Politics

ప్రత్యేక తెలంగాణ (Telangana) ఏర్పడ్డాక అధికారంలోకి వచ్చిన బీఆర్ఎస్ (BRS) పాలన నుంచి ఎన్నో పాఠాలను నేర్చుకొన్నామని అనుకొంటున్న కాంగ్రెస్.. ప్రస్తుతం వ్యవహరిస్తున్న తీరుపై విమర్శలు మొదలైనట్టు తెలుస్తోంది. ఇందులో ప్రభుత్వం పొరపాటు లేదని.. గత ప్రభుత్వం చేసిన తప్పులను సరిదిద్దుకొనే ప్రయత్నంలో ఉన్నాయని పార్టీ నేతలు అంటున్నారు.. అయితే రాష్ట్రం బాగుపడాలంటే తీసుకొనే నిర్ణయాలు కొందరిని బాధిస్తాయని వెల్లడిస్తున్నారు.

మరోవైపు ముఖ్యమంత్రి రేవంత్‌రెడ్డి (Revanth Reddy) జిల్లాల పునర్వ్యవస్థీకరణ చేపడుతామని చేసిన ప్రకటన రాజకీయ వర్గాల్లో కొత్త చర్చకు కారణం అవుతోంది. జిల్లాల సంఖ్య తగ్గిస్తామని, రానున్న బడ్జెట్ సమావేశాల్లోనే ఇందుకు జ్యూడిషియల్ కమిషన్ ఏర్పాటు చేస్తామని తెలిపిన సీఎం.. మండలాల పునర్వ్యవస్థీకరణ సైతం చేస్తామని వ్యాఖ్యానించడం.. బీఆర్ఎస్ నేతలకు గోల్డెన్ ఛాన్స్ లా మారిందని అంటున్నారు.

కానీ రేవంత్ అభిప్రాయం మరోలా ఉన్నట్టు తెలుస్తోంది. తెలంగాణలో జిల్లాల విభజన శాస్త్రీయంగా జరగలేదనేదని భావిస్తున్న సీఎం.. జిల్లాలు, మండలాల విభజనపై బడ్జెట్ సమావేశాల్లో చర్చిస్తామని, దీనికోసం జ్యూడిషియల్ కమిషన్ నియమించి, ప్రజాభిప్రాయం మేరకు నిర్ణయం తీసుకుంటామని ప్రకటించినట్టు పార్టీ వర్గాలు వెల్లడిస్తున్నాయి. అధికారం కాపాడుకోవడానికి, రాష్ట్ర ప్రజలను మభ్యపెట్టడానికి ఏదో హడావుడిగా కేసీఆర్ (KCR).. కొత్త జిల్లాలు ఏర్పాటు చేసినట్టు కాంగ్రెస్ (Congress) నేతలు ఆరోపిస్తున్నారు.

ఇప్పటికే జిల్లాలు అతి చిన్నగా ఉండటం వల్ల అనేక సమస్యలు వస్తున్నట్టు పేర్కొంటున్నారు. కానీ కేటీఆర్ (KTR) ఈ విషయంలో లబ్ధి పొందేలా.. జిల్లాలను తగ్గిస్తే ప్రజలు ఒప్పుకుంటారా అని వాదించడంపై నేతలు మండిపడుతోన్నారు. మరోవైపు జిల్లాల ఏర్పాటు బీఆర్ఎస్ అధినేత కేసీఆర్ సీఎంగా ఉన్నప్పుడు శాస్త్రీయంగా జరగలేదు. పూర్తిగా రాజకీయ డిమాండ్లతోనే జరిగిందనే విమర్శలున్నాయి.

కృత్రిమ ఉద్యమాలు చేయించి జిల్లాలు ఏర్పాటు చేశారని, ఇప్పుడు జిల్లాలను పునర్ వ్యవస్థీకరిస్తే అలాంటి ఉద్యమాలు మళ్లీ జరిగే అవకాశం కూడా ఉందనే వాదనలు తెరపైకి వస్తున్నాయి.. అయితే ఈ అంశంపై ప్రజలకు అవగాహన కల్పించి ముందుకు వెళ్ళితే బాగుంటుందని కొందరు అభిప్రాయపడుతోన్నారు.

రాష్ట్ర రాజకీయాల్లో చక్రం తిపాలని భావించిన బీఆర్ఎస్ (BRS)కు అసెంబ్లీ ఎన్నికలు చెక్ పెట్టాయనే టాక్ వినిపిస్తోంది. ఇంత వరకు మూడోసారి వరుసగా ఒకే పార్టీ అధికారాన్ని సొంతం చేసుకొన్న సందర్భాలు లేవు.. ఈ క్రమంలో ఆ లోటు బీఆర్ఎస్ పూడ్చాలని భావించింది. అయితే ఓటర్లు మాత్రం సున్నితంగా తిరస్కరించినట్టు ప్రచారం జరుగుతోంది. ఈ క్రమంలో పార్టీ ఓటమిపై నేతలు పలురకాలుగా మాట్లాడుకోవడం తెలిసిందే..

