National

అయోధ్య (Ayodhya)లో ప్రాణ ప్రతిష్ట కార్యక్రమాలు మూడవ రోజుకు చేరుకున్నాయి. అయోధ్యలో ‘రామ్ లల్లా’ (Ram Lalla)విగ్రహం ఈ రోజు గర్భగుడిలోకి చేరుకుంది. భారీ క్రేన్ సహాయంతో రామ్ లల్లా విగ్రహాన్ని ఈ రోజు ఉదయం రామ మందిర ఆవరణలోకి తీసుకు వచ్చారు. అనంతరం రామ్ లల్లా విగ్రహాన్ని గర్బగుడిలో ప్రతిష్టించారు. వేద పండితుల మంత్రోచ్ఛరణల మధ్య శ్రీరామ జన్మభూమి తీర్థ క్షేత్ర ట్రస్టు సభ్యుల సమక్షంలో విగ్రహాన్ని ప్రతిష్టించారు.

నిన్న రాత్రి 7.30 గంటల సమయంలో రామ్ లల్లా విగ్రహాన్ని వివేక్ సృష్టి కాంప్లెక్స్ నుంచి జన్మభూమి కాంప్లెక్స్​కు తరలించారు. ఏటీఎస్ కమాండోల భారీ భద్రత మధ్య ఈ కార్యక్రమాన్ని నిర్వహించారు. విగ్రహాన్ని తనలించే సమయంలో వాహనానికి అన్నివైపుల పాలిథిన్ కవర్లతో పూర్తిగా కప్పి వుంచారు. అంతకు ముందు గర్భగుడిలో విగ్రహాన్ని ప్రతిష్ఠించే చోట శ్రీరామ జన్మభూమి తీర్థక్షేత్ర ట్రస్ట్‌ సభ్యులతో పాటు నిర్మోహి అఖాడాకు చెందిన మహంత్ దినేంద్ర దాస్, పూజారి సునీల్ దాస్ పూజలు నిర్వహించారు.

మధ్యాహ్నం 12.20 గంటల నుంచి 1.28 మధ్య విగ్రహాన్ని ప్రతిష్టించినట్ట ట్రస్టు సభ్యుల వెల్లడించారు. విగ్రహాన్ని గర్బగుడిలోకి ప్రతిష్టించే ముందు ప్రత్యేక పూజలు చేశారు. సాయంత్రం జల దివాస్ కార్యక్రమాన్ని నిర్వహించనున్నారు. అందులో భాగంగా విగ్రహానికి జలాభిషేకాన్ని నిర్వహించనున్నారు. అనంతరం గంద దివస్ ను నిర్వహించనున్నారు.

గణేశాంబిక పూజ, వరుణ పూజ, చతుర్వేదోక్త పుణ్యవచనం, మండప ప్రవేశం, పృథ్వి- కుర్మ- అనంత- వరాహ- యజ్ఞభూమి పూజలను చేయనున్నారు. ఇది ఇలా వుంటే రామ మందిర ప్రారంభోత్సవం సందర్బంగా పలు రాష్ట్రాల్లో పాఠశాలలు, కళాశాలలకు సెలవులు ప్రకటించారు. యూపీ, ఛత్తీస్ గఢ్, గోవా, హర్యానాల్లో విద్యా సంస్థలకు సెలవుగా ప్రకటించారు.

మరోవైపు జనవరి 22న రామ మందిర ప్రారంభోత్సవం సందర్బంగా కేంద్ర ప్రభుత్వ కార్యాలయాలకు హాఫ్ డే సెలవును కేంద్రం ప్రకటించింది. రామ మందిర ప్రారంభోత్సవం సందర్బంగా హాఫ్ డే సెలవు ప్రకటించాలని నిర్ణయిచింనట్టు కేంద్ర మంత్రి జితేంద్ర సింగ్ వెల్లడించారు. అయోధ్యకు భక్తుల తాకిడి పెరిగే అవకాశం ఉంది. ఈ నేపథ్యంలో భారత వాతావరణ శాఖ కీలక ప్రకటన చేసింది.

