Featured

– కాళేశ్వరం అవినీతిని బయటపెడతామంటున్న కాంగ్రెస్
– కానీ, ఈఎన్సీ మురళీధర్ రావునే నమ్ముతున్న వైనం
– అధ్యయన కమిటీలో సభ్యుడిగా చేర్చాలని ఉత్తమ్ ప్రతిపాదన
– కమిటీ రిపోర్ట్ ఆధారంగా చర్యలుంటాయంటున్న సీఎం రేవంత్
– మరి, ఆయనపై ఆయనే దర్యాప్తు చేసుకుంటారా?
– ఆనాడు ఈఎన్సీ హోదాలో ప్రతి బిల్లుకు ఆమోదం
– కాళేశ్వరం సూపర్ అంటూ గొప్పలు
– కొడుకు అభిషేక్ రావు కంపెనీకి సబ్ కాంట్రాక్టులు
– అవినీతి లెక్కలు తేలుస్తామంటున్న కాంగ్రెస్ ప్రభుత్వం..
– మురళీధర్ రావు అనుమతులపై ఫోకస్ ఎందుకు పెట్టడం లేదు?
– landsandrecords.com పరిశోధనాత్మక కథనం

కాళేశ్వరం ప్రాజెక్టులో లక్ష కోట్ల అవినీతి జరిగిందనేది మొదట్నుంచి కాంగ్రెస్ చేస్తున్న ఆరోపణ. ఇప్పుడు హస్తం పార్టీనే అధికారంలోకి వచ్చింది. మేడిగడ్డపై విజిలెన్స్ విచారణకు ఆదేశించింది. టోటల్ కాళేశ్వరంపై అధ్యయనానికి ఓ కమిటీ ఏర్పాటు చేయాలని నిర్ణయించింది. అయితే.. ఆ కమిటీలో ఈఎన్సీ మురళీధర్ రావు కూడా ఉండాలని మంత్రి ఉత్తమ్ కుమార్ రెడ్డి ప్రతిపాదన చేయడం.. దానికి ఆమోదం తెలపడం చర్చనీయాంశంగా మారింది. కాళేశ్వరం ప్రాజెక్టు విషయంలో మురళీధర్ రావు చేతుల మీదుగానే అన్ని బిల్లులు విడుదలయ్యాయి. జరిగిన అవినీతికి సాక్ష్యం ఆయనే. అలాంటి వ్యక్తిని కమిటీలో సభ్యుడిని చేయడం ఏంటి..? ఆయనపై ఆయనే దర్యాప్తు చేసుకుంటారా? అంటూ landsandrecords.com ఓ పరిశోధనాత్మక కథనాన్ని ఇచ్చింది.

అధ్యయన కమిటీ నివేదిక ఆధారంగా చర్యలు.. కానీ..!

కాళేశ్వరంపై అధ్యయనం చేయడానికి ఓ కమిటీని ఏర్పాటు చేయాలని ఈమధ్య కాంగ్రెస్ సర్కార్ నిర్ణయం తీసుకుంది. అందులో కేంద్ర జల సంఘం మాజీ ఛైర్మన్ ఏబీ పాండ్యాతో కూడిన 8మందితో కమిటీ ఏర్పాటు చేయాలని భావించింది. వారిలో ఈఎన్సీ మురళీధర్ రావు కూడా ఒకరు. ఈ అధ్యయన కమిటీ ఇచ్చిన నిర్ణయం మేరకే చర్యలు ఉంటాయని సీఎం రేవంత్ రెడ్డి తాజాగా హెచ్చరించారు. అయితే.. మురళీధర్ రావు సభ్యుడిగా ఉండడంతో కీలక సమాచారం దాచి పెట్టి.. ఆయన చేసిన పనులను ఆయనే వెనుకేసుకొని రారనే గ్యారెంటీ ఏంటనే ప్రశ్న ఉత్పన్నం అవుతోంది.

సమాచారం దాచడంలో దిట్ట.. నిజాలు బయటకెలా వస్తాయి?

