Politics

తెలంగాణ (Telangana)లో ఎన్నికలు జరగడానికి సమయం ఎక్కువగా లేదు. ఈ క్రమంలో బీఆర్ఎస్ (BRS)సభల మీద సభలు నిర్వహిస్తూ, పోటీలో ఉన్న అభ్యర్థులకు సపోర్ట్ గా ఎన్నికల ప్రచారం చేస్తుంది. ఇదే సమయంలో కాంగ్రెస్ (Congress)కూడా గట్టిపట్టు మీదనే ఉన్నట్టు తెలుస్తుంది. తెలంగాణలో రాజకీయ పీఠం లక్ష్యంగా టీ కాంగ్రెస్ నేతలు ముందుకు వెల్లుతున్నారు. హస్తం మీద ఉన్న నిందను మాపడానికి తీవ్రంగా శ్రమిస్తున్న నేతలు.. ప్రస్తుతం కాస్త చల్లపడినట్టు కనిపిస్తుంది. సొంత పార్టీ నేతల మీద ఆరోపణలు తగ్గించి విజయం పై దృష్టి సారించారని కార్యకర్తలు సంబరపడుతున్నారు.

మరోవైపు పోలింగ్‌కు 48 గంటల ముందు ప్రచారానికి తెరపడనున్న నేపథ్యంలో పార్టీలన్నీ ప్రచారాన్ని జోరుగా షురూ చేశాయి. ఇక టీ పీసీసీ అధ్యక్షుడు (TPCC President) రేవంత్‌ రెడ్డి (Revanth Reddy)తన ప్రచారంలో భాగంగా బీఆర్ఎస్ ని గట్టిగానే అరుసుకుంటున్నాడని అనుకుంటున్నారు. ఇప్పటికే బీఆర్ఎస్ అవినీతిని బయటికి తీసుకు వస్తామని శపథం కూడా చేశారు కాంగ్రెస్ నేతలు.. ఇలాంటి విభిన్న పరిస్థితుల్లో తెలంగాణలో విజయం క్యాడ్బరీ చాక్లెట్ లా ఊరిస్తుందని ప్రజల్లో టాక్..

మరోవైపు కేసీఆర్ హ్యాట్రిక్ సాధించడం ఖాయమనే నమ్మకంతో, అభివృద్థి మంత్రంతో బీఆర్ఎస్ ముందుకి వెల్లుతుండగా.. కాంగ్రెస్, బీఆర్ఎస్ అవినీతిని అస్త్రంగా మలుచుకుని ప్రచారం నిర్వహిస్తున్నట్టు తెలుస్తుంది. ఈ క్రమంలో ప్రచారాన్ని మరింత వేగవంతం చేయాలని కాంగ్రెస్ భావిస్తోంది. ఈ నేపథ్యంలో రేపు గాంధీభవన్‌లో శిక్షణ కార్యక్రమం నిర్వహించడానికి ఏర్పాట్లు చేస్తుంది.

ఎన్నికల ప్రచారంపై బూత్ స్థాయిలో శిక్షణ ఇవ్వనున్నట్టు పార్టీ వర్గాలు తెలిపాయి. కాగా ఈ ట్రైనింగ్ కార్యక్రమం 3వ తేదీన ఉదయం 11.30 గంటల నుంచి మధ్యాహ్నం 2.30 గంటల వరకు జరగనుందని పార్టీనేతల సమాచారం. మరోవైపు 119 అసెంబ్లీ నియోజకవర్గాల నుంచి 500 మంది వరకు ఈ కార్యక్రమంలో పాల్గొననుండగా.. రేవంత్ రెడ్డి, మాణిక్ రావు ఠాక్రే, భట్టి విక్రమార్క కూడా ఈ కార్యక్రమంలో పాల్గొంటున్నట్టు కాంగ్రెస్ వర్గాలు వెల్లడించాయి.

