Featured

హైదరాబాద్ శివారు తుక్కుగూడలో కాంగ్రెస్ (Congress) జనజాతర పేరుతో తలపెట్టిన భారీ బహిరంగ సభలో మాటల తూటాలు పేలుతున్నాయి.. ఒకవైపు రాహుల్ గాంధీ తీవ్రస్థాయిలో ధ్వజమెత్తుతుండగా మరోవైపు సీఎం రేవంత్ రెడ్డి (Revanth Reddy) సైతం.. బీజేపీ (BJP), బీఆర్ఎస్ (BRS)ను గట్టిగానే అరుసుకొన్నారు.. ఈ నేపథ్యంలో కేసీఆర్‌ (KCR)పై సంచలన వ్యాఖ్యలు చేశారు.

కేసీఆర్ భాష తీరుగా సరిగ్గా లేదని మండిపడ్డ సీఎం.. ఏం మాట్లాడినా చూస్తూ ఊరుకోవడానికి నేను జానారెడ్డిని కాదు.. రేవంత్ రెడ్డిననే విషయం గుర్తుంచుకోవాలని వార్నింగ్ ఇచ్చారు. నోటికి ఇష్టం వచ్చినట్లు మాట్లాడితే చర్లపల్లి జైలులో చిప్పకూడు సిద్దం చేస్తానని హెచ్చరించారు. ఆయనకు చర్లపల్లి జైలులో డబుల్ బెడ్ రూమ్ ఇళ్లు కట్టిస్తామని ఎద్దేవా చేశారు.. పదేళ్లు తెలంగాణను దోచుకున్నారని నిప్పులు చెరిగారు.

బీఆర్ఎస్ పదేళ్ళు అధికారంలో ఉండి వందేళ్ల విధ్వంసం సృష్టించిందని ఆగ్రహం వ్యక్తం చేశారు. కేసీఆర్ కాలు విరిగింది.. కూతురు కవిత జైలుకు వెళ్లిందని ఏమనకుండా జాలి చూపించామన్నారు. కానీ అధికారం కోసం కొత్త నాటకాలు వేస్తే.. ఏం చేయాలో అదే చేస్తామని రేవంత్ వార్నింగ్ ఇచ్చారు. మరోవైపు ఢిల్లీ నుంచి తెలంగాణకు నిధులు రావాలంటే రాష్ట్రంలో 14 మంది ఎంపీలు తప్పని సరిగ్గా గెలవాలని పేర్కొన్నారు..

మరోవైపు బీజేపీపై నిప్పులు చెరిగిన సీఎం.. తుక్కుగూడలో బీఆర్ఎస్‌ను తుక్కుతుక్కుగా ఓడించిన ఉత్సాహం స్పష్టంగా కనిపిస్తోంది.. అదే ఉత్సాహంతో లోక్ సభ ఎన్నికల్లో బీజేపీని ఓడించాలని పిలుపునిచ్చారు. కేంద్రంలో పదేళ్లు అధికారంలో ఉన్న బీజేపీ దేశానికి ఏం చేసిందని ప్రశ్నించారు. రెండు కోట్ల ఉద్యోగాలు ఏడాదికి ఇస్తామన్నారు.. మరీ పదేళ్లలో 20 కోట్ల ఉద్యోగాలు ఏవని ప్రశ్నించారు.

మూడోసారి అధికారం కోసం మతం పేరిట చిచ్చుపెట్టాలని చూస్తున్నారని మండిపడ్డారు. హైదరాబాద్‌లో వరదలొస్తే కేంద్రమంత్రి కిషన్ రెడ్డి ఒక్క పైసా అయిన తెచ్చారా అని ప్రశ్నించారు.. లోక్ సభ ఎన్నికల్లో ఇండియా కూటమి అధికారంలోకి రావడం ఖాయమని రేవంత్ జోస్యం చెప్పారు. తెలంగాణ స్ఫూర్తిని దేశమంతా తీసుకొస్తామని తెలిపిన ఆయన.. ఢిల్లీలో జూన్‌లో కాంగ్రెస్ మువ్వెన్నల జెండా ఎగరబోతుందని ధీమా వ్యక్తం చేశారు.

