National

కాంగ్రెస్ పార్టీ అగ్రనేతలు రిలీజ్ చేసిన మేనిఫెస్టోపై అసోం(ASSAM) సీఎం హిమంత బిస్వశర్మ(CM HIMANTHA BISWASHARMA) విమర్శలు గుప్పించారు. ఈ మేనిఫెస్టో భారత్‌లో కంటే పొరుగున ఉన్న పాకిస్తాన్ ఎన్నికలకు చాలా బాగా పనికొస్తుందని ఎద్దేవా చేశారు. ఈ మేనిఫెస్టో సమాజాన్ని విభజించే లక్ష్యంతో ఉన్నట్లు కనిపిస్తోందన్నారు. జోర్హాట్ నియోజకవర్గంలో జరిగిన ఎన్నికల ర్యాలీలో బిస్వశర్మ ప్రసగించారు.

‘కాంగ్రెస్ మేనిఫెస్టో ఎప్పటిలాగే బుజ్జగింపు రాజకీయాలను తలపిస్తోంది. దీనిని పూర్తిగా ఖండిస్తున్నాం. ఇది భారత్‌లో జరిగే ఎన్నికల కోసం కాకుండా పాకిస్తాన్ జరిగే ఎన్నికల కోసం ఉద్దేశించినదిగా అనిపిస్తోంది’ అని వ్యాఖ్యానించారు.దేశంలో హిందువులు లేదా ముస్లింలు ఎవరూ ట్రిపుల్ తలాక్ పునరుద్ధరుణను కోరుకోవడం లేదన్నారు.

బాల్యవివాహాలు, బహుభార్యత్వాన్ని కూడా ఎవరూ సమర్థించడం లేదన్నారు.సమాజాన్ని విభజించి అధికారంలోకి రావాలని కాంగ్రెస్ భావిస్తోందన్నారు. అసోం 14 స్థానాలను బీజేపీ కైవసం చేసుకుంటుందని ధీమా వ్యక్తం చేశారు. దేశాన్ని ప్రపంచంలోనే విశ్వగురువుగా మార్చేందుకు బీజేపీ కంకణం కట్టుకున్నదన్నారు.

బిస్వశర్మ వ్యాఖ్యలపై కాంగ్రెస్ పార్టీ ఘాటుగా స్పందించింది. ఆయన లాంటి పార్టీ మారిన వ్యక్తులకు లౌకిక, సమ్మిళిత తత్వాన్ని అర్థం చేసుకోలేరని అసోం కాంగ్రెస్ అధికార ప్రతినిధి బేదబత్ర బోరా తెలిపారు. అన్నివర్గాల ప్రయోజనాలను కాపాడటమే కాంగ్రెస్ పార్టీ లక్ష్యమన్నారు.

కేరళ(Kerala)లోని వయనాడ్(Vayanad)లో బీజేపీ అభ్యర్థి కె.సురేంద్రన్‌(Surendran)కు మద్దుతుగా కేంద్ర మంత్రి స్మృతి ఇరానీ(Smriti Irani) ప్రచారం చేశారు. ఈ సందర్భంగా కాంగ్రెస్ అధినేత రాహుల్ గాంధీ(Rahul Gandhi) వయనాడ్ నుంచి పోటీ చేయడంపై సంచలన వ్యాఖ్యలు చేశారు. రాహుల్ అక్కడే ఎందుకు పోటీ చేస్తున్నాడని ప్రశ్నించారు.

యూపీలో పోటీ చేయొచ్చు కదా అని ఇండియా కూటమిలోని వామపక్ష పార్టీలే ప్రశ్నిస్తున్నాయన్నారు. వారిని రాహుల్ ఢిల్లీలో కౌగిలించుకొని.. కేరళలో మాత్రం సీటు కోసం అడుక్కుంటున్నారంటూ స్మృతి ఇరానీ ఎద్దేవా చేశారు. వయనాడ్‌లో రాహుల్ గాంధీ పోటీ చేయడాన్ని ఆ రాష్ట్ర సీఎం పినరాయి విజయన్ తప్పబట్టారని గుర్తు చేశారు.

