Telangana

బీఆర్ఎస్ (BRS) మాజీ మంత్రి మల్లారెడ్డి (Malla Reddy)కి అధికారులు ఊహించని షాకిచ్చారు. గుండ్ల పోచంపల్లి (Gundla Pochampally) మున్సిపాలిటీ, హెచ్‌ఎండీఏ (HMDA) లే అవుట్‌లో సుమారు 2500 గజాల భూమిని ఆక్రమించి కాలేజీ కోసం రోడ్డు నిర్మాణం చేశారని తీవ్ర ఆరోపణలు ఉన్నాయి. ఈ నేపథ్యంలో రోడ్డును అధికారులు తొలగించారు. మేడ్చల్ (Medchal) కలెక్టర్ ఆదేశాలతో నేడు అధికారులు ఈ కార్యక్రమం చేపట్టారు..

మరోవైపు గతంలో ఎంపీగా ఉన్న రేవంత్ రెడ్డి (Revanth Reddy) ఈ వ్యహారంపై అధికారులకు ఫిర్యాదు చేశారు. అయినప్పటికీ అప్పటి బీఆర్ఎస్ ప్రభుత్వం ఎలాంటి చర్యలు చేపట్టలేదు. తాజాగా కాంగ్రెస్ ప్రభుత్వం అధికారంలోకి వచ్చాక భూమి అంశం మరోసారి తెరపైకి వచ్చింది. దీంతో అధికారులు చర్యలకు ఉపక్రమించారు.. ఇదిలా ఉండగా దీనిపై మల్లారెడ్డి స్పందించారు.

తనను కావాలనే కొంతమంది టార్గెట్ చేశారని ఆరోపించారు. తనపై ప్రభుత్వం రాజకీయ కక్ష సాధింపు చేస్తోందని విమర్శించారు. ప్రస్తుతం అధికారం వాళ్ల చేతుల్లో ఉంది కాబట్టి ఎంతకైనా తెగిస్తారని మండిపడ్డారు.. రోడ్డు వేసే సమయంలో హెచ్ఎండీఏ అధికారుల అనుమతి తీసుకొన్నట్లు పేర్కొన్నారు. కాగా రోడ్డుకు ఉపయోగించిన 2500 గజాల స్థలానికి ప్రత్యామ్నాయంగా మరో స్థలాన్ని మున్సిపాలిటీకి ఇచ్చామని మల్లారెడ్డి వెల్లడించారు..

హఠాత్తుగా కాలేజ్ రోడ్డు తొలగించడంతో 25 వేల మంది విద్యార్థులు, అధ్యాపకులు పలు ఇబ్బందులు ఎదుర్కొంటున్నారని అన్నారు.. కావున ప్రభుత్వం ట్రాఫిక్ సమస్య, విద్యార్థుల జీవితాల్ని దృష్టిలో పెట్టుకొని న్యాయం చేయాలని మల్లారెడ్డి డిమాండ్ చేశారు.

తెలంగాణలో కాంగ్రెస్ (Congress), బీఆర్ఎస్ (BRS) నేతల మధ్య డైలాగ్ వార్ కాకపుట్టిస్తోంది. ఇప్పటికే హస్తం నేతలు బీఆర్ఎస్ నేతలపై విమర్శల వర్షం ఏకధాటిగా కురిపిస్తుండటం కనిపిస్తోంది. ఈ నేపథ్యంలో మంత్రి కోమటిరెడ్డి వెంకట్ రెడ్డి వర్సెస్ మాజీ మంత్రి హరీశ్ రావు మధ్య రాజకీయ సమరం ఆసక్తికరంగా మారింది. ఇక ప్రభుత్వ ఉద్యోగులకు ఒకటవ తేదీనే జీతాలు చెల్లిచడంపై స్పందించిన కోమటిరెడ్డి.. హరీశ్ రావుపై విమర్శలు గుప్పించారు.

