Politics

తిమ్మిని బ‌మ్మిని చేయ‌డంలో సీఎం కేసీఆర్ దిట్ట అని విప‌క్షాలు త‌ర‌చూ విమ‌ర్శ‌లు చేస్తుంటాయి. ఎన్నిక‌ల స‌మ‌యంలో ఆయ‌న చేసే ప‌నులు, తీసుకునే నిర్ణ‌యాలే అందుకు నిద‌ర్శ‌నంగా చెబుతుంటాయి. ఇంకో నాలుగైదు నెల‌ల్లో ఎన్నిక‌లు ఉన్నాయి. ప్ర‌తిప‌క్ష పార్టీలన్నీ గెలుపు వ్యూహాల్లో త‌ల‌మున‌క‌ల‌వ్వ‌గా.. కేసీఆర్ వారి ఎత్తుల‌కు పై ఎత్తులు వేసే ప‌నిలో ప‌డ్డారు. ఎలాగైనా, ఏ విధంగానైనా మూడోసారి గెల‌వాల‌ని చూస్తున్నారు. అయితే.. కేసీఆర్ చ‌ర్య‌ల‌ను ఎన్నిక‌ల స్టంట్ గానే ప్ర‌జ‌లు భావించి త‌గిన బుద్ధి చెప్పాల‌ని విప‌క్ష నేత‌లు కోరుతున్నారు.

చాలా రోజుల త‌ర్వాత సుదీర్ఘ కేబినెట్ మీటింగ్ నిర్వ‌హించారు కేసీఆర్. దాదాపు 50 అంశాల‌పై చ‌ర్చించార‌ని వార్త‌లు వ‌స్తున్నాయి. అయితే.. అన్నింటిలోనూ హైలైట్ అయిన అంశం ప్ర‌భుత్వంలో ఆర్టీసీ విలీనం. అవును, ఎన్నో ఏళ్లుగా కార్మికులు దీనికోసం ఎదురుచూస్తున్నారు. ఎన్నిక‌లు ద‌గ్గ‌ర ప‌డిన ఈ స‌మ‌యంలో కేసీఆర్ ఈ నిర్ణ‌యం తీసుకోవ‌డం కార్మికుల‌పై ప్రేమ కాద‌ని.. ముమ్మాటికీ ఇది ఎల‌క్ష‌న్ డ్రామా అని విప‌క్ష నేత‌లు అంటున్నారు. కేసీఆర్ ట్రాప్ లో ప‌డొద్ద‌ని సూచిస్తున్నారు.

తెలంగాణలో అతి పెద్ద వ్యవస్థగా ఉంది ఆర్టీసీ. ఇందులో ప‌ని చేసే ఉద్యోగులను సంతృప్తి పరిస్తే ప్రత్యక్షంగా వేల మంది, పరోక్షంగా వారిపై ఆధారపడిన లక్షల మంది బీఆర్ఎస్ వైపు మ‌ళ్లుతార‌నేది కేసీఆర్ ప్లాన్ గా చెబుతున్నారు ప్ర‌తిప‌క్ష నేత‌లు. కేవ‌లం ఓట్ల కోస‌మే ఎన్నిక‌లు ద‌గ్గ‌ర ప‌డిన ఈ స‌మ‌యంలో ఈ నిర్ణ‌యం తీసుకున్నార‌ని వివ‌రిస్తున్నారు. కేసీఆర్ కు కార్మికుల‌పై అంత చిత్త‌శుద్దే ఉంటే.. ఈ విలీనం ఎప్పుడో చేసేవార‌ని అంటున్నారు. గ‌తంలో ఆంధ్రప్రదేశ్ లో ఆర్టీసీ ఉద్యోగులను ప్రభుత్వంలో విలీనం చేసినప్పుడు తమను కూడా చేయాలంటూ ఇక్క‌డి ఉద్యోగులు పోరుకు దిగారు. ఆ స‌మ‌యంలో కేసీఆర్ చేసిన వ్యాఖ్య‌లు, ఉద్య‌మంపై ఆయ‌న చేసిన కన్నెర్ర ఎవ‌రూ మ‌ర్చిపోర‌ని గుర్తు చేస్తున్నారు విప‌క్ష నేత‌లు.

ఇప్ప‌టికీ జీతాలు 15వ తేదీ దాటితే గానీ ఇవ్వ‌డం లేద‌ని.. కేసీఆర్ వ‌ల్ల ఎంతోమంది ఆర్టీసీ ఉద్యోగులు అప్పుల‌పాల‌య్యార‌ని విమ‌ర్శిస్తున్నారు. మెట్రో పేరుతో న‌గ‌ర‌వాసుల ఓట్ల‌కు గాలం వేసిన కేసీఆర్.. ఇప్పుడు విలీనం పేరుతో ఉద్యోగుల‌తో డ్రామా చేస్తున్నార‌ని అంటున్నారు. రాష్ట్రంలో ఆర్టీసీకి ల‌క్ష కోట్ల వ‌ర‌కు ఆస్తులున్నాయి. మ‌రోసారి కేసీఆర్ ని గెలిపిస్తే.. ప్ర‌భుత్వ భూములు వేలం వేసిన‌ట్టే.. ఆర్టీసీ ఆస్తులు కూడా మాయం చేస్తార‌ని విమ‌ర్శ‌లు చేస్తున్నారు ప్ర‌తిప‌క్ష నాయ‌కులు.

దళిత బంధు.. దేశానికే ఆదర్శం అనేది బీఆర్ఎస్ వాదన. కాదు, ఇది కమీషన్లతో నిండిన దగా అనేది విపక్షాల కౌంటర్. దళితుల అభ్యున్నతి అని ప్రభుత్వం అంటుంటే.. ఇది బీఆర్ఎస్ వాళ్ల అభ్యున్నతే అని ప్రతిపక్షాలు అంటున్నాయి. ఈసారి ఎన్నికల్లో ఈ పథకమే ప్రధాన ఎజెండాగా కారు పార్టీ సమరానికి కాలు దువ్వాలని చూస్తుంటే.. అందులో జరుగుతున్న అవినీతిని హైలైట్ చేయాలని విపక్ష నేతలు ప్రయత్నాల్లో ఉన్నారు. అయితే.. ప్రభుత్వం అనుకున్నట్టు రెండో విడత దళిత బంధు పంపిణీ విషయంలో అడుగు ముందుకు పడడం లేదు.

