Telangana

తెలంగాణ(Telangana)లో కొత్త రేషన్ కార్డుల(New Ration Cards) కోసం లక్షలాది మంది ప్రజలు ఎదురుచూస్తున్నారు. డిసెంబర్ 28 నుంచి జనవరి 6 వరకు జరిగిన ప్రజాపాలన(Praja Palana) కార్యక్రమంలో ‘ఆరు గ్యారంటీ’లతో పాటు కొత్త రేషన్ కార్డులకు ప్రభుత్వం దరఖాస్తులను స్వీకరించింది. అయితే తాజాగా కాంగ్రెస్ సర్కార్ కీలక నిర్ణయం తీసుకుంది.

పాత పద్ధతిలోనే స్థానిక మీసేవా కేంద్రాల్లో కొత్త రేషన్ కార్డుల కోసం దరఖాస్తు చేసుకోవచ్చని ప్రభుత్వం నిర్ణయించింది. అంతేకాదు.. ఈ దరఖాస్తుల కోసం నేషనల్ ఇన్ఫర్మాటిక్ సెంటర్ ద్వారా ప్రత్యేక సాఫ్ట్‌వేర్‌ను కూడా తెలంగాణ సర్కార్ సిద్ధం చేసినట్లు విశ్వసనీయ సమాచారం. ఫిబ్రవరి నెలాఖరు నాటికి దరఖాస్తుల స్వీకరణ పూర్తి చేయాలని అధికారులకు సూచించింది.

ఇక, ప్రజాపాలనలో మొత్తం 1.25 కోట్ల దరఖాస్తులు వచ్చినట్లు ప్రభుత్వం ఇప్పటికే వెల్లడించింది. అయితే వీటిలో కొత్త రేషన్ కార్డులు, భూ వివాదాలకు సంబంధించిన దరఖాస్తులు దాదాపు 20 లక్షలకు పైగానే ఉన్నాయి. ప్రస్తుతం రాష్ట్రంలో 90లక్షల మందికి మాత్రమే రేషన్ కార్డులు ఉన్నాయి. వీటి ద్వారా 2.8కోట్ల మందికిపైగా లబ్ధి పొందుతున్నారు.

అయితే ఇంకా 20లక్షల మంది కొత్త రేషన్ కార్డుల కోసం దరఖాస్తు చేసుకున్నారు. ఊహించిన దానికంటే ఎక్కువ మంది కొత్త రేషన్ కార్డులకు దరఖాస్తు చేసుకోవడంతో పాత పద్ధతిలోనే స్థానిక మీ సేవా కేంద్రాల ద్వారా దరఖాస్తులు స్వీకరించాలని ప్రభుత్వం నిర్ణయం తీసుకున్నట్లు తెలుస్తోంది.

వీలైనంత త్వరగా రేషన్ కార్డుల ప్రక్రియ పూర్తి చేసి అర్హులైన వారికి అందజేయాలని రేవంత్ సర్కార్ యోచిస్తుంది. మరోవైపు రాష్ట్రవ్యాప్తంగా రేషన్ కార్డుల ఈ-కేవైసీ ప్రక్రియ కొనసాగుతోంది. ఇప్పటికే 80 శాతానికిపైగా ఈ ప్రక్రియ పూర్తి కాగా జనవరి 31 వరకు ఈ-కేవైసీకి గడువు విధించారు.

సీఎం రేవంత్ రెడ్డి (CM Revanth Reddy)కి కేంద్ర మంత్రి, తెలంగాణ బీజేపీ (BJP) చీఫ్ కిషన్ రెడ్డి (Kishan Reddy) లేఖ రాశారు. రాష్ట్రంలో భారత్ మాల ప్రాజెక్టు, రింగు రోడ్డుకు సంబంధించి ఈ లేఖ రాశారు. భారత్ మాల కింద నిర్మించబోయే రోడ్ల కోసం భూ సేకరణ చేపట్టాలని సీఎంను లేఖలో ఆయన కోరారు. దీంతో పాటు ఆర్ఆర్ భూసేకరణ కోసం 50 శాతం నిధులు కేటాయించాలని విజ్ఞప్తి చేశారు.

ఈ విషయానికి సంబంధించి గతంలో బీఆర్ఎస్ సర్కార్ కు లేఖలు రాశామని అన్నారు. కానీ అప్పటి ప్రభుత్వం నుంచి ఎలాంటి స్పందన రాలేదని వెల్లడించారు. ఇప్పుడు కొత్త ప్రభుత్వం ఆ ప్రాజెక్టులను ఆలస్యం కాకుండా చూసుకోవాలని, వాటిని త్వరగా పూర్తి చేసేందుకు చర్యలు తీసుకోవాలని కోరారు.

