Uncategorized

దేశ రాజధాని ఢిల్లీ (Delhi)లో వాయు కాలుష్యం ప్రమాదకర స్థాయిలో పెరుగిపోతోంది. వరుసగా మూడవ రోజు కూడా వాయు నాణ్యత సూచీ (AQI)ప్రమాదకర స్థాయిలో ఉన్నట్టు సఫర్ తెలిపింది. ఈ రోజు ఉదయం ఢిల్లీలో వాయు నాణ్యత సూచీ 413గా నమోదైనట్టు అధికారులు తెలిపారు. దీంతో అధికారుల్లో ఆందోళన మొదలైంది.

ఆనంద్ విహార్ ప్రాంతంలో నిన్న రాత్రి వాయు నాణ్యత సూచీ 999కు చేరుకుంది. ఈ క్రమంలో అనంద్ విహార్ బస్ టెర్మినల్ వద్ద ఢిల్లీ పర్యావరణ మంత్రి గోపాల్ రాయ్ తనిఖీలు చేపట్టారు. యూపీ నుంచి వస్తున్న బీఎస్-3 పెట్రోల్, బీఎస్-4 డీజిల్ వాహనాల వల్ల వాయు కాలుష్యం విపరీతంగా పెరిగిపోతోందన్నారు.

ఢిల్లీలో వాయు కాలుష్యాన్ని కట్టడి చేసేందుకు తమ ప్రభుత్వం శాయశక్తులా ప్రయత్నిస్తోందని మంత్రి వెల్లడించారు. ఆనంద్ విహార్ ప్రాంతంలో ఏక్యూఐ అత్యంత ప్రమాదకర స్థాయికి చేరుకోవడంతో ఇక్కడ తనిఖీలు చేశానన్నారు. అక్కడ వస్తున్న బస్సులన్నీ బీఎస్-3, బీఎస్-4 రకానికి చెందినవన్నారు. ఆ బస్సులన్నీ యూపీ నుంచి వస్తున్నట్టు గుర్తించామన్నారు.

బీఎస్-3, బీఎస్-4 బస్సులను ఢిల్లీకి పంపించవద్దని యూపీ సీఎం యోగీ ఆదిత్యనాథ్ ను కోరుతున్నట్టు చెప్పారు. ఢిల్లీలో ఎక్కువగా ఎలక్ట్రికల్ బస్సులు, సీఎన్‌జీ బస్సులను నడుపుతున్నామన్నారు. నిషేధించిన బస్సులను ఢిల్లీలోకి అనుమతిస్తున్నారంటూ ట్రాఫిక్ పోలీసులు పనితీరుపై ఆయన అసహనం వ్యక్తం చేశారు.

టీపీసీసీ ఛీఫ్ రేవంత్ రెడ్డి సంచలన వ్యాఖ్యలు చేశారు. సీఎం కేసీఆర్ నియంత ముసుగులో ఉన్న క్రిమినల్ పొలిటీషియన్ అని ఆరోపించారు. శుక్రవారం ఆయన మీడియాతో మాట్లాడుతూ.. బీఆర్ఎస్‌ ప్రభుత్వంపై నిప్పులు చెరిగారు. తెలంగాణలో జరగబోయే ఎన్నికల్లో బీఆర్ఎస్ న్యాయమైన పద్ధతిలో పోటీ చేయాలని రేవంత్ డిమాండ్ చేశారు.

రేవంత్ మాట్లాడుతూ.. సీఎం కేసీఆర్‌కు ధైర్యం ఉంటే కాంగ్రెస్ సవాళ్లను స్వీకరించి ఎన్నికల్లో పాల్గొనాలని సవాల్ విసిరారు. విధివిధానాలపైనే ఎన్నికలకు వెళ్దాం.. రండి.. మద్యం, డబ్బు పంచకుండా శాసనసభ ఎన్నికల్లో పోటీకి రావాలి.. అంటూ రేవంత్ ‌డిమాండ్ చేశారు. సమైక్య పాలనలో సీమాంధ్ర నేతలే పెత్తనం చెలాయించారని.. నీళ్లు, నిధులు, నియామకాలు విషయంలో ఇబ్బంది పెట్టారని రేవంత్ మండిపడ్డారు. ఎన్ని రాజకీయ ఇబ్బందులు ఎదురైనా.. సోనియాగాంధీ ధర్మం వైపు నిలబడటం వల్లే ప్రత్యేక రాష్ట్రం వచ్చిందని తెలిపారు.

