర‌ద‌లు వ‌స్తే సాయం చేయ‌డు.. బుర‌ద రాజ‌కీయం మాత్రం ప‌క్కా చేస్త‌డు అని విమ‌ర్శించారు. శాస‌న‌స‌భ‌లో ప్ర‌శ్నోత్త‌రాల సంద‌ర్భంగా ఎస్ఆర్‌డీపీ ప‌నుల పురోగ‌తిపై స‌భ్యులు అడిగిన ప్ర‌శ్న‌ల‌కు కేటీఆర్ స‌మాధానం ఇచ్చారు.

స‌మావేశాలు 30 రోజులు జ‌ర‌పాల‌ని బీజేపీ నాయ‌కుడు ఉత్త‌రం రాశార‌ని.. కాంగ్రెసోళ్లేమో 20 రోజులు జ‌ర‌పాల‌ని డిమాండ్ చేశార‌న్నారు కేటీఆర్. కానీ, ప్ర‌శ్నోత్త‌రాల స‌మ‌యంలో తామంద‌రం ఉన్నాం.. కాంగ్రెస్, బీజేపీల నుంచి ఒక‌రి చొప్పున మాత్ర‌మే ఉన్నారని మండిప‌డ్డారు. దీన్ని బ‌ట్టి వీరికి ప్ర‌జ‌ల మీద ఉన్న చిత్త‌శుద్ధి ఏంటో తెలుస్తోంద‌ని సెటైర్లు వేశారు. బ‌య‌టేమో డైలాగులు.. 20 రోజులు కావాలి.. 30 రోజులు కావాలి అని.. కానీ 30 నిమిషాలు కూర్చొనే ఓపిక లేదు అంటూ మండిప‌డ్డారు.

వరదల నష్ట పరిహారం ప్రకటించాలని కాంగ్రెస్ నేతల డిమాండ్ చేశారు. ప్రభుత్వం పరిహారం ప్రకటించలేదని నిరసనగా సభ నుంచి వాకౌట్ చేశారు. ఇసుక మేటల విషయంలో ప్రణాళిక రూపొందించాలని శ్రీధర్ బాబు అన్నారు. ఫసల్‌ బీమా పథకం రాష్ట్రంలో అమలుకావడం లేదని.. ఇది అమలుకాక రైతులు నష్టపోతున్నార‌ని వివ‌రించారు. ఇక 50 ఏళ్లు పాలించిన కాంగ్రెస్‌ నేతలు ఎప్పుడైనా రైతుబీమా ఇచ్చారా? అంటూ కేటీఆర్ ప్ర‌శ్నించారు.

మ‌రోవైపు, వరద బాధితుల సమస్యలు పరిష్కరించాలంటూ వివిధ సంఘాలు అసెంబ్లీ ముట్టడికి ప్ర‌యత్నించాయి. వరద బాధితులకు న్యాయం చేయాలని కాంగ్రెస్ శ్రేణులు మండిప‌డ్డారు. బాధితుల‌కు రూ.50 లక్షల పరిహారం చెల్లించి వారిని ఆదుకోవాలని డిమాండ్ చేశారు. ఇళ్లు కోల్పోయిన వారికి 20 లక్షలు ప్రకటించాలని నిరసన తెలిపారు. నిర‌స‌నకారుల‌ను పోలీసులు అరెస్ట్‌ చేశారు.

రాష్ట్రంలో వర్షాలు, వరదలపై అసెంబ్లీలో డైలాగ్ వార్ కొన‌సాగుతుండ‌గా.. ఇంకోవైపు హైకోర్టులో విచారణ జ‌రిగింది.
వరదలు, వర్షాలపై పూర్తిస్థాయిలో నివేదిక ఇవ్వాలని గతంలో ప్రభుత్వాన్ని ఆదేశించింది హైకోర్టు. ఈ క్ర‌మంలోనే ప్రభుత్వం రిపోర్ట్ స‌మ‌ర్పించ‌గా.. న్యాయస్థానం అసంతృప్తి వ్యక్తం చేసింది. పూర్తిస్థాయిలో నివేదిక ఇవ్వాలన్నని ఆదేశించింది.

