Category:

Politics

Find the latest Telugu news and political news in Andhra and Telangana in Telugu, తెలుగు రాజకీయ వార్తలు, పాలిటిక్స్ న్యూస్,

cm revanth reddy review on dharani portal

Revanth Reddy : నెలరోజుల పాలనపై రేవంత్ ట్వీట్..!!

by Venu January 7, 2024

written by Venu

రాష్ట్రంలో గత పదేళ్లుగా సాగిన కేసీఆర్ (KCR) పాలనపై, రేవంత్ రెడ్డి (Revanth Reddy) రోజు రోజుకు సంచలన నిర్ణయాలు తీసుకొంటున్న విషయం తెలిసిందే.. గత ప్రభుత్వం గొప్పగా చెప్పుకొన్న విద్యుత్, కాళేశ్వరం, ఆర్థిక ప్రగతి అంశాలలోని వైఫల్యాలపై ఫోకస్ పెట్టిన ప్రభుత్వం వీటిని ప్రజల్లోకి తీసుకెళ్ళే దిశగా అడుగులు వేస్తుంది. ఇలా పొగడ్తలు.. విమర్శల మధ్య రేవంత్ పాలనలో నెలరోజులు గడిచిపోయాయి.. అయితే నెల రోజుల పాలనపై సీఎం ట్వీట్‌ చేశారు.

తెలంగాణ (Telangana)లో బానిస సంకెళ్లను తెంచి, స్వేచ్ఛను పంచి జనం ఆకాంక్షలను నిజం చేస్తూ సాగిన ఈ నెల రోజుల ప్రస్థానం తృప్తినిచ్చిందని రేవంత్ పేర్కొన్నారు. సేవకులమే తప్ప పాలకులం కాదన్న మాట నిలబెట్టుకుంటూ… పాలనను ప్రజలకు చేరువ చేస్తూ… అన్నగా నేనున్నానని హామీ ఇస్తూ జరిగిన నెల రోజుల ప్రయాణం కొత్త అనుభూతిని ఇచ్చిందన్నారు.

పేదల గొంతుక వింటూ… యువత భవితకు దారులు వేస్తూ… మహాలక్ష్మిలు మన ఆడబిడ్డల మొఖంలో ఆనందాలు చూస్తూ… రైతుకు భరోసా ఇస్తూ… సాగిన నెల రోజుల నడక ఉజ్వల భవిత వైపునకు అడుగులు వేస్తోందని రేవంత్ రెడ్డి వివరించారు. పెట్టుబడులకు కట్టుబడి ఉన్నామంటూ… పారిశ్రామిక వృద్ధికి పెద్దపీట వేస్తూ… నగరాల అభివృద్ధికి నగిషీలు చెక్కుతూ… మత్తులేని ఛైతన్యపు తెలంగాణ కోసం గట్టి పట్టుదలతో సాగిన ఈ నెల రోజుల పాలన బాధ్యతగా సాగిందని చెప్పారు.

రేవంతన్నగా నన్ను గుండెల్లో పెట్టుకొన్న తెలంగాణ గుండెల్లో శాశ్వతంగా నిలిచిపోయేలా ఇక ముందు కూడా నా బాధ్యత నిర్వర్తిస్తానని హామీ ఇస్తున్నట్టు రేవంత్ చేసిన ట్వీట్ సోషల్ మీడియా (Social Media)లో వైరల్ గా మారింది. మరోవైపు అసెంబ్లీ ఎన్నికల్లో గెలిచిన జోష్ తో, పార్లమెంట్ ఎన్నికలకు కాంగ్రెస్ (Congress) సిద్దం అవుతోంది. ఎలాగైనా విజయాన్ని సొంతం చేసుకోవాలని వ్యూహాలు రచిస్తుంది. ఇక తెలంగాణలో ఆరు హామీలు పూర్తిగా అమలు చేసే దిశగా మంత్రులు కసరత్తు చేస్తున్నట్టు తెలుస్తోంది.

January 7, 2024 0 comment

Assembly Results: Congress is strong in Telangana.. big victory in two places..!

Politics Telangana Viral

Hanumakonda : ఆరు గ్యారెంటీలకు శివయ్య దరఖాస్తు.. సోషల్ మీడియాలో వైరల్..!!

by Venu January 7, 2024

written by Venu

రాష్ట్రంలో కాంగ్రెస్ (Congress) ప్రభుత్వం ప్రతిష్టాత్మకంగా చేపట్టిన ప్రజా‌పాలన కార్యక్రమానికి ప్రజల నుంచి భారీగా స్పందన వస్తున్న విషయం తెలిసిందే.. ఆరు గ్యారెంటీలకు అప్లై చేసుకునేందుకు జనం పంచాయతీ కార్యాలయాల వద్దకు భారీగా వచ్చారు.. అయితే ఈ అంశంపై ప్రతిపక్షాలు విమర్శలు చేస్తున్నారు.. ఆన్ లైన్ ద్వారా అప్లికేషన్స్ స్వీకరించవలసింది పోయి.. ఇలా మ్యాన్యువల్ గా దరఖాస్తులను తీసుకోవడం.. ఇందుకోసం జనాన్ని రోడ్డెక్కించడం ఎంటనే వాదనలు వినిపిస్తున్నాయి..

మరోవైపు సందట్లో సడేమియాలా ఎవరో ఒక ఆకతాయి ఆరు గ్యారెంటీల అప్లికేషన్స్ లో, శివుడి పేరిట దరఖాస్తు చేసినట్టు అధికారులు గుర్తించారు.. హనుమకొండ (Hanumakonda) జిల్లా భీమదేవరపల్లి (Bhimadevarapalli) మండలం ముత్తారం (Muttaram) గ్రామంలో ఈ విచిత్ర సంఘటన చోటుచేసుకుంది. ఏకంగా పరమ శివుడి పేరిట దరఖాస్తు ప్రజా పాలనలో అధికారులకు అందింది.

అందులో అర్జీదారు శివుడు కాగా, కుంటుంబ వివరాల కాలమ్‌లో భార్య పార్వతి, కుమారుల పేర్లు కుమార స్వామి, వినాయకుడు అని రాసి ఉంది. ఇది ఎవరో కావాలనే చేసినట్టు క్షుణంగా అర్థం అవుతోంది. అయితే అప్లికేషన్స్ స్వీకరణ నామమాత్రంగా జరుగుతుందనే ఆరోపణలు వినిపిస్తున్న నేపథ్యంలో.. ఈ ఘటన నిజమని నిరూపించిందనే విమర్శలు వినిపిస్తున్నాయి.. దరఖాస్తులను పరిశీలించి తీసుకొంటే.. ఇలా చేసిన వారు దొరికేవారు కదా అనుకొంటున్నారు..

