Telangana

పార్లమెంట్ ఎన్నికలే లక్ష్యంగా బీజేపీ ప్రారంభించిన విజయ సంకల్స యాత్ర జోరుగా సాగుతుంది. ఈ యాత్రలో పాల్గొన్న నేతలు.. కాంగ్రెస్ (Congress), బీఆర్ఎస్ టార్గెట్ గా విమర్శలు గుప్పిస్తున్నారు. ప్రజల్లోకి కేంద్రం చేసిన అభివృద్ధిని తీసుకెళ్ళి అందినకాడికి ఓటు బ్యాంక్ రాబట్టుకోవాలనే వ్యూహంలో కాషాయం దూకుడుగా వ్యవహరిస్తోందని అంటున్నారు.. ఈ నేపథ్యంలో బీజేపీ జాతీయ ఉపాధ్యక్షురాలు డీకే అరుణ సంచలన వ్యాఖ్యలు చేశారు.

కాంగ్రెస్, బీఆర్ఎస్‌ లక్ష్యంగా విమర్శించారు. ఈ రెండు పార్టీల మధ్య లోకానికి తెలియని లోపాయికారి ఒప్పందం ఉందని ఆరోపించారు.. జగిత్యాల (Jagtial) జిల్లా, మెట్‌పల్లి (Metpalli)లో ప్రారంభమైన బీజేపీ (BJP) విజయ సంకల్స యాత్రలో డీకే అరుణ (DK Aruna) పాల్గొన్నారు. ఈ సందర్భంగా ఆమె మాట్లాడుతూ.. ఎన్నికల్లో అబద్ధపు హామీలతో, మోసపూరిత మాటలతో.. కాంగ్రెస్ అధికారంలోకి వచ్చిందని దుయ్యబట్టారు..

రేవంత్ సర్కార్ రాష్ట్ర ప్రజలను మోసం చేస్తూ పబ్బం గడుపుతోందని ధ్వజమెత్తారు. ఆరు గ్యారంటీలను ఆమలు చేసేంత వరకు బీజేపీ పోరాటం ఆగదని పేర్కొన్నారు. మరోవైపు తొమ్మిదిన్నరేళ్లు అధికారంలో ఉన్న బీఆర్ఎస్ (BRS) రాష్ట్రాన్ని ఆర్థికంగా సర్వనాశనం చేశారని మండిపడ్డారు. అక్కర్లేని కాళేశ్వరం ( kaleshwaram) ప్రాజెక్ట్‌కు రూ.లక్షల కోట్లు కుమ్మరించి ప్రజా ధనాన్ని దుర్వినియోగం చేశారని ఘాటు వ్యాఖ్యలు చేశారు..

ప్రతిష్టాత్మక ప్రాజెక్ట్ అంటూ రాష్ట్ర పరువు గంగలో కలిపిన మేడిగడ్డ ప్రాజెక్ట్ అసలు పనికిరాదంటూ కేంద్రం నుంచి వచ్చిన డ్యాం సేఫ్టీ అథారిటీ అధికారులు వెల్లడిస్తున్నారు. అయినా బీఆర్ఎస్ నేతలు సమర్థించుకొంటున్నారు.. ఈ అంశంపై కేసీఆర్, కేటీఆర్, హరీష్ రావు పెదవి విప్పాలని డిమాండ్ చేశారు. మరోవైపు అవినీతి అంటూ గొంతు పగిలేలా అరచిన కాంగ్రెస్.. ప్రస్తుతం అధికారంలోకి వచ్చి రెండున్నర నెలలు గడుస్తున్నా.. కాళేశ్వరం, మేడిగడ్డ ప్రాజెక్టుల అవినీతిపై ఎందుకు సీబీఐ దర్యాప్తునకు ఆదేశించట్లేదని ప్రశ్నించారు. ఇక్కడే కాంగ్రెస్, బీఆర్ఎస్ దోస్తీ బయటపడుతోందని మండిపడ్డారు..

తెలంగాణ బీజేపీ(Telangana BJP) సీనియర్ నేత, కరీంనగర్ ఎంపీ బండి సంజయ్(Bandi Sanjay) చేపట్టిన ప్రజాహిత యాత్ర హుస్నాబాద్‌ నియోజకవర్గంలో ఉద్రిక్తతలకు దారితీసింది. ప్రజాహిత యాత్రపై కాంగ్రెస్ కార్యకర్తలు దాడికి ప్రయత్నించారు. కర్రలు పట్టుకుని ప్రజాహిత యాత్రను అడ్డుకునేందుకు కాంగ్రెస్ కార్యకర్తలు రావడంతో ఉద్రిక్త పరిస్థితి ఏర్పడింది. కాంగ్రెస్ కార్యకర్తల తీరుపై బీజేపీ శ్రేణులు ఆగ్రహం వ్యక్తం చేశాయి.

కాంగ్రెస్ నాయకులు ప్రజాహిత యాత్ర క్యాంపు వైపు రాకుండా పోలీసులు నిలువరించారు. కాంగ్రెస్ నేతలు కర్రలతో వస్తుంటే ఎందుకు అరెస్ట్ చేయడం లేదంటూ బీజేపీ నేతలు ఆగ్రహం వ్యక్తం చేశారు. హుస్నాబాద్ నియోజకవర్గంలో ఎక్కడికక్కడ చెక్ పోస్టులు ఏర్పాటు చేశారు. హుస్నాబాద్ నుంచి గత ఎన్నికల్లో బీజేపీ అభ్యర్థిగా పోటీ చేసిన బొమ్మ శ్రీరాం చక్రవర్తిని ప్రజాహితయాత్ర క్యాంపునకు వెళ్లకుండా పోలీసులు నిలువరిచారు.

