Politics

తెలంగాణ (Telangana) లో కాషాయ జెండా ఎగురవేస్తామన్నారు బీజేపీ జాతీయ ప్రధాన కార్యదర్శి బండి సంజయ్ (Bandi Sanjay)​. రంగారెడ్డి జిల్లా చేవెళ్ల (Chevella) లో బీజేపీ (BJP) అసెంబ్లీ నియోజకవర్గ పోలింగ్​ బూత్​ మేళ కార్యక్రమంలో ఆయన పాల్గొన్నారు. ఈ సందర్భంగా మాట్లాడుతూ.. కేసీఆర్ (KCR) ప్రభుత్వంపై విరుచుకుపడ్డారు. అలాగే, రానున్న ఎన్నికలకు బీజేపీ శ్రేణులు సమాయత్తం కావాలని పిలుపునిచ్చారు.

అసెంబ్లీ ఎన్నికల్లో బీజేపీ అధికారంలోకి రావడం ఖాయమని.. దీనికోసం పార్టీ శ్రేణులు కష్టపడాలన్నారు సంజయ్. పదేళ్ల పాలనలో ప్రజలకు కేసీఆర్ ఒరగబెట్టిందేమీ లేదని ఆరోపించారు. వచ్చే ఎన్నికల్లో ప్రజలు బీఆర్ఎస్ ఎమ్మెల్యేలను ఓడిస్తారని అన్నారు. ఈ విషయం కేసీఆర్‌ కు కూడా తెలుసని చెప్పారు. కేసీఆర్ ప్రకటించిన బీఆర్ఎస్ అభ్యర్థులు దండుపాళ్యం ముఠా అని సంచలన వ్యాఖ్యలు చేశారు.

సీఎం అవినీతి, అక్రమాలకు పాల్పడ్డారని.. త్వరలోనే ప్రజలు బుద్ధి చెబుతారని హెచ్చరించారు బండి. ప్రాణాంతకమైన క్యాన్సర్ వ్యాధి కంటే.. సీఎం కేసీఆర్ వెరీ డేంజర్ అంటూ విమర్శించారు. రానున్న ఎన్నికల్లో రెండు సార్లు అధికారంలో ఉండి నట్టేట ముంచిన బీఆర్ఎస్‌ కు ఓటు వేస్తారా? మీ కోసం ఉద్యమాలు చేసి జైళ్లకు పోతున్న బీజేపీకి ఓటేస్తారా? అని ప్రజలను ప్రశ్నించారు.

చేవెళ్ల పర్యటనలో భాగంగా.. చాకలి ఐలమ్మ, దొడ్డి కొమురయ్య, సర్దార్ ​పాపన్న విగ్రహాలకు పూలమాల వేసి నివాళి అర్పించారు బండి సంజయ్. బూత్​ మేళలో భాగంగా చేవెళ్ల కూడలి నుంచి సీహెచ్​ఆర్​ గార్డెన్స్ ​వరకు భారీ ర్యాలీ నిర్వహించారు. ఈ కార్యక్రమంలో బీజేపీ సీనియర్​ లీడర్లు కొండా విశ్వేశ్వర్ రెడ్డి, జితేందర్ ​రెడ్డి, పార్టీ కార్యకర్తలు పాల్గొన్నారు.

బీఆర్‌ఎస్‌ (BRS) పాలనలో తెలంగాణ అన్ని రంగాల్లో అభివృద్ధిని సాధించిందని అన్నారు మంత్రి తలసాని శ్రీనివాస్ (Talasani Srinivas). బుధవారం కాచిగూడలోని తుల్జా భవానీ ట్రస్టును సందర్శించారు. ఈ సందర్భంగా మీడియాతో మాట్లాడుతూ.. బీజేపీ (BJP), కాంగ్రెస్ (Congress) పార్టీలపై విరుచుకుపడ్డారు. రాష్ట్రంలో ప్రతిపక్షాలకు తావు లేదని మూడోసారి కూడా బీఆర్‌ఎస్‌ ప్రభుత్వమే అధికారంలోకి వస్తుందని ధీమా వ్యక్తం చేశారు.

తెలంగాణ ప్రభుత్వం ప్రజలకు ఏం చేసిందో చెప్పే ధైర్యం తమకుందని.. మీరేం చేశారో చెప్పగలరా? అని ప్రతిపక్షాలను సూటిగా ప్రశ్నించారు తలసాని. బీజేపీకి అభ్యర్థులు లేరని.. కాంగ్రెస్ లో గొడవలే సరిపోతాయని సెటైర్లు వేశారు. కేసీఆర్‌ నాయకత్వంలో తెలంగాణ ప్రభుత్వం చేసిన అభివృద్ధి, సంక్షేమ కార్యక్రమాలతోనే ప్రజలు తిరిగి బీఆర్ఎస్ కు పట్టం కడతారని ధీమా వ్యక్తం చేశారు.