ఈ నేపథ్యంలో స్టేషన్‌ ఘన్‌పూర్‌ ఎమ్మెల్యే కడియం శ్రీహరి (Kadiam Srihari).. కాంగ్రెస్ పై సంచలన వ్యాఖ్యలు చేశారు.. కాంగ్రెస్‌ (Congress)లో అప్పుడే కుమ్ములాటలు మొదలయ్యాయని, మంత్రి పొంగులేటి శ్రీనివాస్ రెడ్డి తానే రెండో స్థానం అంటున్నారని ఆరోపణలు చేశారు.. డిప్యూటీ సీఎం భట్టి విక్రమార్కకు సీఎం పదవి రాలేదని, ఆయన భార్య వాపోతున్నట్టు వెల్లడించారు..

బీఆర్‌ఎస్‌ పార్టీ 2028లో అధికారంలోకి వస్తుందని ధీమా వ్యక్తం చేశారు.. ఎవరికి వారే యమునా తీరే అన్న చందంగా మారిన కాంగ్రెస్ హామీలు నెరవేర్చే పరిస్థితిలో లేదని ఎద్దేవా చేశారు.. మహబూబాబాద్ లోకసభ నియోజకవర్గ సన్నాహక సమావేశంలో పాల్గొన్న కడియం శ్రీహరి.. కేటీఆర్ (KTR).. హరీష్ రావు (Harish Rao).. కృష్ణార్జునుల మాదిరిగా కలిసి పార్టీని బలోపేతం చేయాలని కోరారు. కార్యకర్తలకు అందుబాటులో ఉండేలా అడుగులు వేయాలని సూచించారు..

రేవంత్ సర్కార్ దళితబంధు పథకాన్ని ఆపటం సరికాదని.. ఇప్పటికైనా లబ్ధిదారులకు పథకాన్ని వర్తింపజేయాలని కడియం సూచించారు. మరోవైపు తెలంగాణ ప్రజలు టీఆర్‌ఎస్‌ (TRS)ను సొంత పార్టీగా భావించారని కానీ.. పార్టీ పేరు నుంచి తెలంగాణను తొలగించడం సెంటిమెంట్‌ను ప్రభావితం చేసిందన్నారు. అందువల్ల ఓట్ల శాతాన్ని కోల్పోయినట్టు పార్టీ శ్రేణుల అభిప్రాయమని తెలిపిన కడియం.. ఈ విషయాన్ని వరంగల్ లోక్ సభ సన్నాహక సమావేశంలో కేటీఆర్ ముందుంచిన విషయం తెలిసిందే..

తెలంగాణ (Telangana) ముఖ్యమంత్రి రేవంత్ రెడ్డి (Revanth Reddy) ఢిల్లీ పర్యటన రద్దయింది. అసెంబ్లీ సమావేశాల నేపథ్యంలో నేడు సీడబ్ల్యూసీ సమావేశంలో పాల్గొనేందుకు ప్రత్యేక విమానంలో ఢిల్లీకి వెళ్తారని పార్టీ వర్గాలు తెలిపాయి. త్వరలో అసెంబ్లీ ఎన్నికలు జరగనున్న నేపథ్యంలో అధిష్టానం 17 పార్లమెంటు సెగ్మెంట్లకు ఇన్‌చార్జిలు, కోఆర్డినేటర్లను నియమించింది. ఈ క్రమంలో ఏఐసీసీ అధ్యక్షుడు, ప్రధాన కార్యదర్శి, సీనియర్ నేతలు వీరితో చర్చించేందుకు ఢిల్లీలో షెడ్యూలు ఖరారైంది.

అయితే ప్రస్తుతం రేవంత్ ఢిల్లీ (Delhi) పర్యటన రద్దయిందని అధికారిక ప్రకటన వచ్చింది. సీఎంకి బదులుగా.. సీడబ్ల్యూసీ శాశ్వత ఆహ్వానితుడిగా ఉన్న దామోదర రాజనర్సింహ, వంశీచంద్ రెడ్డి, డిప్యూటీ సీఎం మల్లు భట్టి విక్రమార్క సహా మంత్రులు సీతక్క, కొండా సురేఖ, పొన్నం ప్రభాకర్, జూపల్లి కృష్ణారావు, ఉత్తమ్‌కుమార్ రెడ్డితో పాటు షబ్బీర్ ఆలీ, ఎమ్మెల్సీ జీవన్ రెడ్డి తదితరులు ఢిల్లీకి చేరుకొన్నారు.