‘ఢిల్లీ మే హగ్గింగ్, కేరళ మే బెగ్గింగ్, కర్ణాటక మే థగ్గింగ్’ అంటూ రాహుల్‌పై విమర్శలు గుప్పించింది. మహిళలు భారీ సంఖ్యలో బీజేపీకి ఓట్లు వేయాలని అభ్యర్థించారు. ఓట్లు వేయడం ఏ టీవీ సీరియల్‌లో ఆట కాదని వ్యాఖ్యానించారు. ఇది బాధ్యతతో కూడినదని, ప్రతీ ఒక్క మహిళ సీరియస్‌గా రాజకీయ విషయాలపై దృష్టి పెట్టాలని సూచించారు.

‘సాస్-బాహు’ సీరియల్స్ జీవితాలు వాస్తవాలకు చాలా దూరంగా ఉన్నాయని తెలిపారు. అయితే, కాంగ్రెస్ ఇప్పటికీ బలమైన ఉనికిని కలిగి ఉన్న కొన్ని రాష్ట్రాల్లో కేరళ ఒకటి.. ఇక్కడి నుంచి 20 మంది ఎంపీలు లోకసభకు ప్రతినిధ్యం వహిస్తున్నారు. 2019 లోక్‌సభ ఎన్నికలలో రాహుల్ గాంధీ వయనాడ్ నుంచి 4.31 లక్షల ఓట్ల భారీ ఆధిక్యంతో విజయం సాధించారు.

పాకిస్థాన్‌(Pakistan)లో ఉగ్రవాదుల(Terrorists) మిస్టరీ మరణాల వెనుక భారత్‌ హస్తం ఉందంటూ యూకే మీడియా రాసిన కథనంపై రక్షణ శాఖ మంత్రి రాజ్‌నాథ్ సింగ్(Rajnathsingh) స్పందించారు. దేశంలో శాంతికి విఘాతం కలిగించేందుకు ఏ ఉగ్రవాది అయినా ప్రయత్నిస్తే ఉపేక్షించేదిలేదని స్పష్టం చేశారు.

ఈ సందర్భంగా రాజ్‌నాథ్ సింగ్ మీడియాతో మాట్లాడుతూ.. ఒకవేళ ఉగ్రవాదులు పాకిస్థాన్‌కు పారిపోయినా వదలమన్నారు. అక్కడికి వెళ్లి మరీ మట్టుపెడతామని హెచ్చరించారు. తాము పొరుగుదేశాలతో ఎల్లప్పుడూ స్నేహమే కోరుకుంటామని కేంద్రం ప్రభుత్వ(Central Govt) వైఖరిని ఆయన వెల్లడించారు.

కాగా, బ్రిటన్‌కు చెందిన ‘ది గార్డియన్’ పత్రిక భారత్‌పై ఇటీవల తీవ్ర ఆరోపణలు చేసింది. 2019లో పుల్వామా ఘటన తర్వాత నుంచి దేశానికి ప్రమాదకరంగా మారుతున్న వ్యక్తులను న్యూఢిల్లీ లక్ష్యంగా చేసుకొందని తెలిపింది. భారత విదేశీ ఇంటెలిజెన్స్ సంస్థ ‘రా’ దాదాపు 20 హత్యలు చేసి ఉంటుందని ఆరోపించింది.

భారత్, పాక్ ఇంటెలిజెన్స్ అధికారులు ఇచ్చిన సమాచారం ఆధారంగానే కథనం రాసినట్లు వెల్లడించింది. ఈనేపథ్యంలో రాజ్‌నాథ్ సింగ్ స్పందిస్తూ.. ప్రధాని మోడీ చెప్పింది అక్షరాలా నిజమన్నారు. భారత్ శక్తిని పాకిస్థాన్ అర్థం చేసుకోవడం ప్రారంభించిందని తెలిపారు. అలాగే భారత్ ఎప్పుడూ ఏ దేశంపై దాడి చేయదని, వారి భూభాగాలను ఆక్రమించేందుకు యత్నించదని స్పష్టం చేశారు.

