Telangana

హైదరాబాద్‌లో మరోసారి మాదకద్రవ్యాలు కలకలం రేపాయి. మాదక ద్రవ్యాలు విక్రయిస్తున్న ఓ యువతిని నార్సింగి (Narsingi) వద్ద ఎస్ఓటీ పోలీసులు (SOT Police)పట్టుకున్నారు. యువతిని ఓ టాలీవుడ్ హీరో ప్రియురాలిగా తెలుస్తోంది. ఆమె దగ్గర నుంచి 4 గ్రాములు ఎండిఎంఏ మాదక ద్రవ్యాలను పోలీసులు స్వాధీనం చేసుకున్నారు.

నగరానికి చెందిన ఉనీత్‌రెడ్డి, లావణ్యను పోలీసులు అరెస్టు చేశారు. కోకాపేటలోని ఓ అపార్ట్‌మెంట్‌లో లావణ్య నివసిస్తోంది. ఆమె సంగీతం టీచర్‌గా పని చేస్తోంది. ఇటీవల మోకిలా మాదకద్రవ్యాల కేసులో ఆమెపై ఆరోపణలు వచ్చాయి. ఈ నేపథ్యంలో ఆమెపై పోలీసులు నిఘా పెట్టినట్టు తెలుస్తోంది.

ఈ క్రమంలో విశ్వసనీయ సమాచారం మేరకు నార్సింగిలో ఆమెను పొలీసులు అరెస్టు చేశారు. ఆమె బ్యాగును తనిఖీ చేయగా మాదక ద్రవ్యాలు దొరికినట్టు పోలీసులు చెబుతున్నారు. ఓ టాలీవుడ్ హీరోకు ఆమె ప్రియురాలు అని విచారణలో పోలీసులు గుర్తించారు.

సినీ ఇండస్ట్రీలో చాలా మందితో ఆమెకు పరిచయాలు ఉన్నట్టు పోలీసులు అనుమానిస్తున్నారు. ఈ మేరకు దర్యాప్తు చేస్తున్నారు. వారిద్దరిపై ఎన్‌డిపిఎస్ యాక్ట్ కింద కేసు నమోదు చేశారు. ఇద్దరు నిందితులను అరెస్టు చేసి రిమాండ్‌కు తరలించినట్లు నార్సింగి పోలీసులు వెల్లడించారు.

సీఎం రేవంత్ రెడ్డి (Revanth Reddy) కీలక నిర్ణయం తీసుకున్నారు. రాష్ట్రంలో ప్రతి ఒక్కరికి డిజిటల్ హెల్త్ ప్రొఫైల్ (Digital Health Profile) సిద్ధం చేయాలని అధికారులను ఆదేశించారు. ఈ హెల్త్ ప్రొఫైల్ కార్డుతో ఆరోగ్యశ్రీ ని అనుసంధానం చేయాలని సూచించారు. దీంతో అత్యవసర పరిస్థితుల్లో ప్రజలకు సరైన వైద్యం అందించేందుకు వీలుంటుందని వివరించారు.

సచివాలయంలో వైద్య ఆరోగ్యశాఖ అధికారులతో సీఎం రేవంత్ రెడ్డి సోమవారం సమీక్ష నిర్వహించారు. ఈ సందర్భంగా సీఎం రేవంత్ రెడ్డి మాట్లాడుతూ… రాష్ట్రంలో ప్రతి ఒక్కరికి డిజిటల్ హెల్త్ ప్రొఫైల్ సిద్ధం చేయాలన్నారు. దాన్ని ఒక యూనిక్ నంబర్‌తో అనుసంధానం చేయాలని సూచించారు. దీనివల్ల అత్యవసర సమయాల్లో ప్రజలకు సరైన వైద్యం అందించే అవకాశం కలుగుతుందన్నారు.

చాలా వరకు ఆరోగ్య శ్రీ కోసమే తెల్ల రేషన్ కార్డులకు ఎక్కువ మంది దరఖాస్తులు చేసుకుంటున్నారని అన్నారు. అందువల్ల ఆరోగ్యశ్రీకి తెల్ల రేషన్ కార్డు తప్పనిసరి అనే నిబంధన సడలించే విషయాన్ని పరిశీలించాలన్నారు. రాష్ట్రంలో ఆరోగ్యశ్రీ అమలవుతున్న తీరును, నిధులకు సంబంధించి అధికారులను వివరాలు అడిగి తెలుసుకున్నారు. ప్రైవేట్ ఆస్పత్రులకు ప్రతీ మూడు నెలలకు ఒకసారి విధిగా ఆరోగ్యశ్రీ బిల్లు విడుదల చేయాలని ఆదేశించారు.