రాజకీయాల్లో అవినీతి ఉంటుందని తెలుసు కానీ అభివృద్థి పేరు చెప్పుకుని ఇంత అడ్డగోలు దోపీడి చేస్తారని ఇప్పుడే తెలిసిందని పొంగులేటి శ్రీనివాసరెడ్డి (Ponguleti Srinivas Reddy) అన్నారు. ఖమ్మం జిల్లా 32 వ డివిజన్ లో ఏర్పాటు చేసిన ఆత్మీయ సమావేశంలో పాల్గొన్న ఆయన అధికార పార్టీపై చురకలు అంటించారు. ఖమ్మం (Khammam)లో బీఆర్ఎస్ (BRS) అభ్యర్థి రెండు పర్యాయాలు శాసన సభ్యుడిగా పని చేసి దొరికినంత దోచుకుని దాచుకున్నారని, ప్రజలను తీవ్ర ఇబ్బందులకు గురి చేశారని పొంగులేటి ఆరోపించారు.

ఖమ్మం, పాలేరు నియోజకవర్గాలు వేరు వేరు కాదు రెండు ఒక్కటే అని పొంగులేటి అన్నారు.. ఖమ్మం బీఆర్ఎస్ అభ్యర్థి ఏ సామాజిక వర్గం దగ్గరకు వెళ్తే ఆ సామాజిక వర్గం వాడిగా చెప్పుకునే అలవాటు ఉందని, తనపై తనకే క్లారిటీ లేని అలాంటి వ్యక్తిని ఎన్నుకుంటే ఖమ్మంలో అరాచక పాలన కొనసాగుతుందని పొంగులేటి ఎద్దేవా చేశారు. ఖమ్మం నియోజక వర్గంలో అరాచక పాలన నడిపే వ్యక్తి కావాలా? అభివృద్ధి చేసే వ్యక్తి కావాలా? అని ప్రశ్నించారు.

ఇక ఆక్రమంగా సంపాదించిన డబ్బుతో నేను ఎన్నికల్లో పోటీ చేస్తున్నానని ఓ పెద్దమనిషి చెప్పడం సిగ్గుచేటని.. వేళ కోట్లు దోపిడి చేసిన ఆ పెద్దమనిషి విలువల కోసం మాట్లాడటం.. అరాచకం గురించి నీతులు చెప్పడం దెయ్యాలు వేదాలు చెబుతున్న తీరుగా ఉందని పొంగులేటి విమర్శించారు. అయినా మీ లాగా.. మా కుటుంబంలో ఎవరు రాజకీయంగా డబ్బు సంపాదించలేదు అంటూ సంచలన వ్యాఖ్యలు చేశారు.

డబ్బును విచ్చల విడిగా ఖర్చు చేసే రాజకీయ పార్టీ, వ్యక్తి దేశంలో ఎవరైనా ఉన్నారు అంటే అది నువ్వే కేసీఆర్ (KCR)అని పొంగులేటి ఆరోపించారు. ఖమ్మం జిల్లా ప్రజలు ప్రతి విషయం స్పష్టంగా గమనిస్తున్నారన్న పొంగులేటి, కాంగ్రెస్ పార్టీకి ఓటు వేసి తుమ్మల నాగేశ్వరరావును గెలిపిస్తారని ఆశాభావం వ్యక్తం చేశారు. ఈమేరకు ఖమ్మంలో అత్యధిక మెజారిటీతో తుమ్మల నాగేశ్వరరావును గెలిపించాలని పొంగులేటి శ్రీనివాసరెడ్డి కోరారు.

కమ్యునిస్టులు ప్రత్యేకమైన భావజాలాలు కలిగిన వ్యక్తులుగా, సమాజం కోసం పోరాడే శక్తులుగా ఒకప్పుడు పేరు ఉండేది. కానీ నేడు కమ్యునిస్టుల ఆశావాదం వెనుక ప్రత్యేకమైన నిర్మాణాత్మక ఎజెండా ఏమీ లేదని అంటున్నారు.. రాజకీయంగా ఎదగాలనే ఆశ తప్పా.. ప్రజా సమస్యలపై పట్టింపులేదని ప్రచారం జరుగుతుంది. ఈ ఆశ అనేది గొలుసు లాంటిది.. దీనితో బంధించబడిన వారు, వేగంగా పరిగెత్తుతారు, కాని స్వేచ్ఛగా ఉన్నవారు, పక్షవాతంలా నిలబడి ఉంటారు.