నాలుగు సంవత్సరాలుగా సమయానికి జీతాలు ఇవ్వకుండా ప్రభుత్వ ఉద్యోగులను తిప్పలు పెట్టిన గత ప్రభుత్వం తప్పులను దాచి.. హరీష్ రావు (Harish Rao) జీతాలు ఎక్కడ అంటూ అడిగారు కదా.. చూడండి. ఇప్పుడున్నది మాటల ప్రభుత్వం కాదు.. చేతల ప్రభుత్వమని అన్నారు. శనివారం మీడియాతో చిట్ చాట్ నిర్వహించిన కోమటిరెడ్డి వెంకట్ రెడ్డి (Komati Reddy Venkat Reddy) మరోసారి సంచలన వ్యాఖ్యలు చేశారు.

హరీశ్ రావుకు ఫ్లోర్ లీడర్ పదవి ఇవ్వకపోతే బీజేపీ (BJP)లోకి వెళ్తాడని నెన్సేషనల్ కామెంట్ చేశారు. కేటీఆర్ (KTR) ఇప్పటికీ కేసీఆర్ (KCR) చాటు కొడుకే అని సెటైర్ వేశారు. కేటీఆర్ మాదిరిగా తండ్రి పేరుతో రాజకీయాల్లోకి రాలేదని తెలిపిన వెంకట్ రెడ్డి.. తాను ఉద్యమాలు చేసి వచ్చానన్నారు. మేం జీరో బిల్ ఇచ్చినట్లుగా కేటీఆర్ కి జీరో నాలెడ్జ్ ఉందని విమర్శించారు. నాలెడ్జ్ లేని కేటీఆర్ గురించి మాట్లాడటం వృథా అని ఎద్దేవా చేశారు..

కాళేశ్వరం కట్టించిన చీఫ్ డిజైనర్ కేసీఆర్ మేడిగడ్డకు ఎందుకు వెళ్లలేదని ప్రశ్నించారు. ఎంపీ అభ్యర్థులపై అంతర్గత సర్వే జరుగుతోందని మంత్రి కోమటిరెడ్డి వెంకట్ రెడ్డి అన్నారు. భువనగిరి నుంచి పోటీ చేయాలని రాహుల్ గాంధీని కోరానని చెప్పారు. భువనగిరి, ఖమ్మం, నల్గొండలో దక్షిణాదిలో టాప్ మెజార్టీ వస్తుందని ఈసారీ మోడీ కంటే రాహుల్ గాంధీనే ఎక్కువ మెజార్టీతో గెలవబోతున్నారని జోస్యం చెప్పారు. యాదాద్రిని యాదగిరి గుట్టగా మారుస్తూ త్వరలో జీవో విడుదల చేస్తామని వెల్లడించారు..

2047 కల్లా భారత్ ప్రపంచంలో విశ్వగురు స్థానానికి చేరుకోవాలని బీజేపీ రాష్ట్ర అధ్యక్షుడు, కేంద్రమంత్రి కిషన్ రెడ్డి(Kishan Reddy) ఆకాంక్షించారు. హైదరాబాద్‌(Hyderabad)లోని పార్టీ కార్యాలయంలో అభివృద్ధి చెందిన భారతానికి మన మోడీ గ్యారంటీ-మరోసారి మన మోడీ సర్కార్ పోస్టర్‌ను కిషన్ రెడ్డి ఆవిష్కరించారు. ఈ సందర్భంగా గ్యాన్ అనే నాలుగు అక్షరాలే బీజేపీ అజెండా(BJP agenda) అని ఆయన స్పష్టం చేశారు.

స్వాతంత్య్రం వచ్చి 75 ఏళ్లు అయినా దేశంలో మౌలిక వసతులు లేవని కిషన్ రెడ్డి ఆవేదన వ్యక్తం చేశారు. మన తర్వాత స్వాతంత్య్రం సాధించుకున్న దేశాలు అభివృద్ధి చెందాయన్నారు. 2047 కల్లా భారత్ ప్రపంచంలో విశ్వగురు స్థానానికి చేరుకోవాలని ఆయన ఆకాంక్షించారు. 2047లో అధికారంలో ఎవరు ఉంటారనేది ముఖ్యం కాదనీ.. ఆ సమయానికల్లా అభివృద్ధి చెందిన దేశంగా మారాలన్నారు.