ప్రతి నెల 15వ తేదీల్లోగా ప్రభుత్వ ఆసుపత్రులకు ఆరోగ్యశ్రీ బిల్లులు విధిగా విడుదల చేయాలన్నారు. ప్రభుత్వ మెడికల్ కాలేజీలతో అనుసంధానంగా ఉన్న టీచింగ్ హాస్పిటల్స్, ప్రభుత్వ హాస్పిటల్స్, పెండింగ్లో ఉన్న ఆరోగ్యశ్రీ బిల్లులు వెంటనే విడుదల చేయాలని ఆదేశాలు జారీ చేశారు. మెడికల్ కళాశాల ఉన్న ప్రతీ చోట నర్సింగ్, పారామెడికల్ కాలేజీ ఉండేలా అధికారులు చర్యలు తీసుకోవాలన్నారు.

ఈ మేరకు ఒక కామన్ పాలసీ విధానాన్ని తీసుకురావాలని ఆదేశించారు. బీబీనగర్ ఎయిమ్స్‌లో పూర్తిస్థాయి వైద్య సేవలు అందుబాటులోకి తెచ్చేందుకు చర్యలు తీసుకోవాలన్నారు. ఎయిమ్స్ లో వైద్య సేవలు పూర్తిస్థాయిలో అందుబాటులోకి వస్తే ఖమ్మం, వరంగల్, నల్గొండ జిల్లా ప్రజలకు ప్రయోజనం చేకూరుతుందని వెల్లడించారు. కొడంగల్‌లో మెడికల్, నర్సింగ్ కాలేజీలో ఏర్పాటును పరిశీలించాలని అధికారులకు సూచించారు.

ఎయిమ్స్ ను సందర్శించి పూర్తిస్థాయి రిపోర్టు తయారు చేయాలని ఆదేశించారు. వైద్య సేవల విషయంలో అవసరమైతే కేంద్ర మంత్రిని తానే స్వయంగా కలిసి మాట్లాడుతానన్నారు. ఉస్మానియ ఆస్పత్రి విస్తరణ ఎదురయ్యే పలు సమస్యలను సీఎం దృష్టికి అధికారులు తీసుకు వచ్చారు. ఉస్మానియా హెరిటేజ్ భవనం ఇష్యూ రేపు హైకోర్టు బెంచ్ పైకి రానున్న నేపథ్యంలో కోర్టు తీర్పు ఆధారంగా తదుఫరి నిర్ణయం తీసుకుందామని పేర్కొన్నారు.

నూతనంగా నియమితులైన ఎమ్మెల్సీలు కోదండరాం (Kodandaram), అమీర్ అలీఖాన్‌ (Amer Ali Khan)లకు నిరాశ ఎదురైంది. ఎమ్మెల్సీలుగా ప్రమాణం చేసేందుకు ఇద్దరు ఎమ్మెల్సీలు సోమవారం కౌన్సిల్ హాల్ కు వెళ్లారు. కానీ ఆ సమయంలో మండలి చైర్మన్ గుత్తాసుఖేందర్ రెడ్డి ఆ సమయంలో అక్కడ లేకపోవడంతో ఇదర్దు ఎమ్మెల్సీలు చాలా సేపు ఎదురు చూశారు.

కానీ చైర్మన్ రాకపోవడంతో ఇద్దరు ఎమ్మెల్సీలు అసహనానికి గురైనట్టు తెలుస్తోంది. ఉదయం 11 గంటల నుంచి ఎమ్మెల్సీ అమీర్ అలీఖాన్‌తో కలిసి తాను శాసన మండలిలో వేచి ఉన్నామని తెలిపారు. చైర్మన్‌కు తాము సమాచారం ఇవ్వకుండానే మండలికి వచ్చామని వెల్లడించారు.

అయితే మండలి చైర్మన్‌ అనారోగ్యంతో బాధపడుతున్నారని మండలి సిబ్బంది చెప్పారని వివరించారు. ఛైర్మన్ తమకు ఫోన్‌లో టచ్‌లోకి రాలేదని చెప్పారు. దీంతో ప్రమాణ స్వీకార విషయాన్ని మండలి ఛైర్మన్‌కు తెలియజేయాలని సెక్రటరిని కోరామని వివరించారు. జనవరి 30 ఉదయం 09:30 గంటలకు ప్రమాణ స్వీకారానికి తమకు అవకాశం ఇవ్వాలని కోరారు.

