News

రాష్ట్ర ప్రజలతో పాటు రాజకీయ నేతలను తెగ టెన్షన్ పెట్టిస్తున్న అంశం.. పార్లమెంట్ ఎన్నికల్లో విజయం ఎవరిని వరిస్తుంది.. ప్రస్తుతం నేతలంతా ఎవరి వ్యూహాల్లో వారున్నారు.. తమదే విజయం అనే ధీమాలో ఉన్న అభ్యర్థులు ఎన్నికల ప్రచారంలో జోరు ప్రదర్శిస్తున్నారు.. మరోవైపు మాటలతో ఒకరిని ఒకరు ఇరుకున పడేసుకొంటున్న దృశ్యాలు కనిపిస్తున్నాయి.

ఈ నేపథ్యంలో సీఎం రేవంత్ రెడ్డి (Revanth Reddy), బీఆర్ఎస్ (BRS)ని ఇరుకున పడేసేలా ఉన్న అంశాన్ని తెరమీదికి తెచ్చారు.. రాజ్యాంగాన్ని మార్చాలని గతంలో కేసీఆర్ అన్నారని గుర్తు చేసిన ఆయన.. ఇప్పుడు రాజ్యాంగాన్ని మార్చడానికి బీజేపీ (BJP) ప్రయత్నిస్తోందని ఆరోపించారు.. హైదరాబాద్ జూబ్లీహిల్స్‌లోని తన నివాసంలో శనివారం ఆయన మీడియా సమావేశం నిర్వహించారు. ఈ సందర్భంగా పలు కీలక వ్యాఖ్యలు చేశారు..

రిజర్వేషన్లపై బీఆర్ఎస్ స్టాండ్ ఏంటో కేసీఆర్ (KCR) ప్రకటించాలని డిమాండ్ చేసిన రేవంత్.. రాజ్యాంగాన్ని దెబ్బతీయాలని చూసే బీజేపీపై కేసీఆర్ పోరాటం ఏదని.. కేవలం మా ప్రభుత్వాన్ని కూల్చడంపైనే మీ దృష్టి ఉందని మండిపడ్డారు.. కేంద్రంలో పదేళ్ల బీజేపీ పాలనపై కనీసం ప్రశ్నించరా ? అని ధ్వజమెత్తారు.. బీఆర్ఎస్, బీజేపీ ఒక్కటే అనడానికి మల్లారెడ్డి, ఈటల రాజేందర్ సంభాషణ ఉదాహరణగా పేర్కొన్నారు.

తెలంగాణ (Telangana) పార్లమెంట్ ఎన్నికల్లో బీఆర్ఎస్ 5 సీట్లు బీజేపీకి తాకట్టు పెట్టిందని ఆరోపించిన రేవంత్ రెడ్డి.. మీ చీకటి ఒప్పందం నిజం కాకపోతే మేడ్చల్ ఎమ్మెల్యే మల్లారెడ్డిపై చర్యలు తీసుకోవాలని డిమాండ్ చేశారు. ఇంత కాలం దోపిడి చేసింది చాలదని ప్రభుత్వాన్ని కూల్చి మళ్ళీ దోపిడి చేయాలని చూస్తుందని బీఆర్ఎస్ అధిష్టానంపై మండిపడ్డారు..

తెలంగాణ (Telangana)లో పార్లమెంట్ ఎన్నికలు సమీపిస్తున్న కొద్ది పొలిటికల్ హీట్ పెరిగిపోతుంది. నేతలు సవాళ్ళు విసురుతూ రాజీనామా చేస్తామా అనే ఛాలెంజ్ పాలిటిక్స్ తో కిక్కు ఎక్కిస్తున్నారు.. ఇప్పటికే బీఆర్ఎస్ నేతలు పలు సవాళ్ళతో కాకా రేపుతుండగా.. బీజేపీ నేతలు సైతం తాము ఏం తక్కువ కాదని ఇదే దారిలో వెళ్తుండటం కనిపిస్తోంది. తాజాగా ఈ రేస్‌లోకి బీజేపీ ఎల్పీ నేత మహేశ్వర్ రెడ్డి ఎంటర్ అయ్యారు.