రాష్ట్ర చిహ్నంలో రాచరిక పోకడలు గుర్తులే కనిపిస్తున్నాయి.. కానీ అందులో ఉండాల్సింది ప్రజల త్యాగాల గుర్తుల.. రాష్ట్రం అధికారిక చిహ్నంలో పోరాటాల స్ఫూర్తి కనిపించడంలేదు. నిరసనలు తెలపడం ప్రజల ప్రాథమిక హక్కు. ప్రజల ప్రాథమిక హక్కులను ఈ పదేళ్లలో కేసీఆర్ కాలరాశారని దుయ్యబట్టారు. ప్రభుత్వాన్ని చూసి ప్రజలే భయపడేలా బీఆర్ఎస్ పాలన ఉందని తెలిపారు. సచివాలయంలోకి ప్రజాప్రతినిధులను, మీడియా మిత్రులను రానివ్వడం లేదు. కేసీఆర్‌.. నియంత ముసుగులో ఉన్న క్రిమినల్ పొలిటీషియన్‌.’ అని రేవంత్ రెడ్డి తీవ్ర స్థాయిలో ధ్వజమెత్తారు.

తెలంగాణ రాష్ట్రం ఏర్పడ్డాక ఎన్నో మార్పులు చూస్తామన్న యువత ఆకాంక్షలు అడియాశలయ్యాయని, మేడిగడ్డ కుంగిందని.. పరీక్షల నిర్వహణలో టీఎస్పీఎస్సీ విఫలమైందని విమర్శించారు. మైనార్టీలకు తమ పార్టీ ప్రాధాన్యత ఇస్తుందన్నారు. ప్రతి రైతు ఖాతాలో రూ.10 వేలు వేస్తామని తాము 2014లోనే హామీ ఇచ్చామని చెప్పారు. హైదరాబాద్‌ అభివృద్ధికి మూలం.. కాంగ్రెస్‌ విధానాలేనని, మూసీ నదిని ప్రక్షాళన చేస్తామని చెప్పారు. 2050 నాటికి ప్రపంచంలోనే గొప్ప నగరంగా హైదరాబాద్‌ను మార్చే ప్రణాళిక తమ వద్ద ఉందని చెప్పారు. కమ్యూనిస్టు పార్టీలు మా పార్టీకి సహజ మిత్రులని, సీపీఐ, సీపీఎం నేతలతో తమ చర్చలు ఇంకా కొనసాగుతున్నాయని రేవంత్ తెలిపారు.

‘రాహుల్ గాంధీ ఆల్ ఇండియా పప్పు, రేవంత్ రెడ్డి తెలంగాణ పప్పు..’ అంటూ కేటీఆర్ వేసిన సెటైర్లకు రేవంత్ అదేరీతిలో స్ట్రాంగ్ కౌంటర్ ఇచ్చారు. ‘నేను కందిపప్పు లాంటివాన్ని.. ఆరోగ్యానికి మంచిది.. కానీ కేటీఆర్ గన్నేరు పప్పు లాంటివాడు.. తింటే చస్తారని దిమ్మతిరిగే రీతిలో కౌంటర్ ఇచ్చాడు. ఆరోగ్యం బాగుండాలంటే కందిపప్పు, ముద్దపప్పును తీసుకోండి.. గన్నేరు పప్పును కాదు’ అని ఎద్దేవా చేశారు.