బీఆర్ఎస్ అధినేత కేసీఆర్ (KCR) అధికారం కోల్పోయాక బయటకు రావడమే మానేశారు. ఒకప్పుడు ప్రెస్‌మీట్ పెట్టి నాన్ స్టాప్‌గా ప్రతిపక్షాలను ఉతికారేసిన కేసీఆర్ ఇప్పుడు ఎందుకో మిన్నకుండిపోతున్నారు. ప్రస్తుతం పరిస్థితులు ఆయనకు వ్యతిరేకంగా మారడమే అందుకు కారణంగా తెలుస్తోంది. ఓవైపు కూతురు కవిత ఢిల్లీ లిక్కర్ స్కాం కేసులో అరెస్టు అవ్వడం, మరోవైపు సొంత పార్టీ నేతలు ఒక్కొక్కరిగా పార్టీని వీడటం ఆయన్ను మానసికంగా కుంగదీసినట్లు తెలుస్తోంది.

అయితే, పార్లమెంటు ఎన్నికల వేళ పార్టీకి ఎలాగైనా జవసత్వాలు తీసుకొచ్చేందుకు కేసీఆర్ ప్రయత్నిస్తున్నారు. కాంగ్రెస్ పాలనలో రైతులు ఇబ్బంది పడుతున్నారని గుర్తించి వారి పక్షాన పోరాడేందుకు సిద్ధమయ్యారు. వారం కిందట ఉమ్మడి నల్గొండ జిల్లాలో పర్యటించి రైతుల కష్టాలను అడిగి తెలుసుకున్నారు.

ఈ క్రమంలోనే నేడు ఉమ్మడి కరీంనగర్ జిల్లాలో రైతు సమస్యలపై ఉద్యమించేందుకు సిద్దమయ్యారు. ఒక్కసారి గతంలోకి వెళితే కేసీఆర్ సీఎంగా ఉన్నప్పుడు రైతులకు రూ.లక్ష రుణమాఫీ చేస్తానని 2018లో ముందస్తు ఎన్నికలకు వెళ్లేముందు కేసీఆర్ ప్రకటించారు. కానీ మళ్లీ 2023లో ఎన్నికల ముందు దానిని అమలు చేశారు.

అప్పటివరకు రైతులు రోడ్డెక్కి ఆందోళనలు చేశారు. ఆత్మహత్యలు చేసుకున్నాకేసీఆర్ పట్టించుకున్న పాపాన పోలేదు.ఇప్పుడు కాంగ్రెస్ అధికారంలోకి వచ్చిన 3 నెలల్లోనే రూ.2లక్షల రుణమాఫీ, 500 బోనస్, రైతు బీమా అమలు చేయాలని కేసీఆర్ గట్టిగా కోట్లాడితే అది ఆయన మెడకే చుట్టుకునే అవకాశం లేకపోలేదని రాజకీయాల్లో చర్చ జరుగుతోంది. కేసీఆర్ వ్యూహత్మకంగా వ్యవహారిస్తున్నారా?

లేదా కోరికోరి అధికార పక్షం చేతిలో బంధీ కాబోతున్నారా? అని పలువురు కొత్త ప్రశ్నలు లేవనెత్తుతున్నారు.కేసీఆర్ ఒకప్పుడు ఏం మాట్లాడినా ఎవరూ ఎదురుచెప్పేవారు కాదు. కానీ ఇప్పుడు ఆయన ఏది మాట్లాడిన ప్రజల్లోకి తప్పుడు సంకేతం వెళ్లిపోతుంది. పదేళ్ల అధికారంలో ఉన్న మీరు ఏంచేశారు? ఇప్పుడు ఉచిత సలహాలు ఇస్తున్నారు? పోరాటాలకు సిద్ధమవుతున్నారు? మీ హయాంలో రైతులను పట్టించుకుంటే ఇప్పుడు ఇలాంటి పరిస్థితి వచ్చేదా? అని ప్రశ్నలు సంధిస్తున్నారు.

తెలంగాణ సెంటిమెంటుతో అధికారం పొందిన బీఆర్ఎస్.. మరుక్షణమే ప్రజల ఆకాంక్షలను ఆటకెక్కించి.. స్వీయ వర్గ ఆధిపత్య ప్రయోజనాలను అమలుచేసిందనే ఆరోపణలున్నాయి. అదీగాక తానొక్కడినే చావు నోట్లో తల పెట్టి తెలంగాణ తెచ్చినా అని బుకాయించడమే కాకుండా కొడుకు, కూతురు, అల్లుడితో తెగ ప్రచారం చేయించుకోవడం. నిజమైన ఉద్యమకారుల త్యాగాలను విస్మరించిడం వంటి చేష్టలతో ఫక్తు రాజకీయ నాయకుడిగా కేసీఆర్ గుర్తింపు పొందారనేలా మారిపోయారని అనుకొనేలా చేశారు..

