Featured

– బీఆర్ఎస్ ఓటమికి కారణం ఎవరు?
– పార్టీ నేతలపై తోసేస్తున్న కేటీఆర్, కవిత
– పార్లమెంట్ సన్నాహక సమావేశాల్లో ఒకటే పాట
– తప్పంతా మీదేనంటూ నేతలకు క్లాసులు
– గెలిస్తే క్రెడిట్ అంతా మీదా?
– ఓడిపోతే మాపై తోసేస్తారా?
– పదేళ్ల పాలనపై అసంతృప్తి లేదనుకుంటున్నారా?
– ఒకరితో ఒకరు మొర పెట్టుకుంటున్న గులాబీలు

లోక్ సభ ఎన్నికల పోరుకు బీఆర్ఎస్ (BRS), కాంగ్రెస్ (Congress), బీజేపీ (BJP) వ్యూహరచనలో ఉన్నాయి. ఉడుం పట్టులా ఉన్న బీజేపీ.. పరువు కాపాడుకునే పనిలో బీఆర్ఎస్.. గత వైభవాన్ని పొందాలనే ఆరాటంలో కాంగ్రెస్.. ఇలా ఎవరికి వారే తమ అస్త్రాలకు పదును పెడుతున్నాయి. అయితే.. బీఆర్ఎస్ పెద్దల మాటలు కొంప ముంచేలా ఉన్నాయనే టాక్ వినిపిస్తోంది. పార్లమెంట్ సన్నాహక సమావేశాల సందర్భంగా మాజీ మంత్రి కేటీఆర్ అసెంబ్లీ ఎన్నికల ఓటమిపై పదేపదే మాట్లాడుతున్నారు. సిట్టింగులను మార్చి ఉండాల్సిందని.. తప్పంతా నేతలపై తోసేసే ప్రయత్నం చేస్తున్నారు.

ఇటు ఎమ్మెల్సీ కవిత సైతం తాజాగా ఇవే వ్యాఖ్యలు చేశారు. దీంతో గులాబీలు పాత విషయాలపై ఒకరితో ఒకరు మాట్లాడుకుంటున్నారని సమాచారం. ధరణి, దళితబంధు, నియంతృత్వ విధానాలు పార్టీ ఓటమికి కారణం అయింది వాస్తవం కాదా? ఢిల్లీ లిక్కర్ స్కాం కేసు ప్రజల్లో అప్రతిష్ట తెచ్చిపెట్టింది నిజం కాదా? ఇంకా చెప్పుకుంటూ పోతే పెద్దల వైఫల్యాలు చాలానే ఉన్నాయి. ఇవన్నీ ఆలోచించకుండా.. తప్పంతా మనమే చేశామన్నట్టు కేసీఆర్ ఫ్యామిలీ మాట్లాడుతుండడంపై గులాబీ నేతలు గుర్రుగా ఉన్నట్టు తెలుస్తోంది. అధికారం కోల్పోయి నెల దాటినా.. ఓటమికి అసలు కారణాలపై పోస్టుమార్టం చేయకుండా.. లోక్ సభ ఎన్నికలకు సమాయత్తం అవుతున్న వేళ.. ఇతర నేతలపై తప్పంతా తోసేస్తుండడం కరెక్ట్ కాదనే చర్చ పార్టీలో జరుగుతోంది.

ఈ సందర్భంగా కేసీఆర్ మాటలను గుర్తు చేసుకుంటున్నారు గులాబీలు. ఎన్నికల ప్రచారంలో తనను, పార్టీని చూసి ఓటెయ్యాలని జనానికి పిలుపునిచ్చారని.. అలాంటిది ఓటమికి తప్పంతా ఇతరులపై నెట్టేయడం కరెక్ట్ కాదేమో అని అనుకుంటున్నారట. మరోవైపు, ఇవేమీ పట్టించుకోకుండా పార్లమెంట్ ఎన్నికల్లో సత్తా చాటాలని పిలుపునివ్వడం ఆశ్చర్యంగా అనిపిస్తోందని గులాబీ నేతలు మాట్లాడుకుంటున్నట్టు సమాచారం. సోమవారం తెలంగాణ భవన్‌ లో నిజామాబాద్ లోక్‌ సభ స్థానం సన్నాహక సమావేశం జరిగింది. ఇందులో పాల్గొన్న కేటీఆర్.. నేతలు, కార్యకర్తలకు దిశానిర్దేశం చేశారు. తెలంగాణ ప్రయోజనాల పరిరక్షణ కోసం, ఢిల్లీలో గులాబీ జెండా ప్రాతినిథ్యం ఉండాల్సిందేనని అన్నారు.