కేసీఆర్ (KCR) దమ్మున్న నాయకుడు కాబట్టే.. ఎన్నికల నోటిఫికేషన్‌ కు ముందే అభ్యర్థులను ప్రకటించారని అన్నారు తలసాని. కాంగ్రెస్, బీజేపీలకు దమ్ముంటే వారం రోజుల్లో అభ్యర్థులను ప్రకటించాలని సవాల్ విసిరారు. ఆ రెండు పార్టీల నేతలు ఎన్ని కుప్పిగంతులు వేసినా, బీఆర్ఎస్ గెలుపును ఆపలేరని అన్నారు. కేసీఆర్ హ్యాట్రిక్ సీఎం పక్కా అని తెలిపారు.

మరోవైపు, భైంసా మార్కెట్ కమిటీ చైర్మన్ జాదవ్ రాజేష్ బాబుపై తలసాని దాడి చేయడాన్ని ఖండిస్తూ ఉమ్మడి జిల్లా వ్యాప్తంగా నిరసనలు కొనసాగుతున్నాయి. మంత్రిపై ఎస్సీ, ఎస్టీ అట్రాసిటీ కేసు నమోదు చేసి వెంటనే అరెస్టు చేయాలని నిర్మల్ జిల్లా లంబాడి జేఏసీ డిమాండ్ చేసింది. చర్యలు తీసుకోకపోతే గిరిజన సంఘాల ఆధ్వర్యంలో రాష్ట్రవ్యాప్తంగా పెద్ద ఎత్తున ఆందోళన చేపడతామని హెచ్చరించింది. మంత్రిని అరెస్ట్​చేయాలంటూ కుభీరు గిరిజన నాయకులు పోలీసులకు రాతపూర్వకంగా ఫిర్యాదు చేశారు.

కేసీఆర్ (KCR) పార్టీ అభ్యర్థుల లిస్ట్ ప్రకటించిన తర్వాత బీఆర్ఎస్ (BRS) లో లుకలుకలు మొదలయ్యాయి. ఎవరు ఉంటారో.. ఎవరు జంప్ అవుతారో తెలియని పరిస్థితి నెలకొంది. ఈ క్రమంలోనే కొందరు రాజీనామాల బాట పట్టారు. టికెట్ ఆశించి భంగపడ్డ బీఆర్ఎస్ సిట్టింగ్ ఎమ్మెల్యే రేఖా నాయక్ (Rekha Naik) ఇప్పటికే కాంగ్రెస్ పార్టీ ఎమ్మెల్యే టికెట్ కోసం దరఖాస్తు చేసుకోగా.. తాజాగా నకిరేకల్ మాజీ ఎమ్మెల్యే వేముల వీరేశం (Vemula veeresham) బీఆర్ఎస్ పార్టీకి గుడ్ బై చెప్పారు.

కార్యకర్తలతో బుధవారం ప్రత్యేక సమావేశం నిర్వహించిన వేముల.. ఈ సందర్భంగా బీఆర్ఎస్ పార్టీకి రాజీమానా చేస్తున్నట్లు ప్రకటించారు. తనను, తన అనుచరులను కేసులతో ఇబ్బందులకు గురి చేశారని ఆరోపించారు. మరో పది రోజుల్లో కార్యకర్తలతో చర్చించి భవిష్యత్ కార్యచరణ ప్రకటిస్తానన్నారు. అంతకుముందు, బీఆర్ఎస్ పార్టీకి గుడై బై చెప్పారు మాజీ ఎమ్మెల్సీ సంతోష్ కుమార్ (Santhosh Kumar). పార్టీకి, ప్రాథమిక సభ్యత్వానికి రాజీనామా చేసినట్టు ఆయన తెలిపారు. ఈ మేరకు రాజీనామా లేఖను సీఎం కేసీఆర్ కు పంపారు.

2018లో ఎటువంటి ప‌ద‌వీ ఆశించ‌కుండా బీఆర్ఎస్ లో చేరాన‌ని, పార్టీ అభివృద్ధికి ఎంతగానో కృషి చేశాన‌ని అన్నారు. వ‌చ్చే ఎన్నిక‌ల్లో పోటీ చేసేందుకు ఎటువంటి అవ‌కాశం ల‌భించ‌లేద‌ని.. తన రాజ‌కీయ భ‌విష్యత్తు నిమిత్తం బీఆర్ఎస్ పార్టీని వీడుతున్నట్లు తెలిపారు. బంగారు తెలంగాణ కోసం కలిసి రావాలని సీఎం పిలుపుతో తాను కాంగ్రెస్ ను వీడి ఆ పార్టీలో చేరానని… కానీ ఇప్పుడు అనివార్య పరిస్థితుల్లో పార్టీని వీడుతున్నానని చెప్పారు. వచ్చే ఎన్నికల్లో తాను కరీంనగర్ నుంచి పోటీలో ఉంటానని స్పష్టం చేశారు.

