Politics

– చెన్నమనేనికి షాకిచ్చిన కేసీఆర్
– మరోసారి వేములవాడ టికెట్ నిరాకరణ
– ఈసారి చెలిమెడ నరసింహారావుకు ఛాన్స్
– ముందే ఊహించిన చెన్నమనేని..
– ట్వీట్ తోనే క్లారిటీ

ఊహించిందే నిజమైంది. వేములవాడ ఎమ్మెల్యే చెన్నమనేని రమేష్ (Chennamaneni Ramesh) కి షాకిచ్చారు కేసీఆర్ (KCR). వచ్చే ఎన్నికల్లో ఆయనకు బదులుగా చెలిమెడ లక్ష్మి నరసింహారావు (Narasimharao) కు ఛాన్స్ ఇచ్చారు. ప్రెస్ మీట్ లో చెన్నమనేని ప్రస్తావన తెచ్చిన కేసీఆర్.. ఆయనకు టికెట్ ఎందుకు ఇవ్వలేదో కూడా వివరించారు. వేములవాడ ఎమ్మెల్యే ఎంతో ఉత్తమమైన వ్యక్తి.. అయినా కూడా ఆయన పౌరసత్వంపై వివాదం కొనసాగుతోందని.. దాని కారణంగానే పార్టీకి ఇష్టం లేకపోయినా ఆ స్థానంలో మార్పు చేశామని తెలిపారు.

నిజానికి, ఈ విషయాన్ని చెన్నమనేనికి ముందే చెప్పినట్టు ఉన్నారు. కేసీఆర్ ప్రకటనకు ముందే ఆయన ట్వీట్ చేశారు. ‘‘రాజకీయాలు ప్రజల కోసమే చేయాలి. పదవుల కోసం కాదు. మా తండ్రిగారి మాటలను ప్రతిసారి స్మరించుకుంటూ ఆ పనిని నా తుది శ్వాస ఉన్నంతవరకు చేస్తా. నాతో ఉన్నవారందరికి భరోసా ఇస్తున్నాను. దయ చేసి నిర్ణయాలు మా అందరితో సంప్రదించి మా ప్రజాభిప్రాయానికి అనుగుణంగా తీసుకోవాలి. లేనిపక్షంలో ఆత్మాభిమానాలు దెబ్బతింటాయి. ప్రజల ఆమోదం లభించదు. ఇది మనందరం తెలంగాణ ఉద్యమంలో నేర్చుకున్న మొదటి పాఠం’’ అంటూ పోస్ట్ పెట్టారు.

ఇది చూశాక చెన్నమనేనికి టికెట్ డౌటే అనే చర్చ జోరుగా సాగింది. చివరకు అనుకున్నట్టే జరిగింది. ఇటు వేములవాడ నియోజకవర్గంలో చెలిమెడ నరసింహారావు అభిమానుల్లో సంతోషం నెలకొంది. బీఆర్ఎస్ పార్టీ కుటుంబ సభ్యులందరిని కలుపుకుపోతానని.. మూడవసారి కేసీఆర్ ముఖ్యమంత్రి కావాలని అన్నారు చెలిమెడ.

– సీఎంపై గుర్రుగా వామపక్షాలు
– సంప్రదింపులు లేకుండానే టికెట్ల ప్రకటన
– మునుగోడులో కలిసి పని చేసిన పార్టీలు
– వచ్చే ఎన్నికలపైనా ఆశలు పెట్టుకున్న లెఫ్ట్ లీడర్లు
– చివరికి ఝలక్ ఇచ్చిన బీఆర్ఎస్ అధినేత
– రేపు సీపీఐ కీలక సమావేశం

అనుకున్నంత పనే అయింది. వామపక్షాలకు చివరి నిమిషంలో ఝలక్ ఇచ్చారు సీఎం కేసీఆర్ (CM KCR). మునుగోడు (Munugode) ఉప ఎన్నికను గట్టెక్కించుకునేందుకు అప్పట్లో లెఫ్ట్ పార్టీల సపోర్ట్ తీసుకున్నారు బీఆర్ఎస్ అధినేత. అయితే.. రానున్న ఎన్నికల్లోనూ ఇలాగే ఉంటుందని ఎన్నో ఆశలు పెట్టుకున్నారు వామపక్ష నేతలు. సీట్ల సర్దుబాటుపై కేసీఆర్ ఎప్పుడెప్పుడు పిలుస్తారా? అని ఎదురుచూస్తున్నారు.