నిజామాబాద్ పార్లమెంట్ స్థానంలో ఓట్ల పరంగా బీఆర్ఎస్ మొదటి స్థానంలో ఉందని పేర్కొన్నారు. లోక్‌ సభ ఎన్నికల్లో త్రిముఖ పోరు ఉండే అవకాశం ఉందని వెల్లడించారు. బీఆర్ఎస్‌ కు గెలుపు ఓటములు కొత్త కాదని గుర్తు చేశారు. పేదలు, దళితులు, బీసీల ప్రయోజనాలకు దెబ్బకొట్టేలా కుట్ర చేస్తే, బీఆర్ఎస్‌ తరఫున కొట్లాడుదామని పేర్కొన్నారు. ఎన్నికల్లో గెలవడానికి కాంగ్రెస్ అడ్డగోలుగా 420 హామీలు ఇచ్చిందని విమర్శించారు. పేద ప్రజల కోసం ఉద్దేశించిన అనేక సంక్షేమ కార్యక్రమాలను రద్దు చేసేందుకు కుట్ర చేస్తోందని ఆరోపించారు. అదే జరిగితే ఆయా లబ్ధిదారులతో కలిసి తమ పార్టీ పోరాటం చేస్తుందని కేటీఆర్ తెలిపారు.

• మరిన్ని తెలంగాణ వార్తలు మరియు తెలుగు న్యూస్ కోసమై ఇవి చదవండి…!

– తెలంగాణలో పీఎం విశ్వకర్మ అమలవుతుందా?
– క్షేత్రస్థాయిలో అంతా నిర్లక్ష్యం జరుగుతోందా?
– బీఆర్ఎస్ ప్రభుత్వంలో ఏం జరిగింది..?
– బీజేపీ నేతలు అవగాహన కల్పించడంలో విఫలమయ్యారా?
– కాంగ్రెస్ హయాంలోనైనా అందరికీ లబ్ధి జరుగుతుందా?

భారతీయ సంస్కృతి సంప్రదాయాలు ఎంతో గొప్పవి. పురాతన కాలం నుంచి ఇవి వారసత్వంగా కొనసాగుతున్నవి. అలాగే, చేతి వృత్తి పనులు కూడా అంతే. భారతదేశానికే ఒక ప్రత్యేక గుర్తింపును ఇవి తెచ్చి పెడుతున్నాయి. కానీ, మారుతున్న కాలంలో చాలా చేతి వృత్తి పనులు కనుమరుగవుతున్నాయి. దీన్ని గుర్తించిన కేంద్రంలోని మోడీ సర్కార్.. మన సంప్రదాయ కళావృత్తుల వారి కోసం ‘పీఎం విశ్వకర్మ’ అనే పథకాన్ని తీసుకొచ్చింది. అయితే.. ఈ పథకం అమలు కిందిస్థాయిలో సరిగ్గా జరగడం లేదనే విమర్శలు ఉన్నాయి. ముఖ్యంగా తెలంగాణలో ప్రజలకు అవగాహన కల్పించడంలో రాష్ట్ర బీజేపీ నేతలు విఫలం అవుతున్నారని అనుకుంటున్నారు.

ఈ పథకం లక్ష్యం ఏంటి?

