Featured

బంగారు తెలంగాణ (Tealangana).. ఇది కేసీఆర్ (KCR) నినాదం. ఉద్యమ సమయంలో.. ప్రత్యేక రాష్ట్రం ఏర్పడిన సందర్భంలో.. దీన్ని బాగా ప్రమోట్ చేశారు. మెల్లమెల్లగా రాష్ట్రం.. బంగారు తెలంగాణ అవుతోందని చెబుతున్నారు. కానీ, ఇది బంగారు తెలంగాణ కాదు, బాధల తెలంగాణ అనే విమర్శలు వినిపిస్తున్నాయి. సర్కారు బడులు, హాస్టళ్లలో భవనం పెచ్చలూడి విద్యార్థులకు గాయాలు అయిన ఘటనలు చాలానే చూశాం. అయితే.. ప్రభుత్వ కార్యాలయాల్లోనూ ఇదే దుస్థితి నెలకొందని ఓ సంఘటన నిరూపిస్తోంది.

జగిత్యాల (Jagtial) జిల్లా బీర్పూర్ (Beerpur)​ మండల ఎంపీడీవో ఆఫీస్​ కి వెళ్తే అక్కడి ఉద్యోగులు కుర్చీల్లో ఉండి హెల్మెట్స్ (Helmets) తో కనిపిస్తారు. అదేంటి టూ వీలర్ వాహనాలపై వెళ్లేటప్పుడు కదా హెల్మెట్స్ పెట్టుకునేది.. వీళ్లేంటి ఆఫీసులో ఉండి పెట్టుకున్నారని చూసిన ఎవరైనా అవాక్కవ్వకుండా ఉండరు. ఉద్యోగులు చెప్పిన దాని ప్రకారం… 2016 నుంచి ఆఫీస్ పాత భవనంలో కొనసాగుతోంది. ఏడేళ్లుగా కురుస్తున్న వర్షాలకు ఇప్పుడది శిథిలావస్థకు చేరుకుంది. పెచ్చులు ఊడి నెత్తి మీద పడుతున్నాయి.

అజాగ్రత్తగా ఉంటే ఎక్కడ మాడు పగులుతుందో అని ఉద్యోగులు బిక్కుబిక్కుమంటూ హెల్మెట్లు పెట్టుకుని పని చేస్తున్నారు. గతేడాది ఎంపీడీవో కూర్చొని ఉండగా ఆయన టేబుల్‌ పై పెచ్చులు ఊడి పడ్డాయి. ఈ విషయాన్ని ఉన్నతాధికారులకు చెప్తే.. అదనపు కలెక్టర్‌ తక్షణమే ఆఫీస్ ను మార్చాలని ఆదేశించారు. కానీ, ఇంతవరకు కార్యరూపం దాల్చలేదు. ఆఫీస్ లో చిన్న టేబుల్ ను కూడా జరిపింది లేదు.

ఈ ఏడాది రెండుచోట్ల పెచ్చులూడి పడ్డాయి. ఉన్నతాధికారుల తీరుతో విసుగెత్తిన ఉద్యోగులు తమ సమస్యను ఇలా వినూత్న రీతిలో హెల్మెట్లు పెట్టుకుని నిరసన తెలిపారు. మరోవైపు, వర్షానికి నీరు లోపలికి వస్తుండడంతో ఫైళ్లు తడిచిపోతున్నాయని వాపోతున్నారు ఉద్యోగులు. ఇప్పటికైనా ఉన్నతాధికారులు స్పందించి.. కొత్త బిల్డింగ్​ నిర్మించాలని కోరుతున్నారు.

Durgam Cheruvu : హైదరాబాద్ (Hyderabad) నగరానికి ఒకప్పుడు తలమానికంగా ఉన్న దుర్గం చెరువు కాలుష్య భూతంలో చిక్కుకుంటోంది. క్రమంగా అనేక కలుషితాలతో నిండిపోతోంది. ప్లాస్టిక్ కవర్లు, హానికరమైన రసాయనాలు, చివరకు కొకైన్ వంటి మాదకద్రవ్యాలతో ఈ చెరువు కాలుష్య కాసారంగా మారుతోంది. మహీంద్రా యూనివర్సిటీ, ఇండియన్ యూనివర్సిటీ ఆఫ్ టెక్నాలజీ హైదరాబాద్ కు చెందిన నిపుణులు నిర్వహించిన తాజా అధ్యయనంలో ఈ షాకింగ్ విషయం వెల్లడైంది. ‘నాన్ టార్గెట్ స్క్రీనింగ్ ఆఫ్ ఆర్గానిక్ మైక్రోపొల్యుటెంట్స్ ఇన్ దుర్గం చెరువు లేక్’ పేరిట వీరు తమ స్టడీ పేపర్ ను విడుదల చేశారు.

