Featured

మేడిగడ్డ (Madigadda)ను బీఆర్​ఎస్​ నేతల బృందం నేడు సందర్శించిన విషయం తెలిసిందే.. ఈ క్రమంలో కాళేశ్వరం (Kaleswaram) చిన్న సమస్య అని కానీ, కాంగ్రెస్ (Congress) నేతలు భూతద్దంలో పెట్టి పెద్దదిగా చూస్తున్నారని కేటీఆర్ (KTR) విమర్శించారు.. ఈ నేపథ్యంలో గులాబీ నేతల తీరుపై నీటిపారుదల శాఖ మంత్రి ఉత్తమ్ కుమార్ రెడ్డి మండిపడ్డారు..

నేడు సచివాయంలో మీడియాతో చిట్ చాట్ చేసిన ఆయన.. పలు కీలక విషయాలు వెల్లడించారు.. బీఆర్ఎస్ ప్రభుత్వం చేసిన పాపాల్లో కేంద్రం పాత్ర ఉందని ఆరోపించారు. రెండు పార్టీల మధ్య అలాయ్ బలయ్ లేకపోతే రూ. లక్ష కోట్ల రుణం ఎలా వచ్చిందని ప్రశ్నించారు. కాళేశ్వరంపై విజిలెన్స్ నివేదిక అందిందని, బాధ్యులపై క్రిమినల్ చర్యలు తీసుకుంటామని ఉత్తమ్ వెల్లడించారు.. మేడిగడ్డ నిర్మాణంలో లోపం ఉన్నందున ఎల్అండ్ టీ కంపెనీకి చెల్లించాల్సిన రూ. 400 కోట్ల బిల్లులను ఆపామని తెలిపారు.

దీనివల్ల రాష్ట్రంకు చాలా అన్యాయం జరిగిందని మండిపడ్డ ఉత్తమ్.. జరిగిన నష్టానికి ఇరిగేషన్ లో ఉన్న లోన్లన్నీ కేసీఆర్, కేటీఆర్ కట్టాలని తెలిపారు.. నిజాలు దాచడానికి మేడిగడ్డ వెళ్లారా.. లేక సత్యాలు ఒప్పుకోవడానికి వెళ్లారా అని బీఆర్ఎస్ నేతలను ప్రశ్నించారు. మరోవైపు తుమ్మిడి హెట్టి వద్ద నీళ్లు లేవని అసత్య ప్రచారం చేశారు కానీ అక్కడ 160 టీఎంసీల నీళ్లున్నట్టు సీడబ్ల్యూసీ వెల్లడించిందని గుర్తుచేశారు..

బీఆర్ఎస్ మేడిగడ్డ పర్యటనపై గరం అయిన ఉత్తమ్.. మేడిగడ్డ.. ఓ బొందల గడ్డ.. ఏం పీక పోతరు అన్నోళ్లు ఇప్పుడు ఎందుకు వెళ్లారని ప్రశ్నించారు. కమీషన్లకు కక్కుర్తి పడి బీఆర్ఎస్ లీడర్లు తెలంగాణ (Telangana) రైతుల భవిష్యత్ పణంగా పెట్టారని ఆరోపించారు.. ఎన్టీఎస్ఏ కమిటీని మేడిగడ్డ విచారణ కోసం ఆహ్వానించడాన్ని తాము స్వాగతిస్తున్నామని తెలిపారు.. వారు ఏ సమాచారం అడిగినా ఇచ్చేందుకు ప్రభుత్వం సిద్ధంగా ఉందని పేర్కొన్నారు..