2023 సెప్టెంబర్ 17న పీఎం విశ్వకర్మ పథకాన్ని ప్రారంభించారు. వారసత్వ పరంపరను ప్రోత్సహించడం.. సంప్రదాయ పనిముట్లను, చేతి వృత్తి కళాకారులు, కుటుంబ ఆధారిత వృత్తులను బలోపేతం చేయడం.. ఈ పథకం ముఖ్య లక్ష్యం. చేతిపనుల వారు, కళాకారులు చేసే ఉత్పత్తుల నాణ్యతను పెంచడం, వారిని దేశీయ, గ్లోబల్ మార్కెట్‌ తో అనుసంధానించడం ఈ పథకం వెనుక ఉన్న మరో ఉద్దేశం. ఇందులో రెండు రకాల స్కిల్లింగ్ కార్యక్రమాలు ఉంటాయి. వీటిల్లో శిక్షణ పొందుతున్నప్పుడు లబ్ధిదారులకు రోజుకు రూ.500 స్టైఫండ్ అందిస్తారు. ఆసక్తి కలిగిన వారు 15 రోజుల అధునాతన శిక్షణ కోసం నమోదు చేసుకోవచ్చు.

ప్రయోజనాలు ఏంటి?

ఈ పథకం నాయీ బ్రాహ్మణులు, చర్మకారులు, కమ్మరి, కుమ్మరి, ఇతర కులవృత్తుల వారికి నైపుణ్య శిక్షణ, అవసరమైన ఆధునిక పనిముట్లను కొనుక్కోవడం కోసం రూ.15 వేల వరకు ఉచితంగా ఆర్థిక సహాయం అందుతుంది. అలాగే రూ.లక్ష వరకు ఈ పథకం కింద తక్కువ వడ్డీతో రుణం కూడా అందుతుంది. రెండో విడతలో రూ.2 లక్షల వరకు రుణం ఇస్తారు. వృత్తి కళాకారులు తయారుచేసిన ఉత్పత్తుల మార్కెటింగ్ విషయంలో కూడా ప్రభుత్వం నుంచి సహాయం ఉంటుంది. ఈ పథకం ద్వారా తొలి ఏడాది 5 లక్షల కుటుంబాలకు, అయిదేళ్లలో మొత్తం 30 లక్షల కుటుంబాలకు లబ్ధి చేకూరుతుంది.

కేసీఆర్ హయాంలో నిర్లక్ష్యం

పీఎం విశ్వకర్మ పథకం ద్వారా చేతివృత్తి కళాకారులకు ఎంతో ఉపయోగం ఉంది. కానీ, ఇది ప్రారంభమైనప్పటి నుంచి తెలంగాణలో అంతగా ప్రచారం జరగలేదు. సవాలక్ష నిబంధనలు ఉన్నాయి.. దాని కంటే కేసీఆర్‌ బీసీ బంధు బెస్ట్.. చేతివృత్తుల వారికి రూ.లక్ష గ్రాంటు అంటూ ప్రభుత్వ అనుకూల మీడియాలో విస్తృత ప్రచారం జరిగింది. రాష్ట్ర ప్రభుత్వం అమలు చేస్తున్న బీసీ బంధుతో పోలిస్తే విశ్వకర్మ పథకం ఎందుకూ కొరగాదన్న వార్తలు ఇచ్చారు. లబ్ధిదారుల ఎంపికలోనూ స్పష్టత లేదని.. కేంద్రం విడుదల చేసిన జాబితాలో లేని కళలకు రుణాలు మంజూరు చేయరని కథనాలు వడ్డించారు. దీంతో పీఎం విశ్వకర్మ పథకంపై ప్రజలకు పెద్దగా తెలియలేదు.

ఇప్పటికైనా లక్ష్యం నెరవేరేనా..?

