Politics

రాష్ట్రంలో ఉప ఎన్నికలకు సమయం ఆసన్నమైంది. అధికారులు ఎమ్మెల్యే కోటాలో ఖాళీగా ఉన్న రెండు ఎమ్మెల్సీ (MLC) స్థానాలకు ఉప ఎన్నికల (By Elections) నోటిఫికేషన్‌ విడుదల చేశారు. విడివిడిగా రెండు సీట్లకూ ఎన్నికలు జరగనున్న నేపథ్యంలో అసెంబ్లీ కార్యాలయం వేర్వేరుగానే నోటిఫికేషన్లను జారీ చేసింది. నేటి నుంచే నామినేష్ల ప్రక్రియ ప్రారంభమవుతుందని అందులో పేర్కొంది.

మరోవైపు ఈ నెల 19న నామినేషన్లు పరిశీలించనున్నారు. 22 వరకు నామినేషన్ల ఉపసంహరణ గడువు ఉండగా, 29న ఎన్నికల పోలింగ్ నిర్వహిస్తారు. అదే రోజు ఓట్లు లెక్కించి, అనంతరం ఫలితాలు వెల్లడించనున్నారు. అయితే కాంగ్రెస్ (Congress)లో పదవులు ఆశించి భంగపడ్డవారు ప్రస్తుతం పోటీపడనున్నట్టు తెలుస్తోంది. ఇక వేర్వేరు ఎన్నిక కావడంతో కాంగ్రెస్ ఖాతాలో రెండు ఎమ్మెల్సీలు చేరే అవకాశం ఉన్నట్టు సమాచారం.

అయితే ఎమ్మెల్సీలుగా ఉన్న కడియం శ్రీహరి (Kadiam Srihari).. పాడి కౌశిక్‌ రెడ్డి (Padi Kaushik Reddy).. అసెంబ్లీ ఎన్నికల్లో ఎమ్మెల్యేలుగా గెలుపొందారు. దీంతో వారు తమ ఎమ్మెల్సీ పదవులకు రాజీనామా చేశారు. ఈ నేపథ్యంతో రెండు స్థానాలకు ఎన్నికల కమిషన్‌ ఉపఎన్నికలు నిర్వహించాలని నిర్ణయించింది. ఈమేరకు టికెట్ త్యాగం చేసిన వారికి పార్టీ ప్రాధాన్యత ఇచ్చే అవకాశం ఉందని ప్రచారం జరుగుతోంది.

మరోవైపు ఎమ్మెల్సీ పదవులు ఆశిస్తున్న వారిలో మాజీ ఎమ్మెల్యే ఇరవత్రి అనిల్ కుమార్‌, మాజీ మంత్రి చిన్నారెడ్డి, వర్కింగ్ ప్రెసిడెంట్ మహేశ్​ కుమార్ గౌడ్, హర్కల వేణుగోపాల్ రావు, అద్దంకి దయాకర్, మైనారిటీ కోటాలో అలీ మస్కతి, విద్యాసంస్థల అధినేత జాఫర్ జావిద్ పేర్లు ఉన్నాయి. ఓడిపోయిన నేతలకు అవకాశం ఇవ్వాలనుకుంటే మాజీ మంత్రి షబ్బీర్ అలీ, ఫిరోజ్ ఖాన్‌లకు అవకాశం దక్కవచ్చని భావిస్తున్నారు..

– పనుల మీద కంటే ప్రచారం మీద ఫోకస్ చేసి ఉంటే గెలిచేవాళ్ళం
– దేశంలో అత్యధికంగా ప్రభుత్వ ఉద్యోగాలు ఇచ్చింది మనమే
– ఉద్యోగులకు అత్యధిక వేతనాలు ఇచ్చింది మన ప్రభుత్వమే
– 29 లక్షల ఫించన్లను 46 లక్షలకు పెంచాం
– కానీ, ఇలాంటి అనేక అంశాలను చెప్పుకోవడం విఫలమయ్యాం
– అందుకే, కాంగ్రెస్ అబద్ధాల ముందు అభివృద్ధి ఓడిపోయింది
– మహబూబాబాద్ నియోజకవర్గ సన్నాహక సమావేశంలో కేటీఆర్

అసెంబ్లీ ఎన్నికల్లో పోయిన పరువును పార్లమెంట్ ఎన్నికలతో నిలుపుకోవాలని బీఆర్ఎస్ (BRS) తెగ తాపత్రయపడుతోంది. సన్నాహక సమావేశాలు అంటూ హడావుడి చేస్తోంది. చేసిన తప్పులతోపాటు ఓటమికి గల కారణాలను అన్వేషించుకుంటోంది. ఈ క్రమంలోనే మాజీ మంత్రి కేటీఆర్ (KTR) కీలక వ్యాఖ్యలు చేస్తున్నారు. గురువారం మహబూబాబాద్ (Mahabubabad) పార్లమెంట్ నియోజకవర్గ సన్నాహక సమావేశంలో పాల్గొన్న ఆయన.. కాంగ్రెస్ (Congress) హామీలపై విమర్శల దాడి చేశారు.