హైదరాబాద్ (Hyderabad) నాంపల్లిలోని బీజేపీ (BJP) స్టేట్ ఆఫీస్‌లో శనివారం ఆయన మీడియాతో మాట్లాడుతూ.. సీఎం రేవంత్ రెడ్డి (Revanth Reddy) కేవలం రూ.2 లక్షల రుణమాఫీపైనే సవాల్ విసురుతున్నారు.. మరీ అసెంబ్లీ ఎన్నికల్లో అధికారంలోకి వచ్చిన 100 రోజుల్లోనే అమలు చేస్తామని హామీ ఇచ్చిన ఆరు గ్యారెంటీల గురించి ఎందుకు మాట్లాడటం లేదని ప్రశ్నించారు.

కాంగ్రెస్ ప్రభుత్వం ఇచ్చిన హామీలన్నీ నేరవేరిస్తే ఎమ్మెల్యే పదవికి రాజీనామా చేసేందుకు తాను కూడా సిద్ధమని సంచలన ప్రకటన చేశారు. సీఎం చెప్పినట్లు ఆగస్ట్ 15 లోపు అన్ని హామీలు నేరవేరిస్తే తాను రాజకీయ సన్యాసం తీసుకొంటానని మహేశ్వర్ రెడ్డి (Maheshwar Reddy) ఓపెన్ ఛాలెంజ్ విసిరారు. అలాగే కాళేశ్వరం మ్యాటర్ పక్కన పెట్టడానికి ఫోన్ ట్యాపింగ్ తెరమీదకు తెచ్చారని ఆరోపించారు.

డ్రామా ఆడుతున్నరేవంత్ రెడ్డి, హరీష్ రావు ల మధ్య చీకటి ఒప్పందం ఏంటో బయట పెట్టాలని డిమాండ్ చేశారు.. లోకల్ పార్టీకి ఎక్కువ, జాతీయ పార్టీకి తక్కువ కాంగ్రెస్ పార్టీ ఉందని ఎద్దేవా చేసిన మహేశ్వర్ రెడ్డి.. రేవంత్, బాలకృష్ణ అభిమానని తెలుసు కానీ ఆయనలా మాట్లాడుతావని అనుకోలేదన్నారు.
ఆరు గ్యారెంటీ లను పక్కన పెట్టీ సవాళ్లు ప్రతి సవాళ్లు ఎందుకని ప్రశ్నించిన ఆయన.. హరీష్ ను రేవంత్ షిండేగా తయారు చేసుకొంటున్నార

తెలంగాణలో (Telangana) బీఆర్ఎస్​ హయాంలో జరిగిన ఫోన్​ట్యాపింగ్​ వ్యవహారం సంచలనంగా మారిన విషయం తెలిసిందే.. ఈ కేసులో పలువురు అధికారులను ఇప్పటికే అరెస్ట్ చేశారు. అయితే ఈ అంశంపై కేటీఆర్ (KTR), కేసీఆర్ (KCR) గతంలో సంచలన వ్యాఖ్యలు చేశారు.. ముఖ్యంగా బీఆర్ఎస్ లోని కొందరు నేతలతో పాటు.. పెద్దలు హస్తం సైతం ఉన్నట్లు ఆరోపణలు వస్తున్నాయి.

అయితే ఈ విషయంలో గతంలో అరుణ్​కుమార్ ​అనే లాయర్ పంజాగుట్ట పోలీసులకు ఫిర్యాదు చేశారు. ఫోన్​ ట్యాపింగ్​కేసులో మాజీ సీఎం కేసీఆర్​ను ఏ–1గా చేర్చాలని కోరారు. అధికారంలో ఉన్నప్పుడు ఆయన రాజ్యాంగ వ్యతిరేక చర్యలకు పాల్పడ్డారని ఆరోపించారు. కేంద్ర హోంశాఖ ప్రత్యేక ఆదేశాలతో మాత్రమే ఫోన్ ​సంభాషణలు వినే అవకాశం ఉంటుందని తెలిపారు. కానీ సీఎం హోదాలో చట్టాన్ని చుట్టంలా వాడుకొన్నారని తెలిపారు.

కానీ అందుకు విరుద్ధంగా అధికారులపై ఒత్తిడి తెచ్చి, ఫోన్​ ట్యాపింగ్ ​చేశారని తన ఫిర్యాదులో పేర్కొన్నారు. అయితే ఈ విషయంలో అధికార్లు చర్యలు తీసుకోవడం లేదని అడ్వకేట్ అరుణ్​ కుమార్​​ పంజాగుట్ట (Panjagutta) ఠాణాలో మరోసారి ఫిర్యాదు చేశారు. ఫోన్​ ట్యాపింగ్​ విషయం చాలా చిన్న విషయం అని కేసీఆర్​ ఇటీవల ఓ టీవీ ఇంటర్వ్యూలో పేర్కొనడం విడ్డూరమని అన్నారు..

