Politics

తెలంగాణ సీఎం కేసీఆర్ ను ప్రజలు నమ్మడం లేదన్నారు బీజేపీ ఎమ్మెల్యే ఈటల రాజేందర్. అసెంబ్లీ మీడియా పాయింట్ దగ్గర మాట్లాడిన ఆయన సమావేశాల నిర్వహణలో ప్రభుత్వ నిర్లక్ష్యంపై మండిపడ్డారు. కేసీఆర్ కు రాబోయే ఎన్నికల్లో ఓడిపోతామనే భయం పట్టుకుందన్నారు. అందుకే, అన్ని వర్గాలను మచ్చిక చేసుకొనే ప్రయత్నం చేస్తున్నారని ఆరోపించారు. కానీ, ఆయన్ను నమ్మడానికి ప్రజలు సిద్ధంగా లేరని తెలిపారు.

అసెంబ్లీలో తమకు రూం ఇవ్వకపోవడం, బీఏసీ సమావేశానికి పిలవకపోవడంపై మండిపడ్డారు రాజేందర్. ఇది తమను కాదు.. అసెంబ్లీనీ అవమానించడమని చెప్పారు. పైగా, మూడు రోజులపాటే అసెంబ్లీ జరపడం అంటే ప్రజా సమస్యలపై ప్రభుత్వానికి ఉన్న చిత్తశుద్ది ఏంటో అర్థం అవుతోందని ఆగ్రహం వ్యక్తం చేశారు. సభా సాంప్రదాయాలను కాపాడాల్సిన స్పీకర్ తీరు సరిగ్గా లేదన్నారు. ఇలాంటి రాజ్యం చెల్లబోదని స్పష్టం చేశారు.

రాష్ట్రంలో ప్రశాంతత లేదనడానికి రోజూ తమ దగ్గరకు వస్తున్న ప్రజలే నిదర్శనమన్నారు ఈటల. రోజూ వందల మంది కలిసి తమ బాధలు చెబుతున్నారని.. వాటి గురించి అసెంబ్లీలో ప్రస్తావించమని అడిగారని వివరించారు. కానీ, చాలా తక్కువ రోజులే సమావేశాలు నిర్వహించడం ఏంటని ప్రశ్నించారు. ప్రజా సమస్యలపై చర్చించాలన్న సోయి ప్రభుత్వానికి లేదని విమర్శించారు. రాష్ట్రంలో అనేక రకాల సమస్యలున్నాయని చెప్పారు.

‘‘వరదలు వచ్చి లక్షల ఎకరాల పంట నష్టం జరిగింది. జనం, పశువులు కొట్టుకుపోయారు. భారీగా ఆస్తినష్టం జరిగింది. ప్రభుత్వం నిమ్మకు నీరెత్తినట్టుగా వ్యవహరిస్తోంది. నేను వరంగల్, హన్మకొండ, హుజూరాబాద్ లో పర్యటించా. బాధితుల బాధలు చూస్తుంటే నాకు కన్నీళ్లు ఆగలేదు. ప్రజలకు అండగా పరిహారం ఇవ్వాలి. కేసీఆర్ వల్లే మంచిర్యాల మునిగిపోయింది. కాళేశ్వరం కట్టకముందు సుభిక్షంగా ఉన్నామని జనం అంటున్నారు. చెక్ డ్యాముల వల్ల నీళ్లు వెనక్కి తన్ని గ్రామాలు మునిగిపోతున్నాయి. తక్షణమే దీనిపై ప్రభుత్వం సమాధానం చెప్పాలి’’ అని డిమాండ్ చేశారు రాజేందర్.

కేసీఆర్ పాలనలో ఆర్టీసీ సర్వనాశనం అయిందన్నారు. ‘‘కొత్త ఉద్యోగాలు ఇవ్వలేదు. బస్సులు ప్రైవేట్ పరం చేశారు. ఇప్పుడు లక్షల కోట్ల ఆస్తులపై కన్నేశారు’’ అని మండిపడ్డారు. సీఆర్పీల జీతం పెంచాలని డిమాండ్ చేశారు. ఇతర రాష్ట్రాల్లో 30వేలకు పైనే ఉన్న వారి జీతం తెలంగాణలో మాత్రం 19వేలే అని తెలిపారు ఈటల రాజేందర్.

తెలంగాణ అసెంబ్లీ సమావేశాలు గురువారం ప్రారంభమయ్యాయి. కంటోన్మెంట్‌ ఎమ్మెల్యే దివంగత సాయన్న సంతాప తీర్మానాన్ని సీఎం కేసీఆర్ సభలో ప్రవేశపెట్టారు. ఈ సందర్భంగా నేతలందరూ సాయన్నకు నివాళులర్పించారు. సాయన్న సేవలను స్మరించుకున్నారు సీఎం. ఆయన లేని లోటు పూడ్చలేనిదని.. కంటోన్మెంట్‌ ను జీహెచ్‌ఎంసీలో కలపాలని పరితపించారని గుర్తు చేశారు. అనంతరం స్పీకర్ పోచారం శ్రీనివాస్‌ రెడ్డి సభను శుక్రవారం ఉదయం 10 గంటలకు వాయిదా వేశారు.