మరోవైపు దరఖాస్తు ఫారం సోషల్ మీడియాలో వైరల్ అవుతోంది. నెటిజన్లు రకరకాల కామెంట్స్ చేస్తున్నారు.. మరికొందరైతే హిందూ దేవతలను ఇలా నవ్వులపాలు చేయడం సరికాదని మండిపడుతున్నారు.. ఇది ఖచ్చితంగా కావాలని చేసిన పనిగా పేర్కొంటున్నారు..

January 7, 2024 0 comment

National Politics

PM Sheikh Hasina : భారత్‌పై కీలక వ్యాఖ్యలు చేసిన బంగ్లా పీఎం హసీనా..!!

by Venu January 7, 2024

written by Venu

బంగ్లాదేశ్‌లో సార్వత్రిక ఎన్నికల పోలింగ్‌ ప్రారంభమైంది. ఈ క్రమంలో ప్రధాని షేక్‌ హసీనా (PM Sheikh Hasina) తమ ఓటుహక్కు వినియోగించుకున్నారు. అనంతరం పలు కీలక వ్యాఖ్యలు చేశారు.. భారత్‌ వంటి నమ్మకమైన మిత్రదేశం ఉండటం తమ అదృష్టంగా పేర్కొన్నారు.. బంగ్లాదేశ్‌ (Bangladesh) విముక్తి పోరాటంలో భారతీయులు (Indians) తమకు అండగా ఉన్నారని గుర్తు చేశారు..

దేశాభివృద్ధికి ప్రజాస్వామ్యం ఎంతో కీలకమన్న ప్రధాని.. 2009 నుంచి 2023 వరకు తాము అధికారంలో ఉండటం వల్లే బంగ్లాదేశ్‌ ఈ స్థాయికి చేరుకుందని వివరించారు.. బంగ్లాదేశ్‌ సార్వభౌమ, స్వాతంత్య్ర దేశం ఇక్కడ జనాభా చాలా ఎక్కువని అన్నారు.. తాము ప్రజల ప్రజాస్వామ్య హక్కులను వ్యవస్థాపితం చేశాం. అది సజావుగా కొనసాగాలని కోరుకుంటున్నట్టు తెలిపారు.. లేదంటే దేశాభివృద్ధి సాధ్యం కాదన్నారు..

బంగ్లాదేశ్‌ లో ప్రజలు నిర్భయంగా ఓటువేసే వాతావరణాన్ని కల్పించామని తెలిపిన షేక్‌ హసీనా.. ఈ సందర్భంగా భారత్‌కు ధన్యవాదాలు తెలిపారు. మరోవైపు 1975 లో జరిగిన విముక్తి పోరాటం (Liberation War) లో హసీనా తన కుటుంబం మొత్తాన్ని కోల్పోయారు. దీంతో ఆమె చాలా కాలం పాటు భారత్‌లో జీవించారు. అనంతరం బంగ్లాదేశ్‌కు వెళ్లిన హసీనా.. అవామీ లీగ్‌ పార్టీ బాధ్యతలు స్వీకరించారు.

మరోవైపు బంగ్లాదేశ్‌ లో ఉన్న 300 నియోజకవర్గాల్లో పోలింగ్‌ కొనసాగుతోంది. సాయంత్రం 5 గంటలకు ఓటింగ్‌ ముగియనున్నది. కాగా ఈ ఎన్నికల్లో 27 పార్టీలకు చెందిన 1500 మంది అభ్యర్థులతో పాటు 436 మంది స్వతంత్రులు బరిలో నిలిచారు. సుమారు 11.96 కోట్ల మంది ఓటర్లు తమ ఓటుహక్కు వినియోగించుకోనున్నారు. వారిలో 1.5 కోట్ల మంది మొదటిసారి ఓటువేస్తున్నారు. ఇక ఎన్నికల ఫలితాలు ఈ నెల 8న వెలువడనున్నాయి.

January 7, 2024 0 comment

Hyderabad Politics Telangana

Telangana : రాష్ట్రంలో కాంగ్రెస్ ప్రభుత్వాన్ని కూల్చే కుట్ర.. రేవంత్ హెచ్చరిక..!?

by Venu January 7, 2024

written by Venu

రాజకీయం ఎప్పుడైతే ఊసరవెల్లిలా రంగులు మార్చడం మొదలు పెట్టిందో.. అప్పుడే ప్రజాసేవ పేరు కాస్త.. స్వార్థ సేవగా మారిందని అంటున్నారు.. ప్రస్తుత పరిస్థితుల్లో దోచుకో, దాచుకో అనే తీరుగా రాజకీయాలు సాగుతున్నాయనే ఆరోపణలున్నాయి.. ఈ పార్టీ ఇంత దోచుకోంది అని చెప్పడం కంటే.. యావత్ రాష్ట్ర ప్రజలకు తెలిసిందే.. ఎవరు దోచుకుని ఆర్థికంగా బలిసిపోయారో అని లోలోపల అనుకుంటున్నారు..

ఇక రాష్ట్రంలో బీఆర్ఎస్ (BRS) పాలన గురించి చర్చలు ఆగడం లేదు.. ఇందుకు కారణాలున్నాయని అంటున్నారు.. కాంగ్రెస్ (Congress) అధికారంలోకి వచ్చాక సమన్వయంతో పాలనకు సహకరించ వలసింది పోయి.. ఎప్పుడెప్పుడు ప్రభుత్వాన్ని కూల్చి అధికారంలోకి వద్దామా అనే కుట్రలు జరుగుతున్నట్టు ఆరోపణలు వస్తున్నాయి.. అధికారం లేకుంటే.. బ్రతుకు అంధకారమే అనే తీరుగా బీఆర్ఎస్ నేతలు వ్యవహరిస్తున్నట్టు విమర్శలు రోజు రోజుకు ఎక్కువగా వినిపిస్తున్నాయి..

అయితే ఆనతి కాలంలో కాంగ్రెస్ లో ఉప్పెనలా మారి సీఎం పీఠాన్ని దక్కించుకొన్న రేవంత్ వ్యూహాలు సైతం తక్కువగా అంచనా వేయడానికి లేదంటున్నారు.. అదీగాక బీఆర్ఎస్ నేతల తీరుపై అసహనాన్ని వ్యక్తం చేస్తున్న రేవంత్ రెడ్డి (Revanth Reddy).. గులాబీ పై పగతీర్చుకోవడం కంటే.. రాష్ట్రాన్ని ఆర్థిక కష్టాల నుంచి గట్టెక్కించి.. కాంగ్రెస్ ప్రభుత్వంపై ప్రజల్లో నమ్మకాన్ని పెంచే ప్రయత్నంలో ఉన్నట్టు టాక్ వినిపిస్తుంది. కానీ తమ ఎమ్మెల్యేలతో ఫిరాయింపులపై చర్చలు ప్రారంభిస్తే మాత్రం…సీన్ మారిపోతుందని హెచ్చరించినట్టు తెలుస్తోంది.

