Politics

రాష్ట్రంలో కొలువుదిరిన కాంగ్రెస్ (Congress) ప్రభుత్వం ఎన్నికల్లో ఇచ్చిన హామీలను ఒక్కొక్కటిగా అమలు చేస్తున్న విషయం తెలిసిందే.. ఇప్పటికే మహిళలకు ఉచిత బస్సు సౌకర్యంతో పాటు.. ఆరోగ్యశ్రీ పరిమితి పెంపు అమలవుతుంది. తాజాగా రూ. 500కి గ్యాస్.. 200 యూనిట్లలోపు కరెంటు ఫ్రీ వంటి పథకాలు అమలవుతున్నాయి.. వీటితో కలిపి మొత్తం నాలుగు హామీలను ప్రభుత్వం ప్రస్తుతం అమలు చేస్తోంది.

ఈ నేపథ్యంలో రాష్ట్ర మంత్రి పొన్నం ప్రభాకర్ (Ponnam Prabhakar) హైదరాబాద్‌ (Hyderabad), అమీర్‌పేట్‌ (Ameerpet)లో ప్రభుత్వ ప్రతిష్టాత్మక గృహజ్యోతి పథకాన్ని ప్రారంభించారు. ఈ సందర్భంగా మీటర్ రీడింగ్ తీసి జీరో బిల్లులను మహిళలకు అందజేశారు. అనంతరం మాట్లాడుతూ.. తమది హామీలిచ్చి కాలయాపన చేసే ప్రభుత్వం కాదని పేర్కొన్నారు. ఎన్నికల సమయంలో ఇచ్చిన హామీలన్నీ నెరవేరుస్తామని స్పష్టం చేశారు.

సుమారు వెయ్యి రూపాయల విలువజేసే కరెంట్‌ను ఒక్కో ఇంటికి ఉచితంగా ఇస్తున్నట్లు వెల్లడించారు. ఇలా క్రమక్రమంగా అభివృద్ధి చేస్తున్న కొత్త ప్రభుత్వానికి నిర్మాణాత్మకమైన సలహాలు ఇవ్వండి కానీ.. అనవసరమైన విమర్శలు తగదని హితవు పలికారు. అదే విధంగా ఈ నెల 11న ఇందిరమ్మ ఇళ్లతో పాటు మిగతా వాగ్ధానాలు కూడా పూర్తి చేస్తామని పొన్నం ప్రభాకర్ హామీ ఇచ్చారు.

మరోవైపు ఆరు గ్యారంటీల్లో భాగంగా తెలంగాణ ప్రభుత్వం.. 200 యూనిట్లలోపు కరెంటు వాడే వినియోగదారులు బిల్లులు కట్టాల్సిన అవసరం లేదని ప్రకటించిన సంగతి తెలిసిందే. మార్చి నెల ప్రారంభం నుంచి అనగా శుక్రవారం నుంచి ఈ పథకం అమల్లోకి వచ్చింది. 200యూనిట్లకు పైన ఒక్క యూనిట్‌ అధికంగా కరెంట్‌ వాడినా పూర్తి బిల్లు కట్టాల్సిందే అని సూచించింది.

లోక్‌సభ ఎన్నికల్లో అసదుద్దీన్ ఒవైసీ (Asaduddin Owaisi) కోటను బద్దలు కొట్టేందుకు బీజేపీ (BJP) కొత్త వ్యూహాలను రచిస్తోందా? అని ఆలోచించే వారికి ప్రస్తుత పరిస్థితులు చూస్తుంటే నిజమే అనిపిస్తోంది. ఇందులో భాగంగా హైదరాబాద్‌ (Hyderabad) ఎంపీ స్థానంలో బీజేపీ కొత్త అభ్యర్థిని ప్రకటించింది. పాతబస్తీలో మజ్లిస్ ను ఓడించచం కష్టమే కానీ అసాధ్యం కాదు. హిందూ ఓట్లన్నీ ఏకీకృతం అయితే.. చీలిపోకుండా చూసుకుంటే.. మజ్లిస్ కోటను బద్దలు కొట్టే అవకాశం ఉంది.

