Politics

టీడీపీ (TDP) నుంచి వైసీపీ YCP)లో చేరిన విజయవాడ ఎంపీ కేశినేని నాని మరోసారి టీడీపీ అధినేత చంద్రబాబు (Chandrababu)పై కీలక వ్యాఖ్యలు చేశారు. కేశినేని భవన్ లో నిర్వహించిన ఎన్టీఆర్ వర్ధంతి కార్యక్రమంలో పాల్గొన్న ఆయన.. ఎన్టీఆర్ విగ్రహానికి పూలమాలలు వేసి నివాళులర్పించారు.. ఈ సందర్భంగా మాట్లాడిన కేశినేని.. తలకిందులుగా తపస్సు చేసిన చంద్రబాబు అధికారంలోకి రారని జోస్యం చెప్పారు..

నందమూరి తారకరామారావు పార్టీ పెట్టిన తొమ్మిది నెలల్లో అధికారంలోకి వచ్చి దేశచరిత్రలో నిలిచి పోయారని గుర్తు చేశారు. తెలుగు ప్రజల ఆత్మగౌరవం కోసం పోరాటం చేసిన ఎన్టీఆర్.. ఎప్పుడు ప్రజాశ్రేయస్సు కోసమే ఆరాటపడేవారని తెలిపారు. ఈ దేశంలో ఎన్టీఆర్ తెచ్చిన సంస్కరణలు మరెవరూ తీసుకురాలేదన్నారు. ఆయన తర్వాత పేదల కోసం పాటుపడిన వ్యక్తి దివంగత వైఎస్‌ రాజశేఖర్‌ రెడ్డి మాత్రమేనని కేశినేని పేర్కొన్నారు.

వీరిద్దరి బాటలో నడుస్తున్న వ్యక్తి ముఖ్యమంత్రి వైఎస్‌ జగన్ మోహన్ రెడ్డి అని.. వీళ్ళకంటే గొప్ప పేరు తెచ్చుకుంటున్నారని ప్రశంసలు కురిపించారు.. మరోవైపు టీడీపీ పై తీవ్ర విమర్శలు చేశారు.. చంద్రబాబు 2014లో గెలిచాక ఏవో అద్భుతాలు చేస్తాడని భావించాం.. కానీ, కేవలం తన కొడుకును ముఖ్యమంత్రిని చేయాలన్న కోరిక బలంగా పెంచుకొన్నాడని కేశినేని నాని విమర్శించారు..

మరోవైపు ఏపీలో రానున్న మూడు నెలల్లో జరుగనున్న అసెంబ్లీ, సాధారణ ఎన్నికలకు అన్ని పార్టీలు సమాయత్తం అవుతున్నాయి. గెలుపే లక్ష్యంగా కదుపుతున్న పావుల్లో అవకాశం దక్కని నాయకులు అంతే వేగంగా నిర్ణయాలు తీసుకొంటూ పక్క పార్టీలో పాగా వేస్తున్నారు. విజయవాడ (Vijayawada) పార్లమెంట్‌ నియోజకవర్గం నుంచి రెండుసార్లు టీడీపీ అభ్యర్థిగా పోటీచేసి గెలుపొందిన కేశినేని నాని (Kesineni Nani)కి ఈసారి టీడీపీ నుంచి టికెట్‌ ఇవ్వడం లేదనే సంకేతాలు అందడంతో వైసీపీలో చేరారు..

బాలయ్య(Balayya), చంద్రబాబు(Chandrababu)పై మాజీ మంత్రి, గుడివాడ ఎమ్మెల్యే(Gudiwada MLA) కొడాలి నాని(Kodali Nani) కీలక వ్యాఖ్యలు చేశారు. వెయ్యి మంది బాలయ్యలు, వెయ్యి మంది చంద్రబాబులు వచ్చినా జూనియర్ ఎన్టీఆర్ వెంట్రుక కూడా పీకలేరంటూ ఘాటు విమర్శలు చేశారు.

