Politics

కారు షెడ్డుకు.. హస్తం అధికారం వైపు అని కాంగ్రెస్ నేతలు స్పీడ్ లో దూసుకువెళ్తుండగా.. కేటీఆర్ వాటికి బ్రేక్ లు వేస్తున్నట్లు ఈ మధ్య తరచుగా ఘాటైన విమర్శలతో విరుచుకుపడుతుండటం కనిపిస్తోంది. ఇప్పటికే ప్రభుత్వాన్ని ఇరుకున పెట్టాలని శత విధాలుగా ప్రయత్నాలు చేస్తున్నట్లు కనిపిస్తుంది. ఈ క్రమంలో కాంగ్రెస్ ప్రతిష్టాత్మకంగా ప్రారంభించిన ఆర్టీసీ బస్సుల్లో మహిళలకు ఉచిత ప్రయాణం స్కీమ్‌పై సంచలన వ్యాఖ్యలు చేశారు..

త్వరలో పార్లమెంట్ ఎన్నికలు (Parliament Elections) ఉన్న నేపథ్యంలో నేడు ఇబ్రహీంపట్నం (Ibrahimpatnam)లో బీఆర్ఎస్ (BRS) విస్తృత స్థాయి సమావేశం నిర్వహించారు. ఈ సందర్భంగా మాట్లాడిన కేటీఆర్ (KTR).. కాంగ్రెస్ (Congress) ప్రభుత్వం ఆర్టీసీ (RTC) బస్సుల్లో మహిళలకు ఉచిత ప్రయాణం స్కీమ్‌ను ఎత్తేస్తారని ఆరోపించారు..

పార్లమెంట్ ఎన్నికలు ముగిసేలోగా ఎంత తిరగాలో అంత తిరగండి అని పేర్కొన్న ఆయన.. ఎన్నికలు అయ్యాక ఇక బాదుడే అని కీలక వ్యాఖ్యలు చేశారు.. మరోవైపు తెలంగాణ (Telangana)లో కాంగ్రెస్ అధికారంలోకి వచ్చి నాలుగు నెలలైంది. కానీ రైతులకు ఇప్పటి వరకు రూ.2 లక్షల రుణమాఫీ జరగలేదని మండిపడ్డారు.. అదీగాక రాష్ట్రంలో కరెంట్ కోతలు, నీటి ఎద్దడి మొదలైనట్లు ఆరోపించారు..

సీఎం రేవంత్ రెడ్డి మగాడైతే అసెంబ్లీ ఎన్నికల్లో ఇచ్చిన హామీలు అమలు చేసి పార్లమెంట్ ఎన్నికల్లో ఓట్లు అడగాలని సవాల్ విసిరారు. అదేవిధంగా రాష్ట్ర ప్రజలను బీఆర్ఎస్ కంటికి రెప్పలా కాపాడుకొందని తెలిపిన కేటీఆర్.. బీసీలకు పార్లమెంట్ ఎన్నికల్లో ఎక్కువ సీట్లు ఇచ్చామని వెల్లడించారు.. కేసీఆర్ దళితుల కోసం చేసినన్నీ కార్యక్రమాలు దేశంలో మరే నేత చేయలేదని వ్యాఖ్యానించారు.. అలాగే కుల వృత్తులకు సైతం ఆసరాగా నిలిచిందని వివరించారు..

కేంద్రంలో కాంగ్రెస్(Congress) అధికారంలోకి వస్తే అవినీతి, అరాచకాలు పెరిగిపోతాయని బీజేపీ రాష్ట్ర అధ్యక్షుడు, సికింద్రాబాద్ ఎంపీ అభ్యర్థి కిషన్‌రెడ్డి(Kishan Reddy) అన్నారు. ఆయన సికింద్రాబాద్ లోక్‌సభ పరిధిలో శుక్రవారం ఎన్నికల ప్రచారంలో మాట్లాడారు. దేశానికి సంబంధించిన ఎన్నికలు వచ్చేనెల జరగనున్నాయన్నారు.

దేశం బాగుండాలంటే మోడీని గెలిపించాలన్నారు. ఇక్కడ మజ్లిస్ కార్పొరేటర్లు, ఎమ్మెల్యేలు ఎవరు అభివృద్ధిని ఆపినా ఆగదన్నారు. తాను అభివృద్ధి చేస్తానని కిషన్ రెడ్డి హామీ ఇచ్చారు. మోడీ వచ్చారు కాబట్టి అయోధ్యలో రామ మందిర నిర్మాణం జరిగిందని గుర్తుచేశారు. 500 ఏళ్లుగా రాముడు గుడిసెలోనే ఉన్నాడని స్వాతంత్రం వచ్చాక కూడా ఎవరు రాముడి గుడిని కట్టలేదన్నారు.