ఇలాంటి సమయంలో వారికి షాకిచ్చేలా 115 నియోజకవర్గాలకు అభ్యర్థులను ప్రకటించారు కేసీఆర్. దీంతో ఆయన తీరుపై వామపక్ష పార్టీల నేతలు గుర్రుగా ఉన్నారు. మునుగోడు పొత్తు ధర్మం మరిచారంటూ కన్నెర్ర చేస్తున్నారు. పొత్తు ధర్మం పాటించకుండా కేసీఆర్ అభ్యర్థుల జాబితాను విడుదల చేశారని.. వామపక్షాలు రగిలిపోతున్నాయి. కేసీఆర్ తీరును తీవ్రంగా తప్పుబడుతున్నాయి.

రేపు సీపీఐ (CPI) రాష్ట్ర కమిటీ సమావేశం జరుగుతుందని ఆ పార్టీ కార్యదర్శి కూనంనేని సాంబశివరావు (Sambasivarao) తెలిపారు. భవిష్యత్ కార్యాచరణపై చర్చించి నిర్ణయం తీసుకోనున్నట్టు చెప్పారు. ముందు నుంచి లెఫ్ట్ పార్టీలు కాంగ్రెస్ కు సపోర్ట్ చేస్తూ వచ్చేవి. మునుగోడులో మాత్రం లెక్క తప్పింది. బీజేపీని ఓడించడమే లక్ష్యంగా బీఆర్ఎస్ తో జత కట్టాయి లెఫ్ట్ పార్టీలు. చివరకు యూస్ అండ్ త్రో పద్దతిలో వారిని కేసీఆర్ వదిలించుకున్నారనే చర్చ రాజకీయ వర్గాల్లో జరుగుతోంది.

– హరీష్ రావుపై రెచ్చిపోయిన మైనంపల్లి
– మెదక్ లో మంత్రి పెత్తనం ఏంటని ఆగ్రహం
– నియంతలా మారారంటూ విమర్శలు
– మైనంపల్లి వ్యాఖ్యలపై స్పందించిన కేటీఆర్
– హరీష్ కే తమ మద్దతు అంటూ ప్రకటన

బీఆర్ఎస్ (BRS) లో అసమ్మతి సెగలు ఎక్కువవుతున్నాయి. తాజాగా మల్కాజ్‌ గిరి ఎమ్మెల్యే మైనంపల్లి హన్మంతరావు (Hanmantharao) సంచలన వ్యాఖ్యలు చేశారు. మంత్రి హరీష్ రావు (Harish Rao)పై తీవ్రస్థాయిలో విరుచుకుపడ్డారు. దీనిపై మంత్రి కేటీఆర్ సీరియస్ గా రియాక్ట్ అయ్యారు. హరీష్ రావుకే పార్టీ శ్రేణులు అండగా ఉండాలని స్పష్టం చేశారు.

తిరుమల శ్రీవారిని దర్శించుకున్న మైనంపల్లి.. బీఆర్‌ఎస్ టికెట్ల గురించి కీలక వ్యాఖ్యలు చేశారు. మెదక్‌ లో మంత్రి హరీష్ రావు పెత్తనం ఏంటని ప్రశ్నించారు. జిల్లాలో మంత్రి నియంతగా వ్యవహరిస్తున్నారని ఫైరయ్యారు. సిద్దిపేట మాదిరిగా మెదక్‌ ను ఎందుకు అభివృద్ధి చేయలేదని ప్రశ్నించారు. జిల్లాను అభివృద్ధి కాకుండా చేశారని ఆరోపించారు. తన కుమారుడిని మెదక్ ఎమ్మెల్యే చేయడమే లక్ష్యంగా ఉన్నానన్న ఆయన.. ఎట్టి పరిస్థితుల్లోనూ ఈసారి తన కుమారుడు మెదక్ నుంచి పోటీ చేస్తారని స్పష్టం చేశారు.

