Telangana

పార్లమెంట్ ఎన్నికలు త్వరలో జరగనున్నాయి. ఈ క్రమంలో ఇప్పటికే తెలంగాణలో బీఆర్ఎస్ (BRS),బీజేపీ (BJP)లు సన్నాహక సమావేశాలను నిర్వహిస్తున్నాయి. అటు కాంగ్రెస్ కూడా ఈ ఎన్నికలపై ఫోకస్ చేస్తోంది. ఇప్పటకే సీఎం రేవంత్ రెడ్డి (Revanth Reddy) పలు మార్లు ఢిల్లీకి వెళ్లి వచ్చారు. లోక్ సభ ఎన్నికల్లో అనుసరించాల్సిన వ్యూహంపై ఇప్పటికే ఆయన అధిష్టానం చర్చించినట్టు తెలుస్తోంది.

తాజాగా పీసీసీ అధ్యక్ష హోదాలో రేవంత్ రెడ్డి 17 పార్లమెంటరీ నియోజకవర్గాల నాయకులతో ఆయన సమీక్ష సమావేశాన్ని నిర్వహించనున్నారు. ఈ సమావేశం రెండు రోజుల పాటు కొనసాగనుంది. మొదటి రోజు ఆదిలాబాద్, నిజామాబాద్, మెదక్, మహబూబ్‌నగర్, హైదరాబాద్ ఉమ్మడి జిల్లాలకు సంబంధించిన పార్లమెంట్ నియోజకవర్గ నాయకులతో ఎంసీహెచ్‌ఆర్‌డీలో రేవంత్ రెడ్డి సమీక్షా సమావేశం నిర్వహించారు.

ఈ సమావేశంలో ఆయా ఉమ్మడి జిల్లాల ఇన్​ఛార్జీలు పాల్గొన్నారు. ఈ సందర్బంగా రాబోయే ఎన్నికల్లో అనుసరించాల్సిన వ్యూహాల గురించి వారితో రేవంత్ రెడ్డి చర్చించారు. మరోవైపు జిల్లాలో రాజకీయ పరిస్థితులు ఎలా ఉన్నాయనే విషయాన్ని ఇంఛార్జ్ లను అడిగి తెలుసుకున్నారు. జిల్లాల్లో ప్రత్యర్థి పార్టీలపై బీఆర్ఎస్, బీజేపీ బలబలాలను ఆరా తీసినట్టు సమాచారం.

సీఎం రేవంత్​రెడ్డి సమీక్ష సమావేశం నేపథ్యంలో మంత్రి సీతక్క మీడియాతో మాట్లాడారు. పదవులు లేకపోయే సరికి బీఆర్​ఎస్​ నేతలు తట్టుకోలేకపోతున్నారని అన్నారు. మహిళలు ఉచితంగా బస్సుల్లో ప్రయాణం చేయడం బీఆర్ఎస్ నేతలకు నచ్చడం లేదన్నారు. ఆటో కార్మికులను బీఆర్​ఎస్​ నాయకులు రెచ్చగొడుతున్నారని మండిపడ్డారు.

తదుపరి విడతలో మహిళలకు 2500 రూపాయలు, గ్యాస్ సిలిండర్​ కోసం రూ. 500, గృహజ్యోతి పథకం కింద 200 యూనిట్​ల ఉచిత కరెంట్ అమలు చేస్తామన్నారు. గత పాలనలో ఉమ్మడి ఆదిలాబాద్‌ జిల్లా అభివృద్దికి ఆమడదూరంలో ఉందన్నారు. మిగతా ప్రాంతాలకు ధీటుగా ఆదిలాబాద్‌ను అభివృద్ది చేస్తామమని రేవంత్ రెడ్డి హామీ ఇచ్చారని మంత్రి సీతక్క వెల్లడించారు.

