Politics

గులాబీ అధినేత దిక్కుతోచని పరిస్థితుల్లో పడ్డారు. పార్లమెంట్ ఎన్నికలు(parliament Elections) సమీపిస్తున్న తరుణంలో కాంగ్రెస్(Congress), బీజేపీ(BJP) పార్టీలు ఇప్పటికే అభ్యర్థులను ప్రకటించి ప్రచారంలో దూసుకువెళ్తున్నాయి. కానీ, కేసీఆర్(KCR) మాత్రం అభ్యర్థుల ఎంపిక విషయంలో తర్జన భర్జన పడుతున్నారు.

తను అనుకున్న అభ్యర్థులను ఎంపిక చేసినా ఆ స్థానాల్లో వారు సత్తా చాటుతారా? అన్న భయం కేసీఆకు పట్టుకున్నట్లు తెలుస్తోంది. ఎందుకంటే ఇప్పటికే చాలా మంది గులాబీ నేతలు పోటీకి దూరంగా ఉన్నారు. కేసీఆర్ పిలిచి మరీ టికెట్ ఇస్తానని చెప్పినా ప్రస్తుతమున్న పరిస్థితుల్లో ఎంత బలమైన క్యాండిడేట్ అయినా ఓడిపోతారని రాజకీయ వర్గాల్లో జోరుగా ప్రచారం జరుగుతోంది.

ఈ పరిస్థితుల్లో కేసీఆర్ మదిలో ఉన్న అభ్యర్థులు ఎంపీ ఎన్నికల్లో గెలుస్తారా? లేదా అన్నది పక్కన బెడితే బీజేపీ, కాంగ్రెస్‌కు కనీసం పోటీ ఇస్తారా? అనేది ఇక్కడ చిక్కు ప్రశ్నగా మారింది. ముఖ్యంగా ఆరు ఎంపీ సెగ్మెంట్లలో అభ్యర్థుల ఎంపిక గులాబీ బాస్ కు తలనొప్పిగా మారినట్లు తెలుస్తోంది.

అందులో నాగర్ కర్నూల్, సికింద్రాబాద్, నల్గొండ, భువనగిరి, మెదక్, హైదరాబాద్ స్థానాలు ఉన్నాయి. నాగర్ కర్నూలో ఆర్ఎస్పీ, సికింద్రాబాద్ నుంచి పద్మారావుగౌడ్ పేరు ఖరారైనట్లు సమాచారం. ఇక మెదక్ నుంచి వంటేరు ప్రతాప్ రెడ్డి, హైదరాబాద్ నుంచి కమలాకర్, నల్లగొండలో కంచర్ల కృష్ణారెడ్డి, భువనగిరి నుంచి బూడిద భిక్షమయ్య గౌడ్ పేర్లను ఖరారు చేసినట్లు ప్రచారం జరుగుతోంది.కాగా,వీరి విజయావకాశాలపై మరోసారి పరిశీలించాకే పేర్లను అధికారికంగా ప్రకటించాలని కేసీఆర్ భావిస్తున్నారని తెలిసింది.

ఇదిలాఉంటే, ఎంపీ ఎన్నికల్లో తమకు ప్రాధాన్యం ఇవ్వడం లేదని ఉద్యమకారులు అసంతృప్తి వ్యక్తంచేస్తున్నారు. మొదటినుంచి కేసీఆర్ తమను చిన్నచూపు చూస్తున్నారని వాపోతున్నారు.

కాంగ్రెస్‌ను ఎంపీ సీట్లు అడిగామని సీపీఐ రాష్ట్ర కార్యదర్శి కూనమనేని సాంబశివరావు (Kunamneni Sambashiva Rao) అన్నారు. ఆయన శుక్రవారం ఏర్పాటు చేసిన మీడియా సమావేశంలో మాట్లాడుతూ తాము పోటీ చేయాలనుకుంటున్న సీట్ల వివరాలను ఆ పార్టీకి ఇచ్చామని వెల్లడించారు. కేజ్రీవాల్ అరెస్ట్ అప్రజాస్వామికమన్న ఆయన మార్చి 21ని చరిత్రలోనే బ్లాక్ డే అని వ్యాఖ్యానించారు.

ప్రధాని మోడీ కుట్రపూరితంగా వ్యవహరిస్తున్నారని మండిపడ్డారు. ఆయనలో హిట్లర్ ఉన్నాడంటూ సంచలన వ్యాఖ్యలు చేశారు. మోడీ ఓ నియంత అంటూ మండిపడ్డారు. ఘోరీ, ఔరంగజేబు లాంటి వాళ్ళను చూశాం ఇప్పుడు మోడీ వ్యవహారం అలాగే ఉందన్నారు. బాండ్‌ల రూపంలో వేల కోట్లు బీజేపీ కొట్టేసిందని ఆరోపించారు. బీజేపీ వసూలు చేస్తే తప్పులేదు కానీ మిగతా వారు చేస్తే అరెస్టులు చేయిస్తారా? అని మండిపడ్డారు.

డిప్యూటీ సీఎంను అరెస్టు చేసిన నాడే కవిత, కేజ్రీవాల్‌ను ఎందుకు అరెస్టు చేయలేదని ప్రశ్నించారు. లొంగిపోతాడని కేజ్రీవాల్‌ను వేధించారని దుయ్యబట్టారు. ఇండియా కూటమి నుండి బయటకు రాకపోవడంతోనే ఆయనను అరెస్ట్ చేశారని ఆరోపించారు.బాండ్‌ల రూపంలో వచ్చిన డబ్బంతా అక్రమమే కదా? అని కీలక వ్యాఖ్యలు చేశారు. వాటిపైనా ఎందుకు చర్యలు లేవనిని ప్రశ్నించారు.

బందిపోట్ల నుంచి దొంగలు దోచుకున్నట్లు బాండ్ల రూపంలో బీజేపీ దోచుకుంటోందని మండిపడ్డారు. కాంగ్రెస్‌ను బీజేపీ సమర్థవంతంగా ఎదుర్కోలేకపోతోందని విమర్శించారు. కలిసి వచ్చే వారితో కలవడంలేదని చెప్పారు. బీఆర్ఎస్ పని అయిపోయిందన్న కూనంనేని కాంగ్రెస్ నిలబడాలని ఆకాంక్షించారు. బీజేపీకి 400 సీట్లు దాటాయి అంటే చాలా ప్రమాదకరమని, తెలంగాణలో కాంగ్రెస్‌ మనుగడ కష్టమని అభిప్రాయపడ్డారు.