మరోవైపు తెలంగాణ ఉద్యమాన్ని వ్యతిరేకించిన టీడీపీ నాయకులకు రెడ్​ కార్పెట్ పరిచి ఆహ్వానించి కీలక మంత్రి పదవులు ఇచ్చారు.. ఈ క్రమంలో నిజమైన ఉద్యమకారులను, మేధావులను దూరం చేసుకొన్నారు.. అయితే అతి కొద్దిమంది అవకాశవాదులైన మేధావులు తమ ప్రయోజనాల కోసం బీఆర్ఎస్ కు జై కొట్టారు. సొంత రాజ్యాన్ని స్థాపించి కుటుంబ సభ్యులను పాలనలో భాగస్వాములుగా చేసి గత దొరల పాలనను గుర్తు చేశారని చర్చించుకొనేలా చేశారు..

మొత్తానికి తెలంగాణ సామ్రాజ్యానికి కల్వకుంట్ల కుటుంబం తప్ప వేరే దిక్కులేదనేలా.. కొడుకు.. మనవడు ఇలా రాజకీయాల్లో తన వంశం పారంపర్యంగా కొనసాగుతుందని భావించిన పెద్ద సారుకు అసెంబ్లీ ఎన్నికల్లో ఓటర్లు ఊహించని జలాక్కు ఇచ్చారు.. దీంతో ప్రస్తుతం బీఆర్ఎస్ కలలో కూడా ఊహించని పరిస్థితులను ఎదుర్కొంటుందని తెలుస్తోంది. పార్టీ అధికారంలో ఉన్నపుడు కారు టికెట్ కు హిట్టు సినిమాకు ఉన్నంత గిరాకీ ఉండేది.

కానీ ఇప్పుడు టికెట్ ఇస్తామని ఆఫర్ చేస్తున్నా కనీసం పట్టించుకొనే వారే కరువయ్యారు.. ఒకవేళ బ్రతిమిలాడి ఇచ్చినా అలా తీసుకొని ఇలా వెనక్కి ఇచ్చేస్తున్న అవమానకర పరిస్థితి ఎదురవుతున్న దృశ్యాలు కనిపిస్తున్నాయి.. అదేవిధంగా 2019 పార్లమెంట్ ఎన్నికల్లో కారు-సారూ.. పదహారు అనే నినాదంతో తెగ హాల్ చల్ చేసిన బీఆర్ఎస్ ప్రస్తుతం సైలంట్ గా సాగడం ఆసక్తికరంగా మారిందని అనుకొంటున్నారు..

ఇక రాజకీయ ఎదుగుదల కోసం టీఆర్ఎస్ (TRS)ను కాస్త బీఆర్ఎస్ (BRS)గా మార్చిన బాస్ తెలంగాణ (Telangana) ఆత్మగౌరవానికి విలువ ఇవ్వలేదనేలా ప్రవర్తించారనే ఆరోపణలు వచ్చాయి.. ఈ క్రమంలో తెలంగాణ బలం, దళం, గళం అనే నినాదంతో ఇప్పుడు ముందుకు వెళ్ళితే.. ఇంకా ప్రజల్లో వ్యతిరేకత ఏర్పడే అవకాశాలు ఉన్నట్లు భావించి కామ్ గా ఉన్నట్లు టాక్ వినిపిస్తోంది..

మరోవైపు జాతీయ పార్టీలు అయిన కాంగ్రెస్ (Congress), బీజేపీ (BJP) సరైన నినాదం, విధానంతో ఈ ఎన్నికల్లో ముందుకు వెళ్ళడం కనిపిస్తోంది. కానీ బీఆర్ఎస్ కే ఓ నినాదం, విధానం లేకుండా పోవడం మైనస్ గా మారిందనే టాక్ వినిపిస్తోంది.. అందులో ప్రస్తుత పరిస్థితుల్లో కారుకు ఓటేస్తే ఎలాంటి ప్రయోజనం ఉండదని జాతీయ పార్టీలు తెగ ప్రచారం చేస్తున్నాయి.. ఇలా ప్రస్తుతం బీఆర్ఎస్ బలాలు, బలహీనతలను బేరీజు వేసుకొంటే.. ఒకటి, రెండు చోట్ల కూడా గెలుపు అందని ఆకాశంగా మారిందనే వాదన వినిపిస్తోంది..