తెలంగాణ ప్రత్యేక రాష్ట్రంగా ఏర్పాటైన సమయం నుంచి లక్ష కోట్ల రూపాయలకు పైగా వెచ్చించి రాష్ట్రంలో జాతీయ రహదారులను కేంద్రం నిర్మించిందని అన్నారు. ఆయా ప్రాంతాల్లో సామాజిక, పారిశ్రామిక, ఆర్థిక ప్రగతికి ఈ జాతీయ రహదారులు సహాయపడ్డాయన్నారు. దీంతో పాటు చాలా ప్రాంతాల్లో ట్రాఫిక్​ సమస్యలు తీరాయన్నారు.

ప్రస్తుతం మరిన్ని జాతీయ రహదారులను కేంద్రం నిర్మిస్తోందన్నారు. వాటికి రాష్ట్ర ప్రభుత్వం భూసేకరణ చేస్తే రోడ్ల నిర్మాణ విషయంలో కేంద్రానికి వీలుగా ఉంటుందన్నారు. దీంతో రాష్ట్రం అభివృద్ధి దిశలో మరింత ముందుకు వెళ్తుతుందన్నారు. ఇది ఇలా వుంటే సీఎం రేవంత్ రెడ్డికి బీజేపీ జాతీయ ప్రధాన కార్యదర్శి బండి సంజయ్ కూడా లేఖ రాశారు.

రాష్ట్రంలో కాంగ్రెస్ ప్రభుత్వం అధికారంలోకి వచ్చి 50 రోజులు అవుతున్నా సర్పంచ్‌ల బిల్లులపై దృష్టి సారించలేదని తెలిపారు. అధికారంలోకి రాగానే సర్పంచ్‌ల సమస్యలు తీరుస్తామని ఎన్నికల సందర్భంగా కాంగ్రెస్ హామీ ఇచ్చిందన్నారు. అందువల్ల రాష్ట్రంలో సర్పంచ్‌ల పెండింగ్​ బిల్లులను ప్రభుత్వం వెంటనే చెల్లించాలని డిమాండ్ చేశారు.

హెచ్ఎండీఏ (HMDA)మాజీ డైరెక్టర్ శివ బాల కృష్ణ (Shiva Bala Krishna) నివాసంలో ఏసీబీ రెయిడ్స్ జరిగాయి. మొత్తం 14 బృందాలు తనిఖీల్లో పాల్గొన్నాయి. శివ బాల కృష్ణతో పాటు ఆయన సన్నిహితుల ఇండ్లలోనూ ఏసీబీ సోదాలు చేసింది. అమీర్ పేట్‌లోని హెచ్ఎండీఏ కార్యాలయంలోనూ ఏసీబీ తనిఖీలు నిర్వహించింది.

రాష్ట్ర వ్యాప్తంగా మొత్తం 20 ప్రాంతాల్లో సోదాలు నిర్వహించాయి. వందల కోట్ల రూపాయల అక్రమాస్తులను ఏసీబీ గుర్తించింది. హెచ్ఎండీఏ ప్లానింగ్ విభాగంలో బాలకృష్ణ కీలక స్థానంలో పనిచేశారు. ఆయన తన పదవిని అడ్డు పెట్టుకుని పెద్ద ఎత్తున్న ఆస్తులు కూడా బెట్టారని ఏసీబీ అధికారులు గుర్తించారు.

ఇప్పటి వరకు రూ.100 కోట్లకు పైగా అక్రమ ఆస్తులను ఏసీబీ గుర్తించినట్టు సమాచారం. దీంతో పాటు బంగారం, ఫ్లాట్స్, బ్యాంకు డిపాజిట్లు, బినామీల వివరాలను ఏసీబీ గుర్తించినట్టు తెలుస్తోంది. సోదాల సమయంలో ఏసీబీకి బాలకృష్ణ కుటుంబ సభ్యులు ఎవరూ సహకరించడం లేదని వార్తలు వినిపిస్తున్నాయి.

రేపు కూడా తనిఖీలు కొనసాగుతాయని ఏసీబీ వర్గాల ద్వారా తెలుస్తోంది. బాలకృష్ణపై అవినీతి ఆరోపణలు వచ్చాయని ఏసీబీ అధికారులు చెబుతున్నారు. ఈ క్రమంలో ఆరోపణలపై విచారణ చేస్తున్నామని పేర్కొన్నారు. బాలకృష్ణ ఏసీబీ విచారణకు సహకరించడం లేదన్నారు. ఇంట్లో డాక్యుమెంట్లు సీజ్ చేశామని వెల్లడించారు.