ఆంధ్రప్రదేశ్ నుంచి రఘువీరారెడ్డి, పల్లంరాజు, కొప్పుల రాజు, సుబ్బరామిరెడ్డి పాల్గొననున్నట్టు సమాచారం.. ఇక రానున్న లోక్‌సభ ఎన్నికల్లో గెలుపు లక్ష్యంగా అధిష్టానం వ్యూహాలు రచిస్తోంది. ఇందులో భాగంగా కీలక నేతలతో చర్చలు నిర్వహిస్తోంది. ఇందులో భాగంగా రాష్ట్ర మంత్రులు పలువురు ఇప్పటికే ఢిల్లీ చేరుకొన్నారు..

మరోవైపు పార్లమెంటు ఎన్నికలపై రేవంత్‌రెడ్డి హైకమాండ్‌కు స్పష్టమైన అభిప్రాయాన్ని చెప్పినందున ఈ మీటింగుకు హాజరుకాలేదని సన్నిహిత వర్గాల సమాచారం. ఎమ్మెల్సీ అభ్యర్థుల విషయంలోనూ అధిష్టానంతో చర్చల తర్వాత సూత్రప్రాయ నిర్ణయం జరిగిందని పేర్కొన్నాయి. కానీ మరికొద్దిమంది సీనియర్ నేతలు మాత్రం షెడ్యూలు ఒక రోజు వాయిదా పడిందని, శుక్రవారం ఉండే అవకాశాలున్నట్టు వెల్లడిస్తున్నారు..

పాటిగడ్డ కాలనీలో సుమారు 15 ఏళ్ల కిందట కట్టిన ఇళ్లు పేదలకు ఇంతవరకు ఇవ్వలేదని కేంద్రమంత్రి(Central Minister) కిషన్ రెడ్డి(Kishan Reddy) ఆగ్రహం వ్యక్తం చేశారు. సమస్యల పరిష్కారానికి ఆయన బస్తీ బాట పట్టారు. ఈ సందర్భంగా గురువారం బేగంపేట్, ఓల్డ్ పాటిగడ్డ బస్తీలో కిషన్‌రెడ్డి పర్యటించారు. బస్తీవాసుల సమస్యలను అడిగి తెలుసుకున్నారు.

రాష్ట్రంలో 30శాతం పైగా జనాభా హైదరాబాద్‌లోనే ఉందన్న ఆయన హైదరాబాద్‌ను అభివృద్ధి చేయడంతో పాటు అంతర్జాతీయ నగరంగా తీర్చిదిద్దామని కేసీఆర్, ఆయన తనయుడు కేటీఆర్ ప్రచారం చేసుకున్నారని అన్నారు. కేవలం ధనవంతులు ఉన్నచోటే హైటెక్ సిటీ, జూబ్లీహిల్స్ లాంటి ప్రాంతాల్లో ఎకనామిక్ సిటీ పేరుతో ఫ్లైఓవర్స్ కట్టి రంగులుపూసి ప్రచారం చేసుకున్నారని విమర్శించారు.

మెయిన్ రోడ్లు దిగి బస్తీల్లో పర్యటించాలని కేటీఆర్‌కు గతంలో పదేపదే గుర్తుచేశామన్నారు. అయినా ఏనాడూ వారు బస్తీలను పట్టించుకోలేదని మండిపడ్డారు. బస్తీలను గత ప్రభుత్వం నిర్లక్ష్యం చేయడంతో రోడ్లు, వీధిలైట్లు లేక, డ్రైనేజీ సమస్యలతో పాటు కనీస సదుపాయాలకు నోచుకోక ఇబ్బందులు పడుతున్నారని కిషన్‌రెడ్డి అన్నారు. మహిళలకు స్కిల్ డెవలప్ సెంటర్లు లేవని, ప్రభుత్వ పాఠశాలలు పాత భవనాలతో పూర్తిగా నిరుపయోగంగా తయారయ్యాయన్నారు.

నేటి కాంగ్రెస్ ప్రభుత్వం కూడా బీఆర్ఎస్ ప్రభుత్వ బాటలోనే నడుస్తుండటం సరికాదన్నారు. పాటిగడ్డ కాలనీలో సుమారు 15ఏళ్ల కిందట కట్టిన ఇళ్లు పేదలకు ఇంతవరకు ఇవ్వలేదన్నారు. హైదరాబాద్‌లోని అనేక ప్రాంతాల్లో గతంలో పేదల కోసం నిర్మించిన ఇళ్లను గత బీఆర్ఎస్ ప్రభుత్వం, ఇప్పుటి కాంగ్రెస్ ప్రభుత్వం ఇప్పటికీ లబ్ధిదారులను ఎంపిక చేయకపోవడం శోచనీయమన్నారు. ఇప్పటికైనా ఇళ్ల లబ్ధిదారులను ఎంపిక చేసి వారికి అలాట్‌మెంట్ చేయాలన్నారు.