తెలంగాణ అసెంబ్లీ ఎన్నికలు(Telangana Assembly Elections) ఆసక్తికరంగా మారుతున్నాయి. ఇప్పటికే ప్రధాన పార్టీలు అభ్యర్థుల ప్రకటనను చేసినా కొన్ని నియోజకవర్గాలకు అభ్యర్థులను ఇంకా సస్పెన్స్‌లోనే ఉంచాయి. దీంతో ఆశావహులు ఉత్కంఠగా ఎదురుచూస్తున్నారు. ఈ క్రమంలో బీజేపీ శేరిలింగంపల్లి ఎమ్మెల్యే (sherlingampally mla) టికెట్‌పై ఇంకా ఓ క్లారిటీ రాలేదు. అయితే బీజేపీ ఆ స్థానాన్ని జనసేనకు అప్పగించనున్నట్లు ప్రచారం జరుగుతోంది. ఈ వార్తల నేపథ్యంలో శేరిలింగంపల్లి బీజేపీకే ఉండాలని పార్టీ శ్రేణులు కోరుకుంటున్నారు.

తొలిజాబితాలో బీజేపీ 52మంది అభ్యర్థులను ప్రకటించింది. ఆ తర్వాత ఒకే ఒక్క అభ్యర్థితో రెండో లిస్టును విడుదల చేసింది. ఇందులో మహబూబ్‌నగర్ అభ్యర్థిగా మిథున్‌రెడ్డిని ప్రకటించారు. ఇక బీజేపీ మూడో లిస్టులో 35మంది పేర్లను ప్రకటించింది. అందులో శేరిలింగంపల్లి టికెట్‌ను మాత్రం బీజేపీ సస్పెన్స్‌లో పెట్టింది. శేరిలింగంపల్లి నియోజకవర్గంలో ఇదివరకు పోటీ చేసిన యోగానంద్‌కే పార్టీ టికెట్ వచ్చే అవకాశాలున్నాయని అంతా అనుకున్నారు. అయితే ఎవరూ ఊహించని విధంగా అక్కడి స్థానాన్ని బీజేపీ వదులుకుంటున్నట్లు ప్రచారం జరుగుతోంది. ఈ నేపథ్యంలో అధిష్టానం ఆంతర్యం ఏమిటో అర్థం కాక పార్టీ శ్రేణులు అయోమయంలో ఉన్నారు.

శేరిలింగంపల్లిలో గురువారం రాత్రి యోగానంద్ ‌మద్దతుదారులు సమావేశాన్ని ఏర్పాటు చేశారు. ఈ సందర్భంగా శేరిలింగంపల్లిలో బీజేపీకే టికెట్ కేటాయించాలి.. ప్రత్యేకంగా యోగానంద్‌కే టికెట్ కేటాయించాలంటూ కార్యకర్తలు నినాదాలు చేశారు. ఈ సమావేశంలో యోగానంద్ మాట్లాడుతూ.. బీజేపీ తరఫున ఆలస్యం చేయకుండా ప్రచారం మొదలు పెట్టాలన్నారు. బీజేపీ గెలుపునకు కృషి చేయాలని పిలుపునిచ్చారు. పార్టీ ఆదేశాలకు తామంతా కట్టుబడి ఉంటామని తెలిపారు. పార్టీ టికెట్‌ ఎవరికి ఇచ్చినా వారిని గెలిపించేందుకు కృషి చేయాలని కార్యకర్తలకు సూచించారు. అయితే, బీజేపీ అభ్యర్థిని కాకుండా జనసేనకు ఆ ఛాన్స్‌ ఇస్తే.. గెలుపొందే అవకాశాలు తక్కువగా ఉన్నాయని ఇక్కడి పార్టీ శ్రేణులు అభిప్రాయపడుతున్నారు.

గత అసెంబ్లీ ఎన్నికల్లో శేరిలింగంపల్లి నుంచి బీజేపీ తరఫున పోటీ చేసిన గజ్జల యోగానంద్‌ అప్పట్లో పార్టీ సంస్థాగతంగా బలంగా లేకపోయినా గట్టి పోటీని ఇచ్చారు. ఓటమిని చవిచూసినా అవేమీ లెక్క చేయకుండా ముందుకెళ్లారు. అయితే బీజేపీ టికెట్‌ను జనసేనకు కేటాయిస్తున్నట్లు వార్తలు రావడంతో పార్టీ శ్రేణులు నిరాశకు గురవుతున్నారు. మరోవైపు, యోగానంద్‌ను లోక్‌సభకు పంపే యోచనలో ఉన్నట్లు చర్చ నడుస్తోంది. బీజేపీ నాలుగవ లిస్టు వచ్చే వరకూ ఈ వార్తలపై ఓ క్లారిటీ రానుంది.