ఎంసీహెచ్‌ఆర్‌డీ ఉమ్మడి ఆదిలాబాద్‌ జిల్లా పరిధిలో ఉన్న కాంగ్రెస్ ఎమ్మెల్యేలు, ఓడిన అభ్యర్థులు, ఇతర ప్రజా ప్రతినిధులతో సీఎం రేవంత్ రెడ్డి సమావేశం నిర్వహించారని చెప్పారు. జనవరి 26 తర్వాత రాష్ట్రంలో ఇంద్రవెల్లిలో సీఎం రేవంత్ రెడ్డి మొదటి పర్యటన చేస్తారని అన్నారు.

రాబోయే లోక్​సభ సార్వత్రిక ఎన్నికల్లో ప్రధాన పోటీ బీజేపీ (BJP), కాంగ్రెస్​ (Congress) మధ్యే ఉంటుందని తెలంగాణ బీజేపీ చీఫ్, కేంద్ర మంత్రి కిషన్ రెడ్డి తెలిపారు. పార్లమెంట్ ఎన్నికల్లో బీజేపీ, బీఆర్ఎస్ కలిసి పోటీ చేస్తుందని అసత్య ప్రచారాలు చేస్తున్నారంటూ మండిపడ్డారు. తెలంగాణకు బీఆర్​ఎస్​, కేసీఆర్​ ఆవశ్యకత అవసరం లేదన్నారు. భవిష్యత్ లో రాష్ట్ర రాజకీయాల్లో బీఆర్ఎస్ కనుమరుగవుతుందన్నారు.

రాష్ట్ర రాజకీయాల్లో బీఆర్ఎస్ కనుమరుగవుంది

రామ మందిరం ప్రాణ ప్రతిష్ఠ కార్యక్రమం తర్వాత తెలంగాణలో ప్రధాని మోడీ పర్యటిస్తారని చెప్పారు. ఆ సందర్భంగా రాష్ట్రంలో పలు అభివృద్ధి కార్యక్రమాలకు ప్రధాని శంకుస్థాపన చేస్తారని పేర్కొన్నారు. బీజేపీ రాష్ట్ర కార్యాలయంలో పార్లమెంట్ ఎన్నికల సన్నాహక సమావేశాన్ని నిర్వహించారు. ఈ కార్యక్రమానికి బీజేపీ రాష్ట్ర అధ్యక్షుడు కిషన్​రెడ్డి అధ్యక్షత వహించారు.

ఈ సందర్బంగా ఆయన మాట్లాడుతూ….. ఈ నెల 22న దేశమంతట రామజ్యోతులతో కళకళలాడాలని రామజన్మ భూమి ట్రస్ట్ పిలుపునిచ్చిందని వెల్లడించారు. రాజకీయాలకు అతీతంగా ప్రతి దేవాలయ కమిటీ సహకరించాలని కోరారు. రామ మందిరం ప్రాణ ప్రతిష్ఠ కార్యక్రమంలో తెలంగాణ భాగస్వామ్యం కావాలని నిర్ణయించామన్నారు. ప్రాణ ప్రతిష్ఠ కార్యక్రమాన్ని ప్రజలు వీక్షించేలా ప్రతి దేవాలయంలో భారీ తెరలు ఏర్పాటు చేయనున్నట్లు తెలిపారు.

సంక్రాంతి నుంచి ఈ నెల 22 వరకు దేవాలయాల్లో స్వచ్ఛ అభియాన్ పేరిట కార్యక్రమాన్ని చేపడతామన్నారు. కాళేశ్వరం ప్రాజెక్ట్ పై రాష్ట్ర ప్రభుత్వం ఎందుకు సీబీఐ విచారణ కోరడం లేదని ప్రశ్నించారు. బీజేపీ దాటికి తట్టుకోలేక కాంగ్రెస్​ అధ్యక్ష పదవికి రాహుల్ గాంధీ రాజీనామా చేశారని, విదేశాలకు పారిపోయారని ఎద్దేవా చేశారు. పార్లమెంట్ ఎన్నికల కోసం ఇంఛార్జ్ లను నియమించనున్నట్లు పేర్కొన్నారు. ఆర్గనైజేషన్​ ఇంచార్జీలను రేపు ప్రకటిస్తామన్నారు.

