Politics

నిన్న సీఎం రేవంత్‌రెడ్డి (CM Revanth reddy) ఉమ్మడి మెదక్ (Medak) జిల్లాకు చెందిన నలుగురు ఎమ్మెల్యేలను కలిసినట్టు.. వారు బీఆర్ఎస్ వీడుతున్నట్లు గుప్పుమన్న వార్తలపై నర్సాపూర్ ఎమ్మెల్యే సునితాలక్ష్మారెడ్డి (MLA Sunithalaxamareddy) స్పందించారు. పార్టీ మారుతున్నట్లు వస్తున్న వార్తలను ఖండించారు.

మెదక్‌ జిల్లా సమస్యలు వివరించేందుకే సీఎం రేవంత్‌రెడ్డిని కలిశామని వివరణ ఇచ్చారు. తాము ఎవరితోనూ చర్చలు జరపడంలేదని, ప్రొటోకాల్, ఎస్కార్ట్ ఇవ్వడం లేదని ఫిర్యాదు చేశామన్నారు. కొందరు కావాలనే తప్పుడు ప్రచారం చేస్తున్నారని ఆగ్రహం వ్యక్తం చేశారు. బీఆర్‌ఎస్‌ (BRS) అధినేత కేసీఆర్‌ (KCR) నాయకత్వంలోనే చివరి వరకు పని చేస్తామని స్పష్టం చేశారు.

మరోవైపు స్పెషల్‌ డెవలప్‌మెంట్‌ ఫండ్స్‌ (SDF) ఇవ్వాలని ఉమ్మడి మెదక్‌ జిల్లాకు చెందిన నలుగురు బీఆర్‌ఎస్‌ ఎమ్మెల్యేలు మంగళవారం సీఎం రేవంత్‌రెడ్డిని కలిశారు. ఈ సందర్భంగా దుబ్బాక ఎమ్మెల్యే కొత్త ప్రభాకర్‌రెడ్డి మాట్లాడారు. ఎస్‌డీఎఫ్‌తో పాటు ప్రొటోకాల్‌ ఉల్లంఘన, గన్‌మెన్ల కుదింపు తదితర అంశాలను సీఎం దృష్టికి తీసికెళ్లినట్టు మీడియాకు వివరించారు.

ఈ క్రమంలో రాష్ట్ర రాజకీయాల్లో ఈ అంశం హాట్ టాపిక్ గా మారింది. దీంతో గులాబీ అధిష్టానం విషయాన్ని ఆరాతీయడం మొదలు పెట్టిందని సమాచారం. కాగా సీఎంను కలిసిన వారిలో పటాన్‌చెరు ఎమ్మెల్యే గుడెం మహిపాల్‌రెడ్డి, నర్సాపూర్‌ ఎమ్మెల్యే సునీతా లక్ష్మారెడ్డి, జహీరాబాద్‌ ఎమ్మెల్యే మాణిక్‌రావు, కొత్త ప్రభాకర్‌రెడ్డి ఉన్నారు. అయితే ఎమ్మెల్యేలు సీఎం ను కలవడంతో.. రాష్ట్రంలో బీఆర్ఎస్ పతనం ఆరంభం అయ్యిందా? అనే అనుమానాలు లేవనెత్తుతోన్నారు..

కేంద్ర ప్రభుత్వం గ్రామాలకు కేటాయించిన నిధులను గత బీఆర్‌ఎస్‌ (BRS) ప్రభుత్వం దారిమళ్లించిందని ఆరోపించిన ఎంపీ బండి సంజయ్‌ (Bandi Sanjay).. ముఖ్యమంత్రి రేవంత్‌రెడ్డి (Revanth Reddy)కి బహిరంగ లేఖ రాశారు. వెంటనే సర్పంచుల పెండింగ్ బిల్లుల విడుదలకు ఉత్తర్వులు ఇవ్వాలని లేఖలో కోరారు.