ప్రధాని నరేంద్ర మోడీ(PM modi) మరోసారి తెలంగాణ(Telangana)లో పర్యటించనున్నారు. నవంబర్ 7వ తేదీన బీసీ ఆత్మగౌరవ సభకు, 11వ తేదీన పరేడ్ గ్రౌండ్‌లో నిర్వహించే మాదిగ, ఉపకులాల విశ్వరూప మహాసభలకు ముఖ్య అతిథిగా హాజరుకానున్నారు. ఇందుకోసం తెలంగాణ బీజేపీ నేతలు తగు ఏర్పాట్లను ముమ్మరం చేశారు.

ఎస్సీ రిజర్వేషన్ల వర్గీకరణకు తక్షణమే చట్టబద్ధత కల్పించాలని కోరుతూ ఎమ్మార్పీఎస్ వ్యవస్థాపక అధ్యక్షుడు మందకృష్ణ మాదిగ ఛలో హైదరాబాద్ కార్యక్రమానికి పిలునిచ్చారు. ఎన్నికల వేళ మూడు రోజుల వ్యవధిలో ప్రధాని రెండు సార్లు తెలంగాణకు రాబోతుండటం ఆసక్తిగా మారింది.

గత నెలలో నిజామాబాద్ పర్యటనకు వచ్చిన ప్రధాని కేసీఆర్‌పై సంచలన వ్యాఖ్యలు చేశారు. ‘ఇంతకు ముందు ఎప్పుడూ చెప్పని రహస్యం ఒకటి చెబుతాను. జీహెచ్ఎంసీ ఎన్నికల అనంతరం కేసీఆర్ దిల్లీకి వచ్చి నన్ను కలిశారు. చాలా ప్రేమ చూపించారు. మీ నేతృత్వంలో దేశం ప్రగతి పథంలో నడుస్తోంది. ఎన్డీఏలో చేరుతాం అని కోరారు. నేను తిరస్కరించా’ అని మోదీ సభలో చెప్పారు.

ఈ వ్యాఖ్యలపై కేసీఆర్ ఇప్పటి వరకు రియాక్ట్ కాలేదు. కేటీఆర్, హరీశ్‌రావు మీడియాతో ప్రధాని వాఖ్యలు పచ్చి అబద్దాలని కొట్టిపారేశారు. అయితే ఎన్నికల వేళ ఈసారి పర్యటనలో మోడీ మరోసారి కేసీఆర్‌ను టార్గెట్ చేస్తూ ప్రసంగిస్తారా? లేక హామీల వరకే పరిమితం అవుతారా అనేది ఆసక్తిగా మారింది.

కాళేశ్వరం ప్రాజెక్టు(Kaleshwaram Project)లో రూ.లక్ష కోట్ల అవినీతి జరిగిందని కాంగ్రెస్ అగ్రనేత రాహుల్‌గాంధీ(RahulGandhi) ఆరోపించారు. జయశంకర్ భూపాలపల్లి జిల్లాలోని మేడిగడ్డ బ్యారేజీ(Medigadda barrage) లో పిల్లర్లు కుంగిన ప్రాంతాన్ని కాంగ్రెస్ అగ్రనాయకుడు రాహుల్ గాంధీ పరిశీలించారు. ఏరియల్ వ్యూ ద్వారా బ్యారేజీని ఆయన చూశారు. కుంగిన ప్రాంతాన్ని పరిశీలించిన ఆయన.. అందుకు గల కారణాలను అధికారులను అడిగి తెలుసుకున్నారు.