తెలంగాణలో 10 ఏండ్లుగా రూ.2 లక్షల కోట్ల సాగునీటి ప్రాజెక్టుల పనులు జరిగాయి. అలాగే, రూ.50 వేల కోట్ల తాగునీటి ప్రాజెక్ట్స్ ఉన్నాయి. వీటన్నింటకీ బిల్లుల జారీలో కీలక సూత్రధారి మురళీధర్ రావే. రిటైర్డ్ అయినా కూడా ఈయన్ను ఎక్స్ టెన్షన్ పేరుతూ కేసీఆర్ ఎన్నో ఏళ్లుగా దగ్గర పెట్టుకున్నారు. విచిత్రం ఏంటంటే.. కాంగ్రెస్ ప్రభుత్వం కూడా ఈయన్ను కొనసాగిస్తోంది. అవినీతి జరిగిందని విచారణ చేస్తున్నప్పుడు విధులను పక్కనపెట్టి చేస్తే ఎన్నో విషయాలు బయటకు వస్తాయి. కానీ, కమిటీలో ఆయనే ఉంటే కీలక సమాచారం దాచిపెట్టే ఛాన్స్ ఉంటుంది. కాళేశ్వరం పేరుతో ఏటీఎంలా వాడుకున్న‌ డ‌బ్బులు ఎటు వెళ్లాయో ఆరా తీయ‌డం మొద‌లు పెట్టాలి. ఎవ‌రెవ‌రికి ఎలా కేటాయింపులు చేశారు? వ‌ర్క ఆర్డ‌ర్స్ ఎలా వ‌చ్చాయి? అసలైన పాత్రధారులు, సూత్ర‌ధారులు ఎవ‌రు? అంచ‌నాలు ఎంత‌? ఖ‌ర్చు పెట్టింది ఎంత‌? రివైజ్డ్ ఎస్టిమేషన్ పేరుతో ఇంజినీర్ ఇన్ చీఫ్ ముర‌ళీధ‌ర్ రావు అవినీతి బాగోతంపై గురి పెట్టాల్సి ఉంది. అలాంటిది ఆ మనిషికే కీలక కమిటీలో చోటు కల్పించడం ఏంటి..?

కుమారుడికి, తెలిసినవాళ్లకి లబ్ధి

కాళేశ్వరం కాంట్రాక్ట్ సంస్థ మేఘాతో స‌బ్ కాంట్రాక్ట్ డీల్స్ చాలా జరిగాయి. ఖ‌మ్మం జిల్లాలో గతంలో కాంగ్రెస్ నుంచి గెలిచి.. బీఆర్ఎస్ గూటికి చేరిన ఉపేందర్ రెడ్డికి, ఆయ‌న అల్లుడికి చేసిన సేవ‌లకు గాను.. వ‌రంగ‌ల్ జిల్లాలోని బిల్లా హార్ష‌వ‌ర్ద‌న్ రెడ్డికి ఈఎన్సీ ఇప్పించిన కాంట్రాక్టులు చాలానే ఉన్నాయి. త‌న కుమారుడైన‌ సాయి అభిషేక్ రావుకి సంబంధించిన కంపెనీకి కాంట్రాక్టులు వెళ్లాయి. హర్ష కన్ స్ట్రక్షన్ తో పాటు మరో కంపెనీకి మేలు చేసినందుకు భారీగా లబ్ధి పొందినట్టు సమాచారం. ఇలా చాలానే జరిగాయి. అందుకే, కాళేశ్వరం అధ్యయన కమిటీలో మురళీధర్ రావుని తప్పించి విచారణ చేపడితే గానీ నిజానిజాలు బయటకు రావని landsandrecords.com కథనాన్ని ఇచ్చింది.

