Politics

మేడ్చల్ (Medical ) ఎమ్మెల్యే మల్లారెడ్డి (MLA Mallareddy) ఆయన రూటే సపరేటు అంటారు. ఆయన గురించి తెలిసినవారు.. ఎప్పుడు ఏం మాట్లాడతారో, దేనిపై ఎలా స్పందిస్తారో తెలియదు.. కానీ ఆయన మాటలు మాత్రం నవ్వుకొన్న వారికి నవ్వుకొన్నంతగా ఉంటాయని అంటారు.. గత బీఆర్ఎస్ (BRS) ప్రభుత్వ హయాంలో కార్మిక శాఖ మంత్రిగా పనిచేసిన ఆయన, ఆ శాఖపై ఎప్పుడు మాట్లాడలేదనే ఆరోపణలను సైతం సీరియస్ గా తీసుకొన్న దాఖలాలు లేవంటారు..

అయితే మ్యానరిజంతో ప్రత్యేకంగా ఫాలోవర్లను సంపాదించుకొన్న మల్లన్న మరోసారి వార్తల్లో నిలిచారు. ఎంపీ టికెట్ పై తన మనసులో మాట బయట పెట్టారు. పార్టీ ఆదేశిస్తే తాను ఎంపీగా పోటీ చేస్తానని, తాను పోటీ చెయ్యాలా ? వద్దా ? అనేది పార్టీ నిర్ణయంపై ఆధారపడి ఉంటుందని, ఈ నెల 21న జరిగే పార్లమెంట్ స్థాయి సమావేశంలో తన అభ్యర్ధిత్వంపై అధిష్టానం నిర్ణయిస్తుందని.. మీడియా ముఖంగా పేర్కొనడం రాజకీయ వర్గాలలో ఆసక్తిగా మారింది.

అయితే లోక్ సభ ఎన్నికలు దగ్గర పడుతోన్న సమయంలో మల్లారెడ్డి వ్యాఖ్యలపై, బీఆర్ఎస్ అధిష్టానం స్పందన ఏంటీ అనేది కీలకంగా మారింది. అధికారంలోకి వచ్చిన కాంగ్రెస్ (Congress) ఏమీ చేయలేదని, అభివృద్ధి అంటే కేసీఆర్, కేటీఆర్ మాత్రమే అని మల్లన్న నోటి వెంట రావడం చర్చాంశనీయంగా మారింది. ఆయన నిజంగానే పోటీ చేస్తారా? లేక పార్టీలో కలవరం సృష్టించేందుకే ఈ తరహ వ్యాఖ్యలు చేశారా? అని పార్టీ వర్గాలలో టాక్ మొదలైనట్టు తెలుస్తోంది.

ఇటీవల జరిగిన ఎన్నికల్లో బీఆర్ఎస్ పార్టీకి ఘోర పరాభవం ఎదురవడంతో మల్లారెడ్డి మంత్రి పదవి పోయింది. దీంతో ఎమ్మెల్యేగా ఉన్న ఆయన గోవాలో ఎంజాయ్ చేస్తూ కనిపించిన వీడియోలు నెట్టింట తెగ వైరల్ అయ్యాయి. ఇక రాష్ట్రంలో కారు గ్యారేజికే పరిమితం అవుతోందనే వార్తలు ప్రచారం జరుగుతోన్న క్రమంలో ఎమ్మెల్యేగా ఎవరు పట్టించుకోరు.. కనీసం కేంద్రంలో ఎంపీగా ఉంటే కాస్త మర్యాద దక్కుతోందనే ఆలోచనతో అలా మాట్లాడి ఉండవచ్చని రాజకీయ విశ్లేషకులు అనుకొంటున్నారు..