మరోవైపు కేటీఆర్​పై కూడా అరుణ్​ కుమార్​​ ఫిర్యాదు చేశారు. తాను సాక్షిగా కొన్ని ఛానళ్లలో మాట్లాడితే వాటికి లీగల్‌ నోటీసులు పంపి బెదిరిస్తున్నారని ఆరోపించారు.. గతనెల 8వ తేదీన ఫిర్యాదు చేసినప్పటికీ పంజాగుట్ట పోలీసులు ఎందుకు చర్యలు తీసుకోవడం లేదని ప్రశ్నించారు. కేసీఆర్‌ సహా 39 మంది ఎమ్మెల్యేలపై కఠిన చర్యలు తీసుకోవాలని డిమాండ్‌ చేశారు.

కేంద్రంలో మరోసారి మోడీ (Modi) ప్రధానిగా ఉంటారనే ధీమా వ్యక్తం చేస్తున్న బీజేపీ (BJP) నేతలు.. ఆ దిశగా ప్రత్యర్థి పార్టీలపై విమర్శలు గుప్పిస్తున్నారు.. అలాగే కేంద్ర ప్రభుత్వ హయాంలో దేశంలో జరిగిన మార్పులపై వివరించే ప్రయత్నాలు చేస్తున్నారు.. ఈ క్రమంలో రాజ్యసభ సభ్యులు ఎంపీ కె.లక్ష్మణ్ (K.Laxman) కీలక వ్యాఖ్యలు చేశారు.. కశ్మీర్ ఆర్టికల్ 370 రద్దుతో ప్రశాంతంగా ఉందని తెలిపారు.

దేశం కోసం జరుగుతున్న ఎన్నికలు ఇవి అని తెలిపిన లక్ష్మణ్.. వికసిత్ భారత్ లక్ష్యంగా వికసిత్ పత్రాన్ని మోడీ గ్యారెంటీ గా ప్రజల ముందు ఉంచినట్లు పేర్కొన్నారు. మరోవైపు విచ్ఛిన్న రాజకీయాలతో విభజించు భారత్ విధానాలతో కాంగ్రెస్ (Congress) వ్యవహరిస్తోందని మండిపడ్డారు.. కూటమికి ఓటమి తప్పదని తెలిసాక.. ఈ విధానాన్ని తెర మీదకు తెచ్చారని విమర్శించారు.

అంబేద్కర్ ను గౌరవించి భారత రత్న ఇచ్చిన ఘనత బీజేపీదని తెలిపిన లక్ష్మణ్.. ఆయన రాజ్యాంగాన్ని అవమానరిచి తూట్లు పొడిచిన పార్టీ కాంగ్రెస్ అని ధ్వజమెత్తారు.. విభజించు పాలించు విధానం కాంగ్రెస్ డీఎన్ఏ లోనే ఉందని విమర్శించారు.. అందుకే హిందూ సమాజంపై విషం జిమ్ముతున్నారని ఆరోపించారు.. కాంగ్రెస్ సనాతన ధర్మం వినాశనం కోరుకునే పార్టీ అని మండిపడ్డారు..

కాంగ్రెస్ కూటమి CAA పట్ల విష ప్రచారం చేస్తోందని.. ఆ పార్టీ అధికారంలోకి వస్తే.. ఆర్టికల్ 370 మళ్ళీ తెస్తామని కాంగ్రెస్ నేతలు చెబుతున్నారని తెలిపారు. అలాగే రంగనాథన్ సిఫార్సులను అమలు చేయని కాంగ్రెస్ పార్టీ రిజర్వేషన్ గురించి మాట్లాడుతోందని లక్ష్మణ్ మండిపడ్డారు. వారసత్వ సంపద పిల్లలకు చెందాలంటే యాభై శాతం సంపద ప్రభుత్వానికి చెల్లించాలని శ్యాం పిట్రోడ్ చెప్పడం ఆ పార్టీ చెడు ఆలోచనలు గమనించాలని సూచించారు..

