Telangana

ఆదిలాబాద్ జిల్లా(Adilabad District) ఇంద్రవెల్లి((Indravelli) మండలం కేస్లాపూర్‌ (Keslapur) లోని నాగోబా క్షేత్రం(Nagoba Temple)లో జాతర ఉత్సవాలు వైభవంగా ప్రారంభమయ్యాయి. నాగ శేషుడుని పూజించే ఈ నాగోబా జాతర గంగాజలాభిషేకంతో శ్రీకారం చుట్టారు. సంప్రదాయం ప్రకారం మేస్రం వంశపూజారులు ఇక్కడ పూజలు చేయడం ఆనవాయితీగా వస్తోంది.

నాగోబా జాతర పూజా విధానం, ఆచార వ్యవహారాలు, నియమ నిష్టలన్నీ ప్రత్యేకమైనవి. తమ పూర్వీకుల్ని స్మరిస్తూ నిర్వహించే పెర్సపాన్ పూజ, కొత్త కోడళ్లను పరిచయం చేసే బేటింగ్ కూడా ఇక్కడ చాలా ప్రత్యేకంగా ఉంటుంది. ఇక ఆదీవాసీల సంస్కృతి సంప్రదాయాలను చాటి చెప్పే ఆటా పాటాలతో నాగోబా జాతర కన్నుల పండగగా కనిపిస్తుంది.

జాతర ప్రారంభానికి ఒక రాగి చెంబులో కొన్ని పాలను పోసి నవధాన్యాలు, మొలకలు అన్నిటికీ ఒక కొత్త రుమాలును కప్పి గర్భగుడిలోని పుట్టపైన పెడతారు. ఆ రుమాలు కదిలితేనే జాతరకు నాగదేవత అనుమతి ఇచ్చారని అక్కడి వారి నమ్మకం. ఏడు కావిడిలతో నెయ్యి, పుట్ట తేనె, బెల్లం, గానుగ నూనెతో పాటు 125గ్రామాలు తిరిగి కాలినడకన గోదావరి నుంచి తెచ్చిన పవిత్ర గంగాజలంతో నాగోబాకు అభిషేకం చేస్తారు. పుష్యమాస అమవాస్య నాడు అర్ధరాత్రి నాగోబా ఆలయంలో ఈ తంతు నిర్వహిస్తారు.

ఈ ప్రత్యేక పూజలకు ఖానాపూర్ ఎమ్మెల్యే వెడ్మ బొజ్జు, ఆసిఫాబాద్ జడ్పీ చైర్మన్ కోనేరు కృష్ణ, ఆదిలాబాద్ జిల్లా కలెక్టర్ రాహుల్ రాజ్, ఎస్పీ గౌసం ఆలంలు హాజరయ్యారు. నాగోబా జాతర ఈ నెల 15వ తేదీ వరకు కొనసాగుతుంది. తెలుగు రాష్ట్రాలతో సహా ఒడిషా, చత్తీస్‌గఢ్, మహారాష్ట్రల నుంచి పెద్ద ఎత్తున భక్తులు తరలివస్తున్నారు. ఈ నెల 12వ తేదీన నాగోబా దర్బార్ హాల్‌లో అధికారుల సమక్షంలో గిరిజన దర్బార్ నిర్వహించి సమస్యలపై చర్చించనున్నారు.

సీఎం రేవంత్ రెడ్డి (CM Revanth Reddy)పై బీఆర్ఎస్ ఎమ్మెల్యే హరీశ్ రావు (Harish Rao) తీవ్ర స్థాయిలో ఫైర్ అయ్యారు. ఏద‌న్నా మాట్లాడితే.. అగ్గిపెట్టె ముచ్చ‌టను సీఎం తీసుకు వస్తున్నారంటూ తీవ్ర స్థాయిలో ధ్వజమెత్తారు. ఈ అగ్గిపెట్టె ముచ్చ‌ట మాట్లాడ‌టం బంద్ చేయాలని సూచించారు. పదే పదే త‌మ‌ను కించ‌ప‌రిచి, రాజ‌కీయంగా విమ‌ర్శిస్తామనుకుంటే అది మీ రాజ‌కీయ విజ్ఞ‌త‌కే వ‌దిలేస్తున్నానని తెలిపారు.

