Featured

– తెలంగాణ బీజేపీ సైలెంట్ స్కెచ్
– గెలుపు వ్యూహాల్లో నేతలు బిజీబిజీ
– 27న అమిత్ షా సభ
– ఆరోజు నుంచే ఎన్నికల శంఖారావం
– రంగంలోకి సరిహద్దు రాష్ట్రాల నేతలు
– వచ్చేనెలలో అభ్యర్థుల తొలి జాబితాకు ఛాన్స్

రాష్ట్రంలో ఎన్నికల వేడి మొదలైంది. సీఎం కేసీఆర్ (CM KCR) అభ్యర్థులను ప్రకటించేసి.. జిల్లాల బాట పట్టారు. కాంగ్రెస్ (Congress) కూడా అభ్యర్థులపై ఫోకస్ పెట్టి దరఖాస్తులు తీసుకుంటోంది. ప్రభుత్వ వైఫల్యాలను జనంలోకి తీసుకెళ్లేందుకు నెల రోజుల యాక్షన్ ప్లాన్ కు శ్రీకారం చుట్టింది. మరి.. బీజేపీ (BJP) పరిస్థితేంటి..? ఏం చేస్తోంది..? అని ఆపార్టీ నేతలను అడిగితే.. షాకింగ్ విషయాలను చెబుతున్నారు. అభ్యర్థులను ఖరారు చేసుకుని.. సైలెంట్ గా ఇన్ సైడ్ వర్క్ చేస్తోందని అంటున్నారు. ఎలాంటి హడావుడి లేకుండా పక్కా ప్లాన్ తోనే ముందుకెళ్తున్నామని వివరిస్తున్నారు. అమిత్ షా (Amit shah) సభతో యాక్షన్ లోకి దిగుతామని అంటున్నారు.

అధికారంలో ఉన్న కర్ణాటకను చేజార్చుకున్న తర్వాత బీజేపీ తెలంగాణ (Telangana) పై ఫుల్ ఫోకస్ పెట్టింది. ఈసారి ఎలాగైనా సత్తా చాటాలని చూస్తోంది. కేంద్రం నుంచి వస్తున్న నిధులు.. రాష్ట్ర ప్రభుత్వం వాడుతున్న తీరును వివరిస్తూ ఇప్పటికే నేతలు జనంలోకి వెళ్తున్నారు. అయితే.. ఈ ప్రచారంలో మరింత స్పీడ్ పెంచాలని చూస్తున్నారు. మరీ ముఖ్యంగా ప్రభుత్వ వైఫల్యాలను ప్రజల్లోకి తీసుకెళ్లేందుకు ఉన్న అన్ని అవకాశాలను వాడుకునే ప్లాన్ చేశారు. ఓవైపు బూత్ కమిటీలను బలోపేతం చేసుకుంటూనే.. ఇంకోవైపు సమావేశాలు, సభలతో ఈ 3 నెలలు పక్కా గెలుపు వ్యూహాలని అమలు చేయాలని చూస్తున్నారు.

ఈ నెల 27న ఖమ్మం జిల్లాలో అమిత్ షా సభ జరగనుంది. దీని తర్వాత గేర్ మార్చాలని డిసైడైంది బీజేపీ అధిష్టానం. ఇక్కడి నుంచే ఎన్నికల శంఖారావం పూరించనుంది. ఖమ్మం వేదికగా అమిత్ షా పలు కీలక ప్రకటనలు సైతం చేసే అవకాశముందని పార్టీ వర్గాలు పేర్కొంటున్నాయి. ఇప్పటికే మిగతా రాష్ట్రాలనుంచి బీజేపీ ఎమ్మెల్యేలు తెలంగాణ నియోజకవర్గాల్లో పర్యటిస్తున్నారు. అభ్యర్థుల ఎంపికలో వీళ్లిచ్చే రిపోర్టులు కూడా కీలకం కాబోతున్నాయని సమాచారం. తెలంగాణతో సరిహద్దు కలిగి ఉన్న కర్ణాటక ప్రాంతానికి చెందిన బీజేపీ నేతలకు హైదరాబాద్‌, సికింద్రాబాద్‌, మెదక్‌, రంగారెడ్డి, మహబూబ్‌ నగర్‌ తదితర జిల్లాల ప్రచార బాధ్యతలను అప్పగిస్తున్నట్టు తెలుస్తోంది.