నేడు భారత్ సాధిస్తున్న ప్రగతికి, మారుమూల ప్రాంతాల వరకు సంక్షేమ పథకాలు చేరుతున్న తీరుతో బీజేపీ(BJP) జెండాను చూడగానే ప్రజలే స్వచ్ఛందంగా ఇదే మన మోడీ గ్యారంటీ అని చెబుతున్నారని కిషన్ రెడ్డి తెలిపారు. ఐదు విభాగాలుగా విజయ సంకల్ప యాత్ర సాగుతోందన్నారు. బీజేపీ సాధించిన ప్రగతిని ప్రజల ముందు ఉంచుతామని కేంద్రమంత్రి స్పష్టం చేశారు.

పార్లమెంటు ఎన్నికల్లో బీజేపీ స్వతంత్రంగా 370 సీట్లు, మిత్రపక్షాలతో కలిసి ఎన్డీయే కూటమికి 400 సీట్లను చేరుకోవడమే లక్ష్యమని కిషన్ రెడ్డి తెలిపారు. తెలంగాణలో మెజారిటీ సీట్లు సాధించి కేంద్రంలో నరేంద్ర మోడీ ప్రభుత్వంలో ప్రజల భాగస్వామ్యం ఉండేలా చేపట్టిన విజయ సంకల్ప యాత్రకు రాష్ట్రవ్యాప్తంగా మంచి స్పందన వస్తోందని చెప్పారు.

దేశంలో అవినీతి రహిత ప్రభుత్వం ఉండాలన్నారు కిషన్ రెడ్డి. పెట్టుబడులకు గమ్యస్థానంగా భారత్ మారాలన్నారు. 2047 కల్లా భారతీయులు విద్య కోసం విదేశాలకు వెళ్లే పరిస్థితి ఉండకూడదని పేర్కొన్నారు. జీ అంటే గరీబ్ కల్యాణ్, వై అంటే యూత్, ఏ అంటే అగ్రికల్చర్, ఎన్ అంటే నారీ శక్తి అని అర్థమని వివరించారు. అలాగే వచ్చే ఎన్నికల్లో ఫిర్ ఏక్ బార్-మోడీ సర్కార్ నినాదంతో ముందుకెళ్లనున్నట్లు పేర్కొన్నారు.

మాజీ సీఎం కేసీఆర్ ఫ్యామిలీపై బీజేపీ జాతీయ ప్రధాన కార్యదర్శి, ఎంపీ బండి సంజయ్(Bandi Sanjay) సంచలన వ్యాఖ్యలు చేశారు. భూదాన్ భూముల పేరుతో బీఆర్ఎస్ మాజీ ఎంపీ వినోద్(BRS Ex MP Vinod) కుటుంబ అక్రమాలు నిజమేనని షాకింగ్ కామెంట్స్ చేశారు. రూ.500కోట్ల భూదాన్ భూములను కేసీఆర్ కుటుంబం స్వాహా చేసిందంటూ ఆరోపించారు.

భూదాన్ భూముల స్కామ్‌పై సీఎం రేవంత్ రెడ్డి సర్కార్ జరిపించాలని బండి సంజయ్ డిమాండ్ చేశారు. గత బీఆర్ఎస్ ప్రభుత్వం తీసుకువచ్చిన ధరణి పోర్టల్ ఒక్క కేసీఆర్ కుటుంబానికి మాత్రమే ఉపయోగపడిందని అన్నారు. ధరణి పోర్టల్ బాధితులతో సమావేశం పెడితే హైదరాబాద్‌లోని జింఖానా క్రికెట్ గ్రౌండ్ కూడా సరిపోదన్నారు.