మెదక్, మల్కాజ్‌ గిరి టిక్కెట్లు ఇస్తేనే బీఆర్‌ఎస్‌ తరఫున పోటీ చేస్తామని.. లేదంటే ఇండిపెండెంట్లుగా బరిలోకి దిగుతామన్నారు మైనంపల్లి. కరోనా సమయంలో తన కుమారుడు ఎంతో ప్రజాసేవ చేశాడని.. దాదాపు రూ.8 కోట్ల వరకు సొంత డబ్బు ఖర్చు చేశాడని వివరించారు. తాము అనుకున్నట్టు జరగకపోతే.. వచ్చే ఎన్నికల్లో సిద్దిపేటలో పోటీ చేసి హరీష్ రావు అడ్రస్‌ గల్లంతు చేస్తానని హెచ్చరించారు. తాను బీఆర్‌ఎస్‌ లోనే ఉన్నానని.. టికెట్‌ కూడా డిక్లేర్‌ చేశారని తెలిపారు.

చాలాకాలంగా మెదక్ నియోజకవర్గంలో మైనంపల్లి కుమారుడు రోహిత్ విస్తృతంగా పర్యటిస్తున్నారు. ఈ క్రమంలోనే ఆయనకు టికెట్ వస్తుందని హన్మంతరావు ఆశించారు. చివరి నిమిషంలో మెదక్ స్థానం నుంచి పద్మా దేవేందర్ పేరు ఖరారు అయింది. దీని వెనుక హరీష్ రావు ఉన్నారని మైనంపల్లి ఇలా రియాక్ట్ అయి ఉంటారని అంటున్నారు.

కేటీఆర్ కౌంటర్

హరీష్ రావుపై మైనంపల్లి చేసిన వ్యాఖ్యలపై సీరియస్ గా స్పందించారు మంత్రి కేటీఆర్. ట్విట్టర్ వేదికగా ఎమ్మెల్యే కామెంట్స్ ను తీవ్రంగా ఖండించారు. హరీష్ రావుకు బీఆర్ఎస్ నాయకులు, కార్యకర్తలందరూ అండగా ఉండాలని పిలుపునిచ్చారు. మైనంపల్లి హన్మంతరావు పేరును ప్రస్తావించకుండానే ట్వీట్ చేశారు కేటీఆర్. హరీష్ రావుపై అవమానకరమైన వ్యాఖ్యలు చేశారని, ఎమ్మెల్యే ప్రవర్తనను తాను తీవ్రంగా ఖండిస్తున్నానని చెప్పారు.

సీఎం కేసీఆర్ తమ పార్టీ అభ్యర్థుల లిస్టు ప్రకటించిన నేపథ్యంలో పలువురు నేతలు తమదైన రీతిలో స్పందించారు. తెలంగాణకు ఇది ఉత్సాహకరమైన సమయమని అన్నారు ఎమ్మెల్సీ క‌విత (MLC Kavitha). అసెంబ్లీ ఎన్నికల కోసం బీఆర్ఎస్ పార్టీ అధినేత, సీఎం కేసీఆర్ 119 స్థానాలకు గాను 115 స్థానాలకు అభ్యర్థులను ప్రకటించారని చెప్పారు. కేసీఆర్ ధైర్యవంతమైన నాయకత్వంపై, ప్రభావశీలమైన బీఆర్ఎస్ ప్రభుత్వ పరిపాలనపై ప్రజలు అచంచలమైన విశ్వాసాన్ని ప్రదర్శిస్తారన్న నమ్మకముందన్నారు. ఈ సంద‌ర్భంగా ప‌ని చేసే ప్ర‌భుత్వాన్ని గుర్తించి మ‌రోసారి తెలంగాణ ప్రజలు ఆశీర్వదించాల‌ని కోరారు కవిత.