సెప్టెంబర్ రెండో వారంలో బీజేపీ అభ్యర్థుల తొలి జాబితాను ప్రకటించే ఛాన్స్ ఉందని పార్టీలో చర్చ జరుగుతోంది. మరోవైపు, సోషల్ మీడియాను కూడా గట్టిగా వాడేయాలని కమలనాథులు డిసైడ్ అయ్యారు. ప్రస్తుతం స్మార్ట్ ఫోన్ లేని ఇళ్లు తక్కువే. ఈ నేపథ్యంలో అన్ని రకాల సామాజిక మాధ్యమాల్లో పార్టీ ప్రచారం, ప్రభుత్వ వైఫల్యాలను వివరించే పోస్టర్లు, ప్రత్యేక వీడియోలను రూపొందించి ప్రమోట్ చేయాలని చూస్తోంది. ఇప్పటికే దీనిపై ఫోకస్ పెట్టిన నేతలు ఆ పనిలో ఉన్నారు.

తన కుమారుడికి టికెట్ నిరాకరించడంతో అధిష్టానంపై తిరుగుబాటు జెండా ఎగురవేశారు మల్కాజ్ గిరి బీఆర్ఎస్ ఎమ్మెల్యే మైనంపల్లి హన్మంతరావు (Mynampally Hanmantarao). ఈ క్రమంలోనే ఆయన పార్టీ మారుతున్నారని ప్రచారం జరుగుతోంది. కర్ణాటక కాంగ్రెస్ అధ్యక్షుడు డీకే శివకుమార్ (Dk Shivakumar) ను కూడా కలవబోతున్నారని.. ఆయన ద్వారా హస్తం గూటికి చేరుతున్నారని రాజకీయ వర్గాల్లో తెగ చర్చ జరుగుతోంది.

వచ్చే ఎన్నికల్లో మెదక్ స్థానం నుంచి బీఆర్ఎస్ తరఫున తన కుమారుడు రోహిత్ (Rohith) ను బరిలోకి దింపాలని అనుకున్నారు హన్మంతరావు. కానీ, కేసీఆర్ (KCR) ఆయనకు షాకిచ్చారు. తనకు మాత్రమే టికెట్ కేటాయించారు. మెదక్ (Medak) స్థానాన్ని పద్మా దేవేందర్ (Padma Devender) కి అప్పగించారు. దీని వెనుక మంత్రి హరీష్ రావు (Harish Rao) ఉన్నారని సోమవారం తీవ్ర వ్యాఖ్యలు చేసిన మైనంపల్లి. తనతోపాటు కుమారుడికి టికెట్ ఇవ్వకపోతే కచ్చితంగా పోటీ చేస్తామని అన్నారు. మంగళవారం కూడా మీడియాతో మాట్లాడిన ఆయన.. తన మాటకు కట్టుబడి ఉన్నానని స్పష్టం చేశారు.

మెదక్ లో రోహిత్ పోటీ చేయడం ఖాయమని తెలిపారు మైనంపల్లి. ఈ విషయంలో మాట తప్పేది లేదని స్పష్టం చేశారు. అదేవిధంగా మల్కాజిగిరిలో తాను కూడా బరిలో ఉంటానని చెప్పారు. బీఆర్ఎస్ (BRS) పార్టీ తనకు టికెట్ ఇచ్చి, తన కుమారుడికి ఇవ్వకపోవడంపై మరోసారి తీవ్ర అసంతృప్తి వ్యక్తం చేశారు. రెండు నియోజకవర్గాల ప్రజలతో చర్చించి భవిష్యత్ కార్యాచరణ ప్రకటిస్తానని తెలిపారు. మైనంపల్లి వ్యాఖ్యల నేపథ్యంలో పార్టీ మారడం ఖాయమని అంచనా వేస్తున్నారు రాజకీయ పండితులు. ఇప్పటికే బీఆర్ఎస్ లోని రోహిత్ వర్గం.. మెదక్ లో పద్మా దేవేందర్ రెడ్డికి మద్దతు ఇచ్చేది లేదని ప్రకటించింది. దీంతో ఆ నియోజకవర్గంలో బీఆర్ఎస్ రెండుగా చీలిపోయింది.