ఇది ఇలా వుంటే 17 లోక్‌సభ నియోజకవర్గాలకు ఇన్‌ఛార్జ్‌లను బీజేపీ నియమించింది. ఇందులో 8 మంది ఎమ్మెల్యేలు, ఒక ఎమ్మెల్సీకి, సీనియర్‌ నాయకులను ఇంఛార్జ్ లుగా నియమించారు. వారిలో సికింద్రాబాద్ ఇంఛార్జ్‌గా ఎంపీ లక్ష్మణ్‌, హైదరాబాద్ ఇంఛార్జ్‌గా రాజాసింగ్, ఖమ్మానికి పొంగులేటి సుధాకర్ రెడ్డి, మహబూబాబాద్ కు గరికపాటి మోహనరావు, వరంగల్ కు మర్రి శశిధరరెడ్డిని నియమించారు. ఇక కరీంనగర్ బాధ్యతలు ధనపాల్ సూర్యనారాయణ గుప్తాకు అప్పగించారు.

• మరిన్ని తెలంగాణ వార్తలు మరియు తెలుగు న్యూస్ కోసమై ఇవి చదవండి…!

తెలంగాణ రాష్ట్ర కేబుల్ టీవీ యాజమాన్యాల ఆత్మీయ సమ్మేళనం, నూతనంగా ఎన్నికైన ప్రజా ప్రభుత్వానికి అభినందన, కృతజ్ఞత సభ బషీర్ బాగ్ ప్రెస్ క్లబ్‌లో జరిగింది. ఎన్-24 న్యూస్ టీవి (N-24 News Tv) , మీడియా టుడే టీవీ అధినేత కే.కోటేశ్వర్ రావు (KKR)అధ్యక్షతన సభను నిర్వహించారు. ఈ సమావేశానికి ముఖ్య అతిథులుగా న్యూస్ 9 టుడే అధినేత సీచ్.వీ.చలపతి రాజు, ఏడబ్యూజేఏ, ఎక్స్ క్లూజివ్ టీవీ అధినేత అనం చిన్ని వెంకటేశ్వరావు హాజరయ్యారు.

ఈ సందర్బంగా తెలంగాణ రాష్ట్ర కేబుల్ టీవీ యాజమాన్యాల కోర్ కమిటీని ఎన్నికున్నారు. ఈ సందర్భంగా వాళ్లు మాట్లాడుతూ…. ప్రభుత్వ కార్యక్రమాలను ప్రజల్లోకి తీసుకెళ్లే బాధ్యతను ప్రతి కేబుల్ టీవీ తీసుకుంటుందని తెలిపారు. నూతన ప్రజాస్వామిక ప్రభుత్వానికి తమ మద్దతు ఎప్పుడూ ఉంటుందని వెల్లడించారు. ప్రభుత్వంతో చర్చించి ప్రభుత్వ ప్రకటనలు కేబుల్ టీవీ యాజమాన్యాలకు అందే విధంగా చూడాలని కోర్ కమిటీ సమావేశంలో నిర్ణయం తీసుకునేందుకు సభ నిర్ణయించింది.

తెలంగాణలోని అన్ని ప్రెస్ క్లబ్‌లల్లో జర్నలిస్టుల సంక్షేమం కోసం పాటుపడే వారికి మాత్రమే అవకాశం కల్పించాలని సూచించారు. కానీ చాలా ప్రాంతాల్లో అలా జరగడం లేదన్నారు. కొన్ని ప్రెస్ క్లబ్‌లల్లో మద్యంతో విచ్చలవిడిగా జల్సాలు చేస్తూ జర్నలిస్టు వృత్తికి అవమానం కలిగించేలా ప్రవర్తిస్తున్నారని అన్నారు. దీన్ని పూర్తిగా ఖండిస్తున్నామని చెప్పారు.