శాస‌న‌స‌భ‌లో గ‌వ‌ర్న‌ర్ ప్ర‌సంగానికి ధ‌న్య‌వాద తీర్మానంపై చ‌ర్చ సంద‌ర్భంగా హ‌రీశ్‌రావు మాట్లాడుతూ….. కాంగ్రెస్ వాళ్లు అమ‌రవీరుల‌ పాడే మోసినోళ్లు కాదని తీవ్ర స్థాయిలో విరుచుకపడ్డారు. గతంలో అమరవీరులకు శ్రద్దాంజలి కూడా ఘటించలేదని చెప్పారు. కనీసం వాళ్ల కుటుంబాలను కూడా పరామర్శించలేదని మండిపడ్డారు. తుపాకుల‌తో ఉద్య‌మ‌కారులను బెదిరించిన మీకు తెలంగాణ పోరాటం, అమ‌ర‌వీరుల‌కు గురించి తెలుస్త‌ద‌ని తాను అనుకోనన్నారు.

నాగార్జున సాగ‌ర్ విష‌యంలో సభను సీఎం తప్పుదోవ పట్టించే ప్రయత్నం చేశారన్నారు. శ్రీశైలం ఏపీ ప్రభుత్వం ఆధీనంలో, నాగార్జున సాగర్ ప్రాజెక్టును తెలంగాణలో కంట్రోల్‌లోకి ఇచ్చారని పేర్కొన్నారు. రెండు నెల‌లు గ‌డుస్తున్న‌ా సీఆర్పీఎఫ్ భ‌ద్ర‌త‌లో సాగ‌ర్‌ ఉందని వివరించారు. సాగ‌ర్‌ను తెలంగాణ ఆధీనంలోకి తీసుకునేందుకు కృషి చేయాలని కోరారు. దీనికోసం స‌హ‌క‌రించేందుకు తాము సిద్ధంగా ఉన్నామ‌న్నారు.

ఎస్ఎల్‌బీసీ విష‌యంలోనూ సభను తప్పుదోవ పట్టించారని ఆరోపించారు. ప‌దేండ్ల‌లో కిలోమీటర్ తవ్వారని మొన్న ప్రెస్ మీట్‌లో వెల్లడించారని ధ్వజమెత్తారు. బీఆర్ఎస్ ప్ర‌భుత్వ‌ హ‌యాంలో 11 కిలోమీట‌ర్లు త‌వ్విన‌ట్లు గుర్తు చేశారు. దీన్ని సీఎం క‌రెక్ష‌న్ చేసుకోవాలని డిమాండ్ చేశారు. ఇంకోసారి మాట్లాడెప్పుడు అవ‌గాహ‌న‌తో మాట్లాడాల‌ని సూచించారు.

బీఆర్ఎస్ (BRS) ఎమ్మెల్యే, మాజీ మంత్రి మల్లా రెడ్డి (Malla Reddy) ఎప్పటికప్పుడు తనదైన శైలిలో వ్యాఖ్యలు చేస్తూ వార్తల్లో ఉంటారు. తాజాగా ఆయన మరోసారి ఆసక్తికర వ్యాఖ్యలు చేశారు. తమ పార్టీ అధినేత కేసీఆర్ కుటుంబంలో ఉన్నట్టుగానే తమ కుటుంబంలో కూడా మూడు పదవులు ఉండాలని తాను ఆశపడ్డాని తెలిపారు.

రాబోయే లోక్ సభ సార్వత్రిక ఎన్నికల్లో మల్కాజ్‌గిరి స్థానం నుంచి పోటీ చేసేందుకు తన కొడుకు రెడీగా ఉన్నారని చెప్పారు. కేసీఆర్ ఆదేశాల కోసం చూస్తున్నామని, ఆయన ఆదేశిస్తే తన కొడుకు ఎన్నికల బరిలో దిగుతారని వెల్లడించారు. బీఆర్ఎస్ నుంచి మల్కాజ్గిరి లోక్సభ స్థానం టికెట్ తన కుమారుడు భద్రారెడ్డికి కన్ఫర్మేషన్ అయిందన్నారు.