తనను ఎమ్మెల్సీ పదవికి ఎంపిక చేయడంపై ప్రతిపక్షాలు చేస్తున్న విమర్శలపై కోదండరాం తీవ్ర స్థాయిలో మండిపడ్డారు. తాము చేసిన సేవల గురించి తెలంగాణ సమాజానికి తెలుసని ఆయన పేర్కొన్నారు. తన ఎంపికపై అనవసరంగా వివాదం చేస్తున్నారని ఫైర్ అయ్యారు. అది సరికాదని తెలిపారు.

కాంగ్రెస్ (Congress) హయాంలో అనేక కుంభకోణాలు జరిగాయని కేంద్ర మంత్రి, తెలంగాణ బీజేపీ చీఫ్ కిషన్ రెడ్డి (Kishan Reddy) అన్నారు. ఆ కుంభకోణాల వల్లే కేంద్రంలో అధికారానికి కాంగ్రెస్ దూరమైందన్నారు. కాంగ్రెస్ అవినీతిపై విసిగి పోయిన ప్రజలు బీజేపీకి పట్టం కట్టారని తెలిపారు. విపక్షాలు ఏర్పాటు చేసుకున్న ఇండియా కూటమి అప్పుడే విచ్ఛిన్నం అవుతోందని ఎద్దేవా చేశారు.

బీజేపీ ఆధ్వర్యంలో సోమవారం శక్తి వందన్ వర్క్ షాప్ ను నిర్వహించారు. ఈ కార్యక్రమానికి కిషన్ రెడ్డి ముఖ్య అతిథిగా హాజరయ్యారు. ఈ సందర్భంగా ఆయన మీడియాతో మాట్లాడుతూ…. దేశంలో ఎలాంటి అవినీతి లేకుండా మోడీ పాలన సాగిస్తున్నారని చెప్పారు. ఈశాన్య రాష్ట్రాల్లో గతంలో కనీసం రహదారులు కూడా ఉండేవి కాదన్నారు. ఇప్పుడు పెద్ద ఎత్తున జాతీయ రహదారుల నిర్మాణం జరుగుతోందని వెల్లడించారు.

మోడీ ఆధ్వర్యంలో సమర్థవంతంగా కరోనాను ఎదుర్కొన్నామన్నారు. వ్యాక్సిన్ తయారీ కంపెనీలను మోడీ స్వయంగా సందర్శించి వారికి ధైర్యం ఇచ్చారని పేర్కొన్నారు. మోడీని విమర్శించే ధైర్యం విపక్షాలకు లేదని… అందుకే ఏదో ఓ రకంగా మోడీపై కొన్ని పార్టీల నేతలు బురద జల్లే ప్రయత్నాలు చేస్తున్నారని ఫైర్ అయ్యారు.

‘రాష్ట్రంలో 32 జిల్లాలకు జాతీయ రహదారులను అనుసంధానం చేశాం. భారతీయులంటే గతంలో అవమానించే వారు. కానీ ఇప్పుడు ఆ పరిస్థితి మారింది. భారత పాసు పోర్టు ఉంటే గౌరవం దక్కుతోంది. ప్రజాస్వామ్య బద్ధంగా బీజేపీ పరిపాలిస్తోంది. గత కేసీఆర్ ప్రభుత్వంలో 7లక్షల కోట్ల అప్పులు చేశారు. కాంగ్రెస్ ప్రభుత్వం 6 గ్యారెంటీలను ఎలా అమలు చేస్తుందనేది ప్రశ్నార్థకంగా మారింది’అని అన్నారు.

రాబోయే ఎన్నికల్లో బీజేపీ ఒంటరిగానే పోటీ చేస్తుందని స్పష్టం చేశారు. ఫిబ్రవరి చివరి వారంలో ఎన్నికల షెడ్యూల్ వచ్చే అవకాశముందన్నారు. గతంలో తెలంగాణలో ఏప్రిల్ 11న ఎన్నికలు జరిగాయని పేర్కొన్నారు. గత ఎన్నికలకు వారం అటూ ఇటూగా ఎన్నికలు జరగవచ్చని చెప్పారు. కేసీఆర్ కుటుంబం అహంకారంతో సిగ్గు లేకుండా మాట్లాడుతోందని దుయ్యబట్టారు. దేశంలో ఏ నాయకులు కేసీఆర్ కుటుంబం మాదిరి మాట్లాడరని విమర్శించారు. బీఆర్ఎస్‌తో బీజేపీ పొత్తు పెట్టుకోదని స్పష్టం చేశారు.