జులై నెల నుంచి పంపిణీ ప్రారంభించాలని కేసీఆర్ అనుకున్నారు. కానీ, జులై నెల అయిపోయింది గానీ, ఆ దిశగా చర్యలు తీసుకున్నది లేదు. దీనికి కారణం నిధుల సర్దుబాటులో జాప్యం అనే ప్రచారం సాగుతోంది. హుజూరాబాద్ ఉప ఎన్నికలో ఈటల రాజేందర్ ను ఓడించాలన్న ఒకే ఒక్క లక్ష్యంతో దళిత బంధు పథకానికి శ్రీకారం చుట్టారు సీఎం కేసీఆర్. నియోజకవర్గంలో దళితులు అధికంగా ఉండడంతో ఈ పథకం ప్లస్ అవుతుందని భావించారు. కానీ, వర్కవుట్ కాలేదు. జనం ఈటల వైపే నిలబడ్డారు. కేసీఆర్ కు దిమ్మ తిరిగే ఫలితాన్నిచ్చారు. హుజూరాబాద్ లో గులాబీ జెండా ఎగురవేయాలని కేసీఆర్ చేసిన ఏ ప్రయత్నమూ ఫలించలేదు. దాని కారణంగా ఈటల చేతిలో ఘోర పరాభవం తప్పలేదు.

దళిత బంధు సాయం కింద ప్రభుత్వం ఒక్కో లబ్ధిదారుకు రూ.10 లక్షలు ఇవ్వాల్సి ఉంటుంది. హుజూరాబాద్​ నియోజకవర్గం మొత్తానికి అప్పట్లో పైలట్​ ప్రాజెక్ట్ ​గా ఈ స్కీంను అమలు చేశారు. మిగతా సెగ్మెంట్లలో ఒక్కో చోట వంద మందికి, మరో నాలుగు మండలాల్లో పూర్తిస్థాయిలో అమలు చేశారు. అనంతరం ఏటా 1.77 లక్షల మందికి స్కీమ్​ అమలు చేస్తామని చెప్పారు. ఈ క్రమంలో 2022–23 బడ్జెట్ ​లో నిధులను కూడా కేటాయించారు. కానీ, ఆ ఆర్థిక సంవత్సరంలో ఒక్కరికి కూడా ఇవ్వలేదు. ఇప్పుడు ఎన్నికలు దగ్గరలో ఉన్న నేపథ్యంలో రెండో విడతలో భాగంగా హుజూరాబాద్ మినహా మిగిలిన నియోజకవర్గాల్లో పథకాన్ని అమలు చేయాలనేది కేసీఆర్ ప్లాన్ గా కనిపిస్తోందనే వార్తలు వస్తున్నాయి. దీనికోసం అధికారులు లెక్కలు కడుతున్నారట. అయితే.. నిధుల కొరత కారణంగా ఎక్కువమంది దళిత బంధు ఇచ్చే పరిస్థితి లేదనే చర్చ జరుగుతోంది.

గత నెలలో అర్హుల ఎంపిక ప్రక్రియపై ఉత్తర్వులు జారీ చేసింది ప్రభుత్వం. నియోజకవర్గానికి 1,100 దళిత కుటుంబాలకు ఈ స్కీం​ ను అమలు చేస్తామని, జిల్లాల కలెక్టర్లు నియోజకవర్గాల్లో సంబంధిత ఎమ్మెల్యే, అధికారులతో కలిసి ఎంపిక చేస్తారని పేర్కొంది. కానీ, ఏదీ అనుకున్నట్టు జరగడం లేదనే ప్రచారం జరుగుతోంది. రాష్ట్ర ఖజానాను నిధుల కొరత వెంటాడుతుండడంతో దళితులకు రూ.10 లక్షలు విడతల వారీగా ఇస్తే ఎలా ఉంటుందనే చర్చ ప్రగతి భవన్ లో జరుగుతున్నట్టు సమాచారం. ఒక్కో సెగ్మెంట్​ లో వంద మందికి ఒకేసారి రూ.10 లక్షలు ఇస్తే రూ.1,180 కోట్లు అవసరం అవుతాయి. అదే ఒక్కో సెగ్మెంట్​ లో 200 మందికి అంటే రూ.5 లక్షలు జమ చేస్తే కూడా అంతే మొత్తం అవుతుంది. ఇక రూ.3 లక్షల చొప్పున ఇస్తే నియోజకవర్గానికి 333 మందికి ఇవ్వొచ్చని అధికారులు లెక్కలు కట్టినట్టు తెలుస్తోంది. ప్రభుత్వం ఇచ్చే నిధులను బట్టే దళిత బంధు పంపిణీ ఉంటుంది.

మరోవైపు, ఈ స్కీం అంతా కమీషన్లే అని విపక్షాలు టార్గెట్ చేస్తున్నాయి. ఈ పథకం వచ్చిన కొత్తల్లో అంతా ఎమ్మెల్యేల మీదే పెట్టింది ప్రభుత్వం. దీంతో కొందరు.. లబ్ధిదారుల నుంచి కమీషన్లు తీసుకున్నట్లు ఆరోపణలు వచ్చాయి. ఇది ప్రభుత్వానికి చెడ్డ పేరును తెచ్చిపెట్టింది. ఒకానొక సమయంలో సీఎం కేసీఆరే ఎమ్మెల్యేలకు వార్నింగ్ ఇచ్చిన పరిస్థితి. అర్హుల ఎంపిక ప్రక్రియను కలెక్టర్లే చూసుకుంటే బెటర్ అనే వాదన తెరపైకి వచ్చినా.. మళ్లీ మంత్రులు, ఎమ్మెల్యేలతో సంప్రదింపులు జరిపి, వారు ఇచ్చిన లిస్టును పరిగణనలోకి తీసుకోవాలని కలెక్టర్లకు కేసీఆర్ చెప్పారు. అయితే.. ఈ పథకం అంతా ఎన్నికల స్టంటే అంటూ ప్రతిపక్ష నేతలు విమర్శలు గుప్పిస్తున్నారు.

బీజేపీ లీడ‌ర్ ఈట‌ల రాజేందర్ దూకుడు పెంచారు. రాష్ట్రంలోని వ‌ర‌ద ప్ర‌భావిత ప్రాంతాల్లో ప‌ర్య‌ట‌న‌లు చేస్తున్నారు. బాధితుల‌ను ప‌రామ‌ర్శించి ప్ర‌భుత్వాన్ని టార్గెట్ చేస్తూ విమ‌ర్శ‌లు చేస్తున్నారు. కేసీఆర్ గ‌తంలో ఇచ్చిన హామీల‌ను గుర్తు చేస్తూ విమ‌ర్శ‌ల దాడి కొన‌సాగిస్తున్నారు.