ఈ చెరువు నుంచి గత మార్చిలో మూడు నీటి శాంపిల్స్ సేకరించి వాటిని అధ్యయనం చేశారు. మహీంద్రా యూనివర్సిటీకి చెందిన శ్రీకృష్ణ దుద్దుపూడి నేతృత్వంలో ఈ స్టడీని నిర్వహించారు. ఈ నీటిలో ఆర్గానిక్ సంబంధమైన 183 కాంపౌండ్స్ ఉన్నట్టు గుర్తించారు. వీటిలో ఫార్మాస్యుటికల్స్, హెర్బిసైడ్స్, ఫంగిసైడ్స్, స్టెరాయిడ్స్, పెస్టిసైడ్స్, యువీ ఫిల్టర్స్, సైనోటాగ్జిన్స్, మెటాబొలైట్స్ వంటి హానికారక పదార్థాలున్నట్టు ఈ విశ్లేషణలో తేలింది. ఇవన్నీ మనుషులకు, జంతువులకు అతి ప్రమాదకరమైనవి.

మాదాపూర్, జూబిలీ హిల్స్ తదితర చుట్టుపక్కల ప్రాంతాల్లోని ఇళ్ళు, పారిశ్రామిక సంస్థల నుంచి వచ్చే వృధా నీరు ఈ చెరువులో కలుస్తోందని నగర పర్యావరణ వేత్తలు కూడా ఆందోళన వ్యక్తం చేశారు. సిటీలోని సీవేజ్ ట్రీట్మెంట్ ప్లాంట్లు కేవలం సెట్లింగ్ ట్యాంక్ ని మాత్రమే వినియోగిస్తాయని, కానీ మాదక ద్రవ్యాలను , ఈ విధమైన కాలుష్య కారకాలను తొలగించ జాలవని నరసింహా రెడ్డి అనే నిపుణుడు చెప్పారు.

ఈ కలుషిత జలాలు భూగర్భ జలాల కాలుష్యానికి కూడా కారణమవుతున్నాయన్నారు. ఈ చెరువు చుట్టుపక్కల గల ఆసుపత్రులు తమ వృధా ప్రాడక్టులు ఈ చెరువులోకి చేరకుండా చూడాల్సి ఉందన్నారు. పర్యావరణ పరిరక్షణపై లండన్ లో ఈ వారం జరిగే 13 వ అంతర్జాతీయ కాన్ఫరెన్స్ లో నిపుణులు తమ అధ్యయన పత్రాన్ని సమర్పించనున్నారు.