ఇదే ఆలోచనలో ఉన్న కాషాయం ముందు చూపుతో వ్యవహరిస్తున్నట్లు టాక్ వినిపిస్తోంది. అదేవిధంగా రాష్ట్రంలో ఎక్కడా బీజేపీ ఉనికిలేని రోజుల్లోనూ ఈ స్థానంలో ఎంఐఎంకి గట్టి ప్రత్యర్థిగా బీజేపీ నిలుస్తూ వస్తోంది. అయితే బీఆర్ఎస్ (BRS) ఓటమితో ఒవైసీ ప్రభావం ఎంతో కొంత తగ్గిందని, దీనికి తోడు కాంగ్రెస్ (Congress) కూడా ఎంఐఎంని గట్టిగా ఢీ కొట్టే ప్రయత్నం చేస్తోందని భావిస్తున్న బీజేపీ బలమైన, కొత్త ముఖాన్ని రంగంలోకి దించితే.. ఒవైసీ మీద గెలుపు సాధ్యమేనని అంచనా వేస్తోన్నట్లు ప్రచారం జరుగుతోంది.

దీనికి తోడు దేశ వ్యాప్తంగా మోడీ (Modi) చరిష్మా బలంగా పనిచేస్తోంది. ఈ సమయంలో ఒక్కసారి హైదరాబాద్ ఎంపీ సీటు గెలవాలని ఆ పార్టీ అధిష్ఠానం గట్టి పట్టుదలగా ఉందని అంటున్నారు.. అందుకే, బలమైన అభ్యర్థిని రంగంలోకి దించి విజయాన్ని సాధించాలని, తద్వారా అసదుద్దీన్, అతని పార్టీకి చెక్ పెట్టాలని భావిస్తున్నట్టు సమాచారం. అదీగాక కాంగ్రెస్ నుంచి అజారుద్దీన్, ఫిరోజ్ ఖాన్ అభ్యర్థులుగా బరిలో నిలిస్తే.. భారీగా ముస్లింల ఓట్లలో చీలిక రావొచ్చని బీజేపీ అంచనా వేస్తోంది. అందుకే మాధవీలత వైపు మొగ్గినట్లుగా కనిపిస్తోంది.

ఈ క్రమంలో కొంపెల్ల మాధవీలత (Kompella Madhavilatha)ను బీజేపీ అభ్యర్థిగా ప్రకటించింది. పాతబస్తీ మూలాలున్న మాధవీలత నుదుట రూపాయి కాసంత బొట్టు పెట్టుకొని కాస్త విచిత్రంగా ఉండే వేషధారణతో ఇటీవలి కాలంలో సోషల్ మీడియాలో వైరల్ అయ్యారు. విరించి హాస్పిటల్స్ ఎండీగా ఎక్కువ మంది గుర్తుంచుకొంటారు. ఎన్నారై అయిన ఈమె మధు సాఫ్ట్‌వేర్‌ సొల్యూషన్స్‌ అనే ఐటీ సేవల సంస్థతో పాటు అమెరికాలో ‘క్యూ ఫండ్‌’ అనే ఫిన్‌‌కార్ప్‌‌నూ నడుపుతున్నారు.

మరోవైపు పాతబస్తీ కేంద్రంగా లోపాముద్రా ఫౌండేషన్ పేరుతో ఒక స్వచ్ఛంద సంస్థను స్థాపించి సేవా కార్యక్రమాలు నిర్వహిస్తున్నారు. పేదల బస్తీల్లో హెల్త్ క్యాంపులు పెట్టి, ఉచితంగా మందులు ఇవ్వటం, టైలరింగ్ కేంద్రాలు పెట్టి మహిళలకు శిక్షణనిచ్చి, వారికి తగిన పనిని ట్రస్ట్ తరఫున కల్పించటంతో పాటు ప్రజ్ఞాపూర్‌ దగ్గర 4 లక్షల చదరపు అడుగుల్లో గోశాలను నిర్మించి దేశవాళీ ఆవులను పరిరక్షించుకోవాలనే ప్రచారం చేస్తున్నారు.

