Politics

తెలంగాణ (Telangana) రాష్ట్రంలో 2024-2025 ఆర్థిక సంవత్సరం బడ్జెట్ కోసం ప్రభుత్వం కసరత్తును వేగవంతం చేసింది. ఇందులో భాగంగా ఆయా శాఖల మంత్రులు, అధికారులతో ఉప ముఖ్యమంత్రి భట్టి విక్రమార్క (Bhatti Vikramarka) సమావేశం నిర్వహిస్తున్నారు. ఆదాయం, వ్యయం, నిధుల సమీకరణ, కేటాయింపులపై శాఖల వారీగా సమీక్షలు నిర్వహిస్తున్నారు..

మరోవైపు ముఖ్యమంత్రి రేవంత్‌రెడ్డి (CM Revanth Reddy) వద్ద ఉన్న శాఖలకు సంబంధించిన సమావేశాలు 24, 25, 27 తేదీల్లో జరుగుతాయని, రోజుకు నాలుగు చొప్పున, మూడు రోజుల్లో శాఖలకు సంబంధించిన ప్రతిపాదనలను సమీక్షిస్తారని అధికారిక సమాచారం.. ఈమేరకు రాష్ట్ర ప్రభుత్వం ఇటీవల ఇచ్చిన హామీలకు అనుగుణంగా కొత్త పథకాలు, ముఖ్యమైన అంశాలకు సంబంధించిన వివరాలు విడిగా ఇవ్వాలని అన్ని శాఖలకు, ఆర్థికశాఖ సూచించింది.

అయితే ఇప్పటికే ప్రజాదర్బర్‌ ఫిర్యాదులపై కేబినెట్ సబ్‌ కమిటీ, ధరణి పోర్టల్‌పై కోదండరెడ్డి కమిటీని ఏర్పాటు చేశారు. బడ్జెట్‌ ప్రతిపాదనల తయారీపై ఉన్నతాధికారులతో చర్చించారు. మంత్రి పొంగులేటి శ్రీనివాస్‌ రెడ్డి (Ponguleti Srinivas Reddy)తో కలిసి రెవిన్యూ, హౌజింగ్, ఐ ఆండ్ పిఆర్ శాఖల ఉన్నతాధికారులతో రివ్యూ నిర్వహించారు. రానున్న ఆర్థిక సంవత్సరంలో ఆయా శాఖలో అమలు చేసే కార్యక్రమాలు, పథకాలు, నిర్వహణ వ్యయంపై ఆరా తీశారు.

మరోవైపు లోక్‌సభ ఎన్నికల నేపథ్యంలో కేంద్రం కీలక నిర్ణయం తీసుకొంది. ఓటాన్ అకౌంట్ బడ్జెట్‌ను ఈ సంవత్సరం తెలంగాణ బడ్జెట్‌ వచ్చాక ప్రవేశపెట్టే ఆలోచనలో ఉన్నట్టు సమాచారం. ఇక ఫిబ్రవరి 1న కేంద్ర ప్రభుత్వ బడ్జెట్ రానుంది. రాష్ట్రానికి వివిధ రూపాల్లో ఏ పథకాల కింద ఏ మేరకు నిధులు వస్తాయో కేంద్ర బడ్జెట్‌లో స్పష్టత రానుంది. ఆ అంశాన్ని కూడా దృష్టిలో పెట్టుకొని ప్రతిపాదనలు ఖరారు చేసినట్టు తెలుస్తోంది.

నేను పట్టిన కుందేలుకు మూడే కాళ్ళు అని వాదించినట్టు ఉందని బీఆర్ఎస్ (BRS) నేతల తీరు చూస్తున్న వారు అనుకొంటున్నారు.. ప్రభుత్వం ఏర్పడిన నాటి నుంచి ఒకే రాగాన్ని ఎత్తుకొన్న గులాబీ పక్షులపై ఇప్పటికే అసంతృప్తిగా ఉన్న రాష్ట్ర ప్రజలు.. వీరి తీరుకు విసుగు చెందుతున్నట్టు వార్తలు వినిపిస్తున్నాయి. ఇప్పటికే కాంగ్రెస్ ప్రభుత్వం ఎక్కువ రోజులు ఉండదనే వాయిస్ వినిపిస్తూ.. పార్లమెంట్ ఎన్నికల్లో సానుభూతి పొందాలని చూస్తున్నా, ప్రజలు నమ్మే స్థితిలో లేరనే నిజాన్ని గ్రహిస్తే మంచిదని అంటున్నారు..