మరోవైపు కాంగ్రెస్ ప్రభుత్వం ఏర్పడి నెల రోజులు కాక ముందు నుంచే బీఆర్ఎస్ నేతలు పెద్ద ఎత్తున బెదిరింపులకు దిగుతున్నట్టు ప్రచారం జరుగుతోంది. రాష్ట్రంలో కాంగ్రెస్ ప్రభుత్వం ఆరు నెలలు మాత్రమే ఉంటుందని ఆరోపణలు చేయడం.. తెర వెనుక ఏమైనా జరుగుతున్నాయన్నట్లుగా వారి మాటలు ఉన్నాయనే చర్చలు రాజకీయాల్లో మొదలైయ్యాయి..

ఇలాంటి పరిస్థితుల్లో లోక్‌సభ ఎన్నికల (Lok Sabha Elections) తర్వాత జరిగే పరిణామాలు ఎలా ఉంటాయన్నదానిపై రేవంత్ రెడ్డి క్లారిటీగా ఉన్నట్టు తెలుస్తోంది. కాంగ్రెస్ పది స్థానాలు గెలిస్తే.. ప్రభుత్వాన్ని కూల్చే ప్రయత్నాలు ఎవరూ చేయలేరని భావిస్తున్నట్టు సమాచారం.. కానీ బీజేపీ, బీఆర్ఎస్ కలిసే ప్రయత్నాలు చేస్తున్నాయని, తమ వ్యూహాలు తమకు ఉన్నాయంటున్నారు హస్తం నేతలు..

January 7, 2024 0 comment

Crime Politics Telangana Viral

Hanumakonda : ఉద్యోగానికి ఎసరు పెట్టిన లంచం.. సస్పెండ్ అయిన ట్రాఫిక్ ఎస్సై.. వీడియో వైరల్..!!

by Venu January 6, 2024

written by Venu

లంచం అనేది నేటికాలంలో సర్వసాధారణంగా మారిందనే ఆరోపణలున్నాయి.. సంపాదనపై ఆశపెంచుకొన్న ప్రభుత్వంలో పనిచేసే కొందరి వల్ల ఆ వ్యవస్థకు చెడ్డపేరు వస్తున్న సంగతి తెలిసిందే.. అయినా లంచం ముట్టచెప్పనిదే కొన్ని డిపార్ట్ మెంట్లల్లో పనులు కావన్న విషయం జగం ఎరిగిన సత్యం.. జనం తెలుసుకొన్న వాస్తవం అని అంటున్నారు..

లంచం విషయంలో నియమాలు ఎంత కఠినంగా అమలు చేయాలని చూస్తున్న లంచానికి అలవాటు పడిన చేతులు ఊరికే ఉండటం లేదంటున్నారు.. ఈ క్రమంలో ట్రాఫిక్ ఎస్సైగా విధులు నిర్వర్తిస్తున్న ఒక వ్యక్తి లంచం తీసుకొంటూ అడ్డంగా బుక్కైన సంఘటన హనుమకొండ (Hanumakonda)లో చోటు చేసుకొంది. డ్రైవింగ్ లైసెన్స్ లేని యువకుల దగ్గరి నుంచి లంచం తీసుకొంటుండగా కెమెరాకు కంటికి చిక్కాడు సదరు ప్రభుద్ధుడు..

హనుమకొండ ట్రాఫిక్ ఎస్సై (Traffic SI)గా పని చేస్తున్న డేవిడ్ అనే వ్యక్తి.. విధుల్లో భాగంగా.. ములుగు రోడ్ (Mulugu Road) వద్దకు చెకింగ్ కు వెళ్లాడు. ఈ క్రమంలో బండి పై వస్తున్న ఇద్దరు వ్యక్తులను ఆపి, లైసెన్స్ అడిగాడు. ఆ ఇద్దరు లేదని చెప్పడంతో, తనలోని లంచగొండిని బయటకి రప్పించాడు.. డబ్బులు డిమాండ్ చేశాడు. అయితే ఈ తతంగాన్ని స్థానికంగా ఉన్న బిల్డింగ్ పై నుంచి ఓ వ్యక్తి వీడియో తీశాడు..

ఆ వీడియోను సోషల్ మీడియా (Social Media)లో పోస్టు చేయడంతో.. క్షణాల్లోనే వైరల్ గా మారింది. ఆ నోట ఈ నోట విషయం కాస్త వరంగల్ పోలీస్ కమిషనర్ అంబర్ కిశోర్ ఝా దాక వెళ్లింది. అంతే ఆ ట్రాఫిక్ ఎస్సైపై చర్యలకు దిగారు పోలీస్ కమిషనర్.. అతన్ని సస్పెండ్ చేస్తున్నట్టు ఉత్తర్వులు జారీ చేశారు. ఆయనకు సహకరించిన తోటి సిబ్బంది పై విచారణ చేపట్టారు.

January 6, 2024 0 comment

Politics Telangana

Jupally Krishna Rao : అభివృద్ధి పేరుతో చేసిన అప్పులు ఎక్కడ ఉపయోగించారు..?

by Venu January 6, 2024

written by Venu

తెలంగాణ (Telangana) రాష్ట్ర ఆర్థిక వ్యవస్థపై విమర్శలు ఆగడం లేదు.. ఇచ్చిన హామీల సంగతి ఏంటని బీఆర్ఎస్ (BRS) నేతలు ప్రభుత్వాన్ని ప్రశ్నిస్తుండగా.. రాష్ట్రాన్ని అప్పుల పాలు చేసి అడ్డగోలుగా సంపదను దోచుకొన్నారని కాంగ్రెస్ (Congress) నేతలు మండిపడుతున్నారు.. ఇప్పటికే పలువురు మంత్రులు గులాబీ పాలనపై గుర్రుగా ఉన్నారు.. ఈ క్రమంలో ఎక్సైజ్ పర్యాటక శాఖ మంత్రి జూపల్లి కృష్ణారావు సంచలన వ్యాఖ్యలు చేశారు.