త్వరలో సీనియర్ పాత్రికేయులు పాశం యాదగిరి చేపట్టే ఉద్యమానికి తమ మద్దతు ఉంటుందని చెప్పారు. ప్రెస్ క్లబ్ అనేది కేవలం జర్నలిస్టుల సంక్షేమానికి, జర్నలిస్టులకు కోసమే పని చేయాలని కోరారు. వారి మనోభావాలు దెబ్బ తినకుండా చూడాలని విజ్ఞప్తి చేశారు. త్వరలోనే ఈ విషయాలపై తెలంగాణ జర్నలిస్టుల సమాజాన్ని ఏక తాటిపైకి తీసుకువస్తామన్నారు.

ఇది ఇలా వుంటే కోర్ కమిటీ సభ్యులుగా కే.కోటేశ్వర్ రావు, హెచ్.వీ.చలపతి రాజు, అనం చిన్ని వెంకటేశ్వరావు, ఎం. రవి కుమార్, కృష్ణంరాజు, జితేందర్, దేవేందర్, రవీందర్, సాజితా సికిందర్, సీహెచ్. శ్రీనివాస్ రావు, బ్రహ్మం, గిరి, రవికుమార్ లను ఎన్నుకున్నారు.

తెలంగాణ హైకోర్టు (Telangana High Court) నూతన భవనానికి 100 ఎకరాల స్థలాన్ని కేటాయిస్తు ఇటీవల కాంగ్రెస్ ప్రభుత్వం నిర్ణయం తీసుకుంది. ప్రభుత్వ నిర్ణయాన్ని అఖిల భారతీయ విద్యార్థి సంఘం (ABVP) వ్యతిరేకిస్తోంది. ప్రభుత్వం జారీ చేసిన జీవో 55పై తాజాగా ఆందోళనకు దిగింది. రాజేంద్రనగర్ విశ్వవిద్యాలయ పరిపాలన భవనం ఎదుట ధర్నాకు దిగింది.

విశ్వవిద్యాలయానికి సంబంధించిన 100 ఎకరా స్థలాన్ని హైకోర్టుకు మంజూరు చేయడాన్ని నిరసిస్తూ ధర్నా చేసింది. జీవో 55ను వెంటనే రద్దు చేయాలని ఏబీవీపీ నేతలు డిమాండ్ చేశారు. హైకోర్టు నిర్మాణ ప్రతిపాదనను మరో చోటుకు మార్చాలని లేక పోతే ఆందోళనను ఉధృతం చేస్తామని హెచ్చరించారు. వర్శిటీకి చెందిన ఒక్క గజం భూమిని కూడా హైకోర్టుకు ఇవ్వడానికి వీలు లేదన్నారు.

వర్శిటీ స్థలాన్ని హైకోర్టుకు కేటాయిస్తే చూస్తూ ఊరుకోబోమన్నారు. విషయం తెలుసుకున్న రాజేంద్ర నగర్ పోలీసులు వర్శిటీ వద్దకు చేరుకున్నారు. ఏబీవీపీ నేతలకు సర్దిచెప్పే ప్రయత్నం చేశారు. హైకోర్టు నిర్మాణ స్థలం వద్దకు వెళ్లి మీ నిరసన తెలపండని సూచించారు. కానీ దానికి ఏబీవీపీ నేతలు నిరాకరించారు. పరిపాలన భవనం ఎదుట తమ నిరసనను కొనసాగిస్తామని చెప్పారు.

తాము అక్కడి నుంచి వెళ్లబోమంటూ బీష్మించుకు కూర్చున్నారు. జీవో 55ను రద్దు చేయాలంటూ పెద్ద ఎత్తున నినాదాలు చేశారు. రాజేంద్రనగర్ యూనివర్సిటీ భూములను అమ్ము కుంటున్నరంటూ ఆరోపణలు గుప్పించారు. గతంలో వీసీగా పని చేసిన అధికారి అవినీతికి పాల్పడ్డారని ఆరోపణలు చేశారు. ఇటీవల హైకోర్టు భవనానికి 100 ఎకరాల స్థలాన్ని రాష్ట్ర ప్రభుత్వం కేటాయించింది. రాజేంద్రనగర్ మండలం బుద్వేల్ ప్రేమావతిపేట సమీపంలో ఈ భూమిని కేటాయించారు. ఈ మేరకు ప్రభుత్వం జీవో 55ని కూడా జారీ చేసింది.

