National

Chandrayaan-3: చంద్రయాన్-3 మిషన్ విజయవంతం కావడంతో ఇండియాకు కలుగుతున్న ప్రయోజనాలు ఇన్నీ అన్నీ కావు. దేశ అంతరిక్ష సంబంధ ప్రాజెక్టుల్లో ఇక పెట్టుబడులు వెల్లువ కావచ్చు. భారత స్పేస్ సెక్టార్ కంపెనీలు ఇక క్యూ కట్టనున్నాయి. రాకెట్ కమ్యూనికేషన్ లోను, నావిగేషన్ లోనూ రాకెట్ కమ్యూనికేషన్ లోను వినియోగించే ఎలెక్ట్రానిక్స్ నుంచి మెటల్ గేర్స్ వరకు ఆయా పరికరాలను, సాధనాలను సప్లయ్ చేసే 13 కంపెనీల స్టాక్స్ ఈ వారం మార్కెట్ కి మరో 2.5 బిలియన్ డాలర్లకు పైగా సొమ్మును అదనంగా వచ్చేట్టు చేశాయని బ్లూమ్ బెర్గ్ తెలిపింది.

ఇదే సందర్భంగా రష్యా ప్రయోగించిన లూనా-25 విఫలం కావడాన్ని కూడా విశ్లేషకులు గుర్తు చేస్తున్నారు. ఇండస్ట్రియల్ గ్యాస్ ఫర్మ్ .. ‘లిండే ఇండియా’ ఆధ్వర్యంలోని స్పేస్ఎం క్రాఫ్ట్ సప్లయర్ల ప్రయోజనాలు ఈ వారంలోనే 23 శాతం పైగా పెరిగాయి. తమ మిషన్ కు క్రిటికల్ సిస్టమ్స్ ను, మాడ్యూల్స్ ను సరఫరా చేసే సెంటమ్ ఎలెక్ట్రానిక్స్ ప్రయోజనాలు 11 శాతం పైగా పెరగగా . శాటిలైట్ కమ్యూనికేషన్ ప్రొవైడర్ అయిన అవాంటెల్ కూడా 12 శాతం పైగా లాభాలను చవి చూసింది.

మూన్ మిషన్ వంటి క్రిటికల్ ప్రాజెక్టుల్లో పాల్గొనే ఆయా కంపెనీలకు అవకాశాలు కలిసొస్తాయని ముంబై లోని వెల్త్ మిల్స్ సెక్యూరిటీస్ ప్రైవేట్ లిమిటెడ్ కు చెందిన స్ట్రాటిజిస్ట్ క్రాంతి బత్తిని తెలిపారు. గ్లోబల్ ప్రాజెక్టుల్లో ఇవన్నీ భాగమవుతాయన్నారు. కొన్ని లిస్టెడ్ సంస్థల షేర్లు అప్పుడే ఎగబాకాయి. వీటిలో ఎల్ అండ్ టీ, మిశ్రధాతు నిగమ్, హిందుస్థాన్ ఏరోనాటిక్స్ వంటివి ఉన్నాయి. భెల్ తప్ప మిగిలిన అన్ని కంపెనీల షేర్లు పాజిటివ్ ట్రెండ్ లోనే నడిచాయి. ముఖ్యంగా లార్సెన్ అండ్ టూబ్రో, మిశ్రధాతు నిగమ్, భెల్ చంద్రయాన్-3 మిషన్ లో కీలక పాత్ర పోషించాయి. హిందుస్థాన్ ఏరోనాటిక్స్, వాల్ చంద్ నగర్ ఇండస్ట్రీస్, ఎం టీ ఏ ఆర్ టెక్నాలజీస్ సంస్థలు వివిధ దశల్లో ఈ మిషన్ కు సహకరించాయి.