రాహుల్‌తో పాటు టీపీసీసీ చీఫ్ రేవంత్‌రెడ్డి, సీఎల్పీ నేత భట్టివిక్రమార్క, శ్రీధర్‌బాబులు ఉన్నారు. అంతకుముందు అంబటిపల్లి వద్ద మహిళ సాధికార సభలో ఆయన ప్రసంగించారు. కాంగ్రెస్ అమలు చేయబోయ ఆరు గ్యారంటీలను రాహుల్ వివరించారు. రాహుల్ మాట్లాడుతూ.. ‘‘దొరల తెలంగాణ, ప్రజల తెలంగాణ మధ్య యుద్ధం జరుగుతోంది. కాళేశ్వరం ప్రాజెక్ట్ కేసీఆర్ కుటుంబానికి, బీఆర్ఎస్ పార్టీకి ఏటీఎంలా మారింది. బ్యారేజీల పిల్లర్లు కుంగిపోతున్న కేసీఆర్ ఎందుకు పరిశీలనకు రావడం లేదు’’ అని ప్రశ్నించారు.

కేసీఆర్‌కు కాళేశ్వరం ప్రాజెక్ట్ ఏటీఎంలా మారిందని రాహుల్ గాంధీ ఆరోపించారు. బీఆర్ఎస్ ప్రభుత్వం తెలంగాణ ప్రజల సొమ్మును దోపిడీ చేస్తుందని విమర్శించారు. కాంగ్రెస్ అధికారంలోకి రాగానే రూ.500కు వంట గ్యాస్ సిలిండర్ ఇస్తామని.. కేసీఆర్ దోచుకున్న సొమ్మును మహిళల ఖాతాల్లో వేస్తామని అన్నారు. ఆర్టీసీ బస్సుల్లో మహిళలకు ఉచిత ప్రయాణం కల్పిస్తామని.. మహాలక్ష్మి పథకం కింద ప్రతి మహిళకు రూ.2,500 ఇవ్వనున్నట్లు వెల్లడించారు.

బీఆర్ఎస్, ఎంఐఎం, బీజేపీ మూడు ఒక్కటేనని, అందుకే ఈ ఎన్నికల్లో కాంగ్రెస్‌ను గెలిపించి ప్రజా ప్రభుత్వాన్ని ఏర్పాటు చేసుకోవాలని రాహుల్ ప్రజలను కోరారు. కేసీఆర్ దోచుకున్న సొమ్మును మహిళల ఖాతాల్లో వేస్తామని చెప్పారు. ఆర్టీసీ బస్సుల్లో మహిళలకు ఉచిత ప్రయాణం కల్పిస్తామని, మహాలక్ష్మి పథకం కింద ప్రతీ మహిళకు రూ.2,500 ఇస్తామని మేనిఫెస్టోలో ప్రకటించిన పథకాలను వివరించారు.

మహారాష్ట్ర(Maharastra)లో మరాఠా రిజర్వేషన్(Marata regervation) కల్పించడానికి అఖిలపక్షం ఏకగ్రీవంగా ఆమోదం తెలిపింది. ఈ విషయాన్ని ముఖ్యమంత్రి ఏక్‌నాథ్ షిండే వెల్లడించారు. మరాఠాలకు రిజర్వేషన్ కల్పించడానికి ఇప్పటికే అమలవుతున్న రిజర్వేషన్‌లలో మార్పులు తీసుకురాకూడదని అఖిలపక్షం సూచించిందని ఆయన చెప్పారు. ఈ క్రమంలోనే ఈ రిజర్వేషన్‌ కోసం చేస్తున్న నిరాహార దీక్షను మనోజ్ జరాంగే(Manoj Jaraange) విరమించాలని సీఎం కోరారు.

మరాఠా ప్రజలకు రిజర్వేషన్ కల్పించాలని మహారాష్ట్రలో జరిగిన అఖిలపక్ష సమావేశం మరోసారి ఏకగ్రీవ తీర్మానాన్ని ఆమోదించింది. మరాఠా రిజర్వేషన్ల కోసం ఆమరణ దీక్ష సాగిస్తున్న జాల్నాకు చెందిన హక్కుల కార్యకర్త మనోజ్ జరంగే పాటిల్‌ను తన దీక్షను ఉపసంహరించుకోవలసిందిగా కూడా అఖిలపక్ష సమావేశం విజ్ఞప్తి చేసింది.