ఆరు గ్యారెంటీల (Six Guarantees) ను 40 రోజుల్లో ఎలా అమలు చేస్తారని విపక్షాలు విమర్శలు చేస్తున్నాయని మంత్రి పొంగులేటి శ్రీనివాస్ రెడ్డి (Pongulet Srinivas Reddy) అన్నారు. తాము 40 రోజులు అని ఎప్పుడూ చెప్పలేదని, 100 రోజుల్లో ఆరు గ్యారెంటీలు అమలు చేస్తామని చెప్పామని గుర్తు చేశారు. ఎన్నికల కోడ్ వచ్చే వరకు టైం పాస్ చేయబోమని తెలిపారు. 100 రోజుల్లో ఆరు గ్యారెంటీలను అమలు చేసి తీరుతామని స్పష్టం చేశారు.

తెలంగాణలో ఆరు గ్యారెంటీల అమలు కోసం కేబినెట్ సబ్ కమిటీని ప్రభుత్వం ఏర్పాటు చేసింది. డిప్యూటీ సీఎం భట్టి విక్రమార్క నేతృత్వంలో ఈ కమిటీని ప్రభుత్వం ఏర్పాటు చేసినట్టు మంత్రి పొంగులేటి శ్రీనివాస్ రెడ్డి వెల్లడించారు. ఈ కమిటీకి భట్టి విక్రమార్క చైర్మన్, శ్రీధర్ బాబు, తనను నియమించారాని పేర్కొన్నారు. ప్రజా పాలనపై మంత్రులు, ఉన్నతాధికారులతో సీఎం రేవంత్ రెడ్డి సోమవారం సమావేశాన్ని నిర్వహించారు.

ఇందులో ఆరు గ్యారెంటీల అమలు విషయంపై చర్చించారు. నిజమైన లబ్ధిదారులకు అభయ హస్తం పథకాలు అందిస్తామని మంత్రి తెలిపారు. ఎన్నికల హామీల అమలుకు తమ ప్రభుత్వం పూర్తిగా కట్టుబడి ఉందని స్పష్టం చేశారు. ప్రజాపాలన కార్యక్రమాన్ని అధికారులు విజయవంతంగా పూర్తి చేశారని తెలిపారు. ప్రతి గ్రామం, తండా నుంచి ప్రజా పాలన దరఖాస్తులను స్వీకరించామని పేర్కొన్నారు. కోటీ 25 లక్షల దరఖాస్తులు వచ్చాయన్నారు.

ఇతర అంశాలకు సంబంధించి మరో 20 లక్షల దరఖాస్తులు వచ్చాయని చెప్పారు. యుద్ధ ప్రాతిపదికన దరఖాస్తుల డేటా ఎంట్రీ ప్రక్రియ జరుగుతోందన్నారు. ఈనెల 30 వరకు దరఖాస్తుల డేటా ఎంట్రీ జరుగుతుందని స్పష్టం చేశారు. 40 రోజుల్లో హామీలు ఎలా నెరవేరుస్తారని ప్రతిపక్షాలు విమర్శలు గుప్పిస్తున్నాయని.. తాము ఏనాడూ అలా చెప్పలేదని స్పష్టం చేశారు.

వంద రోజుల్లో ఆరు గ్యారెంటీలు అమలు చేస్తామని చెప్పామన్నారు. నిజమైన అర్హులను గుర్తించడమే తమ లక్ష్యమని.. ప్రభుత్వాన్ని విమర్శించడమే ప్రతిపక్షాలు పనిగా పెట్టుకున్నాయని మండిపడ్డారు. దిగజారుడు రాజకీయాలు చేస్తున్నాయని ధ్వజమెత్తారు.