ప్రస్తుతం కమ్యునిస్టుల పరిస్థితి ఇదే అని మేధావులు అంటున్నారు. అసలు వారిపై వారికే నమ్మకం ఉందా! అనే అనుమానం ప్రజల్లో ఉందని చెబుతున్నారు.. మరోవైపు వారికి ఉన్న బలంపై ఇతర పార్టీలకే నమ్మకం లేదు. కాలం కలిసి రావడం లేదని వారు అనుకుంటున్నారు. కానీ అది తప్పని మేధావి వర్గం వాదిస్తుంది. అందుకే కమ్యునిస్టు పార్టీలను అన్ని పార్టీలూ పక్కన పెడుతున్నాయని వారు అంటున్నారు. మరోవైపు రెండు తెలుగు రాష్ట్రాల్లో దశాబ్ద కాలంగా కమ్యునిస్టు పార్టీలు ఇబ్బంది పడుతున్నాయి.

పదేళ్ల నుంచి ఏపీ (AP)లో అయితే శాసనసభలో అడుగు పెట్టలేదు. ఈసారైనా కాలుమోపేందుకు టీడీపీతో జత కట్టడానికి కమ్యునిస్టు పార్టీలు తెగ ప్రయత్నాలు చేస్తున్నాయి. ఒకవేళ టీడీపీ (TDP) జనసేన (Janasena)లతో బీజేపీ (BJP) కలిస్తే ఏపీలోనూ ఒంటరిగా కమ్యునిస్టులు పోటీ చేయాల్సిందే. ఇదే జరిగితే వారి బలమెంతో వారికి తెలుసు. అందుకే ఒంటరిగా పోటీ చేసే సాహసం చేయరని అనుకుంటున్నారు.

తెలంగాణలో మరోవైపు అధికార పార్టీ బీఆర్ఎస్ తో పొత్తు కుదురుతుందని కామ్రేడ్లు ఎన్నో కలలు కన్నారు. మునుగోడు ఉప ఎన్నికల సందర్భంగా తమ మద్దతును కేసీఆర్ స్వయంగా కోరుకోవడంతో కమ్యునిస్టులలో ఆశలు చిగురించాయి. వచ్చే ఎన్నికల్లో తాము చట్ట సభల్లోకి అడుగుపెడతామని ఆశపడ్డారు. మునుగోడు ఉప ఎన్నికలలో బేషరతుగా మద్దతిచ్చారు. కానీ ఇక్కడ సీన్ రివర్స్ అయ్యింది. ఎన్నికల్లో గెలిచిన తర్వాత కమ్యునిస్టులను, కేసీఆర్ కన్నెత్తి చూడలేదన్న విషయం యావత్ రాష్ట్రమంతా తెలుసు..

అసెంబ్లీ ఎన్నికల వేళ అయితే కామ్రేడ్స్ ఎవరు అనే చందాగా కేసీఆర్ ప్రవర్తించారని గుసగుసలు కూడా వినిపించాయి. అదీగాక 119 నియోజకవర్గాలకు బీఆర్ఎస్ అభ్యర్థులను కేసీఆర్ ప్రకటించడంతో వామపక్ష పార్టీలు మరోసారి నిరాశకు గురయ్యారు. మరోవైపు ప్రజా సమస్యలపై పోరాటం తగ్గించినందునే కామ్రేడ్లు ప్రజల్లో వీక్ అయపోయారన్నవాదన వినిపిస్తుంది. ప్రస్తుతం అయితే కాంగ్రెస్ తో జతకడితే చాలు అన్న ధోరణితో వారు హస్తం పార్టీకి దగ్గరయ్యారని ప్రచారం జరుగుతుంది.. కానీ కాంగ్రెస్ మాత్రం చూద్దాంలే అనే తీరుగా వ్యవహరిస్తుందని తెలుస్తుంది.