చేవెళ్ల ఎంపీ టికెట్ కోసమే పట్నం మహేందర్ రెడ్డి కాంగ్రెస్ గూటికి వెళ్తున్నాడని ఆరోపించారు. అందుకే నిన్న సీఎం రేవంత్ రెడ్డిని కలిశాడని చెప్పారు. బీఆర్ఎస్ పార్టీ చేవెళ్ల ఎంపీ రంజిత్ రెడ్డి కాంగ్రెస్‌లోకి వెళ్లకుముందే, పట్నం మహేందర్ రెడ్డి వెళ్లి కూర్చున్నారని అన్నారు. ఎంపీ టికెట్ కోసమే రేవంత్ రెడ్డిని జగ్గారెడ్డికి పొగుడుతున్నాడని తెలిపారు.

రాష్ట్ర వ్యాప్తంగా ఫోకస్ అయ్యేందుకే జగ్గారెడ్డి తన పేరును ఎత్తుకున్నాడని ఆరోపించారు. తన పేరు ఎత్తకపోతే జగ్గారెడ్డిని ఎవరు పట్టించుకోరని ఎద్దేవా చేశారు. గతంలో రేవంత్ రెడ్డిని తిట్టిన మాటలు అందరికీ గుర్తే ఉన్నాయన్నారు. తనకు ఇవే చివరి ఎన్నికలని మల్లారెడ్డి వెల్లడించారు. తనకు గోవాలో హోటల్ ఉందన్నారు. రాజకీయాల నుంచి తప్పుకుంటే గోవా వెళ్లి ఎంజాయ్ చేస్తానని స్పష్టం చేశారు.

భారత్‌లో అంబేడ్కర్ (Ambedkar) ఓ అద్భుతమని సీఎం రేవంత్ రెడ్డి (CM Revanth Reddy) అన్నారు. దేశానికి అంబేడ్కర్ అందించిన రాజ్యాంగం ఎన్నో దేశాలకు ఆదర్శంగా నిలిచిందని వెల్లడించారు. బీసీ కమిషన్ తొలి చైర్మన్ బిఎస్ రాములు రాసిన అంబేడ్కర్ ఓ అద్భుతం: ‘బీసీ నోట్’ పుస్తకాన్ని సీఎం రేవంత్ రెడ్డి ఆవిష్కరించారు.

పుస్కకావిష్కరణ సందర్బంగా రేవంత్ రెడ్డి మాట్లాడుతూ…. ప్రతి సామాజిక వర్గానికి, కులానికి జనాభా దామాషా మేరకు ప్రాతినిధ్యం, అవకాశం ప్రతిపాదించి అమలు జరిపితే అన్ని ప్రాంతాలకు, కులాలకు, వర్గాలకు సంబంధించిన వారికి అవకాశాలు అందుతాయని చెప్పారు. తద్వారా ఆయా సామాజిక వర్గాల్లో, కులాల్లో ఒక స్ఫూర్తి, ఉత్తేజంతోపాటు వారి ప్రాతినిధ్యం పెరుగుతుందని అన్నారు.

ఫలితంగా ప్రాతినిధ్య ప్రజాస్వామ్యం నిజమైన అర్థంలో, ఆచరణలోకి వస్తుందని పేర్కొన్నారు. అంతకు ముందు అసెంబ్లీలో సీఎం రేవంత్ రెడ్డిని భారతీయ ఓబీసీ సమాఖ్య, అఖిల భారత వర్కింగ్ జర్నలిస్టుల సంఘం జాతీయ అధ్యక్షులు, కే. కోటేశ్వర్ రావు, పుస్తక రచయిత, ఓబీసీ సమాఖ్య గౌరవ అధ్యక్షులు బీఎస్ రాములు, అనం చిన్ని వెంకటేశ్వరావు, రాష్ట్ర సభ్యులు చింతకాయల వెంకటేశ్వర్లు, శీలం శ్రీనివాస్ రావు కలిశారు.