శ‌నివారం హుజూరాబాద్ నియోజ‌క‌వ‌ర్గంలోని వ‌ర‌ద ప్ర‌భావిత ప్రాంతాల‌కు వెళ్లారు ఈట‌ల‌. జమ్మికుంట, ఇల్లంత‌కుంట మండలాల్లో ప‌ర్య‌టించారు. పాతర్లపల్లి ఊరికి వెళ్ళే బ్రిడ్జి తెగిపోవడంతో అక్క‌డికి వెళ్లి ప‌రిశీలించారు. వరద ఉధృతికి మునిగిన ఇళ్ళను చూసి ఆవేద‌న చెందారు. వర్షాలకు తెగిన రోడ్లు, బ్రిడ్జి, కల్వర్టులను పరిశీలించారు. జమ్మికుంట హౌసింగ్ బోర్డు, అంబేద్కర్ కాలనీల్లో ఇండ్లు నీట మునిగిన బాధితులను పరామ‌ర్శించారు.

వ‌ర‌ద‌ల‌తో జ‌నం చ‌స్తున్నా.. బాధితుల పట్ల ప్రభుత్వ స్పందన కరువైంద‌ని విమ‌ర్శించారు రాజేంద‌ర్. బాధితుల‌ను ఫంక్షన్ హాల్లో పెట్టి అన్నం పెట్టారని.. పరిహారానికి మాత్రం దిక్కు లేదన్నారు. ఒక్కో బాధిత కుటుంబానికి రూ.25 వేలు ఆందజేయాలని డిమాండ్ చేశారు. తెగిన రోడ్లు, చెరువులు, కల్వల ప్రాజెక్ట్ మరమ్మత్తులు చేపట్టాలని డిమాండ్ చేశారు. చెరువుల కింద ఉన్న వ్యవసాయ భూములు కోతకు గురయ్యాయని.. ప్రభుత్వం మాటలు గొప్పగా ఉంటాయని.. చేతల్లో మాత్రం ఏమీ ఉండ‌ద‌ని ఎద్దేవ చేశారు ఈట‌ల‌.

శుక్ర‌వారం కూడా వ‌రంగ‌ల్, భూపాల‌ప‌ల్లి జిల్లాల్లో ప‌ర్య‌టించారు. వరంగల్ లాంటి నగరాలను, ఇతర పట్టణాలను లండన్, డల్లాస్, న్యూయార్క్ చేస్తామని కేసీఆర్ ఇచ్చిన హామీలన్నీ హామీలుగానే మిగిలిపోయాయని విమర్శించారు. కేసీఆర్ హయాంలోనే ఈ దుస్థితి కొనసాగుతూనే ఉందని, నిజాయితీగా పని చేయడం ఆయనకు చేతకాదన్నారు. హైదరాబాద్ లో వరదలప్పుడు 10 వేల రూపాయలు ఎలా ఇచ్చారో ఇప్పుడు ఉమ్మడి వరంగల్, ఖమ్మం వరద ప్రాంతాలలో అందించాలని డిమాండ్ చేశారు.

ఇక భూపాలపల్లి జిల్లా మోరంచపల్లి వరద బాధిత కుటుంబాలను క‌లిశారు రాజేంద‌ర్. ప్రకృతి వైపరీత్యానికి ఎవరూ కారణం కాదని, కాకపోతే బాధిత కుటుంబాలను ఆదుకోవడంలో ప్రభుత్వం నిర్లక్ష్యం కనిపిస్తోందన్నారు. ప్రభుత్వం ఇక్క‌డి వరద బాధితులకు పది లక్షల రూపాయల ఆర్థిక సహకారం అందించాలని డిమాండ్ చేశారు. తమ పార్టీ పరంగా గ్రామస్తులను ఆదుకుంటున్నామని చెప్పారు. మోరంచపల్లి గ్రామస్తులను అప్రమత్తం‌ చేయడంలోనూ, ముంపు తర్వాత సహాయక చర్యల్లోనూ ప్రభుత్వ వైఫల్యం కనిపిస్తోంద‌ని ఆరోపించారు ఈట‌ల రాజేంద‌ర్.

తెలంగాణ స‌హా త్వ‌ర‌లో ఐదు రాష్ట్రాల‌కు ఎన్నిక‌లున్నాయి. స‌మ‌యం ద‌గ్గ‌ర ప‌డేకొద్దీ ఆయా రాష్ట్రాల పార్టీలు గెలుపు వ్యూహాల్లో మునిగిపోయాయి. భారీ మార్పుల‌కు శ్రీకారం చుడుతున్నాయి. ముఖ్యంగా బీజేపీ ఈ విష‌యంలో ఓ అడుగు ముందుకే ఉంది. అసెంబ్లీ ఎన్నిక‌లు, 2024 సార్వ‌త్రిక ఎన్నిక‌లను దృష్టిలో పెట్టుకుని కీల‌క నాయ‌కుల‌కు పోస్టులు కేటాయిస్తోంది. మ‌రీ ముఖ్యంగా తెలంగాణ‌పై ఫుల్ ఫోక‌స్ పెట్టిన‌ట్టు క‌నిపిస్తోంది.

ఈమ‌ధ్యే తెలంగాణ బీజేపీలో భారీ మార్పులు చోటు చేసుకున్నాయి. ఏకంగా పార్టీ అధ్య‌క్షుడ్నే మార్చింది అధిష్టానం. అంతేకాదు, పార్టీ రాష్ట్ర ఎన్నిక‌ల నిర్వ‌హ‌ణ క‌మిటీ చైర్మ‌న్ పోస్ట్ ను తెర‌పైకి తెచ్చింది. అధ్య‌క్షుడిగా బండిని తొల‌గించి కిష‌న్ రెడ్డికి ప‌గ్గాలు అప్ప‌గించింది. అలాగే, ఎన్నిక‌ల నిర్వ‌హ‌ణ క‌మిటీ బాధ్య‌త‌ల‌ను ఈట‌ల రాజేంద‌ర్ కు ఇచ్చింది. ఈ మార్పుతో బీజేపీ నేత‌ల్లో భిన్న వాద‌న‌లు వినిపించినా.. అధిష్టానం నిర్ణ‌యానికి వారు స‌రేన‌న్నారు. అయితే.. కార్య‌క‌ర్తల్లో మాత్రం ఎలాంటి భేదాభిప్రాయాలు లేవ‌నేది రాజ‌కీయ పండితుల వాద‌న‌.

ఈట‌ల రాజేంద‌ర్ కు అన్ని వ‌ర్గాల ప్ర‌జ‌ల్లో ఫాలోయింగ్ ఉంది. ముఖ్యంగా ముదిరాజ్ క‌మ్యునిటీ, బ‌డుగు బ‌ల‌హీన వ‌ర్గాల వారు ఆయ‌న్ను బాగా న‌మ్ముతారు. ఈ లెక్క‌ల‌న్నీ వేసుకునే అధిష్టానం వ‌చ్చే ఎన్నిక‌ల్లో పార్టీ విజ‌యం కోసం ఈట‌ల‌ను ముందుంచుతోంద‌ని.. అందుకే కార్య‌క‌ర్త‌లు హైక‌మాండ్ నిర్ణ‌యాన్ని స్వాగ‌తించార‌ని చెబుతున్నారు విశ్లేష‌కులు. ఇటు అధ్య‌క్ష ప‌ద‌వి నుంచి త‌మ నాయ‌కుడిని తొల‌గించార‌నే అస‌హ‌నంతో ఉన్న బండి వ‌ర్గాన్ని కూడా చ‌ల్ల‌బ‌రిచేందుకు కేంద్ర నాయ‌క‌త్వం కీల‌క నిర్ణ‌యం తీసుకుంది.