– అనుభవం ఉందని నియమిస్తే ఆగం చేశారు
– 1049 మంది రీ రిక్రూట్ మెంట్ లో 200 మంది అక్రమార్కులే
– కేసీఆర్, కేటీఆర్ డిపార్ట్ మెంట్లలోనే అధిక అక్రమాలు
– పక్కదారి పట్టిన వేల కోట్లు
– అన్నీ బయటకు రావాలంటే ఏసీబీని దింపాలంటున్న ఉద్యోగులు
– డిపార్ట్ మెంట్ల వారీగా విచారణ జరపాలని డిమాండ్
– కొత్త ప్రభుత్వం ఆ దిశగా అడుగులేస్తుందా?
– landsandrecords.com పరిశోధనాత్మక కథనం

ప్రతిపక్షంలో ఉన్నప్పుడు గత కేసీఆర్ ప్రభుత్వంపై ఎన్నో ఆరోపణలు చేసింది కాంగ్రెస్. రాష్ట్రాన్ని నాశనం చేశారని.. సలహాదారులు, రిటైర్డ్ అధికారులతో లూటీ చేస్తున్నారని విమర్శల దాడి చేసింది. అయితే.. ఇప్పుడు రాష్ట్రంలో కాంగ్రెస్ ప్రభుత్వం కొలువుదీరింది. మరి, ఆనాటి విమర్శలకు ఇప్పుడు చర్యలు తీసుకుంటుందా? అనే ప్రశ్న ఉత్పన్నమౌతోంది. ఈ క్రమంలోనే రిటైర్డ్ అయిన వారిని రీ రిక్రూట్ మెంట్ చేసుకుని సాగించిన పాలనపై, జరిగిన అవినీతిపై landsandrecords.com పరిశోధనాత్మక కథనాన్ని ఇచ్చింది.

200 మంది అవినీతిపరులు

బీఆర్ఎస్ పాలనలో రిటైర్డ్ అయిన 1049 మందిని తీసుకొచ్చి అక్షరాలా వెయ్యి కోట్ల రూపాయలు జీతాలు ఇచ్చారు. ప్రభుత్వంలోని పెద్దలకు, ప్రజాప్రతినిధులకు, పార్టీ కార్యకర్తలకు ఏం కావాలో అది జబర్దస్త్ గా రూల్స్ , చట్టాలు ఫాలో కాకుండా వారితో చేయించుకున్నారు. రీ రిక్రూట్ మెంట్ అయిన 1049 మందిలో 200 మంది అవినీతికి పాల్పడినట్లు ఆరోపణలు ఉన్నాయి. పని లీగల్ గా చేస్తారని అనుభవం ఉన్నవారిని తెచ్చి పెట్టుకుంటే.. అవినీతికి పాల్పడటమే కాకుండా పనులు చట్టపరంగా చేయలేదట. అందినకాడికి దోచుకోవాలని దొపిడీ ముఠాలా మారారనే విమర్శలు ఆయా శాఖల్లో వినిపిస్తున్నాయి. రిటైర్డ్ అయ్యాం.. తమపై ఏం చర్యలు ఉంటాయని అనుకున్నారో ఏమో.. ఉద్యోగం చేసినన్ని రోజులు సంపాదించలేని ఆస్తులు గత ఐదేళ్లలో సంపాదించారని అనుకుంటున్నారు ఉద్యోగులు. నీటిపారుదల ఈఎన్సీలు, హెచ్ఎండీఏ, మున్సిపాల్టీల్లో ఉన్న అధికారులు తరాతరాలకు తరగని ఆస్తులను సంపాదించారట. తమ వారికే కాంట్రాక్టులు ఇచ్చి , కాంట్రాక్ట్ బేసిక్ లో ఉద్యోగాలు ఇప్పించి పెద్ద ఎత్తున అవినీతికి పాల్పడ్డారు. ఒకరిని చూసి మరొకరు అక్రమంగా ఎన్నో ఫైల్స్ క్లియర్ చేశారని అనుకుంటున్నారు.