హింసాకాండ, దహనకాండ కారణంగా రాష్ట్రంలోని కొన్ని ప్రాంతాల్లో దిగజారిన శాంతి భద్రతల పరిస్థితిపై సమావేశం ఆందోళన వ్యక్తం చేసింది. మరాఠా ప్రజలకు రిజర్వేషన్ కల్పించాలని సమావేశం తీర్మానించినట్లు ముఖ్యమంత్రి ఏక్‌నాథ్ షిండే విలేకరులకు తెలిపారు. ఇతర కులాలలకు చెందిన రిజర్వేషన్లు దెబ్బతినకుండా చూడాల్సిన అవసరం ఉందని సమావేశంలో నిర్ణయించినట్లు ఆయన తెలిపారు. దీనికి కొంత సమయం పడుతుందని, అంతవరకు అందరూ సహనం పాటించాలని ఆయన పిలుపునిచ్చారు.

మరాఠా కోటా ఉద్యమంతో మహారాష్ట్ర రగిలిపోయింది. విద్య, ఉద్యోగాల్లో మరాఠాలకు రిజర్వేషన్లు కల్పించాలని ఆందోళనకారులు రాష్ట్రవ్యాప్తంగా నిరసనలు చేపట్టారు. జాతీయ రహదారులు, రైల్వే ట్రాకులను దిగ్బంధించారు. పలు చోట్ల ప్రభుత్వ, బీజేపీ కార్యాలయాలకు నిప్పుపెట్టారు. దీంతో ప్రభుత్వం స్పందించి ఈ మేరకు మరాఠా రిజర్వేషన్‌ అమలుకు ఆమోదం తెలిపింది.

నటుడు, నిర్మాత(Actor, Producer) బండ్ల గణేష్ సంచలన వ్యాఖ్యలు చేశారు. చంద్రబాబు(Chandrababu) కోసం తాను చనిపోవడానికి కూడా సిద్ధమేనని ప్రకటించారు. ఏం తప్పు చేశారని చంద్రబాబును జైల్లో పెట్టారని ప్రశ్నించారు. చంద్రబాబు దేశానికి చాలా అవసరమని చెప్పారు. హైదరాబాద్‌(HYD)లో ఆదివారం రాత్రి నిర్వహించిన చంద్రబాబు గ్రాటిట్యూడ్ కాన్సెప్ట్‌లో మాట్లాడుతూ ఆయన ఎమోషనల్ అయ్యారు.

హైదరాబాదులో ప్రఖ్యాతిగాంచిన సైబర్ టవర్స్ (Cyber Towers) సిల్వర్ జూబ్లీ వేడుకల్లో చంద్రబాబు గ్రాటిట్యూడ్ కాన్సెర్ట్ (కృతజ్ఞత సంగీత కచేరీ) ఏర్పాటు చేశారు. టాలీవుడ్ మ్యూజిక్ డైరెక్టర్ అనూప్ రూబెన్స్ (Anup Rubens) బృందం తమ సంగీత ప్రదర్శనతో సభకు వచ్చినవారిని ఉర్రూతలూగించింది. ఈ కార్యక్రమానికి వచ్చిన నిర్మాత బండ్ల గణేశ్ (Bandla Ganesh) హాజరై మాట్లాడారు.

ఈ సందర్భంగా బండ్ల తీవ్ర భావోద్యేగానికి లోనైన కండితడి పెట్టారు. చంద్రబాబు రాజమండ్రి సెంట్రల్ జైల్లో ఉండడంతో నేను వినాయకచవితి, దసరా పండుగను జరుపు కోలేదని అన్నారు. దీపావళి (Diwali) పండుగని ఘనంగా జరుపుకునేలా చంద్రబాబుకు దేవుడు ఆశీర్వాదం ఇవ్వాలి ఆయన కోరుకుంటున్నట్లు తెలిపారు. బాబు ఏం తప్పుడు చేశారని జైల్లో పెట్టారని ప్రశ్నించారు.