భూములు మింగడానికే బీఆర్ఎస్.. ధరణి పోర్టల్‌ను తీసుకొచ్చిందని ఆరోపించారు. భూదాన్ భూములపై తాను కూడా 15 రోజుల నుంచి ఆధారాలు సేకరిస్తున్నానని బండి తెలిపారు. కాళేశ్వరం ప్రాజెక్టులో భారీ ఎత్తున అవినీతి జరిగిందని కాగ్ రిపోర్ట్ ఇచ్చినా ప్రభుత్వం ఎలాంటి చర్యలు తీసుకోవడం లేదని అసహనం వ్యక్తం చేశారు. రాష్ట్ర ప్రభుత్వం కోరితే కాళేశ్వరం ప్రాజెక్టుపై సీబీఐ విచారణ చేయిస్తామని కీలక వ్యాఖ్యలు చేశారు.

గత బీఆర్ఎస్ ప్రభుత్వం కేంద్ర ప్రభుత్వాన్ని తిట్టడమే పరిమితమైందని మండిపడ్డారు. గత రాజకీయాలు పక్కనపెట్టి రాష్ట్రాన్ని అభివృద్ధి చేస్తే కేంద్ర ప్రభుత్వం సహకరిస్తుందని బండి స్పష్టం చేశారు. అసెంబ్లీ ఎన్నికల్లో హామీ ఇచ్చినట్లుగా కాంగ్రెస్ వందరోజుల్లోపు ఆరు గ్యారెంటీలు అమలు చేయాలని డిమాండ్ చేశారు. తెల్లరేషన్ కార్డు ఉన్నా కొందరికి పథకాల్లో కోత పెడుతున్నారని ప్రభుత్వాన్ని విమర్శించారు.

బీఆర్ఎస్, కాంగ్రెస్ రెండు పార్టీలు కుమ్మక్కై ప్రజలను మభ్యపెడుతున్నాయని ఫైర్ మండిపడ్డారు. లోక్ సభ ఎన్నికల్లో బీజేపీకి సింగిల్‌గా 350కి పైగా సీట్లు వస్తాయని బండి జోస్యం చెప్పారు. తెలంగాణలో 17కి 17 ఎంపీ స్థానాలు బీజేపీ గెలుస్తోందని బండి సంజయ్ ధీమా వ్యక్తం చేశారు.  ఈ నెల 8, 9వ తేదీన ప్రజాహిత యాత్రకు విరామం ఇస్తున్నట్లు ప్రకటించారు. మహాశివరాత్రి పండుగ నేపథ్యంలో యాత్రకు రెండు రోజుల పాటు బ్రేక్ ఇస్తున్నట్లు స్పష్టం చేశారు.

రాష్ట్రంలో బీఆర్ఎస్ (BRS) అధిష్టానం తీరుపై సొంత పార్టీ నేతలు అసంతృప్తిగా ఉన్నట్లు ప్రచారం జరుగుతోంది. అసలే సార్వత్రిక ఎన్నికలు ముంచుకు వస్తున్నాయి.. ఈ సమయంలో పార్టీ బలోపేతంపై దృష్టి సారించక.. తలొదిక్కుగా వ్యవహరించడం విమర్శలకు దారి తీస్తోంది. దీనికి తోడు ఎంపీ ఎన్నికల్లో విజయం సాధించాలని ప్రధాన పార్టీలు వ్యూహాలు, ప్రతి వ్యూహాలు సిద్ధం చేసుకొంటున్నాయి.

తెలంగాణ (Telangana)లో అధికార కాంగ్రెస్ (Congress), ప్రతిపక్ష బీజేపీ (BJP) పోటాపోటీగా తలపడుతుండగా.. బీఆర్ఎస్ లో మాత్రం ఆ జోష్ కనిపించకపోవడంతో, కారునే నమ్ముకొని ఉన్న నేతల్లో కలకలం మొదలైనట్లు తెలుస్తోంది. ఇదే సమయంలో పక్క పార్టీలోకి వలసలు సైతం ప్రారంభం అయ్యాయి. ఈ క్రమంలో ఒకరు కాదు ఇద్దరు కాదు ఏకంగా ముగ్గురు సిట్టింగ్ ఎంపీలు, ఇతర ముఖ్య నాయకులు వరుసగా బీఆర్ఎస్ కు రాజీనామా చేసి కాంగ్రెస్, బీజేపీలో చేరుతుండటం కారును కంగారు పెట్టిస్తోందని తెలుస్తోంది.