బీఆర్ఎస్ తన పదేళ్ల పాలనలో గ్రామాలు, తండాల్లో సరైన సౌకర్యాలు కలిపించడంలో విఫలం అయ్యిందని జూపల్లి ఆరోపించారు.. ఇప్పటి వరకు ఎల్లారం తండాకు ఎమ్మెల్యే, ఎంపీ వచ్చినా దాఖలాలు లేవని ఫైర్ అయ్యారు. గూగుల్ మ్యాప్ లో ఈ తండా పేరే లేదని తెలుపుతున్నట్టు వెల్లడించారు. అభివృద్ధి పేరుతో అప్పులు చేసిన గత ప్రభుత్వం వాటన్నింటిని ఎక్కడ ఉపయోగించిందో తెలుపాలని డిమాండ్ చేశారు..

రాష్ట్ర ఆదాయం పెరగాలి కానీ, కల్వకుంట్ల ఫ్యామిలీ ఆదాయం మాత్రం పదేళ్ళలో ఎలా మించి పోయిందో తెలుపాలంటూ జూపల్లి ప్రశ్నించారు.. కాగా చారిత్రాత్మక కౌలాస్ కోటను జూపల్లి కృష్ణారావు (Jupally Krishna Rao) సందర్శించారు. ఎంతో ప్రసిద్ధి చెందిన కౌలాస్ కోటను (Kowlas Fort) అభివృద్ధి చేస్తామని ఈ సందర్భంగా మంత్రి తెలిపారు. దీనిపై ప్రతిపాదనలు రూపొందించి, నివేదిక సమర్పించాలని జిల్లా కలెక్టర్, సంబంధిత అధికారులను ఆదేశించారు.

కాంగ్రెస్ ఇచ్చిన ఆరు గ్యారంటీలను అమలు చేసి తీరుతామని హామీ ఇచ్చారు. ప్రజలు ప్రభుత్వ కార్యాలయాల చుట్టూ తిరగకుండా… ప్రజల వద్దకు పాలన తెచ్చామని క్లారిటీ ఇచ్చారు. కాంగ్రెస్ ప్రభుత్వం అధికారంలోకి వచ్చిన వెంటనే సీఎం రేవంత్ రెడ్డి రెండు హామీలను అమలు చేశారని తెలిపారు.. అయితే దశల వారీగా మిగితా హామీలను అమలు చేస్తామన్నారు.

January 6, 2024 0 comment

Hyderabad OFF Beat Politics Technology Telangana

Hyderabad : ఫార్ములా-ఈ రేసింగ్ తో ఆర్థిక వ్యవస్థకు లాభం ఉందా..?

by admin January 6, 2024

written by admin

– నగరంలో ఫార్ములా-ఈ రేస్ మంటలు
– హైదరాబాద్ బ్రాండ్ డ్యామేజ్ చేస్తున్నారని బీఆర్ఎస్ విమర్శలు
– ఇది తిరోగమనమన్న మాజీ మంత్రి కేటీఆర్
– అసలు, ఈ రేసింగ్ తో లాభం ఉందా..?
– ఇప్పటిదాకా ఏమన్నా పెట్టుబడులు వచ్చాయా?

హైదరాబాద్ (Hyderabad) లో ఫార్ములా-ఈ రేస్ (Formula E Race 2024) సీజ‌న్ 10కు చెందిన రేస్ ఫిబ్ర‌వ‌రిలో జ‌ర‌గాల్సి ఉంది. అయితే ఈ రేస్‌ ను ర‌ద్దు చేస్తున్న‌ట్లు నిర్వాహ‌కులు ప్ర‌క‌టించారు. ప్ర‌భుత్వానికి చెందిన మున్సిప‌ల్ శాఖ‌.. హోస్ట్ సిటీ ఒప్పందాన్ని ఉల్లంఘించిన‌ట్లు తెలిపారు. గ‌త ఏడాది అక్టోబ‌ర్ 30వ తేదీ జ‌రిగిన ఒప్పందాన్ని మున్సిప‌ల్ శాఖ ఉల్లంఘించిన‌ట్టు ప్రకటనలో పేర్కొన్నారు. అందుకే ఫార్ములా-ఈ రేస్‌ ను ర‌ద్దు చేస్తున్న‌ట్లు తెలిపారు. ఈ మేరకు మున్సిప‌ల్ శాఖకు నోటీసులు కూడా పంపారు. హోస్ట్ సిటీ అగ్రిమెంట్ చ‌ట్టాల ప్ర‌కారం చ‌ర్య‌లు తీసుకోనున్న‌ట్లు ఎఫ్ఈవో ప్రకటించింది. అయితే.. ఈ రేస్ ఎలా మొదలైంది? పెట్టుబడుల అంశంలో జరుగుతున్న వివాదంలో నిజమెంత..? ఇలా అనేక అంశాలపై చర్చ జరుగుతోంది.

నగరంలో ఎలా మొదలైంది..?

ఫార్ములా రేస్… ఎప్పుడైతే మంత్రి కేటీఆర్‌ అధ్యక్షతన మేనేజింగ్‌ కమిటీ ఏర్పాటైందో.. ఆనంద్ మహీంద్రా, దిల్‌ బాగ్‌ డిల్‌, ఉన్నతాధికారులు, బ్రాండ్ అంబాసిడర్స్‌, నిపుణులు సభ్యులు అయ్యారో.. అప్పటి నుంచి దీనిపై తెలంగాణ వ్యాప్తంగా చర్చ మొదలైంది. ఫార్ములా-ఈ సంస్థ ఈ ప్రిక్స్‌, మున్సిపల్ అడ్మినిస్ట్రేషన్ అర్బన్ డెవలప్‌ మెంట్ డిపార్ట్‌మెంట్లతో కలిసి 2023 అక్టోబర్ 30న రేసింగ్‌ కు సంబంధించి ఒప్పందం చేసుకున్నారు. 2024 ఫిబ్రవరిలో ఫార్ములా-ఈ రేసింగ్ ప్రపంచ ఛాంపియన్ షిప్ కు ప్లాన్ చేశారు. ఈ పోటీలకు సన్నాహకంగా గతేడాది అక్టోబర్ లో ఎఫ్-1 రేస్ నిర్వహించారు. అంతర్జాతీయ ప్రమాణాలతో ట్రాక్ నిర్మాణం జరిగింది. ఆ సమయంలో హైదరాబాద్ పేరు మార్మోగింది. సినీ, క్రీడా ప్రముఖులు ఈ ఈవెంట్ ను చూసేందుకు తరలివచ్చారు.