ఐపీఎస్ (IPS) సీవీ ఆనంద్ (CV Anand) సంచలన ట్వీట్ చేశారు. అవినీతి జాబితాలో మరో కొత్త శాఖ వచ్చి చేరిందంటూ ట్వీట్‌లో తెలిపారు. ఈ ట్వీట్‌పై ప్రభుత్వ వర్గాల్లో హాట్ టాపిక్‌గా మారింది. రాష్ట్రంలో అత్యంత అవినీతి గల శాఖల్లో ఎక్సైజ్ శాఖ కూడా వచ్చి చేరిందని ట్వీట్‌లో సీవీ ఆనంద్ పేర్కొన్నారు.

ఇటీవల కల్లు గీత కార్మికులకు లైసెన్సులు జారీ చేసేందుకు లంచం తీసుకుంటూ జడ్చర్ల ఎక్సైజ్‌ సీఐ రాత్‌ నావత్‌ బాలోజీ ఏసీబీకి రెడ్ హ్యాండెడ్ గా దొరికిపోయారు. ఈ విషయాన్ని ప్రస్తావిస్తూ రమేశ్ వైట్ల అనే జర్నలిస్టు ఏసీబీ రాకింగ్ అంటూ ట్వీట్ చేశారు. దానికి ఐపీఎస్ సీవీ ఆనంద్ ను ట్యాగ్ చేశారు.

ఆ ట్వీట్ కు బదులిస్తూ… రెవెన్యూ, పోలీసు, రవాణా శాఖలతోపాటు తాజాగా ఎక్సైజ్ శాఖ కూడా అత్యధిక అవినీతి గల డిపార్ట్ మెంట్ ల జాబితాలో చేరిందని వెల్లడించారు. ఇప్పుడు ఈ ట్వీట్ వైరల్ అవుతోంది. సాధారణంగా ప్రభుత్వ శాఖల్లో అవినీతి పెరిగిపోయిందంటూ సామాన్య జనం, విపక్షాలు విమర్శలు చేస్తూ ఉంటారు.

కానీ ప్రభుత్వ శాఖల్లో అవినీతి నెలకొందని ఓ ప్రభుత్వ ఉద్యోగి, అదీ ఓ డీజీపీ స్థాయి అధికారి ట్వీట్ చేయడం ప్రాధాన్యత సంతరించుకుంది. ఈ ట్వీట్ పై నెటిజన్లు పెద్ద ఎత్తున కామెంట్స్ చేస్తున్నారు. కేవలం ఆ శాఖలు మాత్రమే కాదని అన్ని ప్రభుత్వ శాఖల్లోనూ అవినీతి పేరుకు పోయిందని కొందరు కామెంట్స్ చేస్తున్నారు.

మొన్న కాంగ్రెస్‌ (Congress)కు ఓటు వేసిన వారు పశ్చత్తాపపడుతున్నారని బీఆర్ఎస్ (BRS)వర్కింగ్ ప్రెసిడెంట్ కేటీఆర్ (KTR) అన్నారు. గుంపు మేస్త్రీకి పరిపాలన అనుభవం లేదని చెప్పారు. గుంపు మేస్త్రీ దావస్‌లో అన్నీ అబద్ధాలు చెప్పాడని విమర్శలు గుప్పించారు. ఇదేం గుంపు మేస్త్రి పాలన అంటూ రైతులు బాధపడుతున్నారని తెలిపారు.

కరీంనగర్‌లో సోషల్‌ మీడియా వారియర్స్‌ సమావేశంలో కేటీఆర్ పాల్గొన్నారు. ఈ సందర్బంగా కేటీఆర్ మాట్లాడుతూ… అనుభవం ఉన్న కేసీఆర్‌ పైసా పైసా కూడబెట్టి 7500 కోట్లు జమ చేసి 70 లక్షల మంది రైతులకు వారి ఖాతాల్లో రైతుబంధు వేశారని వెల్లడించారు. గుంపు మేస్త్రి డిసెంబర్‌ 3న సీఎం అయ్యారని గుర్తు చేశారు. ఈ రోజు వరకు రైతుబంధు వేయాలా.. వద్దా? అని తెలుస్తలేదన్నారు. కానీ, విదేశాల్లోకి పోయి మాత్రం పచ్చి అబద్ధాలు చెబుతున్నడని మండిపడ్డారు.