కేసీఆర్ గొంతులో భయం, ఓటమి స్పష్టంగా కనిపించాయన్నారు టీపీసీసీ చీఫ్ రేవంత్ రెడ్డి (Revanth Reddy). బీఆర్ఎస్ అభ్యర్థుల లిస్ట్ చూసిన తర్వాత రాబోయే ఎన్నికల్లో కాంగ్రెస్ అధికారంలోకి వస్తుందనే నమ్మకం ఏర్పడిందని చెప్పారు. సిట్టింగ్ ఎమ్మెల్యేల్లో మార్పు చేసి కేసీఆర్ ఓటమిని ఒప్పుకున్నారని.. గజ్వేల్‌ లో ఓడిపోతానని భయంతోనే కామారెడ్డిలో పోటీ చేస్తున్నారని విమర్శించారు. కేసీఆర్ స్వయంగా తన ఓటమిని ఒప్పుకున్నారని అన్నారు. ఆయన్ను రెండు స్థానాల్లో ఓడించి తీరుతామని అన్నారు రేవంత్ రెడ్డి.

టెకెట్ల విషయంలో కొందరు నేతలు అలకబూనడంతో మంత్రి కేటీఆర్ (KTR) రంగంలోకి దిగారు. ఎన్నికల్లో పోటీకి హామీ దక్కిన బీఆర్ఎస్ పార్టీ అభ్యర్థులందరికీ అభినందనలు తెలిపారు. ప్రజాజీవిత ప్రయాణంలో నిరాశను ఒక అడుగుగా భావించి ముందుకుసాగాలని హితవు పలికారు. చాలా సామర్థ్యం, అర్హత ఉన్న కృష్ణ (కంటోన్మెంట్ టికెట్ ఆశించిన నేత), కొంతమందికి సీట్లు కేటాయించలేకపోవడం దురదృష్టకరమన్నారు. వారికి వేరే రూపంలో ప్రజలకు సేవ చేసుకునే భరోసా లభిస్తుంది అని తెలిపారు కేటీఆర్.

కేసీఆర్ కాళ్ల కింద భూమి కదిలిపోతోందని విమర్శించారు బీజేపీ రాష్ట్ర అధ్యక్షుడు కిషన్ రెడ్డి (Kishan Reddy). అందుకే రెండు చోట్ల పోటీ చేస్తున్నారని ఎద్దేవ చేశారు. త్వరలోనే బీజేపీ అభ్యర్థుల జాబితాను ప్రకటిస్తామని తెలిపారు. కేసీఆర్ అభద్రతాభావంలో ఉన్నారని.. సర్వేలు ఆయనకు అనుకూలంగా లేవని విమర్శించారు. ప్రభుత్వం భూ వ్యాపారం చేస్తోందని.. బీఆర్ఎస్ ప్రైవేట్ లిమిటెడ్ కంపెనీగా వ్యవహరిస్తోందని అన్నారు కిషన్ రెడ్డి.

గజ్వేల్ ఓటర్లు తన్ని తరిమేస్తారని కేసీఆర్ బాగా అర్థమైందన్నారు వైటీపీ అధ్యక్షురాలు షర్మిల (Sharmila). అందుకే, ముందు జాగ్రత్తగా రెండో స్థానం నుంచి పోటీ చేస్తున్నారని చెప్పారు. స్వయానా ముఖ్యమంత్రికే సొంత నియోజకవర్గంలో గెలుస్తాననే దమ్ము లేకపోవడం.. కేసీఆర్ పదేళ్ల దిక్కుమాలిన పరిపాలనకు నిదర్శనమని విమర్శించారు. వచ్చే ఎన్నికల్లో బీఆర్ఎస్ పార్టీకి డిపాజిట్లు కూడా రావు అనడానికి సంకేతమన్నారు. పేరుకు ముఖ్యమంత్రి నియోజకవర్గమైనా డబుల్ బెడ్రూం ఇళ్లు అక్కడి ప్రజలకు అందలేదని ఆరోపించారు షర్మిల.