ఐదు రాష్ట్రాల అసెంబ్లీ ఎన్నికలు సమీపిస్తున్న ఈ స‌మ‌యంలో పలువురి హోదాలు మార్పు చేసి.. సీనియర్​ నేతలకు ముఖ్యమైన ప‌ద‌వులను కట్టబెట్టింది. బీజేపీ జాతీయ ప్రధాన కార్యదర్శిగా బండి సంజయ్ ని నియమించింది. అలాగే,
జాతీయ ఉపాధ్యక్షురాలిగా డీకే అరుణ నియమితులయ్యారు. ఇందుకు సంబంధించిన వివరాలను పార్టీ జాతీయాధ్యక్షుడు జేపీ నడ్డా విడుదల చేశారు. జాతీయ ప్రధాన కార్యదర్శులుగా తరుణ్‌ చుగ్‌, సునీల్‌ బన్సల్ ను కొనసాగించనున్నట్లు అధిష్టానం వెల్లడించింది. అలాగే, పార్టీ వ్యవహారాల ప్రధాన కార్యదర్శిగా బీఎల్‌ సంతోష్‌, సంస్థాగత వ్యవహారాల ఉప ప్రధాన కార్యదర్శిగా శివప్రకాశ్ ను కొనసాగించనున్నట్లు ప్రకటించింది. మొత్తానికి రానున్న అసెంబ్లీ, సార్వ‌త్రిక ఎన్నిక‌ల‌ను దృష్టిలో పెట్టుకుని బీజేపీ హైక‌మాండ్ భారీ మార్పుల‌కు దిగింది. ఇవి పార్టీని గెలుపు దిశ‌గా ప‌య‌నించేలా చేస్తాయ‌ని పార్టీ కార్య‌క‌ర్త‌లు బ‌లంగా న‌మ్ముతున్న‌ట్టు అంచ‌నా వేస్తున్నారు విశ్లేష‌కులు.

చినుకు పడితే హైదరాబాద్ వాసుల గుండెల్లో వణుకు మొదలవుతుంది. రోడ్లపైకి నీరు చేరి ఎక్కడ గొయ్యి ఉందో, ఎక్కడ మ్యాన్ హోల్ ఉందో అని బిక్కుబిక్కుమంటూ వాహనాన్ని ముందుకు నడిపించాల్సి వస్తోంది.
ఈ పాపం ఎవరిది?
ఏళ్లు గడుస్తున్నా మార్పు ఏది?
ప్రభుత్వం ఏం చేస్తోంది?
ప్రతిపక్షాల వాదనేంటి..?

హైదరాబాద్ మహానగరం.. దేశంలో వేగంగా విస్తరిస్తున్న ప్రాంతం. హైదరాబాద్ చుట్టుపక్కల జిల్లాల్లో చాలా భాగం నగరంలో కలిసిపోయింది. భూముల ధరలు ఆకాశాన్నంటుతున్నాయి. పెరుగుతున్న జనాభాకు తగ్గట్టు అపార్ట్ మెంట్ కల్చర్ విపరీతంగా పెరుగుతోంది. దీంతో రియల్ ఎస్టేట్ వ్యాపారులు రెచ్చిపోతున్నారు. ఖాళీ జాగా కనిపిస్తే చాలు సక్రమంగా.. లేదంటే అక్రమంగా ప్లాట్స్ చేసేస్తున్నారు. భవనాలు లేపేస్తున్నారు. దీని ఫలితంగా నాలాలు కబ్జాలకు గురవుతున్నాయి. ఇంకేముంది, వాన పడితే వరద నీరు ఎటు పోవాలో దారి లేక ఇళ్లలోకి కొత్త దారులు వెతుక్కుంటోంది.

వరదలొచ్చినప్పుడల్లా నాలాల అభివృద్ధి, కబ్జాలపై కొరడా అనే వార్తలు ప్రభుత్వం సైడ్ నుంచి వినిపిస్తున్నా.. కార్యాచరణ అమలులో మాత్రం జాప్యం జరుగుతోందనే విమర్శలు ఉన్నాయి. పైగా బీఆర్ఎస్ నేతలే విచ్చలవిడిగా కబ్జాలకు పాల్పడుతున్నారని ప్రతిపక్షాలు ఆరోపిస్తున్నాయి. హైదరాబాద్‌ ను డల్లాస్‌, ఓల్డ్‌ సిటీని ఇస్తాంబుల్‌ చేస్తామని ప్రగల్బాలు పలికిన ప్రభుత్వం.. నగరాన్ని నరక కూపంగా మార్చిందని విమర్శిస్తున్నాయి. గ్రేటర్‌ పరిధిలోని బీఆర్‌ఎస్‌ నేతలు ఇష్టానుసారం భూములు, చెరువులను కబ్జా చేస్తూ అడ్డగోలుగా అక్రమ నిర్మాణాలు చేపడుతున్నారని ఆరోపిస్తున్నాయి.

బీఆర్ఎస్ 9ఏళ్ల పాలనలో నగరంలో సౌకర్యాల కల్పనకు అవసరమైన చర్యలు చేపట్టలేదనేది ప్రతిపక్ష నేతల వాదన. కానీ, ప్రభుత్వం ప్రచారం మాత్రం పీక్స్ లో చేసుకుంటోందని.. నిజంగా ఈ అంశంలో అంత అభివృద్ధి జరిగితే.. ఐటీ కారిడార్‌ నుంచి హయత్‌ నగర్‌ దాకా ట్రాఫిక్‌ జామ్స్ ఎందుకవుతున్నాయని ప్రశ్నిస్తున్నారు. ట్రాఫిక్‌ సమస్యలతో ప్రజలు నానా యాతన పడుతున్నారని.. కేవలం 10 నిమిషాల ప్రయాణానికి 2 గంటల సమయం పడుతోందని ఫైరవుతున్నారు. స్ర్టాటజిక్‌ రోడ్లు అంటూ హడావుడి చేసినదంతా డొల్లేనని తేలిపోయిందని విమర్శిస్తున్నారు.

