Breaking News

– బీజేపీ అభ్యర్థులకు తలనొప్పిగా మారిన ప్రచారం
– మేనిఫెస్టో ఆలస్యంతో అయోమయం
– హామీలపై క్లారిటీ లేకపోవడంతో నిలదీస్తున్న ప్రజలు
– ఎట్టకేలకు స్పందించిన హైకమాండ్
– 12 లేదా 13న మేనిఫెస్టో ప్రకటన
– అన్ని వర్గాలను సంతృప్తి పరిచేలా హామీలకు ప్లాన్

తెలంగాణ (Telangana) లో అధికారమే లక్ష్యంగా భారతీయ జనతా పార్టీ (BJP) వ్యూహాలకు పదునుపెడుతోంది. ఎన్నికలకు సమయం దగ్గరపడుతుండటంతో ప్రచార పర్వంలో దూసుకెళ్లాలని చూస్తోంది. ఓవైపు జాతీయ నేతలు ఒక్కొక్కరుగా రాష్ట్రానికి వస్తున్నారు. మంగళవారం ప్రధాని మోడీ (PM Modi) కూడా తెలంగాణలో పర్యటించనున్నారు. జనసేన (Janasena) తో పొత్తు కన్ఫామ్ అయింది. దీంతో మరింత ఉత్సాహంగా జనంలోకి వెళ్లాలని చూస్తోంది బీజేపీ. అయితే.. అభ్యర్థులకు అడుగడుగునా చుక్కలు కనబడుతున్నాయి.

ఓటర్లను ఆకర్షించడంలో మేనిఫెస్టోది కీలక పాత్ర. ఇప్పటిదాకా ఏం చేశాం.. ఇకపై ఏం చేస్తామని అందులో పొందుపర్చి ఓటర్లకు గాలం వేసేందుకు ఇది ఎంతో ఉపయోగపడుతుంది. ఇప్పటికే బీఆర్ఎస్, కాంగ్రెస్ మేనిఫెస్టో హామీలను ప్రకటించి ప్రచారం చేసుకుంటున్నాయి. కానీ, బీజేపీ మాత్రం ఈ అంశంపై దృష్టి పెట్టినా ప్రకటన ఆలస్యమైంది. దానివల్ల ప్రజల ముందుకు వెళ్తున్న బీజేపీ నేతలకు ఏం హామీ ఇవ్వాలో తెలియని పరిస్థితి నెలకొంది. కేంద్రం రాష్ట్రానికి ఇచ్చిన నిధులనే వివరిస్తూ ప్రచారాన్ని ముగిస్తున్నారు.

కొందరు నేతలైతే.. ఎన్నికల్లో పోటీ చేసేందుకు పార్టీ టికెట్ వచ్చిందని సంబరపడాలో… మేనిఫెస్టో రాక, జనానికి ఏం చెప్పాలో తెలియక బాధపడుతున్న పరిస్థితి నెలకొందని అంటున్నారు. ప్రచారానికి వెళ్తున్న కొందరు నాయకులను ప్రజలు నిలదీస్తున్నారు. వారి ప్రశ్నలకు సమాధానం చెప్పలేక.. ఎన్నికల ప్రచారాన్ని త్వరగా ముగిస్తున్నట్టు సమాచారం. ఓటర్లను ఏం చెప్పి తమ వైపునకు తిప్పుకోవాలో తెలియని సందిగ్ధంలో కమలనాథులు పడినట్టు మాట్లాడుకుంటున్నారు.

నియోజకవర్గాల్లో పార్టీ నేతలకు ఎదురవుతున్న పరిస్థితులు చివరకు హైకమాండ్ వరకు చేరినట్టు తెలుస్తోంది. తాజాగా మేనిఫెస్టోపై కీలక ప్రకటన చేశారు పార్టీ అధ్యక్షుడు కిషన్ రెడ్డి. ఈ నెల 12 లేదా 13న మేనిఫెస్టో రిలీజ్ ఉంటుందని స్పష్టం చేశారు. ఒక కుటుంబం చేతిలో తెలంగాణ బందీ అయ్యిందని.. కేసీఆర్ నియంతలా రాష్ట్రాన్ని పరిపాలిస్తున్నారని.. ప్రజా సంక్షేమానికి తగ్గట్టుగా తమ మేనిఫెస్టో ఉంటుందని తెలిపారు. దీంతో బీజేపీ అభ్యర్థులు హమ్మయ్య అని అనుకుంటున్నారు. ఇప్పటిదాకా ప్రజలు అడిగే ప్రశ్నలకు సమాధానం చెప్పలేకపోతున్నామని.. మేనిఫెస్టో ప్రకటన తర్వాత ఇచ్చే హామీలను వివరించి ఓట్లు అడుగుతామని చెబుతున్నారు.