ప్రస్తుతం తెలంగాణలో కాంగ్రెస్ ప్రభుత్వం ఉంది. కేసీఆర్ తెచ్చిన బీసీ బంధుపై నీలినీడలు కమ్ముకున్నాయి. ఈ నేపథ్యంలో పీఎం విశ్వకర్మ పథకం విస్తృతంగా అమలైతే లబ్ధిదారులకు ఎంతో మేలు జరుగుతుందని అనుకుంటున్నారు. ఈ విషయంలో రాష్ట్ర బీజేపీ నేతలు చొరవ తీసుకోవాల్సి ఉంటుంది. ప్రజలకు పీఎం విశ్వకర్మ పథకంపై అవగాహన కల్పించి లబ్ధి చేకూర్చే ప్రయత్నం చేయాలి. అప్పుడే ప్రధాని మోడీ లక్ష్యం నెరవేరుతుందని అంటున్నారు. తమది ప్రజా పాలన అని చెప్పుకుంటున్న కాంగ్రెస్.. కేసీఆర్ మాదిరి కాకుండా కేంద్ర పథకాలను రాష్ట్ర ప్రజలకు అందేలా చూడాలని జనం అడుగుతున్నారు.

– పార్లమెంట్ ఎన్నికలపై పార్టీల సన్నాహాలు
– అత్యధిక ఎంపీ సీట్లే లక్ష్యంగా వ్యూహాలు
– రెండు రోజులపాటు బీజేపీ రాష్ట్ర స్థాయి సమావేశాలు
– సంక్రాంతి తర్వాత మరింత స్పీడ్
– కాంగ్రెస్, బీఆర్ఎస్ ను ఎలా ఎదుర్కోబోతోంది?
– ఓట్ షేర్ ను ఇంకా పెంచుకునే అంశాలేవి?
– హామీలనే నమ్ముకున్న కాంగ్రెస్
– ఇప్పుడున్న 3 సీట్లను 10కి పెంచాలని ప్లాన్
– బీఆర్ఎస్ ఆశలు నెరవేరుతాయా?
– ఉన్న 9 స్థానాల్లో గెలిచేవెన్ని..?
– సన్నాహక సమావేశాలతో ఇప్పటికే బిజీ
– జాతీయ అంశాలే ప్రధానంగా ఉండే లోక్ సభ ఎన్నికలు
– అధికారంలో లేని బీఆర్ఎస్ ప్రభావమెంత?

తెలంగాణ (Telangana) లో మరో ఎన్నికల యుద్ధం రెండు నెలల్లో జరగనుంది. అసెంబ్లీ రేస్ లో కాంగ్రెస్ (Congress) ముందు నిలవగా.. బీఆర్ఎస్ (BRS), బీజేపీ (BJP) వెనుకబడ్డాయి. ఇప్పుడు పార్లమెంట్ రేస్ మొదలవుతోంది. ఈ నేపథ్యంలో పార్టీల గెలుపు వ్యూహాలు ఎలా ఉండబోతున్నాయనేది ఇంట్రస్టింగ్ గా మారింది. జాతీయ అంశాలు ప్రధానంగా ఉండే లోక్ సభ సమరంలో ప్రాంతీయ పార్టీల హవా తక్కువగానే ఉంటుంది. అదీగాక బీఆర్ఎస్ ఇప్పుడు ఓటమి పాలైంది. ఈ పరిస్థితుల్లో బీజేపీ, కాంగ్రెస్ ను తట్టుకుని నిలబడుతుందా? లేదా? అనేది ఇంట్రస్టింగ్ గా మారింది. అధికారంలో ఉన్న కాంగ్రెస్, ఓట్ షేర్ పెంచుకున్న బీజేపీ సత్తా చాటాలని వ్యూహాల్లో ఉన్నాయి.

