హీరోయిన్ త్రిష కృష్ణన్ (Trisha krishnan) గురించి ప్రత్యేకంగా చెప్పాల్సిన పనిలేదు. ఆ మధ్య వరుస ఫ్లాప్‌లతో కెరీర్‌ పరంగా ఒడిదుడుకులను ఎదుర్కొన్న ఈ చైన్నె సుందరి ఇటీవల పొన్నియిన్‌ సెల్వన్‌ చిత్రంతో సెకెండ్‌ ఇన్నింగ్స్‌ను ప్రారంభించింది. ఆ తరువాత లియో చిత్రంలో విజయ్‌తో జతకట్టి కమర్షియల్‌ హిట్‌ను అందుకుంది.
అయితే ఈ మధ్య త్రిషకు వరుస వివాదాలు చుట్టుముట్టాయి. వ్యక్తి గత ఆరోపణలను చేసిన వారికి సరైన సమాధానం చెబుతూ వస్తోంది. అన్నాడీఎంకే బహిష్కరణ కార్యనిర్వాహకుడు ఏవీ రాజు త్రిషను అప్రతిష్ట పాలు చేసే విధంగా ఆమె పై అనుచిత వ్యాఖ్యలు చేశారు. దీన్ని తీవ్రంగా ఖండించిన త్రిష అతనిపై చట్టపరమైన చర్యలకు సిద్ధమయ్యారు.
ఈ వ్యవహారంలో పలువురు సినీ ప్రముఖులు త్రిషకు అండగా నిలిచారు. ముఖ్యంగా దర్శకుడు చేరన్‌, సముద్రఖని, నాజర్‌ త్రిషపై ఆరోపణలను తీవ్రంగా ఖండించారు. దీనికి స్పందించిన త్రిష తనకు సపోర్ట్‌గా నిలిచిన ఆ ముగ్గురు అన్నయ్యలకు ధన్యవాదాలు అంటూ ఆమె పేర్కొన్నారు.
ప్రస్తుతం త్రిష.. అజిత్‌ సరసన విడాముయర్చి చిత్రం, కమలహాసన్‌కు జంటగా థగ్స్‌ లైఫ్‌ వంటి భారీ క్రేజీ చిత్రాల్లో నటిస్తూ అగ్రకథానాయకిగా తన స్థానాన్ని సుస్థిరం చేసుకుంది. ఇక అనిల్ రావిపూడి, వెంకటేష్ కాంబోలో రానున్న సినిమాలో త్రిషను హీరోయిన్ గా ఖరారు చేసినట్లు సమాచారం.