అడుగడుగునా నిర్లక్ష్యం

కాంగ్రెస్ ప్రభుత్వం వచ్చి నెలన్నరే అయింది. సీఎం, మంత్రులు ప్రధాన అంశాలపై దృష్టి పెట్టి.. సమీక్షలు నిర్వహిస్తున్నారు. రాష్ట్ర ఆర్థిక పరిస్థితిపై ఓ అవగాహనకు వస్తున్నారు. పాలనపై పట్టు కోసం ప్రయత్నిస్తున్నారు. అయితే.. ఈ గ్యాప్ లో కొందరు అధికారులు నిర్లక్ష్యం వహిస్తున్నారు. హైదరాబాద్ లోని కేటీఆర్ చేసిన శాఖలో అధికారులు పనులు చేయడం లేదట. అసలు, అభివృద్ది ఊసే లేకుండా వారికి నచ్చిన సమయానికి వస్తూ, వెళ్తూ ఉన్నారని మిగిలిన ఉద్యోగులు అంటున్నారు. హెచ్ఎండీఏ, జీహెచ్ఎంసీ, జలమండలిలో ఈ వ్యవహారం కనిపిస్తోంది. ఫీల్డ్ లోకి వెళ్లి పనులు ఎలా జరుగుతున్నాయో చూడాల్సిన డిప్యూటీ కమిషనర్స్ వెళ్లడం లేదట. రోజురోజుకు ఫిర్యాదులు పెరుగుతున్నా వాటిపై దృష్టి పెట్టడం లేదని అంటున్నారు. ఇదే అదునుగా వందలాది అక్రమ నిర్మాణాలు వెలుస్తున్నాయి. నెలన్నరగా ఎక్కడికక్కడ పాలన పడకేసినట్టుగా విమర్శలు వస్తున్నాయి. పన్నులు వసూలు చేయాల్సిన అధికారులు చేయడం లేదు. ఈ ఆర్థిక సంవత్సరానికి ఇంకా రెండు నెలలే సమయం ఉంది. 2,100 కోట్లకు గాను 1,300 కోట్లు మాత్రమే వసూలు అయ్యాయి. బడాబాబులు, రాజకీయ నాయకులే ఇంకా చెల్లించలేదు. వారికి నోటీసులు ఇచ్చేందుకు కూడా సిబ్బంది వెనకడుగు వేస్తున్నారు. ఈ అంశంపై కొత్త ప్రభుత్వం దృష్టి సారించాలని అంటున్నారు మిగిలిన ఉద్యోగులు.

రిటైర్డ్ ఈఎన్సీల నుంచి ఔట్ సోర్సింగ్ దాకా అక్రమాలే!

చీఫ్ ఇంజినీర్స్, ఐఎఏస్ లాంటి పోస్టుల్లో, కీలక నిర్ణయాలు తీసుకోవాల్సిన స్థానాల్లో రిటైర్డ్ అయి రీ రిక్రూట్ చేసుకున్న వారిని తీసుకోవడంతోనే అధిక తప్పులు జరిగాయి. నీటిపారుదల శాఖలో మురళీధర్ రావు తన కుమారుడైన అభిషేక్ కి కాంట్రాక్టులు ఇప్పించుకున్నారు. వెంకటేశ్వర్లు, హరిరాం సిద్దిపేట జిల్లాలో భూములు కొనుగోలు చేశారు. టీఎస్పీఎస్సీలో జనార్ధన్ రెడ్డి, స్త్రీ నిధి ఎండీగా విద్యసాగర్ రెడ్డి, ఆర్టికల్చర్ డైరెక్టర్ గా వెంకట్రామిరెడ్డి, పశువుసంవర్ధక శాఖలో వంగాల లక్ష్మారెడ్డి, ఎండీసీలో ఆర్ కృష్ణమూర్తి, చివరికి మర్రి చెన్నారెడ్డి ఇన్ స్టిట్యూట్ లో ప్రకాశ్ రావు అనే 72 ఏండ్ల అధికారి నెలకు 2 లక్షలు అక్రమంగా సంపాదించారు. ఇలా చెప్పుకుంటూ పోతే ఔట్ సోర్సింగ్ లో ఉన్న సిటీ ప్లానర్స్ కూడా భారీగా లాగారు. అత్యంత కాస్ట్లీ ఏరియా అయిన శేరిలింగంపల్లిలో ముగ్గురు సిటీ ప్లానర్స్ కాంట్రాక్ట్ బేసిక్ లో చేరారు. ఇలా బాధ్యత లేకుండా అక్రమాలకు పాల్పడ్డ అధికారులపై landsandrecords.com వరస కథనాలు ఇవ్వనున్నట్టు తెలిపింది. మరి.. రేవంత్ రెడ్డి సర్కార్ ఈ అక్రమార్కులపై ఫోకస్ పెట్టి చర్యలు తీసుకుంటుందా?