రేపు ఢిల్లీ వెళ్తున్నట్లు తెలిపిన ఉత్తమ్ కుమార్ రెడ్డి (Uttam Kumar Reddy).. మేడిగడ్డ అంశంపై పలువురు నిపుణులను, అధికారులను కలుస్తానన్నారు. నిపుణులతో చర్చించి నిర్ణయం తీసుకొంటామని పేర్కొన్నారు. మరోవైపు ప్రాణహిత చేవెళ్ల ను పూర్తి చేస్తే కాంగ్రెస్ కు క్రెడిట్ వస్తదనే కుట్రతోనే కేసీఆర్ రీ డిజైన్ చేశారని ఆరోపించారు.. మేడిగడ్డ వెళ్తున్న BRS నేతల బస్సు టైర్ బ్లాస్ట్ అయింది.. ఇప్పటికే కారు షెడ్డుకు పోయింది. దీన్ని బట్టి అర్థం అయ్యేది ఏంటంటే.. చేసిన పాపాలు ఎక్కడికిపోవని తెలుస్తోందని ఎద్దేవా చేశారు..

లోక్‌సభ ఎన్నికలు సమీపిస్తుండటంతో అధికార కాంగ్రెస్ (Congress), ప్రతిపక్ష బీఆర్ఎస్ (BRS) మధ్య డైలాగ్ వార్ ముదిరిపోతుంది. చేవెళ్లలో ఇటీవల నిర్వహించిన జనజాతర బహిరంగసభలో బీఆర్ఎస్ వర్కింగ్ ప్రెసిడెంట్ కేటీఆర్‌ (KTR)కు సీఎం రేవంత్ రెడ్డి (Revanth Reddy) సవాల్ విసిరిన విషయం తెలిసిందే. తాజాగా కేటీఆర్ సైతం సీఎంకి ప్రతి సవాల్ విసిరారు. ఇద్దరం కలిసి మల్కాజ్‌గిరి లోక్‌సభ స్థానానికి పోటీ చేద్దామంటూ ఛాలెంజ్ చేశారు..

లోక్ సభ ఎన్నికల్లో ఒక్క సీటైనా గెలిచి చూపించాలని రేవంత్ రెడ్డి అడుగుతున్నారు.. అందుకే ఇద్దరం కలిసి ఒకే సీటు కోసం మల్కాజిగిరి (Malkajigiri) నుంచి పోటీ చేద్దామని తెలిపారు. తాను సిరిసిల్ల ఎమ్మెల్యే పదవికి రాజీనామా చేస్తానని.. రేవంత్ కొడంగల్ ఎమ్మెల్యే, సీఎం పదవికి రాజీనామా చేయాలని పేర్కొన్నారు.సేఫ్‌ గేమ్‌ అక్కర్లేదని తెలిపిన కేటీఆర్.. సీఎం ఐడెంటిటి క్రైసిస్‌తో బాధపడుతున్నారంటూ సెటైర్లు వేశారు.

నేనే సీఎం, నేనే టీపీసీసీ అని అరుస్తున్న రేవంత్.. ఇచ్చిన మాట ప్రకారం 2 లక్షల రుణమాఫీ, మహిళలకు నెలకు రూ. 2500 ఆర్థిక సాయం, బీసీ ప్లాన్‌ అమలు చేయాలని కేటీఆర్ డిమాండ్ చేశారు. మా మీద వచ్చిన ఆరోపణలు అబద్దమని నిరూపించుకోవడానికి మేము మేడిగడ్డ వెళ్తుంటే వాళ్ళు పాలమూరు పేరుతో సిల్లీ రాజకీయాలు చేస్తున్నారని విమర్శించారు.. మరోవైపు మేడిగడ్డ రిపేర్లు చేయమంటే చేయట్లేదని ఆరోపించారు.

రిపేర్ చేసి మార్చి 31 లోపు నీళ్లు ఇవ్వకుంటే చాలా ఇబ్బందులు వస్తాయని పేర్కొన్నారు. రాజకీయంగా వేధింపులు చేయాలంటే చేయండి.. మేము దేనికి భయపడమని తెలిపిన కేటీఆర్.. కాళేశ్వరంకు 400 అనుమతులు వచ్చాయన్నారు. ఇంకా ప్రతిపక్షంలో ఉన్నట్లు రేవంత్ రెడ్డి భావిస్తున్నారని చురకలు అంటించారు. మీరు అధికారంలో ఉన్నామన్న విషయాన్ని గుర్తించి మాట్లాడాలని సూచించారు.

