Crime

మోసపోయే వారు ఉన్నంత కాలం మోసం చేసే వారు పుట్టుకొస్తారు.. ఇది నగ్న సత్యం అయినా మనిషి ఆశ ఈ నిజాన్ని నమ్మదు అని ఎన్నో సార్లు నిరూపించబడింది. తాజాగా మనుషులలో ఉన్న ఆశను భారీగా క్యాష్ చేసుకొన్న ఘరానా మోసాగాడి లీలలు నగరంలో వెలుగులోకి వచ్చాయి.. హైదరాబాద్ (Hyderabad) ఉప్పల్ (Uppal)లో రియల్ ఎస్టేట్ (Real Estate) వ్యాపారం పేరుతో ఒకటి కాదు రెండు ఏకంగా రూ.500 కోట్లతో ఉండాయించిన ఘటన సంచలనంగా మారింది.

JV బిల్డర్స్ అండ్ ఇన్ఫ్రాస్ట్రక్చర్ రియల్ ఎస్టేట్ కంపెనీ స్థాపించిన వ్యక్తి ఇందులో పెట్టుబడులు పెడితే డబుల్ మని వస్తాయని నమ్మించి జనానికి టోకరా ఇచ్చారు.. కోట్లాది రూపాయలను దండుకోని పరార్ అయ్యారని బాధితులు లబోదిబో మంటూ పోలీసు స్టేషన్ మెట్లు ఎక్కారు.. దాదాపు 500 మంది ఏజెంట్లను ఏర్పాటు చేసి సుమారు 7 వేల మంది కొనుగోలుదారులను మోసం చేశారని వారు ఆరోపిస్తున్నారు..

భూముల కొనుగోలుకు పెట్టుబడి పథకం ద్వారా అధిక వడ్డీ లాభం చూపి భారీ మోసానికి పాల్పడినట్లు వెల్లడిస్తున్నారు. ఇందులో లక్ష నుంచి కోటి రూపాయల వరకు పెట్టుబడులు పెట్టిన వారు ఉన్నారని బాధితులు పేర్కొంటున్నారు. అయితే నిందితుడు కొన్ని నెలలు డబ్బులు బాగానే ఇచ్చారని, కానీ గత నాలుగు నెలల నుంచి వడ్డీ ఇవ్వడం లేదు, అసలు ఇవ్వడం లేదని కన్నీరుమున్నీరుగా విలపించారు.

తీరా ఆఫీస్ కి వస్తే.. తాళం వేశారని వాపోయారని వెల్లడించారు. అధిక వడ్డీ వస్తుందని అత్యాశకు పోయి డబ్బులు పెట్టడం మాదే తప్పు అని ఈ సందర్భంగా బాధితులు వాపోయారు. లక్ష్మీ నారాయణ, జ్యోతి దంపతులు మోసం చేసినట్లు బాధితులు కన్నీరుమున్నీరుగా విలపిస్తున్నారు. ఇదిలా ఉండగా ఉప్పల్ పోలీస్టేషన్ లో బాధితుల ఫిర్యాదు చేయడంతో పోలీసులు కేసు నమోదు చేసుకుని దర్యాప్తు చేస్తున్నారు. ఈ క్రమంలో గతంలో వీరిపై పలు చీటింగ్ కేసులు ఉన్నట్లు గుర్తించారు..

హైదరాబాద్‌(Hyderabad)లో మరోసారి ఐటీ దాడులు (IT Raids) కలకలం రేపాయి. ప్రముఖ బ్రేక్‌ఫాస్ట్ ఫ్రాంచైజీ చట్నీస్‌ హోటల్స్‌(Chutneys Hotels)లో ఐటీ అధికారులు సోదాలు నిర్వహిస్తున్నారు. హోటల్ యజమాని ఇళ్లలోనూ తనిఖీలు చేపట్టారు. ఆంధ్రప్రదేశ్‌ పీసీసీ చీఫ్‌ షర్మిలకు వియ్యంకురాలు అట్లూరి పద్మ(Atluri Padma) కావడం చట్నీస్ హోటల్స్ యజమాని కావడం గమనార్హం.

ఇటీవలే షర్మిల కుమారుడు రాజారెడ్డితో అట్లూరి పద్మ కుమార్తెకు వివాహం జరిగిన విషయం తెలిసిందే. అదేవిధంగా హైదరాబాద్‌ కేంద్రంగా నడుస్తున్న మేఘనా ఫుడ్స్‌ ఈటరీస్‌లోనూ ఐటీ అధికారులు సోదాలు చేస్తున్నారు. నగరంతోపాటు బెంగళూరులోనూ ఈ ఫ్రాంచైజీలు ఉన్నట్లు సమాచారం.

అయితే ఈ దాడులకు సంబంధించి హోటళ్ల యజమానులతోపాటు ఐటీ అధికారులు ఎలాంటి ప్రకటనా చేయలేదు. అట్లూరి పద్మ పదేళ్ల కిందట ఈ హోటళ్లను ప్రారంభించారు. నగరంలో అనేక శాఖలను విజయవంతంగా నడుపుతున్నారు. అయితే, తాజాగా ఐటీ అధికారులు ఈ హోటల్స్‌లో సోదాలు నిర్వహిస్తుండటంతో సంచలనంగా మారింది.

