National

ఇజ్రాయెల్‌- హమాస్‌ యుద్ధం(Israel-Hamas War)తో గాజాలో ఆకలి కేకలు వినిపిస్తున్నాయి. ఈ నేపథ్యంలో ఆహార పదార్థాలను తీసుకెళ్తున్న ట్రక్కులు ఉత్తర గాజా(North Gaza)కు చేరుకున్నాయని ఇజ్రాయెల్ అధికారులు బుధవారం తెలిపారు. యుద్ధంతో తీవ్రంగా ప్రభామితమైన గాజాకు ఆహార పదార్థాలు చేరుకోవడం గతకొన్ని వారాల్లో ఇదే తొలిసారి.

మొత్తం 23 లక్షల మందిలో 5,76,000 మంది తీవ్ర క్షుద్బాధతో అలమటిస్తున్నారు. రెండేళ్లలోపు చిన్నారుల్లో ప్రతీ ఆరుగురిలో ఒకరు పోషకాహార లోపంతో బాధపడుతున్నారని ఐక్యరాజ్య సమితి సహాయక సంస్థ ప్రతినిధి రమేశ్‌ రామసింగం తెలిపారు. మిగిలిన వారూ సరైన ఆహారం దొరక్క అలమటిస్తున్నారని ఆయన వెల్లడించారు. జోర్డాన్‌, యూఏఈ, ఈజిప్టు, ఫ్రాన్స్‌ నుంచి వచ్చిన విమానాల ద్వారా గాజాలో ఆహార పొట్లాలను జారవిడిచామని జోర్డాన్‌ వెల్లడించింది.

మరోవైపు ఇజ్రాయెల్ సైనిక స్థావరాలపై లెబనాన్‌లోని హెజ్‌బొల్లా మిలిటెంట్లు క్షిపణి దాడులు చేశారు. 20 క్షిపణుల వరకు ప్రయోగించగా అందులో ఒకటి వైమానిక నిర్వహణ వ్యవస్థకు సమీపంలో పడినట్లు ఇజ్రాయెల్‌ సైన్యం తెలిపింది.  గాజా సిటీలోని కమల్‌ అద్వాన్‌ ఆస్పత్రిలో ఇద్దరు శిశువులు అతిసార, పోషకాహార లోపంతో మృతిచెందినట్లు గాజా ఆరోగ్యశాఖ ప్రకటించింది.

వేల మంది శిశువులు, గర్భిణులు మరణించే ప్రమాదముందని ఆందోళన వ్యక్తం చేసింది. హమాస్‌ చెరలో ఉన్న బందీలను విడిపించాలని కోరుతూ ఇజ్రాయెల్‌లోని వారి బంధువులు, మద్దతుదారులు జెరూసలెం వరకు నాలుగు రోజుల ర్యాలీని ప్రారంభించారు. అటు యెమెన్ తీరం సమీపంలోని ఎర్ర సముద్రంలో సరకు రవాణా నౌకపై మంగళవారం రాత్రి హూతీ రెబల్స్ దాడి చేశారు.

జపాన్‌(Japan)లో జననాల సంఖ్య(Number of births) గణనీయంగా తగ్గిపోతోంది. తాజాగా విడుదలైన నివేదికలో జనన రేటు(Birth rate) మరింత తగ్గింది. 2023 సంవత్సరంలో 7లక్షల 58 వేల 631మంది జన్మించినట్లు వెల్లడించింది. అయితే ఎనిమిదేళ్లలో జపాన్ జననాల సంఖ్యలో ఇదే అత్యల్ప సంఖ్య. అంతకుముందు ఏడాదితో పోలిస్తే 2023లో జననాల సంఖ్య 5.1 శాతం తగ్గింది.

మరోవైపు జపాన్‌ ప్రజలు పెళ్లిళ్లు చేసుకోవడానికి ఎక్కువగా మొగ్గుచూపడం లేదు. వివాహాల సంఖ్య 5.9శాతం తగ్గి 4 లక్షల 89 వేల 281కి చేరుకుంది. 90 ఏళ్లలో తొలిసారిగా వివాహాల సంఖ్య 5లక్షల కంటే తక్కువ పెళ్లిళ్లు జరిగాయి. ప్రస్తుత డేటా ప్రకారం, నేషనల్ ఇన్స్టిట్యూట్ ఆఫ్ పాపులేషన్ అండ్ సోషల్ సెక్యూరిటీ రీసెర్చ్ 2070లో ఈ సంఖ్య మరింతగా 30శాతం తగ్గుతుందని అంచనా వేసింది.

అప్పుడు జపాన్ జనాభా 87 మిలియన్లకు పడిపోతుంది. దీంతో జపాన్ ప్రభుత్వం ఆందోళన వ్యక్తం చేస్తోంది. జనాభా వేగంగా పడిపోతున్న క్రమంలో తగు చర్యలు తీసుకుంటున్నట్లు జపాన్ ప్రతినిధి ఒకరు వెల్లడించారు. పిల్లల సంరక్షణకు ప్రభుత్వం కృషి చేస్తున్నట్లు తెలిపారు. యువ కార్మికుల జీతాలు పెంచనున్నట్లు చెప్పారు.

జపాన్ క్యాబినెట్ మంత్రి యోషిమాసా హయాషి మాట్లాడుతూ జనన రేటు తగ్గుదల సమస్య చాలా తీవ్రమైనదని తెలిపారు. 2030 నాటికి యువత సంఖ్య పెరగకపోతే ఈ సంఖ్యను మార్చడం అసాధ్యంమని అభిప్రాయపడ్డారు. ప్రధాన మంత్రి ఫుమియో కిషిడా మాట్లాడుతూ.. ప్రస్తుతం జననాల రేటు తమ దేశంలో అత్యంత తీవ్రమైన సంక్షోభమని వెల్లడించారు.