– ఓఆర్ఆర్ టోల్ టెండర్ లెక్కలు తీస్తున్న రేవంత్ సర్కార్
– విచారణకు ఆదేశించిన సీఎం
– అన్ని కోణాల్లో దర్యాప్తు చేయాలని నిర్ణయం
– పూర్తి వివరాలు ఇవ్వాలని హెచ్ఎండీఏకు ఆదేశాలు
– సీబీఐతో కానీ.. మరో సంస్థకు విచారణ బాధ్యతలు
– హెచ్ఎండీఏ అధికారులతో రేవంత్ సమీక్ష
– హుస్సేన్ సాగర్ చుట్టూ దుబాయ్ మోడల్ టూరిజం స్పాట్
– రీజనల్ రింగ్ రోడ్డు వరకు హెచ్ఎండీఏ పరిధి విస్తరణకు నిర్ణయం
– లే అవుట్లలోని ప్రభుత్వ స్థలాల్లో ఆదర్శ పాఠశాలలు

రేవంత్ సర్కార్ ఏర్పడ్డాక.. గత ప్రభుత్వంలోని స్కాములు ఒక్కొక్కటిగా వెలుగుచూస్తున్నాయి. ఇప్పటికే గొర్రెలు, ఆవులు, కాళేశ్వరం ఇలా ఏదో అంశంలో కేసీఆర్ బాగోతం బయటపడుతోంది. తాజాగా కాంగ్రెస్ ప్రభుత్వం మరో కీలక నిర్ణయం తీసుకుంది. సచివాలయంలో హెచ్ఎండీఏ అధికారులతో సమావేశమైన సీఎం రేవంత్ రెడ్డి.. ఔటర్ రింగ్ రోడ్డు టోల్ టెండర్లలో జరిగిన అవకతవకలపై సమగ్ర విచారణ చేపట్టాలని ఆదేశాలు జారీ చేశారు. ప్రభుత్వానికి రావాల్సిన భారీ ఆదాయానికి గండి పడేలా తక్కువ రేటుకు టెండర్లు కట్టబెట్టిన తీరుపై ఆగ్రహం వ్యక్తం చేశారు. కనీస రేటు నిర్ణయించకుండా టెండర్లు ఎలా పిలిచారని హెచ్ఎండీఏ అధికారులను ప్రశ్నించారు. అందులో ఎవరెవరి ప్రమేయముంది.. ఏయే సంస్థలున్నాయి.. బాధ్యులెవరు..? ఇలా అన్ని కోణాల్లో దర్యాప్తు జరపాలని సీఎం ఆదేశించారు.

ఈ టెండర్లలో జరిగిన అవకతవకలు, అనుసరించిన విధానాలు, ఫైళ్లు కదిలిన తీరుపై పూర్తి వివరాలను సమర్పించాలని హెచ్ఎండీఏ జాయింట్ కమిషనర్ అమ్రాపాలీకి బాధ్యతలు అప్పగించారు. ఈ వ్యవహారానికి సంబంధించిన ఫైళ్లు ఏవైనా మిస్సయినట్లు గుర్తిస్తే.. వెంటనే సంబంధిత అధికారులు, బాధ్యులైన ఉద్యోగులపై వ్యక్తిగతంగా కేసులు నమోదు చేయాలని ఆదేశించారు. హెచ్ఎండీఏ నుంచి పూర్తి నివేదిక అందిన తర్వాత కేబినేట్లో చర్చించి ఈ టెండర్ల వ్యవహారాన్ని సీబీఐ లేదా అదే స్థాయి మరో దర్యాప్తు సంస్థకు అప్పగిస్తామని సీఎం చెప్పారు. ఇప్పటికే నీటిపారుదల, పశుసంవర్ధక శాఖలపై పూర్తిస్థాయి విచారణ నిర్వహిస్తున్న రాష్ట్ర ప్రభుత్వం… టోల్ టెండర్ అంశంపై దృష్టి సారించడం ఆసక్తికరంగా మారింది.