తన పొరుగుదేశాలతో సత్సంబంధాలను కొనసాగించాలని కోరుకుంటుందని తెలిపారు. ఎవరైనా అందుకు విరుద్ధంగా ప్రవర్తిస్తే మాత్రం ఉపేక్షించదని వ్యాఖ్యానించారు. మరోవైపు దీనిపై ఇప్పటికే భారత విదేశాంగ శాఖ స్పందించింది. ఇది పూర్తిగా తప్పుడు సమాచారమని.. భారత వ్యతిరేక ప్రచారమని చెప్పింది. ఇతర దేశాల్లో హత్యలు భారత్ ప్రభుత్వ విధానం కాదని తేల్చిచెప్పింది.

లోక్‌సభ ఎన్నికల్లో(Loksabha Elections) తెలంగాణ(Telangana)లో 10స్థానాలకు పైగా గెలుస్తామని కేంద్ర మంత్రి, బీజేపీ తెలంగాణ రాష్ట్ర అధ్యక్షుడు కిషన్‌రెడ్డి(Kishan Reddy) అన్నారు. బీజేపీ(BJP) ఆవిర్భావ దినోత్సవం సందర్భంగా శుక్రవారం హైదరాబాద్‌(Hyderabad)లోని కార్యాలయంలో జెండా ఎగురవేశారు.

ఈ సందర్భంగా కిషన్ రెడ్డి మాట్లాడుతూ.. ప్రధాని నరేంద్ర మోదీ విశ్వ నాయకుడిగా గుర్తింపు పొందారని, ప్రపంచమంతా భారత్ వైపు చూస్తోందని తెలిపారు. దేశ వ్యాప్తంగా బీజేపీ 400సీట్లతో కేంద్రంలో మళ్లీ అధికారంలోకి వస్తుందని ధీమా వ్యక్తం చేశారు. రాష్ట్రంలో బీఆర్ఎస్ రోజురోజుకు కనుమరుగవుతోందని, కాంగ్రెస్ సర్కార్ ఎన్నికల్లో హామీలను గాలికి వదిలేసిందని విమర్శించారు. రాష్ట్రంలో కాంగ్రెస్ పార్టీ పతనం ప్రారంభమైందన్నారు.

వంద రోజుల్లో ఆరు గ్యారంటీలు అమలు చేస్తామని చెప్పిన రాహుల్ గాంధీ ఏ మొహం పెట్టుకుని తెలంగాణకు వస్తున్నారని మండిపడ్డారు. హామీలు అమలు చేయలేదు కానీ.. పెద్ద పెద్ద ప్రకటనలు, సభలు పెడుతున్నారని ఎద్దేవా చేశారు. సీఎం రేవంత్ రెడ్డికి పార్టీ ఫిరాయింపులపై ఉన్న శ్రద్ధ పథకాల అమలుపై లేదని దుయ్యబట్టారు. ఓటు అడిగే నైతిక హక్కు కాంగ్రెస్ పార్టీకి లేదంటూ తీవ్ర స్థాయిలో ధ్వజమెత్తారు.

పార్లమెంట్ ఎన్నికల కోసం మేనిఫెస్టోను ప్రకటించడం కాదని.. ముందు తెలంగాణలో అసెంబ్లీ ఎన్నికల సందర్భంగా ఇచ్చిన హామీలను కాంగ్రెస్ ప్రభుత్వం అమలు చేయాలని హితవు పలికారు. రాష్ట్ర ప్రజల దృష్టి ఇప్పుడు బీజేపీపై ఉందన్నారు. పార్లమెంట్ ఎన్నికల్లో మోడీకే ఓటేయాలని ఇప్పటికే నిర్ణయం తీసుకున్నారని తెలిపారు. మెజార్టీ సీట్లు గెలుచుకోబోతున్నామని ధీమా వ్యక్తం చేశారు.