భరోసా వేస్తున్నామని దావోస్‌లో చెప్పిండని ఫైర్ అయ్యారు. ఊళ్లలో రైతులు బాధపడుతున్నారని చెప్పారు. ఇదేంరా నాయన.. కేసీఆర్‌ ఉన్నప్పుడు వారం రోజుల్లో రైతుబంధు వస్తుండేదని.. ఇదేం గుంపు మేస్త్రిపాలన రా నాయన…. ఇప్పటి వరకు రైతుబంధుకు దిక్కులేదని బాధపడుతున్నారని పేర్కొన్నారు. సీఎం పదవి చేసేందుకు అనుభవం ఉందా? అంటే రేవంత్‌రెడ్డి ఏమన్నాడని గుర్తు చేశారు.

గా పదవి గుంపు మేస్త్రి లెక్క.. ఒకడు సున్నం కొడుతడు. ఒకడు సిమెంట్‌ వేస్తడు. నేనే గిట్లగిట్ల అంటే అయిపోతదన్నడని ఎద్దేవా చేశారు. రైతు భరోసా మొదలైందా? అని ప్రశ్నించారు. రైతు భరోసా అంటే రూ.15వేలు అకౌంట్లలో వేయాలి కదా? అన్నారు. రైతుబంధును రైతు భరోసా అని పేరు మార్చి.. డూప్లికేట్‌ మాటలు మాట్లాడుతున్నడు గుంపుమేస్త్రి అంటూ ధ్వజమెత్తారు. ‘మీరు సోషల్‌ మీడియాలో గట్టిగా ఉంటే.. రోజుకు పదిసార్లు వాళ్లు దొరుకుతరు’అని సోషల్‌ మీడియా వారియర్లకు సూచనలు చేశారు.

కోమటి రెడ్డి వెంకట్ రెడ్డి నిన్న ఏం మాట మాట్లాడిండన్నారు. రైతు బంధు పడలేదంటే చెప్పుదీసి కొడుతానంటున్నాడని ఫైర్ అయ్యారు. ఇది మన గౌరవ మంత్రి కోమట్‌రెడ్డి మాట అని ఆగ్రహం వ్యక్తం చేశారు. కాంగ్రెస్‌ ప్రచార కమిటీ అధ్యక్షుడు మల్లన్న కూడా రైతుబంధు పడలేంటే చెప్పు దీసి కొడుతం అంటున్నరు. రాష్ట్రంలో ఉన్న 70లక్షల మంది రైతుల్లో ఎవరికైతే రైతు బంధు పడలేదో వారిని ఆలోచించాలని ఆడుగుతున్నానన్నారు. రైతుబంధు వేయనోళ్లను ఏ చెప్పుతో కొట్టాలో ఆలోచించాలని అడుగుతున్నానన్నారు.

రూ.2లక్షల రుణమాఫీ చేయనందుకు, రైతుబంధు భరోసా చాల్‌ చేయనందుకు.. రైతుబంధు వేయనందుకు రైతు బంధు వేయాలంటే చెప్పు తోటి కొట్టాలన్నందుకు రేపు కరీంనగర్‌ లోక్‌సభ ఎన్నికల్లో కాంగ్రెస్‌ను ప్రజలు ఓటుతో కొడుతారని చెప్పారు. రైతులు ఇప్పటికే మంట మీదున్నారని అన్నారు. క్వింటాల్‌కు రూ.500 బోనస్‌ ఇచ్చిండా? ఏప్రిల్‌లో ఇస్తడా? ఇవ్వకపోతే రైతులు ఊరుకుంటరా..? అని ప్రశ్నించారు. చీరి చింతకు కట్టరు… క్వింటాల్‌కు రూ.500 బోనస్‌ మరిచిపోవద్దన్నారు. ఇచ్చి తీరాలి. ఇవ్వకపోతే వాళ్ల తరఫున తామే గర్జిస్తామన్నారు..

రూ.2లక్షల రుణమాఫీ అన్నారని… సోనియమ్మ పుట్టిన రోజు రూ.2లక్షల రుణమాఫీ అన్నారనని. పోయి రుణం తెచ్చుకొండి తాను సంతకం పెడుతానని రేవంత్ రెడ్డి అన్నారని గుర్తు చేశారు. డిసెంబర్‌ 9 పోయింది. జనవరి 9 పోయింది. ఫిబ్రవరి 9 వస్తోందన్నారు. మరి చేస్తడా? చేయ చేతకాదు. ఎందుకంటే గుంపుమేస్త్రికి పని చేసిన తెలివి లేదంటూ సెటైర్లు వేశారు. ఎదో ప్రతిపక్షం డైలాగులు కొట్టుకుంటూ అవతలపడ్డడు. కేసీఆర్‌పై బూతుపురాణం ప్రయోగించుకుంటూ తిరుగాడు వదరుబోతోడు. ఆయనకు ఏం తెల్వది. తెల్వక ఏదో మాట్లాండిండు. ఫసాయించిండన్నారు.