Telangana

ఎన్నికల్లో తనకు ఓటు వేస్తే మోడీ(Modi) ప్రధానమంత్రి(Prime Minister) అవుతారని, కాంగ్రెస్ పార్టీకి వేస్తే ఓటు వృథా అవుతుందని బీజేపీ అభ్యర్థి(BJP Candidate) బండి సంజయ్(Bandi Sanjay) అన్నారు. కరీంనగర్‌(Karimnagar)లోని ఎస్ఆర్ఆర్ కళాశాల(SRR College)లో శనివారం మార్నింగ్ వాక్ చేశారు. ఈ సందర్భంగా వాకర్స్‌ను ఓటు వేసి గెలిపించాలని అభ్యర్థించారు.

ఈ సందర్భంగా ఆయన మాట్లాడుతూ.. 400ఏళ్ల కళ శ్రీరామ మందిరం కలని మోడీ సాకారం చేశారని తెలిపారు. ఇండియన్ పొలిటికల్ లీగ్‌లో తమ కెప్టెన్ మోడీ(Modi) అని అభివర్ణించారు. కాంగ్రెస్ పార్టీ ప్రధానమంత్రి అభ్యర్థి ఎవరో చెప్పాలని డిమాండ్ చేశారు. చీటర్స్, లూటర్స్‌కు ఒక ఫైటర్‌కు మధ్య జరుగుతున్న ఎన్నికలు అని వ్యాఖ్యానించారు. అసెంబ్లీ ఎన్నికల్లో ప్రజలు బీఆర్ఎస్‌ను బొందపెట్టారని గుర్తు చేశారు.

పార్లమెంటు ఎన్నికల తర్వాత కేసీఆర్‌ను పాతాళ లోకానికి పాతిపెట్టడం ఖాయమన్నారు. ఎన్నికలప్పుడే కేసీఆర్ బయటకు వస్తాడని విమర్శించారు.  కాంగ్రెస్, బీఆర్ఎస్ మధ్య రహస్య ఒప్పందం జరిగిందని ఆరోపించారు. బీఆర్ఎస్ పార్టీలో బీఫాం తీసుకొని పార్టీలు మారారని బండి సంజయ్ తెలిపారు. వేములవాడ, రామలయాలను ప్రసాద్ స్కీం కింద అభివృద్ధి చేస్తానంటే అనుమతి ఇవ్వలేదన్నారు.

ఆర్వోబీ కోసం బీఆర్ఎస్ లేఖ ఇవ్వలేదని, కేంద్ర ప్రభుత్వం నిధులతోనే ఆర్వోబీ కడుతున్నామని తెలిపారు. కరీంనగర్ స్మార్ట్ కోసం బీజేపీ ప్రభుత్వమే నిధులు ఇచ్చిందన్నారు. కాంగ్రెస్ పార్టీ ఎందుకు పోటీ చేస్తుందో అర్థంకావడంలేదని ఎద్దేవా చేశారు. ఈ ఎన్నికల్లో ఈ ఎన్నికల్లో బీఆర్ఎస్ మూడో స్థానం, కాంగ్రెస్‌ పార్టీది రెండో స్థానమని స్పష్టం చేశారు.

పార్లమెంట్ ఎన్నికల సందర్భంగా కేంద్రంలోని బీజేపీ పెద్దలు, రాష్ట్ర బీజేపీ నాయకత్వం చేస్తున్న ప్రచారంపై కాంగ్రెస్ నేతలు ఫైర్ అవుతున్నారు. దేవుడి పేరు చెప్పి బీజేపీ పోలరైజేషన్ చేస్తోందని ఆరోపిస్తున్నారు. కాంగ్రెస్ అధికారంలోకి వస్తే హిందూవులు ప్రశాంతంగా ఉండలేరని, వారి ఆస్తులు లాక్కుంటారని, హనుమాన్ చాలీసా చదవనివ్వరని ప్రచారం చేయడంపై మంత్రి పొన్నం ప్రభాకర్ సీరియస్ అయ్యారు.

ఈ సందర్భంగా శుక్రవారం ఆయన సోషల్ మీడియా ట్విట్టర్(ఎక్స్) వేదికగా ట్వీట్ చేశారు. కాంగ్రెస్ వస్తే హనుమాన్ చాలీసా చదవనివ్వమని అంటున్నారు.. మన ఆస్తులు ముస్లింలకు ఇస్తామని అబద్ధాలు ఆడుతున్నారు. గతంలో కాంగ్రెస్ అధికారంలో ఉన్న సమయంలో హనుమాన్ ఆలయాలు లేవా? హనుమాన్ చాలీసాలు చదవలేదా? అని ప్రశ్నించారు.

