National

అమెరికా(USA)లోని జార్జియా స్టేట్‌, బెయిన్‌బ్రిడ్జ్‌లో కోతుల కోసం ఏకంగా మినీ సిటీని ఏర్పాటు చేస్తున్నారు. సేఫర్‌ హ్యూమన్‌ మెడిసిన్‌(Safer Human Medicine) కంపెనీ బెయిన్‌బ్రిడ్జ్‌లో 30వేల కోతులను పెంచేందుకు సిద్ధమైంది.

సుమారు 200 ఎకరాల విస్తీర్ణంలో ఈ కేంద్రాన్ని ఏర్పాటు చేస్తామన్నారు. దీంతో పట్టణవాసులు ఆ కంపెనీపై తీవ్ర ఆగ్రహం వ్యక్తం చేస్తున్నారు. జనావాసాల్లో కోతుల పెంపకంపై ప్రజలతోపాటు జంతు హక్కుల సంఘాలు మండిపడుతున్నాయి.

అయితే, వీటిని వైద్య రంగంలో పరిశోధనల కోసం విశ్వవిద్యాలయాలు, ఫార్మాస్యుటికల్‌ కంపెనీలకు పంపిస్తామని సేఫర్‌ హ్యూమన్‌ మెడిసిన్‌ కంపెనీ చెబుతోంది. వీటి వల్ల ఈ ప్రాంతంలో వ్యాధులు ప్రబలకుండా కట్టుదిట్టమైన చర్యలు తీసుకుంటామని హామీ ఇస్తోంది.

అయినప్పటికీ స్థానికులు తీవ్ర నిరసన తెలుపుతున్నారు. దాదాపు 14వేల జనాభాగల ఈ పట్టణంలో 30వేల కోతులు ఉండటాన్ని తాము ఎట్టి పరిస్థితుల్లో అంగీకరించబోమని తేల్చిచెబుతున్నారు. ఈ కంపెనీని తక్షణమే నిలిపేయాలని అధికారులను డిమాండ్‌ చేస్తున్నారు.

-దేశంలో తొలి గూఢచార ఉపగ్రహం
-నిర్మిస్తున్న టాటా కంపెనీ
-స్పేస్ ఎక్స్ ద్వారా అంతరిక్షంలోకి
-బెంగళూరులో గ్రౌండ్ కంట్రోల్ సెంటర్

భారత్ తన మొదటి గూఢచార శాటిలైట్‌ (spy satellite )ను ప్రయోగించేందుకు ఏర్పాట్లు చేస్తోంది. దేశానికి చెందిన టాటా అడ్వాన్స్‌డ్ సిస్టమ్స్ లిమిటెడ్ (TASL) కంపెనీ ఈ శాటిలైట్‌ను నిర్మించింది. ఈ ఏడాది ఏప్రిల్‌లోగా దీన్ని స్పేస్ ఎక్స్ రాకెట్ ద్వారా అంతరిక్షంలోకి పంపించేందుకు ఏర్పాట్లు చేస్తున్నారు.

ఇప్పటికే ఈ శాటిలైట్‌ను లాంఛింగ్ కోసం కంపెనీ ఫ్లోరిడాకు పంపించినట్టు సమాచారం. రహస్య సమచారాన్ని సేకరించడంలో సైన్యానికి ఈ ఉపగ్రహం ఉపయోగపడుతుందని అధికారులు చెబుతున్నారు. ఈ శాటిలైట్ కోసం బెంగళూరులో ఓ గ్రౌండ్ కంట్రోల్ సెంటర్ ను ఏర్పాటు చేస్తున్నట్టు కంపెనీ ప్రతినిధులు చెబుతున్నారు.

దీనికి సంబంధించిన పనులు శరవేగంగా జరుగుతున్నాయని చెప్పారు. త్వరలోనే ఈ గ్రౌండ్ కంట్రోల్ సెంటర్ ను ప్రారంభిస్తామని పేర్కొన్నారు. లాటిన్-అమెరికన్ కంపెనీ అయిన శాటెలోజిక్ భాగస్వామ్యంతో ఈ కేంద్రాన్ని నిర్మిస్తున్నట్లు తెలుస్తోంది.

శాటిలైట్ పంపించిన చిత్రాలను మార్గ నిర్దేశం చేసేందుకు, ప్రాసెస్ చేసేందుకు ఉపయోగించబడుతుందని పేర్కొంది. టీఏఎస్ఎల్ ఉపగ్రహం ద్వారా పంపబడిన చిత్రాలను మిత్ర దేశాలతో పంచుకునేందుకు అనుమతించే అవకాశాలు ఉన్నట్టు తెలుస్తోంది.