చంద్రబాబు హయాంలోనే అడుగులు

గతేడాది హైదరాబాద్‌ లో రేస్ జరిగితే.. ప్రపంచ వ్యాప్తంగా ఉన్న రేసర్లు వచ్చి పాల్గొన్నారు. వేల రూపాయలు టికెట్ ధర పెట్టినా వీక్షకులు పోటెత్తారు. అయితే.. ఫార్ములా రేస్ నిర్వహణకు చంద్రబాబు హయాంలోనే అడుగులు పడ్డాయి. 1995-2004 మధ్య ఉమ్మడి రాష్ట్ర ముఖ్యమంత్రిగా చంద్రబాబు ఉన్నారు. అప్పట్లోనే ఈ క్రీడ ఔన్నత్యాన్ని గుర్తించారు. దీని వల్ల టూరిజం అభివృద్ధి జరుగుతుందని.. హైదరాబాద్ బ్రాండ్ ఇమేజ్ పెరుగుతుందని.. తద్వారా ఆంధ్రప్రదేశ్ పేరు మార్మోగుతుందని భావించారు. ఎఫ్-1 రేస్ నిర్వహణ కోసం.. రంగారెడ్డి జిల్లాలో 3 వేల ఎకరాలు భూమిని కూడా కేటాయించారు. అయితే.. ఇది వాస్తవ రూపంలో అమలులోకి వచ్చేలోపే సాధారణ ఎన్నికలు రావడం.. ఆయన ఓడిపోవడం జరిగాయి. కాంగ్రెస్ ప్రభుత్వం వచ్చాక.. ఆ భూకేటాయింపును రద్దు చేశారు.

రూ.650 కోట్ల ప్రయోజనం.. నిజమేనా?

ఈ రేసింగ్ ఈవెంట్‌ ను ప్రపంచంలో 12 దేశాలు మాత్రమే నిర్వహిస్తున్నాయి. అందులో భారత్ కూడా చేరుతుందని అంతా అనుకున్నారు. కానీ, ఇప్పుడది జరగలేదు. రేస్ మెక్సికోకు తరలిపోయింది. హైదరాబాద్‌ కి బదులుగా హాంకుక్ మెక్సికో సిటీలో ఈ రేస్ నిర్వహించనున్నట్లు ఫార్ములా సంస్థ తెలిపింది. సీజ‌న్ 10 రేస్‌ లు జ‌ర‌గ‌నున్న న‌గ‌రాల్లో టోక్యో, షాంఘై, బెర్లిన్‌, మొనాకో, లండ‌న్ న‌గ‌రాలు ఉన్నాయి. ఈనెల 13వ తేదీ నుంచి ఈ సీజ‌న్ ప్రారంభం కానుంది. మెక్సికోలోని హాంకూక్‌ లో తొలి రేస్ జరుగుతుంది. లాస్ట్ ఇయర్ జ‌రిగిన ప్రారంభోత్సవ రేస్ చాలా స‌క్సెస్ అయ్యింద‌ని, ఆ రేస్ వ‌ల్ల హైదరాబాద్ లో సుమారు 84 మిలియ‌న్ల డాల‌ర్ల (రూ.650 కోట్లు) ఆర్థిక ప్ర‌గ‌తి జ‌రిగింద‌ని ఫార్ములా-ఈ సీఈవో జెఫ్ డోడ్స్ తెలిపారు. దీన్ని బీఆర్ఎస్ ప్రభుత్వం కూడా ప్రమోట్ చేసింది. తాజాగా ఇదే విషయాన్ని గుర్తు చేస్తూ మంత్రి కేటీఆర్ ట్వీట్ చేశారు.

కాంగ్రెస్ ను బూచిగా చూపిస్తున్నారా?

ఫార్ములా-ఈ రేసు రద్దు కావడంతో మాజీ మంత్రి కేటీఆర్‌ ఫైరయ్యారు. ఇది నిజంగా కాంగ్రెస్ ప్రభుత్వం తీసుకున్న దుర్మార్గమైన, తిరోగమన నిర్ణయమని అన్నారు. హైదరాబాద్ ఈ-ప్రిక్స్ వంటి ఈవెంట్‌ లు ప్రపంచవ్యాప్తంగా మన నగరం దేశం బ్రాండ్ ఇమేజ్‌ ను పెంచుతాయని తెలిపారు. ప్రపంచంలో హైదరాబాద్‌ ను ఆకర్షణీయమైన పెట్టుబడి గమ్యస్థానంగా చూపించడానికి, ఔత్సాహికులు, తయారీదారులు స్టార్టప్‌ లను ఆకర్షించడానికి ఫార్ములా రేసును ఓ సాధనంగా చేసుకున్నట్టు వెల్లడించారు. నగరానికి 650 కోట్ల ప్రయోజనం జరిగిందని తెలిపారు. అలాంటి ప్రయత్నాన్ని కాంగ్రెస్ ప్రభుత్వం వృధా చేస్తోందని ఆవేదన వ్యక్తం చేశారు. కేటీఆర్ ట్వీట్ తో బీఆర్ఎస్ శ్రేణులు కాంగ్రెస్ సర్కార్ ను టార్గెట్ చేస్తున్నారు. బ్రాండ్ హైదరాబాద్ కు ఇది భారీ దెబ్బగా అభివర్ణిస్తున్నారు. కాంగ్రెస్ నిర్ణయం దురదృష్టకరమని.. బెంగళూరు కోసం బ్రాండ్ హైదరాబాద్ ని స్కాంగ్రెస్ నాశనం చేస్తోందని విమర్శలు చేస్తున్నారు.

కేటీఆర్ కు ఎదురవుతున్న కౌంటర్లు

రాష్ట్ర ఆర్థిక పరిస్థితి దారుణంగా ఉందంటూ ఇప్పటికే కాంగ్రెస్ ప్రభుత్వం శ్వేతపత్రి విడుదల చేసింది. దీనివల్ల పెట్టుబడులు వెనక్కి పోతాయని బీఆర్ఎస్ విమర్శలు చేసింది. ఇప్పుడు మరోసారి ఫార్ములా-ఈ రేస్ రద్దును అడ్డుగా పెట్టుకుని ఎటాక్ చేస్తోంది. ఈ నేపథ్యంలో కాంగ్రెస్ శ్రేణులు కూడా రంగంలోకి దిగారు. ఒక కార్ రేస్ కి సిటీ బ్రాండ్ కి ఏం సంబంధమని ప్రశ్నిస్తున్నారు. అలా అయితే ఒలంపిక్స్ ని ఎక్కువ సార్లు(3 సార్లు) హోస్ట్ చేసింది అమెరికా, యూకే… అలాంటప్పుడు యూకే కూడా ఎకానమీ వారీగా ధనిక దేశంగా ఉండాలిగా.. అమెరికా ఫస్ట్ లో ఉంటే యూకే ఆరోస్థానంలో ఎందుకుందని ప్రశ్నిస్తున్నారు. కొందరైతే.. ఫార్మాలా రేస్, పబ్స్ అభివృద్ధికి చిహ్నాలు కాదంటూ కామెంట్లు పెడుతున్నారు. ముందు గ్రామాల్లో అభివృద్ధి బాటలు వేయాలని.. సమస్యలతో ప్రజా భవన్ కు వస్తున్న జనం కన్నీళ్లను ఓసారి చూడండి అంటూ ఎదురుదాడి చేస్తున్నారు. ఈ సందర్భంగా కేటీఆర్ కావాలనే డ్రామా చేస్తున్నారని హస్తం శ్రేణులు మండిపడుతున్నారు. రేసింగ్ జరగకపోవచ్చని గతేడాది సెప్టెంబర్ లోనే హిందూ పత్రిక సహా మీడియాలో కథనాలు వచ్చాయని.. దానికి సంబంధించిన ఫోటోలను పోస్ట్ చేస్తున్నారు. ప్రజలను తప్పుదోవ పట్టిస్తూ.. కాంగ్రెస్ ను బూచిగా చూపించే ప్రయత్నం చేస్తున్నారని ఫైరవుతున్నారు.

