Politics

నారాయణపేటలో నిర్వహించిన కాంగ్రెస్‌ జనజాతర సభ (Jana Jathara Sabha)కు ముఖ్య అతిథిగా విచ్చేసిన రేవంత్​ రెడ్డి, ప్రతిపక్షాలపై తీవ్రంగా విరుచుకుపడ్డారు. కేసీఆర్ తెలంగాణ ఆత్మగౌరవాన్ని మోదీ కాళ్ల వద్ద తాకట్టుపెట్టారని ఆరోపించారు. బీఆర్​ఎస్​ ఓట్లన్నీ బీజేపీకు మళ్లించాలని, కేసీఆర్ వెల్లడించడం సరైనదేనా అని ప్రశ్నించారు.. అలాగే ముదిరాజ్​లను బీసీ-డీ నుంచి బీసీ- ఏ గ్రూప్​లోకి మార్చేందుకు, సుప్రీంకోర్టులో కేసు గెలిచేలా పోరాడతామని తెలిపారు.

మాదిగల వర్గీకరణ జరగాల్సిందేనన్న సీఎం.. భవిష్యత్​లో మాదిగలకు మరిన్ని పదవులు ఇస్తామని పేర్కొన్నారు.. రాష్ట్రంలో 10శాతంగా ఉన్న ముదిరాజ్‌లకు కేసీఆర్‌ (KCR) పదేళ్ల పాలనలో ఒక్క టికెట్‌ కూడా ఇవ్వలేదని విమర్శించారు. కేసీఆర్‌ పదేళ్లలోనే వందేళ్ల విధ్వంసాన్ని సృష్టించారని మండిపడ్డారు.. నారాయణపేట మున్సిపాలిటీకి భూగర్భ డ్రైనేజీ మంజూరు చేస్తామని ఈ సందర్భంగా హామీ ఇచ్చారు.

పాలమూరు బిడ్డ, పేదోడి బిడ్డ సీఎం అయితే దొరలు ఓర్వలేకపోతున్నారని విమర్శించిన రేవంత్.. దొరలు మాత్రమే కుర్చీల్లో కూర్చోవాలా, పేద బిడ్డలు కూర్చోవద్దా అంటూ నిలదీశారు. వందరోజులకే తనని గద్దె దించాలని అంటూన్న కేసీఆర్.. పదేళ్లుగా అధికారంలో ఉన్న ప్రధాని మోడీని (PM Modi) గద్దె దించాలని ఎందుకు అనడం లేదని ప్రశ్నించారు. రేవంత్‌ రెడ్డిని ఊడగొట్టాలని బీజేపీ జాతీయ ఉపాధ్యక్షురాలు డీకే అరుణ అంటున్నారని మండిపడ్డారు..

ఆగస్టు 15 నాటికి 2 లక్షల రుణమాఫీ చేస్తామన్న రేవంత్ (Revanth), ఎన్నికల కోడ్‌ ఉన్నందునే రుణమాఫీ చేయలేకపోయామని తెలిపారు. వచ్చేసారి వడ్లకు రూ.500 బోనస్‌ తప్పకుండా ఇస్తామని ప్రకటించారు. మరోవైపు కొడంగల్​ నారాయణపేట ఎత్తిపోతల పథకాన్ని పూర్తి చేసానో, ఆర్టీసీ ఉచిత ప్రయాణం కల్పించానో అదేవిధంగా ఏకకాలంలో, ఏక మొత్తంలో మీకు రుణమాఫీ చేసే బాధ్యత నాదని పేర్కొన్నారు..

గడిచిన పదేళ్లలో కేసీఆర్‌ ఎంతమందికి డబుల్​ బెడ్​రూం ఇళ్లు ఇచ్చారో చెప్పాలని రేవంత్‌ డిమాండ్‌ చేశారు. కాంగ్రెస్‌ ప్రభుత్వం రాగానే నియోజకవర్గానికి 3,500 చొప్పున ఇళ్లు మంజూరు చేశామని వివరించారు.. ఒక్కో ఇంటికి రూ.5 లక్షలు కేటాయించామని తెలిపారు. అదేవిధంగా బీసీలకు జనాభా దామాషా ప్రకారం నిధులివ్వాలనే ఉద్దేశంతో, బీసీ కులగణనకు తీర్మానం చేశామని వెల్లడించారు..

మెదక్ (Medak) పార్లమెంట్ పరిధిలో ఎన్నికల ప్రచారం రణరంగాన్ని తలపిస్తోంది. బీఆర్ఎస్ (BRS) అభ్యర్థి వెంకట్రామిరెడ్డి, బీజేపీ (BJP) అభ్యర్థి రఘునందన్ రావు విమర్శలతో ఢి కొంటున్నారు.. ఈ నేపథ్యంలో ఎన్నికల ప్రచారంలో భాగంగా గజ్వేల్ పట్టణంలో బీజేపీ అభ్యర్థి రఘునందన్ రావు పర్యటించారు. ఈ క్రమంలో స్థానిక కోట మైసమ్మ ఆలయం నుంచి ఇంద్ర పార్క్ చౌరస్తా దాకా రోడ్ షో లో పాల్గొన్నారు..

ఈ సందర్భంగా వెంకట్రామిరెడ్డి పై సంచలన వ్యాఖ్యలు చేశారు. గజ్వేల్ ప్రజలకు డబల్ బెడ్రూం లేవు కానీ ఆయన ఇంట్లో 30 డబల్ బెడ్రూంలు ఉన్నాయని ప్రచారం జరుగుతున్నట్లు పేర్కొన్నారు.. ప్రజలను రోడ్డు పాలు చేసి ఆయన మాత్రం రాజ్ పుష్పలో ఇండ్లు కట్టుకోని వైభోగాలు అనుభవిస్తున్నారని విమర్శించారు.. పదేళ్లు కలెక్టర్ గా ఉండి రింగ్ రోడ్డు పక్కన పది ఎకరాలు కొన్నాడని రఘునందన్ ఆరోపణలు చేశారు..