అసెంబ్లీ ఎన్నికల్లో (Assembly Elections) ఓటమి తర్వాత పార్టీకి అండగా నిలుస్తారనుకున్న నేతలే ఇలా చేజారిపోవడం బలమైన కారణం ఉందనే కొత్త వాదన తెరపైకి వస్తోంది. బీఆర్ఎస్ లో నెలకొన్న ఆధిపత్య పోరు.. వలసలకు కారణం అవుతోందనే చర్చ జరుగుతోంది. ఇంత జరుగుతున్నా అసంతృప్త నేతలను ఆపేందుకు అధిష్టానం ఎలాంటి చర్యలు తీసుకోవడం లేదనే విమర్శలు బీఆర్ఎస్ క్యాడర్ నుంచి వినిపిస్తున్నాయి.

ఇప్పటికే పెద్దపల్లి ఎంపీ వెంకటేశ్ నేత, నాగర్న కర్నూల్ ఎంపీ రాములు, తాజాగా జహీరాబాద్ ఎంపీ బీబీ పాటిల్ గులాబీకి గుడ్ బై చెప్పి తమదారి తాము చూసుకొన్నారు. అయితే వీరు పార్టీ మారడం వెనుక బీఆర్ఎస్ లో నేతల మధ్య నెలకొన్న కోల్డ్ వారే కారణం అనే టాక్ వినిపిస్తోంది. సొంత పార్టీ నేతలు పొమ్మన లేక పొగ పెట్టడం వల్ల ఈ ఆధిపత్యపోరు భరించడం కంటే పార్టీ మారిపోవడమే బెటర్ అనే నిర్ణయానికి వచ్చి ఒక్కొక్కరుగా కారు దిగిపోతున్నారనే టాక్ వినిపిస్తోంది.

మరోవైపు ఎంపీల పరిస్థితి ఇలా ఉంటే మిగతా నాయకుల విషయంలోనూ ఆధిపత్యపోరే కనిపిస్తోందని అనుకొంటున్నారు. జీహెచ్ఎంసీ పరిధిలో పలువురు కార్పొరేటర్లు, కేటీఆర్ ముఖ్య అనుచరులు పార్టీ వీడేందుకు అక్కడి నేతలతో ఉన్న వర్గపోరే కారణం అనేది రాజకీయ వర్గాల్లో జరుగుతున్న చర్చ.. అదీగాక ఎంపీ టికెట్ల విషయంలోనూ ఏమాత్రం తగ్గని నేతలు.. ఎదుటి వారు తామ పార్టీ వారైనా సరే రాజకీయంగా శత్రువుగా భావిస్తున్నారని ప్రచారం జరుగుతోంది.

ముఖ్యంగా నల్గొండ (Nalgonda)లో గుత్తా సుఖేందర్ వర్సెస్ మాజీ మంత్రి జగదీశ్ రెడ్డి మధ్య ఆధిపత్యపోరు నడుస్తోందనే చర్చ జిల్లాలో జోరుగా వినిపిస్తోంది. మిగతా నియోజకవర్గాల్లోనూ దాదాపు ఇదే పరిస్థితి ఉందని ఒక నేతకు మరో నేత అడ్డుపుల్లలు వేస్తున్నారనే ఊహాగానాలు వినిపిస్తున్నాయి. ఈ నేపథ్యంలో ముఖ్య నేతలు కారు దిగివెళ్తుంటే.. నెక్స్ట్ లీడ్ లో ఉన్న లీడర్ ఎవరనేది బీఆర్ఎస్ లో సస్పెన్స్ గా మారిందని సామాచారాం.

