Politics

తెలంగాణ (Telangana) సీఎం రేవంత్ రెడ్డి (Revanth Reddy) మంత్రులకు శాఖలు కేటాయించారు. రాష్ట్రంలో కాంగ్రెస్ (Congress) అధికారంలోకి వచ్చాక రేవంత్‌తో పాటు మరో 11 మంది మంత్రులు ఈనెల 7 ప్రమాణ స్వీకారం చేయగా.. ఇంకా ఎవరికి శాఖలు కేటాయించలేదు. అయితే ఈరోజు తెలంగాణ శాసనసభ సమావేశాలు ప్రారంభం అవుతుండగా.. తాజాగా మంత్రులకు శాఖలు కేటాయించారు.

కాగా, కీలకమైన హౌంశాఖను ఎవరికి కేటాయించలేదు. మరో ఆరుగురికి మంత్రి వర్గంలో స్థానం కల్పించనుండగా.. వారికి ఏ శాఖలు కేటాయిస్తారనేది ఆసక్తిగా మారింది. ఇక కాంగ్రెస్ ప్రభుత్వంలో మంత్రులకు ఏయే శాఖలు కేటాయించారో చూద్దాం..

భట్టి విక్రమార్క కి ఆర్థిక, ఇంధన శాఖ కేటాయించారు. తుమ్మల నాగేశ్వరరావు – వ్యవసాయ, చేనేత శాఖ.. జూపల్లి కృష్ణారావు – ఎక్సైజ్‌, పర్యాటక శాఖ.. ఉత్తమ్‌ కుమార్‌ రెడ్డి – నీటిపారుదల, పౌరసరఫరాల శాఖ.. దామోదర రాజనర్సింహ – వైద్య, ఆరోగ్య శాఖ, సైన్స్‌ అండ్‌ టెక్నాలజీ.. కోమటిరెడ్డి వెంకట్‌రెడ్డి – ఆర్‌అండ్‌బీ, సినిమాటోగ్రఫీ మంత్రులుగా కొనసాగానున్నారు..

మరోవైపు శ్రీధర్‌బాబు – ఐటీ, పరిశ్రమల శాఖ, శాసనసభ వ్యవహారాల మంత్రిగా.. పొంగులేటి శ్రీనివాస్​రెడ్డి – రెవెన్యూ, గృహనిర్మాణం, సమాచార శాఖ మంత్రిగా.. పొన్నం ప్రభాకర్‌ – రవాణా, బీసీ సంక్షేమ శాఖ మంత్రిగా.. సీతక్క – మహిళా శిశు సంక్షేమం, పంచాయతీరాజ్‌ శాఖ మంత్రిగా.. కొండా సురేఖ – అటవీ, పర్యావరణ, దేవాదాయ శాఖ మంత్రులుగా కొనసాగానున్నారు. కాగా రేవంత్‌రెడ్డి వద్దే హోం, పురపాలక, ఎస్సీ, ఎస్టీ సంక్షేమ శాఖలు ఉన్నాయి..

రాజ్‌భవన్‌లో ప్రొటెం స్పీకర్‌ ప్రమాణస్వీకారోత్సవం జరిగింది. తెలంగాణ శాసనసభ ప్రొటెమ్ స్పీకర్‌(Assembly proteome speaker)గా ఎంఐఎం ఎమ్మెల్యే అక్బరుద్దీన్ ఓవైసీ(Akbaruddin Owaisi)తో గవర్నర్ తమిళిసై సౌందరరాజన్(Governor Tamilisai soundararajan) ప్రమాణ స్వీకారం చేయించారు. ఈ మేరకు అక్బరుద్దీన్‌తో పాటు.. సీఎం రేవంత్ రెడ్డి, డిప్యూటీ సీఎం మల్లు భట్టి విక్రమార్క రాజ్‌భవన్ చేరుకున్నారు.

మరికొద్ది సేపట్లో తెలంగాణ అసెంబ్లీలో ఎమ్మెల్యేల ప్రమాణస్వీకారం జరగనుంది. ఈ మేరకు శాసనసభ ప్రొటెమ్ స్పీకర్‌గా ఎంఐఎం ఎమ్మెల్యే అక్బరుద్దీన్ ఓవైసీ తో గవర్నర్ తమిళిసై సౌందరరాజన్ ప్రమాణ స్వీకారం చేయించారు. ప్రమాణ స్వీకారం అనంతరం అక్బరుద్దీన్‌కు గవర్నర్, సీఎం రేవంత్ రెడ్డి శుభాకాంక్షలు తెలిపారు. ప్రమాణస్వీకారం అనంతరం అక్బరుద్దీన్ అసెంబ్లీలో కొత్త ఎమ్మెల్యేలతో ప్రమాణం చేయించనున్నారు.

ఉదయం 11 గంటలకు అసెంబ్లీ సమావేశాలు ప్రారంభంకానున్నాయి. తెలంగాణ సీఎం హోదాలో రేవంత్‌రెడ్డి తొలిసారి అసెంబ్లీలో అడుగుపెట్టనున్నారు. అసెంబ్లీలో ఎమ్మెల్యేల ప్రమాణ స్వీకారం అనంతరం కాంగ్రెస్ ప్రభుత్వ పాలన ఏవిధంగా ఉండనుందో రేవంత్‌రెడ్డి ప్రసంగించనున్నారు.

అసెంబ్లీ ఎన్నికల్లో భారీ మెజార్టీతో అధికారాన్ని కైవసం చేసుకున్న కాంగ్రెస్ పార్టీ తెలంగాణలో ప్రభుత్వాన్ని ఏర్పాటు చేసుకుని హామీల అమలుపై దృష్టి పెట్టింది. మరోవైపు బీఆర్ఎస్ నేతలు ప్రభుత్వ హామీలు, అమలు తీరును గమనిస్తున్నారు. తేడా వస్తే ఆందోళనలు చేయడానికి సిద్ధంగా ఉన్నట్లు తెలుస్తోంది.