అంతే కాకుండా కొవిడ్ సమయంలో రోజూ ఉస్మానియా ఆసుపత్రిలో ఉన్న వందలాది మందికి భోజనాన్ని పంపి స్థానికంగా మంచిపేరు తెచ్చుకొన్నారు. అటు సాధుసంతులతో సమావేశాలు పెట్టించటం, ధార్మిక ప్రవచనాలు ఏర్పాటు చేయించి పాతబస్తీ హిందూ ఓటర్లలో చైతన్యాన్ని కలిగిస్తున్నారు. ఈ నేపథ్యంలో ఈ ప్రాంతంలో బాగా చదువుకొన్న, ఆర్థిక వనరులున్న, హిందీలో ప్రజలతో మమేకమయ్యే మహిళను బరిలో దింపితే త్రిముఖపోరులో సత్తా చాటవచ్చని భావించిన బీజేపీ ఈ నిర్ణయానికి వచ్చినట్లు టాక్ వినిపిస్తోంది.

మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ (KTR) సోషల్ మీడియా (Social Media)లో చాలా యాక్టివ్ గా ఉంటారన్న విషయం తెలిసిందే.. ఆయన ట్విట్టర్ (X) వేదికగానే చాలా సమస్యల పరిష్కారానికి కృషి చేస్తారనే టాక్ కూడా ఉంది. అదేవిధంగా కేసీఆర్ (KCR) తనయుడుగానే కాకుండా తనకంటూ ఓ ప్రత్యేకమైన ఇమేజ్ ను సొంతం చేసుకొన్నారు.

తెలుగు రాజకీయ నేతల్లో ఒకరైన కేటీఆర్.. ప్రత్యేకశైలితో మాట్లాడే మాటాలకు ఫ్యాన్స్ సైతం ఉన్నారు.. ఇక నిత్యం సోషల్ మీడియా వేదికగా ప్రజలకు అందుబాటులో ఉండే కేటీఆర్.. వ్యక్తిగత జీవితానికి సంబంధించిన పలు ఆసక్తికర విషయాలను తన అభిమానులకు, బీఆర్ఎస్ (BRS) శ్రేణులకు తెలియజేస్తారని అనుకొంటారు.. ఈ క్రమంలో ఆయన నేడు న్యూ లుక్‌తో దర్శనమిచ్చారు.

క్లీన్ షేవ్ చేసుకొని సరికొత్త లుక్‌తో ఉన్న ఫొటోను ఇన్‌స్టాగ్రామ్‌ (Instagram)లో కేటీఆర్ పోస్టు చేశారు. దీంతో ఆయన అభిమానులు కామెంట్లతో రెచ్చిపోతున్నారు. కొందరు బాలీవుడ్ హీరోలా ఉన్నవంటూ కామెంట్ పెడుతుండగా.. వెంటనే సినిమాల్లోకి వచ్చేయండి అన్న అంటూ మరికొందరు ట్రోలింగ్ చేస్తున్నారు. ఇదిలా ఉండగా కొద్ది రోజుల క్రితం కేటీఆర్‌ అభిమాని ఒకరు ఏఐ టెక్నాలజీ ద్వారా ఆయన కొత్త లుక్‌లో రూపొందించారు. పొడవాటి జట్టు, గడ్డం, మీసంతో ఎడిట్‌ చేసి కేటీఆర్‌కు పంపించాడు. ఆ ఫొటోను తన అధికారిక ఎక్స్‌లో కేటీఆర్‌ షేర్‌ చేశారు. దీంతో అదికాస్త వైరల్‌గా మారిన విషయం తెలిసిందే..

తెలంగాణ (Telangana)లో అప్పుడే భానుడి ప్రతాపం మొదలైంది. రాత్రి సమయంలో వాతావరణం కాస్త చల్లబడుతున్న.. పగలు మాత్రం ఎండలు దంచికొడుతున్నాయి. ఈ నేపథ్యంలో రాష్ట్ర ప్రభుత్వం కీలక ఉత్తర్వులు జారీ చేసింది. మార్చి 15వ తేదీ నుంచి రాష్ట్రంలోని అన్ని ప్రభుత్వ, ప్రైవేట్, ఎయిడెడ్‌ స్కూళ్లకు ఒంటి పూట బడులు (Half Day Schools) నిర్వహించ‌నున్నట్లు ప్రకటించింది.

