Politics

బీజేపీ ఎమ్మెల్యే(BJP MLA)లను టచ్ చేస్తే కాంగ్రెస్ సర్కార్(Congress Government) కూలడం ఖాయమని బీజేఎల్పీ(BJLP) నేత ఏలేటీ మహేశ్వర్‌రెడ్డి(Eleti Maheshwar Reddy) అన్నారు. ఆయన శనివారం మీడియాతో మాట్లాడుతూ.. తమతో ఎనిమిది ఎమ్మెల్యేలు టచ్‌లో ఉన్నారంటూ మంత్రి కోమటిరెడ్డి వెంకటరెడ్డి చేసిన వ్యాఖ్యలకు మహేశ్వర్‌రెడ్డి కౌంటర్ ఇచ్చారు.

తాము గేట్లు తెరిస్తే 48 గంటల్లో కాంగ్రెస్ సర్కార్ ఉండదంటూ హెచ్చరించారు. రాహుల్ గాంధీ ట్యాక్స్ పేరుతో 3వేల కోట్లు వసూలు చేశారని, సీఎం రేవంత్‌ రెడ్డి చేస్తున్న వసూళ్ల చిట్టా తమ దగ్గర ఉన్నదని సంచలన వ్యాఖ్యలు చేశారు. హైదరాబాద్ డబ్బులు దేశ నాయకుల కోసం కాంగ్రెస్ వినియోగిస్తోందని ఆరోపించారు.

రంజిత్‌రెడ్డిపై గతంలో రేవంత్‌రెడ్డి చేసిన వ్యాఖ్యలు ఏమయ్యాయని ప్రశ్నించారు. గతంలో పార్టీ మారిన వారిని రాళ్లతో కొట్టాలన్న రేవంత్ ఇప్పుడు ఇతర పార్టీల నేతలను ఎలా చేర్చుకుంటారని ప్రశ్నించారు. ప్రజాతీర్పును గౌరవించి కాంగ్రెస్‌కు సహకరిస్తున్నామని, ఇష్టం వచ్చినట్లు మాట్లాడితే ఊరుకునేది లేదని హెచ్చరించారు. అప్పుడు రంజిత్ రెడ్డి అవినీతి చేశారని చెప్పిన రేవంత్ ఇప్పుడు ఎన్నికల్లో ఆయనకు ఓటు వేయాలని అడగడం సిగ్గుచేటన్నారు.

కోమటిరెడ్డి వెంకట్ రెడ్డిపై ఎవరికీ నమ్మకం లేదన్నారు. నితిన్‌ గడ్కరీ వద్దకు వెళ్లి షిండే పాత్ర పోషిస్తానని కోమటిరెడ్డి అన్నది వాస్తవం కాదా? అని ప్రశ్నించారు. కోమటిరెడ్డి వెంకటరెడ్డి కూడా ఆయనతో లేడు అని చెప్పారు. షిండే పాత్ర పోషిస్తానని గతంలో గడ్కరీతో కోమటిరెడ్డి అన్నది నిజమా కాదా అన్నారు. తమ్ముడి భార్యకు వెంకట్ రెడ్డి టికెట్ రాకుండా చేశారని ఆరోపించారు.

మాజీ మంత్రి, పెద్దపల్లి బీఆర్‌ఎస్‌ ఎంపీ అభ్యర్థి కొప్పుల ఈశ్వర్‌ (Koppula Eshwar) 36 గంటల రైతు భరోసా దీక్ష(Rythu Bharosa Deeksha) చేపట్టారు. పెద్దపల్లి జిల్లా(Peddapally District)లోని బీఆర్‌ఎస్‌ భవన్‌లో శనివారం దీక్షను ప్రారంభించారు. ఆదివారం సాయంత్రం 8గంటల వరకు కొనసాగనుంది. ఇటీవల మంథని, ఓదెల, సుల్తానాబాద్‌, ధర్మారం, ముత్తారం, కాల్వశ్రీరాంపూర్‌, ఎలిగేడు, జూలపల్లి, పెద్దపల్లి మండలాల్లో దెబ్బతిన్న పొలాలను కొప్పుల ఈశ్వర్‌ శుక్రవారం పరిశీలించిన విషయం తెలిసిందే.