– కేసీఆర్ కాంగ్రెస్ ప్రొడక్ట్
– కొడుకు కోసం పాత సెక్రటేరియట్ కూల్చారు
– హుజూరాబాద్ ఫలితాలే రిపీట్ అవుతాయి
– అన్ని వర్గాలను సీఎం మోసం చేశారు
– కామారెడ్డి, గజ్వేల్‌ లో కేసీఆర్‌ ఓటమి తప్పదు
– మీట్ ది ప్రెస్ లో కిషన్ రెడ్డి విమర్శల దాడి

సీఎం కేసీఆర్‌ (CM KCR) కామారెడ్డి, గజ్వేల్‌ లో ఓటమి పాలవుతారని బీజేపీ రాష్ట్ర అధ్యక్షుడు కిషన్‌ రెడ్డి (Kishan Reddy) విమర్శించారు. ఆదివారం హైదరాబాద్‌ (Hyderabad) ప్రెస్‌ క్లబ్‌ లో మీట్‌ ది ప్రెస్‌ లో పాల్గొన్న ఆయన.. డబ్బుతో అభ్యర్థులు, నాయకులను కొనవచ్చు కాని, ప్రజల కోపాన్ని తగ్గించలేరని అన్నారు. హుజూరాబాద్‌ (Huzurabad) ఉపఎన్నికల్లో వచ్చిన ఫలితమే తెలంగాణ వ్యాప్తంగా రాబోతోందని జోస్యం చెప్పారు. రానున్న రోజుల్లో తెలంగాణ యువత సునామీలా విజృంభించి బీఆర్‌ఎస్‌ (BRS) ను తుడిచిపెడుతుందని అన్నారు.

రాష్ట్రంలో సీఎం, మంత్రులను కలిసే వీలు లేకుండా పోయిందన్న కిషన్ రెడ్డి.. దళితుడిని సీఎం చేస్తానని.. కేసీఆర్ మాట తప్పారని.. ఉద్యోగ నియామకాల్లో విఫలమయ్యారని విమర్శలు చేశారు. కేసీఆర్ రోడ్ల గురించి మాట్లాడుతున్నారని.. కేంద్రం నిధులివ్వకుంటే వేసే వారా? అని ప్రశ్నించారు. తెలంగాణ అభివృద్ధిలో కేంద్రం కీలకంగా వ్యవహరించిందన్న ఆయన.. ఈ ఎన్నికల్లో జనసేన (Janasena) తో కలిసి పోటీ చేస్తున్నామని స్పష్టం చేశారు. తెలంగాణకు బీసీ నేతను ముఖ్యమంత్రిని చేయటమే బీజేపీ (BJP) లక్ష్యమని చెప్పారు.

ఒక కుటుంబం చేతిలో తెలంగాణ బందీ అయిందని కిషన్‌ రెడ్డి విమర్శించారు. తెలంగాణ ఆకాంక్షలకు విరుద్ధంగా బీఆర్‌ఎస్‌ పాలన సాగుతోందని అన్నారు. కేసీఆర్‌ నియంతలా పరిపాలిస్తున్నారని మండిపడ్డారు. రాష్ట్రంలో నిరసన తెలిపే హక్కు లేకుండా చేశారని, పదేళ్లుగా ఒక్క టీచర్‌ పోస్టు కూడా భర్తీ చేయలేదని, ఉద్యోగ భర్తీలపై ప్రభుత్వానికి చిత్తశుద్ధి లేదని విమర్శల దాడి చేశారు. బీఆర్ఎస్ పోయి కాంగ్రెస్ వస్తే పెనం మీద నుంచి పొయ్యిలో పడ్డట్లే అని అన్నారు. రుణమాఫీతో 30 శాతం మంది రైతులకు కూడా లాభం జరగలేదన్న ఆయన.. ఉస్మానియా ఆస్పత్రికి తాళాలు వేయాల్సిన దుస్థితి నెలకొందని ఆవేదన వ్యక్తం చేశారు.