ఈ హోటల్స్‌తో పాటు సైబరాబాద్ పోలీస్ కమిషనరేట్ పరిధిలోని రాయదుర్గం, మొయినాబాద్ కోకాపేటలో ఐటీ అధికారులు సోదాలు నిర్వహిస్తున్నట్లు సమాచారం. ఓ ఫార్మా కంపెనీతో పాటు మరో తొమ్మిది చోట్ల ఐటీ అధికారులు సోదాలు నిర్వహించారు. అయితే లోక్ సభ ఎన్నికలు సమీపిస్తున్న తరుణంలో ఐటీ దాడులు జరగడం సంచలనంగా మారింది.

ఇబ్రహీంపట్నం(Ibrahimpatnam)లో పరువుహత్య చోటుచేసుకుంది. కూతురు ఓ యువకున్ని ప్రేమించిందని తల్లి కర్కశంగా వ్యవహరించింది. కన్న కూతురుకు చున్నీతో ఉరేసి చంపేసింది. ఈ దారుణ ఘటన హైదరాబాద్‌లో కలకలం రేపింది. వివరాల్లోకి వెళ్తే.. ఇబ్రహీంపట్నం పరిధిలో దండుమైలారం (Dandumailaram)లో  జంగమ్మ కుటుంబం నివాసముంటోంది.

ఆమెకు ఇద్దరు పిల్లలు. కూతురు భార్గవి(Bhargavi) డిగ్రీ మొదటి సంవత్సరం చదువుతోంది. అయితే ఆమె చదువుతున్న కాలేజీలో శశి(shashi) అనే యువకుడు పరిచయమయ్యాడు. కొద్దిరోజులు స్నేహితులుగా ఉన్న వీరిద్దరి మధ్య ప్రేమ చిగురించింది. రాను రాను వీరిద్దరూ ఎక్కువగా కలవడం, మాట్లాడుకుంటున్నారు. ఈ విషయం కాస్త భార్గవి కుటుంబ సభ్యులకు తెలియడంతో రచ్చరచ్చ చేశారు. శశిని కలవకూడదని, పరువు పోతోందని కూతురు సరైన దారిలో పెట్టడానికి ప్రయత్నించారు.

చదువుపై శ్రద్ధ పెట్టాలని భార్గవి తల్లి జంగమ్మ మందలించింది. అయినా భార్గవి కుటుంబాన్ని, తన తల్లి చెప్పిన మాటలను పక్కన పెట్టి శశిని కలవడం మానలేదు. దీంతో వీరి ప్రేమ వ్యవహారం కుటుంబంలో గొడవలకు దారితీసింది. ఇంటి నుంచి బయటకు వెళ్లేందుకు భార్గవి తల్లి నిరాకరించింది. చాలా రోజుల నుంచి భార్గవి కనిపించకపోవడంతో శశి ఆమె ఇంటికి వచ్చాడు. దీంతో అది చూసిన తల్లి జంగమ్మ ఆగ్రహంతో ఊగిపోయింది.

శశి ఇంటికి ఎందుకు వచ్చాడని తల్లి జంగమ్మ రెచ్చిపోయింది. కూతురు భార్గవి ఏం చేస్తుందో ఏమో అని భయపడి చివరకు కన్న కూతురినే చీరతో ఉరేసి చంపేసింది. ఏమీ ఎరుగనట్లు కూతురు చనిపోయిందంటూ ఏడవడం మొదలుపెట్టింది. ఈ వ్యవహారంపై భార్గవి సోదరుడు పోలీసులకు ఫిర్యాదు చేశాడు. తన కన్నతల్లే భార్గవిని చంపిందని కేసు పెట్టడంతో అసలు విషయం వెలుగులోకి వచ్చింది. ఈ మేరకు పోలీసులకు కేసు దర్యాప్తు చేస్తున్నారు.

భార్గవిని చంపింది తల్లి కాదు.. ప్రియుడు..?

పరువు హత్య కేసులో మరో ట్విస్ట్ వెలుగులోకి వచ్చింది. భార్గవి సోదరులు, ప్రియుడు శశిని పోలీసులు అదుపులోకి తీసుకుని విచారించారు. ఈ క్రమంలో భార్గవి తండ్రి మాట్లాడుతూ.. కన్న తల్లి ఎక్కడైనా కూతురును హత్య చేస్తుందా..? అని ప్రశ్నించాడు. సోమవారం మధ్యాహ్నం తన భార్య ఇంటి నుంచి వచ్చేసరికి శశి ఇంట్లో ఉన్నాడని, తన భార్య రావడం చూసి పారిపోయాడని వెల్లడించాడు.

శశి తన కూతురు భార్గవిని చంపి పారిపోయి ఉంటాడని అనుమానం వ్యక్తం చేశాడు. భార్గవిని తమ మేనల్లుడికి ఇచ్చి పెళ్లి చేయాలి అనుకున్నామని, అయితే భార్గవి మాత్రం శశినే పెళ్లి చేసుకుంటానని మొండికేసిందని తెలిపాడు. కూతురు మృతిచెందడం చూసి తన భార్య మాట్లాడలేని స్థితిలో కూర్చుండిపోయిందని, అది చూసిన తన కుమారుడు తన తల్లే చంపినట్లు భావించి పోలీసులకు చెప్పాడని తెలిపాడు. తన భార్య కూతురును హత్య చేయలేదని తెలిపాడు. మరి దీనిపై పోలీసులు ఎలాంటి చర్యలు తీసుకుంటారనేది తెలియాల్సివుంది.