అయోధ్యలో వాతావరణానికి సంబంధించి ప్రత్యేక అప్ డేట్ ఇవ్వనున్నట్టు పేర్కొంది. దీని కోసం వాతావరణ శాఖ వెబ్​సైట్​లో ప్రత్యేక పేజీని అందుబాటులోకి తీసుకు వచ్చినట్టు వెల్లడించింది. ఉష్ణోగ్రత, తేమ, గాలి వేగం సహా వాతావరణానికి సంబంధించిన పలు అంశాల వివరాలను అందులో అప్ డేట్ చేయనుంది. హిందీ, ఇంగ్లిష్, ఉర్దూ, చైనీస్, ఫ్రెంచ్, స్పానిష్ వంటి భాషల్లో ఈ పేజీని చూడవచ్చు.

జనవరి 22న అయోధ్య రామ మందిర ప్రారంభోత్సవం సందర్బంగా సైబర్ దాడులను ఎదుర్కొనేందుకు ఉన్నతాధికారుల ప్రత్యే క బృందాన్ని కేంద్ర హోం శాఖ పంపించింది. ఇండియన్ సైబర్ కో ఆర్డినేషన్ టీమ్, మినిస్ట్రీ ఆఫ్ ఎలక్ట్రానిక్స్ అండ్ ఇన్ఫర్మేషన్ టెక్నాలజీ, ఇంటెలిజెన్స్ బ్యూరో, ఇండియన్ కంప్యూటర్ ఎమర్జెన్సీ రోస్పాన్స్ టీమ్, సైబర్ విషయాల్లో నిపుణులు ఈ బృందంలో ఉండనున్నట్టు కేంద్ర ప్రభుత్వ వర్గాలు తెలిపాయి.

భార‌త యుద్ధ నౌక ఐఎన్ఎస్ విశాఖ‌ప‌ట్ట‌ణం(INS Visakhapatnam) డ్రోన్ దాడికి గురైన ఓ విదేశీ నౌక‌ను కాపాడింది. మార్ష‌ల్ దీవుల‌కు చెందిన ఎంవీ జెన్‌కో షిప్‌పై డ్రోన్ దాడి చేశారు. అయితే అక్క‌డే పెట్రోలింగ్ నిర్వ‌హిస్తున్న ఐఎన్ఎస్ విశాఖ‌ప‌ట్ట‌ణం యుద్ధ‌నౌక‌కు కాల్ వ‌చ్చింది.

దీంతో రంగంలో దిగిన ఆ యుద్ధ నౌక‌ కార్గో షిప్‌ను ర‌క్షించింది. దాంట్లో 22 మంది సిబ్బంది ఉన్నారు. దీంతో 9 మంది భార‌తీయ సిబ్బంది కూడా ఉన్నారు. ఎవ‌రికీ ఎలాంటి ముప్పు కలగలేదని, ప్ర‌స్తుతం మంట‌లను అదుపులోకి తెచ్చిన‌ట్లు ఇండియ‌న్ నేవీ ఓ ప్ర‌క‌ట‌న‌లో తెలిపింది.

దాడికి గురైన నౌక అమెరికాకు చెందిన ‘జెన్‌కో షికార్డీ’గా గుర్తించారు. ఈ నౌకను లక్ష్యంగా చేసుకుని హౌతీ తిరుగుబాటుదారులు దాడికి పాల్పడ్డారు. డ్రోన్‌తో బాంబులు జారవిడిచారు. దీంతో కొంత భాగం ధ్వంసమైంది. ప్రస్తుతానికి ఈ నౌక తన ప్రయాణాన్ని సురక్షితంగా తిరుగుప్రయాణమైంది.

గాజాలో ఇజ్రాయెల్ చేస్తున్న యుద్ధానికి హౌతీలు నిరసనలు తెలుపుతూ ఇలాంటి దాడులకు పాల్పడుతున్నారు. ముఖ్యంగా ఇజ్రాయెల్, అమెరికా నౌకలను లక్ష్యంగా చేసుకుని దాడి చేస్తున్నారు. అటు అగ్రరాజ్యం అమెరికా రక్షణ చర్యలకు దిగింది. యెమెన్‌లోని హౌతీ తిరుగుబాటుదారుల స్థావరాలపై క్షిపణి, వైమానికదాడులు చేస్తోంది.