– హ్యాట్రిక్ పక్కాగా కొడతాం
– ఎవరికి పిండం పెట్టాలో ప్రజలే నిర్ణయిస్తారు
– కాంగ్రెస్ అలవి కానీ హామీలు ఇస్తోంది
– మేం అలాకాదు.. చేయగలిగేది చెప్తాం
– దేశం ఆశ్చర్యపోయేలా ఉద్యోగులకు పేస్కేల్ పెంచుతాం
– త్వరలోనే ప్రభుత్వ ఉద్యోగులకు ఐఆర్ ప్రకటిస్తాం
– ఆర్థిక వనరులు సమకూరగానే మళ్లీ జీతాలు పెంచుతాం
– మా అమ్ములపొదిలో ఇంకా చాలా అస్త్రాలు ఉన్నాయి
– సింగరేణిని నిండా ముంచింది కాంగ్రెస్ పార్టీయే
– రైతుల పంట మొత్తం కొంటున్న ఏకైక రాష్ట్రం మనదే
– ధరణి తీసేస్తాం అనే వారికి ఇంగితం ఉండాలి
– మజ్లీస్-బీఆర్ఎస్ ఎప్పటికీ ఫ్రెండ్లీ పార్టీలే
– అసెంబ్లీలో సీఎం కేసీఆర్ కీలక వ్యాఖ్యలు
హైదరాబాద్, రాష్ట్ర:ధాన్యం దిగుమతిలో పంజాబ్ ను తెలంగాణ అధిగమిస్తోందని సీఎం కేసీఆర్(CM KCR) అన్నారు. ఇతర రాష్ట్రాల కన్నా ఈ విషయంలో మనమే ముందున్నామని ఆదివారం అసెంబ్లీలో మాట్లాడారు. తొమ్మిదేళ్లలో తెలంగాణ పురోగతిపై చర్చకు ఆయన సమాధానమిచ్చారు. ధాన్యాన్ని మిల్లులకు తరలించేందుకు రాష్ట్రంలో లారీలు సరిపోవడంలేదని, తొలి నాళ్ళలోనే 30-40 లక్షల టన్నుల సామర్థ్యం గల గోదాములను నిర్మించామని చెప్పారు. వరదల వల్ల నష్టపోయిన వారిని కాపాడుకుంటామన్నారు. అయితే.. కొన్నాళ్ల క్రితం వర్షాలు, వరదలకు గురైన రైతులు తడిసిపోయిన ధాన్యాన్ని రోడ్లపైనే వేసి తమ గోడు వినిపించుకున్నారు. మొలకలెత్తిన ధాన్యాన్ని ఎవరు కొంటారని వాపోయారు. తడిసిన ధాన్యాన్ని కొనేందుకు ముందుకు రావడం లేదని బావురుమన్నారు. మిల్లర్లు సిండికేట్ గా ఏర్పడి.. ధాన్యం కొనడానికి నిరాకరించడమే గాక.. నాలుగైదు కేజీలకు తక్కువ తూకం వచ్చేట్టు కొనాలని నిర్ణయించడంపై ఫైరయ్యారు. ఇంత జరిగినా ప్రభుత్వం నిర్లక్ష్యం వహించిందనే ఆరోపణలు ఉన్నాయి.

అలవి కాని హామీలను మేం ఎప్పుడూ ఇవ్వం

గత ఏడాది భారీ వర్షాలు, వరదలకు భద్రాచలంలోని లోతట్టు ప్రాంతాలు నీటమునిగాయి. ఆ ప్రాంతాన్ని సందర్శించిన కేసీఆర్.. బాధితులకు ఎన్నో హామీలిచ్చారు. వారికి పక్కా శాశ్వత గృహాలు నిర్మించి ఇస్తామని, ప్రతి కుటుంబానికి తక్షణ సాయంగా 10 వేల రూపాయల ఆర్ధిక సాయం చేస్తామని అన్నారు. ఈ జిల్లాకు వంద కోట్లను కేటాయిస్తామన్నారు. కానీ, ఈ హామీలన్నీ నీటిమీది బుడగలే అయ్యాయనే విమర్శలున్నాయి. ఇప్పుడు మళ్లీ అసెంబ్లీలో వరద బాధితులను ఆదుకుంటామని కేసీఆర్ హామీ ఇచ్చారు. అలాగే, ‘‘రూ.4 వేలు పెన్షన్ పెంచుతామని కాంగ్రెస్ అంటోంది.. తాము రూ.5 వేలు పెంచుతామని అంటాం.. అలా చెప్పడం కాదు.. చేయాలి. అందుకే మేము సాధ్యం అయ్యేదే చెబుతాం.. చేస్తాం. పెన్షన్లు కచ్చితంగా పెంచుతాం.. కానీ, ఒకేసారి పెంచం. కాంగ్రెస్ అలవి కానీ హామీలు ఇస్తోంది. చేయగలిగేది చెప్పాలి.. అలా కాని పక్షంలో ప్రజలు నమ్మరు. మా అమ్ముల పొదిలో ఇంకా చాలా అస్త్రాలు ఉన్నాయి’’ అని అన్నారు సీఎం.