మరోవైపు, నగరంలో అభివృద్ధిని ఓవైపుకే పరిమితం చేయడం కూడా నగరవాసుల ట్రాఫిక్ నరకానికి కారణంగా చెబుతున్నారు విపక్ష నేతలు. నలుదిక్కులా అభివృద్ధి జరిగి ఉంటే జనానికి ఇన్ని బాధలు తప్పేవని చెబుతున్నారు. పైగా, పెరుగుతున్న వాహనాల సంఖ్యకు అనుగుణంగా రహదారుల అభివృద్ధి అంతంత మాత్రంగానే ఉందని అంటున్నారు ప్రతిపక్ష నేతలు. ముమ్మాటికీ గులాబీ సర్కార్ ఫెయిల్ అయిందని చెబుతున్నారు.

రైతులకు మెరుగైన సేవలు అందించేందుకు కేంద్ర ప్రభుత్వం మరో ముందుడుగు వేసింది. లక్షా 25 వేల ప్రధాన మంత్రి కృషి సంవృద్ది కేంద్రాలను పీఎం మోడీ ప్రారంభించారు. రాజస్థాన్​ సికర్ ​లో జరిగిన ఈ కార్యక్రమంలో ఆయన పాల్గొని ప్రసంగించారు. ఈ కేంద్రాలను వన్​ స్టాప్ కేంద్రాలుగా అభివర్ణించారు. పీఎం కిసాన్ సమ్మాన్ నిధి 14వ విడత నిధులను కూడా విడుదల చేశారు. ఈ కార్యక్రమంలో భాగంగా షాద్ నగర్ బస్టాండ్ వద్ద ఉన్న గణేష్ అగ్రో ఏజెన్సీస్ లో ఏర్పాటు చేసిన లైవ్ ప్రోగ్రాంలో బీజేపీ ఎన్నికల నిర్వహణ కమిటీ చైర్మన్ ఈటల రాజేందర్ పాల్గొన్నారు.

ప్రధాని మోడీ 11 కోట్ల మంది రైతులకు ప్రధాని సమ్మాన్ నిధి ఇచ్చి ఆదుకుంటున్నారని తెలిపారు. ప్రపంచ మార్కెట్లో ఎరువుల ధర పెరిగినా మన దేశంలో పెరగకుండా సబ్సిడీతో అన్నదాతలకు అందిస్తున్నారని వివరించారు. ఓ యూరియా బస్తా 2503 రూపాయలు ఉంటే 2236 రూపాయల సబ్సిడీ ఇచ్చి రైతులకు 267 రూపాయలకు కేంద్రం అందిస్తోందని తెలిపారు. అలాగే, డీఏపీ బస్తా 3711 రూపాయలు ఉంటే 2422 రూపాయల సబ్సిడీ ఇచ్చి 1300 రూపాయలకే ఇస్తోందన్నారు.

అమెరికాలో యూరియా బస్తా 3 వేల రూపాయలు, పాకిస్థాన్ లో 800, బంగ్లాదేశ్ లో 720 రూపాయలకు అందిస్తుంటే మన దేశంలో మాత్రం 267 రూపాయలకే అందిస్తున్నారని వివరించారు ఈటల. యూరియా, డీఏపీ, 20-20లతో సంవత్సరానికి ఒక ఎకరానికి 20 వేల రూపాయల వరకు బీజేపీ సర్కార్ సబ్సిడీ ఇస్తోందని తెలిపారు. అలాగే, పెట్టుబడి సాయంగా 6 వేల రూపాయలు ప్రతి ఎకరానికి సమ్మాన్ నిధి కింద అందిస్తోందన్నారు. రైతులకు అవసరం అయిన అన్ని వస్తువులు, ఎరువులు, విత్తనాలు ఒకే దగ్గర లభించేలా 1.25 లక్షల షాపులు ప్రారంభించుకోవడం సంతోషంగా ఉందని చెప్పారు.

పంటకి 5 వేల రూపాయలు ఇచ్చి అన్నీ తానే ఇచ్చానని కేసీఆర్ చెప్పుకుంటారని మండిపడ్డారు ఈటల. కేసీఆర్ వచ్చాక సబ్సిడీ విత్తనాలు లేవు, ఎరువులు లేవన్నారు. అనేక పనిముట్ల సబ్సిడీ తొలగించారని మండిపడ్డారు. కిసాన్ సర్కార్ అంటే ఇదేనా? అంటూ ప్రశ్నించారు. కౌలు రైతులు ఆత్మహత్య చేసుకుంటే 5 పైసలు ఇవ్వని కేసీఆర్ మన డబ్బులు తీసుకెళ్ళి వేరే రాష్ట్రంలో ఇవ్వడం సిగ్గుచేటన్నారు. భారత ప్రభుత్వం పంట నష్టం కోసం ఫసల్ భీమా యోజన స్కీమ్ తీసుకువస్తే రాష్ట్ర ప్రభుత్వం కట్టాల్సిన వాటా కట్టకపోవడం వల్ల ఆ డబ్బులు రావడం లేదని తెలిపారు. హెలికాప్టర్ లో వెళ్ళి అకాల వర్షాలవల్ల పంట నష్టపోయిన వారికి 10 వేలు ఇస్తా అని చెప్పి ఇవ్వకుండా మెసం చేశారని ఆరోపించారు. రాష్ట్రంలోని రైతులందరూ ఈ విషయాలను గమనించాలని కోరారు.

రాష్ట్రంలో వడ్లు కొంటోంది కేంద్రమేనని.. సుతిలి, దబ్బనం, ట్రాన్స్ పోర్ట్, కొనుగోలుకు డబ్బులు, ఇంట్రెస్ట్ కూడా కేంద్రమే ఇస్తోందని వివరించారు రాజేందర్. కానీ, కేసీఆర్ మాత్రం పండిన ధాన్యం కొనడం లేదని ఆరోపించారు. ఆలస్యం కావడం వల్ల వర్షాలకు తడిచి రైతులు నష్టపోతున్నారని.. ఒక చేత్తో 5 వేలు ఇచ్చి ఇంకో చేత్తో ఆ డబ్బులు లాక్కుంటున్నారని మండిపడ్డారు. పేరుకే రైతు ప్రభుత్వం తప్ప చేతల్లో కాదని విమర్శించారు. ప్రజల ఆశీర్వాదంతో రాష్ట్రంలో బీజేపీని గెలిపిస్తే రైతులకు కన్నీళ్లు లేకుండా చేస్తామన్నారు. కౌలు రైతులకు భద్రత కలిపిస్తామని.. సబ్సిడీ విత్తనాలు, ఎరువులు ఇస్తామని హామీ ఇచ్చారు. గ్రామస్వరాజ్యమే తమ లక్షమని మోడీ నిరూపించారని.. కేసీఆర్ మోసపు మాటలు నమ్మవద్దని రైతుల్ని కోరారు ఈటల రాజేందర్.