రాష్ట్రంలో ఎండల తీవ్రత పెరుగుతున్న నేపథ్యంలో ఒంటిపూట బడులు ప్రారంభించాలని ప్రభుత్వం నిర్ణయించింది. మార్చి 15వ తేదీ నుంచి ఏప్రిల్‌ 23 వరకు ఒంటి పూట బడులు నిర్వహించాలని ఆదేశించింది. కాగా ఉదయం 8 గంటల నుంచి మధ్యాహ్నం 12.30 గంటల వరకు ఒంటిపూట బడులు కొనసాగుతాయని తెలిపింది.. అలాగే పదో తరగతి పరీక్షలు జరిగే కొన్ని పాఠశాలల్లో మాత్రం మధ్యాహ్నం క్లాసులు జరిపేందుకు పర్మిషన్లు ఇవ్వనున్నట్లు అధికారులు తెలిపారు.

మరోవైపు మార్చి నెల ప్రారంభానికి ముందే రాష్ట్రంలో ఎండలు సెగలు పుట్టిస్తున్నాయి. ఈ క్రమంలో శనివారం సీఎం (CM) రేవంత్ రెడ్డి (Revanth Reddy) సచివాలయంలో అధికారులతో కలిసి సమీక్షా సమావేశం నిర్వహించారు. ఇందులో భాగంగా రాష్ట్రంలో రోజు రోజుకు పెరుగుతున్న ఉష్ణోగ్రత మార్పుల తీవ్రత దృష్ట్యా ఒంటిపూట బడులు ప్రారంభించాలని ప్రభుత్వం నిర్ణయించినట్లు తెలిపారు.

తెలంగాణ (Telangana) రాష్ట్రంలో బీసీ కులగణనపై కాంగ్రెస్ ప్రభుత్వం తీసుకొన్న నిర్ణయం పలువురి నుంచి ప్రశంసలు అందుకోంటుంది. ఈ నేపథ్యంలో బీసీ కులగణన విషయంలో ప్రభుత్వానికి అన్ని విధాలా అండగా ఉంటామని జాతీయ బీసీ దళ్ అధ్యక్షుడు దుండ్ర కుమారస్వామి పేర్కొన్నారు. మేడ్చల్ (Medchal) జిల్లా పర్యటనలో భాగంగా కుత్బుల్లాపూర్ (Quthbullapur)లో నాయి బ్రాహ్మణుల ఆత్మగౌరవ భవనాన్ని పరిశీలించారు..

ఈమేరకు బీసీ ఆత్మగౌరవ భవనాల నిర్మాణం పూర్తి చేయడానికి ప్రభుత్వం సహకరించాలని కోరుతూ నాయీ బ్రాహ్మణుల నాయకులు కుమార స్వామికి వినతిపత్రం అందజేశారు. ఈ సందర్భంగా మాట్లాడిన ఆయన.. ఈ సమస్యను ప్రభుత్వం దృష్టికి తీసుకవెళ్తామని తెలిపారు.. తెలంగాణ ప్రభుత్వం బీసీల అభివృద్దికి కట్టుబడి ఉందని పేర్కొన్నారు.. మరోవైపు రాష్ట్రంలో కులగణన విషయంలో ప్రభుత్వం ఇటీవల చారిత్రాత్మకమైన నిర్ణయాన్ని తీసుకొన్న విషయాన్ని గుర్తు చేశారు..

బీహార్ కులగణన తరహాలో తెలంగాణలో కులగణన చేయడం అభినందనీయమన్నారు.. 2022లో బీహార్ ప్రభుత్వం రాష్ట్రంలోని వివిధ కులాల జనాభాను లెక్కించే లక్ష్యంతో కుల-ఆధారిత గణన నిర్వహించింది. ఈ గణన దేశవ్యాప్తంగా చర్చనీయాంశమై, ఇతర రాష్ట్రాలకు ఆదర్శంగా నిలిచిందని దుండ్ర కుమారస్వామి (Dundra Kumaraswamy) తెలిపారు. ఇటీవల తెలంగాణ రాష్ట్ర ప్రభుత్వం, బీహార్ మాడెల్ కుల గణన చేపడతాము అని చెప్పడం అభినందనీయం అని అన్నారు.