కేసీఆర్ రెండు స్థానాల్లో పోటీ చేస్తానని ప్రకటించడంపై ఎంపీ అరవింద్ (MP Aravind) సెటైర్లు వేశారు. ఈటల రాజేందర్ గజ్వేల్ నియోజకవర్గంలో పోటీ చేస్తానని ప్రకటించినప్పటి నుండి కేసీఆర్‌ లో భయం మొదలైందన్నారు. గజ్వేల్‌ లో ఓటమి భయంతోనే కామారెడ్డిలో పోటీ చేసేందుకు వస్తున్నారని.. అక్కడ ఓడించి పంపుతామని కీలక వ్యాఖ్యలు చేశారు. కేసీఆర్ ప్రకటించిన బీఆర్ఎస్ అభ్యర్థుల లిస్ట్ చూసి చాలా హ్యాపీగా ఫీలవుతున్నానని సెటైర్ వేశారు అరవింద్.

నిర్మల్ (Nirmal) మాస్టర్ ప్లాన్ ను వ్యతిరేకిస్తోంది బీజేపీ (BJP). ఇండస్ట్రియల్ జోన్​ లో ఉన్న భూములను తక్కువ ధరకు కొన్న బీఆర్ఎస్ (BRS) నేతలు వాటిని కమర్షియల్, రెసిడెన్షియల్ జోన్ లోకి మార్చుకునేందుకు మున్సిపల్ అడ్మినిస్ట్రేషన్ అర్బన్ డెవలప్​ మెంట్ ​నుంచి జీవో నెంబర్ 220ను జారీ చేయించారనే ఆరోపణలున్నాయి. ఈ నేపథ్యంలో మాస్టర్ ప్లాన్ ను వ్యతిరేకిస్తూ బీజేపీ నిరసనలకు దిగింది. ఈ క్రమంలోనే నిర్మల్ మాజీ ఎమ్మెల్యే ఏలేటి మహేశ్వర్ రెడ్డి (Maheswar Reddy) ఐదు రోజులుగా దీక్ష చేస్తున్నారు. అయితే.. పోలీసులు ఆయన దీక్షను భగ్నం చేశారు.

ఏలేటి నిరాహార దీక్షతో నిర్మల్ లో టెన్షన్ వాతావరణం కనిపించింది. మాస్టర్ ప్లాన్ ను రద్దు చేయాల్సిందేనని బీజేపీ శ్రేణులు నిత్యం ధర్నాలు చేస్తున్నారు. వీరికి మద్దతుగా ఇతర జిల్లాల నేతలు నిర్మల్ బాట పట్టారు. ఆదివారం మహేశ్వర్ రెడ్డి దగ్గరకు వెళ్లేందుకు బీజేపీ నేతలు డీకే అరుణ (DK Aruna), అరవింద్ (Aravind) ప్రయత్నించారు. కానీ, పోలీసులు వారిని మధ్యలోనే అడ్డుకున్నారు.

రోజురోజుకీ ఏలేటి ఆరోగ్య పరిస్థితి క్షీణిస్తోంది. ఈ క్రమంలోనే నిరాహార దీక్షను పోలీసులు (Police) భగ్నం చేశారు. సోమవారం తెల్లవారుజామున ఆయన్ను అదుపులోకి తీసుకున్నారు. వైద్య పరీక్షల నిమిత్తం జిల్లా ఆసుపత్రికి తరలించారు. ఈ సందర్భంగా అక్కడ కొద్దిసేపు ఉద్రిక్తత నెలకొంది. దీక్షను భగ్నం చేసేందుకు వచ్చిన పోలీసులను బీజేపీ శ్రేణులు అడ్డుకున్నారు. ముందు గేటుకు తాళం వేసి పోలీసులను లోనికి అనుమతించలేదు. గో బ్యాక్ అంటూ కార్యకర్తలు నినాదాలు చేశారు.

గేటు తాళం పగులగొట్టిన పోలీసులు.. ఇంట్లోకి ప్రవేశించి మహేశ్వర్ రెడ్డి దగ్గరకు వెళ్లారు. ఇదే సమయంలో పోలీసులను బీజేపీ నేతలు అడ్డుకోవడంతో తోపులాట జరిగింది. వైద్య పరీక్షలు చేయించుకోవాలని ఏలేటికి పోలీసులు సూచించగా, అందుకు ఆయన నిరాకరించారు. దీంతో తెల్లవారుజామున 3 గంటలకు ఆయన నివాసం వద్ద పోలీసులు భారీగా మోహరించి బలవంతంగా ప్రభుత్వాసుపత్రికి తరలించారు.