తెలంగాణ (Telangana) రాష్ట్రంలో అధికారం చేపట్టిన కాంగ్రెస్ (Congress) ప్రభుత్వం.. ఎన్నికల ప్రచారంలో ఇచ్చిన హామీలను అమలుచేసే దిశగా అడుగులు వేస్తుంది. ఈ క్రమంలో మ‌హాల‌క్ష్మి ప‌థ‌కం కింద‌ రేప‌ట్నుంచి ఆర్టీసీ బ‌స్సుల్లో మ‌హిళ‌ల‌కు ఉచిత ప్ర‌యాణం క‌ల్పిస్తూ ఉత్త‌ర్వులు జారీ చేసింది. బాలిక‌లు, మ‌హిళ‌లు, ట్రాన్స్‌జెండ‌ర్లు శ‌నివారం మ‌ధ్యాహ్నం నుంచి ఉచితంగా ప్ర‌యాణించొచ్చ‌ని అధికారులు ఉత్త‌ర్వుల్లో పేర్కొన్నారు.

మరోవైపు తెలంగాణ రాష్ట్ర సరిహద్దుల వరకు అంతర్ రాష్ట్ర ఎక్స్‌ప్రెస్, పల్లె వెలుగు బస్సులలో ప్రయాణం ఉచితంగా చేయవచ్చని కాంగ్రెస్ ప్రభుత్వం తెలిపింది. అయితే మహిళా ప్రయాణికులు ప్రయాణించే దూరం ఆధారంగా వసూలు చేసే ఛార్జీలను.. టీ కాంగ్రెస్ ప్రభుత్వం టీఎస్ఆర్టీసీకి రీయింబర్స్ చేస్తుంది. అదీగాక ప్రయాణం విషయంలో మ‌హిళ‌ల‌కు మ‌హాల‌క్ష్మి స్మార్ట్ కార్డుల‌ను (Mahalakshmi Smart Cards) త్వ‌ర‌లోనే అందిస్తామని రాష్ట్ర ప్ర‌భుత్వం వెల్లడించింది. ఈ పథకం తెలంగాణ ప్రజలకు మాత్రమే అని తెలిపింది.

సోనియాగాంధీ జన్మదినం సందర్భంగా ఈ పథకాన్ని లాంఛ్​ చేస్తున్నట్లు మంత్రులు తెలిపారు. మహాలక్ష్మి పథకంపైనే నిన్నటి కేబినెట్​లో సుదీర్ఘంగా చర్చలు జరిగాయి. కేబినెట్​ మీటింగ్​ అనంతరం మంత్రులు శ్రీధర్​ బాబు, పొన్నం ప్రభాకర్​ కేబినెట్​లో తీసుకున్న నిర్ణయాలను వెల్లడించారు. ఉచిత బస్సు ప్రయాణానికి సంబంధించిన పూర్తి వివరాలను ఆర్టీసీ ఎండీ సజ్జనార్​ వివరించారు.

రేపు మధ్యాహ్నం 1.30 గంటలకు మహాలక్ష్మి పథకాన్ని ప్రారంభిస్తామని ఆర్టీసీ ఎండీ సజ్జనార్​ (RTC MD Sajjanar) వెల్లడించారు. అసెంబ్లీ ప్రాంగణంలో మహాలక్ష్మి పథకాన్ని సీఎం రేవంత్​ రెడ్డి (Revanth Reddy) ప్రారంభిస్తారన్నారు. ఆర్టీసీ బస్సుల్లో మహిళలకు జీరో టికెట్​ ఇస్తారని వివరించారు. మహాలక్ష్మి పథకం వల్ల ప్రజా రవాణాకు మేలు జరుగుతుందని చెప్పారు. కొవిడ్​ వల్ల ప్రజారవాణాకు తీవ్ర విఘాతం కలిగిందని ఆవేదన చెందారు. ఇప్పుడు మహాలక్ష్మి పథకం వల్ల ప్రజా రవాణా పుంజుకుంటుందని వివరించారు.

మహిళలు బస్సు ఎక్కడైనా ఎక్కవచ్చు. ఎక్కడైనా దిగవచ్చని తెలిపిన సజ్జనార్​, ఉచిత ప్రయాణాలకు ఎలాంటి పరిమితులు, షరతులు లేవని వెల్లడించారు. ఆర్టీసీ బస్సుల్లో మహిళలు రోజుకు ఎన్నిసార్లయినా వెళ్లవచ్చు కానీ రాష్ట్రం, కేంద్రం జారీ చేసే ఏదైనా గుర్తింపు కార్డు తప్పని సరిగ్గా చూపాలని తెలిపారు.

సిటీ ఆర్డినరీ, మెట్రో బస్సుల్లో ఉచిత ప్రయాణ పథకం ద్వారా మహిళల స్వయం శక్తి మెరుగవుతుందని ఆర్టీసీ ఎండీ సజ్జనార్​ వివరించారు. ట్రాఫిక్​ సమస్యలు, ప్రమాదాలు తగ్గుతాయన్నారు. ఆర్టీసీలో మహిళలకు ఉచిత ప్రయాణం చారిత్రాత్మక నిర్ణయమని కొనియాడారు. ఇప్పటికే ఆర్టీసీ సిబ్బందికి నిబంధనలు జారీ చేశామన్నారు. వయసుతో సంబంధం లేకుండా బస్సుల్లో ఉచిత ప్రయాణం కల్పిస్తున్నామని సజ్జనార్​ చెప్పారు.