టీఎస్పీఎస్సీ విఫలమైందని, 17 పరీక్షలు వాయిదా పడ్డాయని తెలిపారు కిషన్ రెడ్డి. కాళేశ్వరం ప్రాజెక్ట్ చూస్తే కడుపు తరుక్కుపోతోందని.. మేడిగడ్డ బ్యారేజ్ లో ఉన్న 10 టీఎంసీల వాటర్ ఖాళీ చేశారని అన్నారు. భద్రాచలం సీతారామ కళ్యాణానికి ముఖ్యమంత్రి హోదాలో కేసీఆర్ కనీసం వెళ్ళడం లేదన్నారు. మనవడిని భద్రాచలం పంపడం ఎంత వరకు కరెక్ట్? అని ప్రశ్నించారు. ఎన్నికల వ్యవస్థను కేసీఆర్ చిధ్రం చేశారని ఆరోపించారు. కేసీఆర్ తన రాజకీయ జీవితాన్ని కాంగ్రెస్‌ తోనే ప్రారంభించారని గుర్తు చేశారు. కాంగ్రెస్, బీఆర్ఎస్‌ కు పూర్తి అవగాహన ఉందని, 2004లో కాంగ్రెస్‌ తో టీఆర్ఎస్ ప్రభుత్వం కలసి పనిచేసిందని వివరించారు. ‘కాంగ్రెస్ అమ్ముకునే పార్టీ.. బీఆర్ఎస్ కొనుక్కునే పార్టీ’ అని ఎద్దేవ చేశారు. బీజేపీకి బీఆర్ఎస్‌ తో ఎలాంటి సంబంధాలు లేవని స్పష్టం చేశారు.

వాస్తు పేరుతో పాత సెక్రటేరియట్ ను కూల్చేసిన కేసీఆర్.. కొత్త సచివాలయానికి ఎదుకు రావడం లేదని ప్రశ్నించారు కిషన్ రెడ్డి. రాష్ట్రంలో 53 శాతం ఉన్న బీసీలు తలుచుకుంటే ఏదైనా సాధ్యమేనన్నారు. బీసీని సీఎం చేస్తామని బీజేపీ ప్రకటించిందని.. రాహుల్ గాంధీ, కేటీఆర్ బీసీలను అవమానించేలా మాట్లాడుతున్నారని విమర్శించారు. బీజేపీ అధికారంలోకి రాగానే ప్రగతి భవన్ ను ప్రజా ప్రగతి భవన్ గా మారుస్తామని తెలిపారు. 9 ఏళ్ల పాలనలో కేసీఆర్ అన్ని వర్గాల ప్రజలను మోసం చేశారని ఆరోపించారు. ఉద్యమాల పేరుతో బీఆర్ఎస్ అధికారంలోకి వచ్చిందని విమర్శించారు. 1200 మంది బలిదానాలకు బాధ్యులెవరని ప్రశ్నించారు కిషన్ రెడ్డి.

తెలంగాణ (Telangana) అసెంబ్లీ ఎన్నికలకు (Assembly-Elections)అభ్యర్థుల తొలి జాబితా (First List) సీపీఎం (CPM) ప్రకటించింది. ఎన్నికల్లో పోటీ చేసే అభ్యర్థుల తొలి జాబితాలో 14 స్థానాలకు అభ్యర్థులను ఖరారు చేసింది. మరో మూడు స్థానాలకు ఆదివారం సాయంత్రం అభ్యర్థులను ప్రకటించే అవకాశమున్నట్టు సమాచారం.

మరోవైపు సీపీఎం రాష్ట్ర కార్యదర్శి తమ్మినేని వీరభద్రం.. ఖమ్మం జిల్లా పాలేరు నుంచి బరిలోకి దిగనున్నారని తెలిపారు. ఇక తెలంగాణ ఎన్నికల్లో ప్రతి పార్టీ దూకుడు ప్రదర్శిస్తోంది. ప్రచారంలో జోరు కూడా పెంచింది. విమర్శలే అస్త్రాలుగా పార్టీలు ముందుకి వెళ్ళుతున్నాయి. మరోవైపు పొత్తుల మీద ఆశ పెట్టుకున్న సీపీఎం ఆశలు ఆవిరవడంతో ఒంటరిగా ఎన్నికల బరిలో దిగేందుకు సిద్దమైంది.