కాంగ్రెస్ అధ్యక్షుడు రేవంత్ రెడ్డి (Revanth Reddy) తో మైనంపల్లికి మంచి రిలేషనే ఉంది. గతంలో వీళ్లిద్దరూ టీడీపీలో కలిసి పని చేశారు. 2009 ఎన్నికల్లో టీడీపీ నుంచి గెలిచారు. ఇప్పుడు మైనంపల్లి కాంగ్రెస్ వైపు చూస్తున్నారని ప్రచారం జరుగుతోంది. డీకే శివకుమార్ ను కలిసేందుకు ప్రయత్నాలు జరుగుతున్నాయని తెలుస్తోంది. ఆ తర్వాత ఢిల్లీలో ఖర్గే సమక్షంలో కాంగ్రెస్ లో చేరతారని.. రాహుల్ గాంధీని కూడా కలుస్తారని రాజకీయ వర్గాల్లో చర్చ జరుగుతోంది. ఈమధ్య కాలంలో కాంగ్రెస్ లో చేరాలనుకునే కీలక నేతలందరూ డీకేనే కలుస్తున్నారు. మొన్నామధ్య మాజీ మంత్రి చంద్రశేఖర్ కూడా బెంగళూరు వెళ్లి డీకేను కలిసొచ్చారు. తర్వాత బీజేపీకి గుడ్ బై చెప్పారు. ఇప్పుడు మైనంపల్లి కూడా ఇదే బాటలో ఉన్నట్టు సమాచారం.

ఈమధ్య మహిళపై థర్డ్ డిగ్రీ ఘటన తెలంగాణ (Telangana) వ్యాప్తంగా సంచలనం రేపింది. విచారణ పేరుతో మహిళను పోలీస్ స్టేషన్ కు తీసుకెళ్లి రాత్రి సమయంలో చావగొట్టారు పోలీసులు (Police). ఎల్బీనగర్ పరిధిలో జరిగిన ఈ ఘటనను తొలుత హైలైట్ చేసింది ‘మన తొలివెలుగు’ (Mana Tolivelugu). బాధితురాలిని కలిసిన జర్నలిస్ట్ రఘు (Journalist Raghu).. ఆమె బాధను అందరికీ తెలిసేలా చేశారు. ఘటన జరిగిన రోజు రాత్రి పోలీసులు ప్రవర్తించిన తీరును.. బాధితురాలు వివరిస్తున్న వీడియోలు వైరల్ అయ్యాయి. దీని తర్వాతే న్యూస్ ఛానల్స్ ఈ ఇష్యూపై దృష్టి సారించాయి.

తాజాగా ఈ ఘటనపై తెలంగాణ హైకోర్టు (Telangana High Court) ఫోకస్ పెట్టింది. మీడియాలో వచ్చిన కథనాలను ఆధారంగా చేసుకుని సుమోటోగా కేసును స్వీకరించింది. దీనిపై త్వరలో ప్రధాన న్యాయమూర్తితో కూడిన ధర్మాసనం విచారణ చేపట్టనుంది. దీంతో బాధితురాలికి న్యాయం జరుగుతుందని కుటుంబసభ్యులు భావిస్తున్నారు. ఈ విషయాన్ని మొదటగా సంప్రదించి వెలుగులోకి తెచ్చిన జర్నలిస్ట్ రఘుకు ధన్యవాదాలు తెలుపుతున్నారు.

అసలేం జరిగిందంటే..?

బాధితురాలి కథనం ప్రకారం.. మీర్ పేట్ మున్సిపల్ కార్పొరేషన్ పరిధిలోని నందిహిల్స్ కాలనీ రోడ్ నెంబర్ 4లో ఉంటోంది బాధిత మహిళ. కుమార్తె పెళ్లి కోసం సరూర్‌ నగర్‌ లోని బంధువుల ఇంటికి డబ్బుల కోసం వెళ్లింది. ఆగస్టు 15న రాత్రి తిరిగి ఎల్బీనగర్‌ కు రాగా పోలీసులు ఆపారు. ఎవరు నువ్వు..? ఇక్కడేం చేస్తున్నావు..? ఏంటీ కథ..? అంటూ ప్రశ్నల వర్షం కురిపించారు. తాను ఫలానా అని చెప్పినా వినిపించుకోలేదు. అన్నీ తెలుసులే.. అంటూ వెటకారంగా మాట్లాడుతూ.. ఆమెను తమ వాహనంలో బలవంతంగా ఎక్కించుకుని పోలీస్ స్టేషన్‌ కు తీసుకువెళ్లారు. చిత్రహింసలకు గురిచేయడమే కాకుండా రాత్రంతా పోలీస్ స్టేషన్ లో ఉంచి థర్డ్ డిగ్రీ ప్రయోగించారు. ఎదురు తిరిగితే నీ సంగతి తెలుసు అంటూ.. ఇబ్బందులకు గురి చేశారని బాధితురాలు ‘‘మన తొలివెలుగు’’కు వివరించింది.