కరీంనగర్ కాంగ్రెస్ లో కీలక నేతగా ఉన్న సంతోష్ కుమార్ 2018లో బీఆర్ఎస్ లో చేరారు. ఆ సమయంలో శాసనమండలిలో ఆయనతోపాటు మరో ముగ్గురు కాంగ్రెస్ ఎమ్మెల్సీలు బీఆర్ఎస్ గూటికి వెళ్లడంతో.. మండలిలో కాంగ్రెస్ గుర్తింపును రద్దు చేశారు చైర్మన్. అప్పటినుంచి ఇప్పటిదాకా సంతోష్ కు ఎలాంటి పదవి దక్కలేదు. వచ్చే ఎన్నికల్లో టికెట్ అయినా ఇస్తారని అనుకుంటే.. అదీ జరగలేదు. దీంతో తీవ్ర అసంతృప్తితో బీఆర్ఎస్ కు గుడ్ బై చెప్పారు.

రెండు రోజుల క్రితం నల్లా మనోహర్ రెడ్డి కూడా బీఆర్ఎస్ కు రాజీనామా చేశారు. పెద్దపల్లి టికెట్ దాసరి మనోహర్ రెడ్డికే కేటాయించడంతో అసంతృప్తి వ్యక్తం చేశారు. గత 15 ఏళ్లుగా పార్టీలో ఉంటూ కష్టపడ్డానని.. అయినా, పార్టీ తనను గుర్తించలేదని ఆవేదన చెందారు. మంత్రి కేటీఆర్ కు తొమ్మిదేళ్లుగా ప్రధాన అనుచరుడుగా ఉన్నా కూడా అన్యాయం జరిగిందన్నారు. ఈ క్రమంలోనే ఆయన రాజీనామా చేస్తున్నట్లు తెలిపారు. రానున్న అసెంబ్లీ ఎన్నికల్లో ఇండిపెండెంట్ గా బరిలో ఉంటానని చెప్పారు.

అభ్యర్థుల ప్రకటనతో ఎన్నికల యుద్ధాన్ని మొదలుపెట్టారు సీఎం కేసీఆర్ (CM KCR). ఈ క్రమంలోనే జిల్లాల బాట పట్టారు. ఇప్పటికే సూర్యాపేట టూర్ ముగించిన సీఎం.. రేపు మెదక్ (Medak) పర్యటనకు వెళ్తున్నారు. ఆ తర్వాత జనగామ (Jangaon) జిల్లాకు వెళ్లనున్నారు. ఎన్నికలు దగ్గర పడుతుండడంతో వరుస పర్యటనలతో బిజీగా ఉంటూ.. పార్టీ నేతలు, కార్యకర్తల్లో జోష్ నింపాలని కేసీఆర్ ఫిక్స్ అయ్యారు.

మెదక్ టూర్ లో భాగంగా బీఆర్ఎస్ పార్టీ ఆఫీస్, పోలీస్ కార్యలయం, సమీకృత కలెక్టరేట్ కార్యలయాన్ని సీఎం ప్రారంభించనున్నారు. ఇదే వేదికపై వికలాంగుల ఆసరా పెన్షన్ పెంపు కార్యక్రమాన్ని ప్రారంభించనున్నారు. సీఎం టూర్ కు సంబంధించిన ఏర్పాట్లను మంత్రి హరీష్ రావు (Harish Rao) చూసుకుంటున్నారు. మంగళవారం ఏర్పాట్లను పరిశీలించారు. ఈ సందర్భంగా ఆయన మాట్లాడుతూ.. దేశంలో ఎక్కడా లేనివిదంగా బీడీ కార్మికులకు పెన్షన్ ఇస్తున్న ఏకైక రాష్ట్రం తెలంగాణ అని వెల్లడించారు.

వచ్చే ఎన్నికల్లో ఉమ్మడి మెదక్ జిల్లాలో పదికి పది స్థానాలు గెలిచి సీఎం కేసీఆర్ కు గిఫ్ట్ గా ఇస్తామని తెలిపారు హరీష్. తెలంగాణలో బీజేపీకి క్యాడర్ లేదని, కాంగ్రెస్ కు క్యాండిడేట్లు లేరని విమర్శించారు. అంతేకాదు, కాంగ్రెస్ లో టికెట్లు అమ్ముకుంటున్నారంటూ ఎద్దేవ చేశారు. కేసీఆర్ వ్యూహాన్ని ఎవరూ ఉహించలేదని, అభ్యర్థుల ప్రకటనతో విపక్షాలు ఆగమైపోయాయని విమర్శించారు. గ్లోబల్స్ ప్రచారంతో ప్రతిపక్షాలు గెలువాలని చూస్తున్నాయన్న హరీష్.. బీఆర్ఎస్ మూడోసారి అధికారంలోకి వస్తుందని ధీమా వ్యక్తం చేశారు.

