Politics

తెలంగాణ (Telangana)లో ఏర్పడ్డ కాంగ్రెస్ (Congress) ప్రభుత్వం పై మాజీ మంత్రి హరీష్ రావు కీలక వ్యాఖ్యలు చేశారు. అధికారంలోకి రావడానికి బీఆర్ఎస్ పై వాళ్ళు కొన్ని దుష్ప్రచారాలు చేశారు.. ప్రజలు నమ్మారు వాళ్ళకి అధికారం ఇచ్చారని పేర్కొన్నారు. సంగారెడ్డిలో ఏర్పాటు చేసిన బీఆర్ఎస్ కృతజ్ఞత సభలో పాల్గొన్న హరీష్ రావు.. కాంగ్రెస్ ప్రభుత్వాన్ని విమర్శిస్తున్నట్టు.. పొగిడినట్టు కాకుండా.. విమర్శలు చేశారు..

అధికార పార్టీ వాళ్ళు మన మానసిక స్థైర్యాన్ని దెబ్బతీసే ప్రయత్నం చేస్తారని ఆరోపించిన హరీష్ రావు (Harish Rao)..మనం కుంగిపోవాల్సిన అవసరం లేదని అన్నారు. కాంగ్రెస్ పాలన కూడా రాష్ట్రంలో ఎలా ఉంటుందో చూడాలని ప్రజలు వారికి అవకాశం ఇచ్చారు.. వాళ్ళు గత ప్రభుత్వం కంటే బాగా పాలన చేయాలని కోరుకుందామని తెలిపారు.

బీఆర్ఎస్ (BRS) అధికారపక్షంలో ఉన్నా.. ప్రతిపక్షంలో ఉన్నా ఎప్పుడు ప్రజల పక్షమే ఉంటుందని హరీష్ రావు పేర్కొన్నారు. తెలంగాణ ఓటర్ల తీర్పు శిరసా వహిస్తున్నామని తెలిపిన హరీష్ రావు.. ఓటమిపై సమీక్ష జరుపుదాం.. తప్పు ఒప్పులు సరి చేసుకుని ముందుకు వెళ్తాం అని వెల్లడించారు. రాష్ట్రం అంతా తక్కువగా ఓట్లు పడినా.. సంగారెడ్డి (Sangareddy)లో మాత్రం ఈ సారి గులాబీ జెండా ఎగిరిందని హరీష్ రావు తెలిపారు.

చింతా ప్రభాకర్ ఆరోగ్యం దెబ్బ తిన్నా.. ప్రతి ఒక్క కార్యకర్త, అభ్యర్థిగా కష్టపడి పని చేసి బీఆర్ఎస్ ని ఇక్కడ గెలిపించారని హరీష్ రావు అభినందించారు. పార్టీ కోసం కష్టపడ్డ కార్యకర్తలను గుండెల్లో పెట్టుకుని చూసుకుంటామని మాట ఇచ్చారు. త్వరలో జరిగే పంచాయతీ ఎన్నికలు, ఎంపీ ఎన్నికల్లో బీఆర్ఎస్ సత్తా చూపించాలని హరీష్ రావు కార్యకర్తలకి సూచించారు.. ఏడుగురు ఎమ్మెల్యేలు ఉమ్మడి మెదక్ జిల్లాలో ఉన్నారు.. వారితో కలిసి అందరం పని చేద్దామని హరీష్ రావు తెలిపారు.

బీఆర్ఎస్(BRS) పాలనలో జరిగిన తప్పిదాలతో తెలంగాణ ప్రభుత్వంలోని అన్ని శాఖల్లో అప్పులు పెరిగాయని మంత్రి ఉత్తమ్‌ కుమార్‌రెడ్డి(Minister Uttam Kumar Reddy) అన్నారు. ఇవాళ అధికారులతో సమీక్ష నిర్వహించారు. ధాన్యం కొనుగోలు, బియ్యం, సేకరణ, బియ్యం సరఫరా వంటి కీలక అంశాలపై ఉన్నతాధికారులతో మాట్లాడారు. అనంతరం ఉత్తమ్ మీడియాతో మాట్లాడారు.

గత పాలకుల వల్ల పౌరసరఫరాలశాఖలో తప్పిదాలు జరిగాయని, ఆర్థిక పరిస్థితి ఆందోళనకరంగా ఉందన్నారు ఉత్తమ్. 1.8 మెట్రిక్ టన్నుల బియ్యం ప్రజలకు ఉచితంగా ఇస్తున్నామని, కానీ ప్రజలు వాటిని వినియోగించుకుంటున్నారా? లేదా? అనేదానిపై అధ్యయనం చేయాలని అధికారులకు సూచించారు.

ప్రభుత్వం కిలోకు రూ.39 వెచ్చించి ప్రజలకు ఉచితంగా బియ్యాన్ని అందిస్తుంటే పేదలు తినకపోతే ఉచిత బియ్యం పథకం నిరుపయోగమవుతుందన్నారు. రాష్ట్రంలోని అన్ని శాఖల్లో ఆర్థిక పరిస్థితి బాగోలేదని, అన్ని అప్పుల్లో ఉన్నాయని వెల్లడించారు. తొమ్మిదిన్నర ఏళ్ల బీఆర్ఎస్ పాలనలో లోపాలు ఉన్నాయని తెలిపారు. కొత్త రేషన్ కార్డులు ఇవ్వాలని డిమాండ్ ఉందని తెలిపారు. సీఎం దృష్టికి ఆ విషయాన్ని తీసుకువెళ్తానని మంత్రి ఉత్తమ్ కుమార్‌రెడ్డి చెప్పారు.