– డబుల్ బెడ్రూం ఇళ్లపై అనిశ్చితి
– గ్రేటర్ పరిధిలో 31వేల ఇళ్ల వరకు పనుల పెండింగ్
– ఇప్పటిదాకా రూ.7వేల కోట్ల దాకా ఖర్చు
– కావాల్సింది మరో రూ.1,500 కోట్లే
– పెండింగ్ లో ఇంకో రూ.400 కోట్ల బిల్లులు
– అన్నీ విడుదలైతే 31వేల మందికి లబ్ధి
– కాంగ్రెస్ సర్కార్ నిర్ణయంపై ఉత్కంఠ
– బడ్జెట్ తర్వాతే క్లారిటీ రానుందా?

ప్రతీ పేదవాడికి ఇల్లు అనే కాన్సెప్ట్ తో అప్పటి బీఆర్ఎస్ (BRS) సర్కార్ డబుల్ బెడ్రూం పథకాన్ని (Double Bedroom Housing scheme) తీసుకొచ్చింది. రాష్ట్రమంతా ఈ పథకాన్ని అమలు చేసినా కొందరికే లబ్ధి జరిగింది. అయితే.. గ్రేటర్‌ హైదరాబాద్‌ (Hyderabad) లో మొదటి విడతగా లక్ష ఇళ్ల నిర్మాణం చేపట్టింది. 70 శాతం ఇళ్ల పంపిణీ కూడా జరిగింది. కానీ, మిగిలిన 30 శాతం ఇళ్లపై నీలినీడలు కమ్ముకున్నాయి. ఈ డబుల్ బెడ్రూం ఇండ్ల నిర్మాణంలో పెండింగ్ పనులను పూర్తి చేసేందుకు రూ.1,500 కోట్ల నిధులు మాత్రమే అవసరం ఉంది. వాటిలో కొన్నింటికి 10 శాతం పనులు పూర్తికాగా, మరికొన్ని చివరి దశలో ఉన్నాయి. ప్రస్తుతం కాంగ్రెస్ (Congress) ప్రభుత్వం ఎలాంటి నిర్ణయం తీసుకుంటుందో అనే ఉత్కంఠ నెలకొంది.

2015లో గత బీఆర్ఎస్ ప్రభుత్వం డబుల్ బెడ్రూం ఇళ్ల పథకాన్ని రూపొందించింది. పేదలకు వంద శాతం రాయితీతో గౌరవప్రదమైన ఇండ్లను నిర్మించి ఇవ్వాలనే ఉద్దేశంతో ఈ పథకాన్ని ప్రారంభించింది. గ్రేటర్‌ హైదరాబాద్‌ లోని 111 ప్రాంతాల్లో లక్ష ఇళ్లు కేటాయిస్తామని హామీ ఇచ్చింది. కొన్నిచోట్ల పనులు పూర్తవడంతో పలు దఫాల్లో 69వేల ఇళ్ల దాకా పంపిణీ చేసింది. ఇంకో 31వేల ఇళ్ల నిర్మాణ పనులు గత ఏడాదిన్నరగా పెండింగ్‌ లో ఉన్నాయి. ఇప్పటిదాకా వీటికోసం దాదాపు రూ.7 వేల కోట్లు ఖర్చు చేయగా.. ఇంకో రూ.1,500 కోట్లు విడుదల చేస్తే పనులు పూర్తవుతాయి. అలాగే, ప్రభుత్వం నుంచి రూ.400 కోట్ల వరకు బిల్లులు పెండింగ్ లో ఉన్నాయి.