కుల గణనపై తెలంగాణ ప్రభుత్వం తీసుకున్న నిర్ణయాన్ని పూర్తి స్వాగతిస్తు సీఎం రేవంత్ రెడ్డికి కృతజ్ఞతలు తెలియచేశారు. దేశవ్యాప్తంగా ఓబీసీ రిజర్వేషన్ల అమలు కోసం భారతీయ ఓబీసీ సమాఖ్య చేస్తున్న ఉద్యమానికి మద్దతు కావాలని భారతీయ ఓబీసీ సమాఖ్య, అఖిల భారత వర్కింగ్ జర్నలిస్టుల సంఘం జాతీయ అధ్యక్షులు, కే.కోటేశ్వర్ రావు, పుస్తక రచయిత, ఓబీసీ సమాఖ్య గౌరవ అధ్యక్షులు బీఎస్ రాములు కోరారు.

ఈ పుస్తకాలను స్పీకర్ గడ్డం ప్రసాద్ కుమార్, ఉప ముఖ్యమంత్రి భట్టి విక్రమార్క, మంత్రులు ఉత్తమ్ కుమార్ రెడ్డి, సీతక్క, శ్రీధర్ బాబు, పొన్నం ప్రభాకర్, పొంగులేటి శ్రీనివాస్ రెడ్డి, దామోదర రాజ నర్సింహ, కోమటిరెడ్డి వెంకరెడ్డిలకు ప్రత్యేకంగా భారతీయ ఓబిసి సమాఖ్య సభ్యులు అందచేశారు. అలాగే మిగిలిన అందరి శాసనసభ్యులకు, ప్రభుత్వ అధికారులకు ఉచితంగా అందించారు. ఈ కార్యక్రమంలో ఓబిసి సమాఖ్య జాతీయ ప్రధాన కార్యదర్శి అనంచిన్ని వెంకటేశ్వరావు, రాష్ట్ర సభ్యులు చింతకాయల వెంకటేశ్వర్లు, శీలం శ్రీనివాస్ రావు తదితరులు పాల్గొన్నారు.

త్వరలోనే గ్రూప్​-1 (Group-1) నోటిఫికేషన్​ ఇస్తున్నట్లు సీఎం రేవంత్ రెడ్డి (CM Revanth Reddy) వెల్లడించారు. కొన్ని నిబంధనల వల్ల టీఎస్పీఎస్సీ ప్రక్షాళన ఆలస్యం అయిందని తెలిపారు. ప్రభుత్వ ఉద్యోగాలు భర్తీ చేయాలంటే నిర్ధిష్ట విధానం ఉంటుందన్నారు. జిరాక్స్​ సెంటర్లలో ప్రశ్నపత్రాలు విక్రయించి ఉద్యోగాలను భర్తీ చేసేవాళ్లం తాము కాదని బీఆర్ఎస్‌ను ఎద్దేవా చేశారు.

ప్రభుత్వ శాఖల్లో బంధువులను పెట్టుకుని ఉద్యోగాలను అమ్ముకునే వాళ్లం కాదని విమర్శలు గుప్పించారు. గ్రూప్​ -1 వయోపరిమితిని 46 ఏళ్లకు పెంచి పరీక్ష నిర్వహిస్తామని చెప్పారు. ఈ ప్రభుత్వం 15 రోజుల్లో పోలీసు ఉద్యోగాలను ఇచ్చేందుకు రెడీగా ఉందని పేర్కొన్నారు. ప్రభుత్వ పరిపాలనలో మైనార్టీలకు సముచిత స్థానం ఇస్తున్నామని వెల్లడించారు.

సీఎంఓలో మైనార్టీ ఐఏఎస్​లకు కీలక బాధ్యతలు అప్పగించామన్నారు. మైనార్టీకి ఎమ్మెల్సీ అవకాశం ఇస్తే అడ్డుకున్నారని ఆరోపణలు గుప్పించారు. రాష్ట్ర అధికారిక చిహ్నంలో రాచరిక ఆనవాళ్లు ఉన్నాయని పేర్కొన్నారు. తెలంగాణ ఉద్యమ సమయంలో అంతా టీజీ అని రాసుకునేవాళ్లని గుర్తు చేశారు. కేంద్రం కూడా వారి నోటిఫికేషన్​లో టీజీ అని పేర్కొందని సీఎం తెలిపారు. కొంత మంది యువకులు వారి గుండెలపై టీజీ అని పచ్చబొట్టు వేయించుకున్నారని అన్నారు.