కాంగ్రెస్ అగ్రనేత రాహుల్ గాంధీ (Rahul Gandhi) చేపట్టిన భారత్ జోడో న్యాయ్ యాత్ర (Bharat Jodo Nyay Yatra)కు తాత్కాలికంగా బ్రేక్ పడింది. మంగళ వారం ఉదయం యాత్రను తాత్కాలికంగా నిలిపి వేయనున్నట్టు కాంగ్రెస్ కమ్యూనికేషన్స్ ఇంఛార్జ్ జనరల్ సెక్రటరీ జైరాం రమేశ్ వెల్లడించారు.

పరువు నష్టం కేసుకు సంబంధించి సుల్తాన్‌పూర్‌లోని జిల్లా సివిల్ కోర్టులో రాహుల్ గాంధీ హాజరు కావాల్సి ఉందని తెలిపారు. ఈ నేపథ్యంలో యాత్రకు తాత్కాలికంగా బ్రేక్ ఇస్తున్నట్టు చెప్పారు. 4 ఆగస్టు 2018న బీజేపీ నేత దాఖలు చేసిన పరువు నష్టం కేసుకు సంబంధించి రాహుల్ గాంధీకి సమన్లు వచ్చాయని చెప్పారు.

ఈ క్రమంలో రాహుల్ గాంధీ మంగళవారం సుల్తాన్ పూర్ జిల్లా సివిల్ కోర్టు ఎదుట హాజరు కావాల్సి ఉందని వివరించారు. దీంతో యాత్రను తాత్కాలికంగా నిలిపి వేస్తున్నామన్నారు. మంగళవారం మధ్యాహ్నం 2 గంటలకు అమేథీలోని ఫుర్సత్‌గంజ్ నుండి భారత్ జోడో న్యాయ్ యాత్రను తిరిగి ప్రారంభిస్తామని పేర్కొన్నారు.

2018లో బెంగళూరులో నిర్వహించిన ఓ సభలో కేంద్ర హోం మంత్రి అమిత్ షాపై రాహుల్ గాంధీ తీవ్ర వ్యాఖ్యలు చేశారు. దీనిపై బీజేపీ శ్రేణులు మండిపడ్డాయి. ఈ వ్యాఖ్యలపై బీజేపీ నేతలు కోర్టులో పిటిషన్ వేశారు. ఈ కేసులో ఈ నెల 20న విచారణకు హాజరు కావాలని రాహుల్ గాంధీని ప్రజాప్రతినిధుల న్యాయస్థానం ఆదేశించింది.

రైతు సంఘాల నేతలతో కేంద్ర మంత్రుల చర్చలు సత్పలితాలను ఇస్తున్నాయి. రైతుల (Farmers) ప్రధాన డిమాండ్ అయిన మద్దతు ధర (Minimum Support Price) విషయంలో కేంద్రం కీలక ప్రతిపాదనలు చేసింది. ఈ ప్రతి పాదనల నేపథ్యంలో తాము ఛలో ఢిల్లీని రెండు రోజుల పాటు వాయిదా వేస్తున్నామని రైతులు ప్రకటించారు. దీంతో రైతులకు ఆందోళనకు తాత్కాలికంగా బ్రేక్ పడింది.

అంతకు ముందు రైతు సంఘాల నేతలతో కేంద్ర మంత్రులు అర్జున్ ముండా, పీయూష్ గోయెల్, నిత్యానంద్ రాయ్ భేటీ అయ్యారు. వారితో పాటు పంజాబ్ సీఎం భగవంత్ సింగ్ మాన్ కూడా చర్చల్లో పాల్గొన్నారు. రాబోయే ఐదేండ్ల పాటు పలు రకాల పంటలను మద్దతు ధరతో కొనుగోలు చేస్తామని కేంద్ర మంత్రులు హామీ ఇచ్చారు.

పప్పుధాన్యాలు, మొక్కజొన్న, పత్తి పంటలను కనీస మద్దతు ధరలకు ప్రభుత్వ సంస్థలు కొనుగోలు చేస్తాయని ప్రతిపాదనలు చేశాయి. ఈ ప్రతిపాదనలకు రైతు సంఘాలు సంతృప్తి వ్యక్తం చేయడంతో చర్చలు సఫలం అయ్యాయి. ఈ మేరకు విషయాన్ని కేంద్ర మంత్రి పీయూష్ గోయల్ వెల్లడించారు. చర్చల అనంతరం కేంద్ర మంత్రి పీయూష్ గోయెల్ మీడియాతో మాట్లాడారు.

నాలుగో రౌండ్ చర్చల్లో రైతుల ముందుకు తాము వినూత్న ప్రతిపాదన తీసుకు వచ్చామని తెలిపారు. రైతుల నుంచి ఎన్సీసీఫ్, ఎన్ఏఎఫ్ఈడీ, సీసీఐ లాంటి సహకార సంస్థలు ఒప్పందం కుదుర్చుకుంటాయని ప్రతిపాదనలు తీసుకు వచ్చామని చెప్పారు. ఆయా సంస్థలు రాబోయే ఐదేండ్లపాటు వారి పంటలను కనీస మద్దతు ధరతో కొనుగోలు చేస్తాయని అన్నారు.