ఇక ప్రపంచ వ్యాప్తంగా 2013 నుంచి 1791 అంతరిక్ష టెక్నాలజీ సంస్థల్లో రూ. 22 లక్షల కోట్ల పెట్టుబడులు వచ్చాయి. స్పేస్ ఫౌండేషన్ లెక్కల ప్రకారం ఈ ఏడాది ద్వితీయార్థం నాటికి అంతరిక్ష ఆర్ధిక వ్యవస్థ విలువ రూ. 45 లక్షల కోట్లుగా తేలింది. పదేళ్లలో ఈ రంగం విలువలో 91 శాతం వృద్ధి నమోదైంది. కాగా ఈ మిషన్ సక్సెస్ తో చంద్రుని ఉపరితలం, పర్యావరణంపై పరిశోధనలు చేయగలుగుతారు. ముఖ్యంగా దక్షిణ ధృవంపై ఐస్, నీరు వంటి వనరులు ఉన్న దృష్ట్యా ఈ పరిశోధనల విషయంలో ఇతర దేశాలకు మన దేశం మార్గదర్శకం కానుంది. జాబిల్లిపై శాశ్వత నివాస పరిశోధనలకు ఊతం లభించనుంది. చంద్రుని పుట్టుక, పరిణామంపై మరిన్ని పరిశోధనలకు ఈ మిషన్ తోడ్పడనుంది . ఇతర దేశాల భవిష్యత్ ప్రయోగాలకు కూడా ఇది దోహదం చేయనుంది. ఈ వ్యోమనౌక చంద్రునిపై రెండు వారాలు పరిశోధనలు చేయనుంది.

Chandrayaan-3 అంతా విజయవంతమే. కోట్లాది భారతీయులు, ప్రపంచ దేశాలు ఆసక్తిగా, ఉత్కంఠగా ఎదురు చూస్తున్న క్షణం రానే వచ్చింది. బుధవారం సాయంత్రం సరిగ్గా 6 గంటల 4 నిముషాలకు చంద్రయాన్-3 ల్యాండింగ్ విజయవంతమైంది. చంద్రుని దక్షిణ ధృవంపై బండరాళ్లు, గుంతలు లేని స్థలం చూసుకుని విక్రమ్ ల్యాండ్ అయింది.

నరాలు తెగే ఉత్కంఠ మధ్య ఈ మిషన్ సూపర్ సక్సెస్ అయింది. అంతరిక్ష పరిశోధనల్లో ఇస్రో మరో మైలు రాయిని చేరుకుంది. సాఫ్ట్ ల్యాండింగ్ తో ఇస్రో శాస్త్రవేత్తల సంతోషానికి అవధులు లేకపోయింది.

సాయంత్రం 5 గంటల 45 నిముషాలకు మొదలైనల్యాండింగ్ ప్రక్రియ కచ్చితంగా నిర్దేశిత సమయానికి పూర్తయింది/ జాబిల్లిపై రోవర్ ను విజయవంతంగా దింపిన ప్రపంచ దేశాల్లో ఇండియా నాలుగో దేశమైంది. దక్షిణాఫ్రికా పర్యటనలో ఉన్న ప్రధాని మోడీ.. ఈ ల్యాండింగ్ ని వర్చ్యువల్ గా చూశారు.

ఇస్రో శాస్త్రజ్ఞులను అభినందించారు. ఇది మన దేశానికే గర్వ కారణమన్నారు. భారత్ సరికొత్త చరిత్రను సృష్టించిందని అన్నారు. సాఫ్ట్ ల్యాండింగ్ సమయం పట్టిందని, ఏమైనా ఈ విజయం మనందరిదని అన్నారు.

Scholorships : అవినీతికి ఏదీ అతీతం కాదని ఈ స్టోరీ గురించి తెలుసుకున్న ఏ చిన్న పిల్లాడైనా చెబుతాడు. అందినకాడికి దోచుకుతింటున్న రాజ్యమిది.. అవినీతికి ఆజ్యం పోసే స్కాముల స్వాములున్న కాలమిది.. అని ఎలుగెత్తి చాటుతాడు. మైనారిటీ పిల్లలకు ఉద్దేశించిన స్కాలర్ షిప్పుల భోక్తల కథ విని బోలెడంత ఆశ్చర్యపడిపోతాడు. పిల్లల నోట్లో మట్టి కొట్టే స్వాహా స్వాములు ఎక్కడ నక్కారో గానీ అంతా గప్ చుప్ ! నాడు యూపీఏ హయాంలో వెలగబెట్టిన పథకం కాస్తా పక్కదారి పట్టి సొమ్మంతా ఫేక్ వీరుల జేబుల్లోకి వెళ్ళిపోయింది. కథ ఎక్కడ, ఎలా మొదలు పెట్టినా చివరకు వేలకోట్ల కుంభకోణం వద్దకే చేరుతుంది. నకిలీ సంస్థలు, నకిలీ డాక్యుమెంట్లతో బురిడీ కొట్టించి ప్రభుత్వ ఖజానాకు గండి కొట్టించిన ఛీటర్లున్న రాజ్యంలో ఎక్కడ ఎలా మొదలు పెట్టాలో తెలియకుండా పోయింది.