ఉదయం ఓ అధికారి ఆదేశాల మేరకు బాధితురాలిని ఎల్బీనగర్ పోలీసులు వదలిపెట్టారు. ఈ దాడిలో ఆమె నడవలేని స్థితికి చేరుకుంది. అకారణంగా పోలీసులు తనని కొట్టారని బాధితురాలు ఆవేదన వ్యక్తం చేసింది. ఈ ఘటనపై రాచకొండ సీపీ చౌహాన్ స్పందిస్తూ ఇద్దరు పోలీసులపై వేటు వేసినట్టు తెలిపారు. ఇప్పుడు దీనిపై హైకోర్టు దృష్టి సారించడంతో బాధితురాలికి న్యాయం జరుగుతుందని.. మళ్లీ ఇలాంటివి రిపీట్ కాకుండా ఉంటాయని భావిస్తున్నారు ప్రజలు.

– బీఆర్ఎస్ అధినేత అనూహ్య నిర్ణయం
– ఈసారి గజ్వేల్ తోపాటు కామారెడ్డిలో పోటీ
– ప్రతిపక్షాల అంచనాలే నిజమా?
– గజ్వేల్ లో కేసీఆర్ కు ఓటమి తప్పదా?
– అందుకే, సెకెండ్ ఆప్షన్ ఎంచుకున్నారా?
– సేఫ్టీ సీట్ చూసుకుని బరిలోకి దిగుతున్నారా?
– 2012 నుంచి కామారెడ్డిలో గెలుస్తున్న బీఆర్ఎస్
– ఇంతకీ, సర్వేల్లో ఏం తేలింది..?

తెలంగాణ (Telangana) అసెంబ్లీ యుద్ధానికి సమరశంఖం పూరించారు బీఆర్ఎస్ అధినేత కేసీఆర్ (KCR). ఏడు చోట్ల మార్పులతో అభ్యర్థుల లిస్టును ప్రకటించారు. అయితే.. అనూహ్యంగా కేసీఆర్ ఈసారి రెండు చోట్ల నుంచి బరిలోకి దిగుతున్నారు. గజ్వేల్ (Gajwel) తో పాటు కామారెడ్డి (Kamareddy) ని కూడా ఆయన ఎంచుకున్నారు. ఇదే రాజకీయ వర్గాల్లో చర్చనీయాంశంగా మారింది. గజ్వేల్ లో గత రెండు పర్యాయాలు గెలిచారు కేసీఆర్. అయితే.. వచ్చే ఎన్నికల్లో ఆయన వేరే నియోజకవర్గం నుంచి పోటీ చేస్తారని కొన్నాళ్లుగా ప్రచారం సాగుతోంది.

గజ్వేల్ ను వదిలి మేడ్చల్ లో పోటీ చేస్తారని కొంతమంది, లేదు.. యాదాద్రి ఆలయం ఉన్న ఆలేరు నియోజకవర్గంలో పోటీ చేస్తారని మరికొందరు.. ఇవన్నీ కాదు కామారెడ్డి నియోజకవర్గాన్ని ఎంచుకున్నారని.. ఇప్పటికే అనేక సర్వేలు చేశారని వార్తలు వచ్చాయి. చివరకు సీఎం కామారెడ్డినే ఎంచుకున్నారు. అయితే.. ఈ సెకెండ్ ఆప్షన్ ఎంచుకోవడం వెనుక ఓటమి భయం ఉందని అంటున్నారు రాజకీయ పండితులు. కొద్ది రోజుల క్రితం కేసీఆర్ చేసిన సర్వేల్లో వ్యతిరేక పవనాలు వీచాయని.. అందుకే, నియోజకవర్గ మార్పుపై కేసీఆర్ దృష్టి పెట్టి కామారెడ్డిని ఎంచుకున్నారని అంచనా వేస్తున్నారు.