సర్పంచుల పెండింగ్ బిల్లులను అధికారంలోకి వచ్చిన వెంటనే చెల్లిస్తామని అసెంబ్లీ ఎన్నికల్లో హామీ ఇచ్చిన మీరు.. 50 రోజులు కావస్తున్నా పెండింగ్ బిల్లులపై దృష్టి సారించకపోవడం దురదృష్టకరం అని పేర్కొన్నారు. రాష్ట్ర ప్రభుత్వం తక్షణమే సర్పంచుల సంఘం ప్రతినిధులతో సమావేశం ఏర్పాటు చేయాలి అని బండి డిమాండ్ చేశారు.

అలాగే కాంగ్రెస్‌ పార్టీ ఎన్నికల మేనిఫెస్టోలో హామీ ఇచ్చిన ప్రకారం సర్పంచులతో సహా స్థానిక సంస్థల ప్రజా ప్రతినిధులకు గౌరవ వేతనం పెంచాలని కోరిన ఆయన.. మాజీ సర్పంచులు, ఇతర స్థానిక సంస్థల ప్రతినిధులకు పెన్షన్‌ మంజూరు చేయాలన్నారు. బీఆర్‌ఎస్‌ ప్రభుత్వం హయాంలో జరిగిన అవినీతి గురించి రాష్ట్రం మొత్తం మాట్లాడుకొంటుందని తెలిపిన బండి సంజయ్.. దేశంలో ఏ రాష్ట్రంలో లేని విధంగా పెండింగ్ బిల్లులు ఉన్నాయని.. వీటి కారణంగా సర్పంచులు ఆత్మహత్యలు చేసుకొన్న విషయాన్ని గుర్తు చేశారు.

గ్రామాభివృద్ధి కోసం చేసిన పనులను కూడా ప్రభుత్వ అధికారులు రికార్డు చేయకుండా సర్పంచులను ఇబ్బంది పెడుతున్నారని ఆరోపించారు. ఈ విషయాలపట్ల ప్రభుత్వం శ్రద్ధ వహించి వారికి న్యాయం జరిగేలా చూడాలని పేర్కొన్నారు..

తెలంగాణ (Telangana) రాజకీయాలు రోజు రోజుకు యూ టర్న్ తీసుకొంటున్నాయని అనుకొంటున్నారు. కేటీఆర్ (KTR) తరచుగా కాంగ్రెస్ (Congress)పై విమర్శలు చేస్తుండటం.. బీఆర్ఎస్ అధికారంలో వస్తుందని పదే పదే వల్లెవేయడం రాజకీయాల్లో ఆసక్తికరంగా మారింది. ప్రభుత్వం అన్నాక విజయాలు.. వైఫల్యాలు సర్వసాధారణమే.. అంత మాత్రానికే ప్రభుత్వాన్ని టార్గెట్ చేసి ఒకే పాట పాడటంపై కాంగ్రెస్ నేతలు మండిపడుతోన్నారు.

అయితే కాంగ్రెస్ ప్రభుత్వ మనుగడపై కేటీఆర్ వ్యాఖ్యలు.. పార్టీ నేతలతో అనిపిస్తున్న కామెంట్స్ కు రేవంత్ రెడ్డి (Revanth Reddy) ఘాటుగా స్పందించారు.. అసలు విషయం తెలుసుకొందామని రంగంలోకి దిగినట్టు సమాచారం.. విదేశీ పర్యట నుంచి రాగానే ఉమ్మడి మెదక్ జిల్లాకు చెందిన నలుగురు ఎమ్మెల్యేలను ఆయన కలిసినట్టు తెలుస్తోంది. అయితే కేటీఆర్ చేస్తున్న వాఖ్యలపై మాట్లాడిన వారు.. అలాంటి ఉద్దేశ్యం తమకు లేదని తెలిపినట్టు టాక్ వినిపిస్తోంది. ఇదే అంశంపై ఇంటలిజెన్స్ చీఫ్ శివనాథ్ రెడ్డితో సైతం మాట్లాడినట్టు సమాచారం.