కమ్యూనిస్టులతో కాంగ్రెస్ (Congress) పొత్తు కన్ఫామ్ అని వార్తలు వస్తున్న నేపథ్యంలో.. వీటిపై కేటీఆర్ (KTR) స్పందించారు.. కేరళ (Kerala)లో సీపీఎం (CPM)ను రాహుల్ గాంధీ తిడుతున్నారు..కానీ దేశంలో మిగతా ప్రాంతాల్లో కమ్యూనిస్టులతో పొత్తులు ఏర్పరచుకోవడం విడ్డూరంగా ఉందన్నారు.. అలాగే కేరళ ముఖ్యమంత్రి విజయన్‌ను రేవంత్ రెడ్డి (Revanth Reddy) బండ బూతులు తిట్టారు.

అయినా ఇక్కడి సీపీఎం నేతలు కాంగ్రెస్‌కు మద్దతు ఇవ్వడం చూస్తుంటే.. విలువలను బజార్లో వదిలేసినట్లే అని అర్థం అవుతోందని విమర్శించారు.. తెలంగాణలో కాంగ్రెస్, బీజేపీతో రాజీ పడిందని సంచలన వ్యాఖ్యలు చేసిన కేటీఆర్.. ఖమ్మం పార్లమెంట్ స్థానాన్ని కచ్చితంగా బీఆర్ఎస్ గెలుస్తుందని ధీమా వ్యక్తం చేశారు. అలాగే మన దేశంలో ప్రాంతీయ పార్టీలే గెలవాలని బీఆర్ఎస్ భావిస్తున్నట్లు వెల్లడించారు.

బీజేపీ, కాంగ్రెస్ ఒక్కటే అని ఆరోపించిన కేటీఆర్.. బీజేపీతో కొట్లాటే సత్తా కాంగ్రెస్ కి లేదన్నారు.. అందుకే ప్రాంతీయ పార్టీలు గెలిస్తే పట్టు ఉంటుందని పేర్కొన్నారు.. మరోవైపు ఆంధ్రప్రదేశ్ లో జగన్ గెలుస్తున్నారని.. వెస్ట్ బెంగాల్ లో మమతా బెనర్జీ గెలవాలని, తమిళనాడులో స్టాలిన్ గెలవాలని కోరుకొంటున్నట్లు తెలిపారు. దేశంలో ప్రాంతీయ పార్టీలే బీజేపీకి అడ్డుకట్ట వేస్తున్నాయన్నారు.

బీజేపీని అడ్డుకోవడంలో కాంగ్రెస్ పార్టీ పూర్తిగా విఫలం అయ్యిందని ఆరోపించిన కేటీఆర్.. ఈసారీ దేశంలో 200ల సీట్లు కూడా దాటవని పేర్కొన్నారు. అలాగే పార్లమెంట్ ఎన్నికల్లో బీఆర్ఎస్ కు 10 నుంచి 12 స్థానాలు గెలిపిస్తే.. దేశ, రాష్ట్ర రాజకీయాలు శాసించే స్థాయిలో ఉంటామని వివరించారు. మరోవైపు మా పార్టీ నుంచి బయటకు వెళ్లిన వారు పోటీ చేస్తున్న స్థానాల్లో ఫోకస్ పెడతామని పార్టీ మారిన వారికి ఇన్ డైరెక్ట్ గా హెచ్చరించారు..

కాంగ్రెస్ (Congress) పార్టీలో చేరిన తర్వాత ఎమ్మెల్యే కడియం శ్రీహరి (Kadiam Srihari)పై బీఆర్ఎస్ నేతలు తీవ్రంగా విరుచుకుపడుతున్న సంగతి తెలిసిందే.. అయితే తాజాగా ఆయన కేసీఆర్ పై కీలక వ్యాఖ్యలు చేశారు. ఫోన్ ట్యాపింగ్ వ్యవహారంపై మండిపడ్డారు.. బీఆర్ఎస్ అబద్ధాలు చెబుతుందని ఆరోపించారు.. బీఆర్ఎస్ ప్రాంతీయ పార్టీ అని తెలిపిన ఆయన కేసీఆర్ పదేళ్లు ముఖ్యమంత్రిగా ఉండి రాష్ట్రాన్ని దోచుకొన్నారని విమర్శించారు.