ప్రజలు పదేళ్లు బీఆర్ఎస్ కు అవకాశం ఇచ్చారని.. అధికారంలోకి వస్తామని కాంగ్రెస్ వాళ్ళు కూడా అనుకోలేదని సెటైర్లు వేశారు. ‘‘నోటికి ఏది వస్తే అది హామీ ఇచ్చారు. ఆరు గ్యారెంటీలు అన్నారు. 420 హమీలిచ్చారు. వాళ్ళ తప్పుడు ప్రచారం నమ్మి ప్రజలు గొప్పగా పని చేసిన నాయకులను కూడా తిరస్కరించారు. రేషన్ కార్డులు ఇవ్వలేదు అని ప్రచారం చేశారు. ఒక్క రేషన్ కార్డు ఇవ్వలేదు అన్నారు, తొమ్మిదిన్నరేళ్లలో బీఆర్ఎస్ ప్రభుత్వం 6,47,479 రేషన్ కార్డులు ఇచ్చింది’’ అని వివరించారు.

దేశంలో అత్యధికంగా ప్రభుత్వ ఉద్యోగాలు ఇచ్చింది బీఆర్ఎస్ ప్రభుత్వమేనని.. దీన్ని ఏనాడూ చెప్పుకోలేదన్నారు కేటీఆర్. ప్రభుత్వ ఉద్యోగులకు అత్యధిక వేతనాలు ఇచ్చింది కూడా తామేనని.. ఈ విషయంపై కూడా ప్రచారం చేసుకోలేదని తెలిపారు. దేశంలో అందరికన్నా ఎక్కువగా ప్రభుత్వ ఉద్యోగులకు 73శాతం జీతాలు పెంచిన ఏకైక నాయకుడు కేసీఆర్ మాత్రమేనన్నారు. 29 లక్షల ఫించన్లను 46 లక్షలకు పెంచినా ఏనాడూ చెప్పుకోలేదని తెలిపారు. కాంగ్రెస్ అబద్ధాల ముందు అభివృద్ధి ఓడిపోయిందని విమర్శించారు.

పనుల మీద కంటే ప్రచారం మీద ఫోకస్ చేసి ఉంటే మనమే గెలిచేవాళ్ళమని బీఆర్ఎస్ శ్రేణులకు చెప్పారు కేటీఆర్. వందలాది సంక్షేమ కార్యక్రమాలు తమ హయాంలో అమలు చేసినా, ఏనాడూ ప్రజలను లైన్లలో నిలబెట్టలేదని గుర్తు చేశారు. ప్రజల సౌకర్యమే చూసాం కానీ రాజకీయ ప్రయోజనం, ప్రచారం గురించి ఆలోచించలేదన్నారు. ప్రజలు మనల్ని పూర్తిగా తిరస్కరించలేదన్న విషయం గుర్తుంచుకోవాలని సూచించారు. బీఆర్ఎస్ పార్టీకి మూడో వంతు సీట్లు వచ్చాయని.. 14 స్థానాల్లో ఓటమి కేవలం గరిష్టంగా 6 వేల ఓట్లతోనే జరిగిందన్నారు. మొత్తంగా కాంగ్రెస్ కు, బీఆర్ఎస్ కు తేడా కేవలం 1.85 శాతం మాత్రమేనని వివరించారు.

స్దానిక సంస్ధల నుంచి మెదలుకొని అసెంబ్లీదాకా బలమైన నాయకత్వం తమకుందన్నారు కేటీఆర్. ఇప్పుడు బలమైన ప్రతిపక్షం ఉందని.. అన్నింటికీ మించి కేసీఆర్ లాంటి గొప్ప నాయకుడు మనకున్నారని పార్టీ శ్రేణులకు ధైర్యం చెప్పారు. మహబూబాబాద్ పార్లమెంట్ ఎన్నికల్లో గెలుపే లక్ష్యంగా ముందుకెళ్లాలని సూచించారు. ‘‘ఎన్నికల ముందు రైతు రుణమాఫీ చేస్తామంటూ రేవంత్ రెడ్డి అనేక మాటలు మాట్లాడారు, రుణం ఉన్నవాళ్లే కాదు, వ్యవసాయ రుణం లేనివాళ్లు కూడా తీసుకోండి రాగానే వెంటనే మాఫీ చేస్తామన్నారు. ఇచ్చిన అడ్డగోలు హామీలను నెరవేర్చే దారి లేకనే అప్పులు, శ్వేతపత్రాల నాటకాలను ఆడుతున్నారు. అందుకే వాస్తవాలు అందరికీ తెలియాలనే స్వేదపత్రం రూపొందించాం. ఎవరు నిరుత్సాహపడాల్సిన అవసరం లేదు. మన పార్టీకి బలమైన నాయకులు అద్భుతమైన నాయకత్వం ఉంది’’ అని వివరించారు కేటీఆర్.