ముఖ్యమంత్రి రేవంత్‌రెడ్డి (Revanth Reddy) పది రోజుల పాటు తెలంగాణ (Telangana)కు బైబై చెప్పనున్నారు. పార్టీ వ్యవహారాల నిమిత్తం ఢిల్లీ (Delhi) వెళ్లిన ఆయన సోనియాగాంధీ, రాహుల్‌గాంధీ, మల్లికార్జున్ ఖర్గేతో పాటు పలువురు కేంద్ర మంత్రులతో భేటీ కానున్నారు. అక్కడి నుంచి ఆదివారం ఉదయం మణిపూర్‌ వెళ్ళి రాహుల్‌గాంధీ భారత్ జోడో న్యాయ్ యాత్రలో పాల్గొంటారు.

అనంతరం ఢిల్లీకి చేరుకొని నేరుగా స్విట్జర్లాండ్‌ (Switzerland), దావోస్‌ (Davos)లో జరిగే వరల్డ్ ఎకనమిక్ ఫోరం సమ్మిట్‌కు హాజరవుతారు. ఈమేరకు నాలుగైదు రోజుల పాటు అక్కడే ఉండి మరో మూడు రోజులు రేవంత్ లండన్‌లో పర్యటిస్తారని అధికారిక సమాచారం. మరోవైపు దావోస్‌లో ప్రతి సంవత్సరం జరిగే ప్రపంచ ఆర్థిక సదస్సుకు వివిధ దేశాల నుంచి పెద్ద సంఖ్యలో పారిశ్రామికవేత్తలు, మల్టీ నేషనల్ కంపెనీల అధినేతలు, పెట్టుబడిదారులు హాజరవుతుంటారు.

వారిలో భారత్ నుంచి ముఖేష్ అంబానీ, ఆనంద్ మహీంద్ర, కుమారమంగళం బిర్లా, గౌతమ్ అదాని వంటి పారిశ్రామికవేత్తలు ఉన్నారు. తమ రాష్ట్రానికి పెట్టుబడులను తీసుకుని రావడానికి వీరితో పాటు కేంద్రమంత్రులు, వివిధ రాష్ట్రాల ముఖ్యమంత్రులు ఈ సదస్సులో పాల్గొంటుంటారు. కాగా ఈ ఏడాది దావోస్ సదస్సుకు సీఎం హోదాలో రేవంత్ రెడ్డి హాజరుకానున్నారు. ఈ నెల 15 నుంచి 18వ తేదీ వరకు ఆయన దావోస్‌లో పర్యటిస్తారు.

సీఎం వెంట మంత్రి దుద్దిళ్ళ శ్రీధర్ బాబు, పరిశ్రమల శాఖ ముఖ్య కార్యదర్శి జయేశ్ రంజన్, సీఎంఓ సెక్రటరీలు, ఓఎస్డీ తదితరులు దావోస్ వెళ్తున్నారు. పది రోజుల తర్వాత ఈ నెల 23న నగరానికి రానున్నారు. కాగా రేవంత్ రెడ్డి.. పెట్టుబడుల సాధన విషయంలో ప్రతిపక్షానికి అవకాశం ఇవ్వకుండా వ్యవహరించాలనే భావనలో ఉన్నట్టు టాక్.. అయితే కీలకమైన ఎమ్మెల్సీ ఎన్నికలు ఉన్నప్పటికీ.. పది రోజుల పాటు విదేశీ పర్యటనకు వెళ్ళడం ఆసక్తికరంగా మారింది..

తెలంగాణ అసెంబ్లీ ఎన్నికల్లో కారు స్పీడుకు బ్రేకులు పడటంతో.. ప్రస్తుతం గులాబీ తోటలో అయోమయం నెలకొన్నట్టు ప్రచారం జరుగుతోంది. దీనికి కారణం వెతికితే.. కేసీఆర్ (KCR) అంటేనే మొండితనానికి నిదర్శనమని కొందరు చెవులు కోరుక్కోంటున్నారు.. పదేళ్ల పాలనను అదేరీతిలో సాగించడం.. రాజకీయ వారసుడిగా కొడుకును సీఎం పీఠం మీద కూర్చోపెట్టి.. హస్తిన రాజకీయాల్లో చక్రం తిప్పాలనే ఆశతో.. తెలంగాణ రాష్ట్ర సమితి (TRS)ని కాస్త బీఆర్ఎస్ గా మార్చడం పెద్ద ముప్పుగా చర్చించుకొంటున్నారు.

