Telangana

రాష్ట్రంలో రేవంత్ రెడ్డి (Revanth Reddy) ప్రభుత్వం కొలువు దీరడంతో.. గత ప్రభుత్వ హయాంలో అతిగా ప్రవర్తించిన అధికారుల గుండెల్లో రైళ్లు పరిగెడుతోన్నాయనే టాక్ పొలిటికల్ సర్కిల్ లో వినిపిస్తోంది. ఇప్పటికే పలువురు ఐఏఎస్, ఐపీఎస్ అధికారులను బదిలీ చేసిన రాష్ట్ర ప్రభుత్వం కీలక పోస్టుల విషయంలో ఆచితూచి వ్యవహరిస్తున్నదనే చర్చ మొదలైంది. దీంతో గత బీఆర్ఎస్ (BRS) ప్రభుత్వానికి అంటకాగిన కొందరు సీనియర్ బ్యూరోక్రాట్ల పోస్టింగ్ అంశం రాష్ట్రంలో హాట్ టాపిక్ గా మారింది..

ఈ క్రమంలో మిషన్ భగీరథ (Mission Bhagiratha) స్కీమ్‌తో పాటు గ్రామీణాభివృద్ధి లాంటి అంశాలలో సీఎంఓ తరఫున బాధ్యతలు నిర్వర్తించిన స్మితా సభర్వాల్ పోస్టింగ్ పై సస్పెన్స్ నెలకొంది. కాళేశ్వరం ప్రాజెక్టుపై అవినీతి ఆరోపణల నేపథ్యంలో ఆమెను ఎక్కడకు బదిలీ చేస్తారనేది ఆసక్తికరంగా మారింది. మరోవైపు మున్సిపల్ శాఖకు అన్నీ తానై వ్యవహరించిన అరవింద్ కుమార్ ఇకపైన లూప్‌లైన్‌లోకి వెళ్ళక తప్పదనే టాక్ వినిపిస్తోంది.

దాదాపు పడేండ్లుగా ఐటీ, పరిశ్రమల శాఖకు కార్యదర్శిగా వ్యవహరించిన ప్రస్తుత స్పెషల్ సీఎస్ జయేశ్ రంజన్ విషయంపై సైతం సచివాలయం సర్కిళ్లలో చర్చలు జరుగుతోన్నట్టు సమాచారం. ఐటీ మంత్రి దుద్దిళ్ల శ్రీధర్ బాబు (IT Minister Duddilla Sridhar Babu) నిన్న నిర్వహించిన సమావేశంలో ఐటీ శాఖకు సంబంధించిన అంశాలపై రివ్యూ చేశారు. అయితే సరైన సమాచారం ఇవ్వడంలో అధికారులు తడబడటంతో మంత్రి ఆగ్రహం వ్యక్తం చేశారు. ఈ నేపథ్యంలో ఆయనను కూడా లూప్‌లైన్‌లోకి బదిలీ చేయవచ్చన్న వార్తలు మొదలైయ్యాయి..

మరోవైపు జలమండలికి దీర్ఘకాలంగా ఎండీగా వ్యవహరించిన దానకిషోర్, వ్యవసాయ శాఖకు కార్యదర్శిగా, కమిషనర్‌గా వ్యవహరిస్తున్న రఘునందన్‌రావు, ప్రస్తుతం రెవెన్యూ శాఖకు ముఖ్య కార్యదర్శిగా ఉన్న నవీన్ మిట్టల్ తదితరుల విషయంలో కూడా ప్రభుత్వం కీలక నిర్ణయం తీసుకొనున్నట్టు వార్తలు వినిపిస్తోన్నాయి. అయితే వీరు లూప్ లైన్ లో ఉంటారా? లేదా అనేది తేలాల్సి ఉంది.

