Politics

తెలుగు జాతికి పూర్వ వైభవం తేవాలని టీడీపీ అధినేత(TDP Chief) చంద్రబాబు నాయుడు(Chandrababu) ఆకాంక్షించారు. ఉగాది రోజుల ప్రజలు ఈ సంకల్పాన్ని తీసుకోవాలని పిలుపునిచ్చారు. రాష్ట్రం నిలబడాలి.. ప్రజలు గెలవాలంటూ ఆకాంక్షించారు. మంగళగిరి(Mangalagiri)లోని టీడీపీ ప్రధాన కార్యాలయంలో మంగళవారం నిర్వహించిన ఉగాది(Ugadi) వేడుకల్లో ఆయన పాల్గొని మాట్లాడారు.

తెలుగు వారికి శ్రీ క్రోధి నామ ఉగాది శుభాకాంక్షలు తెలిపారు చంద్రబాబు.. దశా, దిశా నిర్దేశం చేసుకోవడానికి ఉగాది పండుగ ఓ వేదిక అని చెప్పారు. తెలుగు వారికి కొత్త ఏడాది ఉగాది నుంచే ప్రారంభం అవుతుందని అన్నారు. ప్రకృతికి, పండుగలకు సంబంధం ఉందని, చైత్ర మాసం నుంచి ప్రజా చైతన్యం వెల్లువెత్తాలన్నారు. మంచి రోజులు రావాలని అందరూ సంకల్పం తీసుకోవాలని సూచించారు.

రాష్ట్ర పునర్నిర్మాణం కోసం వైసీపీ వ్యతిరేక ఓటు చీలకూడదనే కూటమిగా ఏర్పడ్డామని స్పష్టం చేశారు. సూపర్ సిక్స్ అంశాలను ప్రజల్లోకి తీసుకెళ్లాలన్నారు. మన మేనిఫెస్టో ప్రజల్లోకి వెళ్తే వైసీపీకి డిపాజిట్లు రావని.. త్వరలో ఉమ్మడి మేనిఫెస్టో విడుదల చేస్తాం అని ప్రకటించారు. వృద్ధులకు పెన్షన్ విధానాన్ని ప్రవేశపెట్టిన పార్టీనే టీడీపీయే చంద్రబాబు చెప్పుకొచ్చారు.

టీడీపీ హయాంలో ముస్లింలకు ఎప్పుడూ ఇబ్బంది రాలేదని, పేదరికం లేని సమాజం ఎన్టీఆర్ ఆశయమని గుర్తుచేశారు. ఆ సంకల్పంతోనే తాను ముందుకెళ్తున్నానని చెప్పారు. పెన్షన్ల పేరుతో జగన్ రాజకీయం చేస్తున్నారని మండిపడ్డారు. రాష్ట్రానికి రూ.14లక్షల అప్పు ఉందన్నారు. వలంటీర్ల వ్యవస్థపై తొలి సంతకం అంటే.. ఇప్పుడు వలంటీర్ల వ్యవస్థ లేనట్లేగా? అని ప్రశ్నించారు.

తాము అధికారంలోకి వస్తే వాలంటీర్ల వ్యవస్థ కొనసాగిస్తామని వారికి రూ.10వేలు గౌరవ భృతిని కల్పిస్తామని హామీ ఇచ్చారు. వలంటీర్లు జైలుకు వెళ్లొద్దని, రాష్ట్ర ప్రగతితో భాగస్వాములు కావాలని పిలుపునిచ్చారు. జగన్
సంక్షేమం పేరుతో పది రూపాయలిచ్చి.. రూ.100 లాగేస్తున్నాడని దుయ్యబట్టారు. సంపద సృష్టించి పేదలకు న్యాయం చేయాలనే సంకల్పంతో తాను పనిచేశానని గుర్తుచేశారు. రూ.16 లక్షల కోట్ల మేర పెట్టుబడులకు ఎంవోయూలు కుదుర్చుకున్నామని వెల్లడించారు.

జనసేన అధినేత(Janasena Chief) పవన్‌కల్యాణ్(Pawan Kalyan) లోక్‌సభ ఎన్నికల నేపథ్యంలో కాకినాడ జిల్లా పిఠాపురం నుంచి పోటీ చేస్తున్న విషయం తెలిసిందే. ఉగాది పర్వదినాన్ని పురస్కరించుకుని పిఠాపురం జనసేన కార్యాలయంలో తన సోదరుడు నాగబాబు, జనసేన నేతలతో కలిసి పాల్గొన్న పవన్ వేద పండితుల ఆశీర్వచనాలు అందుకున్నారు.

అనంతరం జనసేనాని మాట్లాడుతూ.. పిఠాపురం జనసేన కార్యాలయమే నా స్వగృహం అంటూ ప్రకటించారు. వచ్చే ఎన్నికల్లో పిఠాపురంలో విజయకేతనం ఎగరవేస్తున్నామని ధీమా వ్యక్తం చేశారు. ప్రజలంతా బాగుండాలని మనస్ఫూర్తిగా కోరుకుంటున్నట్లు తెలిపారు. క్రోధి నామ సంవత్సరంలో కూటమి ప్రభుత్వాన్ని ఏర్పాటు చేస్తామన్నారు.

ఈ ఏడాది ప్రజలకు మేలు జరగాలని.. రైతులు, మహిళలకు మరింత ప్రోత్సాహం లభించాలన్నారు. ఇక, తెలుగు ప్రజలకు ఉగాది శుభాకాంక్షలు తెలిపారు పవన్ కల్యాణ్. అదేవిధంగా టీడీపీ మాజీ ఎమ్మెల్యే వర్మ మాట్లాడుతూ..పిఠాపురంలో కొత్త టెక్నాలజీలో డబ్బులు తరలిస్తున్నారని ఆరోపించారు.

ఎంతమంది మిథున్ రెడ్డిలు వచ్చినా పవన్ కల్యాణ్ గెలుపును ఆపలేరని స్పష్టం చేశారు. పిఠాపురంలో పోలీసులకు తెలియకుండానే నోట్ల కట్టలు తరలిపోతున్నాయని, ఆ డబ్బంతా మంత్రి దాడిశెట్టి రాజాది అని వాళ్ల డ్రైవర్ చెప్పాడని గుర్తుచేశారు. పవన్ కల్యాణ్‌కు భారీ మెజారిటీ ఇవ్వడానికి పిఠాపురంలో టీడీపీ పని చేస్తుందని స్పష్టం చేశారు.