కొల్లూరు, చెర్లపల్లి, అమీన్‌ పూర్, బహదూర్‌ పల్లి, దుండిగల్, నార్సింగి, శంకర్‌ పల్లి, నల్లగండ్ల, మురహరిపల్లి, చైతన్యనగర్, రాంపల్లి, తూముకుంట సహా నగరంలోని పలు ప్రాంతాల్లో డబుల్ బెడ్రూం ఇళ్లను పంపిణీ చేసింది ప్రభుత్వం. పట్టణ ప్రాంతాల్లో ఈ ఇండ్ల కేటాయింపుల విషయంలో ఎస్సీ వర్గాలకు 17 శాతం, ఎస్టీ 6 శాతం, మైనారిటీలకు 12 శాతం, ఇతరులకు 65 శాతం రిజర్వేషన్లు కల్పించింది. ఇప్పుడు ప్రభుత్వం మారింది. కాంగ్రెస్ సర్కార్ కొలువుదీరింది. ఈ నేపథ్యంలో పెండింగ్ పనులపై అనిశ్చితి నెలకొంది. డబుల్ బెడ్రూం ఇళ్లపై కొత్త ప్రభుత్వం ఎలాంటి నిర్ణయం తీసుకుంటుందనే విషయంపై ఆసక్తి నెలకొంది. బడ్జెట్ విడుదల తర్వాతే ఈ విషయంలో ముందుకు వెళ్లాలనే ఆలోచనలో ఉన్నట్టు సమాచారం.

మరోవైపు, డబుల్ బెడ్రూం ఇండ్లను నిర్మిస్తున్న ప్రాంతాలు జీహెచ్ఎంసీ పరిధిలో ఉన్నందున ఇంటర్నెట్/బ్రాడ్‌ బ్యాండ్, కేబుల్ టీవీ సేవలు ప్రస్తుత సర్వీస్ ప్రొవైడర్ల ద్వారా సేవలు అందుబాటులో ఉంటాయని అధికారులు చెబుతున్నారు. అయితే.. జీహెచ్ఎంసీ పరిధిలో లేని డబుల్ బెడ్ రూం ఇండ్ల విషయంలో, వారికి ఇంటర్నెట్/బ్రాడ్‌ బ్యాండ్, కేబుల్ టీవీ సేవల కోసం మౌలిక సదుపాయాలను అందించాలని కూడా అంటున్నారు. పలు ప్రాంతాల్లో ఈ సేవలను అందించేందుకు సర్వీస్ ప్రొవైడర్ల నుంచి టెండర్లను కూడా ఆహ్వానించారు. ప్రతీ డబుల్ బెడ్రూంకు ఒకే రకమైన సేవలను అందించేందుకు గతంలో అనుభవం ఉన్న సర్వీస్ ప్రొవైడర్లు దరఖాస్తు చేసుకోవాలని తెలిపారు.

– బీఆర్ఎస్ పై కుట్రలు జరుగుతున్నాయంటున్న కేటీఆర్
– బీజేపీ, కాంగ్రెస్ కలిసిపోయాయని విమర్శలు
– గులాబీ పార్టీని తుడిచిపెట్టేందుకు చూస్తున్నారని ఆరోపణలు
– అసలు, కేటీఆర్ వ్యాఖ్యలకు అర్థం ఉందా..?
– బీఆర్ఎస్ హయాంలో ఎలాంటి తప్పులూ జరగలేదా?
– ఓటమిని ఇంకా జీర్ణించుకోలేకపోతున్నారా?
– లోక్ సభ ఎన్నికల్లో లబ్ధి కోసం సింపథీ క్రియేట్ చేస్తున్నారా?