మరోవైపు సీఎంగా బాధ్యతలు చేపట్టిన రేవంత్ రెడ్డి మొదటి రోజే ఇంటలిజెన్స్ చీఫ్ ను నియమించుకొన్నారు. తనకు ఉన్నది నలుగురు ఎమ్మెల్యేల మెజార్టీ అని ఆయనకు తెలుసు. ప్రభుత్వాన్ని కాపాడు కోవాలంటే ఏం చేయాలో సీఎం ముందుగానే వ్యూహాలు రచించిపెట్టుకొన్నట్టు ఇదివరకే ఆయన మాటల్లో సృష్టం చేశారు.. ఈ క్రమంలో కేటీఆర్.. రేవంత్ రెడ్డిని బెదిరించడానికో లేకపోతే తమ పార్టీ కార్యకర్తలకు భరోసా కల్పించడానికో కానీ.. పదే పదే కాంగ్రెస్ ప్రభుత్వం కూలిపోతుందనే ప్రకటనలు చేయడం వారికే ముప్పు అనే విషయాన్ని గ్రహించకపోవడంపై విమర్శలు వస్తున్నాయి.

ఇప్పటికే రాష్ట్రంలో బీఆర్ఎస్ పై నమ్మకం లేని ప్రజలు ఎన్నికల్లో దూరం పెట్టారనే ప్రచారం జరుగుతోంది. ఈ నేపథ్యంలో కేటీఆర్ మాటలు రాజకీయ విశ్లేషకులు సైతం నవ్వుకునేలా ఉన్నాయని అనుకొంటున్నారు.. ఇక పార్లమెంట్ ఎన్నికల ఫలితాల తర్వాత బీఆర్ఎస్ పరిస్థితిపై ఓ క్లారిటీ ఉంటుందనే వాదన వినిపిస్తుంది. ఆ నలుగురు మాత్రమే మిగులుతారా? అనే అనుమానాలు సైతం కొందరు వెల్లడిస్తున్నారు. ఇలాంటి సమయంలో పార్టీని కాపాడుకోవాలి కానీ నోరు జారీ ప్రభుత్వాన్ని విమర్శిస్తే లాభం ఏంటని కొందరు ప్రశ్నిస్తున్నారు..

కాంగ్రెస్‌ సీనియర్‌ నాయకులు వి.హనుమంతరావు (V.Hanumantha Rao) ఈ మధ్యకాలంలో బీజేపీని టార్గెట్ చేసినట్టు ఉన్నారని ఆయన విమర్శలు వింటున్న వారు అనుకొంటున్నారు. ఇదివరకే అయోధ్య (Ayodhya)లో బాల రాముడి విగ్రహ ప్రాణ ప్రతిష్ట వేడుకు సంబంధించి, భద్రాచలం రాముడికి ఆహ్వాన పత్రిక అందక పోవడంపై ఘాటుగానే స్పందించిన వీహెచ్.. తాజాగా మరోసారి విరుచుకుపడ్డారు..

రాముడిని ఆయుధంగా మార్చుకొని పార్లమెంట్ ఎన్నికల్లో గెలవాలని బీజేపీ (BJP) చూస్తోందని ఆరోపించారు. ప్రజల్లో రాహుల్ గాంధీ (Rahul Gandhi)కి వస్తున్న ఇమేజ్ చూసి బీజేపీ ఓర్వలేక పోతోందని అన్నారు. మీరు ఎన్ని ప్రయత్నాలు చేసిన కాంగ్రెస్ (Congress) ప్రవాహాన్ని ఆపలేరని తెలిపారు. చేసిన అభివృద్ధి లేదు కానీ.. హిందు ఓట్ల మీదనే బీజేపీకి ప్రేమని వీహెచ్ మండిపడ్డారు.