కరీంనగర్ ఎంపీ బండి సంజయ్ ఎప్పుడైనా గ్రామాల్లోకి వెళ్లి పర్యటించావా? అని మంత్రి పొన్నం ప్రభాకర్ ప్రశ్నించారు. పదేళ్ల బీజేపీ పాలనలో ఎంత మంది హిందువులకు న్యాయం చేశారు? సంపద అంతా అదానీ, అంబానీలకు పంచి పెట్టారని తీవ్ర విమర్శలు చేశారు.

గురువారం బీజేపీ ఎన్నికల ప్రచారంలో కరీంనగర్‌కు గుజరాత్ ముఖ్యమంత్రి వచ్చి ఇప్పటికే సూరత్ పార్లమెంట్ సెగ్మెంటును గెలుచుకున్నామని అంటున్నారని, బెదిరించి గెలుచుకోవడం కాదు.. ఓట్లతో గెలుచుకోవాలని మంత్రి పొన్నం ప్రభాకర్ ఎద్దేవాచేశారు. కాగా, భవిష్యత్‌లో రైతులకు సాగు నీరు, నిరుద్యోగులు ఉద్యోగాలు కల్పిస్తామని మంత్రి పొన్నం ప్రభాకర్ చెప్పుకొచ్చారు.

మాదిగ రిజర్వేషన్ పోరాట సమితి(MRPS) వ్యవస్థాపక అధ్యక్షుడు మందకృష్ణ మాదిగ(Mandakrishna Madiga) సీఎం రేవంత్‌రెడ్డిపై ఆగ్రహం వ్యక్తం చేశారు. వరంగల్ జిల్లా హనుమకొండలోని హరిత హోటల్‌లో శుక్రవారం ఏర్పాటు చేసిన మీడియా సమావేశంలో ఆయన మాట్లాడుతూ రేవంత్ రెడ్డి ఓ బ్రోకర్ అంటూ సంచలన వ్యాఖ్యలు చేశారు. రేవంత్ ఉద్యమం చేసి సీఎం కాలేదని, బ్రోకరిజం చేస్తూ సీఎం అయ్యాడని ఆరోపించారు.

రేవంత్ రెడ్డి అనే బ్రోకర్ వల్ల మాదిగలు, మాలలు మోసపోయారని ఆరోపించారు. సీఎం పదవిలో ఉండే నైతిక విలువలు రేవంత్ రెడ్డికి లేవని కీలక వ్యాఖ్యలు చేశారు. ప్రజాభిమానం ఉంటే రేవంత్ రెడ్డి కామారెడ్డిలో ఎందుకు ఓడిపోయాడని ప్రశ్నించారు. కడియం శ్రీహరినిని తానే పిలిచానని చెప్తున్న సీఎం.. ఎమ్మెల్యే పదవికి రాజీనామా చేయాలని ఎందుకు అడగలేదని నిలదీశారు. ఒక పార్టీలో గెలిచి ఇతర పార్టీలో చేరితే పిచ్చి కుక్కల్లా రాళ్లతో కొట్టమని రేవంత్ రెడ్డి చెప్పారని గుర్తు చేశారు.

కడియం శ్రీహరిని రాజీనామా చేయనీయకుంటే రాళ్లతో కొట్టాల్సి వస్తుందన్నారు. కడియం శ్రీహరి కులం ఎస్సీ కాదని చెప్పిందే రేవంత్ రెడ్డి అని, శాసనసభ కమిటీ ముందు కులాన్ని నిరూపించుకోవాలని టీడీపీలో ఉన్నప్పుడు రేవంత్ విమర్శలు చేశారని దుయ్యబట్టారు. ఎస్సీ కాకుండానే ఎస్సీ సర్టిఫికెట్ తీసుకున్నాడని మోత్కుపల్లి నర్సింహులు చెప్పాడని, కడియం శ్రీహరి ఎస్సీ కానప్పుడు కడియం కావ్య ఎలా ఎస్సీ అవుతుందన్నారు. ఎస్సీ కాని కావ్యకు వరంగల్ ఎంపీ టికెట్ ఎందుకు ఇచ్చారని ప్రశ్నించారు.