మరోవైపు, ప్రజాహిత యాత్రకు అడగడుగునా అడ్డంకులు సృష్టిస్తున్న మంత్రి పొన్నం ప్రభాకర్‌కు సవాల్ విసిరారు బండి సంజయ్. కరీంనగర్ పార్లమెంట్ నియోజకవర్గానికి  ఏం చేశానో ప్రజలకు వివరిస్తూ ఎన్నికల్లోకి వెళ్తున్నట్లు చెప్పారు. కరీంనగర్‌లో తాను ఓడిపోతే రాజకీయ సన్యాసం తీసుకుంటానని, రాజకీయాల నుంచి శాశ్వతంగా తప్పుకుంటానని సంచలన వ్యాఖ్యలు చేశారు.

కాంగ్రెస్ అభ్యర్థి ఓడిపోతే పొన్నం ప్రభాకర్ మంత్రి పదవికి రాజీనామా చేయడానికి సిద్ధమా? అంటూ సవాల్ విసిరారు. ఆరు గ్యారంటీలను అమలు చేయడం చేతగాక ప్రశాంతంగా ప్రజాహిత యాత్ర చేస్తుంటే కాంగ్రెస్ మూకలను పంపి విధ్వంసం సృష్టిస్తున్నారంటూ మండిపడ్డారు. రేవంత్ పొన్నం పట్ల జాగ్రత్తగా ఉండాలని సూచించారు. రాముడు అయోధ్యలోనే పుట్టారని చరిత్ర చెబుతున్నట్లు సాక్షాత్తు సుప్రీంకోర్టు తీర్పు ఇచ్చిందన్నారు బండి సంజయ్.

అయినా ఆధారాల్లేవని వితండ వాదం చేస్తున్న వాళ్లు వారి అమ్మకే పుట్టారనడానికి, తన అమ్మకే తాను పుట్టాననడానికి ఆధారాలేంటని ప్రశ్నించారు. అక్కడున్న నర్స్, డాక్టర్లు చెబితేనే కదా తెలిసేది.. నేనదే చెబుతున్నా అందులో తప్పేముందని బండి సంజయ్ అన్నారు. మీరు మా రాముడిని కించపరిస్తే మేం ఎందుకు భరించాలి? బరాబర్ మాట్లాడతా. రాముడి జన్మస్థలాన్ని, పుట్టుకను ప్రశ్నించే వాళ్లను చెప్పుతో కొట్టండని బండి సంజయ్ ప్రజలకు సూచించారు.

రానున్న వేసవి దృష్ట్యా రాష్ట్రంలో కరువు పరిస్థితులు ఏర్పడే అవకాశముందని మండలి చైర్మన్‌ గుత్తా సుఖేందర్‌రెడ్డి (Gutta Sukhender Reddy) ఆందోళన వ్యక్తం చేశారు. నల్గొండ (Nalgonda)లోని నివాసంలో ఆయన మంగళవారం మీడియా సమావేశంలో మాట్లాడారు. ప్రస్తుతం దురదృష్టవశాత్తు వర్షాలు లేవని తీవ్ర వర్షాభావ పరిస్థితులు వచ్చాయన్నారు.

సాగర్ కింద, ఏఎంఆర్‌పీ, ఆయకట్టు కింద క్రాఫ్ హాలీడేలు ప్రకటించారన్నారు. బోర్లు, బావుల కింద అనేక పంటలు సాగవుతున్నాయన్నారు. భూగర్భ జలాలు అడుగంటి బావులు ఎండిపోయే పరిస్థతి నెలకొందన్నారు. కర్ణాటకలో కాంగ్రెస్ ప్రభుత్వమే ఉన్నందున తెలంగాణ కాంగ్రెస్‌ అక్కడి ప్రభుత్వంతో మాట్లాడి వెంటనే 15టీఎంసీలు నీటిని తరలించాలని డిమాండ్ చేశారు.

ఎండిపోతున్న పంట పొలాలను కాపాడాలని కోరారు. పదేళ్లలో కేసీఆర్‌ నాయకత్వంలోనే ధాన్యం పండించిన రాష్ట్రంగా తెలంగాణ నిలిచిందని చెప్పుకొచ్చారు. రాజకీయ పార్టీలు ప్రజల బాధలను ముందుగానే అర్థం చేసుకొని ఆ దిశగా చర్యలు చేపట్టాలని సూచించారు. కాంగ్రెస్ సర్కార్ వెంటనే సాగు నీటిని విడుదల చేయాలన్నారు.

రాబోయే పార్లమెంట్‌ ఎన్నికల్లో బీఆర్‌ఎస్‌ ఎంపీ అభ్యర్థులుగా ఎవరిని నిలబెట్టినా సహకారం అందిస్తానన్నారు గుత్తా సుఖేందర్‌రెడ్డి. రాజకీయాల్లో గెలుపు ఓటములు సహజమేనన్న ఆయన సమన్వయంతో పని చేస్తేనే ఫలితాలు వస్తాయన్నారు. అన్ని అంశాలను పరిగణలోకి తీసుకుని అభ్యర్థులను పార్టీ నిర్ణయిస్తుందని, ఎవరు గెలిచే అవకాశం ఉంటే వారికే టికెట్లు ఇస్తారని చెప్పారు.