పార్టీ సమావేశాలను వరుసగా పెట్టుకుందామని.. అనుబంధ సంఘాలను బలోపేతం చేస్తామన్నారు. పార్టీకి అన్ని వర్గాలను దగ్గరయ్యేలా కార్యక్రమాలు చేపడతామని.. గిరిజనులకు స్థానిక సంస్థల రిజర్వేషన్ తో పాటు.. పొడు భూముల పట్టాల పంపిణీ, అనేక ఇతర సంక్షేమ పథకాలు అనేక కార్యక్రమాలను చేపట్టినట్టు వివరించారు. అయినా గిరిజనం ఎక్కువ ఉన్న చోట్లకూడా ప్రజల పూర్తి మద్దతు రాలేదని, ఇలాంటి వాటన్నింటినీ విమర్శ చేసుకుని ముందుకు సాగుదామని పార్టీ శ్రేణులకు పిలుపునిచ్చారు కేటీఆర్. ఈ సమావేశంలో మాజీ మంత్రులు హరీష్ రావు, ప్రశాంత్ రెడ్డి, సత్యవతి రాథోడ్, మాజీ స్పీకర్ పోచారం, ఎంపీ కవిత, మహబూబాబాద్ పార్లమెంట్ నియోజకవర్గం పరిధిలోని ఎమ్మెల్యేలు, ఎమ్మెల్సీలు, మాజీ ఎమ్మెల్యేలు, పార్టీ ప్రజాప్రతినిధులు, ముఖ్య నేతలు పాల్గొన్నారు.

పార్లమెంట్ ఎన్నికలు సమీపిస్తున్న నేపథ్యంలో బీజేపీ (BJP)కి షాక్ తగిలింది. యువనేత, మాజీ మంత్రి ముఖేష్ గౌడ్ తనయుడు మూల విక్రమ్ గౌడ్ (Vikram Goud) పార్టీకి రాజీనామా చేస్తున్నట్టు వెల్లడించారు. ఈమేరకు బీజేపీ రాష్ట్ర అధ్యక్షుడు కిషన్ రెడ్డి (Kishan Reddy)కి నేడు తన రాజీనామా లేఖను పంపించినట్టు సమాచారం. ఈ నేపథ్యంలో పార్టీ అధిష్టానంపై అసంతృప్తిని వ్యక్తం చేశారు.. మోడీ నాయకత్వం పట్ల విశ్వాసంతో 2020 లో బీజేపీలో చేరినట్లు తెలిపారు.

పార్టీ రాష్ట్ర కార్యవర్గ సభ్యుడిగా కొనసాగుతున్నా విక్రమ్.. గత అసెంబ్లీ ఎన్నికల్లో గోషామహల్ టిక్కెట్ ఆశించారు. కానీ అధిష్టానం రాజాసింగ్ (Raja Singh) వైపు మొగ్గు చూపడంతో.. చిన్నబుచ్చుకొన్న విక్రమ్ గౌడ్ కు.. కిషన్ రెడ్డి నచ్చజెప్పారు. అయితే లోక్ సభ ఎన్నికల్లో పోటీ చేసే అవకాశం కల్పిస్తారని ఆశించిన ఆయనకు అధిష్టానం నుంచి ఎటువంటి హామీ రాకపోవడంతో.. చిత్తశుద్ధితో పని చేసినా పార్టీలో తగిన గుర్తింపు దక్కలేదని భావిస్తూ పార్టీ మారాలనే నిశ్చయానికి వచ్చినట్టు ప్రచారం జరుగుతోంది.

మరోవైపు విక్రమ్ గౌడ్ బీజేపీపై కీలక వ్యాఖ్యలు చేశారు.. క్రమశిక్షణకు మారు పేరంటూ పెద్ద నాయకులు కొట్టుకుంటుంటే చోద్యం చూస్తున్నారని ఆరోపించారు. ప్రజాబలం లేని వారికి పెద్దపీట వేసి వారి కింద పని చేయాలని ఆదేశిస్తున్నారన్నారు. పార్టీలో చేరి దాదాపు మూడున్నర సంవత్సరాలలో బీజేపీ అభివృద్ధికి, పార్టీ అభ్యర్థుల గెలుపునకు పని చేశానని తెలిపారు.