నిజానికి భారాస పేరుతో కొత్తగా ఒక పార్టీ పెట్టాలనే ఆలోచన చేసినప్పటికీ.. చివరికి తెలంగాణ (Telangana) పేరు కాస్త మారడంతో.. స్ఫూర్తి దెబ్బతిన్నదని కార్యకర్తలు అనేకమంది చిన్నబుచ్చుకొన్నారు. కానీ.. కేసీఆర్ పట్టించుకోలేదు. తీరా ఇప్పుడు పార్టీ ఓడిపోయిన తర్వాత.. లోక్ సభ ఎన్నికలకు సిద్ధం చేసే సన్నాహక సమావేశాల్లో కూడా ఇదే అభిప్రాయాలు వ్యక్తం అవుతున్నాయి. మరోవైపు తెలంగాణ అనే పదాన్ని పార్టీ పేరులోంచి తొలగించడం ద్వారా.. పార్టీ అస్తిత్వం నాశనం అయినట్టు కడియం శ్రీహరి ఘాటుగానే వినిపించారు.

ఇది కడియం ఒక్కరి మాట కాదు. ఇన్నాళ్లూ కేసీఆర్ వైఖరి తెలిసిన వారెవ్వరూ కనీసం తమ అభిప్రాయాలను వినిపించడానికైనా అంతగా సాహసం చేయలేదు.. కానీ పార్టీ ఓడిపోయిన తర్వాత.. ఇప్పుడు ముందుకు వచ్చి ధైర్యంగా అభిప్రాయం వెల్లడిస్తున్నారు. ఒకసారి కేంద్రమంత్రిగా వైభవం వెలగబెట్టిన కేసీఆర్.. జాతీయ రాజకీయాల్లో తన ముద్ర చూపించాలనే తపనతో తహతహలాడిపోతున్నారు. అయితే.. విపక్ష కూటమి ఆయనను దూరం పెడుతూందనే ఆరోపణలున్నాయి..

బీజేపీ (BJP)కి బీ టీమ్ గా.. ప్రభుత్వ వ్యతిరేక ఓటును చీల్చడానికి మాత్రమే ఆయన జాతీయ పార్టీ డ్రామా నడిపిస్తున్నారనే విమర్శను దూరం చేసుకోలేకపోతున్నట్టు చర్చించుకొంటున్నారు. ఇక అసెంబ్లీ ఎన్నికలకు ముందు 2022, 2023లో మహారాష్ట్ర పై ఫోకస్ పెట్టిన బీఆర్ఎస్ (BRS). నాగ్‌పూర్, సోలాపూర్, నాందేడ్ ప్రాంతాల్లో పార్టీ కమిటీలు ఏర్పాటు చేసి కార్యాలయాలు సైతం ప్రారంభించింది.

ఏపీలో తోట చంద్రశేఖర్‌ను రాష్ట్ర అధ్యక్షునిగా నియమించిన కేసీఆర్.. పార్టీని ముందుకు తీసుకెళ్లే ప్రయత్నం చేశారు. మధ్యప్రదేశ్, కర్ణాటకలో పార్టీని విస్తరించేందుకు ప్లాన్ చేశారు. ఢిల్లీలో సొంత కార్యాలయాన్ని నిర్మించారు. కానీ రాష్ట్రంలోనే అధికారం కోల్పోయిన పరిస్థితుల్లో జాతీయ పార్టీని రాష్ట్ర పార్టీగా మార్చే భావనలో ఉన్నట్టు సమాచారం..