తాజా పరిణామాలు క్యాడర్ ను తీవ్ర గందరగోళానికి గురి చేస్తుంటే అధినేత కేసీఆర్ మాత్రం సైలెంట్ గా ఉండిపోవడం విమర్శలకు చోటిస్తోంది. పార్టీలో నెలకొన్న ఆధిపత్యపోరుకు చెక్ పెట్టి అసంతృప్త నేతలను బుజ్జగించాల్సిన అధినేత ఫామ్ హౌస్ కే పరిమితం అవడంతో అధికారంలో ఉన్నా, ప్రతిపక్షంలో ఉన్నా అధినేత తీరు మాత్రం మారడం లేదని కేసీఆర్ వైఖరిపై సొంత పార్టీ నేతలే విమర్శలు గుప్పిస్తున్నారని అంటున్నారు..

పారిశ్రామికవేత్తలకు తెలంగాణ బెస్ట్ అని డిప్యూటీ సీఎం భట్టి విక్రమార్క(Bhatti Vikramarka) అన్నారు. సీఐఐ తెలంగాణ స్టేట్ అన్యువల్ మీటింగ్ 2023-24 కాన్ఫరెన్స్ కార్యక్రమం ఇవాళ(శనివారం) జరిగింది. ఈ సందర్భంగా ఆయన మాట్లాడుతూ.. పారిశ్రామికవేత్తలకు తెలంగాణ భూతల స్వర్గమని అభివర్ణించారు.

దేశంలో ఎక్కడా లేని మౌలిక వసతుల కల్పనకు మంచి వాతావరణం రాష్ట్రంలో ఉందన్నారు. తెలంగాణలో పెట్టుబడులు పెట్టడానికి వచ్చే పారిశ్రామికవేత్తలకు కాంగ్రెస్ ప్రభుత్వం రాయితీలు ఇవ్వడంతో పాటు పూర్తి సహకారం అందించడానికి సిద్ధంగా ఉందని తెలిపారు. ఈ సందర్భంగా ఆయన మాట్లాడుతూ.. ఇందిరమ్మ రాజ్యంలోని కాంగ్రెస్ ప్రభుత్వం పరిశ్రమల స్థాపనకు ప్రోత్సాహం అందిస్తుందని తెలిపారు.

రాష్ట్రంలో వ్యవసాయ అనుబంధ పరిశ్రమల ఏర్పాటుకు పారిశ్రామికవేత్తలు ముందుకు రావాలని పిలుపునిచ్చారు. మొక్కజొన్న, టమాట, మిర్చి, పత్తి తదితర వ్యవసాయ అనుబంధ పరిశ్రమలు ఏర్పాటు చేయడం వల్ల రైతులకు మేలు కలగడంతో పాటు ప్రజలను నాణ్యమైన ఆహార ఉత్పత్తులు అందుతాయన్నారు.  వాణిజ్య పంటల ఉత్పత్తి ద్వారా రైతులు ఆర్థికంగా బలపడటంతో పాటు పరిశ్రమల యజమానులు సైతం ఆదాయం పొందవచ్చన్నారు.

అన్ని విధాలుగా రాష్ట్రంలో పరిశ్రమల స్థాపనకు కొత్త ఇండస్ట్రీ పార్కుల ఏర్పాటునకు కాంగ్రెస్‌ ప్రణాళికలను తయారు చేస్తున్నామని వెల్లడించారు. మహిళా పారిశ్రామికవేత్తలకు తమ ప్రభుత్వం ప్రత్యేక ప్రోత్సాహం అందిస్తుందన్నారు. అత్యధిక ఉద్యోగ అవకాశాలు కల్పించడానికి అనువుగా ఉన్న ప్రభుత్వం ఎంఎస్ఎంఎస్ఈలను కాంగ్రెస్ ప్రోత్సహిస్తోందని భట్టి తెలిపారు.