ఇక అసలు విషయానికి వస్తే మైనారిటీ స్కాలర్ షిప్ ప్రోగ్రాం కింద నాడు ..2007 లో ఆ నాటి ప్రభుత్వం దీన్ని ప్రతిష్టాత్మకంగా చేబట్టింది. కానీ ఎప్పుడు అవినీతికి ఎవరు, ఎలా బీజం వేశారో గానీ దాదాపు 830 మైనారిటీ సంస్ధలు .. అంటే సుమారు 53 శాతం సంస్థలు ఈ స్కాలర్ షిప్పులను ‘పక్కదారి పట్టించాయి.’ 18 ఏళ్లకు గానీ ఈ చీటింగ్ బయటపడలేదు. ఇది దాదాపు రూ. 144 .83 కోట్ల కుంభకోణమని తెలిసి మైనారిటీ వ్యవహారాలశాఖ ఖంగు తింది . ఈ యవ్వారం బయట పడడంతో కేంద్రమంత్రి స్మృతి ఇరానీ దీనిపై సిబిఐ ఇన్వెస్టిగేషన్ కి ఆదేశించారు. మైనారిటీల శాఖ గత జులై 10 న అధికారులకు ఫిర్యాదు చేసింది. దేశశంలోని 34 రాష్ట్రాల్లోని 100 జిల్లాల్లో 1572 సంస్ధలను స్క్రూటినీ చేస్తూపోతే అవినీతి భూతం వికటాట్టహాసం చేస్తూ కనిపించింది.

నకిలీ గాళ్ళు బ్యాంకుల్లో ఖాతాలు తెరిస్తే వాటిని అధికారులు స్తంభింపజేశారు. ఇక వీటిలో పలు సంస్థలు నేషనల్ స్కాలర్ షిప్ పోర్టల్, యునిఫైడ్ డిస్ట్రిక్ట్ ఇన్ఫర్మేషన్ సిస్టం ఫర్ ఎడ్యుకేషన్ కింద రిజిస్టర్ చేయించుకున్నాయి. కానీ దేవతా వస్త్రాల్లాగా అసలు వీటి ఉనికే లేదని, ఉన్నా అవి పని చేయడం లేదని తెలిసింది. ఈ సంస్ధల నోడల్ ఆఫీసర్లను, ఇతర అధికారులను ఇన్వెస్టిగేట్ చేసే పనిలో పడింది సిబిఐ. వీరితో బాటు జిల్లాల్లోని నోడల్ ఆఫీసర్లు కూడా చేసిన వెరిఫైడ్ కేసులు కూడా ఫేక్ అని తేలింది. ఆరా తీస్తే ఛత్తీస్ గఢ్ లో 62 సంస్ధలు, రాజస్థాన్ లో 99, అసోంలో 68 సంస్థలు వట్టి బోగస్ అని కూడా తెలిసింది. కర్ణాటకలో 64, యూపీలో 44, బెంగాల్ లో 39 సంస్థలు అసలు ఉన్నాయో, లేవో కూడా తెలియలేదు. మొత్తానికి మైనారిటీ విద్యార్థుల స్కాలర్ షిప్ ల పేరిట కోట్ల కొద్దీ సొమ్మును తిలా పాపం తలా అన్నట్టు దోచుకు తిన్నారు . రాజకీయ నాయకుల నుంచి బడా బాబులు, చివరకు బ్యాంకర్లు కూడా ఈ దోపిడీలో భాగస్వాములయ్యారు. సీబీఐ దర్యాప్తు మరిన్ని జిల్లాలకు విస్తరిస్తే ఇంకెన్ని కోట్లను స్వాహా చేశారో తెలుస్తుంది. అర్హత లేకున్నా స్కాలర్ షిప్.. బ్యాంకులు సైతం ఫేక్ డాక్యుమెంట్లు ఇచ్చినవారికి కూడా ఖాతాలు తెరిచి తమ ‘ఉదారతను’ చాటుకున్నాయి.