ఉద్యమ సమయంలో వాహనాలపై, బోర్డులపైన అందరం టీజీ అనే రాసుకున్నామని వెల్లడించారు. కానీ అందరి ఆకాంక్షలకు విరుద్ధంగా గత ప్రభుత్వం తమ పార్టీ పేరు స్పరించేలా టీఎస్​ అని పెట్టిందని మండిపడ్డారు. తెలంగాణకు అందెశ్రీ అనే కవి గొప్ప గీతాన్ని అందించారని పేర్కొన్నారు. జయ జయహే తెలంగాణ గీతం తెలంగాణ ఉద్యమంలో అందరికీ స్ఫూర్తినిచ్చిందనివివరించారు. రాష్ట్రం వచ్చాక జయజయహే తెలంగాణ పాట రాష్ట్ర గీతం అవుతుందని ఆశించారని చెప్పుకొచ్చారు. . కానీ తెలంగాణ వచ్చాక జయజయహే తెలంగాణ పాటను నిషేధించినంత పని చేశారని మండిపడ్డారు.

‘మహిళలకు ఉచిత రవాణా సదుపాయం కల్పిస్తే విమర్శలు చేస్తున్నారు. మహిళలకు ఉచిత ప్రయాణం వల్ల క్రమంగా ఆదాయం పెరుగుతోంది. మహిళలకు ఉచిత ప్రయాణం వల్ల ముఖ్యంగా దేవాదాయ శాఖకు ఆదాయం గణనీయంగా పెరుగుతోంది. మహిళలకు ఉచిత ప్రయాణం వల్ల ఆటో డ్రైవర్లు నష్టపోతున్నారని రెచ్చగొడుతున్నారు. గత ప్రభుత్వం మహిళలను ఎన్నో రకాలుగా అవమానించింది. మొదటిసారి ఏర్పడిన టీఆర్​ఎస్​ ప్రభుత్వంలో ఒక్క మహిళకు కూడా మంత్రి పదవి ఇవ్వలేదు. కానీ తమ ప్రభుత్వం తొలిసారే ఇద్దరు మహిళలకు మంత్రి పదవులు ఇచ్చింది’అని అన్నారు.

ఒకటవ తేదీన ఉద్యోగులకు జీతాలు ఇవ్వలేని స్థితికి రాష్ట్రాన్ని దిగజార్చారంటూ నిప్పులు చెరిగారు. ప్రజలు ఇబ్బందులు పడితే బాగుండని విపక్షం కోరుకుంటోందని మండిపడ్డారు. పిల్లి శాపనార్థాలకు ఉట్టి తెగిపడదన్నారు. మంచి పనులకు అభినందించే సద్బుద్ధి కూడా విపక్షాలకు లేదన్నారు. ప్రభుత్వ ఉద్యోగులు, పింఛనర్లకు ఈ నెల 1న జీతాలు ఇచ్చామని హర్షం వ్యక్తం చేశారు.

కేసీఆర్‌ను ప్రధాన ప్రతిపక్ష నేత అంటూ పరోక్షంగా ప్రస్తావించారు. ప్రధాన ప్రతిపక్ష నేతకు ఉన్న రాజకీయ అనుభవాన్ని, పాలన అనుభవాన్ని రాష్ట్ర ప్రజల కోసం ఉపయోగించాల్సిందన్నారు. కానీ దానికి భిన్నంగా ఆయన సభకు రాకపోవడం బాధాకరమన్నారు. అత్యధిక పుస్తకాలు చదివిన మహా మేధావి అని చెప్పుకుంటారు కదా.. వారు అసెంబ్లీకి వచ్చి ప్రభుత్వానికి సూచనలు ఇవ్వడమో లేదా తప్పిదాలు ఉంటే సరిచేయడమో చేయాలి కదా అని అన్నారు.