అధికారంలో ఉన్నప్పుడు రాజకీయాలకు, కుటుంబానికి పదవులు ఇవ్వకుండా దూరం పెట్టారన్నారు. ‘నా తండ్రి వయసు 78 ఏళ్లు. చంద్రబాబును ఎందుకు అరెస్ట్ చేశార్రా అని ఆయన అడిగారు. నాన్నా.. కులీకుతుబ్ షా హైదరాబాద్ (Hyderabad)ను కట్టాడు. 400 ఏళ్లయినా ఆయన పేరు చెప్పుకుంటున్నారు. అలాగే సైబర్ టవర్స్ (Cyber Towers) కట్టిన చంద్రబాబును 4 వేల ఏళ్లయినా గుర్తుంచుకుంటారు అని నాన్నతో చెప్పా’ అని గణేశ్ తెలిపారు.

ఈ మధ్య ఎక్కడికి వెళ్లినా చంద్రబాబు జై అంటున్నారు. అమెరికాలో, ఆస్ట్రేలియాలో, హైదరాబాద్‌లో, ఢిల్లీలో ఆయనకు జై కొడుతున్నారు. కానీ చంద్రబాబు రాజమండ్రి జైల్లో ఉంటే కడుపు తరుక్కుపోతోంది. ఆఖరికి భార్యాబిడ్డలను కూడా పక్కనబెట్టి ప్రజల కోసం పాటుపడిన ఆయనకు ఈ పరిస్థితి వచ్చిందంటే కడుపు రగిలిపోతోంది. చంద్రబాబు కోసం నా ప్రాణాలిచ్చేందుకైనా సిద్ధమే… అలాంటి వ్యక్తి దేశానికి అవసరం’ అంటూ బండ్ల గణేశ్ ఉద్వేగభరితంగా ప్రసంగించారు.

హైదరాబాద్‌(Hyderabad)లోని చంపాపేట్‌(Champapet)లో శనివారం ఉదయం జరిగిన స్వప్న(Swapna) అనే యువతి హత్య(murder) కేసుకు సంబంధించి పోలీసులు దర్యాప్తు ముమ్మరం చేశారు. ఈ నేపధ్యంలో సంచలన నిజాలు వెలుగులోకి వచ్చాయి. హత్యకు ప్రేమ వ్యవహారమే కారణమని పోలీసులు చెబుతున్నారు. స్వప్న కేసును దర్యాప్తు చేసిన పోలీసు అధికారులు మాట్లాడుతూ ఆసక్తికర వ్యాఖ్యలు చేశారు.

మృతిచెందిన స్వప్న అనే యువతి గతంలో సతీష్ అనే యువకుడిని ప్రేమించింది. కాగా స్వప్నకు ప్రేమ్ అనే యువకుడితో వివాహం జరిగింది. అయితే స్వప్న వివాహం జరిగిన తరువాత కూడా ప్రియుడు సతీష్‌తో కాంటాక్ట్‌లోనే ఉన్నది. సతీష్ చంపాపేట్ లోని స్వప్న ఇంటికి తరుచూ వస్తూ పోతూ ఉండేవాడు. ఈ నేపథ్యంలో స్వప్నకు తన భర్త ప్రేమ్ మధ్యన ఇటీవల మనస్పర్ధలతో గొడవలు చోటుచేసుకున్నాయి.

కాగా శనివారం ఉదయం 11:30గంటలకు చంపాపేట్‌లోని స్వప్నఇంటికి సతీష్.. అతడి స్నేహితునితో కలిసి వచ్చాడు. అనంతరం స్వప్న గొంతు కోసి హత్య చేశారు. ప్రేమ్‌ను రెండవ అంతస్తు నుంచి కిందకు నెట్టివేశాడు. ప్రస్తుతం స్వప్న భర్త ప్రేమ్ కుమార్ ఉస్మానియా ఆసుపత్రిలోని ఐసీయూలో కోమాలో ఉన్నాడు. ఈ నేపథ్యంలో ప్రేమ్ కుమార్ వాంగ్మూలాన్ని తీసుకుంటే కేసును ఛేదించవచ్చని పోలీసులు భావిస్తున్నారు.