కేరళలోని మలప్పురం లో ఓ బ్యాంక్ 67 వేల స్కాలర్ షిప్పులను మంజూరు చేసిందట. పిల్లల నోట్లో మట్టి కొట్టి లబ్ది దారులకు ప్రయోజనం కలిగించాయి బ్యాంకులు.

Mizorum : మిజోరాం రాజధాని ఐజాల్ సమీపంలోని సాయిరాంగ్ లో బుధవారం నిర్మాణంలో ఉన్న రైల్వే వంతెన కూలిపోగా 17 మంది కార్మికులు మరణించారు. మరికొందరు తీవ్రంగా గాయపడ్డారు. శిథిలాల కింద కొంతమంది చిక్కుకుని ఉండవచ్చునని భావిస్తున్నారు. మృతుల సంఖ్య పెరగవచ్చునని, సహాయక చర్యలు యుద్ధ ప్రాతిపదికన కొనసాగుతున్నాయని అధికారులు తెలిపారు. ప్రమాద స్థలం వద్ద 35 నుంచి 40 మంది పని చేస్తున్నట్టు తెలిసింది.

ఈ దుర్ఘటనపై మిజోరాం సీఎం జోరంతంగా దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. గాయపడినవారు త్వరగా కోలుకోవాలని ఆకాంక్షించారు. ఈ రైల్వే వంతెన ప్రమాదంలో మరణించినవారి కుటుంబాలకు కేంద్రం 2 లక్షల చొప్పున గాయపడినవారికి 50 వేల చొప్పున ఎక్స్ గ్రేషియా ప్రకటించింది. మృతుల కుటుంబాలకు ప్రధాని మోడీ తీవ్ర సంతాపం తెలుపుతూ ట్వీట్ చేశారు.

రైల్వే శాఖ మంత్రి అశ్వినీ వైష్ణవ్ కూడా ఈ ప్రమాదంపై దిగ్భ్రాంతిని వ్యక్తం చేశారు. రైల్వే అధికారులు ప్రమాద స్థలి వద్ద ఉన్నారని, సహాయక చర్యలను పర్యవేక్షిస్తున్నారని ఆయన తెలిపారు.

మృతుల కుటుంబాలకు రైల్వే శాఖ తరఫున 10 లక్షలు, తీవ్రంగా గాయపడిన వారికి 2 లక్షలు, స్వల్పంగా గాయపడినవారికి 50 వేల చొప్పున ఎక్స్ గ్రేషియాను ఆయన ప్రకటించారు.

Baghel : చంద్రయాన్-3 మిషన్ ఘనత అంతా దివంగత మాజీ ప్రధాని జవహర్లాల్ నెహ్రూకే చెందుతుందని ఛత్తీస్ గఢ్ సీఎం భూపేశ్ బాఘేల్ అన్నారు. నాడు నెహ్రూ చాలా ముందు చూపుతో వ్యవహరించారని, అంతరిక్ష పరిశోధనలకోసం 1962 లో ఇండియన్ నేషనల్ కమిటీ ఫర్ స్పేస్ రీసెర్చ్ ను స్థాపించారని ఆయన చెప్పారు అదే ఇప్పుడు భారత అంతరిక్ష పరిశోధనా కేంద్రం (ఇస్రో) గా మారిందన్నారు. ఈ సంస్థకు చెందిన శాస్త్రవేత్తలకృషితో బాటు ఈ మిషన్ విషయంలో నాటి తొలి ప్రధాని నెహ్రూ పాత్ర కూడా ఉందన్నారు.