సీపీఎం పొత్తు విషయంలో కాంగ్రెస్‌తో చివరి వరకు ప్రయత్నించిన అవి ఫలించలేదు. మిర్యాలగూడ, వైరా స్థానాలను ఇవ్వాలని గతంలో సీపీఎం కోరింది. కానీ కాంగ్రెస్ పెద్దల నుంచి ఎలాంటి స్పందన రాక పోవడంతో ఒంటరి పోరు మేలని భావించిన ఎర్రన్నలు అటువైపు అడుగులు వేశారు. ఇక సీపీఎం ప్రకటించిన అభ్యర్థుల తొలి జాబితాలో ఉన్న పేర్లను పరిశీలిస్తే..

పాలేరు నుంచి తమ్మినేని వీరభద్రం.. మిర్యాలగూడ నుంచి జూలకంటి రంగారెడ్డి.. భద్రాచలం నుంచి కారం పుల్లయ్య.. అశ్వారావుపేట నుంచి పి.అర్జున్
మధిర నుంచి పాలడుగు భాస్కర్‌.. వైరా నుంచి భూక్యా వీరభద్రం.. ఖమ్మం నుంచి శ్రీకాంత్.. సత్తుపల్లి నుంచి భారతి.. నకిరేకల్‌ నుంచి చినవెంకులు.. భువనగిరి నుంచి నర్సింహ.. జనగామ నుంచి కనకారెడ్డి.. ఇబ్రహీంపట్నం నుంచి యాదయ్య.. పటాన్‌చెరు నుంచి మల్లికార్జున్.. ముషీరాబాద్‌ నుంచి దశరథ్‌ అసెంబ్లీ ఎన్నికల బరిలో దిగనున్నారని సీపీఎం ప్రకటించింది.

తెలంగాణలో జనసేన అభిమానులు, బీజేపీ కార్యకర్తలు ఉత్కంఠంగా ఎదురుచూస్తున్న అంశం ఓ కొలిక్కి వచ్చింది. జనసేన, బీజేపీ మధ్య పొత్తు కుదిరింది. ఈ మేరకు రెండు పార్టీల అధ్యక్షులు జరిపిన చర్చలలో జనసేన 9 స్థానాల్లో పోటీ చేసేందుకు అంగీకారం తెలిపింది. మరోవైపు హైదరాబాద్‌లో ఈ నెల 7న నిర్వహించనున్న ప్రధాని మోదీ సభకు.. పవన్‌ కల్యాణ్‌ (Pawan Kalyan) హాజరవుతున్నట్టు సమాచారం.

కాగా జనసేన (Janasena) అధినేత పవన్‌ కల్యాణ్‌ నివాసంలో జరిగిన సమావేశంలో కేంద్రమంత్రి, బీజేపీ (BJP) రాష్ట్ర అధ్యక్షుడు కిషన్‌రెడ్డి (Kishan Reddy) ఎంపీ లక్ష్మణ్‌, నాదెండ్ల మనోహర్‌ పాల్గొన్నారు. అయితే మొదట 11 చోట్ల పోటీ చేయాలని జనసేన భావించినా చివరికి 9 స్థానాలతో సరిపెట్టుకోవడం జనసేన లోని కొందరు నేతలను నిరాశకు గురిచేస్తుందని అనుకుంటున్నారు.

మరోవైపు జనసేన పోటీ చేసే స్థానాల పేర్లను త్వరలో ప్రకటిస్తామని పార్టీ వర్గాలు తెలిపాయి. కాగా తొమ్మిది స్థానాల్లో పోటీ పై.. పవన్ కల్యాణ్ క్లారిటీ ఇచ్చారు. దేశానికి నరేంద్ర మోదీ (Narendra Modi) అవసరం ఎంతో ఉందని.. అందుకే నరేంద్ర మోదీయే మూడోసారి ప్రధాని కావాలనే ఆలోచనతో ముందుకు వెళ్తున్నామని పవన్ అన్నారు.. కాగా ఈ నెల 7న హైదరాబాద్‌లోని ఎల్బీ స్టేడియంలో జరిగే బీసీ ఆత్మగౌరవ సభకు హాజరు కావాలని పవన్‌ కల్యాణ్‌ను.. కిషన్‌రెడ్డి, లక్ష్మణ్‌లు కోరగా.. అందుకు ఆయన అంగీకరించినట్టు తెలుస్తుంది.