నిజానికి, ఈ విషయాన్ని టీపీసీసీ చీఫ్ రేవంత్ రెడ్డి (Revanth Reddy) ముందే చెప్పారు. కే‌సీ‌ఆర్ గనుక వచ్చే ఎన్నికల్లో గజ్వేల్ నుంచే పోటీ చేయాలని ఛాలెంజ్ కూడా చేశారు. ఈసారి ఆ స్థానంలో సీఎం ఓటమి పక్కా అంటూ కుండబద్దలు కొట్టారు. దానికి కొన్ని కారణాలను కూడా చెప్పారు. నియోజకవర్గంలో కే‌సీఆర్ పై జనంలో వ్యతిరేకత ఏర్పడిందని.. అందుకే, అనుకున్న స్థాయిలో మెజారిటీ రాకపోవచ్చనే ఆలోచనతోనే కేసీ‌ఆర్ గజ్వేల్ కాకుండా వేరే నియోజకవర్గంపై దృష్టి పెట్టారని తెలిపారు. ఇప్పుడు రేవంత్ అంచనానే నిజమైంది.

ఈమధ్యే మీడియాతో మాట్లాడిన కామారెడ్డి మాజీ ఎమ్మెల్యే షబ్బీర్ అలీ కూడా కేసీఆర్ పోటీపై తీవ్ర వ్యాఖ్యలు చేశారు. గజ్వేల్ ​లో తన ఓటమిని ముందే గ్రహించి తమ దగ్గరకు ​వస్తున్నారని అన్నారు. గజ్వేల్​ లోని గ్రామాలను నీట ముంచి కామారెడ్డిని ముంచడానికి వస్తున్నారని ఎద్దేవ చేశారు. గజ్వేల్ ​లో అభివృద్ధి చేశామని గొప్పలు చెప్పుకునే వారు.. ఇప్పుడు భయంతో పారిపోయి వస్తున్నారని విమర్శించారు. అక్కడ చెల్లని రూపాయి కామారెడ్డిలో చెల్లుతుందా అని చురకలంటించారు. కామారెడ్డిలో బీఆర్ఎస్ 2012 నుంచి గెలుస్తోంది. ఆపార్టీ నేత గంప గోవర్ధన్ వరుసగా విజయం సాధిస్తున్నారు. ఈయన గతంలో టీడీపీలో పని చేశారు. తర్వాత బీఆర్ఎస్ లో చేరి గెలుస్తూ వస్తున్నారు. ఈ స్థానంలో వరుస విజయాలు నమోదైన నేపథ్యంలో కేసీఆర్.. దీన్ని ఎంచుకున్నట్టుగా చెబుతున్నారు.

– ఎన్నికల వేళ బీఆర్ఎస్ లో గొడవలు
– కొన్నిచోట్ల ఎమ్మెల్సీ వర్సెస్ ఎమ్మెల్యే
– ఇంకొన్ని చోట్ల ఎమ్మెల్యేలు, మాజీల మధ్య వార్
– ఇన్నాళ్లూ చాపకింద నీరులా వ్యవహారం
– కానీ, ఇప్పుడు డైరెక్ట్ ఎటాక్
– నేతల మధ్య మాటల యుద్ధం
– పోటాపోటీ నిరసనలకు దిగిన అనుచరగణం

ముచ్చటగా మూడోసారి గెలిచి సౌత్ లో హ్యాట్రిక్ కొట్టిన తొలి సీఎంగా రికార్డ్ సృష్టించాలని కేసీఆర్ (KCR) అనుకుంటున్నారు. దీనికోసం అనేక వ్యూహాల్లో ఆయన ఉన్నారు. ప్రస్తుతం అభ్యర్థుల ఎంపికపై ఫోకస్ పెట్టిన కేసీఆర్.. గెలుపు గుర్రాలను బరిలోకి దింపాలని చూస్తున్నారు. అయితే.. కొన్ని నియోజకవర్గాల్లో పోటీ చేసే ఆశావాహుల సంఖ్య ఎక్కువగా ఉంది. వారిలో ఎవరికి సీటు ఇవ్వాలనేది తేల్చుకోలేకపోతున్నారట. అయితే.. ఈలోపు జరగాల్సిన నష్టం జరుగుతుందనేది రాజకీయ పండితుల వాదన.