January 6, 2024 0 comment

Featured Hyderabad Politics Telangana

Telangana : టార్గెట్ 10.. సంక్రాంతి తర్వాత సమరం.. ‘రాష్ట్ర’ ప్రత్యేక కథనం

by admin January 6, 2024

written by admin

– పార్లమెంట్ ఎన్నికలపై పార్టీల సన్నాహాలు
– అత్యధిక ఎంపీ సీట్లే లక్ష్యంగా వ్యూహాలు
– రెండు రోజులపాటు బీజేపీ రాష్ట్ర స్థాయి సమావేశాలు
– సంక్రాంతి తర్వాత మరింత స్పీడ్
– కాంగ్రెస్, బీఆర్ఎస్ ను ఎలా ఎదుర్కోబోతోంది?
– ఓట్ షేర్ ను ఇంకా పెంచుకునే అంశాలేవి?
– హామీలనే నమ్ముకున్న కాంగ్రెస్
– ఇప్పుడున్న 3 సీట్లను 10కి పెంచాలని ప్లాన్
– బీఆర్ఎస్ ఆశలు నెరవేరుతాయా?
– ఉన్న 9 స్థానాల్లో గెలిచేవెన్ని..?
– సన్నాహక సమావేశాలతో ఇప్పటికే బిజీ
– జాతీయ అంశాలే ప్రధానంగా ఉండే లోక్ సభ ఎన్నికలు
– అధికారంలో లేని బీఆర్ఎస్ ప్రభావమెంత?

తెలంగాణ (Telangana) లో మరో ఎన్నికల యుద్ధం రెండు నెలల్లో జరగనుంది. అసెంబ్లీ రేస్ లో కాంగ్రెస్ (Congress) ముందు నిలవగా.. బీఆర్ఎస్ (BRS), బీజేపీ (BJP) వెనుకబడ్డాయి. ఇప్పుడు పార్లమెంట్ రేస్ మొదలవుతోంది. ఈ నేపథ్యంలో పార్టీల గెలుపు వ్యూహాలు ఎలా ఉండబోతున్నాయనేది ఇంట్రస్టింగ్ గా మారింది. జాతీయ అంశాలు ప్రధానంగా ఉండే లోక్ సభ సమరంలో ప్రాంతీయ పార్టీల హవా తక్కువగానే ఉంటుంది. అదీగాక బీఆర్ఎస్ ఇప్పుడు ఓటమి పాలైంది. ఈ పరిస్థితుల్లో బీజేపీ, కాంగ్రెస్ ను తట్టుకుని నిలబడుతుందా? లేదా? అనేది ఇంట్రస్టింగ్ గా మారింది. అధికారంలో ఉన్న కాంగ్రెస్, ఓట్ షేర్ పెంచుకున్న బీజేపీ సత్తా చాటాలని వ్యూహాల్లో ఉన్నాయి.

ప్రక్షాళన దిశగా బీజేపీ

లోక్‌ సభ ఎన్నికలే లక్ష్యంగా బీజేపీ ముందే అలర్ట్ అయింది. ఇప్పటికే అగ్రనేత అమిత్ షా రాష్ట్రానికి వచ్చి.. ఎలా ముందుకెళ్లాలనే దానిపై దిశానిర్దేశం చేసి వెళ్లారు. ప్రస్తుతానికి 4 స్థానాల్లో ఉన్న కమలం పార్టీని డబుల్ డిజిట్ కు తీసుకెళ్లాలని సూచించారు. మొత్తం 17 సీట్లలో కచ్చితంగా 10 సీట్లు, 35 శాతం ఓటు బ్యాంకును సాధించాలనే లక్ష్యాన్ని నిర్ధేశించారు. ఈ నేపథ్యంలో రాష్ట్ర నాయకత్వం గ్రామస్థాయిలో కేంద్ర పథకాల ప్రచారానికి శ్రీకారం చుట్టింది. ఇదే క్రమంలో ఆదివారం నుంచి రెండు రోజుల పాటు బీజేపీ ముఖ్యనేతల కీలక సమావేశం జరుగనుంది. తెలంగాణ బీజేపీ చీఫ్ కిషన్‌ రెడ్డి అధ్యక్షతన జరగనున్న ఈ భేటీలో రాష్ట్ర నేతలు పాల్గొననున్నారు. నేతల మధ్య వచ్చిన దూరంపై బీజేపీ జాతీయ నాయకత్వం ప్రధానంగా దృష్టి సారించింది. సమన్వయం చేసే బాధ్యతను కిషన్ రెడ్డికి అప్పగించింది. పార్లమెంట్ ఎన్నికలకు అభ్యర్థులు, అనుసరించాల్సిన వ్యూహంపై ఈ భేటీలో చర్చించనున్నారు నేతలు. మెజారిటీ పార్లమెంట్ స్థానాల్లో గెలుపే లక్ష్యంగా సమావేశం జరుగనుంది. సంక్రాంతి తర్వాత కొన్ని జిల్లాల అధ్యక్షులను మార్చాలని కిషన్‌ రెడ్డి భావిస్తున్నట్లు తెలుస్తోంది. ముఖ్య నేతల సమావేశం తర్వాత పార్టీ ప్రక్షాళనపై ఆయన ఫోకస్ పెట్టనున్నారు. ఇటు, కొందరు బీఆర్ఎస్ నేతలకు కూడా గాలం వేస్తున్నారు.