ఎన్నికలు సమీపిస్తుండడంతో బీఆర్ఎస్ సర్కార్ పై బీజేపీ పోరుబాట ప్రారంభించింది. వంద రోజుల యాక్షన్ ప్లాన్ లో భాగంగా డబుల్ బెడ్రూం ఇళ్ల అంశంలో యుద్ధానికి దిగింది. సోమవారం జిల్లా కలెక్టరేట్ల ఎదుట ధర్నాలకు దిగింది. పార్టీ కీలక నేతలు ఈ ధర్నాల్లో పాల్గొన్నారు. హన్మకొండ, వరంగల్ కలెక్టరేట్ల ఎదుట జరిగిన నిరసన కార్యక్రమాల్లో బీజేపీ రాష్ట్ర ఎన్నికల నిర్వహణ కమిటీ చైర్మన్ ఈటల రాజేందర్ పాల్గొన్నారు. కేసీఆర్ సర్కార్ పై తీవ్రస్థాయిలో ధ్వజమెత్తారు.

అబ్ కీ బార్ కిసాన్ సర్కార్ అంటున్న కేసీఆర్.. 2018 ఎన్నికల్లో ఇచ్చిన హామీలను ఎందుకు నెరవేర్చలేదని ప్రశ్నించారు ఈటల. రాష్ట్రంలోని రైతులకు లక్ష రూపాయల రుణ మాఫీ చేస్తానని చెప్పి.. మోసం చేశారని మండిపడ్డారు. కాంగ్రెస్, బీఆర్​ఎస్​ పార్టీల నాయకులు పార్లమెంట్​ లో చెట్టాపట్టాలేసుకొని తిరుగుతున్నారని ఆరోపించారు. కాంగ్రెస్ పార్టీకి ఓటు వేస్తే తిరిగి అది కేసీఆర్ ​కే వెళ్తుందని తెలిపారు. తెలంగాణ కోసం 14 ఏళ్లు పోరాటం చేస్తే చిల్లర ఆరోపణలు చేసి తనను బీఆర్​ఎస్​ పార్టీ నుంచి బయటికి పంపారని ఆవేదన వ్యక్తం చేశారు.

తెలంగాణలో కాషాయ జెండా ఎగురవేస్తామని ధీమా వ్యక్తం చేశారు ఈటల. అహర్నిశలు శ్రమించి పార్టీని గెలిపించాలని వరంగల్ సభలో ప్రధాని మోడీ, జేపీ నడ్డా చెప్పారని.. సీఎం కేసీఆర్ ​ను గద్దె దించడమే తన కర్తవ్యమన్నారు. కేసీఆర్​తో కొట్లాడడానికే తనను రాష్ట్ర ఎన్నికల కమిటీ చైర్మన్ చేశారని తెలిపారు. కట్టిన డబుల్ బెడ్​ రూం ఇండ్లను పంచని బీఆర్ఎస్ నేతలు ఏ ముఖం పెట్టుకుని గ్రామాల్లోకి వెళ్తారని ఎద్దేవ చేశారు. 2023 తర్వాత కేసీఆర్ సర్కార్ పని ఖతమేనన్నారు. మళ్ళీ ఆయనకు ఓటు వేయబోమని పేద ప్రజలు చర్చించుకుంటున్నారని చెప్పారు.

2014లో అధికారంలోకి వచ్చాక కేంద్రం ఆశ్చర్యపోయే రీతిలో డబుల్ బెడ్ రూం ఇండ్లను కట్టిస్తామని కేసీఆర్ గొప్పలు చెప్పారని గుర్తు చేశారు రాజేందర్. ఆనాడు డబుల్ బెడ్ రూం ఇండ్లు సాధ్యం కాదని తాము అప్పుడే చెప్పామన్నారు. డబ్బులిస్తే ప్రజలే కట్టుకుంటారని చెప్పినా.. కేసీఆర్ వినిపించుకోలేదని తెలిపారు. బాట సింగారంలో నిర్మించిన ఇండ్ల గోడలు పెచ్చులూడి పోయాయన్నారు. రెండోసారి అధికారంలోకి వచ్చాక కేసీఆర్ కు కళ్ళు నెత్తికెక్కాయని మండిపడ్డారు ఈటల రాజేందర్.

ఎన్నిక‌ల‌కు టైమ్ ద‌గ్గ‌ర పడుతోంది. పార్టీల‌న్నీ స‌మ‌యం లేదు మిత్ర‌మా అంటూ జోరు పెంచాయి. శ‌ర‌ణం లేదు ఇక ర‌ణ‌మే అంటూ కార్య‌క్ర‌మాలను స్పీడ‌ప్ చేశాయి. అధికార బీఆర్ఎస్ అటు ప్ర‌భుత్వ కార్య‌క్ర‌మాలు, ఇటు పార్టీ ప్రోగ్రామ్స్ తో దూకుడుగా ఉండ‌గా.. వంద రోజుల యాక్ష‌న్ ప్లాన్ కు దిగింది బీజేపీ. ఇటు కాంగ్రెస్ కూడా పీఏసీ స‌మావేశం నిర్వ‌హించి.. భ‌విష్య‌త్ కార్యాచ‌ర‌ణ‌పై ఓ క్లారిటీకి వ‌చ్చేసింది. దీంతో తెలంగాణ రాజ‌కీయం ర‌స‌వ‌త్త‌రంగా మారింది.

అధికార బీఆర్ఎస్ ఈసారి ఎన్నిక‌ల‌ను ప్ర‌తిష్టాత్మ‌కంగా భావిస్తోంది. మూడోసారి గెలిచి హ్యాట్రిక్ కొట్టాల‌ని చూస్తోంది. కానీ, స‌ర్వేలు అనుకూలంగా రాలేద‌ని స‌మాచారం. సీఎం ఎప్ప‌టిక‌ప్పుడు రాష్ట్రంలో పార్టీ ప‌రిస్థితి, ఎమ్మెల్యేల‌ గ్రాఫ్ పై స‌ర్వేలు చేయిస్తుంటారు. అలా, రానున్న ఎన్నిక‌ల్లో భారీ షాకులు త‌ప్ప‌వ‌నే సంకేతాలు వ‌చ్చిన‌ట్టు తెలుస్తోంది. ఈ క్ర‌మంలోనే బీఆర్ఎస్ నేత‌లకు ఫుల్ క్లాస్ తీసుకున్న కేసీఆర్.. జ‌నంలోనే ఉండాల‌ని స్ప‌ష్టం చేశార‌ట‌. అందుకే, గులాబీ నేత‌లు ఈమ‌ధ్య కాలంలో గ్రామాల బాట ప‌ట్టారు. కానీ, ప్ర‌తిప‌క్షాలు మాత్రం మ‌రోసారి బీఆర్ఎస్ గెలిచే ఛాన్స్ లేద‌ని అంటున్నాయి.

