Politics

లోక్ సభ ఎన్నికలు సమీపిస్తున్న కొద్ది.. పార్టీలు ముందు చూపుతో వ్యవహరించడం కనిపిస్తోంది. ఇప్పటికే బీఆర్ఎస్ (BRS) అధినేత కేసీఆర్ (KCR), ఆర్‌ఎస్‌ ప్రవీణ్‌కుమార్ (RS Praveen Kumar)తో చర్చలు జరిపిన విషయం తెలిసిందే.. ఇదే సమయంలో రాబోయే లోక్‌సభ సార్వత్రిక ఎన్నికల్లో బీఎస్పీ (BSP) ఒంటరిగానే పోటీ చేస్తుందని మాయవతి (Mayawati) ఎక్స్ వేదికగా స్పష్టం చేశారు..

అయితే ఈ ట్వీట్ రాజకీయాల్లో ఆసక్తికరంగా మారి చర్చలు జరుపుకొనే వరకు వెళ్ళింది. దీంతో బీఎస్పీ పొత్తుల విషయంలో జరుగుతున్న ప్రచారంపై ప్రవీణ్ కుమార్ స్పందించారు. పార్టీ అధినేత్రి మాయవతి చేసిన ట్వీట్ సారాంశాన్ని అర్థం చేసుకోకుండా, తప్పుడు ఊహాగానాలు చేయటం సరికాదని సూచించారు. గతంలో చాలా సార్లు తాము ఏ జాతీయ పార్టీతో పొత్తు పెట్టుకోబోమని ఎన్డీఏ, ఇండియా కూటముల్లో ఉండబోమని తమ నాయకురాలు స్పష్టం చేసినట్లు గుర్తు చేశారు..

యూపీలో ఒంటరిగా పోటీ చేస్తామని మాయవతి చెప్పారని, అంతే తప్ప ఏ కూటమిలో లేని పార్టీలతో కలసి పనిచేయడం గురించి ఆమె ప్రస్తావించలేదని క్లారిటీ ఇచ్చారు. గతంలో మధ్యప్రదేశ్, పంజాబ్‌లో ఏ జాతీయ కూటమిలో లేని ప్రాంతీయ పార్టీలతో జరిగినట్టుగానే, తెలంగాణలో బీఆర్ఎస్, బీఎస్పీ పొత్తు కోసం ఇటీవల జరిగిన చర్చలకు తమ పార్టీ నాయకత్వం అనుమతి ఉందన్నారు. సీట్ల పంపకంపై స్పష్టత వచ్చే దాకా చర్చలు కొనసాగుతాయని ఆర్ఎస్. ప్రవీణ్‌ స్పష్టం చేశారు.

మరోవైపు నిన్న బీఎస్పీ పూర్తి సన్నద్ధత, సొంత బలంతో పోరాడుతుందని మాయవతి ప్రకటించారు. ప్రత్యేకించి యూపీలో ఎన్నికల్లో బీఎస్పీ ఒంటరిగా పోటీ చేయడం వల్ల ప్రతిపక్షాలు చాలా అశాంతికి గురవుతున్నాయని అన్నారు. అయితే బహుజన వర్గాల ప్రయోజనాలు దృష్టిలో ఉంచుకుని ఒంటరిగా ఎన్నికల్లో పోటీ చేయాలని బీఎస్పీ నిర్ణయించిందని స్పష్టం చేశారు.

తెలంగాణ (Telangana)లో కాంగ్రెస్ (Congress) అధికారంలోకి వచ్చినప్పటి నుంచి ప్రభుత్వంపై.. సీఎం రేవంత్ రెడ్డి (CM Revanth Reddy)పై బీఆర్ఎస్ (BRS) నేతలు తీవ్ర విమర్శలు చేస్తున్న విషయం తెలిసిందే. ముఖ్యంగా కాంగ్రెస్ ప్రభుత్వం ఎక్కువ రోజులు ఉండదనే మాటలు ఎక్కువగా వినిపిస్తున్నాయి.. ఈ నేపథ్యంలో తాజాగా మాజీ ఎమ్మెల్యే బాల్క సుమన్ (Balka Suman) సంచలన వ్యాఖ్యలు చేశారు.