ముషీరాబాద్‌ (Musheerabad)లో దళితుల ఇండ్లను అధికారులు కూల్చి వేశారు. గాంధీ నగర్ (Gandhi Nagar) డివిజన్‌ వివేకానంద నగర్‌లో సోమవారం ఉదయం అధికారులు పలు ఇండ్లను తొలగించారు. భారీ బందోబస్తు మధ్య అధికారులు కూల్చి వేత చర్యలు మొదలు పెట్టారు. ఆ సమయంలో ఎవరిని అక్కడికి అనుమతించలేదు.

విషయం తెలుసుకన్న ధరణి విచారణ కమిటీ ఛైర్మన్‌ కోదండ రెడ్డి ఘటనా స్థలానికి చేరుకున్నారు. అక్కడ బాధితులను పరామర్శిస్తున్న సమయంలో పోలీసులు అడ్డుకున్నారు. అక్రమ నిర్మాణాలు కావడంతోనే వాటిని కూల్చి వేశామని అధికారులు చెప్పారు. ఈ నేపథ్యంలో స్థానికులు ఆందోళనకు దిగారు.

దీంతో అక్కడ ఉద్రిక్త పరిస్థితులు నెలకొన్నాయి. అధికారుల తీరుపై స్థానికులు తీవ్ర ఆగ్రహం వ్యక్తం చేస్తున్నారు. గత 70 ఏండ్లుగా తాము ఇక్కడే ఉంటున్నామని చెబుతున్నారు. స్థల వివాదం కేసు ప్రస్తుతం కోర్టులో పెండింగ్ లో ఉందని చెప్పారు. ఫిబ్రవరి 6న కేసు కోర్టు విచారణకు రానుందని చెప్పారు.

కానీ ఇంతలోనే అధికారులు తమ ఇండ్లను కూల్చి వేశారని వాపోతున్నారు. రోడ్డు, ప్రభుత్వ భూమిలో అక్రమంగా నిర్మించిన ఇండ్లను అధికారులు తొలగిస్తున్నారు. న్యాయస్థానంలో ప్ర‌భుత్వానికి అనుకూలంగా తీర్పు రావ‌డంతో చ‌ర్య‌లు చేప‌ట్టారు. 2000 సంవత్సరం నుండి వివిధ రూపాల్లో కూల్చివేత‌ల‌ను స్థానికుల‌ను అడ్డుకుంటున్నారు.

పార్టీ పిరాయింపుల చట్టం కింద ఏపీ స్పీకర్ జారీ చేసిన నోటీసులను వైసీపీ రెబల్ ఎమ్మెల్యేలు (Rebel MLAs) ఏపీ హైకోర్టు (High Court)లో సవాల్ చేశారు. అనర్హత పిటిషన్‌పై విచారణకు హాజరవుతామని ప్రకటించిన కొద్ది సేపటికే వైసీపీ రెబెల్ ఎమ్మెల్యేలు ట్విస్ట్ ఇచ్చారు. స్పీకర్ నోటీసులను సవాల్ చేస్తూ రెబెల్ ఎమ్మెల్యేలు హైకోర్టులో లంచ్ మోషన్ పిటిషన్ వేశారు. అనర్హత విచారణ నోటీసులను రద్దు చేయాలని న్యాయస్థానాన్ని కోరారు.

వైసీపీ రెబల్ ఎమ్మెల్యేలు ఉండవల్ల శ్రీదేవీ, ఆనం రామనారాయణ రెడ్డి, మేకపాటి చంద్రశేఖర్ రెడ్డి, కోటం రెడ్డి శ్రీధర్ రెడ్డిలు ఈ పిటిషన్ దాఖలు చేశారు. తమకు మరింత సమయం ఇవ్వాలని స్పీకర్‌ను కోరినట్లు ఎమ్మెల్యే కోటం రెడ్డి శ్రీధర్ రెడ్డి అంతకు ముందు తెలిపారు. కానీ తమకు సమయం ఇచ్చేందుకు స్పీకర్ నిరాకరించారని పేర్కొన్నారు.