మామ అల్లుడు 10 ఏండ్లు అధికారంలో ఉండి ప్రజలకు ఏం చేశారో తెలుపాలని డిమాండ్ చేసిన రఘునందన్.. ఎమ్మెల్సీ గా ఉన్నప్పుడు వంద కోట్లు ఇయ్యనోడు ఇప్పుడు ఇస్తా అని ప్రజల చెవి లో పువ్వు పెడుతుండని మండిపడ్డారు.. అలాగే రేవంత్ రెడ్డి రైతులకు 2 లక్షలు ఇస్తానని చెప్పి ఇయ్యలేదు కానీ 20 సార్లు ఢిల్లీకి పోయిండని అన్నారు.. హోలీ పండగ రోజు చెంగి చెర్లలో సంబరాలు జరుపుకుంటున్న వారి పై ఓ మతానికి చెందిన వారు దాడి చేయడం సమంజసమా అని ప్రశ్నించారు.

మన ఊర్లో మన ఇంటి దగ్గర పండగ చేసుకుంటే ఇలా జరిగితే భవిష్యత్తులో ఏమైతదో మనం ఆలోచించుకోవాలని సూచించారు.. దేశంలో నూటికి 80 శాతం జనాభా ఉన్నా మనం నోరు మూసుకొని ఉండాలంటా, నూటికి 10 శాతం ఉన్నా వాళ్ళు మాత్రం పండగలు చేసుకోవాలంటా అని రఘునందన్ ధ్వజమెత్తారు.. రైతులకు కొరత లేకుండా ఎరువులు ఇస్తున్న మోడీ ప్రభుత్వంపై విమర్శలు చేయడం తగదని సూచించారు..

మరోవైపు వెంకట్రామిరెడ్డి (Venkatrami Reddy)లా తులం బంగారం ఇయ్యలేను కానీ మీ పిల్లల భవిష్యత్తు కోసం పోరాడుతానని తెలిపిన రఘునందన్ (Raghunandan).. తెలంగాణ ఉద్యమకారులకు కాకుండా కేసీఆర్ (KCR) కాళ్ళు మొక్కి ఫ్రీగా ఎమ్మెల్సీ పదవి దక్కించుకొన్నారని ఆరోపించారు..

లోక్​సభ ఎన్నికల నేపథ్యంలో భద్రాద్రి (Bhadradri) సీతారాముల కల్యాణ (Sitaramula Kalyanam) ఘట్టాన్ని లైవ్​ ఇవ్వొద్దని ఈసీ ఇటీవల ప్రభుత్వానికి ఆదేశాలు ఇచ్చిన సంగతి తెలిసిందే.. కాగా ఈ విషయంలో స్పందించిన దేవాదాయ శాఖ మంత్రి కొండా సురేఖ (Konda Surekha).. ఈ కల్యాణాన్ని ప్రభుత్వం తరఫున ప్రత్యక్షప్రసారం చేసేందుకు అనుమతి ఇవ్వాలంటూ సీఈవో వికాస్​రాజ్​కు లేఖ రాశారు.

ఈ అంశంపై మరోసారి పరిశీలించి, అనుమతించాలంటూ కోరారు. మరోవైపు ఈ నెల 17న శ్రీరామ నవమి రాష్ట్ర వ్యాప్తంగా ఘనంగా నిర్వహించనున్నారు.. అయితే ఎన్నికల కోడ్ అమలులో ఉన్న క్రమంలో భద్రాద్రి రామయ్య కళ్యాణం ప్రత్యక్ష ప్రసారం చేయరాదని ఈసీ ఈ నెల 4న ప్రభుత్వానికి స్పష్టం చేసింది. ఇదిలా ఉండగా శ్రీ సీతారామచంద్రస్వామి కల్యాణం దేశ ప్రజలు, ముఖ్యంగా తెలుగు రాష్ట్రాల భక్తుల మనోభావాలకు సంబంధించిన అంశం..

అదీగాక సుమారు నలభై ఏళ్లుగా రామయ్య కళ్యాణ ఘట్టాన్ని ప్రత్యక్షప్రసారం చేయడం సంప్రదాయంగా ఉందని మంత్రి ఈసీకి వివరించారు. అలాగే ఈ కల్యాణ మహోత్సవం ప్రత్యక్ష ప్రసారాన్ని దేశ, విదేశాల్లోని లక్షల మంది వీక్షిస్తారని తెలిపారు. సుమారు నాలుగు వందల సంవత్సరాలుగా భద్రాచలం ఆలయం విశిష్టత, ఆచార సంప్రదాయాలు సమాజంలో అంతర్లీనమయ్యాయని పేర్కొన్నారు..

అందుకే స్వామివారి కల్యాణ మహోత్సవం ప్రత్యక్ష ప్రసారానికి అనుమతివ్వాలని సీఈవోను మంత్రి కొండా సురేఖ కోరారు. మరోవైపు రామయ్య కల్యాణ ఘడియలు దగ్గర పడుతున్న వేళ, భద్రాద్రి ఆలయం సర్వాంగ సుందరంగా ముస్తాబవుతోంది. దేశంలోనే రెండో అయోధ్యగా పేరుగాంచిన భద్రాచలం సీతారాముల కల్యాణం వీక్షించడానికి దేశంలోని వివిధ ప్రాంతాల నుంచి భక్తులు వేల సంఖ్యలో ఇక్కడికి వస్తారు..