అయితే.. ఈ సమావేశాల సందర్భంగా ఓ ఆసక్తికర సన్నివేశం జరిగినట్టు చర్చ జరుగుతోంది. బీజేపీ రాష్ట్ర ఎన్నికల నిర్వహణ కమిటీ చైర్మన్, ఎమ్మెల్యే ఈటల రాజేందర్ సీటు వద్దకు మంత్రి కేటీఆర్ వెళ్లి ఆప్యాయంగా ఆలింగనం చేసుకున్నట్టు తెలుస్తోంది. దాదాపు పది నిమిషాల పాటు వీళ్లిద్దరూ మాట్లాడుకున్నట్టు సమాచారం.

గత బడ్జెట్ సమావేశాల సమయంలోనూ ఇలాగే జరిగింది. అప్పట్లో ఎమ్మెల్యేలు ఈటల రాజేందర్, రఘునందన్ రావు, రాజాసింగ్ ఉన్న దగ్గరికి ప్రత్యేకంగా వచ్చి కేటీఆర్ పలకించారు. ఈటలతో స్పెషల్‌ గా మాట్లాడారు. హుజూరాబాద్‌ ‌లో జరిగిన అధికారిక కార్యక్రమంలో ఎందుకు పాల్గొనలేదని అడిగారు. దానికి తనను ఎవ్వరూ పిలవ లేదంటూ బదులిచ్చారు ఈటల. ఆ సమయంలో ఈ వార్త వైరల్ అయింది. ఇప్పుడు మరోసారి వీరిద్దరూ కలిసి మాట్లాడుకున్నట్టు వార్తలు వస్తున్నాయి.

తెలంగాణ అసెంబ్లీ సమావేశాలు గురువారం ప్రారంభం అయ్యాయి. కేసీఆర్ సర్కార్ కు ఈ టర్మ్ లో ఇవే చివరి సమావేశాలు. ఇంకో రెండు మూడు నెలల్లో ఎన్నికలు ఉంటాయి. గత ఎన్నికల ఓటింగ్ 2018లో డిసెంబరు 7న జరిగింది. ఈసారి కూడా డిసెంబర్ 7న ఎలాంటి పండుగలు లేకపోతే అదే రోజు జరిగే ఛాన్స్ ఉందని అంటున్నారు. లేకపోతే, రెండు రోజులు అటు ఇటుగా ఉంటుంది. ఈసారి చివరి అసెంబ్లీ సమావేశాలు కావడంతో వార్ కి దిగాయి అధికార, విపక్ష పార్టీలు.

సమావేశాల సందర్భంగా అసెంబ్లీకి వచ్చిన మంత్రి మల్లారెడ్డి మీడియాతో చిట్ చాట్ నిర్వహించారు. ఈ సందర్భంగా హాట్ కామెంట్స్ చేశారు. తన అసెంబ్లీ సెగ్మెంట్ లో టికెట్ పై స్పందించిన ఆయన.. మేడ్చల్ నియోజకవర్గంలో ఏ పార్టీలో ఎవరు అభ్యర్థిగా పోటీ చేయాలో తానే డిసైడ్ చేస్తానని చెప్పారు. కాంగ్రెస్ పార్టీలో కూడా ఎవరు అభ్యర్థిగా ఉండాలో తానే చూసుకుంటానని అన్నారు.

గత ఎన్నికల్లో కిచ్చన్నగారి లక్ష్మా రెడ్డికి తానే టికెట్ ఇప్పించానని చెప్పారు మల్లారెడ్డి. కాంగ్రెస్ అధిష్టానంలో తనకు దోస్తులు ఉన్నారని.. బీజేపీ, కాంగ్రెస్ దగ్గర డబుల్ బెడ్ రూమ్ అంశం తప్ప వేరే సబ్జెక్టు లేదని విమర్శించారు. తాను చేసిన అభివృద్ధి ప్రజలు మర్చిపోయేలా చేయాలనే కుట్రలు చేస్తున్నారని.. ప్రతిపక్షాలు రెచ్చగొట్టేలా చేస్తున్నాయని మండిపడ్డారు. మంత్రివర్గ విస్తరణ అంటే మల్లారెడ్డి పోస్ట్ ఉడుతుంది అనే ప్రచారం కూడా చేశారని అన్నారు. అయితే.. రేవంత్ రెడ్డిపై తాను తొడగొట్టిన తరువాత గ్రాఫ్ పెరిగిందని తెలిపారు.

మీడియాలో తనపై కక్షపూరితంగా అసత్య ప్రచారం చేయిస్తున్నారని.. ఏడాదికి నాలుగు తెలంగాణ యాస సినిమాలు తీస్తానని చెప్పారు. ఏది జరిగినా అంతా మన మంచికే అనుకోవాలన్నారు మల్లారెడ్డి. 2018 ఎన్నికల్లో మల్లారెడ్డి మేడ్చల్ నుంచి పోటీ చేసి గెలిచారు. కాంగ్రెస్ తరఫున కిచ్చన్నగారి లక్ష్మా రెడ్డి పోటీ చేశారు. మల్లారెడ్డికి 167,324 ఓట్లు రాగా, లక్ష్మా రెడ్డికి 79,334 ఓట్లు వచ్చాయి.