మరోవైపు కాంగ్రెస్ ప్రభుత్వంపై బీఆర్ఎస్ వర్కింగ్ ప్రెసిడెంట్ కేటీఆర్ (KTR) సంచలన వ్యాఖ్యలు చేశారు.. కొద్ది రోజుల్లోనే కాంగ్రెస్ ప్రభుత్వం పట్ల సమాజంలోని అనేక వర్గాలు అసంతృప్తిగా ఉన్నాయని ఆరోపించారు. ఇదే పరిస్థితి రాష్ట్రంలో కొనసాగితే కేవలం ఆరు నెలల్లో ప్రభుత్వంపై ప్రజలు తిరగబడే పరిస్థితి వస్తుందని పేర్కొన్నారు.. మహబూబ్ నగర్ (Mahbub Nagar) పార్లమెంట్ సన్నాహక సమావేశంలో కేటీఆర్ మాట్లాడుతూ కాంగ్రెస్ ప్రభుత్వంపై మండిపడ్డారు.

రైతుబంధు, రుణమాఫీ, నిరుద్యోగ భృతి ఇంకా ఎందుకు ఇవ్వడం లేదని ప్రశ్నించారు. కాంగ్రెస్ ఇచ్చిన హామీల సంఖ్య సరిగ్గా 420 ఉన్నాయని ఎద్దేవా చేశారు.. నాలుగు కోట్ల మంది ఉన్న తెలంగాణ (Telangana) రాష్ట్రంలో కాంగ్రెస్ కంటే బీఆర్ఎస్ కి తక్కువ వచ్చిన ఓట్లు కేవలం నాలుగు లక్షలు మాత్రమేనని గుర్తు చేశారు.. మళ్ళీ గట్టిగా పోరాడితే అధికారంలోకి రావడానికి ఎక్కువ సమయం పట్టదని సూచించారు..

ఎన్నికల సమయంలో ఇచ్చిన హమీలు నెరవేర్చే వరకు గుర్తు చేయాలని.. అవసరం అనుకొంటే పోరాటం చేయాలని పార్టీ కార్యకర్తలను ఉద్దేశించి అన్నారు. మరోవైపు బీఆర్ఎస్ పై జరిగిన దుష్ప్రచారాన్ని తిప్పికొట్టడంలో వైఫల్యం చెందినట్టు తెలిపారు.. బీఆర్ఎస్ అమలు చేస్తున్న పథకాలు ప్రజల్లోకి తీసుకెళ్లడంలో విఫలం అయినట్టు కేటీఆర్ పేర్కొన్నారు.. ఇచ్చిన మాట తప్పుతోన్న కాంగ్రెస్ (Congress) ప్రభుత్వానికి ముందు ముందు తిప్పలు తప్పవని జోస్యం చెప్పారు..

హైదరాబాద్ (Hyderabad) మహానగరంలో వందల కోట్ల అభివృద్ధి పనులపై నీలినీడలు కమ్ముకొన్నాయి. జీహెచ్ఎంసీ (GHMC) ఖజానాలో సరిపడా నిధులు లేకపోవడంతో గుత్తేదారులు పనులు చేసేందుకు ముందుకు రావడం లేదనే ఆరోపణలు వినిపిస్తున్నాయి.. గత ఏడాది నుంచి పనులు చేస్తున్న గుత్తేదారులకు జీహెచ్ఎంసీ బిల్లులు చెల్లించడం లేదన్న సంగతి తెలిసిందే..

ఈ క్రమంలో కొత్త టెండర్లు పిలిచినా ఎవరూ ముందుకు రావడం లేదంటున్నారు. జీహెచ్ఎంసీలోని 6 సర్కిళ్లలో దాదాపు రూ.1100 కోట్లకుపైగా గుత్తేదారులకు బకాయిలు చెల్లించాల్సి ఉందని ప్రచారం జరుగుతోంది.. అయితే గతంలో బకాయిల కోసం గుత్తేదారులు ధర్నా చేస్తే రూ.300 కోట్ల వరకు విడుదల చేశారు. మరోవైపు జీహెచ్ఎంసీ రూ.6వేల కోట్ల అప్పుల్లో కూరుకుపోయిందనే ఆరోపణలున్నాయి. ఉద్యోగుల జీతాలు చెల్లించేందుకు కూడా తీవ్రంగా శ్రమించాల్సి వస్తోందని టాక్ నడుస్తోంది.