సమగ్ర నివేదికను సమర్పించడానికి మరో రెండు రోజుల గడువు కోరింది ప్రభుత్వం. సోమవారం రోజు పూర్తిస్థాయిలో వరదలు నష్టాలపై రిపోర్ట్ సమర్పిస్తామని ప్రభుత్వ తరఫు న్యాయవాది తెలుప‌గా.. నివేదిక ఇవ్వడానికి లేట్ ఎందుకు చేస్తున్నారని ప్రశ్నించారు చీఫ్ జస్టిస్. చెప్పిన‌ట్టుగా సోమవారం నివేదిక సమర్పించాలని స్ప‌ష్టం చేసింది.

ఇప్పటికే ప్రజలు ఇబ్బంది పడుతున్నారని, వరద ప్రభావిత బాధితులకు వెంటనే పరిహారం, సహాయక చర్యలు చేపట్టేలా ఆదేశించాలని పిటిషనర్ త‌ర‌ఫు న్యాయవాది చిక్కుడు ప్రభాకర్ కోర్టును కోరారు. అయితే.. ప్రభుత్వ నివేదిక పరిశీలించిన తరువాత ఆదేశాలిస్తామని న్యాయస్థానం తెలిపింది. తదుపరి విచారణను ఈనెల 9కి వాయిదా వేసింది హైకోర్టు.

ఈమ‌ధ్యే రాష్ట్ర బీజేపీలో అధిష్టానం భారీ మార్పులు చేసింది. అధ్యక్ష పదవి నుంచి బండి సంజయ్ ​ని తొలగించి.. కిషన్ ​రెడ్డికి బాధ్యతలను అప్పగించింది. అలాగే, ఈట‌ల రాజేంద‌ర్ కు పార్టీ రాష్ట్ర ఎన్నిక‌ల నిర్వ‌హ‌ణ క‌మిటీని చైర్మ‌న్ ని చేసింది. తెలంగాణ‌లో గెలుపే ల‌క్ష్యంగా ఇవి జ‌రిగాయని పార్టీ శ్రేణులు భావిస్తున్నారు. ఈ క్ర‌మంలోనే బీజేపీ జాతీయ ప్ర‌ధాన కార్య‌ద‌ర్శిగా నియ‌మితుల‌య్యారు బండి సంజ‌య్. ఆయ‌నను పార్టీ అధ్య‌క్ష బాధ్య‌త నుంచి త‌ప్పించి దేశ రాజ‌కీయాల్లో క్రియాశీల‌కం చేసింది హైక‌మాండ్.

తాజాగా ఢిల్లీ ప్రధాన కార్యాలయంలో బీజేపీ జాతీయ ప్రధాన కార్యదర్శిగా బండి పదవీ బాధ్యతలు తీసుకున్నారు సంజ‌య్. ఈ సందర్భంగా నేతలు ఆయ‌న‌కు శుభాకాంక్షలు తెలిపారు. అధిష్ఠానం తనపై పెట్టిన బాధ్యతను నమ్మకంతో పనిచేసి.. పార్టీని శ‌క్తివంతంగా తయారు చేస్తానని ఆయ‌న‌ వెల్లడించారు. తెలంగాణలో జరుగుతున్న నిరంకుశ పాలనకు అడ్డుకట్ట వేసి.. మోడీ రాజ్యస్థాపనకు తన వంతు కృషి చేస్తానని స్పష్టం చేశారు.

రాబోయే రోజుల్లో పార్టీ ఏ పని అప్పగించినా బాధ్యతాయుతంగా పనిచేస్తానని స్పష్టం చేశారు బండి. మోడీ నేతృత్వంలో తెలంగాణలో రామరాజ్యం ఏర్పాటు కోసం కృషి చేస్తానని అన్నారు. తనను నమ్మి బీజేపీ జాతీయ ప్రధాన కార్యదర్శిగా బాధ్యతలు అప్పగించిన మోడీ, అమిత్ షా, జేపీ నడ్డాకు కృతజ్ఞతలు తెలిపారు.