హైదరాబాద్ మహానగర మణిహారమైన ఓఆర్ఆర్ ను కేసీఆర్ ప్రభుత్వం దీర్ఘకాలిక లీజు కోసం అప్పగిస్తూ ఆదేశాలు ఇచ్చింది. టోల్ ఆపరేట్ ట్రాన్స్ ఫర్ విధానంలో 30 ఏళ్లపాటు లీజుకు గాను తొలుత 4 కంపెనీలు బిడ్లు దాఖలు చేశాయి. టెక్నికల్, ఫైనాన్షియల్ బిడ్ల పరిశీలన తర్వాత ఎల్-1గా ఐఆర్బీ ఇన్ఫ్రా లిమిటెడ్ నిలిచింది. మొత్తం రూ.7,380 కోట్లకు బిడ్ ఫైనల్ కాగా.. మేనేజ్మెంట్ నుంచి టోల్ వరకు మొత్తం కార్యకలాపాలు ప్రైవేట్ సంస్థ చూసుకుంటుంది. 158 కిలోమీటర్ల మేర ఓఆర్ఆర్ ఉండగా, నిత్యం 1.30 లక్షల వాహనాలు తిరుగుతున్నాయి. ఔటర్ పై ఎక్కి, దిగడానికి 44 పాయింట్లతోపాటు 22 ఇంటర్ ఛేంజ్ జంక్షన్స్ ఉన్నాయి. టోల్ కలెక్షన్ల కింద ఓఆర్ఆర్ ద్వారా ఏటా రూ.500 కోట్ల దాకా రాబడి ఉండగా, ప్రతి సంవత్సరం 5 శాతం వరకు పెంచుకునే అవకాశముంది. అంతకుముందు ఓఆర్ఆర్ ను హెచ్ఎండీఏ పరిధిలోని హైదరాబాద్ గ్రోత్ కారిడార్ లిమిటెడ్ చూసేది. ఫండ్స్, మానవ వనరుల కొరత వల్ల నిర్వహణ భారంగా మారినందునే దీన్ని లీజుకు అప్పగిస్తున్నట్లు ఆనాటి కేసీఆర్ ప్రభుత్వం తెలిపింది. అయితే.. ఈ వ్యవహారంలో వెయ్యి కోట్ల రూపాయలు చేతులు మారాయని ప్రతిపక్ష నేతగా ఉన్నప్పుడు రేవంత్ రెడ్డి ఆరోపించారు. తాము అధికారంలోకి వస్తే పూర్తిస్థాయిలో విచారణ చేపడతామని ఆనాడు ఇచ్చిన హామీ మేరకు ఇప్పుడు విచారణకు నిర్ణయించారు. దీంతో బీఆర్ఎస్ వర్గాల్లో భయం మొదలైంది.

మరోవైపు, ఓఆర్ఆర్ నుంచి రీజనల్ రింగ్ రోడ్డుకు రేడియల్ రోడ్లకు ప్రణాళికలు రూపొందించాలని సీఎం రేవంత్ రెడ్డి ఆదేశించారు. మాస్టర్ ప్లాన్ -2050కి అనుగుణంగా విజన్ డాక్యుమెంట్ రూపొందించాలని సూచించారు. ఓఆర్ఆర్ లోపల ప్రాంతాలను ఒకే యూనిట్‌గా అభివృద్ధి చేయాలన్నారు. ఓఆర్ఆర్ – ఆర్ఆర్ఆర్ మధ్య ప్రాంతాలను హెచ్ఎండీఏ పరిధిలోకి తేవాలన్నారు.