కాంగ్రెస్ గ్యారెంటీల అస్త్రం

పదేళ్ల తర్వాత తెలంగాణలో అధికారాన్ని దక్కించుకుంది కాంగ్రెస్. రాష్ట్రాన్ని తామే ఇచ్చామని ముందు నుంచీ చెప్పుకున్నా.. అది ప్రజల్లోకి వెళ్లేందుకు పదేళ్లు పట్టింది. దీనికితోడు కేసీఆర్ పాలనపై విసుగుచెందిన జనం హస్తానికి జై కొట్టారు. అయితే.. అసెంబ్లీ ఎన్నికల్లో కాంగ్రెస్ కు వచ్చిన సీట్లు పెద్దగా చెప్పుకోదగినవేం కాదు.. మ్యాజిక్ ఫిగర్ కు కాస్త దగ్గరలోనే ఆగింది. ఈ నేపథ్యంలో లోక్ సభ ఎన్నికల్లో సత్తా చాటాలంటే ఇచ్చిన హామీలు అమలు చేస్తేనే జనం నమ్ముతారని గట్టిగా ఫిక్స్ అయింది. అందుకే, గ్యారెంటీలపై ఎక్కువ ఫోకస్ పెట్టింది. నిజానికి, అసెంబ్లీ ఎన్నికల్లో కాంగ్రెస్ విజయానికి ఈ గ్యారెంటీలే కీలక పాత్ర పోషించాయి. దీంతో, ఇదే ఫార్మాలాను పార్లమెంట్ ఎన్నికల్లోనూ వాడాలని హస్తం పార్టీ చూస్తోంది. లోక్ సభ ఎన్నికల షెడ్యూల్ విడుదలకు ముందే మరో మూడు గ్యారంటీలను అమలు చేయాలని యోచిస్తోంది. ఇందుకోసం ఇప్పటికే కసరత్తు ప్రారంభించేసింది. అధకారంలోకి వచ్చిన వంద రోజుల్లోగా ఆరు గ్యారంటీలను అమలు చేస్తామని ప్రచారంలో హామీ ఇచ్చిన కాంగ్రెస్.. అధికారంలోకి వచ్చిన రోజుల వ్యవధిలోనే మహిళలకు ఉచిత బస్సు ప్రయాణం, ఆరోగ్య శ్రీ పరిమితిని 10 లక్షలకు పెంపు హామీలను అమలు చేసేసింది. ఇప్పుడు లోక్ సభ ఎన్నికల నేపథ్యంలో మరో మూడు హామీలపై దృష్టి పెట్టింది. గృహలక్ష్మి ‌పథకంలో భాగంగా ప్రతి ఇంటికీ 200 యూనిట్ల ఫ్రీ కరెంట్, మహాలక్ష్మి పథకంలో భాగంగా రూ.500కే గ్యాస్ సిలిండర్, అలాగే చేయూత కింద పింఛన్లను రూ.4 వేలకు పెంపు హామీలను అమలు చేయడానికి రెడీ అవుతోంది. గ్యారెంటీలనే నమ్ముకుని ప్రస్తుతం ఉన్న 3 సీట్ల నుంచి 10 సీట్లకు పైగా సాధించాలని పట్టుదలతో కనిపిస్తోంది.

బీఆర్ఎస్ తెలంగాణ గళం

తెలంగాణ అసెంబ్లీ ఎన్నికల్లో ఓటమిపాలైంది బీఆర్‌ఎస్. ఇప్పుడు పార్లమెంట్ ఎన్నికల్లోనూ అదే జరిగితే పార్టీ మనుగడ కష్టం. దీన్ని గ్రహించిన కేసీఆర్.. సరికొత్త వ్యూహాలతో ముందుకువెళ్లాలని చూస్తున్నారు. మనమే తెలంగాణ గళం.. మనమే తెలంగాణ దళం.. మనమే తెలంగాణ బలం అన్న నినాదాన్ని అందుకున్నారు. ఈ నినాదంతో పార్లమెంట్ ఎన్నికల్లో పట్టు నిలుపుకోవాలని భావిస్తున్నారు. ఈ క్రమంలోనే సమీక్షా సమావేశాలు నిర్వహిస్తున్నారు. జాతీయ అంశాలు కీలకంగా ఉండే లోక్ సభ ఎన్నికల్లో అధికారం లేకుండా గెలవడం కష్టం. పైగా, బీజేపీ ఓట్ షేర్ పెరిగింది. కాంగ్రెస్ అధికారంలో ఉంది. ఈ రెండు పార్టీలను తట్టుకుని బీఆర్ఎస్ నిలబడడం కష్టమే. ప్రస్తుతం 9 స్థానాల్లో ఉన్న గులాబీ పార్టీకి వాటిని నిలబెట్టుకోవడం కష్టంగా మారింది. ఎందుకంటే.. వీటిలోని చాలా అసెంబ్లీ నియోజకవర్గాలు కాంగ్రెస్ హస్తగతం అయ్యాయి. ఈ క్రమంలో బీఆర్ఎస్ కు గెలుపు అనేది కష్టమే. దీన్ని అధిగమించేందుకు కేసీఆర్ ఎలాంటి ఎత్తుగడులు వేస్తారనేది హాట్ టాపిక్ గా మారింది. మనమే తెలంగాణ గళం అనే నినాదం అందుకున్నా.. దాన్ని జనం ఎంత వరకు నమ్ముతారనేది పెద్ద ప్రశ్న. ఎందుకంటే.. అసెంబ్లీ ఎన్నికల్లోనూ కేసీఆర్ ఇలాంటి వ్యూహాన్ని అమలు చేసి ఫెయిల్ అయ్యారు. మొత్తంగా మూడు పార్టీలు లోక్ సభ ఎన్నికల్లో 10 సీట్లకు పైనే టార్గెట్ గా పెట్టుకున్నాయి. మరి, జనం ఎవరి ఆశలు నెరవేరుస్తారో చూడాలి.

January 6, 2024 0 comment

Congress MLA Bhatti Vikramarka Press Meet

Politics Telangana

Bhatti Vikramarka : బీఆర్ఎస్ మెడకు ఉరితాళ్ళలా బిగుసుకొన్న ఆరు హామీలు..!!

by Venu January 6, 2024

written by Venu

అధికారంలో కాంగ్రెస్.. ప్రతిపక్షంలో బీఆర్ఎస్.. ఈ రెండు పాము ముంగిసల్లా కొట్లాడుకొంటున్నాయని రాష్ట్ర ప్రజలు అనుకొంటున్నారు.. ఇప్పటికే కాంగ్రెస్ ఇచ్చిన హామీలు.. బీఆర్ఎస్ మెడకు ఉరితాళ్ళలా బిగుసుకొన్నాయని.. హస్తం నేతలు ఆనందపడుతున్నట్టు తెలుస్తోంది. ఇక ఇచ్చిన హామీలు నెరవేర్చకుంటే.. గబుక్కున మింగేద్దామని గులాబీ నేతలున్నట్టు తెలుస్తుంది. అయితే వీరి తీరుపై డిప్యూటీ సీఎం భట్టి విక్రమార్క మండిపడ్డారు.