ప్రక్షాళన దిశగా బీజేపీ

లోక్‌ సభ ఎన్నికలే లక్ష్యంగా బీజేపీ ముందే అలర్ట్ అయింది. ఇప్పటికే అగ్రనేత అమిత్ షా రాష్ట్రానికి వచ్చి.. ఎలా ముందుకెళ్లాలనే దానిపై దిశానిర్దేశం చేసి వెళ్లారు. ప్రస్తుతానికి 4 స్థానాల్లో ఉన్న కమలం పార్టీని డబుల్ డిజిట్ కు తీసుకెళ్లాలని సూచించారు. మొత్తం 17 సీట్లలో కచ్చితంగా 10 సీట్లు, 35 శాతం ఓటు బ్యాంకును సాధించాలనే లక్ష్యాన్ని నిర్ధేశించారు. ఈ నేపథ్యంలో రాష్ట్ర నాయకత్వం గ్రామస్థాయిలో కేంద్ర పథకాల ప్రచారానికి శ్రీకారం చుట్టింది. ఇదే క్రమంలో ఆదివారం నుంచి రెండు రోజుల పాటు బీజేపీ ముఖ్యనేతల కీలక సమావేశం జరుగనుంది. తెలంగాణ బీజేపీ చీఫ్ కిషన్‌ రెడ్డి అధ్యక్షతన జరగనున్న ఈ భేటీలో రాష్ట్ర నేతలు పాల్గొననున్నారు. నేతల మధ్య వచ్చిన దూరంపై బీజేపీ జాతీయ నాయకత్వం ప్రధానంగా దృష్టి సారించింది. సమన్వయం చేసే బాధ్యతను కిషన్ రెడ్డికి అప్పగించింది. పార్లమెంట్ ఎన్నికలకు అభ్యర్థులు, అనుసరించాల్సిన వ్యూహంపై ఈ భేటీలో చర్చించనున్నారు నేతలు. మెజారిటీ పార్లమెంట్ స్థానాల్లో గెలుపే లక్ష్యంగా సమావేశం జరుగనుంది. సంక్రాంతి తర్వాత కొన్ని జిల్లాల అధ్యక్షులను మార్చాలని కిషన్‌ రెడ్డి భావిస్తున్నట్లు తెలుస్తోంది. ముఖ్య నేతల సమావేశం తర్వాత పార్టీ ప్రక్షాళనపై ఆయన ఫోకస్ పెట్టనున్నారు. ఇటు, కొందరు బీఆర్ఎస్ నేతలకు కూడా గాలం వేస్తున్నారు.

కాంగ్రెస్ గ్యారెంటీల అస్త్రం

పదేళ్ల తర్వాత తెలంగాణలో అధికారాన్ని దక్కించుకుంది కాంగ్రెస్. రాష్ట్రాన్ని తామే ఇచ్చామని ముందు నుంచీ చెప్పుకున్నా.. అది ప్రజల్లోకి వెళ్లేందుకు పదేళ్లు పట్టింది. దీనికితోడు కేసీఆర్ పాలనపై విసుగుచెందిన జనం హస్తానికి జై కొట్టారు. అయితే.. అసెంబ్లీ ఎన్నికల్లో కాంగ్రెస్ కు వచ్చిన సీట్లు పెద్దగా చెప్పుకోదగినవేం కాదు.. మ్యాజిక్ ఫిగర్ కు కాస్త దగ్గరలోనే ఆగింది. ఈ నేపథ్యంలో లోక్ సభ ఎన్నికల్లో సత్తా చాటాలంటే ఇచ్చిన హామీలు అమలు చేస్తేనే జనం నమ్ముతారని గట్టిగా ఫిక్స్ అయింది. అందుకే, గ్యారెంటీలపై ఎక్కువ ఫోకస్ పెట్టింది. నిజానికి, అసెంబ్లీ ఎన్నికల్లో కాంగ్రెస్ విజయానికి ఈ గ్యారెంటీలే కీలక పాత్ర పోషించాయి. దీంతో, ఇదే ఫార్మాలాను పార్లమెంట్ ఎన్నికల్లోనూ వాడాలని హస్తం పార్టీ చూస్తోంది. లోక్ సభ ఎన్నికల షెడ్యూల్ విడుదలకు ముందే మరో మూడు గ్యారంటీలను అమలు చేయాలని యోచిస్తోంది. ఇందుకోసం ఇప్పటికే కసరత్తు ప్రారంభించేసింది. అధకారంలోకి వచ్చిన వంద రోజుల్లోగా ఆరు గ్యారంటీలను అమలు చేస్తామని ప్రచారంలో హామీ ఇచ్చిన కాంగ్రెస్.. అధికారంలోకి వచ్చిన రోజుల వ్యవధిలోనే మహిళలకు ఉచిత బస్సు ప్రయాణం, ఆరోగ్య శ్రీ పరిమితిని 10 లక్షలకు పెంపు హామీలను అమలు చేసేసింది. ఇప్పుడు లోక్ సభ ఎన్నికల నేపథ్యంలో మరో మూడు హామీలపై దృష్టి పెట్టింది. గృహలక్ష్మి ‌పథకంలో భాగంగా ప్రతి ఇంటికీ 200 యూనిట్ల ఫ్రీ కరెంట్, మహాలక్ష్మి పథకంలో భాగంగా రూ.500కే గ్యాస్ సిలిండర్, అలాగే చేయూత కింద పింఛన్లను రూ.4 వేలకు పెంపు హామీలను అమలు చేయడానికి రెడీ అవుతోంది. గ్యారెంటీలనే నమ్ముకుని ప్రస్తుతం ఉన్న 3 సీట్ల నుంచి 10 సీట్లకు పైగా సాధించాలని పట్టుదలతో కనిపిస్తోంది.