ఇప్పటికే అధికారుల బదిలీలు, వారి పోస్టింగ్ పై దూకుడుగా వ్యవహరిస్తోన్న సీఎం రేవంత్ రెడ్డి.. గత ప్రభుత్వంలో నియమించబడిన సీఎస్ శాంతికుమారి విషయంలో ఎలాంటి నిర్ణయం తీసుకొంటారో అనేది తెలియాల్సి ఉంది. మరోవైపు డీజీపీ అంజనీ కుమార్ పై సీఈసీ సస్పెన్షన్ ఎత్తివేసింది. దీంతో సీఎస్, డీజీపీ పోస్టులను యధావిథిగా కొనసాగిస్తారా? లేక వారి స్థానంలో కొత్తవారిని నియమిస్తారా? అనేది ఆసక్తిగా మారింది.

గత ప్రభుత్వ వైఫల్యాలు, అవకతవకలు, అవినీతి ఆరోపణలను దృష్టిలో పెట్టుకుని మంత్రులకు సైతం వ్యూహాత్మకంగా బాధ్యతలు అప్పజెప్పిన ముఖ్యమంత్రి రేవంత్‌రెడ్డి.. తన పాలనకి మచ్చ అంటుకోకుండా చూసుకొంటున్నట్టు తెలుస్తోంది. ప్రతిపక్షాల మాటల దాడులను సమర్థవంతంగా ఎదుర్కొంటూ.. రాష్ట్రాన్ని గాడిలో పెట్టడానికి మరిన్ని కీలక నిర్ణయాలు తీసుకొన్న ఆశ్చర్యపోవలసిన అవసరం లేదంటున్నారు రాజకీయ విశ్లేషకులు..

తెలంగాణ (Telangana) రాష్ట్రంలో కాంగ్రెస్ (Congress) అధికారంలోకి వచ్చినప్పటి నుంచి.. ఆ పార్టీపై విమర్శలు ఎక్కువైయ్యాయని తెలుస్తోంది. ఇప్పటికే బీఆర్ఎస్ (BRS) నేతలు సమయం దొరికినప్పుడల్లా కాంగ్రెస్ పై విరుచుకుపడుతోన్నారు.. మరోవైపు బీజేపీ నేతలు కూడా చీకట్లో బాణాలు వదిలినట్టు విమర్శలు చేస్తున్నారు.. వీటన్నింటినీ ధీటుగా ఎదుర్కొంటున్న రేవంత్ ప్రభుత్వం సరైన తీరులో సమాధానాలు చెప్తుండటం కనిపిస్తోంది.

ఇక తాజాగా కాంగ్రెస్ ప్రభుత్వం పై బీజేపీ (BJP) ఎంపీ లక్ష్మణ్ (Laxman) కీలక వ్యాఖ్యలు చేశారు. కాంగ్రెస్ ఓబీసీలకు వంచించి మోసం చేసిందని ఆరోపించారు. సెమీ ఫైనల్స్ లో కాంగ్రెస్ కు చెంప పెట్టు లాంటి ఫలితాలు ప్రజలు ఇచ్చి బుద్ధి చెప్పారని తెలిపారు. రానున్న ఫైనల్స్ లో బీజేపీదే విజయం అని ధీమా వ్యక్తం చేసిన లక్ష్మణ్.. మోడీ విధానాల పట్ల ప్రజలు మొగ్గు చూపుతున్నారని అన్నారు. ఐదు రాష్ట్రాల ఎన్నికల్లో ప్రజలు స్పష్టంగా బీజేపీని గెలిపించడం ఇందుకు నిదర్శనం అని పేర్కొన్నారు.

కాంగ్రెస్.. ఉత్తర, దక్షిణ అనే పేరుతో విడదీసే ప్రయత్నాలు చేస్తోందని ఆరోపించిన లక్ష్మణ్.. ఇందులో భాగంగా ద్రవిడ, ఆర్య అనే అంశాన్ని తెరపైకి తెస్తున్నారని మండిపడ్డారు. కానీ బీజేపీలో దక్షిణాది పై ఎలాంటి వివక్ష లేదన్నారు. అందుకు నేనే ఉదాహరణ అని లక్ష్మణ్ వివరించారు. వచ్చే పార్లమెంట్ ఎన్నికల్లో తెలంగాణలో గెలుస్తామని తెలిపిన లక్ష్మణ్.. రాష్ట్రంలో బీఆర్ఎస్ కనుమరుగు కాబోతోందని జోస్యం చెప్పారు.