ఖమ్మం (Khammam) జిల్లా ఎర్రుపాలెం మండంలం, బనిగండ్లపాడులో నిర్వహించిన ప్రజా పాలన కార్యక్రమంలో భట్టి విక్రమార్క (Bhatti Vikramarka) పాల్గొన్నారు. ఈ క్రమంలో రాష్ట్రాన్ని పూర్తిగా వుడ్చేశామూ ఇంకా కాంగ్రెస్ (Congress) ప్రజలకి ఏమి చేస్తుందని కొందరు అనుకుంటున్నారు. కానీ ప్రజా సంక్షేమమే ధ్యేయంగా ప్రభుత్వం ముందుకు సాగుతుందని తెలిపారు.. సంపద ఎలా సృష్టించాలో మాకు తెలుసని బీఆర్ఎస్ (BRS)పై మండిపడ్డారు.

దోపిడీ చేయకుండా సంపద ను ప్రజలకు పంచి పెడతామని ఎన్నికల్లో హామీ ఇచ్చినట్టు గుర్తు చేసుకొన్న భట్టి.. అమలు చేయని మూడు ఎకరాల హామీ మాదిరిగా.. అరు గారెంటీ పథకాలు అమలు కాకుండా వుంటే బాగుండని ఆశిస్తున్న వారికి బుద్ధి వచ్చేలా.. ఎన్ని కష్టాలు వున్న ప్రజలకు ఇచ్చిన హామీలు నెరవేరుస్తామన్నారు. అనంతరం బానిగెండ్ల పాడు, ప్రజా పాలనలో 3,90,000 వేల దరఖాస్తులు స్వీకరించినట్లు డిప్యూటీ సీఎంకు కలెక్టర్ గౌతమ్ వివరించారు.

మరోవైపు బీఆర్ఎస్ పదేళ్ల కాలంలో ఏ ఒక్క ఊరిలో కూడా కాలనీలు కట్టలేదని ఆరోపించిన భట్టి.. అయిదు లక్షల రూపాయలు ఇల్లు కట్టుకునెందుకు ఇస్తామన్నారు. పనికి రాని టెక్నాలజీ భద్రాద్రిలో తీసుకొని వచ్చారని విమర్శించిన మంత్రి.. కరెంట్ పేరు చెప్పుకొని.. లక్ష కోట్ల అప్పు చేశారని ఆగ్రహం వ్యక్తం చేశారు. అప్పుల భారాన్ని మోస్తునే నాణ్యమైన కరెంట్ ఇస్తామని వివరించారు.. మీ ప్రభుత్వంలో బాస్ ఒకరిద్దరు అయితే.. కాంగ్రెస్ ప్రభుత్వంలో అందరూ జవాబు దారులేనని అన్నారు..

January 6, 2024 0 comment

Ambati Rayudu: Resignation of Rayudu, who is known as Jagan Psycho.. TDP said all the best!

Andhra Pradesh Politics

Ambati Rayudu: ‘జగన్ సైకో అని తెలిసే రాయుడి రాజీనామా..’ ఆల్ ది బెస్ట్ చెప్పిన టీడీపీ!

by Mano January 6, 2024

written by Mano

మాజీ టీమిండియా క్రికెటర్ అంబటి రాయుడు(Ambati Rayudu) వైసీపీ(YCP)లో చేరి 10 రోజులు తిరక్కుండానే సీఎం జగన్‌(CM Jagan)కు గుడ్‌బై చెప్పాడు. రాజకీయాలకు కొంతకాలం దూరంగా ఉంటానని.. సరైన సమయంలో తదుపరి కార్యాచరణ ప్రకటిస్తానని తెలిపాడు.

క్రికెట్‌లో దూకుడు నిర్ణయాలు తీసుకునే రాయుడు రాజకీయాల్లోనూ అదే ప్రదర్శనను చూపుతున్నాడు. గత నెల డిసెంబర్ 28న వైసీపీలో చేరిన ఆయన తాజాగా పార్టీకి రాజీనామా చేస్తున్నట్లు ప్రకటించాడు. దీంతో ఏపీ రాజకీయాల్లో హాట్ టాపిక్‌ అయ్యాడు. ఈ క్రమంలోనే టీడీపీ అధికారిక ట్విట్టర్ ఖాతా నుంచి అనూహ్యమైన ట్వీట్ వచ్చింది.

‘జగన్ లాంటి విపరీత ధోరణి ఉన్న వ్యక్తితో కలిసి మీరు రాజకీయ ఇన్నింగ్స్‌లు ఆడనందుకు సంతోషంగా ఉంది. మీ భవిష్యత్ ప్రయాణాలు మంచిగా సాగాలని కోరుకుంటున్నాం’ అని రాయుడిని ట్యాగ్ చేస్తూ టీడీపీ ట్వీట్ చేసింది. ఈ ట్వీట్ కూడా సోషల్ మీడియాలో వైరల్ అవుతోంది.

అదేవిధంగా అంబటి రాజీనామాపై టీడీపీ నేత బుద్దా వెంకన్న సంచలన వ్యాఖ్యలు చేశారు. సీఎం జగన్ సైకో అని తెలిసే వారం రోజులకే అంబటి రాయుడు వైసీపీకి రాజీనామా చేశాడని అన్నారు. ఇవాళ తిరువూరులో చంద్రబాబు సభ నిర్వహణపై విజయవాడ నేతలతో సమావేశమయ్యారు. ఈ సందర్భంగా బుద్దా వెంకన్న మాట్లాడుతూ అంబటి రాయుడికి శుభాకాంక్షలు తెలిపారు.

2024లో పశ్చిమ నియోజకవర్గంలో టీడీపీ జెండా ఖాయమని తెలిపారు. పశ్చిమ నియోజకవర్గ అభ్యర్థి తమ అధినేత చంద్రబాబు నిర్ణయిస్తారని పేర్కొన్నారు. టీడీపీలో పదవులు ఇవ్వడంతో పాటు నేతలకు ప్రత్యేక గుర్తింపు ఉంటుందని వెంకన్న చెప్పుకొచ్చారు. రాజ్యసభల్లో ఫ్లోర్ లీడర్ పదవి ఆర్.కృష్ణయ్యకు ఎందుకు ఇవ్వలేదని బుద్దా వెంకన్న ప్రశ్నించారు.

January 6, 2024 0 comment

Newer Posts

Older Posts