నేడు తెలంగాణ భవన్‌లో మీడియాతో మాట్లాడిన బాల్క సుమన్.. పార్లమెంట్ ఎన్నికలు జరిగిన తర్వాత రేవంత్ రెడ్డి బీజేపీలోకి వెళ్తాడని సెన్సేషనల్ కామెంట్స్ చేశారు. ఇటీవల రాష్ట్రానికి వచ్చిన ప్రధాని మోడీని.. రేవంత్ రెడ్డి పెద్దన్న అన్నప్పుడే ఈ విషయం తెలిసిపోయిందన్నారు. పార్లమెంట్ ఎన్నికల ముగియగానే రేవంత్ రెడ్డి మరో ఏక్ నాథ్ షిండే, హేమంత్ బిశ్వశర్మ కావడం ఖాయమని షాకింగ్ కామెంట్స్ చేశారు

అదీగాక బేగంపేట విమానాశ్రయంలో ఇటీవల కలుసుకొన్న గురు శిష్యులు చంద్రబాబు, రేవంత్ రెడ్డి మధ్య రెండు గంటల పాటు చర్చ జరిగిందని ఆరోపించారు. 2019లో పార్లమెంట్ ఎన్నికల్లో టీడీపీ ఓటమి తరువాత చంద్రబాబు ఆయన అనుచరులను బీజేపీలోకి పంపించారని ఆరోపించిన బాల్క సుమన్.. రేవంత్ ను సైతం బీజేపీలోకి పంపించేందుకు రెడీగా ఉన్నాడని విమర్శించారు.

రేవంత్ రెడ్డి మా శిష్యుడేనని.. మీరూ ఒకే అంటే బీజేపీలోకి తీసుకుని వస్తానని చంద్రబాబు, మోడీకి హామీ ఇచ్చాడని ఎద్దేవా చేశారు. గురు శిష్యుల బంధం బీజేపీ కోసం కృషి చేస్తున్నాయని మండిపడ్డారు. ఈ సందర్భంగా రేవంత్ రెడ్డితో మీకూ పెను ప్రమాదం చోటు చేసుకోబోతోందని, కాంగ్రెస్ సీనియర్ నేతలకు హెచ్చరించాడు. రాబోయే పార్లమెంట్ ఎన్నికల్లో కాంగ్రెస్ పార్టీకి ఓటు వేస్తే బీజేపీకి వేసినట్లేనని పేర్కొన్నారు..

ప్రస్తుతం తెలంగాణ (Telangana)లో 200 యూనిట్ల ఉచిత విద్యుత్ గురించే ముచ్చటించుకొంటున్నారు. అయితే కొందరికి మాత్రం జీరో బిల్లులు రావడం లేదు. గతంలో వచ్చినట్లుగా విద్యుత్ బిల్లులు వస్తున్నాయి. అయితే ఈ విషయంలో డిప్యూటీ సీఎం మల్లు భట్టి విక్రమార్క (Mallu Bhatti Vikramarka) క్లారిటీ ఇచ్చారు. బిల్లులు వచ్చిన వారు.. తమ ఆధార్ కార్డు, రేషన్ కార్డు, విద్యుత్ బిల్లుల కాపీలతో ఎంపీడీవో ఆఫీసులో దరఖాస్తు చేసుకోవాలని సూచించారు.

నేడు అధికారులతో సచివాలయంలో సమీక్ష జరిపిన భట్టి.. తెలంగాణలో కరెంటు డిమాండ్ బాగా పెరిగిందని.. రాష్ట్రంలో కరెంటు కష్టాలు రాబోతున్నాయని అసత్య ప్రచారం చేస్తున్నారని తెలిపారు. ఇలాంటి అపోహాల్ని నమ్మోద్దని ప్రజలకు సూచించారు. అదేవిధంగా గత ప్రభుత్వ పెద్దలు కాంగ్రెస్ (Congress) వస్తే కరెంటు ఉండదని మభ్యపెట్టే ప్రకటనలు చేశారని గుర్తు చేశారు.. వారికంటే ఇప్పుడే కరెంట్ సరాఫరా బాగుందని అన్నారు..

మరోవైపు గత ప్రభుత్వం సరఫరా చేసిన దానికంటే ఎక్కుడ కరెంట్ డిసెంబర్ నుంచి సరఫరా చేస్తున్నామని తెలిపిన డిప్యూటీ సీఎం.. 2022 డిసెంబర్ లో 200 మిలియన్ యూనిట్లు వాడితే, 2023 డిసెంబర్ 207.07 మిలియన్ యూనిట్లు సరఫరా చేశామని వెల్లడించారు. ఇక కరెంట్ బిల్లుల విషయంలో రాష్ట్ర ప్రజలంతా నిశ్చింతగా ఉండాలని సూచించారు. ఈ విషయంలో ఎంత డిమాండ్ ఉన్నా ఎదుర్కోనేందుకు సిద్ధంగా ఉన్నామని తెలిపారు.