చంద్రయాన్-3 ప్రయోగం మన శాస్త్రజ్ఞుల అమోఘమైన కృషికి నిదర్శనమని, వారిని మనఃస్ఫూర్థిగా అభినందిస్తున్నానని బాఘేల్ ట్వీట్ చేశారు. అయితే దీనిపై బీజేపీ నేత నలిన్ కోహ్లీ స్పందిస్తూ ఈ మిషన్ కి క్రెడిట్ ని కాంగ్రెస్ పార్టీ నెహ్రూ కే ఆపాదిస్తే అది గతంలోని పోకడలో వారు చిక్కుకున్నట్టేనన్నారు. ఆ పార్టీకి ప్రస్తుత లేదా భవిష్యత్తు గురించి ఏమీ తెలియదన్నారు

. చంద్రయాన్-3 కి క్రెడిట్ ని మనం ఇస్రో సైంటిస్టులకు, ఇస్రోకు, ప్రభుత్వానికి ఇవ్వాలని ఆయన పేర్కొన్నారు. బీజేపీ మరో నేత అమిత్ మాలవీయ.. ప్రధాని మోడీ నాయకత్వం కింద ఇండియా ఎంతో ఘనత సాధించిందని, ఇది నాడు నెహ్రూ, మన్మోహన్ సింగ్ ల హయాంలో కన్నా చాలా హెచ్చు స్థాయి అని వ్యాఖ్యానించారు.

గత తొమ్మిదేళ్లలో మన దేశం అంతరిక్ష ప్రయోగాల్లో ఎన్నో విజయాలు చవి చూసిందన్నారు. ఇక సక్సెస్ అన్నది ఏ రాజకీయ పార్టీది కాదని, చంద్రయాన్-3 మిషన్ మొత్తం దేశానికే గర్వకారణమని తృణమూల్ కాంగ్రెస్ చీఫ్, బెంగాల్ సీఎం మమతా బెనర్జీ అన్నారు. ఇస్రో టీమ్ అంతా ఇండియాదే .. వారి కృషి వల్లే ఈ ఘనత సాధ్యమైంది గానీ ఏ ఒక్క రాజకీయ పార్టీ వల్లో కాదని ఆమె వ్యాఖ్యానించారు.

CR Rao ; ప్రఖ్యాత గణిత శాస్త్రవేత్త, మహా మేధావి సీఆర్ రావు (CR Rao) కన్ను మూశారు. స్టాటిస్టిక్స్ రంగంలో అనేక సిధ్ధాంతాల రూపకర్త అయిన ఆయన వయస్సు 102 ఏళ్ళు.. తెలుగు కుటుంబానికి చెందిన ఆయన కర్ణాటకలో జన్మించారు. ప్రపంచంలోనే ప్రఖ్యాత సంఖ్యా శాస్త్రవేత్తగా గుర్తింపు పొందిన ఆయన స్టాటిస్టిక్స్ రంగంలో నోబెల్ బహుమతిగా పేర్కొనబడే ఇంటర్నేషనల్ ప్రైజ్ ఇన్ స్టాటిస్టిక్స్ పురస్కారాన్ని పొందారు. ఆధునిక గణిత శాస్త్రంలో అత్యంత ప్రతిభావంతుడైన ఆయనకు ఈ ఏడాదే ఈ అవార్డును ప్రదానం చేశారు. కర్ణాటకలోని హడగలిలో తెలుగు కుటుంబానికి జన్మించిన ఆయన ఏపీ లోని గూడూరు,నూజివీడు, నందిగామ, విశాఖలో స్కూల్ విద్యాభ్యాసం కొనసాగించారు.

ఆంధ్రా యూనివర్సిటీ నుంచి ఎంఎస్సీ మ్యాథమ్యాటిక్స్ లో పట్టా పుచ్చుకున్నారు. 1943లో కలకత్తా యూనివర్సిటీ నుంచి ఎంఏ స్టాటిస్టిక్స్ పూర్తి చేసిన సీఆర్ రావు గణిత శాస్త్రంలో పీ హెచ్ డీ కోసం బ్రిటన్ వెళ్లి సర్ రోనాల్డ్ ఏ వద్ద పీ హెచ్ డీ చేశారు. 1965 లో కేంబ్రిడ్జ్ యూనివర్సిటీకి చెందిన కింగ్స్ కాలేజీలో డీ ఎస్సీ డిగ్రీ చేశారు. మొదట ఇండియన్ స్టాటిస్టికల్ ఇన్స్ టిట్యూట్, కేంబ్రిడ్జ్ ఆంథ్రోపాలొజికల్ మ్యూజియంలో పని చేశారు.