రైతులతో మరోసారి సమావేశమయ్యే అవకాశం ఉందని వెల్లడించారు. రైతులు చేస్తున్న పలు డిమాండ్లపై సమగ్ర చర్చ లేకుండా నిర్ణయం తీసుకోలేమని వివరించారు. రైతులు ఉత్పత్తి చేసిన పంట మొత్తాన్ని కొనుగోలు చేస్తామని హామీ ఇచ్చారు. ఈ విషయంలో ఎలాంటి పరిమితులు ఉండబోవని రైతులకు చెప్పామని పేర్కొన్నారు. కొనుగోళ్ల కోసం ప్రత్యేక పోర్టల్‌ను కూడా అభివృద్ధి చేస్తామన్నారు. ఈ నిర్ణయం పంజాబ్ వ్యవసాయాన్ని కాపాడుతుందన్నారు.

మరోవైపు నాలుగో రౌండ్ చర్చల్లో ఎంఎస్​పీ చట్టం, ఎం.ఎల్ స్వామినాథన్ కమిషన్ సిఫార్సులు, రుణమాఫీ వంటి అంశాలపై కేంద్ర మంత్రులతో చర్చించామని రైతు సంఘాల నాయకులు వివరించారు. ప్రభుత్వం చేసిన ప్రతిపాదనలపై మరో రెండు రోజుల్లో పూర్తి స్థాయిలో ఆలోచించి నిర్ణయం తీసుకుంటామని తెలిపారు. ఇంకా కొన్ని డిమాండ్లు పెండింగ్ లో ఉన్నాయని.. మరో రెండు రోజుల్లో అవి కూడా పరిష్కారం అవుతాయని తాము ఆశిస్తున్నట్టు రైతు సంఘాల నేతలు చెబుతున్నారు. తమ సమస్యలు పరిష్కారం కాకపోతే మళ్లీ ఫిబ్రవరి 21 ఉదయం 11 గంటలకు ప్రారంభిస్తామని పేర్కొన్నారు.

ప్రపంచంలోనే అత్యంత శక్తవంతమైన పాసు పోర్టుల (Powerful Passports) జాబితాను హెన్లీ పాస్ పోర్టు ఇండెక్స్ (Henley Passport Index) విడుదల చేసింది. ఈ జాబితాలో ఫ్రాన్స్ మొదటి స్థానంలో నిలిచింది. ఫ్రాన్స్‌తో పాటు జర్మనీ, ఇటలీ, జపాన్, స్పెయిన్, సింగపూర్‌లు అగ్రస్థానాన్ని పంచుకున్నాయి. ఆయా దేశాల పాసుపోర్టుతో ఎలాంటి వీసా లేకుండానే 194 దేశాల్లో పర్యటించవచ్చు.

ఈ జాబితాలో భారత్ పాసుపోర్టు 85వ స్థానంలో నిలిచింది. గతేడాదితో పోలిస్తే వీసా లేకుండా తమ దేశాల్లో భారతీయులను అనుమతించే దేశాల సంఖ్య 60 నుంచి 62కు పెరిగింది. అయినప్పటికీ ఈ జాబితాలో భారత్ పాసుపోర్టు స్థానం కిందకి పడిపోవడం గమనార్హం. ఇక దాయాది పాక్ గతేడాది లాగానే ఈ సారి కూడా 106వ స్థానంలో నిలిచింది.

ఎలాంటి వీసా లేకుండానే పాక్ పౌరులు 34 దేశాల్లో ప్రయాణించేందుకు అవకాశం ఉంది. ఇక పొరుగు దేశం బంగ్లాదేశ్ గతంతో పోలిస్తే ఒక స్థానం కిందకి పడిపోయింది. గతేడాది ఈ జాబితాలో బంగ్లాదేశ్ 101 వస్థానంలో ఉండగా, ఈ ఏడాది 102వ స్థానానికి పడిపోయింది. ఇక మాల్దీవులు ఈ జాబితాలో 58వ స్థానంలో ఉంది.

ఇక సౌదీ అరేబియా రెండు స్థానాలు మెరుగు పరుచుకుంది. గతేడాది సౌదీ అరేబియా ఈ జాబితాలో 65 వ స్థానంలో ఉండగా.. ఈ ఏడాది 63వ స్థానానికి ఎగబాకింది. అటు డ్రాగన్ కంట్రీ కూడా ఈ జాబితాలో రెండు స్థానాలు మెరుగు పరుచుకుంది. గతేడాది చైనా 66 నుంచి 64వ స్థానానికి చేరుకుంది. అగ్రరాజ్యం అమెరికా గతంతో పోలిస్తే ఏడు నుంచి ఆరవ స్థానానికి చేరింది.