మళ్ళీ అధికారం మాదే

తెలంగాణలో మళ్ళీ అధికారం తమదేనని కేసీఆర్ చెప్పారు. తనకు పిండం పెడతామని కాంగ్రెస్ నేతలు అంటున్నారని, కానీ వచ్చే ఎన్నికల్లో ఎవరికి పిండం పెట్టాలో ప్రజలే నిర్ణయిస్తారన్నారు. ప్రభుత్వం తలచుకుంటే మీ తాట తీసేవాళ్లమేనని, కానీ తాము సంయమనం పాటిస్తున్నామని చెప్పారు. తన చావు మీదకు తెచ్చుకుని తెలంగాణ తెచ్చుకున్నామన్నారు. ఇదే సందర్భంలో దేశంలోనే 24 గంటలు కరెంట్ ఇస్తున్న ఏకైక రాష్ట్రం తెలంగాణ మాత్రమేనని చెప్పిన ఆయన.. ఎంత క్రమశిక్షణ పాటిస్తే 24 గంటల కరెంట్ సాధ్యమవుతుందని ప్రశ్నించారు. 25 వేల మెగావాట్ల విద్యుత్ రాష్ట్రంగా తెలంగాణ అవతరించబోతోందన్నారు. దళిత బంధు గురించి విపక్షాలు ఏనాడైనా ఆలోచించాయా అని కూడా కేసీఆర్ ప్రశ్నించారు. అయితే.. 24 గంటల ఉచిత కరెంట్ అంశంపై వివాదం కొనసాగుతోంది. అన్ని గంటలు ఇవ్వడం లేదని కాంగ్రెస్ నేతలు సబ్ స్టేషన్లకు వెళ్లి లాగ్ బుక్స్ చెక్ చేసి చూపించారు.

ఇస్రో చేబట్టిన చంద్రయాన్-3 (Chandrayan-3) తన అత్యంత ప్రతిష్టాత్మక ‘చంద్ర వ్యోమనౌక’ ను నిన్న చంద్రుడి కక్ష్యలోకి ప్రవేశపెట్టి మరో అద్భుతాన్ని సాధించింది. శనివారం ఇది చంద్రుని ఆర్బిట్ లోకి ప్రవేశించింది. రిట్రో ఫైరింగ్ ద్వారా దీని వేగం నెమ్మదించిందని, నిన్న రాత్రి 7 గంటల సమయంలో చంద్రుని సమీపంలో ఉండే పెరిలూన్ (Perillune) బిందువుకి చేరువైందని ఇస్రో శాస్త్రజ్ఞులు తెలిపారు. అత్యంత సంక్లిష్టమైన ఈ పనిని విజయవంతంగా పూర్తి చేశామని వారు చెప్పారు.

వరుసగా మాక్స్, టెలిమెట్రీ, ట్రాకింగ్, కమాండ్ నెట్ వర్క్ ప్రక్రియలను చేబట్టడం ద్వారా దీన్ని సాధించగలిగామన్నారు. ఇస్రోకిది మరో ఘన విజయం. ల్యూనార్ గ్రావిటీని ఈ నౌక ఆకళింపు చేసుకోగలిగింది. నెమ్మదిగా ఆర్బిట్ లో తన స్థానాన్ని సుస్థిరం చేసుకోవడంలో కృతకృత్యమవుతోంది. ఇక ఇస్రో లక్ష్యం.. దీని వేగాన్ని మరింత తగ్గించి ..సర్క్యులర్ ఆర్బిట్ లోకి అంటే చంద్రుని ఉపరితలంలో సుమారు వంద కి.మీ. దూరంలో చేర్చవలసి ఉంది.

కక్ష్యలో విజయవంతంగా ఈ స్పేస్ క్రాఫ్ట్ (Space Craft) ని ప్రవేశపెట్టడంతోనే సరిపోదని, ల్యాండర్ (Lander) నుంచిదీన్ని వేరు చేసి చందమామ సౌత్ పోల్ (South Pole) .. అంటే దక్షిణ ధృవం వైపు మరల్చవలసి ఉందని ఇస్రో సైంటిస్టులు పేర్కొన్నారు. ఈ దక్షిణ ధ్రువంలో ఐస్, నీరు, ఇతర వనరులు ఉండవచ్చునని ప్రపంచ వ్యాప్తంగా శాస్త్రజ్ఞులు ఇదివరకే అంచనాలు వేసిన నేపథ్యంలో ఇస్రో సైంటిస్టులకు ఇది కూడా పెను సవాలే.. !

చంద్రుని చుట్టూ పరిభ్రమించనున్న ఈ వ్యోమనౌక.. ఈ నెల 23 న చంద్రుని ఉపరితలంపైకి చేరనున్న అద్భుత ఘట్టం ఎప్పుడు ఆవిష్క్రతమవుతుందా అని యావత్ దేశం ఆతృతగా ఎదురు చూస్తోంది. భారత సైంటిఫిక్ మేధో సంపత్తికి సంకేతమవుతున్న వ్యోమనౌక .. ఇతర ప్రపంచ దేశాల్లో దీన్ని ప్రతిబింబింపజేయడానికి ఇక ఎంతో కాలం పట్టబోదు.