బీజేపీలో ఈమ‌ధ్య కీల‌క మార్పులు చోటు చేసుకున్నాయి. పార్టీ ప‌గ్గాలు కిష‌న్ రెడ్డికి అప్ప‌గించి, ఈట‌ల రాజేంద‌ర్ కు ప్ర‌మోష‌న్ ఇచ్చింది అధిష్టానం. ఆయ‌న‌కు బీజేపీ రాష్ట్ర ఎన్నిక‌ల నిర్వ‌హ‌ణ క‌మిటీ బాధ్య‌త‌లు అప్ప‌గించింది. ఈమార్పు బీజేపీ గ్రాఫ్ ను అమాంతం పెంచింద‌నే చ‌ర్చ జ‌రుగుతోంది. అంత‌కుముందు వ‌ర‌కు ఉప ఎన్నిక‌ల్లో విజ‌యాలు బూస్ట‌ప్ ఇచ్చినా త‌ర్వాత రానురాను నేత‌ల మ‌ధ్య స‌ఖ్య‌త కొర‌వ‌డి రేసులో బీజేపీ వెనుక‌బ‌డింద‌నే ఆరోప‌ణ‌లు వ‌చ్చాయి. ఎప్పుడైతే ఈట‌ల‌కు ఎన్నిక‌ల నిర్వ‌హ‌ణ బాధ్య‌త‌లు అప్ప‌గించారో అప్ప‌టినుంచి క‌మ‌ల‌నాథుల్లో జోష్ పెరిగింది. ఎందుకంటే, ఈట‌ల బీసీ లీడ‌ర్. ఉద్య‌మ‌కారుడిగా గుర్తింపు ఉంది. అన్ని వ‌ర్గాల ప్ర‌జ‌లు ఆయ‌న్ను అభిమానిస్తారు. ముఖ్యంగా ముదిరాజ్, బడుగు బలహీన వర్గాలు రాజేంద‌ర్ ను బాగా ఓన్ చేసుకున్నాయి. ఈ ప‌రిణామాల త‌ర్వాత బీజేపీ కార్య‌క‌ర్త‌లు కూడా ఈట‌ల వెంట న‌డుస్తున్నారు. పార్టీ అధ్య‌క్షుడు కిష‌న్ రెడ్డి సైతం అధ్య‌క్ష బాధ్య‌త‌లు స్వీక‌రించే స‌మ‌యంలో ఈట‌ల‌కున్న ప్ర‌యారిటీని చెప్పేశారు. కార్య‌క్ర‌మం మొద‌ట్నుంచి చివ‌రి వ‌ర‌కు త‌న వెంటే ఉండేలా చూసుకున్నారు. మొత్తానికి అంద‌రూ క‌లిసి క‌ట్టుగా ముందుకెళ్లి కేసీఆర్ ను గ‌ద్దె దించాల‌ని ల‌క్ష్యంగా పెట్టుకున్నారు క‌మ‌ల‌నాథులు.

ఇటు కాంగ్రెస్ కూడా దూకుడుగా ఉంది. క‌ర్ణాట‌క ఎన్నిక‌ల త‌ర్వాత తెలంగాణ‌లోనూ అధికారం సాధిస్తామ‌ని హ‌స్తం నేత‌లు ధీమాగా చెబుతున్నారు. బీఆర్ఎస్ కు పోటీ ఇచ్చేది తామేన‌ని.. ఈసారి ప‌క్కాగా గెలిచి తీరుతామ‌ని చెబుతున్నారు. గాంధీ భ‌వ‌న్ లో పీఏసీ స‌మావేశం ఏర్పాటు చేసుకున్న నేత‌లు.. భ‌విష్య‌త్ కార్యాచ‌ర‌ణ‌పై చ‌ర్చ‌లు జ‌రిపారు. కొత్త ప‌థ‌కాలు, ప్ర‌జాక‌ర్ష‌క కార్య‌క్ర‌మాలు, ప్ర‌భుత్వ వ్య‌తిరేక అంశాల‌పై చ‌ర్చించి ముందుకు వెళ్లాల‌ని డిసైడ్ అయ్యారు. ఈ వంద రోజులు క‌ష్ట‌ప‌డ‌దాం.. అధికారం సాధిద్దామ‌ని కార్య‌క‌ర్త‌ల‌కు ధైర్యం నూరిపోసి పోరాటానికి సై అంటున్నారు. మొత్తంగా రాష్ట్రంలో ఎల‌క్ష‌న్ యుద్ధం స్పీడ్ అందుకుంది. ప్ర‌ధాన పార్టీలు గెలుపు ఆశ‌ల‌తో దూసుకెళ్తున్నాయి. మ‌రి, ఈ త్రిముఖ పోరులో ప్ర‌జ‌లు ఎవ‌రికి ప‌ట్టం క‌డ‌తారో చూడాలి.

భూ సమస్యలపై శాస్త్రీయ అధ్యయనం జరగాల్సిన అవసరం వుందన్నారు బీజేపీ రాష్ట్ర ఎన్నిక‌ల నిర్వ‌హ‌ణ క‌మిటీ చైర్మ‌న్ ఈట‌ల రాజేంద‌ర్. రేపటి తెలంగాణ ఆకాంక్షల వేదిక ఆధ్వర్యంలో నిర్వహించిన మేధావుల సదస్సులో ఆయ‌న‌ పాల్గొన్నారు. ధరణి సమస్యల పరిష్కారం కోసం ప్రత్యేక కమిటీ వేస్తామన్నారు. ఈ కార్యక్రమంలో రిటైర్డ్ చీఫ్ జస్టిస్ నరసింహారెడ్డి, మాజీ ఐఏఎస్ అధికారులు రత్నప్రభ, తేజావత రామచంద్రుడు, తెలంగాణ లెక్చరర్స్ ఫోరం మురళి మనోహర్, మాజీ ఐపీఎస్ అధికారి అరవింద్ రావు సహా పలువురు నాయకులు, సంఘాల ప్రతినిధులు పాల్గొన్నారు.

ఈట‌ల రాజేంద‌ర్ మాట్లాడుతూ.. దళితులకు మూడు ఎకరాల భూమి ఇస్తామని కేసీఆర్ మోసం చేశారని అన్నారు. ఎస్టీలకు ఇస్తా అన్న దళిత బంధు, బీసీలకు ఇస్తున్న బంధు ఓట్లు, సీట్ల కోసమేనని చెప్పారు. రాష్ట్రం వచ్చినప్పుడు 74 వేల కోట్ల అప్పు ఉండేదన్న ఆయన.. ఇప్పుడ‌ది 5 లక్షల కోట్లకు చేరిందని మండిపడ్డారు. ఇప్పుడే పుట్టిన పసి బిడ్డ మీద లక్షా 20 వేల అప్పు ఉందన్నారు. తనకు ఉన్న అనుభవంతో పేద ప్రజలను ఎలా బాగుచేయాలో ఆలోచన చేస్తానని తెలిపారు. టీఎస్పీఎస్సీలో 15 పేపర్లు లీక్ అయ్యాయని ఫైరయ్యారు.