గురువారం రోజున కుటుంబ సభ్యులతో కలిసి ప్ర‌ధాని నరేంద్ర మోడీని కలిశారు బండి సంజయ్​. తెలంగాణలో బీజేపీ బలోపేతం కోసం ఎంతగానో శ్రమించారని ఆయ‌న‌ను పీఎం అభినందించారు. రానున్న ఎన్నికల నేపథ్యంలో మరింతగా కష్టపడాలని సూచించారు.

మొన్నటి వరదలకు రాష్ట్రంలోని పలు జిల్లాల్లోని లోతట్టు ప్రాంతాలు జలమయం అయ్యాయి. కొన్ని ఏరియాల్లో పరిస్థితి దారుణంగా తయారైంది. ఈ నేపథ్యంలో ప్రతిపక్షాలు ప్రభుత్వమే లక్ష్యంగా విమర్శనాస్త్రాలు సంధిస్తున్నాయి. వరద సాయం విషయంలో సర్కార్ నిర్లక్ష్యాన్ని ఎండగడుతున్నాయి. అసెంబ్లీ సమావేశాల సందర్భంగా బీజేపీ ఎమ్మెల్యే ఈటల రాజేందర్ మీడియా పాయింట్ లో మాట్లాడుతూ.. జనం అల్లాడుతుంటే ప్రభుత్వం పట్టించుకున్న పాపాన పోలేదని విమర్శించారు. ఈ నేపథ్యంలో ప్రభుత్వం సైడ్ నుంచి కీలక ప్రకటన వచ్చింది.

శాసనసభ శుక్రవారానికి వాయిదా పడినా.. మండలి మాత్రం కొనసాగింది. వరద నష్టం తీవ్రతపై శాసన మండలిలో ప్రభుత్వం ప్రకటన చేసింది. సుమారు 7,870 కుటుంబాలను సురక్షిత ప్రాంతాలకు తరలించినట్లు వెల్లడించింది. 139 గ్రామాల ప్రజలను తరలించి, 157 సహాయ కేంద్రాలు ఏర్పాటు చేశామని చెప్పింది. 756 చిన్నతరహా సాగునీటి చెరువులకు గండ్లు పడ్డాయని.. వాటి పునరుద్ధరణకు రూ.171.1కోట్లు అవసరమని వివరించింది.

వరదల కారణంగా 488 రాష్ట్ర రోడ్లు, 29 జాతీయ రహదారులు దెబ్బతినగా వాటిని పునరుద్ధరించామని తెలిపింది ప్రభుత్వం. తాత్కాలిక పునరుద్ధరణ కోసం 253.77 కోట్లు అవసరమని.. అలాగే, శాశ్వత పునరుద్ధరణ కోసం రూ.1,771.47 కోట్లు అవుతాయని చెప్పింది. పంచాయతీరాజ్ శాఖకు సంబంధించిన 1,517 రోడ్లు దెబ్బతినగా.. తాత్కాలిక పునరుద్ధరణ కోసం రూ.187.71 కోట్లు అవసరమని వివరించింది. అదే, శాశ్వత పునరుద్ధరణ కోసం అయితే రూ.1,339.03 కోట్లు అవుతాయని తెలిపింది తెలంగాణ సర్కార్.

ఆగస్టు 8 వరకు తాత్కాలిక పునరుద్ధరణ పనులు పూర్తిచేస్తామని.. భారీ వర్షాలకు 419 ఇళ్లు పూర్తిగా, 7,505 పాక్షికంగా దెబ్బతిన్నాయని చెప్పింది. మున్సిపాలిటీలలో రోడ్లు, డ్రైన్లు, వీధి దీపాల పునరుద్ధరణకు రూ.380 కోట్లు అవసరం అవుతాయని.. జీహెచ్ఎంసీలో రోడ్ల పునరుద్ధరణకు రూ.255.66 కోట్ల ఖర్చు అవుతుందని శాసన మండలిలో వివరించింది. వరదల సమయంలో 8 ఎన్డీఆర్‌ఎఫ్‌ బృందాలను అందుబాటులో ఉంచామని.. మోరంచపల్లిలో హెలికాప్టర్, ఆర్మీని దింపామని తెలిపింది ప్రభుత్వం.