ఇక, సెప్టెంబర్ 4న జనగామ జిల్లాకు వెళ్లనున్నారు కేసీఆర్. పాలకుర్తి నియోజకవర్గంలోని వల్మిడి రామాలయ ప్రతిష్టాపన, పాలకుర్తి సోమనాథుని మ్యూజియంను ప్రారంభించనున్నారు. సీఎం పర్యటన నేపథ్యంలో వివిధ శాఖల ఉన్నతాధికారులు, జిల్లా కలెక్టర్ తో మంత్రి ఎర్రబెల్లి దయాకర్ రావు (Errabelli Dayakar Rao) సమీక్ష నిర్వహించారు. అనంతరం ఆలయ అభివృద్ధి, పాలకుర్తి టూరిజం పనులను మంత్రి పరిశీలించారు. పాలకుర్తిలో 11 అడుగుల భారీ సోమనాథుని రాతి విగ్రహం ఏర్పాటు చేయనున్నట్లు ఎర్రబెల్లి తెలిపారు.

నిర్మల్‌ (Nirmal) జిల్లా ఖానాపూర్‌ ఎమ్మెల్యే రేఖా నాయక్‌ స్థానంలో కేటీఆర్‌ మిత్రుడు భూక్య జాన్సన్‌ (Johnson Naik) కు అవకాశం ఇచ్చింది బీఆర్‌ఎస్‌ (BRS) అధిష్టానం. దీంతో.. రేఖా నాయక్‌ (Rekha Naik) తీవ్ర అసంతృప్తిలో ఉన్నారు. మంగళవారం ఆమె మీడియాతో మాట్లాడుతూ.. సంచలన వ్యాఖ్యలు చేశారు. ఖానాపూర్‌ లో తన సత్తా ఏంటో చూపిస్తానని హెచ్చరించారు. ఎన్నికలకు మూడు నెలలే సమయం ఉండటంతో తన నిర్ణయాన్ని అతి త్వరలోనే ప్రకటిస్తానని తెలిపారు.

ఉమ్మడి ఆదిలాబాద్‌ లో ముగ్గురు ఎస్టీ నేతలను మార్చారని అధిష్టానంపై మండిపడ్డారు రేఖా నాయక్. బీఆర్ఎస్‌ లో అగ్రవర్ణాలకే మంత్రి పదవులు కట్టబెడుతున్నారని.. గెలిచాక మంత్రి పదవి అడుగుతాననే తనకు టికెట్ ఇచ్చేందుకు సీఎం నిరాకరించారని అన్నారు. ఖానాపూర్ బీఆర్ఎస్ అభ్యర్థిగా ఖరారు చేసిన జాన్సన్ నాయక్ అసలు ఎస్టీనే కాదని సంచలన వ్యాఖ్యలు చేశారు.

జాన్సన్ నాయక్ ది నకిలీ సర్టిఫికెట్ అని ఈ విషయం నిరూపించి తీరుతానని రేఖా నాయక్ కంటతడి పెట్టారు. మెట్ పల్లిలోని జాన్సన్ ఇంటిలో చర్చి ఉందని, ఆయన తండ్రి పాస్టర్ అని తెలిపారు. జాన్సన్ ఎస్టీ సర్టిఫికెట్ ఎక్కడి నుంచి తెచ్చారో, ఏ ఎమ్మార్వో ఇచ్చాడో బయటపెడుతానని అన్నారు. ఖానాపూర్ నుంచి తాను పోటీ చేసి గెలుస్తానని ధీమా వ్యక్తం చేశారు.

రేఖా నాయక్ 2009లో రాజకీయాల్లోకి ప్రవేశించారు. కాంగ్రెస్ తరపున ఆసిఫాబాద్ జెడ్పీటీసీ మెంబర్ గా పోటీచేసి గెలిచారు. 2013లో టీఆర్ఎస్ లో చేరారు. 2014లో ఖానాపూర్ నుంచి పోటీచేసి 30వేల మెజారిటీతో విజయం సాధించారు. 2018లో జరిగిన ముందస్తు ఎన్నికల్లోనూ టీఆర్ఎస్ తరఫున పోటీ చేసి.. 24వేలకు పైగా మెజారిటీ సాధించి గెలుపొందారు. కానీ, మూడోసారి కేసీఆర్ ఛాన్స్ ఇవ్వలేదు. దీంతో ఆమె తీవ్ర అసహనంలో ఉన్నారు.