ఇవి దేశానికి ఎవరు ప్రధాని కావాలి, ఎవరు పరిపాలించాలి అని నిర్ణయించే ఎన్నికలని వ్యాఖ్యానించారు. మన దేశ, మన పిల్లల భవిష్యత్తు కోసం మోడీ లాంటి నేత అవసరమన్నారు. పేదలకు ఎల్పీజీ సిలిండర్లు ఇస్తుంది మోడీనేనని ఆయన అన్నారు. పొదుపు సంఘాలకు డిపాజిట్లు లేకుండా 20 లక్షల లోన్లు ఇస్తున్నామన్నారు.

ఆయుష్మాన్ భారత్ తీసుకువచ్చి పేదలకు వైద్యాన్ని అందిస్తున్నారని పేర్కొన్నారు. కరోనా నుంచి ప్రజలను ఆదుకున్నది మోడీ అని చెప్పుకొచ్చారు. ఉచిత బియ్యం మరో ఐదేళ్లు ఇస్తామని మోడీ హామీ ఇచ్చినట్లు తెలిపారు. మోడీ(Modi) లేకపోతే దేశంలో అవినీతి, మజ్లిస్ గుండాయిజం, అరాచకాలు పెరుగుతాయని ప్రజలు ఆలోచించి ఓటు వేయాలని కోరారు.

బీజేపీ రాజ్యసభ సభ్యులు కే.లక్ష్మణ్(K.Laxman) కాంగ్రెస్ సర్కార్‌(Congress Government) పై సంచలన ఆరోపణలు చేశారు. బీజేపీ(BJP) రాష్ట్ర కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ పార్లమెంట్ ఎన్నికలు దగ్గరపడుతున్నకొద్దీ సీఎం రేవంత్‌రెడ్డి(CM Revanth Reddy)లో అభద్రతా భావం కనిపిస్తోందన్నారు.

కాంగ్రెస్‌లోనే గూడు పుఠానీ నడుస్తోందని, ప్రభుత్వం పడిపోతే బాధ్యులం తాము కాదని అన్నారు. గ్రామాల్లో ఉన్న ముసలి వారు కూడా మోడీకే ఓటు వేస్తామంటుంటే కాంగ్రెస్ భయపడుతోందన్నారు. రేవంత్‌రెడ్డి మాటలు తడబడుతున్నాయని విమర్శించారు. ఇదివరకు వందరోజుల మా పాలనను రెఫరెండంగా భావించి మాకు ఓటు వేయాలని అన్నారని, ఇప్పుడేమో ఆరు గ్యారెంటీలపై వస్తున్న వ్యతిరేకత చూసి కాంగ్రెస్ మాట మారుస్తోందని దుయ్యబట్టారు.

తమ హైదరాబాద్ పార్లమెంట్ అభ్యర్థి మాధవీలత ఓవైసీకి ముచ్చెమటలు పట్టిస్తున్నారని అన్నారు. అక్కడ కాంగ్రెస్ గెలిచే అవకాశం లేనందున ఒవైసీని గెలిపించడానికి కాంగ్రెస్ సిద్ధమైనట్లు కనిపిస్తోందన్నారు. ఇది స్వయంగా ఆ పార్టీ నాయకుడు ఫిరోజ్ ఖాన్ మాటల్లోనే చెప్పారన్నారు. కాంగ్రెస్ సీనియర్ నాయకులు, ఫిరోజ్ ఖాన్‌లురేవంత్ రెడ్డి తరుపున తాను మాట్లాడుతుంటే పార్టీలోని ఇతర నాయకులను నచ్చడంలేదని, అయినా రేవంత్ రెడ్డి స్పందించడం లేదన్నారు.

సొంతపార్టీలోనే రేవంత్‌కు వ్యతిరేకత పెరుగుతోందన్నారు. కరువు వల్ల రైతులు నష్టపోతున్నారని, పంటకు బోనస్, రెండు లక్షల రుణ మాఫీ, కవులు రైతులను ఆదుకుంటామనీ చెప్పి మోసం చేశారని దుయ్యబట్టారు. వచ్చే ఎన్నికల్లో 14 స్థానాలు కైవసం చేసుకోబోతున్నామని లక్ష్మణ్ ధీమా వ్యక్తం చేశారు. ఎన్నికలు ఎప్పుడొచ్చిన తెలంగాణలో బీజేపీ అధికారంలోకి వస్తుందన్నారు.

అహంకారానికి, అబద్దాలకు నిదర్శనంగా ప్రభుత్వ పాలన సాగుతోందని విమర్శించారు. లోపాయికారంగా ఎన్ని కుట్రలు, కుతంత్రాలు పన్నినా తెలంగాణలో మోడీ ప్రభంజనాన్ని తట్టుకోలేరని, బీఆర్ఎస్‌కు పట్టిన గతే కాంగ్రెస్‌కూ పడుతుందని అన్నారు. రేవంత్ రెడ్డి రెఫరoడాన్ని తాను స్వీకరిస్తున్నానన్నారు. మూడోసారి మోడీ ప్రధాని అవుతారని ధీమా వ్యక్తం చేశారు. రాహుల్ ప్రధాని అవుతారని తన సవాల్‌ను రేవంత్‌ స్వీకరిస్తాడా? అని ప్రశ్నించారు.