భారత్ కు వచ్చిన ఆయన ఆ తరువాత డిపార్ట్మెంట్ ఆఫ్ స్టాటిస్టిక్స్ ను ప్రారంభించారు. 1968 లో సీఆర్ రావును పద్మభూషణ్, 2001 లో పద్మ విభూషణ్ అవార్డులు వరించాయి. 2002 లో నాటి అమెరికా అధ్యక్షుడు జార్జ్ బుష్ నుంచి నేషనల్ మెడల్ ఆఫ్ సైన్స్ పురస్కారం అందుకున్నారు. ఆయన పూర్తి పేరు కాల్యంపూడి రాధాకృష్ణ రావు.

పెన్సిల్వేనియన్ స్టేట్ యూనివర్సిటీలో ప్రొఫెసర్ గా పని చేసిన ఆయన బఫెలో లోని యూనివర్సిటీ రీసర్చ్ ప్రొఫెసర్ గా కూడా వ్యవహరించారు. హైదరాబాద్ యూనివర్సిటీ ఆవరణలో ఆయన పేరిట సీఆర్ రావు అడ్వాన్స్డ్ ఇన్స్ టిట్యూట్ ఆఫ్ మ్యాథమెటిక్స్ అండ్ స్టాటిస్టిక్స్ అండ్ కంప్యూటర్ సైన్స్ ని ఏర్పాటు చేశారు. 19 దేశాల నుంచి ఆయన 39 డాక్టరేట్లను పొందారు. 477 రీసర్చ్ పత్రాలను ప్రెజెంట్ చేసి.. 15 పుస్తకాలు రాశారు.

Pakistan : చంద్రయాన్-3 (Chandrayaan-3) బుధవారం సాయంత్రం 6 గంటల 4 నిముషాలకు చంద్రుని ఉపరితలంపై దిగనున్న నేపథ్యంలో పాకిస్తాన్ మాజీ మంత్రి ఫాద్ హుసేన్ (Fawad Hussain) . ఇండియాను.. ముఖ్యంగా ఇస్రోను ప్రశంసల వర్షంతో ముంచెత్తారు. ‘మానవాళికి ఇది చరిత్రాత్మకమైన క్షణమని’ అభివర్ణించారు. చంద్రయాన్-3 ల్యాండింగ్ ని ప్రత్యక్ష ప్రసారం చేయాలని ఆయన తమ దేశ ప్రభుత్వాన్ని, మీడియాను కోరారు.

ఇస్రో కు మరీమరీ కంగ్రాట్యులేషన్స్ అని ట్వీట్ చేశారు. లోగడ మాజీ ప్రధాని ఇమ్రాన్ ఖాన్ ప్రభుత్వంలో సైన్స్ అండ్ టెక్నాలజీ మంత్రిగా పని చేసిన ఈయన.. చంద్రయాన్-3 ప్రయోగం మానవాళికి.. ముఖ్యంగా ప్రజలకు, సైంటిస్టులకు, భారత స్పేస్ కమ్యూనిటీకి కూడా ప్రత్యేకమైనదని పేర్కొన్నారు.

బుధవారం సాయంత్రం 6.15 గంటలకు పాక్ మీడియా దీన్ని లైవ్ గా ప్రసారం చేయాలని కోరుతున్నానన్నారు. అయితే ఈయనే 2019 లో చంద్రయాన్-2 ప్రయోగం సందర్భంగా ఇస్రోను తీవ్రంగా అపహాస్యం చేశారు.

ఈ మిషన్ కోసం భారత ప్రధాని మోడీ ప్రభుత్వం 900 కోట్లు ఖర్చు పెడుతోందని, ఇది ఏ మాత్రం సముచితం కాదని నాడు విమర్శించారు. తన ట్వీట్ లో ఆయన ‘ఇండియా ఫెయిల్డ్’ అనే పదాన్ని కూడా హ్యాష్ ట్యాగ్ గా వినియోగించారు. చంద్రయాన్-2 చివరి దశలో విఫలమైన విషయం గమనార్హం.