రాముడు మీ ఒక్కడికే దేవుడా అని ఘాటు వ్యాఖ్యలు చేసిన హనుమంతరావు.. మోడీ (Modi) అన్ని దేవాలయాలు తిరగవచ్చు.. కానీ రాహుల్ గాంధీకి మాత్రం ఆలయాలకు వెళ్లాలంటే అనుమతి అవసరమా?.. అని ప్రశ్నించారు. మీరు పిలిచినప్పుడే గుడికి పోవాలా అని మండిపడ్డారు. అయోధ్యలో ఉన్న దేవుడే రాముడా?.. భద్రాచలంలో ఉన్నది రామయ్య కాదా అని బీజేపీపై విరుచుకుపడ్డారు.

నాకంటే ఎక్కువ రామ భక్తులు ఉన్నారా?.. అని పేర్కొన్న వీహెచ్.. రాహుల్ గాంధీని అస్సాం సీఎం హేమంత్ బిశ్వ.. రావణుడు అనడాని తీవ్రంగా ఖండిస్తున్నానన్నారు. మోడీ రాముడా.. రాహుల్ గాంధీ రావణుడా.. ఇది ఏం న్యాయమని మండిపడ్డారు. వందల మంది మహిళలు మణిపూర్‌లో చనిపోతే మోడీ వెళ్ళలేదు.. కానీ పార్లమెంట్ ఎన్నికల కోసం.. హిందూ ఓట్లు రాబట్టుకోవాలనే ఆలోచనతో అయోధ్య అంశాన్ని తెరమీదికి తెచ్చారని ఆరోపించారు..

రెవెన్యూ శాఖ మంత్రి పొంగులేటి శ్రీనివాసరెడ్డి (Ponguleti Srinivas Reddy) సచివాలయంలో ధరణి కమిటీతో (Dharani Committee) భేటీ అయ్యారు. ఇందులో భాగంగా మధ్యంతర నివేదికపై మంత్రి పొంగులేటితో కమిటీ సభ్యులు చర్చించారని తెలుస్తోంది. రేపు సిద్దిపేట, మెదక్ సహా నాలుగు జిల్లాల కలెక్టర్లతో ధరణి కమిటీ భేటీ కానుంది.

ఈ క్రమంలో క్షేత్రస్థాయి భూ సమస్యలపై కమిటీ సభ్యులు ఆరా తీయనున్నారు.అనంతరం మధ్యంతర నివేదికను సిద్ధం చేసి మంత్రి పొంగులేటికి ఇవ్వనున్నారు. ఆ తరువాత కమిటీ ఇచ్చిన మధ్యంతర నివేదికపై సీఎం రేవంత్ రెడ్డి (CM Revanth Reddy)తో మంత్రి పొంగులేటి చర్చించనున్నట్లుగా సమాచారం. కాగా ధరణి సమస్యలపై తక్షణ పరిష్కారం కోసం మధ్యంతర నివేదికను కమిటీ సభ్యులు రూపొందించనున్న విషయం తెలిసిందే.

ధరణి పోర్టల్ లో సులభంగా రిజిస్ట్రేషన్ చేసుకోవడం ఎంత ముఖ్యమో, ఇబ్బందులు రాకుండా చూసుకోవడమూ కూడా అంతే ముఖ్యమని తెలిపిన కమిటీ.. ఏ సమస్యనూ పరిష్కరించదని, నివేదికను మాత్రమే సిద్ధం చేస్తుందని వివరించారు. వివిధ రాష్ట్రల యొక్క రెవెన్యూ విధి విధానాలను మాత్రమే ఈ కమిటీ పరిశీలిస్తుందని తెలిపారు. ప్రజలు ఇబ్బందులు పడకుండా సాఫ్ట్‌వేర్‌తో పాటు చట్టాల్లో ఎలాంటి మార్పుచేర్పులు చేయవచ్చనే అంశాలపై ప్రభుత్వానికి నివేదిక ఇస్తామని కమిటీ సభ్యులు తెలిపారు.