రాష్ట్ర గవర్నర్ (Governor) త‌మిళిసై సౌంద‌ర్ రాజ‌న్ (Tamilisai Soundar Rajan)పై కీలక వ్యాఖ్యలు చేశారు బీఆర్ఎస్ ఎమ్మెల్యే క‌డియం శ్రీహ‌రి. గవర్నర్ ప్రసంగం పూర్తిగా కాంగ్రెస్ పార్టీ మేనిఫెస్టో చదివినట్లు ఉందని తెలిపారు. గ‌వ‌ర్న‌ర్ ప్ర‌సంగం ముగిసిన అనంత‌రం అసెంబ్లీ మీడియా పాయింట్‌లో మాట్లాడిన క‌డియం శ్రీహ‌రి.. ఇవాళ ఉభ‌య‌స‌భ‌ల‌ను ఉద్దేశించి గ‌వ‌ర్న‌ర్ త‌మిళిసై సౌంద‌ర్ రాజ‌న్ చేసిన ప్ర‌సంగంలో కొత్త‌ద‌నం లేద‌ని ఆరోపించారు.

బీఆర్ఎస్ (BRS) ప్రభుత్వ హయాంలో తెలంగాణ జాతీయ స్థాయిలో అనేక అవార్డులు అందుకున్నది మరిచిపోయిన గవర్నర్.. గత పది సంవత్సరాలుగా తెలంగాణ తిరోగమనంలో ఉన్నట్లు ప్రసంగంలో పేర్కొనడం చిత్రంగా ఉందని క‌డియం శ్రీహ‌రి వెల్లడించారు.. తెలంగాణ వరి ఉత్పత్తిలో హర్యానా, పంజాబ్ రాష్ట్రాలను తలదన్నిముందు నిలిచిందన్న విషయాన్ని గుర్తు చేసిన క‌డియం శ్రీహ‌రి.. రాష్ట్ర త‌లసరి ఆదాయం గణనీయంగా పెరిగింది నిజం కాదా? ఐటీ ఉత్పత్తులు, ఎగుమ‌తుల్లో హైదరాబాద్ బ్రహ్మాండమైన అభివృద్ధి సాధించింది అబద్ధమా? అని ప్రశ్నించారు.

తెలంగాణ నిర్బంధం నుంచి విముక్తి అయింద‌ని గ‌వ‌ర్న‌ర్ చెప్ప‌డం స‌రికాదన్న క‌డియం శ్రీహ‌రి (Kadiyam Srihari).. పలువిషయాల్లో గ‌వ‌ర్న‌ర్ అబ‌ద్ధాలు చెప్ప‌డం దుర‌దృష్ట‌క‌రమని పేర్కొన్నారు. తెలంగాణ 2014లోనే నిర్బంధం నుంచి విముక్తి అయింది. ఇప్పుడు కావ‌డమేమిటి అని క‌డియం ప్ర‌శ్నించారు. మరోవైపు గవర్నర్ ప్రసంగంలో కాంగ్రెస్ (Congress) పార్టీ ఇచ్చిన ఆరు గ్యారెంటీలకు సంబంధించి ఎటువంటి ప్రణాళిక లేదని తెలిపారు.

గవర్నర్ ప్రసంగంలో దళిత బంధు ప్రస్తావన రాలేదు ఎందుకని ప్రశ్నించిన శ్రీహరి.. మద్దతు ధరకు రూ. 500 కలిపి ధాన్యం కొనుగోలు చేస్తామన్న అంశం పై కూడా గవర్నర్ ప్రసంగంలో ప్రస్తావించ లేదని ఆరోపించారు.. ప్రస్తుత పరిస్థితి గమనిస్తే కాంగ్రెస్ ప్రభుత్వం ఇచ్చిన హామీలను నెరవేర్చే విధంగా కనబడడం లేదని కడియం శ్రీహరి అనుమానం వ్యక్తం చేశారు..