ఇంతటి క్లిష్ట పరిస్థితుల్లో సంవత్సర కాలం నుంచి పెండింగ్‌లో ఉన్న తమ బిల్లులను వెంటనే చెల్లించాలని డిమాండ్ చేస్తూ జీహెచ్ఎంసీ కాంట్రాక్టర్లు నేడు దోమలగూడ (Domalguda) ధర్నా చౌక్ వద్ద ధర్నా నిర్వహించారు. ‘‘వి వాంట్ పేమెంట్‘‘ అంటూ పెద్ద ఎత్తున నినాదాలు చేస్తూ బైఠాయించారు. ఈ సందర్భంగా కాంట్రాక్టర్లు మాట్లాడుతూ గత సంవత్సరం మార్చి నుంచి ఇప్పటివరకు తమ బిల్లులు వేల కోట్లలో పేరుకుపోయాయని ఆవేదన వ్యక్తం చేశారు.

ఇటీవల జరిగిన అసెంబ్లీ ఎన్నికల్లో డీఆర్సీ సెంటర్లను ఏర్పాటు చేసేందుకు తాము చేపట్టిన పనులకు సైతం బిల్లులు చెల్లించలేదని ఆరోపించారు.. ప్రభుత్వ తీరువల్ల తాము ఆర్థికంగా ఇబ్బందులు ఎదుర్కొంటున్నామని వాపోయారు. ఇక గత ప్రభత్వ హయాంలో చేసిన పొరపాట్లు కాంగ్రెస్ (Congress) ప్రభుత్వం మెడకు గుదిబండలా మారిందని అనుకొంటున్నారు..

కాంగ్రెస్ ఎమ్మెల్యే కోటా ఎమ్మెల్సీ అభ్యర్థులుగా బల్మూరి వెంకట్ (Balmoori Venkat), మహేష్ కుమార్ గౌడ్ (Mahesh Kumar Goud) నామినేషన్ వేశారు. డిప్యూటీ సీఎం భట్టి విక్రమార్క సమక్షంలో వీరిద్దరూ నామినేషన్లు దాఖలు చేశారు. మరోవైపు ఎమ్మెల్సీ ఎన్నికల (MLC Elections) నామినేష్ల గడువు నేటితో ముగియనున్నది. కాగా ఈ నెల 29న ఎమ్మెల్సీ ఎన్నికల పోలింగ్‌ జరుగనుంది. అదే రోజున ఫలితాలు వెల్లడించనున్నారు.

అయితే మొదట కాంగ్రెస్‌ (Congress) అధిష్టానం ఎమ్మెల్సీ అభ్యర్థులుగా వెంకట్‌, అద్దంకి దయాకర్‌ పేర్లను ఫైనల్‌ చేసింది. కానీ చివరి నిమిషంలో.. దయాకర్‌ను తొలగించి పీసీసీ ఉపాధ్యక్షుడు మహేశ్‌ కుమార్‌ పేరును తెరపైకి తెచ్చింది. దీంతో వారిరువురు నేడు అసెంబ్లీ సెక్రటేరియట్‌లో నామినేషన్ పత్రాలను సమర్పించారు. మరోవైపు అద్దంకి దయాకర్‌ ను బుజ్జగించే పనిలో నేతలున్నారు..

ఈ కార్యక్రమానికి కాంగ్రెస్ పార్టీ తెలంగాణ ఇన్ చార్జ్ దీపాదాస్ మున్షీ, AICC కార్యదర్శి రోహిత్ చౌదరి, మంత్రులు ఉత్తమ్ , తుమ్మల, పొంగులేటి, జూపల్లితో పాటు CWC సభ్యులు గిడుగు రుద్రరాజు, ప్రభుత్వ విప్ బీర్ల ఐలయ్య పాల్గొన్నారు. ఇక రెండు ఎమ్మెల్సీ స్థానాలకు వేర్వేరుగా ఎన్నికలు నిర్వహిస్తున్న విషయం తెలిసిందే.. అయితే అధికార పార్టీ మినహా మరో పార్టీ అభ్యర్థులను బరిలో నిలిపే అవకాశం లేకపోవడంతో ఎన్నిక ఏకగ్రీవం కానున్నదని సమాచారం..