టీడీపీ వ్యవస్థాపక అధ్యక్షుడు, మాజీ ముఖ్యమంత్రి ఎన్టీ రామారావు 28వ వర్థంతి సందర్భంగా గుడివాడలోని ఎన్టీఆర్ స్టేడియంలో ఆయన నివాళులర్పించారు. హైదరాబాద్‌లోని ఎన్టీఆర్ ఘాట్‌ వద్ద ఫ్లెక్సీ వివాదంపై సీరియస్‌గా స్పందించారు. ఎన్టీఆర్ మానసిక వేదనతో చనిపోయారని, ఎన్టీఆర్ పనికి రాడన్న గజ దొంగ చంద్రబాబు అని ఆరోపించారు.

ఆ చంద్రబాబే ఇప్పుడు ఎన్టీఆర్ బూట్లు నాకుతున్నాడని దుయ్యబట్టారు. చంపిన వ్యక్తులే ఎన్టీఆర్‌ను పొగుడుతూ కీర్తిస్తున్నారని, టీడీపీ నేతలు ఓట్ల కోసం ఎన్టీఆర్ వర్థంతి కార్యక్రమాలు చేపడుతున్నారని విమర్శించారు. చంద్రబాబు ‘రా.. కదిలి రా’ అంటే రాజమండ్రి సెంట్రల్ జైలు చంద్రబాబుకు ఆహ్వానం పలుకుతుందని ఎద్దేవా చేశారు.

అల్లుడి నారా లోకేష్ కోసం జూనియర్ ఎన్టీఆర్ ఫ్లెక్సీలను బాలయ్య తొలగిస్తున్నారని ఫైర్ అయ్యారు. గతంలో పెద్ద ఎన్టీఆర్‌ను దించిన బాలయ్య ఇప్పుడు జూనియర్ ఎన్టీఆర్ ఫ్లెక్సీల మీద పడ్డారని ధ్వజమెత్తారు. హైదరాబాద్ ఎన్టీఆర్ ఘాట్‌లో బాలయ్య నివాళులర్పించిన అనంతరం జూనియర్ ఎన్టీఆర్ పేరుతో ఏర్పాటు చేసిన ఫ్లెక్సీలను తీసేయాలని బాలయ్య సూచించించారు. దీంతో ఈ వీడియో వైరల్ అవడంతో పెనుదుమారం రేపుతోంది.

అయోధ్య(Ayodhya)లో శ్రీరాముడి విగ్రహ ప్రాణప్రతిష్ఠాపన నేపథ్యంలో ఏపీలో ఈనెల 22న సెలవు ప్రకటించాలని బీజేపీ(BJP) రాష్ట్ర అధ్యక్షురాలు దగ్గుబాటి పురంధేశ్వరి(Daggubati Purandeswari) డిమాండ్ చేశారు. గురువారం ఆమె మీడియాతో మాట్లాడుతూ.. రామ మందిరం ప్రారంభం భారతీయుల శతాబ్దాల కల అని, దశాబ్దాల పోరాటమని వ్యాఖ్యానించారు.

ఇప్పటికే ఏపీలో సంక్రాంతి సెలవులను మరో మూడు రోజులు పొడిగిస్తూ ఏపీ ప్రభుత్వం నిర్ణయం తీసుకున్న సంగతి తెలిసిందే. దీంతో రాష్ట్రంలో ఈ నెల 22న పాఠశాలలు పునఃప్రారంభం కానున్నాయి.. అయితే, ఏపీలో 21వ తేదీ వరకు మాత్రమే సెలవు ప్రకటించారు.

22వ తేదీన దేశమంతా రామజపం చేస్తూ దాదాపు అన్ని రాష్ట్రాల్లో విద్యా సంస్థలు సెలవు ప్రకటించాయి. ఏపీలో మాత్రం అందుకు భిన్నంగా ఆ రోజు సెలవు ప్రకటించలేదని పురంధేశ్వరి దుయ్యబట్టారు. ఈ నెల 22వ తేదీన బాలరాముని విగ్రహ ప్రతిష్ట నిర్వహించబోతుంట.. 21వ తేదీ వరకు మాత్రమే జగన్ ప్రభుత్వం సెలవులు ఇవ్వడం వెనక దురుద్దేశం ఉందని అర్థం అవుతుందని విమర్శించారు.