– ఆర్టీసీ బిల్లుపై రగడ
– సీఎస్ కు గవర్నర్ లేఖ
– ఐదు అంశాలపై క్లారిటీ కావాలన్న తమిళిసై
– గవర్నర్‌ అభ్యంతరాలపై ప్రభుత్వం వివరణ
– మెరుగైన జీతాలు ఉంటాయని స్పష్టం
– రాజ్ భవన్ ను ముట్టడించిన కార్మికులు
– తొందరపడొద్దు.. మాట్లాడుకుందామన్న గవర్నర్
– తమిళిసైని కలిసిన టీఎంయూ నేతలు

ప్రభుత్వంలో టీఎస్‌ ఆర్టీసీ విలీనం బిల్లు (RTC govt merger Bill) వివాదాలకు దారి తీస్తోంది. గవర్నర్ (Governor Tamilisai)ను టార్గెట్ చేస్తూ.. బీఆర్ఎస్ వర్గాలు విమర్శల దాడి చేస్తుండగా.. కార్మికులు ధర్నాల బాట పట్టారు. శనివారం ఉదయం 6 గంటల నుంచి 8 గంటల వరకు బస్సులు నిలిపివేశారు. ఆ తర్వాత వేల సంఖ్యలో ఆర్టీసీ ఉద్యోగులు రాజ్ భవన్‌ (Raj Bhavan)ను ముట్టడించారు. మొదట వీరిని పోలీసులు విశ్వేశ్వరయ్య విగ్రహం చౌరస్తా వద్ద రాజ్ భవన్ రోడ్డులోకి రాకుండా నిలిపివేశారు. అయినా, బారికేడ్లను తోసుకుంటూ రాజ్ భవన్ వైపు పరుగులు తీశారు కొందరు. దాంతో పోలీసులు రాజ్ భవన్ వద్ద ఉద్యోగులను అడ్డుకున్నారు. దీంతో తీవ్ర ఉద్రిక్తత నెలకొంది.

గవర్నర్ కొందరు నేతల్ని రాజ్ భవన్ లోపలికి అనుమతించడంతో వారు చర్చలు జరిపారు. బయటకు వచ్చాక టీఎంయూ ప్రధాన కార్యదర్శి థామస్‌ రెడ్డి మీడియాతో మాట్లాడారు. కార్మికుల ప్రయోజనాలే తనకు ముఖ్యమని గవర్నర్‌ తమతో అన్నారని తెలిపారు. వారిని ఇబ్బంది పెట్టే ఉద్దేశం తనకు లేదని చెప్పారన్నారు. ప్రభుత్వ వివరణ తర్వాత బిల్లు ఆమోదిస్తామని చెప్పినట్టు వెల్లడించారు. గవర్నర్‌ కు ప్రత్యేకంగా ధన్యవాదాలు తెలుపుతున్నామని పేర్కొన్నారు.

ఇటు ఈ వివాదంపై తమిళిసై, సీఎస్ మధ్య లేఖలు నడిచాయి. విలీన ప్రక్రియకు సంబంధించి గవర్నర్ కొన్ని సందేహాలను వ్యక్తం చేస్తూ.. ప్రభుత్వ ప్రధాన కార్యదర్శి శాంతికుమారికి లేఖ రాశారు. ఆర్టీసీ బిల్లులోని 5 అంశాలపై గవర్నర్ రాష్ట్ర ప్రభుత్వాన్ని వివరణ కోరారు. కేంద్ర గ్రాంట్లు, లోన్లు గురించి వివరాలు లేవని, విభజన చట్టం ప్రకారం ఆర్టీసీ స్థితిని మార్చడంపైనా క్లారిటీ లేదన్నారు. దీనిపై ప్రభుత్వం స్పందించింది. గవర్నర్‌ లేవనెత్తిన అభ్యంతరాలపై వివరణ ఇచ్చింది. ఈ మేరకు కాపీని రాజ్‌ భవన్‌ కు పంపించింది. ఆర్టీసీ కార్మికులకు కార్పొరేషన్‌ కంటే మెరుగైన జీతాలు ఉంటాయని పేర్కొంది. విలీనమైన తర్వాత రూపొందించే గైడ్‌ లైన్స్‌ లో అన్ని అంశాలు ఉంటాయని తెలిపింది. కేంద్ర ప్రభుత్వ వాటా, 9వ షెడ్యూల్‌ సమస్యలను ఆంధ్రప్రదేశ్‌ తీరుగానే పరిష్కరిస్తామని స్పష్టం చేసింది.