ఈ నెలలో 200 యూనిట్లలోపు ఉన్న వారికి బిల్లు వస్తే వారు ఆ బిల్లు కట్టాల్సిన అవసరం లేదని భరోసా భట్టి ఇచ్చారు. ప్రజాపాలన దరఖాస్తులో వివరాలు తప్పుగా నమోదు చేయడం వల్ల ఇలా జరిగి ఉండొచ్చని, ఆ బిల్లుతో పాటు రేషన్ కార్డు తీసుకెళ్లి ఎంపీడీఓ ఆఫీస్ నందు నమోదు చేయించుకుంటే జోరో బిల్లు వస్తుందని తెలియజేశారు. ఇక కాంగ్రెస్ ప్రభుత్వం ప్రకటించిన ఆరు గ్యారంటీల్లో ఇప్పటి వరకు నాలుగు పథకాలను ప్రారంభించారు.

కాళేశ్వరం (Kaleshwaram) ప్రాజెక్టు క్షేత్రస్థాయి పర్యటన అనంతరం ఎన్డీఎస్ఏ (NDSA) నిపుణుల కమిటీ ఇవాళ జలసౌధ (Jalasauda)లో సమావేశం నిర్వహించిది. ఈ సమావేశానికి ఇరిగేషన్ అధికారులు, ఇంజినీర్లు, ఏజెన్సీల ప్రతినిధులు, రిటైర్డ్ అధికారులు అందరూ హాజరు కావాలని స్పష్టం చేసింది. వీరందరితో ప్రాజెక్టుపై చర్చించిన అనంతరం ఢిల్లీ (Delhi) వెళ్లనుంది.

మేడిగడ్డ సహా అన్నారం (Annaram), సుందిళ్ల (Sundilla) ఆనకట్టలపై అధ్యయనం కోసం రాష్ట్ర పర్యటనకు వచ్చిన చంద్రశేఖర్ అయ్యర్ నేతృత్వంలోని కమిటీ, రెండు రోజుల పాటు మూడు ఆనకట్టలను పరిశీలించింది. ఆనకట్టలకు సంబంధించిన పరీక్షలు, డిజైన్స్, నిర్మాణం, నాణ్యత, ఆపరేషన్ అండ్ మెయింటనెన్స్ అంశాలపై అధ్యయనం చేసింది. మేడిగడ్డ ఆనకట్టలో (Medigadda) కుంగిన పియర్స్, పగుళ్లు, దెబ్బతిన్న ప్రాంతాల్ని పరిశీలించింది.

అన్నారం ఆనకట్టలో సీపేజీ వచ్చిన ప్రాంతంతో పాటు సుందిళ్ల ఆనకట్టను కూడా ఈ బృందం పరిశీలించారు. అనంతరం నేడు హైదరాబాద్ జలసౌధలో నీటి పారుదల శాఖ అధికారులు, ఇంజినీర్లు, ఏజెన్సీలతో సమావేశమయ్యారు. 2016 నుంచి ఆనకట్టల బాధ్యతలు నిర్వర్తించిన ఇంజినీర్లను, బదిలీ అయిన, పదవీ విరమణ చేసిన వారు కూడా సమావేశానికి రావాలని స్పష్టం చేశారు.

ముందుగా మేడిగడ్డ బ్యారేజీని పరిశీలించిన బృందం, ఆనకట్ట కుంగుబాటుకు ఏమేరకు ఉందన్నదీ నిశితంగా పరిశీలించారు. బ్యారేజీ దిగువకు వెళ్లి, 7వ బ్లాక్​లోని 19, 20, 21 పియర్ల కుంగుబాటుకు దారితీసిన కారణాలను బృందం సమగ్రంగా అధ్యయనం చేశారు.మరోవైపు ఎన్టీఎస్ఏ కమిటీ బ్యారేజీలో స్థితిగతులపై, మరమ్మతుల సాధ్యసాధ్యాలపై నాలుగు నెల్లలో రాష్ట్ర ప్రభుత్వానికి నివేదిక సమర్పించనుంది. కాగా ప్రాథమిక నివేదిక ఆధారంగానే మరమ్మతులతో పాటు బాధ్యులపై చర్యలు తీసుకోవాలని ప్రభుత్వం భావిస్తున్నట్లు సమాచారం..