విద్యా వ్యవస్థను కేసీఆర్ సర్కార్ నిర్వీర్యం చేసిందని మండిపడ్డారు ఈట‌ల‌. రాష్ట్రంలో 8 వేల పాఠశాలలను మూసి వేశారని అనేక స్కూళ్లలో టీచర్లు లేరని చెప్పారు. అందరి భాగస్వామ్యంతో రాష్ట్రాన్ని తెచ్చుకున్నామని.. తొమ్మిదేండ్లుగా ప్రజలు చాలా మోసపోయారని అన్నారు. రాష్ట్రంలో ఒక్క రిక్రూట్ మెంట్ లేదని.. చైతన్యానికి కేంద్ర బిందువైన పేదల విశ్వవిద్యాలయాలను ఖతం పట్టించారని మండిపడ్డారు. వాటి స్థానంలో ఐదు ప్రైవేట్ విశ్వవిద్యాలయాలకు అవకాశం ఇచ్చి పేదవారికి విద్యను దూరం చేసిన చరిత్ర కేసీఆర్ దేనంటూ విరుచుకుపడ్డారు.

ప్రభుత్వ విశ్వవిద్యాలయాలకు పూర్వ వైభవం కల్పించాలని డిమాండ్లు ఈ వేదికకు వచ్చాయన్నారు ఈటల. రాబోయే రోజుల్లో వాటిని చేసి తీరుతామని స్పష్టం చేశారు. రిక్రూట్ మెంట్ జరగాల్సింది టీచర్లకని.. కేసీఆర్ మాత్రం పోలీసు రిక్రూట్ మెంట్లను చేశారని అసహనం వ్యక్తం చేశారు. వచ్చే నెల 6న ఈ మీటింగుకు కొనసాగింపుగా ప్రజా సమస్యలపై బహిరంగ సభ ఏర్పాటు చేస్తామన్నారు ఈటల. తెలంగాణలో ఉన్న ప్రజా సమస్యలను పుస్తక రూపంలో తీసుకువస్తామని తెలిపారు.

ప్ర‌గ‌తి భ‌వ‌న్ రాజ్ భ‌వ‌న్ మ‌ధ్య వైరం చాన్నాళ్లుగా చూస్తూనే ఉన్నాం. గ‌వ‌ర్న‌ర్ త‌మిళిసై ప్రోటోకాల్ ను ప్ర‌భుత్వం ప‌క్క‌కు పెట్టేయ‌డం.. ఆమె అస‌హ‌నం వ్య‌క్తం చేయ‌డం త‌ర‌చూ జ‌రుగుతోంది. గ‌వ‌ర్న‌ర్ వ్యాఖ్య‌ల త‌ర్వాత బీఆర్ఎస్ నేత‌లు మూకుమ్మ‌డిగా దండ‌యాత్ర చేయ‌డం కూడా కామ‌న్ అయిపోయింది. ఈ ప‌రిణామాల నేప‌థ్యంలో రాజ్ భ‌వ‌న్ వైపు క‌న్నెత్తి చూడ‌డం మానేశారు సీఎం కేసీఆర్. అధికారికంగా పాల్గొనాల్సిన కార్య‌క్ర‌మాల‌కు కూడా ఆయ‌న డుమ్మా కొడుతూ వ‌స్తున్నారు. కానీ, ఈసారి రాజ్ భ‌వ‌న్ లో ఆయ‌న అడుగు పెట్ట‌క త‌ప్ప‌లేదు.

ఈమ‌ధ్యే తెలంగాణ హైకోర్టు ప్రధాన న్యాయమూర్తిగా జస్టిస్‌ అలోక్‌ కుమార్‌ అరాధే నియామకమయ్యారు. మొన్న‌టిదాకా ఈయన కర్ణాటక హైకోర్టు న్యాయమూర్తిగా పని చేశారు. సుప్రీంకోర్టు కొలీజియం అరాధేను తెలంగాణ హైకోర్టు న్యాయమూర్తిగా బదిలీ చేస్తూ ఇటీవ‌ల కేంద్రానికి సిఫారసు చేసింది. ఆ సిఫార‌సుకు ఆమోదముద్ర వేయడంతో న్యాయశాఖ నోటిఫై చేస్తూ త‌ర్వాత ఉత్తర్వులు జారీ చేసింది. ఈ నేప‌థ్యంలో ఆదివారం రాజ్ భ‌వ‌న్ లో అలోక్ అరాధే హైకోర్టు ప్రధాన న్యాయమూర్తిగా ప్ర‌మాణం చేశారు.

రాజ్​ భవన్ లో ఉదయం 11 గంటలకు గవర్నర్‌ తమిళిసై ప్రమాణ స్వీకారం చేయించారు. ఈ కార్యక్రమానికి సీఎం కేసీఆర్‌ హాజరయ్యారు. గ‌తేడాది జూన్ లో జస్టిస్‌ ఉజ్జల్‌ భూయాన్‌ ప్రమాణ స్వీకారం సందర్భంగా రాజ్ భవన్ కు వెళ్లిన సీఎం ఆ తర్వాత ఆ గ‌డ‌ప తొక్క‌డం ఇదే. సంవత్సరం దాటిన తర్వాత ఇన్నాళ్ల‌కు రాజ్ భవన్ ​కు వెళ్లారు. ఈ కార్యక్రమానికి మంత్రులు సహా టీపీసీసీ అధ్యక్షుడు రేవంత్ ​రెడ్డి సైతం హాజరయ్యారు.

కౌశిక్ రెడ్డి ఎమ్మెల్సీ ప‌ద‌వి విష‌యంలో రాజ్ భ‌వ‌న్, ప్ర‌గ‌తి భ‌వ‌న్ మ‌ధ్య వైరం మొద‌లైంది. అంత‌కుముందు వ‌ర‌కు అధికార‌క కార్య‌క్ర‌మాల్లో ప‌క్క‌ప‌క్క‌నే క‌నిపించిన కేసీఆర్, త‌మిళిసై ఆ త‌ర్వాత చెరో దారిలో న‌డిచారు. ఆఖ‌రికి వీళ్ల పంచాయితీ.. సుప్రీంకోర్టు దాకా వెళ్లింది. పెండింగ్ బిల్లుల విష‌యంలో గ‌వ‌ర్న‌ర్ ఆల‌స్యం చేస్తున్నార‌ని ప్ర‌భుత్వం సుప్రీంను ఆశ్ర‌యించింది. ఈ వివాదం కొన‌సాగుతుండ‌గానే సీఎం రాజ్ భ‌వ‌న్ కు వెళ్ల‌డం ఆస‌క్తిక‌రంగా మారింది.