ఈ నేపథ్యంలో 36గంటల దీక్ష చేపట్టి ఆయన రైతులకు భరోసా కల్పిస్తున్నారు. ఈ సందర్భంగా కొప్పుల ఈశ్వర్‌ మాట్లాడుతూ.. తెలంగాణలో కాంగ్రెస్ ప్రభుత్వం అధికారంలోకి వచ్చిన తర్వాత రైతుల పరిస్థితి దయనీయంగా మారిందని ఆవేదన వ్యక్తం చేశారు. రాష్ట్రంలో పాలన అస్తవ్యస్తంగా మారిందని విమర్శించారు. పంటలు ఎండుతున్నా రేవంత్ ప్రభుత్వం పట్టించుకోవడం లేదని మండిపడ్డారు.

ఎండిపోయిన పంటలకు ఎకరాకు రూ.25వేల చొప్పున నష్టపరిహారం చెల్లించాలని ఈ సందర్భంగా కొప్పుల డిమాండ్ చేశారు. రైతులకు న్యాయం చేసే వరకూ తన పోరాటం కొనసాగుతుందని మాజీ మంత్రి స్పష్టం చేశారు. తెలంగాణ ప్రత్యేక రాష్ట్రం ఏర్పాటు కాకముందు ఉన్న పరిస్థితులే మళ్లీ వచ్చాయన్నారు. కేసీఆర్ రైతుల అభివృద్ధికి ఎంతో చేశారని గుర్తుచేశారు. ఆయన హయాంలో వ్యవసాయం పండుగలా మారిందని అభివర్ణించారు.

పుష్కలమైన నీళ్లు, 24గంటల ఉచిత కరెంట్‌, రైతుబంధు, రైతుబీమా పథకాలతో సంబురంగా సాగిందని చెప్పుకొచ్చారు. అయితే కాంగ్రెస్ వంద రోజుల పాలనలో పంటల సాగు ప్రశ్నార్థకంగా మారిందని దుయ్యబట్టారు. ఉమ్మడి కరీంనగర్‌ జిల్లావ్యాప్తంగా సాగునీటి ఎద్దడి నెలకొందన్నారు. మన్మందు పరిస్థితి ఇంకా దారుణంగా మారే అవకాశముందని ఆందోళన వ్యక్తం చేశారు. ఈ దీక్షలో కొప్పుల వెంట పెద్దపల్లి జడ్పీ చైర్మన్‌ పుట్ట మధూకర్‌, బీఆర్‌ఎస్‌ పెద్దపల్లి జిల్లా అధ్యక్షుడు, రామగుండం మాజీ ఎమ్మెల్యే కోరుకంటి చందర్‌, పెద్దపల్లి మాజీ ఎమ్మెల్యే దాసరి మనోహర్‌ రెడ్డి ఉన్నారు.

మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్(KTR) నిస్సహాయ స్థితిలో ఉన్నట్లు స్పష్టంగా తెలుస్తోంది. అందుకు కారణం ఆయన ఇటీవలి కాలంలో చేస్తున్న కామెంట్స్ అని సొంత పార్టీ నేతలే అభిప్రాయం వ్యక్తంచేస్తున్నారు. ఈ రోజుల్లో ఎవరైనా నిజంగా దొంగతనం చేసినా ఎదుటి వాడు ప్రశ్నిస్తే నేను దొంతనం చేయలేదనే వాదిస్తాడు.

కానీ, కేటీఆర్ మాత్రం నిస్సందేహంగా అవును..మేం తప్పులు చేశాము అని ఒప్పుకోవడం.. అయితే ఇపుడేంటి? అన్నట్లు మాట్లాడటం వెనుక ‘ధైర్యం,మళ్లీ అధికారంలోకి వస్తాం అనే నమ్మకం’ కంటే నిస్సహాయతే ఎక్కువగా ఉందని అర్థమవుతోంది. బీఆర్ఎస్ పార్టీకి చెందిన కీలక నేతలు కాంగ్రెస్‌లో చేరడం, గతంలో తమ ప్రభుత్వంలో జరిగిన తప్పులు, అవినీతి, ఫోన్ ట్యాపింగ్ వ్యవహారం, కాళేశ్వరం డ్యామేజ్? వీటన్నింటిపై రేవంత్ సర్కార్ విచారణ జరిపిస్తోంది.