రాజ్యాంగ నిర్మాత డాక్టర్ బీఆర్ అంబేద్కర్ విగ్రహావిష్కరణ వల్ల 21వ తేదీ వరకు సెలవు ఇవ్వడాన్ని బీజేపీ పక్షాన హర్షం వ్యక్తం చేస్తున్నామని చెప్పారు. అంబేద్కర్ ఆశయాలకు అనుగుణంగా అన్ని వర్గాల వారికి మోడీ చేయూతను ఇచ్చారని తెలిపారు. అయితే, 22న బాలరాముని ప్రతిష్ఠాపనను వీక్షించేందుకు దేశ ప్రజలంతా ఎదురు చూస్తోందని వెల్లడించారు.

ఏపీ డిప్యూటీ సీఎం(AP Deputy CM) నారాయణ స్వామి (Narayana Swamy) వ్యాఖ్యలు ఆసక్తికరంగా మారాయి. తనకు టికెట్ రాకపోతే ఆత్మాభిమానాన్ని చంపుకొని జ్ఞానేందర్ రెడ్డితో కలిసి పనిచేసేది లేదని తేల్చేశారు. కాపాడుకోవడానికి తనకేం ఆస్తులు, అంతస్తుల లేవని.. తనెవరికీ భయపడాల్సిన అవసరం లేదంటూ మండలనేతల సమావేశంలో నారాయణస్వామి చేసిన వ్యాఖ్యలు వైరల్‌గా మారాయి.

డిప్యూటీ సీఎం నారాయణస్వామి చిత్తూరు జిల్లాలోని గంగాధర నెల్లూరు అసెంబ్లీ నియోజకవర్గం నుంచి ప్రాతినిథ్యం వహిస్తున్నారు. అయితే ఆ నియోజకవర్గం నుంచి ఈసారి నారాయణరావుకు బదులుగా జ్ఞానేందర్ రెడ్డికి అధిష్టానం టికెట్ నిర్ణయించినట్లు వార్తలు వినిపిస్తున్నాయి. ఈ నేపథ్యంలో పుత్తూరు నివాసంలో ఆరు మండలాల నాయకులతో గురువారం ఆత్మీయ సమావేశం ఏర్పాటు చేయడం ప్రధాన్యతను సంతరించుకుంది.

ఆరు మండలాల నాయకులు, ప్రజాప్రతినిధుల అభిప్రాయాలను నారాయణస్వామి అడిగి తెలుసుకున్నారు. ఈ సమావేశంలో కొందరు నేతలు నారాయణస్వామి గురించి మాట్లాడుతూ భావోద్వేగానికి గురయ్యారు. టికెట్ ఇవ్వకపోతే కలిసి పనిచేసేది లేదంటూ తెగేసి చెప్పారు. డిప్యూటీ సీఎం అయిన నారాయణస్వామి పక్కన కుర్చీవేసుకుని దర్జాగా కూర్చునే స్వేచ్ఛ ఉందని, జ్ఞానేందర్ రెడ్డి దగ్గర ఆ పరిస్థితి ఉందని వైసీపీ నేతలు వాపోయారు.

అయితే, నారాయణ స్వామికి టికెట్ ఇవ్వకపోతే తమకు వైఎస్ఆర్ కాంగ్రెస్ పార్టీతో పని లేదని స్థానిక నేతలు, ఆయన అభిమానులు అంటున్నారు. మరికొందరు ఆత్మహత్య చేసుకుంటామని సంచలన వ్యాఖ్యలు చేస్తున్నారు. జ్ఞానేందర్ రెడ్డితో కలిసి వెళ్లే ప్రసక్తే లేదని తేల్చిచెబుతుండడంతో ఈ నియోజకవర్గంలో రాజకీయ చర్చ తారాస్థాయికి చేరుకుంది.