మరోవైపు, కాంగ్రెస్ ఇచ్చిన హామీల్లో ఆరు గ్యారంటీల్లో రెండు పథకాలైన ‘మహాలక్ష్మి’, ‘ఆరోగ్యశ్రీ’ పథకాలను ప్రారంభించిన సర్కార్ మరో పథకంపై దృష్టిసారించినట్లు తెలుస్తోంది. ఆరు గ్యారంటీల్లో ఒకటైన ‘రూ.500కే గ్యాస్ సిలిండర్’ అమలుపై పేదలు ఎంతో ఆసక్తిగా ఎదురుచూస్తున్నారు. ఆరు గ్యారెంటీలను 100 రోజుల్లోగా అమలు చేస్తామంటున్నారు కాంగ్రెస్ నేతలు.

ఆర్మూర్ మాజీ ఎమ్మెల్యే(Armur Ex MLA), బీఆర్ఎస్ నేత జీవన్‌రెడ్డి(JeevanReddy)కి మరో షాక్ తగిలింది. రూ.20కోట్ల రుణాన్ని వడ్డీతో సహా చెల్లించాలని మామిడిపల్లి(Mamidipally)లోని ఆయన ఇంటికి రాష్ట్ర ఫైనాన్స్ కార్పొరేషన్(State Finance Corporation)అధికారులు నోటీసులు అతికించారు. నిర్ణీత సమయంలో రుణం చెల్లించకుంటే చర్యలు తీసుకుంటామని హెచ్చరించారు.

జీవన్‌రెడ్డితో పాటు గ్యారెంటీ సంతకాలు పెట్టిన మరో నలుగురికి కూడా అధికారులు నోటీసులు జారీ చేయడం చర్చనీయాంశమైంది. జీవన్‌రెడ్డి 2017లో తన భార్య పేరిట లోన్ తీసుకున్నారు. రూ.20 కోట్ల రుణం తీసుకుని.. ఇప్పటివరకు ఒక్కపైసా కూడా వడ్డీ కట్టలేదు. వడ్డీ, లోన్ కట్టాలని ఎన్నిసార్లు నోటీసులు ఇచ్చినా జీవన్ రెడ్డి స్పందించకపోవడంతో అధికారులు ఆయన ఇంటికి నోటీసులు అతికించినట్లు తెలుస్తోంది.

నిజామాబాద్ జిల్లా ఆర్మూర్ పట్టణంలో ఆర్టీసీ బస్టాండ్ డిపో పక్కన కోట్ల రూపాయల విలువైన స్థలం ఆర్టీసీకి ఉంది. ఆ స్థలాన్ని ఉమ్మడి రాష్ట్రంలో కొందరు లీడర్లు లీజుకు తీసుకున్నారు. దానిని ఓ ప్రైవేట్ ఇన్‌ఫ్రాస్ట్రక్టర్ పేరు మీద అప్పుడు ఆర్మూర్ ఎమ్మెల్యేగా ఎన్నికైన జీవన్ రెడ్డి తన సతీమణి పేరు మీద లీజుకు తీసుకున్నాడు. అక్కడ స్టేట్ ఫైనాన్స్ కార్పొరేషన్ నుంచి 20 కోట్ల రుణంతో కాంప్లెక్స్ నిర్మించారు.

ఆ కాంప్లెక్స్ ద్వారా ప్రతీనెల లక్షల రూపాయల ఆదాయం వస్తున్నా.. ఆర్టీసీకి లీజు అగ్రిమెంట్ ప్రకారం బకాయిలు చెల్లించలేదు. దాంతో ఆర్టీసీ అధికారులు బకాయుల కోసం చాలా సార్లు ఒత్తిడి తెచ్చారు. అయితే స్థానికంగా ఎమ్మెల్యే కావడంతో లీజు బకాయిల వసూలుకు అధికారులు వెనుకడుగు వేశారు. ఇప్పుడు ఆయన ఓడిపోవడంతో నోటీసులు పంపడం గమనార్హం.

ఈ వ్యవహారంపై రిటైర్డ్ ఐఏఎస్, సోషల్ డెమోక్రటిక్ ఫోరం కన్వీనర్ ఆకునూరి మురళి ఇవాళ ట్విట్టర్ వేదికగా స్పందించారు. ప్రభుత్వ, కార్పొరేషన్స్ అధికారులు అధికారంలో ఉన్న రాజకీయ నాయకులకు ఇలా అనుకూలంగా వ్యవహరించడం దురదృష్టకరమన్నారు. రాజకీయ నాయకులు ఇలాంటి అధికార దుర్వినియోగానికి పాల్పడటం సిగ్గుచేటని విమర్శించారు. రాజకీయాలను వ్యాపారం చేయడం ఈ దేశానికి పట్టిన దరిద్రమని ఆరోపించారు. కొత్త ప్రభుత్వం ఇలాంటి విషయాల మీద సరైన విధానం తీసుకోవాలంటూ రాసుకొచ్చారు.