తెలంగాణ రాష్ట్ర ప్రభుత్వం బీసీల పక్షపాతి అని కొనియాడారు.. ఇకపోతే బీహార్ రాష్ట్రంలో కుల గణన మొదటి దశలో, అన్ని జిల్లాల్లో, బ్లాకుల్లో మరియు పట్టణ స్థానిక సంస్థల్లో మొత్తం కుటుంబాల సంఖ్యను లెక్కించి నమోదు చేశారు.. రెండవ దశలో గుర్తించిన కుటుంబాలలో వ్యక్తుల కులం, ఉపకులం, సామాజిక-ఆర్థిక వివరాలను 17 ప్రశ్నల ద్వారా డాటాను ఎనుమరేటర్లు సేకరించారని కుమారస్వామి వివరించారు..

రాష్ట్రంలో కులగణన ప్రక్రియ సరిలీకృతం చేసి, సంక్షిప్త సమాచార అధ్యయనంతో తెలంగాణ రాష్ట్రంలో వెనుక బడిన తరగతుల ప్రజలను సామాజికంగా, ఆర్ధికంగా, రాజకీయంగా మరియు అన్నీ రంగాలలో ఎదగడానికి కృషి చేయాలని ఈ సందర్భంగా తెలంగాణ రాష్ట్ర ప్రభుత్వాన్ని కోరారు.

బీఆర్ఎస్ (BRS) మాజీ మంత్రి మల్లారెడ్డి (Malla Reddy)కి అధికారులు ఊహించని షాకిచ్చారు. గుండ్ల పోచంపల్లి (Gundla Pochampally) మున్సిపాలిటీ, హెచ్‌ఎండీఏ (HMDA) లే అవుట్‌లో సుమారు 2500 గజాల భూమిని ఆక్రమించి కాలేజీ కోసం రోడ్డు నిర్మాణం చేశారని తీవ్ర ఆరోపణలు ఉన్నాయి. ఈ నేపథ్యంలో రోడ్డును అధికారులు తొలగించారు. మేడ్చల్ (Medchal) కలెక్టర్ ఆదేశాలతో నేడు అధికారులు ఈ కార్యక్రమం చేపట్టారు..

మరోవైపు గతంలో ఎంపీగా ఉన్న రేవంత్ రెడ్డి (Revanth Reddy) ఈ వ్యహారంపై అధికారులకు ఫిర్యాదు చేశారు. అయినప్పటికీ అప్పటి బీఆర్ఎస్ ప్రభుత్వం ఎలాంటి చర్యలు చేపట్టలేదు. తాజాగా కాంగ్రెస్ ప్రభుత్వం అధికారంలోకి వచ్చాక భూమి అంశం మరోసారి తెరపైకి వచ్చింది. దీంతో అధికారులు చర్యలకు ఉపక్రమించారు.. ఇదిలా ఉండగా దీనిపై మల్లారెడ్డి స్పందించారు.

తనను కావాలనే కొంతమంది టార్గెట్ చేశారని ఆరోపించారు. తనపై ప్రభుత్వం రాజకీయ కక్ష సాధింపు చేస్తోందని విమర్శించారు. ప్రస్తుతం అధికారం వాళ్ల చేతుల్లో ఉంది కాబట్టి ఎంతకైనా తెగిస్తారని మండిపడ్డారు.. రోడ్డు వేసే సమయంలో హెచ్ఎండీఏ అధికారుల అనుమతి తీసుకొన్నట్లు పేర్కొన్నారు. కాగా రోడ్డుకు ఉపయోగించిన 2500 గజాల స్థలానికి ప్రత్యామ్నాయంగా మరో స్థలాన్ని మున్సిపాలిటీకి ఇచ్చామని మల్లారెడ్డి వెల్లడించారు..

హఠాత్తుగా కాలేజ్ రోడ్డు తొలగించడంతో 25 వేల మంది విద్యార్థులు, అధ్యాపకులు పలు ఇబ్బందులు ఎదుర్కొంటున్నారని అన్నారు.. కావున ప్రభుత్వం ట్రాఫిక్ సమస్య, విద్యార్థుల జీవితాల్ని దృష్టిలో పెట్టుకొని న్యాయం చేయాలని మల్లారెడ్డి డిమాండ్ చేశారు.