అయోధ్య (Ayodhya) రామ మందిర (Ram Mandhir) ప్రారంభోత్సవం రోజున బెంగాల్‌లో సర్వమత ర్యాలీకి టీఎంసీ (TMC) అధినేత్రి, సీఎం మమతా బెనర్జీ (Mamatha Benarjee) పిలుపు నివ్వడంపై బీజేపీ తీవ్ర స్థాయిలో మండిపడుతోంది. జనవరి 22న జరిగే అయోధ్య రామ మందిర ప్రారంభోత్సవ కార్యక్రమానికి మమతా బెనర్జీ వెళ్లడం లేదని బీజేపీ ఎంపీ దిలీప్ ఘోష్ అన్నారు.

కానీ బెంగాల్‌లో ఆమె ఊరెగింపు చేస్తున్నారని మండిపడ్డారు. ఆమె ఎవరిని కలుపుతోందని ప్రశ్నించారు. బెంగాల్‌లో రక్తపాతం జరుగుతోందన్నారు. ఆమెను ఆ రాముడు కూడా క్షమించబోడని ఫైర్ అయ్యారు. మరోనేత సుకాంత్ మజుందార్ మాట్లాడుతూ…. బెంగాల్‌లో హిందువులు మైనార్టీలుగా ఉన్న ప్రాంతాల్లొ బాబర్ మద్దతుదారులు రామ మందిర ప్రాణ ప్రతిష్టకు సంబంధించిన ఉత్సవాలకు ఆటంకం కలిగించే అవకాశం ఉందన్నారు.

బెంగాల్ ను ఉగ్రవాదుల కేంద్రంగా సీఎం మమతా బెనర్జీ మార్చారని తీవ్ర ఆరోపణలు చేశారు. అంతకు ముందు సీఎం మమతా బెనర్జీ మాట్లాడుతూ…. అయోధ్యలో రామ మందిర ప్రారంభోత్సవం జరిగే రోజు బెంగాల్‌లో ‘సర్వ ధర్మ’ర్యాలీని నిర్వహించనున్నట్లు వెల్లడించారు. కాళీ ఘాట్ ఆలయం వద్ద తాను ఊరేగింపులో పాల్గొని ప్రత్యేక పూజలు చేస్తానని తెలిపారు.

అన్ని మతాల వారు ఈ కార్యక్రమంలో పాల్గొనాలని మమతా బెనర్జీ కోరారు. రామ మందిరి ప్రాణ ప్రతిష్టకు కౌంటర్ గా ఈ ర్యాలీని చేపడుతున్నారా అని మీడియా అడిగిన ప్రశ్నకు ఆమె బదులిస్తూ….. తాను రామ మందిరానికి కౌంటర్‌గా ఇ ఈవెంట్ చేయడం లేదన్నారు. మతం వేరు, కానీ పండుగలు అందరికీ ఉంటాయని చెప్పారు. తాను అంతకు మించి చెప్పలేనన్నారు.

ఢిల్లీ సీఎం అరవింద్ కేజ్రీవాల్ (Aravind Kejriwal) ఈ సారి కూడా ఈడీ (ED) విచారణకు గైర్హాజరు అయ్యే అవకాశాలు ఉన్నట్టు తెలుస్తోంది. తాజాగా ఈడీ నోటీసులకు సీఎం అరవింద్ కేజ్రీవాల్ సమాధానం ఇచ్చారు. ఢిల్లీ లిక్కర్ కేసుకు సంబంధించిన మనీలాండరింగ్ కేసులో తాను నిందితునిగా లేనని వెల్లడించారు. అలాంటప్పుడు ఈ కేసులో తనకు నోటీసులు ఎందుకు జారీ చేశారని ఈడీకి సీఎం కేజ్రీవాల్ లేఖ రాసినట్టు ఆప్ వర్గాలు వెల్లడించాయి.

రాబోయే లోక్ సభ ఎన్నికల్లో ప్రచారం చేయకుండా తమ అధినేత, సీఎం అరవింద్ కేజ్రివాల్‌ను అడ్డుకోవాలని బీజేపీ ప్రయత్నాలు చేస్తోందని ఆప్ ఆరోపించింది. ఈ కేసులో కేజ్రీవాల్ నిందితుడు కాదని ఈడీనే స్వయంగా చెప్పిందని తెలిపింది. మరి ఎందుకు ఈడీ నోటీసులు పంపుతోందని ప్రశ్నించింది. గత వారం అరవింద్ కేజ్రీవాల్ కు ఈడీ సమన్లు పంపింది.