ఏపీలో స్పీకర్ రూల్ బుక్‌ను కూడా విభజించారని ఆరోపణలు గుప్పించారు. చివరి రోజుల్లోనైనా చరిత్రలో నిలిచిపోయేలా ప్రభుత్వం నిర్ణయాలను తీసుకోవాలని సూచించారు. మరోవైపు ఎమ్మెల్సీ రామ చంద్రయ్య కూడా పిటిషన్ దాఖలు చేశారు. తనపై దాఖలైన అనర్హత పిటిషన్​పై శాసన మండలి ఛైర్మన్ ఎదుట విచారణకు హాజరు కాకూడదని తాను నిర్ణయించుకున్నట్టు తెలిపారు. ఈ మేరకు పిటిషన్ దాఖలు చేసినట్టు మండలి ఛైర్మన్‌కు న్యాయవాది ద్వారా రామచంద్రయ్య లేఖ పంపారు.

ఇక విచారణ అంతా ఒక ప్రహసనంగా ఉందని ఎమ్మెల్యే ఆనం రామ నారాయణరెడ్డి పేర్కొన్నారు. తమ వాదనలు వినిపించేందుకు 4 వారాల సమయం అడిగామన్నారు. కానీ న్యాయవాదిని నియమించుకునేందుకు కూడా తమకు స్పీకర్ సమయం ఇవ్వలేదని తెలిపారు. తనపై ఫిర్యాదు చేసిన ప్రసాద్‌ రాజు కూడా విచారణలో ఉండాలని తాము కోరామన్నారు.

ఇక తన అనారోగ్యంపై వైద్యులు నివేదిక ఇచ్చారని, దాన్ని కూడా స్పీకర్ పట్టించుకోలేదని చెప్పారు. విప్ ఉల్లంఘించామనడానికి వాళ్ల దగ్గర ఏం ఆధారాలు ఉన్నాయని ప్రశ్నించారు. ఎమ్మెల్సీ ఎన్నికల్లో విప్ ఉల్లంఘించామని ఎలా నిర్ధారించారని నిలదీశారు. ఇక తాను కొవిడ్‌తో బాధపడుతున్నానని తాటికొండ ఎమ్మెల్యే ఉండవల్లి శ్రీదేవీ పేర్కొన్నారు. అయినప్పటికీ తనను హాజరుకావాలన్నారని ఆవేదన వ్యక్తం చేశారు.

ఇక తన రాజీనామాను నిబంధనల ప్రకారం అనుమతించలేదంటూ టీడీపీ నేత గంటా శ్రీనివాసరావు హైకోర్టులో పిటిషన్ వేయగా…దానిపై న్యాయస్థానం విచారణ చేపట్టింది. ఈ పిటిషన్ పై కౌంటర్ దాఖలు చేయాలంటూ స్పీకర్, న్యాయశాఖ కార్యదర్శికి హైకోర్టు నోటీసులు పంపింది. దీంతో పాటు సీఈసీ, ఎస్‌ఈసీకి కూడా నోటీసులు జారీ అయ్యాయి. అనంతరం తదుపరి విచారణను మూడు వారాల పాటు హైక్ర్టు వాయిదా వేసింది.

గతంతో పోలిస్తే ఈ సారి లోక్ సభ ఎన్నికలు భిన్నంగా ఉండబోతున్నాయని డిప్యూటీ సీఎం భట్టి విక్రమార్క (Bhatti Vikramarka) అన్నారు. హైదరాబాద్‌ను విశ్వనగరంగా అభివృద్ధి చేసింది కాంగ్రెస్ (Congress) అని తెలిపారు. ఈ విషయంలో ఎవరికీ అనుమానాలు అవసరం లేదన్నారు. సికింద్రాబాద్ ఈ సారి తమదేనని చెప్పారు. లోక్ సభ ఎన్నికల్లో సికింద్రబాద్ సీటును గెలుస్తామని ధీమా వ్యక్తం చేశారు.

సికింద్రాబాద్ పార్లమెట్ పరిధి బూత్ కమిటీ సమావేశాన్ని సోమవారం నిర్వహించారు. ఈ సమావే భట్టి విక్రమార్క పాల్గొని మాట్లాడుతూ….లోక్ సభ సార్వత్రిక ఎన్నికల్లో కాంగ్రెస్ మెజారిటీ స్థానాలను గెలుచుకోబోతోందని వెల్లడించారు. బీఆర్ఎస్ ఎమ్మెల్యేలు తమ నియోజక వర్గాల అభివృద్ధి కోసమే సీఎంతో ప్రత్యేకంగా సమావేశామయ్యారని స్పష్టం చేశారు.

