Telangana

తెలంగాణ (Telangana)లో కాంగ్రెస్ (Congress), బీఆర్ఎస్ (BRS) నేతలు ఢీ అంటే ఢీ అంటూ సిద్దం అవుతున్నారు. ఈ క్రమంలో నేడు మేడిగడ్డను బీఆర్​ఎస్​ నేతల బృందం సందర్శించింది. మాజీ మంత్రులు కేటీఆర్ (KTR)​, హరీశ్​రావు (Harish Rao) సహా పలువురు నేతలు, పార్టీ కార్యకర్తలు బ్యారేజీని పరిశీలించారు. అనంతరం మాట్లాడిన కేటీఆర్ కీలక వ్యాఖ్యలు చేశారు..

మేడిగడ్డ (Medigadda )లో కనిపించిన చిన్న సమస్యను కాంగ్రెస్ నేతలు భూతద్దంలో పెట్టి పెద్దదిగా చూస్తున్నారని పేర్కొన్నారు. తమపై కోపం, రాజకీయ వైరం ఉంటే తీర్చుకోవాలని ప్రభుత్వానికి విజ్ఞప్తి చేస్తున్నామన్న కేటీఆర్.. కాళేశ్వరం ప్రాజెక్టే నిష్ఫలమైందని కాంగ్రెస్ నేతలు దుష్ప్రచారం చేస్తున్నారని మండిపడ్డారు. కాళేశ్వరం ప్రాజెక్టు ద్వారా రూ.లక్ష కోట్లు కొట్టుకుపోయాయని ప్రచారం చేయడం తగదన్నారు.

నిపుణులు మేడిగడ్డను మరమ్మతులు చేసే అవకాశం ఉందని తెలిపిన నేపథ్యంలో.. వర్షాకాలం వచ్చేలోగా మరమ్మతులు పూర్తి చేయాలని ప్రభుత్వాన్ని కోరారు. మరోవైపు మేడిగడ్డ అంశంలో బాధ్యులపై చర్యలు తీసుకోవాలని కేటీఆర్ డిమాండ్​ చేశారు. రైతులకు మాత్రం న్యాయం చేయాలని విజ్ఞప్తి చేశారు. వరద వచ్చేలోగా మేడిగడ్డలో దిద్దుబాటు చర్యలు చేపట్టాలని సూచించారు. కరీంనగర్​లో ఇప్పటికే సాగు నీరు లేక పంటలు ఎండిపోయే పరిస్థితి వచ్చిందని, ఇతర జిల్లాల్లో సైతం ఇలాంటి పరిస్థితులే వస్తున్నాయని వెల్లడించారు.

సాగు నీరు ఎత్తిపోస్తే పంటలకు లాభం చేకూరుతుందని వివరించారు. మేడిగడ్డ అంశంపై అధికారులు, నిపుణులతో కమిటీ వేయాలని ప్రభుత్వానికి విజ్ఞప్తి చేస్తున్నామన్న ఆయన, కమిటీ వేసి నివేదిక తీసుకోవాలని కోరారు. మాపై కోపం ఉంటే తీర్చుకోండి. రైతులపై కాదు. రైతులు, రాష్ట్రంపై పగ వద్దని ప్రభుత్వాన్ని కోరుతున్నామని కేటీఆర్ వెల్లడించారు. 1.6 కిలోమీటర్ల బ్యారేజ్‌లో 50 మీటర్ల ప్రాంతంలో సమస్య ఉంది. కాంగ్రెస్ నేతలు ఇలాంటివి గతంలో ఎప్పుడూ జరగలేదన్నట్లు మాట్లాడటం సరికాదని తెలిపారు.

మాజీ సీఎం కేసీఆర్ (KCR) పై సీడబ్ల్యూసీ ప్రత్యేక ఆహ్వానితుడు వంశీచంద్ రెడ్డి (Vamsichand Reddy) తీవ్ర విమర్శలు చేశారు.. ఆంధ్రా పాలకులు కృష్ణా జలాలను దోచుకుపోతుంటే దద్దమ్మలా కేసీఆర్ చూస్తుండిపోయారని ఆరోపించారు. రాజకీయ బిక్ష పెట్టిన పాలమూరు (Palamuru) జిల్లాకు కేసీఆర్ తీవ్ర అన్యాయం చేశారని మండిపడ్డారు. కన్నీళ్ళ గాథలు వినిపిస్తున్న పాలమూరు ప్రజల తరుపున మాట్లాడుతున్నానని తెలిపారు..

పాలమూరు రంగారెడ్డి ప్రాజెక్టును మూడేళ్లలో పూర్తి చేస్తామని చెప్పిన కేసీఆర్.. తొమ్మిదేళ్లయిన పూర్తి చేయలేదని ఆరోపించారు. నాసిరకం పనులు ప్రాజెక్టు పొడవునా జరుగుతున్నాయన్నారు. దక్షిణ తెలంగాణపై కేసీఆర్ సవతి తల్లి ప్రేమ చూపించారని వంశీచంద్ రెడ్డి మండిపడ్దారు. పాలమూరు ప్రాజెక్టు 90శాతం పనులు చేశాం అని చెబుతున్న మీరు.. ఆంధ్రోళ్లు సంగమేశ్వర ప్రాజెక్టు ద్వారా 11 టీఎంసీలు దోచుకు వెళ్తుంటే.. అసమర్ధతతో చూస్తూ ఉండిపోయారన్నారు.

మీ ప్రభుత్వ హయాంలో కృష్ణా నదిలో రావాల్సిన వాటాపై ఎందుకు పోరాటం చేయలేదని ప్రశ్నించారు. నాడు కేసీఆర్ స్థానంలో రేవంత్ రెడ్డి సీఎంగా ఉండుంటే 299 టీఎంసీలకు బదులుగా 577 టీఎంసీల వాటా వచ్చేదని వంశీచంద్ రెడ్డి తెలిపారు.. నీళ్ళు, నిధులు, నియామకాలు పాలమూరు జిల్లా ప్రజలకు రాలేదు కానీ కేసీఆర్ కుటుంబ సభ్యులకు వచ్చాయన్నారు..

కేసీఆర్ డిజైన్ చేసిన కాళేశ్వరం ప్రాజెక్టులో భాగమైన మేడిగడ్డ కుంగిపోయిందని.. ఉత్తర తెలంగాణ (Telangana)లో లక్షల కోట్ల అవినీతి జరిగిందని, దక్షిణ తెలంగాణనూ సైతం కేసీఆర్ మోసం చేశారని ఆరోపించారు. పదేళ్ల నిర్లక్ష్యం తుడిచి పెట్టీ రేవంత్ రెడ్డి (Revanth Reddy) పాలన చేస్తుంటే.. బీఆర్ఎస్ కుట్రలు చేస్తూ.. విమర్శలు చేస్తున్నారని వంశీచంద్ రెడ్డి ఆగ్రహం వ్యక్తం చేశారు.