ఈ కేసులో ఇప్పటికే ఆయనకు ఈడీ నాలుగు సార్లు సమన్లు పంపింది. కానీ ఆయన మూడు సార్లు ఈడీ విచారణకు హాజరు కాలేదు. తాజాగా ఈ రోజు ఈడీ విచారణకు ఆయన హాజరు కావాల్సి ఉంది. కానీ ఈ రోజు కూడా ఆయన విచారణకు డుమ్మా కొట్టే అవకాశం ఉన్నట్టు తెలుస్తోంది. షెడ్యూల్ ప్రకారం ఆయన మూడు రోజుల గోవా పర్యటనకు వెళ్లాల్సి ఉంది.

పంజాబ్ సీఎం భగవంత్ సింగ్ మాన్‌తో కలిసి ఈ రోజు ఆయన గోవా బయల్దేరి వెల్లనున్నారు. అక్కడ నిర్వహించే లోక్ సభ సన్నాహక సమావేశంలో పాల్గొంటారు. ఈడీ నాల్గవ సారి సమన్ల విషయాన్ని మీడియా ప్రస్తావించగా దానికి కేజ్రీవాల్ బదులిస్తూ….. ఈ విషయంలో చట్టం ప్రకారం ఏమి చేయాలో తాము అది చేస్తామని పేర్కొన్నారు.

అయోధ్య (Ayodhya)లో రామ మందిరానికి అంకితం చేసిన స్మారక తపాల స్టాంపు (Postal Stamp)లను, ప్రపంచ వ్యాప్తంగా రామున్ని గౌరవిస్తూ విడుదల చేసిన స్టాంపులతో కూడిన పుస్తకాన్ని ప్రధాని నరేంద్ర మోడీ (PM Narendra Modi) ఈ రోజు విడుదల చేశారు. ఇందులో మొత్తం 48 పేజీలు ఉన్నాయి.

వాటిలో అమెరికా, న్యూజిలాండ్, సింగపూర్, కెనడా, కంబోడియా, యూఎన్ వంటి సంస్థలతో సహా 20 దేశాలకు పైగా దేశాలు జారీ చేసిన స్టాంపులను ఇందులో పొందుపరిచారు. స్టాంపులను, పుస్తకాన్ని విడుదల చేసిన అనంతరం ప్రధాని మోడీ మీడియాతో మాట్లాడుతూ….. ఈరోజు శ్రీరామ మందిర ప్రాణ ప్రతిష్ఠ అభియాన్ నిర్వహిస్తున్న మరో అద్భుతమైన కార్యక్రమానికి హాజరయ్యే అవకాశం తనకు లభించిందని వెల్లడించారు.

శ్రీ రామ జన్మభూమి మందిర్‌పై 6 స్మారక తపాలా స్టాంపులు, ప్రపంచవ్యాప్తంగా రాముడిపై విడుదల చేసిన స్టాంపుల ఆల్బమ్‌ను విడుదల చేసినట్టు పేర్కొన్నారు. ఈ సందర్బంగా దేశ ప్రజలకు, ప్రపంచవ్యాప్తంగా ఉన్న రామభక్తులందరికీ అభినందనలు తెలియజేస్తున్నానని చెప్పారు. ఈ ఆరు స్టాంపుల్లో రామాయణంలోని కీలకమైన వ్యక్తులు, అంశాలను సూచిస్తాయని వివరించారు.

వీటిలో రామాలయం, గణేశ్, హనుమాన్, జటాయు, కేవత్రాజ్, మాత శబరిపై స్టాంపులు ఉన్నాయని పేర్కొన్నారు. వివిధ సమాజాలపై భగవాన్ శ్రీరాముడి ప్రభావం ఎలా ఉందో తెలిపేందుకు గాను ఈ స్టాంప్ బుక్ ను విడుదల చేశారు. ఈ స్టాంపుల రూపకల్పనలో శ్రీరామ జన్మభూమి మందిరానికి సంబంధించిన పలు ముఖ్యమైన అంశాలకు చోటు కల్పించారు.