పార్లమెంట్ ఎన్నికల సందర్భంగా బీఆర్ఎస్ (BRS) వర్కింగ్ ప్రెసిడెంట్ కేటీఆర్ (KTR) మాటల యుద్ధానికి దిగారు. అసెంబ్లీ ఎన్నికల సందర్భంగా కాంగ్రెస్ (Congress), బీజేపీ (BJP)ఒక్కటేనని ఏ మంత్రం జపించారో.. ఇప్పుడు కూడా అదే పాట పాడుతున్నారు. దీనికి కొన్ని ఉదాహరణలను పదేపదే వినిపిస్తున్నారు. ప్రధాని మోడీ (PM Modi) ని సీఎం రేవంత్ (CM Revanth) కలవడం, అదానీ గ్రూప్ తో చర్చల అంశాలను పట్టుకుని బీజేపీ, కాంగ్రెస్ ఒకటికొకటి తోడుగా ముందుకు వెళ్తున్నాయని.. బీఆర్ఎస్ ను తుడిచిపెట్టేందుకు చూస్తున్నాయని.. ఢిల్లీ కేంద్రంగా స్కెచ్ గీశాయని విమర్శల దాడి చేస్తున్నారు. ఈ వ్యాఖ్యలు విన్నాక రాజకీయ వర్గాల్లో భిన్న అభిప్రాయాలు వ్యక్తం అవుతున్నాయి. కాకపోతే.. ఎక్కువశాతం గులాబీ తప్పిదాలే రీసౌండ్ ఇస్తున్నాయి.

కాళేశ్వరం అవినీతి నిజం కాదా?

కాంగ్రెస్ ప్రభుత్వం తెచ్చిన ప్రాజెక్టును రీడిజైన్ చేసి కాళేశ్వరం పేరుతో పలు నిర్మాణాలు చేసింది కేసీఆర్ ప్రభుత్వం. కానీ, కొన్నేళ్లకే లోపాలు బయటపడ్డాయి. ముందుగా వరదల సమయంలో పంప్ హౌస్ లు మునిగిపోయాయి. ఆ సమయంలో ప్రాజెక్టులను సందర్శించేందుకు వెళ్లిన ప్రతీ ఒక్కర్నీ అరెస్ట్ చేసింది ప్రభుత్వం. నియంత పాలనకు ఇదే నిదర్శనం అంటూ ప్రతిపక్షాలు ఈ ఇష్యూను బాగా హైలైట్ చేశాయి. సరిగ్గా అసెంబ్లీ ఎన్నికలకు ముందు మేడిగడ్డ బ్యారేజీ పిల్లర్లు కుంగడం, అన్నారం బ్యారేజీకి బుంగ ఏర్పడడం మరోసారి కాళేశ్వరం లోపాలను గుర్తు చేశాయి. ఆ సమయంలో కేసీఆర్ మౌనం ప్రజల్లో వ్యతిరేకతకు కారణమైంది. అదీగాక, అంచనాలను విపరీతంగా పెంచేసిన తీరును కాగ్ రిపోర్ట్ బయటపెట్టింది. మరి, ఇవన్నీ బీఆర్ఎస్ ను తుడిచిపెట్టేందుకు కారణం కాలేదని కేటీఆర్ అనుకుంటున్నారా? అనే ప్రశ్న తెరపైకి వస్తోంది.

ఉద్యోగ కల్పనలో విఫలం కాలేదంటారా?

తెలంగాణలో 2 లక్షల వరకు ఉద్యోగాలు ఖాళీగా ఉన్నాయనేది పలు నివేదికలు చెప్పాయి. కానీ, కేసీఆర్ వాటి భర్తీ విషయంలో నిర్లక్ష్యం వహించారు. సరిగ్గా ఎన్నికలకు కొద్ది నెలల ముందు ఉద్యోగాలపై కీలక ప్రకటనలు చేశారు. కొన్నింటికి నోటిఫికేషన్లు కూడా వచ్చాయి. తొమ్మిదిన్నరేళ్లలో ఉద్యోగాలపై ఫోకస్ పెట్టకపోవడంతో ఎంతోమంది నిరుద్యోగులు ఆత్మహత్యలకు పాల్పడ్డారు. తమ చావులకు కేసీఆరే కారణం అంటూ ఎంతోమంది సూసైడ్ నోట్స్ కూడా రాశారు. ఇచ్చిన నోటిఫికేషన్లకు ఉద్యోగాల భర్తీ చేశారా? అంటే అదీలేదు. టీఎస్పీఎస్సీ పేపర్ల లీకేజీతో నిరుద్యోగుల ఆశల అడియాశలయ్యాయి. ఇది ప్రభుత్వ కుట్రేనని ప్రతిపక్షాలు గట్టిగా వాదించాయి. ఈ క్రమంలో నిరుద్యోగులకు దూరం అయ్యింది బీఆర్ఎస్.