ప్రస్తుతం సీపీఐ (CPI) పరిస్థితి కుడితిలో పడ్డ ఎలుకల తయారైందని అనుకుంటున్నారు. కాగా కమ్యునిస్టులు ఒంటరిగా పోటీ చేసినా పెద్దగా ప్రమాదం లేదని భావించిన పార్టీలు వారిని పక్కన పెడుతున్నాయనే టాక్ వినిపిస్తుంది. ఇలాంటి సమయంలో కమ్యునిస్టు పార్టీలకు ఉన్న మార్గం.. సొంతంగా బరిలోకి దిగడం. లేదా మళ్లీ వచ్చే ఎన్నికల వరకూ ఎదురు చూపులు చూడటం.. మొత్తానికి ప్రజాక్షేత్రంలో బలహీనంగా మారి వెర్రోళ్ళు అవుతున్న ఎర్రన్నలని కమ్యూనిస్టు భావజాలాలు కలిగిన వ్యక్తులు బాధపడుతున్నారు..

రంగారెడ్డి జిల్లా(Rangareddy dist) మహేశ్వరం కాంగ్రెస్ పార్టీ ఎమ్మెల్యే అభ్యర్థి కిచెన్నగారి లక్ష్మారెడ్డి(Kichannagar Laxmareddy) ఇంట్లో గురువారం తెల్లవారుజామున ఐటీ అధికారులు(IT officers) సోదాలు చేపట్టారు. జిల్లా, శంషాబాద్ మండలం, బహదూర్గుడా గ్రామ శివారులోని లక్ష్మారెడ్డి ఫామ్ హౌస్‌(Form house)పై ఐటీ అధికారుల సోదాలు నిర్వహిస్తున్నారు. భారీ పోలీసు బందోబస్తు నడుమ సోదాలు చేస్తున్నారు.

ఐటీ అధికారులు సోదాలు నిర్వహిస్తున్న క్రమంలో సెక్యూరిటీ సిబ్బంది కేఎల్ఆర్ ఇంట్లోకి ఎవరినీ అనుమతించడంలేదు. విషయం తెలుసుకున్న లక్ష్మారెడ్డి అనుచరులు, కార్యకర్తలు భారీగా ఇంటివద్దకు చేరుకుంటున్నారు. అదేవిధంగా బాలాపూర్‌లోని మహేశ్వరం నియోజకవర్గం కాంగ్రెస్ టిక్కెట్ ఆశావహురాలు, బడంగ్‌పేట్ మున్సిపల్ కార్పొరేషన్ మేయర్ చిగురింత పారిజాతా నర్సింహారెడ్డి ఇంట్లో ఐటీ అధికారులు సోదాలు చేపట్టారు.

గురువారం తెల్లవారుజామున 5గంటలకు చేరుకుని పారిజాత కుమార్తె ఫోన్ స్వాధీనం చేసుకున్న అధికారులు సోదాలు జరుపుతున్నారు. ప్రస్తుతం పారిజాతానర్సింహారెడ్డి తిరుపతిలో, ఆమె భర్త నర్సింహారెడ్డి ఢిల్లీలో ఉన్నారు. కాగా హైదరాబాద్ బాలానగర్ ఏసీపీ పరిధిలో ఎన్నికల కోడ్ అమలులో ఉన్న నేపథ్యంలో పోలీసుల ముమ్మర తనిఖీలు చేపట్టారు.

ఎలాంటి పత్రాలులేని రూ. 1లక్ష 50వేల నగదును జీడిమెట్ల పోలీసులు పట్టుకున్నారు. అలాగే బాలానగర్ పోలీస్ స్టేషన్ పరిధి గిరినగర్‌లో ఎలాంటి పత్రాలు లేకపోవడంతో లక్ష రూపాయల నగదును సీజ్ చేశారు. మరోవైపు సనత్ నగర్ పోలీస్ స్టేషన్ పరిధిలో ఎలాంటి పత్రాలు లేని రూ.21లక్షల నగదును పోలీసులు పట్టుకున్నారు.