అంతే కానీ అందులో ఇతర అంశాలేవీ లేవని పేర్కొన్నారు. మిగులు బడ్జెట్‌తో ఉన్న రాష్ట్రాన్ని అప్పుల కుప్పగా మార్చారని తీవ్రంగా మండిపడ్డారు. ఎప్పటికైనా ప్రజలకు మంచి చేసేది కాంగ్రెస్సేనని అన్నారు. ఆ విషయాన్ని గుర్తించిన ప్రజలు తమకు అధికారం కట్టబెట్టారని చెప్పారు. బీఆర్ఎస్ నేతల ఉడుత ఊపులకు కాంగ్రెస్ భయపడబోదన్నారు.

ప్రజలు తరిమి కొట్టినా బీఆర్ఎస్ నేతల్లో మార్పు కనిపించడం లేదని ఫైర్ అయ్యారు. పరాజయం పొంది ప్రతిపక్షంలో ఉన్నామనే విషయాన్ని బీఆర్ఎస్ శ్రేణులు గుర్తించుకోవాలని హితవు పలికారు. అసెంబ్లీ ఎన్నికల ఫలితాలే పార్లమెంట్ ఎన్నికల్లోనూ పునరావృతం అవుతాయన్నారు. పార్లమెంట్ ఎన్నికల తర్వాత క్రమంగా బీఆర్ఎస్ కనుమరుగు కావడం ఖాయమన్నారు. ఎవరొచ్చినా ఇక బీఆర్ఎస్ గట్టెక్కించడం కష్టమన్నారు.

బీఆర్ఎస్ (BRS)ఎమ్మెల్సీ కల్వకుంట్ల కవిత ( Kalvakuntla Kavitha)పై కాంగ్రెస్ అధికార ప్రతినిధులు తీవ్ర స్థాయిలో ఫైర్ అయ్యారు. 30 లక్షల మందికి సీఎం కేసీఆర్ ఉద్యోగాలను ఇచ్చారని ఎమ్మెల్సీ కవిత అసత్యాలు చెబుతోందని కాంగ్రెస్ అధికార ప్రతినిధి భవాని రెడ్డి మండిపడ్డారు. 30 లక్షల ఉద్యోగాల వివరాలను కవిత వెల్లడించాలని డిమాండ్ చేశారు.

మహిళాభివృద్ధి కోసం తాము చర్యలు తీసుకుంంటుంటే తట్టుకోలేక గోప్రో కెమెరాలు పెట్టుకొని, వాళ్ళ కార్మిక సంఘ ఆటోల్లో కేటీఆర్ తిరుగుతూ డ్రామాలు చేస్తున్నారంటూ తీవ్ర స్థాయిలో మండిపడ్డారు. పదేండ్లలో కేసీఆర్ సర్కార్ మహిళలకు ఏమీ చేయాలేదని ఆరోపించారు. ఎమ్మెల్సీ కవితకి ఈడీ నోటీసులు వచ్చిన ప్రతిసారీ ఢిల్లీ వెళ్లి టెంట్ వేస్తదని విమర్శించారు.

ఏఐసీసీ మీడియా ఇంచార్జీ సునీతా పాల్ మాట్లాడుతూ… మొన్నటి దాకా కేసీఆర్ కుటుంబం ప్రజలను దోచుకుందని మండిపడ్డారు. కేటీఆర్ ప్రజల్లో తిరిగితే ఈ పదేండ్ల పాటు ఏం చేశారని ప్రజలు ఆయన్ని ప్రశ్నిస్తున్నారని అన్నారు. అధికారం కోల్పోయాక బీఆర్ఎస్ నేతలు మతిస్థిమితం కోల్పోయారని విమర్శలు గుప్పించారు.

బీజేపీ కోసం బీఆర్ఎస్ పని చేస్తోందని తీవ్ర ఆరోపణలు చేశారు. రేవంత్ రెడ్డి పీపుల్స్ సీఎం అని తెలిపారు. ప్రజల కోసం ఆలోచిస్తున్నారని వెల్లడించారు. కానీ కేటీఆర్ మాత్రం ప్రజలను వాడుకుంటూ డ్రామాలు చేస్తున్నారంటూ ఫైర్ అయ్యారు. వంద రోజుల్లో ఆరు గ్యారంటీలు అమలు చేస్తామని స్పష్టం చేశారు. సర్కార్ ఏర్పడి ఇంకా 50 రోజులు కూడా కాలేదన్నారు. అప్పుడే విమర్శలు చేస్తే ఎలా? అని నిలదీశారు.