గులాబీల కబ్జాలు, అవినీతి సంగతేంటి..?

భూముల రిజిస్ట్రేషన్స్, ఇతర సమస్యల పరిష్కారం కోసం ధరణి తెచ్చామని కేసీఆర్ ప్రభుత్వం చెప్పింది. కానీ, ఇది వచ్చాకే సమస్యలు ఎక్కువయ్యాయనే ఆరోపణలు బలంగా వినిపించాయి. పైగా, బీఆర్ఎస్ నేతలు విచ్చలవిడిగా భూముల కబ్జాలకు పాల్పడ్డారు. అంతేకాదు, ఎంతోమంది అవినీతికి పాల్పడ్డారు. ఒకప్పుడు, సైకిళ్లు, స్కూటర్ల మీద తిరిగిన నేతలు ఇప్పుడు బెంజ్ కార్లలో చక్కర్లు కొడుతున్నారు. అదీగాక, సంక్షేమ పథకాల విషయంలో జరిగిన అవినీతి, కొందరికే జరిగిన లబ్ధిని గమనించి ప్రజలు బీఆర్ఎస్ ను వద్దనుకున్నారు. ఇలా చెప్పుకుంటూ పోతే చాలానే ఉన్నాయి. మరి, ఇవన్నీ నిజం కాదని కేటీఆర్ చెప్పదలుచుకున్నారా? కేవలం బీజేపీ, కాంగ్రెస్ కలిసి తమపై కుట్రలు చేశాయి.. ఇంకా చేస్తూనే ఉన్నాయని పదేపదే చెప్తుండడం హాస్యాస్పదంగా అనిపిస్తోందనే చర్చ జరుగుతోంది. ఈ సందర్భంగా జనానికి మంచి చేసి ఉంటే గెలిపించే వాళ్లు కదా అనే సెటైర్లు వినిపిస్తున్నాయి.

పార్లమెంట్ ఎన్నికల కోసమేనా?

అసెంబ్లీ ఎన్నికల్లో పరాజయం, ఆ వెంటనే కేసీఆర్ కు గాయం బీఆర్ఎస్ శ్రేణుల్లో నిరాశను పెంచాయి. కేటీఆర్, హరీష్ కాస్త హడావుడి చేస్తున్నా పెద్దగా ప్రయోజనం ఉండడం లేదు. కేసీఆర్ రంగంలోకి ఎప్పుడు దిగుతారా? అని ఎదురుచూస్తున్నారు. పార్టీ శ్రేణుల్లో నిరాశ ఎక్కువ కాకుండా త్వరలో పులి వస్తుందని కేటీఆర్ అంటున్నారు. ఇంకొన్ని రోజుల్లో పార్లమెంట్ ఎన్నికలు ఉన్నాయి. జాతీయ అంశాలే ప్రధాన అజెండాగా ఉండే ఈ ఎన్నికల్లో ఈసారి రాష్ట్రంలో అధికారంలో ఉన్న కాంగ్రెస్, ఓట్ షేర్ పెంచుకున్న బీజేపీ మధ్యే ఫైట్ ఉంటుందని అంతా అనుకుంటున్నారు. ఇది ఇలాగే కొనసాగితే బీఆర్ఎస్ మనుగడ కష్టమవుతుంది. ఇది గమనించిన కేటీఆర్.. అంతా బీజేపీ, కాంగ్రెస్ కుట్రగా చెబుతూ.. తామేం తప్పులు చేయలేదు.. తమపై ప్రజా వ్యతిరేకత లేదు అంటూ అంతా వాటి మీదే తోసేసే ప్రయత్నం చేస్తున్నారనే టాక్ నడుస్తోంది.