ఓరుగల్లు ఉద్యమంలో రగిలిపోతుంటే చంద్రబాబుకు వత్తాసు పలికిన వ్యక్తి కడియం శ్రీహరి అని విమర్శించారు. కొడంగల్‌కు, వరంగల్‌కు నాలుగు నెలల్లో ఎంత ఖర్చు చేశారో రేవంత్‌రెడ్డి చెప్పాలని డిమాండ్ చేశారు. రేవంత్ ఎక్కడికెళ్లినా దేవుళ్ళ పేర్ల మీద ఒట్టు వేస్తున్నాడని, దేవుడి పేరుతో రాజకీయాలు చేస్తోంది బీజేపీ కాదు.. రేవంత్ రెడ్డి అని అన్నారు. మోడీ వస్తే రిజర్వేషన్లు రద్దు చేస్తారని రేవంత్ రెడ్డి దుష్ప్రచారం చేస్తున్నాడని మండిపడ్డారు.

కోడ్ ముగియగానే రుణమాఫీ చేసే అవకాశమున్నా ఆగస్టు వరకు ఎందుకన్నారు. ఎస్సీ, ఎస్టీల రిజర్వేషన్లకు బీజేపీ ప్రభుత్వంలో డోఖా ఉండదని మంద కృష్ణ మాదిగ చెప్పుకొచ్చారు. అణగారిన వర్గాల రిజర్వేషన్లు బీజేపీ ప్రభుత్వంలో పెరుగుతాయన్నారు. మతపరమైన రిజర్వేషన్లకు మాత్రమే బీజేపీ వ్యతిరేకమని స్పష్టం చేశారు. రాజ్యాంగానికి ప్రమాదం వచ్చిందే ఇందిరాగాంధీ కాంగ్రెస్ ప్రభుత్వంలో అని, రేవంత్ రెడ్డి దుష్ప్రచారాలు మానకుంటే రాళ్ల వర్షం కురుస్తుందని హెచ్చరించారు.

జాతీయ రహదారుల కోసం పార్లమెంటులో గళ మెత్తింది తానేనని బీఆర్ఎస్ పార్టీ అభ్యర్థి బోయినిపల్లి వినోద్ కుమార్(Vinod Kumar)తెలిపారు. కరీంనగర్(Karimnagar) పట్టణంలోని అంబేడ్కర్ స్టేడియంలో శుక్రవారం ఉదయం ఆయన వాకర్స్‌ను కలసి ఎన్నికల ప్రచారం నిర్వహించారు.

ఈ సందర్భంగా ఆయన మాట్లాడుతూ.. కరీంనగర్‌కు ఎంపీగా స్మార్ట్ సిటీ పనులకు రూ.వెయ్యి కోట్లు మంజూరు చేయించినట్లు తెలిపారు. పది సంవత్సరాల నుంచి బీజేపీ అధికారంలో అంబానీ ఆదానీల కోసం రూ.13లక్షల కోట్లు రుణమాఫీ చేసిందన్నారు. పెట్రోల్ నిత్యావసర వస్తువుల ధరలు పెంచింది బీజేపీ కేంద్ర ప్రభుత్వమేనని దుయ్యబట్టారు.

బండి సంజయ్‌కి ఓటు ఎందుకు ఓటు వేయాలి? అని వినోద్ కుమార్ ప్రశ్నించారు. తాను గెలిస్తే బండి సంజయ్ రాజకీయ సన్యాసం తీసుకుంటానని చాలెంజ్ చేశారని, అతి త్వరలోనే బండి సంజయ్ సన్యాసం తీసుకునే రోజులు వస్తాయన్నారు. కరీంనగర్ నుంచి హైదరాబాద్‌కు రైల్వే లైన్ తీసుకొచ్చింది తానే అని, మరికొద్ది రోజుల్లోనే సిరిసిల్ల నుంచి హైదరాబాద్‌కు రైలుమార్గం సుగమనం అన్నారు.

కేంద్రంలో బీజేపీ మంత్రులను కలిసి అభివృద్ధి కోసం ఎన్నోసార్లు వివరించామన్నారు. ఏనాడూ బీజేపీ ఎంపీ బండి సంజయ్ అభివృద్ధిపై కేంద్ర మంత్రితో కలిసిన దాఖలాలు లేవని విమర్శించారు. తాను ఎంపీగా కరీంనగర్‌ను ఎంతో అభివృద్ధి చేశానని చెప్పుకొచ్చారు. కరీంనగర్ ఎంపీగా మళ్లీ గెలిపిస్తే ప్రజలకు అందుబాటులో ఉండి మరింత అభివృద్ధి చేస్తా అన్నారు.