ప్రస్తుతం రాష్ట్రంలో నెలకొన్న పరిస్థితులకు కారణం అయిన ఆయనే ప్రజలకు జవాబు దారి అని కడియం పేర్కొన్నారు.. అలాగే గత ప్రభుత్వంపై వస్తున్న ఆరోపణలకు ఆయనే సమాధానం చెప్పాలని అన్నారు.. కాళేశ్వరం బ్యారేజ్ లో పిల్లర్లు కుంగిపోవడానికి కేసీఆర్ (KCR) చర్యలని పేర్కొన్న ఆయన ఇందుకు బాధ్యత ఆయనే వహించాలని తెలిపారు.. ఆయన అక్కడ కుర్చీ వేసుకొని నీళ్ళు వదిలితే కుర్చీతో పాటు కూడా కొట్టుకుపోతారని ఎద్దేవా చేశారు.

మరోవైపు బీజేపీ (BJP) విధానాలతో ప్రజాస్వామ్య వ్యవస్థ ఆపదలో ఉందన్న శ్రీహరి.. నా కూతురు ఎస్సీ కాబట్టే స్క్రూటినీలో రిటర్నింగ్ అధికారులు ఎలాంటి అభ్యంతరం లేవనెత్తలేదని తెలిపారు. బయటమాట్లాడే సన్యాసులు స్క్రూటినీలో ఎందుకు అభ్యంతరం చూపలేదని మండిపడ్డారు.. ఎందుకు ఆధారాలు చూపలేదని ప్రశ్నించారు.. హరీశ్ రావుది రాజీనామా డ్రామా అని తెలిపిన ఆయన.. చేసిన సవాల్ కు సీఎం కట్టుబడి ఉన్నారన్నారు.

మరోవైపు నా బిడ్డ ఎంపీగా గెలిచిన తర్వాత ఇదే మంద కృష్ణ నా ఇంటికి వచ్చి దండం పెడతాడని వ్యాఖ్యానించిన కడియం.. నావద్ద వందల కోట్లు ఉన్నది నిజమైతే.. ఈడీ, ఇన్ కమ్ ట్యాక్స్ సోదాలు ఎందుకు చేయడం లేదని ప్రశ్నించారు. నా తర్వాత 20 ఏళ్లకు పుట్టిన వెధవలకు నేను సమాధానం చెప్పనని ధ్వజమెత్తారు.. అలాగే ఫోన్ ట్యాపింగ్ కామన్ అన్న కేసీఆర్ అధికారులను బలి చేశారని గుర్తు చేశారు.. ఈ కేసులో తన సామాజిక వర్గానికి చెందిన అధికారులను ఇరికించారని విమర్శించిన కడియం.. కేసీఆర్ ప్రమేయం లేకుండానే వాళ్ళు ఫోన్ ట్యాపింగ్ చేశారా అని ప్రశ్నించారు. డొంక తిరుగుడు మాటలు మాట్లాడవద్దని హెచ్చరించారు..

పార్లమెంట్ ఎన్నికల నేపథ్యంలో తెలంగాణ (Telangana)లో రాజకీయ సమీకరణాలు ఆసక్తికరంగా మారుతున్నాయి. కాంగ్రెస్ (Congress), బీజేపీ (BJP), బీఆర్ఎస్ (BRS)మధ్య పోటీ హోరాహోరీగా సాగుతోంది. ఈ క్రమంలో రేవంత్ రెడ్డి (Revanth Reddy)తో సీపీఎం (CPM) నేతలు భేటీ కావడం రాష్ట్రంలో హాట్ టాపిక్ గా మారింది. ఎంపీ ఎన్నికల్లో మద్దతు విషయంలో వీరి మధ్య చర్చలు జరిగినట్లు తెలుస్తోంది.

మరోవైపు భువనగిరి స్థానాన్ని ప్రతిష్టాత్మకంగా తీసుకొన్న కాంగ్రెస్.. ఈ స్థానంలో పార్టీకి మద్దతు ఇవ్వాలని సీపీఎం నేతలను కోరుతున్నారు. ఇప్పటికే డిప్యూటీ సీఎం భట్టి విక్రమార్క, తమ్మినేని మధ్య ఓ దఫా చర్చలు సైతం జరిగాయి. కానీ ఇక్కడ సీపీఐఎం తమ అభ్యర్థిని బరిలోకి దింపింది. అయితే నామినేషన్ల పరిశీలన ముగిసిపోగా మరో రెండు రోజుల్లో విత్ డ్రా చేసుకునేందుకు గడువు తీరనుండటంతో సీఎంతో సీపీఎం నేతలు భేటీ అవ్వడం ఆసక్తికరంగా మారింది.