ప్రేమ్‌కుమార్ స్పృహలోకి ఎప్పుడు వస్తాడో తెలీదు. ఈ క్రమంలో స్వప్న తండ్రి ఇచ్చిన ఫిర్యాదు మేరకు హత్య కేసుగా నమోదు చేసుకొని పోలీసులు దర్యాప్తు చేస్తున్నారు పోలీసులు. మూడు బృందాలుగా ఏర్పడి కేసును వివిధ కోణాల్లో దర్యాప్తు చేపట్టారు.

‘చంద్రబాబు చస్తాడు’ అంటూ తెలుగుదేశం పార్టీ(TDP) అధినేత నారాచంద్రబాబు నాయుడు(Chandrababu Nayudu)పై  కీలక వ్యాఖ్యలు చేసిన వైసీపీ హిందూపురం ఎంపీ(Hindupuram Mp) గోరంట్ల మాధవ్(Gorantla Madhav) ఎట్టకేలకు ఓ క్లారిటీ ఇచ్చారు. టీడీపీ తన మాటలను వక్రీకరిస్తోందని ఆరోపించారు. పద దోషంతో అలా మాట్లాడాల్సి వచ్చిందన్నారు. చంద్రబాబు రాజకీయంగా చనిపోతారన్నదే తన ఉద్దేశం అని స్పష్టం చేశారు.

‘2024లో నారా చంద్రబాబు చస్తారంటూ గోరంట్ల సంచలన వ్యాఖ్యలు చేశారు. ‘చంద్రబాబు బస్సు యాత్ర మొదలుపెట్టారు.. ఇప్పుడు జైలు యాత్ర చేస్తున్నారు. లోకేష్ పాదయాత్ర మొదలుపెట్టి.. ఢిల్లీ యాత్ర చేశారు. పవన్‌ వారాహి యాత్ర మొదలుపెట్టి.. వదిలిపెట్టి పారిపోయే యాత్ర చేస్తున్నారు. ఎవరెన్ని యాత్రలు చేసినా.. జగన్ జైత్రయాత్రను ఆపలేరు. 2024లో జగన్ సీఎం అవుతారు. చంద్రబాబు చస్తాడు’ అని గోరంట్ల హాట్ కామెంట్స్ చేశారు.

ఏపీలో అసెంబ్లీ ఎన్నికలకు ఇంకా సమయం ఉన్నా.. ఎంపీ గోరంట్ల ఏంటి ఇలా అనేశారు? అని జనాలు మాట్లాడుకునేలా ఆయన వ్యాఖ్యలు ఉన్నాయి. గోరంట్ల మాధవ్ వ్యాఖ్యలపై పెద్ద దుమారమే చెలరేగింపు టీడీపీ శ్రేణులు రాష్ట్రమంతా నిరసన జ్వాలలు చేపట్టాయి. ఈ నేపథ్యంలో తాజాగా ఉమ్మడి అనంతపురం జిల్లాలో వైసీపీ చేపట్టిన సామాజిక సాధికార బస్సు యాత్రలో ఎంపీ గోరంట్ల మాధవ్ పాల్గొని మాట్లాడుతూ చంద్రబాబుపై ఆయన చేసిన వ్యాఖ్యలకు క్లారిటీ ఇచ్చారు.

‘నా వ్యాఖ్యలను టీడీపీ వక్రీకరించింది. పద దోషంతో నారా చంద్రబాబుపై ఆ వ్యాఖ్యలు చేయాల్సి వచ్చింది. వాఖ్య నిర్మాణం లోపం వల్ల అలా మాట్లాడాను. చంద్రబాబు రాజకీయంగా చనిపోతారన్నదే నా ఉద్దేశం. 2024 ఎన్నికల్లో వైసీపీకి 175సీట్లు ఖాయం. 2024 ఎన్నికల తర్వాత టీడీపీ సమాధి అవుతుంది. ఎస్సీ, ఎస్టీ, బీసీ, మైనారిటీలకు ఇంగ్లీష్ మీడియం విద్య జగన్ పుణ్యమే’ అని గోరంట్ల మాధవ్ అన్నారు.