ఇప్పటికే ఫోన్ ట్యాపింగ్ వ్యవహారంలో అధికారులు అంతా అరెస్ట్ అయ్యారు.హెచ్ఎండీఏ(HMDA)లో దాదాపు రూ.1000 కోట్ల నిధుల గోల్‌‌మాల్‌ కేసులో శివబాలకృష్ణ అరెస్టు, ఫార్ములా రేస్ స్కాంలో అప్పటి మంత్రి కేటీఆర్ ఆదేశాల మేరకే రూ.50కోట్లు బదిలీ చేసినట్లు ఐఏఎస్ అధికారి అరవింద్ వాంగ్మూలం ఇవ్వడంతో ఆయన లోలోపల భయపడుతున్నట్లు స్పష్టంగా తెలుస్తోంది.

తర్వాత దర్యాప్తు సంస్థలు తన వద్దకే వస్తాయని కేటీఆర్కు కూడా ఇప్పటికే సమాచారం కూడా ఉందని టాక్.శుక్రవారం ప్రెస్‌మీట్లో భాగంగా సీఎం రేవంత్ మరోసారి కేటీఆర్‌ను హెచ్చరించారు. కేటీఆర్ త్వరలో జైలుకెళ్లడం ఖాయం అని స్వయంగా సీఎం చెప్పడం దేనికి సంకేతం..కేటీఆర్ వరకు దర్యాప్తు సంస్థలు వస్తే తమ వద్దకు రాలేవా? అని ముందే గ్రహించిన గులాబీ లీడర్లు ఒక్కొక్కరుగా సీఎం రేవంత్ పంచన చేరి అరెస్టు నుంచి, తమ అక్రమ సంపాదనను కాపాడుకుంటున్నట్లు తెలుస్తోంది.

రీసెంట్‌గా కేటీఆర్ మాట్లాడుతూ..సీఎం రేవంత్ ఏం పీక్కుంటాడో నేను చూస్తా..అంతపెద్ద కాలేశ్వరంలో రెండు పిల్లర్లు కుంగితే ఏమైంది? ఒకటో రెండో ఫోన్ ట్యాపింగ్ చేశాం.. పక్కా లంగాగాళ్లవి చేస్తాం కానీ అందరివి ఎందుకు చేస్తాం.. లక్ష కాల్ రిక్డార్డ్స్ చేశారని బీఆర్ఎస్‌పై నిందలు వేస్తున్నారని కేటీఆర్ చేసిన కామెంట్స్ వెనుక నిస్సహాయతతో పాటు భయం కూడా ఉందని ప్రస్తుత రాజకీయాల్లో చర్చ నడుస్తోంది.

బీఆర్ఎస్ పార్టీకి చెందిన కీలక నేతలు కాంగ్రెస్ పార్టీలో చేరుతున్న క్రమంలో ఆ పార్టీ నుంచి ఇప్పటికే బయటకు వెళ్లిన కీలక నేత పేరు మరోసారి చర్చకు దారితీసింది. స్వయంగా కేసీఆర్ ఆయనకు కాల్ చేసి వరంగల్ ఎంపీ అభ్యర్థిగా పోటీ చేయాలని ఒప్పించినట్లు జోరుగా ప్రచారం జరుగుతోంది.

దీంతో స్వయంగా ఆ నేతనే మీడియా ముందుకు వచ్చి ఈ ప్రచారంపై క్లారిటీ ఇచ్చారు. ఆయన మరెవరో కాదు బాబు మోహన్(BABU MOHAN). కేఎ పాల్(KA PAUL) స్థాపించిన ప్రజాశాంతి పార్టీ(PRAJASHANTHI PARTY) తెలంగాణ రాష్ట్ర అధ్యక్షుడిగా(TELANGANA PRESIDENT) ప్రస్తుతం ఆయన బాధ్యతలు నిర్వహిస్తున్నారు.

వరంగల్ ఎంపీ సీటు మాజీ డిప్యూటీ సీఎం కడియం శ్రీహరి కూతురు కావ్యకు కేటాయించగా ఆమె పోటీ చేయనని చెప్పి కేసీఆర్‌కు లేఖ రాశారు. కడియం శ్రీహరి, కావ్య ఇద్దరు కాంగ్రెస్ పార్టీలో చేరేందుకు సిద్ధం అయ్యారు. దీంతో వరంగల్ ఎంపీగా పోటీ చేయాలని కేసీఆర్ బాబు మోహన్‌ను కోరినట్లు ప్రచారం జరిగింది.