తెలంగాణ (Telangana) ను రెండు పర్యాయాలుగా శాసిస్తున్నారు కేసీఆర్. ఇన్నేళ్లలో ఇతర పార్టీలకు చెందిన చాలామంది నాయకులకు గులాబీ కండువా కప్పేశారు. దాని ఫలితంగా కారు పార్టీ నాయకులతో ఫుల్ అయింది. ఇప్పుడు టికెట్ల టైమ్ రావడంతో.. ఇన్నాళ్లూ సైలెంట్ గా ఉన్న నేతలు ఇప్పుడు స్వరం పెంచారు. తమకు పోటీగా ఉంటున్న వారిని టార్గెట్ చేయడం మొదలుపెట్టారు. ఈక్రమంలో కొన్ని నియోజకవర్గాల్లో బీఆర్ఎస్ శ్రేణులు గ్రూపులుగా విడిపోయి కొట్టుకునే స్టేజ్ కి వెళ్లిపోయారు.

జనగామ బీఆర్ఎస్ (BRS) లో టికెట్ పంచాయితీ తారాస్థాయికి చేరింది. సిట్టింగ్ ఎమ్మెల్యే ముత్తిరెడ్డి యాదగిరి రెడ్డికి వ్యతిరేకంగా పార్టీకి చెందిన పలువురు ముఖ్య నాయకులు ఎమ్మెల్సీ రాజేశ్వర్ రెడ్డి కి టికెట్ కేటాయించాలంటూ డిమాండ్ చేస్తున్నారు. ఈ క్రమంలో పల్లాకు వ్యతిరేకంగా జనగామ చౌరస్తాలో ముత్తిరెడ్డి వర్గీయులు ఆందోళన చేపట్టారు. పల్లా గో బ్యాక్ అంటూ పార్టీ జెండాలతో పాటు, నల్లజెండాలు, ప్లకార్డులతో భారీ ర్యాలీ నిర్వహించారు. పల్లా రాజేశ్వర్ రెడ్డికి టికెట్ ఇవ్వొద్దంటూ డిమాండ్ చేశారు. మూడోసారి కూడా ముత్తిరెడ్డిని గెలిపించుకుంటామని చెబుతున్నారు. ఇక ఇదే స్థానం కోసం పోచంపల్లి శ్రీనివాసరెడ్డి కూడా పోటీకి సై అంటున్నారు. టికెట్‌ ఇవ్వకపోతే ముత్తిరెడ్డి వైఖరి ఎలా ఉంటుందన్నది ఇప్పుడు చర్చనీయాంశంగా మారింది.

ఇటు స్టేషన్‌ ఘన్‌ పూర్‌ సంగతి సరేసరి.. ఇక్కడ చాలారోజులుగా ఎమ్మెల్యే రాజయ్య, ఎమ్మెల్సీ కడియ శ్రీహరి మధ్య వార్ నడుస్తోంది. ఈమధ్య అయితే పీక్స్ కు చేరింది. వీళ్ల పంచాయితీ ఆఖరికి ప్రగతి భవన్ వరకు వెళ్లింది. కొద్ది రోజులుగా సైలెంట్ గా ఉన్న వ్యవహారం.. తాజాగా మళ్లీ రాజుకుంది. తనకే టికెట్‌ వస్తుందన్న నమ్మకం ఉందని సిట్టింగ్‌ ఎమ్మెల్యే రాజయ్య ప్రకటించగా.. అంత సీన్ లేదని అంటున్నారు కడియం శ్రీహరి. తనకు ప్రజలు ఆశీర్వాదం అందిస్తే నియోజకవర్గ రూపురేఖలు మార్చుతానని చెబుతున్నారు. ఈ క్రమంలోనే క్యాడర్ రెండు వర్గాలుగా విడిపోయి నిరసనలకు దిగుతోంది. వేలేరులో కడియంకు వ్యతిరేకంగా రాజయ్య వర్గీయులు నినాదాలు చేశారు. స్టేషన్ ఘన్‌ పూర్‌ టికెట్‌ శ్రీహరికి ఇవ్వొద్దని ఆందోళన చేశారు. ప్రస్తుతానికి ఇవే. రానున్న రోజుల్లో ఇంకా ఎన్నో చూడాల్సి వస్తుందని.. బీఆర్ఎస్ లో కుమ్ములాటలు తప్పవని అంచనా వేస్తున్నారు రాజకీయ పండితులు.