బీఆర్ఎస్ తెలంగాణ గళం

తెలంగాణ అసెంబ్లీ ఎన్నికల్లో ఓటమిపాలైంది బీఆర్‌ఎస్. ఇప్పుడు పార్లమెంట్ ఎన్నికల్లోనూ అదే జరిగితే పార్టీ మనుగడ కష్టం. దీన్ని గ్రహించిన కేసీఆర్.. సరికొత్త వ్యూహాలతో ముందుకువెళ్లాలని చూస్తున్నారు. మనమే తెలంగాణ గళం.. మనమే తెలంగాణ దళం.. మనమే తెలంగాణ బలం అన్న నినాదాన్ని అందుకున్నారు. ఈ నినాదంతో పార్లమెంట్ ఎన్నికల్లో పట్టు నిలుపుకోవాలని భావిస్తున్నారు. ఈ క్రమంలోనే సమీక్షా సమావేశాలు నిర్వహిస్తున్నారు. జాతీయ అంశాలు కీలకంగా ఉండే లోక్ సభ ఎన్నికల్లో అధికారం లేకుండా గెలవడం కష్టం. పైగా, బీజేపీ ఓట్ షేర్ పెరిగింది. కాంగ్రెస్ అధికారంలో ఉంది. ఈ రెండు పార్టీలను తట్టుకుని బీఆర్ఎస్ నిలబడడం కష్టమే. ప్రస్తుతం 9 స్థానాల్లో ఉన్న గులాబీ పార్టీకి వాటిని నిలబెట్టుకోవడం కష్టంగా మారింది. ఎందుకంటే.. వీటిలోని చాలా అసెంబ్లీ నియోజకవర్గాలు కాంగ్రెస్ హస్తగతం అయ్యాయి. ఈ క్రమంలో బీఆర్ఎస్ కు గెలుపు అనేది కష్టమే. దీన్ని అధిగమించేందుకు కేసీఆర్ ఎలాంటి ఎత్తుగడులు వేస్తారనేది హాట్ టాపిక్ గా మారింది. మనమే తెలంగాణ గళం అనే నినాదం అందుకున్నా.. దాన్ని జనం ఎంత వరకు నమ్ముతారనేది పెద్ద ప్రశ్న. ఎందుకంటే.. అసెంబ్లీ ఎన్నికల్లోనూ కేసీఆర్ ఇలాంటి వ్యూహాన్ని అమలు చేసి ఫెయిల్ అయ్యారు. మొత్తంగా మూడు పార్టీలు లోక్ సభ ఎన్నికల్లో 10 సీట్లకు పైనే టార్గెట్ గా పెట్టుకున్నాయి. మరి, జనం ఎవరి ఆశలు నెరవేరుస్తారో చూడాలి.