పార్టీ సిద్ధాంతాలను వదిలేసి కొంతమంది నాయకులకు వత్తాసు పలుకుతున్నారని, పార్టీ రాష్ట్ర నాయకుల తొత్తులుగా మారిన వారికే న్యాయం జరిగిందని విక్రమ్ గౌడ్ మండిపడ్డారు. త్వరలో కాంగ్రెస్ లో చేరనున్నట్లు వెల్లడించారు. ఇక తెలంగాణలో బలం పెంచుకొని అసెంబ్లీ ఎన్నికల్లో ఎలాగైనా సత్తా చాటాలని భావిస్తున్న బీజేపీపై యువనేత రాజీనామా ఏ మేరకు ప్రభావం చూపిస్తుందో అనే ఆసక్తి రాజకీయాల్లో నెలకొంది.

రాష్ట్రంలో బీఆర్ఎస్ (BRS) అధికారం కోల్పోయాక పార్టీ అవినీతిపై పలు ఆరోపణలు ప్రచారంలోకి వస్తున్నాయి.. ఇప్పటికే కాళేశ్వరంపై చర్చలు గరం గరంగా సాగుతోన్న విషయం తెలిసిందే. అదీగాక మాజీ మంత్రి శ్రీనివాస్ యాదవ్ (Srinivas Yadav) ఆఫీసులో ఫైళ్ళు మాయం.. ప్రగతిభవన్ నుంచి కంప్యూటర్లు మాయం.. నీటి పారుదల శాఖలోని ఫైళ్లు కూడా మాయం. ఇలా ఇదివరకు ప్రభుత్వాలు మారినప్పుడు జరగని చోరీలు ప్రస్తుతం జరగడం చర్చాంశనీయంగా మారింది.

అయితే తాజాగా ధరణి (Dharani)లో పెద్దస్థాయిలో జరిగిన లావాదేవీలకు సంబంధించిన పత్రాలు మాయం చేస్తున్నట్లు ప్రచారం జరుగుతోంది. వందల ఎకరాల్లో క్లియరెన్స్ ఇచ్చిన కేసుల్లో, కరస్పాండెన్స్ కాగితాలు లేకుండా కుట్ర చేస్తున్నట్లు సమాచారం. అక్రమాలు బయటపడకుండా, తాము ఇరుక్కోకుండా ఆఫీసర్లు ఇలాంటి చర్యలకు పాల్పడుతోన్నట్లు చర్చించుకొంటున్నారు..

ఈ స్కామ్ లో కింది స్థాయి సిబ్బంది, ధరణి ఆపరేటర్ల పై నెపం పెట్టి తప్పించుకోవాలని, అక్రమాలకు పాల్పడిన వారు చూస్తున్నట్టు రెవెన్యూ శాఖలో చర్చ నడుస్తోంది. మరోవైపు ధరణి అక్రమాల్లో కొందరు ఐఏఎస్ (IAS) అధికారుల పాత్రపై పెద్ద ఎత్తున ఆరోపణలు వచ్చాయి. అందులో కొందరు ప్రస్తుతం కీలక స్థానాల్లో ఉన్నారు. వారు గత ప్రభుత్వ హయాంలో రూ.వేల కోట్ల విలువైన సర్కారీ భూములను సరైన ఆర్డర్లు లేకపోయినా, దొడ్డిదారిన ప్రైవేటు వ్యక్తులకు, కంపెనీలకు కట్టబెట్టారనే విమర్శలు ఉన్నాయి.

అయితే భూ అక్రమాలపై కాంగ్రెస్ (Congress) సర్కారు ఫోకస్ చేసిందన్న చర్చ నడుస్తున్న సమయంలో.. గత ప్రభుత్వ అక్రమాల్లో పాలుపంచుకొన్నట్టు ఆరోపణలు ఉన్న కొందరు అధికారులు.. అవినీతిని కప్పిపుచ్చుకునే ప్రయత్నాలు చేస్తున్నట్లు ప్రచారం జరుగుతోంది. ఆధారాలు లేకుండా చేయడం ద్వారా.. తాము సేఫ్ గా ఉంటారనే భావనతో ఇలాంటి చర్యలకు పాల్పడుతున్నట్టు టాక్..

మరోవైపు అక్రమాల నిరూపణ కావాలంటే ఆధారాలు అదృశ్యం కాకుండా చూడాలి. ఆ ఫైళ్లు మాయమైతే ఎవరిపైనా ఎలాంటి చర్యలు తీసుకొనేందుకు అవకాశాలు ఉండవు. ధరణి సమస్యలపై కమిటీ వేసిన నేపథ్యంలో.. జరిగిన అక్రమాలను నిగ్గు తేల్చడానికి కలెక్టర్లు, తహసీల్దార్ల సంతకాలతో కూడిన కాపీలను తెప్పించుకోవాలని రెవెన్యూ అధికారులు భావిస్తోన్న సమయంలో ఈ చోరీలు కలకలం సృష్టిస్తోన్నాయి..