తాజాగా ఆ ప్రచారాన్ని బాబుమోహన్ ఖండించారు. మరోసారి అలాంటి తప్పు చేయదలుచుకోలేదని స్పష్టంచేశారు. ఎట్టిపరిస్థితుల్లోనూ బీఆర్ఎస్‌లో చేరబోను అని తెలిపారు. ప్రజాశాంతి పార్టీ తరఫున వరంగల్ ఎంపీ అభ్యర్థిగా పోటీ చేస్తానని చెప్పారు.‘తాను కేసీఆర్‌తో మాట్లాడి దాదాపు ఆరేళ్లు అవుతుంది’ ఇదంతా ఎవరు క్రియేట్ చేశారో తెలియదని, తాను ఎవరికీ అమ్ముడుపోనని, తనను కొనే వాళ్లు ఇంకా ఈ భూమి పుట్టలేదని’ బాబుమోహన్ క్లారిటీ ఇచ్చారు.

వరంగల్ బీఆర్ఎస్ పార్లమెంట్ అభ్యర్థి (Warangal mp candidate) ఎంపికపై సస్పెన్స్ ఇంకా కొనసాగుతూనే ఉంది. కడియం కావ్యా(Kadium kavya) ఎంపీ రేసు నుంచి తప్పుకోవడంతో ఆ స్థానంలో తమ పేరును పరిశీలించాలని లోకల్ లీడర్లు బీఆర్ఎస్(BRS) అధిష్టానానికి రిక్వెస్ట్ చేస్తున్నట్లు తెలుస్తోంది. గతంలో స్టేషన్ ఘనపూర్ ఎమ్మెల్యేగా ఉన్న రాజయ్యను తప్పించి మొన్నటి అసెంబ్లీ ఎన్నికల్లో కేసీఆర్ కడియం శ్రీహరికి టికెట్ ఇచ్చారు.

దీంతో రాజయ్య అధిష్టానంపై కోపంతో కాంగ్రెస్ పార్టీలో చేరారు. తాజాగా కడియం , ఆయన కూతురు కూడా కాంగ్రెస్ పార్టీలో చేరేందుకు సిద్ధమయ్యారు. ప్రస్తుతం బీఆర్ఎస్‌కు అక్కడ బలమైన క్యాండిడేట్ ఎవరూ కనిపించడం లేదు.

ఈ క్రమంలోనే మాజీ బీఆర్ఎస్ నేత బాబుమోహన్‌‌కు కేసీఆర్ కాల్ చేసి రెండు రోజుల్లో ఎంపీ టికెట్ కన్ఫామ్ చేస్తానని చెప్పినట్లు ప్రచారం జరిగింది. ఇక కాంగ్రెస్ లో చేరిన రాజయ్యను తిరిగి పార్టీలోకి తీసుకొచ్చేందుకు పల్లారాజేశ్వర్ రెడ్డి మంతనాలు చేస్తున్నట్లు తెలుస్తోంది. ఆయనకు వరంగల్ ఎంపీ సీటు ఆఫర్ చేసినట్లు టాక్.

అయితే, సీనియర్లు ముందుకు రాకపోతే వరంగల్ ఎంపీ స్థానం తమకు కేటాయించాలని తెలంగాణ ఉద్యమకారులు, మాజీ కార్పొరేటర్లు బోడ డిన్నా, జోరిక రమేశ్ లు తీవ్రంగా ప్రయత్నిస్తున్నట్లు సమాచారం. వీరిద్దరు మొదటి నుంచి కడియం కావ్యకు ఎంపీ సీటు కేటాయించడాన్ని వ్యతిరేకించారు. మరో వైపు నర్సంపేట మాజీ ఎమ్మెల్సీ పెద్ది సుదర్శన్ రెడ్డి సతీమణి, వరంగల్ రూరల్ జిల్లా జడ్పీ ఫ్లోర్ లీడర్ పెద్ది స్వప్న సైతం వరంగల్ ఎంపీ టికెట్‌‌ను ఆశిస్తున్నారు. కాగా, గులాబీ బాస్ వరంగల్ ఎంపీ టికెట్ ఎవరికి కేటాయించనున్నారనేది ప్రస్తుతం హాట్ టాపిక్‌గా మారింది.