ఇదిలా ఉండగా సీపీఎం నేతలతో సమావేశమైన అంశంపై రేవంత్ కీలక విషయాలు వెల్లడించారు.. భువనగిరి పార్లమెంట్ తో పాటు ఇతర స్థానాల్లోనూ సంపూర్ణ మద్దతు ఇవ్వాలని కోరినట్లు తెలిపారు. మరి కొన్ని రాజకీయ ప్రతిపాదనలు కూడా వారి ముందుకు తీసుకొచ్చామన్నారు. బీజేపీ శక్తులను ఓడించే విషయంలో కాంగ్రెస్ కు మద్దతు ఇచ్చేందుకు వారు అంగీకరించారని పేర్కొన్నారు..

అదేవిధంగా దేశంలోనూ ఇండియా కూటమితో కలిసి పనిచేయనున్నారని తెలిపిన సీఎం.. ఒకట్రెండు విషయాల్లో సందిగ్దత ఉన్నా… అధిష్టానంతో చర్చించి రేపటిలోగా ఏకాభిప్రాయానికి వస్తామని తెలిపారు. ఈ రెండు పార్టీల మధ్య కుదిరిన అవగాహన రాష్ట్రంలో కాంగ్రెస్ గెలుపునకు పనిచేస్తుందని భావిస్తున్నట్లు రేవంత్ వెల్లడించారు..

తెలంగాణలో ఎన్నికలు సమీపిస్తున్న కొద్ది.. నేతల ప్రచారం రణరంగాన్ని తలపిస్తోంది. పరువు గురించి పెద్దగా పట్టింపు లేదు.. గెలుపే ముఖ్యం అనేలా వీరి ప్రవర్తన ఉందని అనుకొంటున్నారు ప్రస్తుత తీరును గమనిస్తున్న వారు.. ఇదిలా ఉండగా.. పార్లమెంట్ ఎన్నికల్లో విజయాన్ని అందించి.. ఆ క్రెడిట్ కూడా తన ఖాతాలో వేసుకోవాలని భావిస్తున్న రేవంత్ ఆ దిశగా వ్యూహాలు రచించడం కనిపిస్తోంది.

ఈ నేపథ్యంలో కాంగ్రెస్ పార్టీ సోషల్ మీడియా టీమ్‌తో శుక్రవారం ముఖ్యమంత్రి, టీపీసీసీ చీఫ్ రేవంత్ రెడ్డి ఆత్మీయ సమావేశం నిర్వహించనున్నారని సమాచారం.. హైదరాబాద్ (Hyderabad), జూబ్లీహిల్స్‌ (Jubilee Hills)లోని సీబీఐ కాలని రేవంత్ క్యాంపు కార్యాలయంలో ఈ భేటీ జరగనున్నట్లు తెలుస్తోంది. ఈ క్రమంలో ఉదయం 9 గంటల నుంచి సోషల్ మీడియా టీమ్‌కు లోక్‌సభ ఎన్నికల వ్యూహాలపై దిశానిర్దేశం చేయనున్నారని సమాచారం..

ఈ సందర్భంగా సీఎం మాట్లాడిన వీడియోను కాంగ్రెస్ పార్టీ సోషల్ మీడియా వేదికగా పోస్ట్ చేసింది. అందులో మాకు మీడియానే లేదు. కాంగ్రెస్‌కు పేపర్ లేదు. టీవీ లేదు. మా కార్యకర్తలే మా జర్నలిస్టులు. వారే మా రిపోర్టర్లు. వాళ్లే సోషల్ మీడియాలో కింగ్ లు అని పేర్కొన్న రేవంత్.. ఠాగూర్ (Tagore) సినిమాలో ఉన్నట్లుగా సోషల్ మీడియా ద్వారా కాంగ్రెస్ (Congress) పార్టీ కార్యక్రమాలను ఒకరు ఇద్దరికీ.. ఆ ఇద్దరు మరో ఇద్దరికీ షేర్ చేస్తారన్నారు..

ఇలా నాలుగు కోట్ల మందికి చేరేవరకు ప్రజలకు చేర్చమని చెబుతున్నట్లు తెలిపి.. వీ‌ఆర్‌ డిపెండింగ్ ఆన్ ఓన్లీ సోషల్ మీడియా అని రేవంత్ రెడ్డి (Revanth Reddy) వీడియోలో పేర్కొన్నారు. అయితే దీనిపై స్పందించిన ఓ నెటిజన్.. అసెంబ్లీలో సత్తాచాటినం అంటే ఫేక్ న్యూస్‌లు స్ప్రెడ్ చేశారా? అని ప్రశ్నించారు.